బుల్లితెరపై నెంబర్ వన్ రియాలిటీ షోగా దూసుకుపోతుంది బిగ్ బాస్(Bigg Boss). అన్ని భాషల్లో ఈ షో సూపర్ హిట్ అయింది. తెలుగులో కూడా ఈ షోకి మంచి గుర్తింపు వచ్చింది. ఇప్పటివరకు ఐదు సీజన్లను పూర్తి చేసుకుంది. అలానే ఈ ఏడాది ఓటీటీ వెర్షన్ తో ఆడియన్స్ ను ఎంటర్టైన్ చేయాలనుకున్నారు. హాట్ స్టార్ లో 24 గంటల కాన్సెప్ట్ తో ఈ షోని నడిపించారు. కానీ ఆశించిన స్థాయిలో ఓటీటీ వెర్షన్ క్లిక్ అవ్వలేదు.
 
ఇదిలా ఉండగా.. బిగ్ బాస్ సీజన్ 6 కోసం రంగం సిద్ధమైంది. సెప్టెంబర్ 4 నుంచి ఈ షోని మొదలుపెట్టారు. ఇప్పటివరకు నాలుగు సార్లు ఈ షోని హోస్ట్ చేసిన నాగార్జున ఇప్పుడు ఐదోసారి కూడా హోస్ట్ గా వ్యవహరించనున్నారు. ఈసారి మొత్తం 18 మంది కంటెస్టెంట్స్ కనిపించనున్నారు. ఆదివారం నాడు గ్రాండ్ గా షో మొదలైంది. ఇక కంటెస్టెంట్స్ ను ఒక్కొక్కరిగా నాగార్జున ఇంట్రడ్యూస్ చేస్తున్నారు.

 

ఫస్ట్ కంటెస్టెంట్ గా కీర్తి భట్ ఎంట్రీ ఇచ్చింది. 'కార్తీకదీపం' సీరియల్ లో హిమ క్యారెక్టర్ తో బాగా ఫేమస్ అయింది కీర్తి. ఈ సీరియల్ కంటే ముందు 'మనసిచ్చి చూడు' అనే సీరియల్ లో నటించింది. ఇప్పుడు బిగ్ బాస్ హౌస్ లో కంటెస్టెంట్ గా పాల్గొంటుంది. ఈ షోకి సంబంధించి కీర్తి ఎమోషనల్ కేటగిరీలో బాగా పనికొస్తుందనే చెప్పాలి. ఎందుకంటే ఆమె రియల్ లైఫ్ లో చాలా కష్టాలను చవి చూసింది. బెంగుళూరుకి చెందిన ఈమె చిన్నప్పటినుంచి సినిమాలపై ఇంట్రెస్ట్ తో యాక్టింగ్ స్కూల్ లో ట్రైనింగ్ తీసుకుంది. భరతనాట్యం కూడా నేర్చుకుంది. కన్నడలో మూడు సీరియల్స్, కొన్ని సినిమాలు చేసింది. 

 

తన కెరీర్ సెట్ అవుతుందనుకుంటున్న సమయంలో ఆమె లైఫ్ లో ఊహించని ఘటన చోటుచేసుకుంది. ఓ ప్రమాదంలో తన ఫ్యామిలీ మొత్తాన్ని కోల్పోయింది. తల్లిదండ్రులతో పాటు అన్న, వదినలను కూడా పోగొట్టుకుంది. రీసెంట్ గా ఓ టీవీ షోలో తన స్టోరీ చెప్పుకొని ఎమోషనల్ అయింది. ఇప్పుడు ఈమె ఓ అనాథను దత్తత తీసుకొని పెంచుకుంటుంది. ఇవే విషయాలను హోస్ట్ నాగార్జునతో పంచుకొని ఎమోషనల్ గా మాట్లాడింది. జీవితంలో ఎన్నో కష్టాలను చూసిన కీర్తి.. ఇప్పుడు బిగ్ బాస్ హౌస్ లో ఎలా రాణిస్తుందో చూడాలి! 

 

ఇక ఈసారి అబ్బాయిల నెంబర్ కంటే అమ్మాయిలే ఎక్కువ మంది హౌస్ లో కనిపించబోతున్నారు. ఎప్పటిలానే ఈసారి కూడా బిగ్ బాస్ హౌస్ ని చాలా కొత్తగా డిజైన్ చేశారు. మొత్తం 18 మంది పోటీదారులు కాబట్టి ఈసారి షో 100 రోజులకు పైగానే ఉండే ఛాన్స్ ఉంది. మధ్యలో డబుల్ ఎలిమినేషన్స్ కూడా ఉంటాయి. ఇక టాస్క్ ల విషయానికొస్తే.. బిగ్ బాస్ హిందీ వెర్షన్ నుంచి కొన్ని టాస్క్ లను సీజన్ 6 కోసం తీసుకోబోతున్నారని సమాచారం. గత సీజన్లలో కూడా టాస్క్ లకు సంబంధించి ఇలానే చేశారు.