Hyderabad Crime News: హైదరాబాద్‌లో వైన్స్ షాప్ వద్ద ‘చిల్లర’ వివాదం.. సిబ్బంది దాడిలో ఒకరి మృతి

Srikalahasti Temple Fire Accident: శ్రీకాళహస్తి ఆలయంలో అగ్నిప్రమాదం.. ప్రసాదాల తయారీ కేంద్రంలో చెలరేగిన మంటలు

Satyaprasad Bandaru — Thu, 12 Nov 2026 13:35:59 +0530

Srikalahasti Temple Fire Accident: ప్రముఖ పుణ్యక్షేత్రం శ్రీకాళహస్తీశ్వర ఆలయంలో చోటుచేసుకున్న అగ్నిప్రమాదం భక్తుల్లో తీవ్ర కలకలం రేపింది. ఆలయ నాలుగో గోపురం సమీపంలో ఉన్న ప్రసాదాల తయారీ కేంద్రంలో ఒక్కసారిగా మంటలు చెలరేగడంతో పరిసర ప్రాంతాల్లో భయాందోళనలు నెలకొన్నాయి. వంటగదిలో గ్యాస్ లీక్ కావడం, అక్కడే ఉన్న వంటనూనె డబ్బాలకు నిప్పు అంటుకోవడంతో అగ్నికీలలు వేగంగా ఎగసిపడ్డాయి. క్షణాల్లోనే దట్టమైన పొగ ఆలయ పరిసరాలను కమ్మేయడంతో దర్శనానికి వచ్చిన భక్తులు తీవ్ర గందరగోళానికి గురయ్యారు.

Also Read: వెబ్‌ల్యాండ్‌ రికార్డుల తారుమారు.. ఎన్‌ఐసీ లాగిన్ కొట్టేసి రూ.కోట్ల భూముల అక్రమార్జన.. నలుగురి అరెస్ట్!

అధికారుల అప్రమత్తతో తప్పిన ప్రాణ నష్టం

అగ్ని ప్రమాదం సమాచారం అందుకున్న వెంటనే ఆలయ అధికారులు, అగ్నిమాపక సిబ్బంది హుటాహుటిన ఘటనా స్థలానికి చేరుకున్నారు. ముందుజాగ్రత్త చర్యగా ఆలయ సిబ్బంది వెంటనే అప్రమత్తమై, ప్రసాద తయారీ కేంద్రానికి సమీపంలో ఉన్న భక్తులను సురక్షిత ప్రాంతాలకు తరలించారు. అనంతరం అగ్నిమాపక సిబ్బంది శ్రమించి మంటలను పూర్తిగా అదుపులోకి తీసుకువచ్చారు. అయితే, ఈ ప్రమాదం జరిగిన సమయంలో ప్రసాదాల వంటగదిలో సిబ్బంది ఎవరూ లేకపోవడంతో ప్రాణనష్టం తప్పింది. మంటలు అదుపులోకి రావడంతో ఆలయ అధికారులు, భక్తులు ఊపిరి పీల్చుకున్నారు. ఈ ప్రమాదానికి గల కచ్చితమైన కారణాలపై ఆలయ అధికారులు సమగ్ర విచారణ చేపట్టారు.

Also Read: ఏపీలో 23 పట్టణ స్థానిక సంస్థల ఎన్నికలకు నోటిఫికేషన్.. ఈ నెల 26న పోలింగ్

Kishtwar Police: అడవిలో విగతజీవులుగా ఇద్దరు పోలీసు ఆఫీసర్లు.. సర్వీస్ రివాల్వర్లు మాయం.. ఉగ్రకోణంపై దర్యాప్తు!

Satyaprasad Bandaru — Thu, 12 Nov 2026 12:43:03 +0530

Kishtwar Police: జమ్మూకశ్మీర్‌లోని కిశ్త్‌వాడ్ జిల్లాలో విషాదకర ఘటన చోటుచేసుకుంది. విధుల్లో ఉండి, అదృశ్యమైన ఇద్దరు స్పెషల్ పోలీసు ఆఫీసర్లు అనుమానాస్పద స్థితిలో మృతి చెందడం భద్రతా వర్గాల్లో కలకలం రేపింది. గురువారం ఉదయం అటవీ ప్రాంతంలో వీరి మృతదేహాలు లభ్యమయ్యాయి. మృతుల శరీరంపై బుల్లెట్ గాయాలు ఉండటం, వారి సర్వీసు తుపాకులు మాయమవడం పలు అనుమానాలకు తావిస్తోంది.

అసలేం జరిగింది?

స్పెషల్ ఆపరేషన్స్ గ్రూప్ కు చెందిన బాబీ చాంద్ (57), రశ్‌పాల్ కుమార్ (45) బుధవారం మధ్యాహ్నం తమ క్యాంప్ నుంచి ధర్నా-మర్వా ప్రాంతంలోని ఆర్మీ పోస్ట్‌కు బయల్దేరారు. మధ్యాహ్నం 3.30 గంటల సమయంలో మార్గమధ్యంలోని దచన్ అటవీ ప్రాంతం నుంచి అనుమానాస్పద శబ్దాలు వినిపించడంతో, తనిఖీ చేసేందుకు వీరిద్దరూ అడవిలోకి వెళ్లారు. ఆ తర్వాత వారి నుంచి ఎలాంటి సమాచారం రాలేదు. సరిగ్గా అదే సమయంలో ఆ ప్రాంతంలో మొబైల్ నెట్‌వర్క్ సేవలు కూడా నిలిచిపోవడంతో అధికారుల్లో ఆందోళన మొదలైంది.

