తెలుగు సినిమా పరిశ్రమలో శ్రీలీల కెరీర్ మాంచి స్వింగ్​లో కొనసాగుతోంది. వరుస అవకాశాలతో దూసుకుపోతోంది. ఆమె నటించిన సినిమాలన్నీ చక్కటి విజయాలు అందుకోవడంతో చిత్ర నిర్మాతలు ఆమెతో సినిమాలు చేసేందుకు క్యూ కడుతున్నారు. సీనియర్ హీరోల నుంచి యంగ్ హీరోల వరకు ఆమె ఫస్ట్ చాయిస్ అవుతోంది. ప్రస్తుతం అరడజన్ కు పైగా చిత్రాల్లో నటిస్తోంది శ్రీలీల. ఈ నేపథ్యంలో ఆమె గురించి ఓ ఇంట్రెస్టింగ్ వార్తల సినీ సర్కిల్స్ లో చక్కర్లు కొడుతోంది. ఇంతకీ అదేంటంటే?


అప్పట్లో హీరోయిన్ మార్పు వార్తలను కొట్టిపారేసిన చిత్రబృందం


కొద్ది రోజుల క్రితం యంగ్ హీరో విజయ్ దేవరకొండ, దర్శకుడు గౌతమ్ తిన్ననూరి కాంబోలో ఓ సినిమాను ప్రకటించారు. ఇందులో హీరోయిన్ గా శ్రీలీల ఓకే అయ్యింది. తాజాగా ఈ సినిమా నుంచి ఆమె తప్పుకున్నట్లు వార్తలు వస్తున్నాయి. నిజానికి కొన్ని వారాల క్రితమే ఆమె ఈ సినిమా చేయట్లేదనే వార్తలు వచ్చాయి. అంతేకాదు, ఆమె స్థానంలో నేషనల్ క్రష్ రష్మిక మందన్నను ఓకే చేసినట్లు టాక్ వినిపించింది. అయితే, ఈ వార్తలను చిత్ర నిర్మాన సంస్థ కొట్టిపారేసింది. విజయ్ సినిమా నుంచి శ్రీలీల తప్పుకోలేదని వెల్లడించింది. ఆమే ఈ సినిమాలో హీరోయిన్ గా ఉంటుందని తేల్చి చెప్పింది.  


విజయ్-గౌతమ్ మూవీ నుంచి తప్పుకున్న శ్రీలీల


ఆ తర్వాత హీరోయిన్ మార్పు వార్తలు సద్దుమణిగాయి. తాజాగా మరోసారి ఆమె ఈ సినిమా నుంచి తప్పుకున్నట్లు వార్తలు వస్తున్నాయి. వాస్తవానికి విజయ్ దేవరకొండ, గౌతమ్‌ తిన్ననూరి కాంబో వస్తున్న ఈ మూవీ షూటింగ్ ఇప్పటికే ప్రారంభం కావాలి. వచ్చే ఏడాది వేసవిలోగా పూర్తి కావాలి. కానీ, ఇప్పటి వరకు సినిమా సెట్స్ మీదకే రాలేదు. రకరకాల కారణాలతో సినిమా షూటింగ్ వాయిదా పడుతోంది. ఇదే సమయంలో శ్రీలల డేట్లు కుదరడం లేదట. ఆమె ఓవైపు సినిమాలు చేస్తూనే  మరోవైపు చదువును కంటిన్యూ చేస్తోంది. పరీక్షల సమయంలో సినిమాలకు కొద్ది రోజులు దూరంగా ఉంటుంది. అయితే, ఈసారి కూడా ఆమె పరీక్షలకు హాజరుకానుంది. అదే సమయంలో గౌతమ్ తన సినిమాకు డేట్లు ఇవ్వాలని కోరారట. అయితే తను కుదరదని చెప్పి ఈ సినిమా నుంచి తప్పుకున్నట్లు తెలుస్తోంది.


శ్రీలీల స్థానంలో సాక్షి వైద్య ఫిక్స్!   


ఇక ఈ సినిమా నుంచి శ్రీలీల తప్పుకోవడంతో చిత్ర నిర్మాతలు కొత్త హీరోయిన్ కోసం వేట మొదలు పెట్టారట. చివరకు ‘ఏజెంట్’ సినిమాలో నటించిన సాక్షి వైద్యను సంప్రదించారట. విజయ్ సరసన సాక్షి అయితే బాగుంటుందని దర్శకుడు గౌతమ్ భావిస్తున్నారట. దాదాపు ఆమె ఈ సినిమాలో హీరోయిన్ గా ఖరారు అయినట్లు తెలుస్తోంది. త్వరలోనే చిత్రబృందం ఈ విషయాన్ని అధికారికంగా ప్రకటించే అవకాశం ఉందని ఇండస్ట్రీలో టాక్ నడుస్తోంది.


Read Also: చిరంజీవి సచిన్, పవన్ కల్యాణ్ విరాట్ కోహ్లీ, భలే చెప్పావయ్యా వరుణ్!


ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial