Hina KhanGets Back To Work: కొద్ది రోజుల క్రితం తనకు బ్రెస్ట్  క్యాన్సర్ ఉన్నట్లు ప్రకటించి అభిమానులను షాక్ కు గురించి చేసింది బాలీవుడ్ బ్యూటీ హీనా ఖాన్.  స్టేజ్ 3 బ్రెస్ట్ క్యాన్సర్ తో  పోరాడుతున్నట్లు వెల్లడించింది. తన సమస్య గురించి వివరిస్తూ సోషల్ మీడియాలో ఓ సుదీర్ఘ పోస్టు పెట్టింది. ఆ తర్వాత వైద్యుల సమక్షంలో కీమో థెరపీ తీసుకుంటోంది. అయినప్పటికీ, ఆమె తాజాగా షూటింగ్‌లో పాల్గొని వృత్తి పట్ల తనకున్న ఇష్టాన్ని చాటుకుంది.  


సోషల్ మీడియాలో వీడియో షేర్ చేసిన హీనా


తన తాజా షూటింగ్ కు సంబంధించిన విషయాన్ని హీనా ఖాన్ స్వయంగా వెల్లడించింది. ఈ మేరకు షూటింగ్ సెట్ లో ఉన్న వీడియోను షేర్ చేస్తూ పోస్టు పెట్టింది. “గత కొద్ది రోజుల క్రితమే నాకు క్యాన్సర్ ఉన్నట్లు వైద్యులు వెల్లడించారు. ఓ వైపు ట్రీట్మెంట్ తీసుకుంటూనే మరోవైపు షూటింగ్ లో పాల్గొన్నాను. నా జీవితంలో అతి పెద్ద సమస్యలను ఫేస్ చేస్తున్నాను. ఈ సమయంలో షూటింగ్ లో పాల్గొనడం అంత సాధారణ విషయమేమీ కాదు. అయినా, సంతోషంగా గడపాలనేదే నా ఉద్దేశం. జీవితంలో కష్టాలు అనేవి వస్తాయి. పోతాయి. వాటిని పెద్దవి చేసి చూడకూడదు. మనం జీవించి ఉన్న కాలమే చాలా ముఖ్యమైనదని గుర్తించాలి. సమస్యలను ఎదుర్కొంటూనే, గతంలో మాదిరిగా ఉండేలా ట్రై చేయాలి” అని చెప్పుకొచ్చింది.   


కష్టమైనా ఇష్టంగా పని చేస్తున్నా


క్యాన్సర్ చికిత్స పేరుతో హాస్పిటల్లోనే కూర్చోవాలని లేదని, అందుకే షూటింగ్ లో పాల్గొంటున్నానని హీనా ఖాన్ వెల్లడించింది. “గత కొద్ది రోజులు క్యాన్సర్‌కు ట్రీట్మెంట్ తీసుకుంటున్నాను. ట్రీట్మెంట్ పేరుతో ఎప్పుడూ హాస్పిటల్ లోనే ఉండాలి అనుకోవడం లేదు. అందుకే షూటింగ్ లో పాల్గొంటున్నాను. పని చేయడం వల్ల మానసిక ఆందోళన ఉండదు. నలుగురితో కలవడం వల్ల ఒత్తిడి తగ్గి ప్రశాంతంగా ఉంటాం. మనసుకు నచ్చిన పని చేస్తే, సమస్యలు మరుగునపడిపోతాయి. సమస్యలను ఎదుర్కొనే ధైర్యం, శక్తి లభిస్తుంది” అని హీనా అభిప్రాయపడింది.


హీనాపై నెటిజన్ల ప్రశంసల జల్లు


క్యాన్సర్‌తో పోరాడుతూనే హీనా షూటింగ్‌లో పాల్గొనడం పట్ల సోషల్ మీడియాలో నెటిజన్లు ప్రశంసలు కురిపిస్తున్నారు. మళ్లీ స్క్రీన్ మీద చూడటం సంతోషంగా ఉందంటూ కామెంట్స్ పెడుతున్నారు. క్యాన్సర్ నుంచి త్వరగా కోలుకోవాలని ఆకాంక్షిస్తున్నారు. కష్ట సమయంలోనూ ఆమె ఆత్మ స్థైర్యాన్ని చూసి అభినందిస్తున్నారు.


హీనా ఖాన్ గురించి..


 హీనా ఖాన్ జమ్మూకాశ్మీర్ లో పుట్టి పెరిగింది. 2009లో  'హే రిస్తా క్యా ఖేల్తా హై' సీరియల్‌ తో ఇండస్ట్రీలోకి అడుగుపెట్టింది. ‘ఫియర్ ఖత్రోంకి ఖిలాడీ 8’, ‘బిగ్ బాస్’ 11 రియాలిటీ షోలతో మంచి గుర్తింపు తెచ్చుకుంది. ‘నాగిన్ 5’,’ షద్యంత్రా’తో పాటు పలు సీరియల్స్ లో యాక్ట్ చేసింది. రీసెంట్ గా ‘నామాకూల్‌’ అనే వెబ్‌ సిరీస్‌ లో నటించింది.  ప్రొడ్యూసర్ రాఖీ జైశ్వాల్‌ ను 2014లో ప్రేమ వివాహం చేసుకుంది. గతంలోనే తనకు ఆస్తమా ఉన్నట్లు చెప్పింది. తాజాగా బ్రెస్ట్ క్యాన్సర్ న్యూస్ చెప్పి అభిమానులకు షాక్ ఇచ్చింది.



Read Also: ఎన్నో అగ్ని పరీక్షలు ఎదుర్కొన్నా- విడాకులపై సమంత షాకింగ్ కామెంట్స్