ముమ్మర గాలింపు.. మృతదేహాల లభ్యం

పోలీసు ఆఫీసర్లు అదృశ్యమైనట్లు నిర్ధారించుకున్న ఆర్మీ, భద్రతా బలగాలు దచన్ అటవీ ప్రాంతంలో రాత్రంతా ముమ్మర గాలింపు చర్యలు చేపట్టాయి. ఈ క్రమంలో గురువారం ఉదయం అడవిలో బాబీ చాంద్, రశ్‌పాల్ కుమార్ విగతజీవులుగా పడి ఉండటాన్ని భద్రతా సిబ్బంది గుర్తించారు.

Also Read: కుల్గాం CRPF క్యాంపుపై ఉగ్రదాడి.. ఇద్దరు జవాన్లకు గాయాలు- ఆ ఏరియాను జల్లెడ పడుతున్న బలగాలు

ఉగ్రవాదుల పనేనా?

ఘటనాస్థలంలో మృతి చెందిన పోలీసుల వద్ద ఉండాల్సిన సర్వీసు తుపాకులు కనిపించకపోవడం గమనార్హం. ఉగ్రవాదులే వీరిని కిడ్నాప్ చేసి, కాల్చి చంపి ఆయుధాలను ఎత్తుకెళ్లి ఉండొచ్చని ఉన్నతాధికారులు ప్రాథమికంగా అనుమానిస్తున్నారు. ప్రస్తుతం ఆ ప్రాంతమంతా భద్రతా బలగాలు దిగ్బంధించి, ఉగ్రవాదుల కోసం నిర్బంధ తనిఖీలు నిర్వహిస్తున్నాయి.

కుల్గామ్ ఉగ్రదాడితో సంబంధం ఉందా?

మరోవైపు, బుధవారం మధ్యాహ్నం 2 గంటల ప్రాంతంలోనే జమ్మూకశ్మీర్‌లోని కుల్గామ్ జిల్లాలో ఉన్న సీఆర్పీఎఫ్ శిబిరంపై ఉగ్రదాడి జరిగింది. బైకులపై వచ్చిన ఇద్దరు ఉగ్రవాదులు చెక్‌పోస్ట్ వద్ద ఉన్న జవాన్లపై కాల్పులు జరిపి పరారయ్యారు. దాదాపు ఒకే సమయంలో కుల్గామ్ దాడి, కిశ్త్‌వాడ్‌లో పోలీసుల మిస్సింగ్ హత్య జరగడంతో ఈ రెండు ఘటనల వెనుక ఒకే ఉగ్రముఠా హస్తం ఉందా అనే కోణంలో పోలీసులు లోతుగా దర్యాప్తు చేస్తున్నారు.

Also Read: పట్టాలు తప్పిన కోల్‌కతా- సైరాంగ్ ఎక్స్‌ప్రెస్ రైలు

Webland Records Tampering: వెబ్‌ల్యాండ్‌ రికార్డుల తారుమారు.. ఎన్‌ఐసీ లాగిన్ కొట్టేసి రూ.కోట్ల భూముల అక్రమార్జన.. నలుగురి అరెస్ట్!

Satyaprasad Bandaru — Wed, 11 Nov 2026 11:53:49 +0530

Webland Records Tampering: వెబ్‌ల్యాండ్‌ రికార్డుల్లో రూ.కోట్ల విలువైన భూములను అనధికారికంగా ఇతరుల పేరిట మార్చేస్తున్న ఒక ముఠా గుట్టును సీఐడీ విభాగం విజయవంతంగా రట్టు చేసింది. నేషనల్‌ ఇన్‌ఫర్మేషన్‌ సెంటర్‌ (NIC)కి చెందిన ఓ సీనియర్‌ అధికారి లాగిన్ క్రెడెన్షియల్స్‌ను అక్రమంగా వాడుతూ డేటాబేస్‌ను తారుమారు చేస్తున్న నలుగురు నిందితులను పోలీసులు అరెస్టు చేశారు. ప్రాథమిక దర్యాప్తులో ఈ ముఠా సుమారు రూ.50 లక్షలు వసూలు చేసి 70 ఎకరాలకు పైగా భూమి రికార్డులను మార్చినట్లు తేలింది.

వెలుగులోకి వచ్చిందిలా?

ప్రకాశం జిల్లా దొనకొండ మండలం ఇండ్లచెరువు, పడమరలక్ష్మీపురం గ్రామాల పరిధిలోని 6.65 ఎకరాల భూమికి సంబంధించి వెబ్‌ల్యాండ్‌ రికార్డుల్లోఅనధికారిక మార్పులు జరిగినట్లు సీసీఎల్‌ఏ అధికారులు గుర్తించారు. ఈ అక్రమాలపై సీసీఎల్‌ఏ ఇచ్చిన ఫిర్యాదుతో కేసు నమోదు చేసిన సీఐడీ ఈ స్కామును బయటపెట్టింది.

