తెలుగులో పొడుగైన హీరోయిన్లు ఎవరంటే మొదట గుర్తొచ్చే పేరు అనుష్కదే. ముఖ్యంగా ప్రభాష్ - అనుష్క జంట అంటే అభిమానులకు కనుల పంటే. తెలుగు పరిశ్రమలో అడుగుపెట్టి నేటితో 17 ఏళ్లు పూర్తి చేసుకుంది అనుష్క శెట్టి. ఈ సందర్భంగా తన ఆనందన్ని అభిమానులతో పంచుకుంది. స్వీటీ పదిహేడేళ్ల వేడుకను షూటింగ్ సెట్లో ఘనంగా నిర్వహించారు. ప్రస్తుతం అనుష్క నవీన్ పోలిశెట్టితో కలిసి యూవీ క్రియేషన్ బ్యానర్ పై ఓ సినిమాలో నటిస్తోంది. ఆ సినిమా షూటింగ్ సెట్లోనే ఆమె పదిహేడేళ్ల ఇండస్ట్రీ ప్రయాణాన్ని సెలెబ్రేట్ చేశారు. అనుష్క చేత కేక్ కట్ చేయించారు. ఆ ఫోటోలను పోస్టు చేసిన అనుష్క తన ఆనందాన్ని అక్షరాల రూపంలో రాసుకొచ్చింది‘17 ఏళ్ల నుంచి నాకు సినిమా ఇండస్ట్రీల నుంచి, కుటుంబం నుంచి, అభిమానుల నుంచి అందుతున్న మద్దతుకు నా ధన్యవాదాలు. నా జీవితంలో మీరంతా భాగమైనందుకు నా నా హృదయపూర్వక ధన్యవాదాలు. హద్దుల్లేని మీ ప్రేమను వర్ణించేందుకు పదాలు సరిపోవు’ అంటూ ముగించింది. ఆమె కట్ చేసిన ఓ కేకుపై 17 ఇయర్స్ ఇండస్ట్రీ ఇక్కడ అనే కొటేషన్ ను రాయించారు. అనుష్కకు అభిమానులు వెల్లువలా శుభాకాంక్షలు చెబుతున్నారు.
పొడగరి... సొగసరి...
అనుష్క బెంగుళూరులో యోగా శిక్షకురాలిగా ఉండేది. అనుకోకుండా నాగార్జున నటించిన సూపర్ చిత్రంలో రెండో హీరోయిన్ ఛాన్సు కొట్టేసింది. ఆ సినిమాలో ఆమెను తొలిసారి చూసిన వాళ్లంతా ‘వావ్ ఎవరీ అమ్మాయి?’ అనుకున్నారు. హీరోలతో సమానమైన ఎత్తుతో, సన్నని మల్లెతీగలా ఉంది ఆ సినిమాలో. ఇక విక్రమార్కుడు సినిమాలో ఆమె డ్యాన్సులు జనాలకు విపరీతంగా నచ్చేశాయి. ఆమెను టాప్ హీరోయిన్ గా నిలబెట్టిన సినిమా అయితే ‘అరుంధతి’ అనే చెప్పాలి. అనుష్క కెరీర్ అరుంధతికి ముందు, తరువాత అనేంతగా మారింది. అప్పట్నించి లేడీ ఓరియంటెడ్ మూవీ అనగానే అందరికీ అనుష్కనే గుర్తొచ్చేది. 2005లో టాలీవుడ్ లో అడుగుపెట్టిన అనుష్క వెనుదిరిగి చూసుకోవాల్సిన అవసరం రాకుండా కెరీర్ సాగుతోంది. ఇక ఆమె కెరీర్ లో బాహుబలి సినిమా అంతర్జాతీయ స్థాయి గుర్తింపును తెచ్చి పెట్టింది. ఆమె కెరీర్లో 2005 నుంచి 2020 వరకు వరుస పెట్టి ప్రతి ఏడాది రెండుకి మించి ఆమె సినిమాలు విడుదలయ్యేవి. 2010లో అయితే ఏకంగా 8 సినిమాలు విడుదలయ్యాయి. అయితే 2021లో మాత్రం బ్రేక్ తీసుకుంది అనుష్క. ఆ ఏడాది ఒక్కసినిమా కూడా విడుదల కాలేదు.2020లో విడుదలైన నిశ్శబ్ధం మూవీనే చివరిది.