Pakistan Crime : కట్టుకున్న వాడే నరరూప రాక్షకుడిగా మారిపోయాడు. భార్యను అత్యంత కిరాతకంగా హత్య చేసి ఉడకబెట్టిన ఘటన పాకిస్తాన్ లోని సింధ్ ప్రావిన్స్ లో చోటుచేసుకుంది. ఈ దేశ మీడియా నివేదిక ప్రకారం పాకిస్తాన్ సింధ్ ప్రావిన్స్‌లో వ్యక్తి తన ఆరుగురు పిల్లల ముందు భార్యను కాల్చి చంపి ఉడకబెట్టిన దారుణమైన ఘటన బుధవారం చోటుచేసుకుంది. సింధ్ ప్రావిన్స్ గుల్షన్-ఎ-ఇక్బాల్ ప్రాంతంలోని ఒక ప్రైవేట్ పాఠశాలలో నర్గీస్ అనే మహిళను ఆమె భర్త బుధవారం హత్య చేసి వంటగదిలో ఉడకబెట్టాడని పోలీసులకు సమాచారం అందిందని స్థానిక మీడియా తెలిపింది.
ముగ్గురు పిల్లలతో పరారీ
పోలీసులు తెలిపిన వివరాల ప్రకారం, బజౌర్ ఏజెన్సీకి చెందిన ఆషిక్ ఓ పాఠశాలలో వాచ్‌మెన్‌గా పనిచేస్తున్నాడు. ఆ పాఠశాల తొమ్మిది నెలలు మూతపడి ఉంది. ఈ పాఠశాలలోని సర్వెంట్ క్వార్టర్‌లో అతడు కుటుంబంతో నివసిస్తున్నాడు. ఈ దారుణ ఘటన తర్వాత ఆషిక్ ముగ్గురు పిల్లలతో పారిపోయాడు. అయితే బాధితురాలి కుమార్తె పోలీసులకు ఫోన్ చేసి సమాచారం అందించింది. జిల్లా ఈస్ట్ సీనియర్ సూపరింటెండెంట్ ఆఫ్ పోలీస్ అబ్దుర్ రహీమ్ షెరాజీని స్థానిక మీడియాతో మాట్లాడుతూ ముగ్గురు పిల్లలను సంరక్షణ కేంద్రానికి తరలించామన్నారు.
హత్య చేసి ఆపై
పిల్లలు చాలా భయపడిపోయారని, వారికి గాయాలు కూడా అయ్యాయని ఎస్ఎస్పీ షెరాజీ అన్నారు. మెడికో-లీగల్ ఫార్మాలిటీస్ కోసం పోలీసులు మృతదేహాన్ని జిన్నా పోస్ట్ గ్రాడ్యుయేట్ మెడికల్ సెంటర్‌కు తరలించామని షెరాజీ చెప్పారు. ప్రాథమిక విచారణ, పిల్లల వాంగ్మూలాల ప్రకారం నిందితుడు తన భార్యను గొంతుకోసి చంపినట్లు తెలుస్తోందని పోలీసులు తెలిపారు. మహిళ కాలు కూడా ఆమె శరీరం నుంచి వేరుచేయబడి ఉందని ఎస్ఎస్పీ చెప్పారు. ఈ ఘటన వెనుక కారణం ఇంకా తెలియాల్సి ఉందన్నారు.
వివాహేతర సంబంధం పెట్టుకోవాలని బలవంతం
అయితే ఆషిక్ తన భార్యను వివాహేతర సంబంధాలు పెట్టుకోవాలని బలవంతం చేశాడని, ఆమె నిరాకరించడంతో హత్య చేశాడని స్థానికులు అంటున్నారు. నిందితుడిని పట్టుకునేందుకు గాలిస్తున్నామని పోలీసులు తెలిపారు. సుమారు 11 ఏళ్ల క్రితం 2011 నవంబర్‌లో తన అనుమతి లేకుండా మరో మహిళను పెళ్లి చేసుకోవాలని భావించి తన భర్తను హత్య చేసి, అతని శరీర భాగాలను వండడానికి ప్రయత్నించింది ఓ మహిళ. దాదాపుగా ఇలాంటి సంఘటన చోటుచేసుకోవడంతో స్థానికులు భయాందోళన చెందుతున్నారు. నిందితుడి కఠినంగా శిక్షించాలని కోరుతున్నారు.