అక్రమాల నెట్‌వర్క్

పడమరలక్ష్మీపురం గ్రామానికి చెందిన వడ్లమూడి ఏడుకొండలు అనే వ్యక్తి తన కుటుంబ భూములను తండ్రి వడ్లమూడి వెంకటేశ్వర్లు పేరిట మార్చేందుకు ఈ అక్రమ మార్గాన్ని ఎంచుకున్నాడు. ఏడుకొండలు మొదట తన బంధువు గుండపనేని వెంకటేశ్వర్లును సంప్రదించగా.. ఆయన ద్వారా పురపాలక శాఖ కమిషనరేట్‌లో డేటా ఎంట్రీ ఆపరేటర్‌గా పనిచేస్తున్న వేముల వెంకటరావు పరిచయమయ్యాడు. వెంకట్ ద్వారా అన్న క్యాంటీన్ ప్రాజెక్ట్ టెక్నికల్ అసిస్టెంట్ షేక్ బాషా, ఆయన ద్వారా విజయవాడ ఎన్‌ఐసీలో జూనియర్ డెవలపర్‌గా పనిచేస్తూ వెబ్‌ల్యాండ్ యాక్సెస్ ఉన్న రంగయ్యగారి సాయికుమార్ ఈ కుట్రలో భాగస్వాములయ్యారు. ఏడుకొండలు చెప్పిన భూముల వివరాలను వెంకట్, బాషాల ద్వారా సాయికుమార్‌కు చేరవేసి రికార్డుల్లో మార్పులు చేయించేవారు.

రెవెన్యూ అక్రమాలకు బైపాస్

ఎన్‌ఐసీ సీనియర్ అధికారి జీవీఎస్‌ఆర్‌ శర్మకు తెలియకుండా ఆయన లాగిన్ వివరాలను వాడిన సాయికుమార్.. తహసీల్దార్ ఆఫీసు ఆమోదం, మ్యుటేషన్ ప్రొసీడింగ్స్ వంటి ఎలాంటి రెవెన్యూ ప్రక్రియలు లేకుండానే ఆన్‌లైన్ రికార్డుల్లో కొత్త పట్టాదారుల పేర్లు ప్రత్యక్షమయ్యేలా చేశాడు. ఈ అక్రమాలకు గాను సాయికుమార్‌కు బాషా భార్య అమీనా ఖాతా నుంచి ఆగస్టులో రూ.50 వేలు, సెప్టెంబరులో రూ.25 వేలు జమ అయినట్లు సీఐడీ ఆధారాలు సేకరించింది.

కోట్ల విలువైన 70 ఎకరాలు తారుమారు

ఈ ట్యాంపరింగ్ కేవలం ఒక కుటుంబానికే పరిమితం కాకుండా మొత్తం 30 రికార్డుల్లోని 70 ఎకరాల భూములకు పాకింది. వీటి మార్కెట్ విలువ రూ.కోట్లలో ఉంటుంది. ఈ కేసుకు సంబంధించి ప్రధాన సూత్రధారులు వడ్లమూడి ఏడుకొండలు, రంగయ్యగారి సాయికుమార్, వేముల వెంకటరావు, షేక్ బాషాలను సీఐడీ అరెస్టు చేసింది. ఈ స్కాము ద్వారా లబ్ధి పొందిన ఇతరులను గుర్తించేందుకు దర్యాప్తు ముమ్మరం చేశారు.

Kolkata Sairang Express Derail: పట్టాలు తప్పిన కోల్‌కతా- సైరాంగ్ ఎక్స్‌ప్రెస్ రైలు.. తప్పిన పెను ప్రమాదం- అసలేం జరిగింది

Shankar Dukanam — Wed, 11 Nov 2026 08:42:53 +0530

కోల్‌కతా-సైరాంగ్ ఎక్స్‌ప్రెస్‌ రైలుకు చెందిన ఏడు బోగీలు, లోకోమోటివ్ పట్టాలు తప్పడంతో ప్రమాదం జరిగింది. మంగళవారం ఉదయం గువాహటి శివార్లలోని డిగారు సమీపంలో ఈ ఘటన చోటుచేసుకుంది. ప్రాథమిక సమాచారం ప్రకారం ఈ రైలు ప్రమాదంలో అదృష్టవశాత్తూ ఎవరికీ గాయాలు కాలేదని రైల్వే అధికారులు తెలిపారు.

Guwahati, Assam: Six coaches of a passenger train derailed at Digaru railway station in Assam's Kamrup (Metro) district Kapinjal Kishore Sharma, CPRO of Northeast Frontier Railway, told ANI over the phone that there is no report of any casualties so far. "Six coaches of the Kolkata-Sairang express have derailed at Digaru railway station at around 6:54 a.m. today. So far, no casualties have been reported. Our senior officials have rushed to the spot," Kapinjal Kishore Sharma said. More details are awaited
— ANI (@ANI) November 11, 2026

నవంబర్ 11న ఉదయం 6:54 గంటలకు రైలు విజోరం (Mizoram) నుంచి కోల్‌కతా (Kolkata) వైపు వెళ్తుండగా విషాదం చోటుచేసుకుంది. డిగారు రైల్వే స్టేషన్ వద్దకు రాగానే కోల్‌కతా సైరాంగ్ ఎక్స్‌ప్రెస్ రైలు 7 బోగీలు పట్టాలు తప్పాయి. ప్రయాణికుల వివరాలు, ప్రమాద తీవ్రత వివరాలు తెలియాల్సి ఉంది. సమాచారం అందుకున్న రెస్క్యూ టీమ్స్ ప్రమాదం జరిగిన ప్రాంతానికి బయలుదేరాయి. లోకో పైలట్ వేగాన్ని కంట్రోల్ చేయలేకపోవడం వల్లే ప్రమాదం జరిగి ఉంటుందని రైల్వే అధికారులు ప్రాథమికంగా భావిస్తున్నారు.

