Anil Ravipudi: జీవీని పాతేసిన అనిల్ రావిపూడి... ప్రమోషన్లు మొదలెట్టేశార్రో

Anil Ravipudi - GV Prakash Kumar: అనిల్ రావిపూడి మార్క్ ప్రమోషనల్ వీడియోలు మ్యూజిక్ డైరెక్టర్ అనౌన్స్‌మెంట్‌ నుంచి మొదలైంది. జీవీ ప్రకాష్ కుమార్ పుట్టినరోజు సందర్భంగా ఓ వీడియో విడుదల చేశారు.

వెంకటేష్ - కళ్యాణ్ రామ్ - అనిల్ రావిపూడి సినిమాకు సంగీత దర్శకుడిగా జీవీ ప్రకాష్ కుమార్

Source : https://www.youtube.com/watch?v=PcpRsv8dMxQ

Show Quick Read

Key points generated by AI, verified by newsroom

• వెంకటేష్, అనిల్ రావిపూడి ఐదవ సినిమాకు జీవీ ప్రకాష్ కుమార్ సంగీతం.
• అనిల్ మార్క్ ప్రమోషన్‌తో సంగీత దర్శకుడు, గేయ రచయిత పరిచయం.
• కల్యాణ్ రామ్, కీర్తి, కృతి నటిస్తున్న సినిమా జూన్ 22న షూటింగ్.
• ఈ సినిమా వచ్చే ఏడాది సంక్రాంతికి విడుదల కానుంది.

సినిమాను ప్రమోట్ చేయడంలో హిట్ మెషీన్ అనిల్ రావిపూడి (Anil Ravipudi) స్టయిలే సపరేటు. ఈ సంక్రాంతికి వచ్చిన 'మన శంకర వరప్రసాద్ గారు', అంతకు ముందు పెద్ద పండక్కి వచ్చిన 'సంక్రాంతికి వస్తున్నాం' ప్రమోషన్స్ చూశారుగా... ఏ సందర్భాన్ని అసలు వదల్లేదు. ఇప్పుడు విక్టరీ వెంకటేష్ (Venkatesh) హీరోగా అనిల్ రావిపూడి దర్శకత్వంలో తెరకెక్కబోయే ఐదో సినిమా (Venky Anil 5)కు కూడా తన మార్క్ ప్రమోషన్ స్టార్ట్ చేశారు దర్శకుడు.

వెంకీ అనిల్ 5కు సంగీత దర్శకుడిగా జీవీ!
జీవీ ప్రకాష్ కుమార్... తెలుగు ప్రేక్షకులకు సైతం పరిచయం అవసరం లేని సంగీత దర్శకుడు. ఏఆర్ రెహమాన్ మేనల్లుడు అని అందరికీ పరిచయమైన ఆయన... తక్కువ సమయంలో సంగీత దర్శకుడిగా తనకంటూ సపరేట్ స్టైల్, మార్క్ క్రియేట్ చేస్తున్నారు. ఒక్క జానర్ సినిమాలకు పరిమితం కాకుండా ఏ జానర్ సినిమాకు అయినా సంగీతం అందించగలడని పేరు తెచ్చుకున్నారు. ఇప్పుడు ఆయన్ను వెంకీ - అనిల్ 5 సినిమాకు సంగీత దర్శకుడిగా ఎంపిక చేశారు.

'మన శంకర వరప్రసాద్ గారు' విజయం తర్వాత వెంకటేష్, అనిల్ రావిపూడి కలిసి మరో సినిమా చేస్తున్న సంగతి తెలిసిందే. ఇందులో నందమూరి కళ్యాణ్ రామ్ మరో హీరో. ఈ సినిమాకు జీవీ ప్రకాష్ మ్యూజిక్ చేస్తారని కొన్ని రోజుల క్రితమే లీకులు వచ్చాయి. ఇప్పుడు ఆ విషయాన్ని అధికారికంగా అనౌన్స్ చేశారు. అదీ అనిల్ రావిపూడి మార్క్ స్టైల్‌లో.

చెన్నైలోని సముద్ర తీర ప్రాంతం (బీచ్)లోని ఇసుకలో జీవీ ప్రకాష్ కుమార్ (GV Prakash Kumar)ని అనిల్ రావిపూడి పాతి పెట్టేస్తారు. ఎందుకు? అని జీవీ ప్రశ్నిస్తే ''హీరోగా బిజీ. నిర్మాతగా బిజీ. మ్యూజిక్ డైరెక్టర్‌గా బిజీ. నీతో ట్యూన్స్ / సాంగ్స్ చేయించుకోవడం కోసం మా నిర్మాత ఇలా పాతిపెట్టమని చెప్పారు'' అని అనిల్ రావిపూడి బదులు ఇచ్చారు. జీవీని మాత్రమే కాదు... లిరిసిస్ట్ అనంత శ్రీరామ్ (Anantha Sriram)ని కూడా పాతి పెట్టారు. మ్యూజిక్ సిట్టింగ్స్ స్టార్ట్ అయ్యాయని ఇలా చెప్పారు అనిల్ రావిపూడి. అదీ సంగతి. జూన్ 13న జీవీ ప్రకాష్ కుమార్ పుట్టినరోజు (GV Prakash Kumar Birthday). అందుకు ఈ అనౌన్స్‌మెంట్ అన్నమాట.

Photo Gallery: Pandu Master - పండు మాస్టర్‌కు పృథ్వీరాజ్ పరామర్శ... లేటెస్ట్ హెల్త్ అప్డేట్ ఏమిటంటే?

వెంకటేష్ సరసన కీర్తి సురేష్, కళ్యాణ్ రామ్ సరసన కృతి శెట్టి కథానాయికలుగా నటించనున్న ఈ సినిమాను జూన్ 18వ తేదీన... హైదరాబాద్‌లో పూజ, ముహూర్త కార్యక్రమాలతో ప్రారంభించనున్నారు. అలాగే, జూన్ 22వ తేదీ నుంచి రెగ్యులర్ షూటింగ్ మొదలు కానుంది. షైన్ స్క్రీన్స్ పతాకంపై సాహు గారపాటి నిర్మిస్తున్న ఈ సినిమాను జీ స్టూడియోస్, సురేష్ ప్రొడక్షన్స్ సంస్థలు సమర్పిస్తున్నాయి. వచ్చే ఏడాది సంక్రాంతికి సినిమాను విడుదల చేయనున్నారు.