బుల్లితెరపై నెంబర్ వన్ రియాలిటీ షోగా దూసుకుపోతుంది బిగ్ బాస్(Bigg Boss). అన్ని భాషల్లో ఈ షో సూపర్ హిట్ అయింది. తెలుగులో కూడా ఈ షోకి మంచి గుర్తింపు వచ్చింది. ఇప్పటివరకు ఐదు సీజన్లను పూర్తి చేసుకుంది. అలానే ఈ ఏడాది ఓటీటీ వెర్షన్ తో ఆడియన్స్ ను ఎంటర్టైన్ చేయాలనుకున్నారు. హాట్ స్టార్ లో 24 గంటల కాన్సెప్ట్ తో ఈ షోని నడిపించారు. కానీ ఆశించిన స్థాయిలో ఓటీటీ వెర్షన్ క్లిక్ అవ్వలేదు.
 
ఇదిలా ఉండగా.. బిగ్ బాస్ సీజన్ 6 కోసం రంగం సిద్ధమైంది. సెప్టెంబర్ 4 నుంచి ఈ షోని మొదలుపెట్టారు. ఇప్పటివరకు నాలుగు సార్లు ఈ షోని హోస్ట్ చేసిన నాగార్జున ఇప్పుడు ఐదోసారి కూడా హోస్ట్ గా వ్యవహరించనున్నారు. ఈసారి మొత్తం 18 మంది కంటెస్టెంట్స్ కనిపించనున్నారు. ఆదివారం నాడు గ్రాండ్ గా షో మొదలైంది. ఇక కంటెస్టెంట్స్ ను ఒక్కొక్కరిగా నాగార్జున ఇంట్రడ్యూస్ చేస్తున్నారు.

 

ఏడో కంటెస్టెంట్ గా నటుడు అర్జున్ కళ్యాణ్ ఎంట్రీ ఇచ్చారు. 'అక్డి పక్డి' అంటూ బీట్ ఉన్న సాంగ్ కి మంచి పెర్ఫార్మన్స్ ఇచ్చారు. ఇతడు 'ప్లే బ్యాక్', 'పెళ్లికూతురు పార్టీ' వంటి సినిమాల్లో నటించారు. స్టేజ్ పైకి వచ్చిన అర్జున్ ''నేను మిడిల్ క్లాస్ ఫ్యామిలీ నుంచి వచ్చా.. వైజాగ్ లో ఇంజనీరింగ్, అమెరికాలో ఎమ్మెస్ చేశా. న్యూయార్క్ ఫిలిం ఎకాడమీలో కోర్స్ చేశా. కొన్ని సినిమాలు చేశా. నాకు బిగ్ బాస్ మంచి ప్లాట్ ఫామ్ అవుతుందని భావిస్తున్నాను. ప్రేక్షకుల ప్రేమ గెలుచుకోవాలనుకుంటున్నాను. అలానే టైటిల్ గెలవాలనుకుంటున్నాను'' అంటూ చెప్పుకొచ్చారు. నాగ్ తో ట్రూత్ ఆర్ డేర్ ఆడుతూ.. 'సిట్యుయేషన్ ని బట్టి రియాక్ట్ అవుతానని నాగార్జునతో అన్నారు' అర్జున్. ఏదైనా సీక్రెట్ చెప్పమని నాగార్జున.. అర్జున్ ని అడిగారు. దానికి అతడు 'నాకొక బ్రేకప్ జరిగింది. ఆ సమయంలో చాలా డిప్రెషన్ లోకి వెళ్లిపోయా' అని చెప్పుకొచ్చారు. 

 

కంటెస్టెంట్స్ ని ఒక్కొక్కరినీ ఒక్కో కార్డు సెలెక్ట్ చేసుకోమని అడుగుతున్నారు నాగార్జున. నేహా సెలెక్ట్ చేసుకున్న కార్డు బ్లాక్ హార్ట్. దానికి అర్ధం ఏంటో తరువాత చెబుతానని అన్నారు నాగార్జున. 

 

ఇక ఈసారి అబ్బాయిల నెంబర్ కంటే అమ్మాయిలే ఎక్కువ మంది హౌస్ లో కనిపించబోతున్నారు. ఎప్పటిలానే ఈసారి కూడా బిగ్ బాస్ హౌస్ ని చాలా కొత్తగా డిజైన్ చేశారు. మొత్తం 18 మంది పోటీదారులు కాబట్టి ఈసారి షో 100 రోజులకు పైగానే ఉండే ఛాన్స్ ఉంది. మధ్యలో డబుల్ ఎలిమినేషన్స్ కూడా ఉంటాయి. ఇక టాస్క్ ల విషయానికొస్తే.. బిగ్ బాస్ హిందీ వెర్షన్ నుంచి కొన్ని టాస్క్ లను సీజన్ 6 కోసం తీసుకోబోతున్నారని సమాచారం. గత సీజన్లలో కూడా టాస్క్ లకు సంబంధించి ఇలానే చేశారు.