ఎవరికీ గాయాలు కాలేదు, అంతా సురక్షితం..

నార్త్ ఈస్ట్ ఫ్రంటియర్ రైల్వే సీపీఆర్‌ఓ ఈ ప్రమాదంపై స్పందించారు. నవంబర్ 11న ఉదయం దాదాపు 6:54 గంటలకు, అస్సాంలోని దిగారు రైల్వే స్టేషన్‌లో వేరొక రైలుకు దారి ఇచ్చేందుకు రైలు నంబరు 13125 కోల్‌కతా - సైరాంగ్ ఎక్స్‌ప్రెస్‌ను ఆపుతున్న క్రమంలో, లోకో పైలట్ వేగాన్ని నియంత్రించలేకపోయారు. దీనివల్ల లోకోమోటివ్‌తో పాటు 5 కోచ్‌లు పట్టాలు తప్పాయి. రైలులోని ప్రయాణికులందరూ సురక్షితంగా ఉన్నారు. ఎవరికీ ఎలాంటి గాయాలు కాలేదు. ప్రయాణికులను మరో రైలు ద్వారా వారి గమ్యస్థానాలకు తీసుకెళ్తున్నాం. సహాయక చర్యలు తక్షణమే ప్రారంభించామని’ తెలిపారు.

Hyderabad Crime: వనస్థలిపురంలో విషాదం.. ప్రేమ నిరాకరించిందని, యువతి ఇంట్లోనే బ్యాంక్ ఉద్యోగి ఆత్మహత్య!

Satyaprasad Bandaru — Tue, 10 Nov 2026 12:37:27 +0530

Hyderabad Crime: ఇష్టపడిన యువతి ప్రేమను నిరాకరించిందన్న మనస్తాపంతో ఓ యువకుడు బలవన్మరణానికి పాల్పడిన విషాద సంఘటన వనస్థలిపురం పోలీస్ స్టేషన్ పరిధిలో చోటుచేసుకుంది. పోలీసులు తెలిపిన వివరాల ప్రకారం... ఏపీలోని పశ్చిమగోదావరి జిల్లా ఆచంట మండలం శేషమ్మచెరువుకు చెందిన శివకుమార్ (25) ఓ ప్రైవేట్ బ్యాంకులో పనిచేస్తున్నాడు. గత కొన్నేళ్లుగా అతడు తన కుటుంబంతో కలసి హైదరాబాద్‌లోని కొత్తపేటలో ఉంటున్నాడు. ఈ క్రమంలోనే వనస్థలిపురానికి చెందిన ఓ 22 ఏళ్ల సాఫ్ట్‌వేర్ ఉద్యోగినితో శివకుమార్‌కు పరిచయం ఏర్పడి, స్నేహంగా మారింది.

ప్రేమను అంగీకరించలేదని

ఆదివారం రాత్రి మద్యం సేవించిన శివకుమార్, ఆ యువతి ఇంటికి వెళ్లాడు. తన ప్రేమను అంగీకరించాలని ఆమెను కోరగా, అందుకు ఆమె నిరాకరించింది. ఎన్నిసార్లు అడిగినా ఆమె ఒప్పుకోకపోవడంతో శివకుమార్ తీవ్ర మనస్తాపానికి గురయ్యాడు. శివకుమార్ తన ఇంటికి వచ్చిన విషయాన్ని యువతి శివకుమార్ స్నేహితుడికి ఫోన్ చేసి చెప్పింది. అతడిని ఆటో బుక్ చేసి ఇంటికి పంపించివేయాలని సూచించాడు.

Also Read: 9 సార్లు ఛాన్స్ ఇచ్చిన కాంగ్రెస్.. పార్టీ కార్యక్రమాలకు దూరంగా చిన్నారెడ్డి! అసలేం జరుగుతోంది?

యువతి ఇంట్లోనే

స్నేహితుడు చెప్పడంతో.. ఆ యువతి ఆటో బుక్ చేసింది. ఆటో ఇంటి ముందుకు వచ్చే సమయానికి తీవ్ర ఉద్వేగానికి లోనైన శివకుమార్, యువతి ఇంట్లోనే ఫ్యానుకు ఉరివేసుకున్నాడు. భయాందోళనకు గురైన యువతి వెంటనే ఆటో డ్రైవర్, స్థానికుల సాయంతో తలుపులు తెరిచి చూడగా, అప్పటికే శివకుమార్ ప్రాణాలు కోల్పోయాడు. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని స్వాధీనం చేసుకున్నారు. ఈ ఘటనపై కేసు నమోదు చేసి దర్యాప్తు జరుపుతున్నారు.

