Voilent Clash in Mexico:
రెండు గ్రూప్‌ల ఘర్షణ..
మెక్సికోలో గ్రూపు కొట్లాటలు 11 మంది ప్రాణాల్ని బలి తీసుకున్నాయి. సెంట్రల్ మెక్సికోలో క్రిమినల్ గ్యాంగ్‌కి, గన్‌మెన్స్‌కి జరిగిన ఘర్షణ స్థానికంగా సంచలనం సృష్టించింది. సోషల్ మీడియాలో ఇందుకు సంబంధించిన వీడియోలు వైరల్ అవుతున్నాయి. కౌబాయ్‌ హ్యాట్స్‌ పెట్టుకున్న కొందరు గ్రామస్థులు గన్స్‌ పట్టుకుని ఉన్న గ్యాంగ్‌స్టర్‌లను వెంబడించి మరీ దాడి చేశారు. అయితే...ఈ గ్రామస్థులతో పాటు కొంత మంది గ్యాంగ్‌స్టర్‌లు కూడా గొడవకు దిగారు. చాలా సేపు రెండు వర్గాల మధ్య ఘర్షణ జరిగింది. ఈ క్రమంలోనే 11 మంది ప్రాణాలు కోల్పోయారు. వీళ్లలో 8 మంది గ్యాంగ్‌స్టర్‌లు కాగా మిగతా ముగ్గురు స్థానికులుగా గుర్తించారు పోలీసులు. ఏ గ్యాంగ్ వాళ్లు ఈ దారుణానికి పాల్పడ్డారన్నది మాత్రం ఇంకా స్పష్టత రాలేదని పోలీసులు వెల్లడించారు. ఈ ఘర్షణ జరిగిన ప్రాంతం డ్రగ్‌ బిజినెస్‌కి అడ్డా అని, బహుశా ఈ విషయంలో రెండు వర్గాల మధ్య గొడవ జరిగి ఉండొచ్చని ప్రాథమికంగా భావిస్తున్నారు. స్థానిక మీడియా వెల్లడించిన వివరాల ప్రకారం...ఓ గన్‌మెన్ గ్యాంగ్ స్థానిక రైతులను చాలా సార్లు బెదిరించింది. పంటలు పండిస్తున్నందుకు ఎకరాకి ఇంత డబ్బు చెల్లించాలని డిమాండ్ చేసింది. ఈ విషయంలోనే స్థానికులకు ఆ గ్యాంగ్‌కి మధ్య గొడవ జరిగినట్టు సమాచారం. మెక్సికోలో ఇలాంటి గ్యాంగ్‌లు చాలా ఎక్కువ. బెదిరింపులు, హత్యలు, దొంగతనాలతో స్థానికులను భయభ్రాంతులకు గురి చేయడమే వీళ్ల పని. ఎవరైనా డబ్బులు కట్టకపోతే ఆ పొలాలకు నిప్పు పెట్టేస్తారు.