Also Read: కేసీఆర్ సైలెన్స్ - కేటీఆర్‌నే ఇక ప్రత్యర్థిగా రేవంత్ పరిగణిస్తున్నారా?

ACB Raids: రూ.2 లక్షలు లంచం తీసుకుంటూ ఏసీబీకి అడ్డంగా దొరికిన ఎస్సై

Shankar Dukanam — Mon, 9 Nov 2026 16:05:05 +0530

కీసర: మేడ్చల్ మల్కాజిగిరి జిల్లా కీసర పోలీస్ స్టేషన్‌లో మరో భారీ అవినీతి ఘటన వెలుగులోకి వచ్చింది. ఓ కేసులో చార్జ్‌షీట్ దాఖలు చేయడానికి సంబంధిత వ్యక్తి నుంచి రూ. 2 లక్షల లంచం డిమాండ్ చేశారు. ఆ మొత్తాన్ని తీసుకుంటుండగా ఎస్‌ఐ శ్రీనివాస్‌ను అవినీతి నిరోధక శాఖ (ఏసీబీ) అధికారులు రెడ్ హ్యాండెడ్‌గా పట్టుకున్నారు. నాగారంలోని శిల్పానగర్‌లో ఉన్న ఒక అపార్ట్‌మెంట్‌లో బాధితుడి నుంచి రూ. 2 లక్షల లంచం స్వీకరిస్తుండగా ఏసీబీ అధికారులు మెరుపు దాడి చేసి ఆయనను అదుపులోకి తీసుకున్నట్లు సమాచారం.

కీసర పోలీస్ స్టేషన్‌లో స్వల్ప వ్యవధిలోనే వరుసగా అవినీతి కేసులు నమోదవుతుండటం పోలీస్ శాఖలో కలకలం రేపుతోంది. ఇటీవల ఇదే పోలీస్ స్టేషన్‌కు చెందిన సీఐతో పాటు మరొక ఎస్‌ఐ కూడా లంచం కేసులో ఏసీబీకి చిక్కారు. ఆ ఘటన మరవకముందే ఇప్పుడు మరో ఎస్‌ఐ శ్రీనివాస్ రూ. 2 లక్షలు లంచం తీసుకుంటూ దొరికిపోవడంతో కీసర పీఎస్ అవినీతి అక్రమాలకు నిలయంగా మారిందన్న విమర్శలు వ్యక్తమవుతున్నాయి. ఉన్నతాధికారులు ఈ పోలీస్ స్టేషన్‌, అందులో పనిచేసే పోలీస్ సిబ్బందిపై నిఘా పెంచాలని స్థానికులు భావిస్తున్నారు.

Software Engineer Murder: పూజ చేసి బలిచ్చింది! సాఫ్ట్‌వేర్ ఇంజినీర్‌ను హత్య చేసిన ప్రియురాలు.. ఆమెతో పాటు తల్లి అరెస్ట్

Shankar Dukanam — Mon, 9 Nov 2026 15:28:15 +0530

కోల్‌కతా: పశ్చిమ బెంగాల్‌లోని కోల్‌కతాలో శనివారం అర్ధరాత్రి దారుణం జరిగింది. సహజీవనం చేస్తున్న ప్రియుడ్ని అతడి లవర్ దారుణంగా కత్తితో గొంతుకోసి హత్య చేసింది. కాళీ మాత పూజ చేసి అందులో భాగంగా కుట్ర చేసి యువకుడ్ని హత్య చేసినట్లు ప్రచారం జరుగుతోంది. విషయం బయటకు రావడంతో పోలీసులు సాఫ్ట్ వేర్ ఇంజినీర్ ప్రియురాలితో పాటు ఆమె తల్లిని అరెస్ట్ చేశారు. యువతి హత్య చేసినట్లు నిర్ధారణ కాగా, ఆమె తల్లి పాత్రపై విచారణ కొనసాగుతోంది. కోల్‌కతాలోని గరియా ప్రాంతంలో శనివారం అర్దరాత్రి దాటిన తరువాత సార్థక్ సర్కార్‌ అనే 25 ఏళ్ల సాఫ్ట్ వేర్ ఇంజినీర్ దారుణహత్యకు గురయ్యాడు. నరేంద్రపూర్ పోలీస్ స్టేషన్ పరిధిలోని గరియా ఫార్తాబాద్ పరిసర ప్రాంతాల్లో తీవ్ర భయాందోళనలు నెలకొన్నాయి.

ఉత్తర 24 పరగణాల జిల్లా బారాసత్‌కు చెందిన సార్థక్ సర్కార్‌ ఫార్తాబాద్‌లోని ఒక అద్దె ఫ్లాట్‌లో సంచాలిక బసుతో కలిసి నివాసం ఉంటున్నాడు. వీరు కొంతకాలం నుంచి ఇక్కడ సహజీవనం చేస్తుండగా.. వీరితో పాటు యువతి తల్లి ఉంటున్నారని తెలుస్తోంది. శనివారం రాత్రి టెకీ సార్థక్, సంచాలికల మధ్య ఒక విషయమై గొడవ జరిగింది. వాగ్వాదం మరింత ముదరడంతో సంచాలిక కత్తితో సార్థక్ భుజంపై పొడిచింది. అతడు కుప్పకూలిపోగా కత్తితో పొడిచి, గొంతుకోసి హత్య చేసింది.

బయటకు వచ్చి కేకలు వేయడంతో పొరుగింటి వారు వెళ్లి చూడగా, రక్తపు మడుగులో స్పృహతప్పి పడి ఉన్న సార్థక్‌ను చూశారు. అతడ్ని సమీపంలోని ఆసుపత్రికి తరలించగా, అప్పటికే అతడు చనిపోయాడని నిర్ధారించారు. అదే సమయంలో యువకుడి హత్యపై పోలీసులకు సమాచారం రావడంతో నరేంద్రపూర్ పీఎస్ సిబ్బంది ఘటనా స్థలానికి చేరుకుని పరిశీలించారు. ప్రాథమిక విచారణ అనంతరం లవర్ సంచాలికతో పాటు ఆమె తల్లి మౌమిత బసును అరెస్టు చేశారు. సంచాలిక తల్లి పాత్రపై పోలీసులు విచారణ చేపట్టారు. ఆ సమయంలో ఆమె ఫ్టాట్ లో ఉందా, గొడవలో ఆమె ఇన్వాల్స్ మెంట్ ఉందా లేదా అనేది స్థానికంగా ఆసక్తి రేపుతోంది. కాళీ మాతకు పూజలు చేసి కుట్ర ద్వారా ప్రియుడ్ని హత్య చేశారని స్థానికంగా వైరల్ అవుతోంది. నిజంగానే బలిచ్చిందా, లేక గొడవలో ఆవేశంతో హత్య చేసిందా పోలీసుల విచారణలో తేలనుంది.

మృతుడు సార్థక్ సర్కార్ తండ్రి సుజయ్ సర్కార్ మాట్లాడుతూ.. యువతి పక్కా ప్లాన్ ప్రకారమే ఈ హత్య చేసింది. సార్థక్ డైమండ్ హార్బర్‌కు బయలుదేరగా, కారు పాడవడంతో చెల్లెలి కారు తీసుకుని ప్రియురాలు సంచాలిక ఫ్లాట్‌కు వెళ్లాడు. ఈ క్రమంలో శనివారం అర్ధరాత్రి నా కుమార్తె ఫోన్ చేసి సార్థక్ పరిస్థితి విషమంగా ఉందని తీవ్ర గాయాలయ్యాయని చెప్పింది. ప్లాన్ ప్రకారమే సంచాలిక నా కుమారుడ్ని హత్య చేసిందని’ ఆయన ఆరోపించారు.

Hyderabad Fire Accident: హైదరాబాద్‌లో దీపావళి వేళ వరుస అగ్నిప్రమాదాలు.. భారీగా ఆస్తి నష్టం, తప్పిన ప్రాణనష్టం

Satyaprasad Bandaru — Mon, 9 Nov 2026 11:27:38 +0530

Hyderabad Fire Accident: దీపావళి పండుగ వేళ హైదరాబాద్‌లోని పలు ప్రాంతాల్లో వరుసగా అగ్నిప్రమాదాలు చోటుచేసుకున్నాయి. ఈ ఘటనపై ప్రజలను తీవ్ర భయాందోళనలకు గురి అయ్యారు. ఒకవైపు పటాకుల మోతలతో నగరం హోరెత్తుతుంటే, మరోవైపు ఎక్కడ ఎలాంటి ప్రమాదం జరుగుతుందోనని స్థానికులు కంటిమీద కునుకు లేకుండా గడిపారు.

కూకట్‌పల్లిలో భారీ అగ్ని ప్రమాదం

కూకట్‌పల్లిలోని ఆస్బెస్టాస్ కాలనీలో సోమవారం తెల్లవారుజామున ఒక పేపర్ టీ కప్పులు, ప్లేట్ల తయారీ కంపెనీలో మంటలు చెలరేగాయి. ఈ మంటలు వేగంగా పక్కనే ఉన్న నెయ్యి, కుర్‌కురే, హల్దీరామ్ స్టాక్ గోదాములకు విస్తరించాయి. సమాచారం అందుకున్న అగ్నిమాపక సిబ్బంది 4 ఫైర్ ఇంజిన్ల సహాయంతో మంటలను అదుపులోకి తీసుకొచ్చారు. ఈ ప్రమాదానికి షార్ట్ సర్క్యూట్ కారణం కావచ్చని అనుమానిస్తున్నారు.

వివిధ ప్రాంతాల్లో అగ్ని ప్రమాదాలు

సీతాఫల్‌మండిలో బాణసంచా కాల్చే సమయంలో ఒక రాకెట్ నేరుగా బాణసంచా దుకాణంలోకి దూసుకెళ్లడంతో షాపులోని క్రాకర్స్ అన్నీ ఒక్కసారిగా పేలి భారీగా మంటలు ఎగసిపడ్డాయి. దీంతో రోడ్డుపై ఉన్న ప్రజలు, వాహనదారులు భయంతో పరుగులు తీశారు.

కాటేదాన్ లోని ఒక పరిశ్రమలో మంటలు చెలరేగి పక్కనే ఉన్న ప్లైవుడ్ తయారీ కేంద్రానికి వ్యాపించాయి. దట్టమైన నల్లటి పొగ రావడంతో స్థానికులు ఉక్కిరిబిక్కిరి అయ్యారు. అయితే ఈ పరిశ్రమలకు ఎటువంటి అనుమతులు లేవని అధికారులు వెల్లడించారు. బేగంబజార్‌లోని ఒక భవనంపై బాణసంచా నిప్పులు పడటంతో మంటలు చెలరేగాయి. జీడిమెట్లలోని ఒక స్క్రాప్ దుకాణంలో బాణసంచా వల్ల మంటలు వ్యాపించి షాపు పూర్తిగా ఆహుతైంది. మైలార్‌దేవ్‌పల్లి ఓల్డ్ విలేజ్‌లోని డెకరేషన్ గోదాంలో, అలాగే సికింద్రాబాద్ బండిమెట్‌లోని డిస్ట్రిబ్యూటర్ డ్రగ్ మార్ట్‌లో అగ్నిప్రమాదాలు సంభవించాయి.

అదృష్టవశాత్తూ ఈ ప్రమాదాలన్నింటిలోనూ ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు. అయితే, రూ. లక్షల్లో ఆస్తి నష్టం జరిగిందని బాధితులు ఆవేదన వ్యక్తం చేస్తున్నారు. అగ్నిమాపక సిబ్బంది, పోలీసులు వెంటనే స్పందించి మంటలను అదుపు చేయడంతో పెను ప్రమాదాలు తప్పాయి.

Also Read: ధరణి అక్రమాలపై సీఐడీ ఉక్కుపాదం - బీఆర్ఎస్ నేతల మెడకు భూ కుంభకోణం చుట్టుకోనుందా?

48 మందికి కంటి గాయాలు

దీపావళి పండుగ వేళ బాణసంచా కాల్చుతూ పలువురు ప్రమాదాలకు గురయ్యారు. కంటి గాయాలతో బాధితులు సరోజినీ దేవి కంటి ఆసుపత్రిలో చేరారు. బాణసంచా పేల్చుతూ 48 మంది కంటి గాయాలతో ఆస్పత్రికి వచ్చినట్లు డాక్టర్లు తెలిపారు. వీరిలో 38 మంది అవుట్ పేషెంట్, మరో 10 మంది ఇన్ పేషెంట్లుగా జాయిన్ అయ్యారు. నవంబర్ 9వ తేదీ ఉదయం 6 గంటల వరకు ఈ కేసులు నమోదయ్యాయని వైద్యులు వెల్లడించారు.

Also Read: దీపావళి రోజు గచ్చిబౌలిలో విషాదం.. ఒకే కుటుంబానికి చెందిన ముగ్గురు ఆత్మహత్య

Fake Death Certificate: ఫేక్ డెత్ సర్టిఫికెట్‌తో కారుణ్య నియామకం.. నల్గొండలో 14 మంది అరెస్ట్

Shankar Dukanam — Sun, 8 Nov 2026 19:21:24 +0530

Job Scam In Nalgonda District | నకిలీ మరణ ధ్రువీకరణ పత్రాన్ని (Fake Death Certificate) సృష్టించి కారుణ్య నియామకం పొందిన ఘటన సంచలనం రేపింది. నల్గొండ జిల్లా వైద్యారోగ్య శాఖకు సంబంధించిన కేసును పోలీసులు ఛేదించారు. ఈ కేసులో అక్రమంగా ఉద్యోగం సాధించిన వ్యక్తితో పాటు అతనికి ప్రత్యక్షంగా, పరోక్షంగా సహకరించిన బంధువులు, మున్సిపల్ వైద్య ఆరోగ్య శాఖ అధికారులు, సిబ్బందితో కలిపి మొత్తం 14 మందిని పోలీసులు అరెస్టు చేసి రిమాండ్‌కు తరలించారు. ఈ కుట్రలో ప్రమేయం ఉండి ప్రస్తుతం పరారీలో ఉన్న మరో ఇద్దరి కోసం పోలీసులు గాలింపు చర్యలు చేపట్టారు.

పోలీసులు తెలిపిన వివరాల ప్రకారం.. శాలిగౌరారం ప్రాథమిక ఆరోగ్య కేంద్రం (PHC)లో హెల్త్ అసిస్టెంట్‌గా పనిచేసిన చామకూరి వెంకటేశ్వర్లు గతేడాది మే 31న రిటైర్డ్ అయ్యారు. ఆ తర్వాత ఆయన కిడ్నీ సంబంధిత సమస్యలతో చికిత్స పొందుతూ నవంబర్ 17న మరణించారు. అయితే, వెంకటేశ్వర్లు సర్వీస్‌లో ఉండగానే ఆయన చనిపోయినట్లు నకిలీ డెత్ సర్టిఫికెట్ సృష్టించి, ఆయన కుమారుడు చామకూరి రాజు దామరచర్ల పీహెచ్‌సీలో కారుణ్య నియామకం కింద జాబ్ సంపాదించాడు. ఈ నకిలీ సర్టిఫికెట్స్ వ్యవహారం బయటపడటంతో మున్సిపల్ కమిషనర్ పోలీసులకు ఫిర్యాదు చేశారు. కేసు నమోదు చేసి, రంగంలోకి దిగిన పోలీసులు దర్యాప్తు చేపట్టి ఈ ముఠా గుట్టును రట్టు చేశారు.

Also Read: Hyderabad Crime News: హైదరాబాద్‌లో వైన్స్ షాప్ వద్ద ‘చిల్లర’ వివాదం.. సిబ్బంది దాడిలో ఒకరి మృతి

Hyderabad Crime News: హైదరాబాద్‌లో వైన్స్ షాప్ వద్ద ‘చిల్లర’ వివాదం.. సిబ్బంది దాడిలో ఒకరి మృతి

Shankar Dukanam — Sun, 8 Nov 2026 17:31:00 +0530

Man Dies at Wine Shop in Hyderabad | హైదరాబాద్‌లో పండుగ పూట ఒక కుటుంబంలో విషాదం చోటుచేసుకుంది. మద్యం కొనుగోలు చేసేందుకు వెళ్లిన వ్యక్తి.. వైన్స్ షాపు వద్ద జరిగిన ఘర్షణలో సిబ్బంది దాడిలో తీవ్రంగా గాయపడి మృతిచెందాడు. పండుగ పూట మద్యం తాగి సరదాగా గడపాలనుకుంటే ఏకంగా ప్రాణం పోవడంతో ఆ కుటుంబ సభ్యులు ఆవేదన వ్యక్తం చేస్తున్నారు.

అసలేం జరిగిందంటే..
హైదరాబాద్‌లోని అత్తాపూర్ పిల్లర్ నంబర్ 140 సమీపంలో ఉన్న ఒక వైన్ షాప్‌లో మద్యం కొనేందుకు నాగరాజు (45) అనే వ్యక్తి వెళ్లాడు. మద్యం కొనుగోలు చేయడానికి వచ్చిన నాగరాజుకు, వైన్ షాప్ సిబ్బందికి మధ్య చిల్లర డబ్బుల విషయమై వాగ్వాదం జరిగింది. ఈ వాగ్వాదం ముదిరి ఘర్షణకు దారితీసింది.

ఈ క్రమంలో వైన్స్ సిబ్బంది దాడి చేయడంతో గుండె భాగంలో తీవ్రమైన గాయం కావడంతో నాగరాజు అక్కడికక్కడే కుప్పకూలిపోయాడు. ఇది గమనించిన తోటివారు వెంటనే ఆయనను సమీపంలోని ఆసుపత్రికి తరలించారు. అయితే, పరీక్షించిన డాక్టర్లు అప్పటికే నాగరాజు మృతి చెందినట్లు నిర్ధారించారు. ఈ దారుణ ఘటనపై మృతుడి కుటుంబ సభ్యులు అత్తాపూర్ పోలీస్ స్టేషన్‌లో ఫిర్యాదు చేశారు. ఈ ఘటనపై కేసు నమోదు చేసిన పోలీసులు దర్యాప్తు చేపట్టారు.

చిల్లర డబ్బుల వివాదం.. ఆర్టీసీ కండక్టర్ మృతి

మణుగూరు డిపోకు చెందిన ఆర్టీసీ మహిళా కండక్టర్ గుండ్ల ప్రవళిక హైదరాబాద్‌లోని ఆసుపత్రిలో చికిత్స పొందుతూ నవంబర్ 4న మృతి చెందారు. అక్టోబర్ 25న మణుగూరు నుంచి భద్రాచలం వెళ్తున్న పల్లె వెలుగు బస్సులో బాలుడి టికెట్, చిల్లర విషయంలో మిట్టగూడెంకు చెందిన ఓ మహిళా ప్రయాణికురాలు కండక్టర్ ప్రవళికతో వాగ్వాదానికి దిగింది.

మిట్టగూడెం వద్ద సదరు ప్రయాణికురాలు దిగేందుకు ప్రయత్నించగా, కండక్టర్ ఆమెను అశ్వాపురం పోలీస్ స్టేషన్‌కు తీసుకెళ్లేందుకు బస్సును ముందుకు పోనివ్వాలని డ్రైవర్‌కు చెప్పారు. దాంతో భయాందోళనకు గురైన ప్రయాణికురాలు కండక్టర్‌ ప్రవళికను తోసివేయడంతో, కదులుతున్న బస్సు వెనుక చక్రాల కింద పడి తీవ్రంగా గాయపడ్డారు.

తొలుత భద్రాచలం ప్రభుత్వ ఆసుపత్రికి, అనంతరం మెరుగైన వైద్యం కోసం హైదరాబాద్ తరలించినా ఫలితం దక్కలేదు. 10 రోజుల చికిత్స తర్వాత ఆమె కన్నుమూశారు. ఈ ఘటనపై కేసు నమోదు చేసి ప్రయాణికురాలిని అదుపులోకి తీసుకున్నట్లు సీఐ ఎల్లయ్య తెలిపారు. ప్రభుత్వం రూ.10 లక్షల పరిహారంతో పాటు ఆమె తల్లికి ప్రభుత్వ ఉద్యోగం, రూ. 1 కోటి ఇన్సూరెన్స్ అందిస్తామని మంత్రి పొన్నం ప్రభాకర్ ప్రవళిక కుటుంబానికి భరోసా ఇచ్చారు.