Hyderabad ORR Accident: ఔటర్ పై రోడ్డు ప్రమాదంలో ఇద్దరు మృతి.. టైర్ పేలడంతో పల్టీలు కొట్టిన ఆటో

Dilsukhnagar Santoshimatha Temple: దిల్‌సుఖ్‌నగర్ సంతోషిమాత ఆలయంలో అలజడి.. విగ్రహం ధ్వంసానికి యత్నించిన నిందితుడి అరెస్ట్

Shankar Dukanam — Fri, 2 Oct 2026 12:10:07 +0530

Vandalising Idol at Santoshimatha Temple in Dilsukhnagar | హైదరాబాద్‌: నగరంలోని ఓ ఆలయంలో ఓ దుండగుడు చేసిన పని కలకలం రేపింది. ఎల్బీనగర్ నియోజకవర్గ పరిధిలోని దిల్‌‌సుఖ్‌నగర్ సంతోషిమాత గుడిలో ముస్లిం వ్యక్తి వీరంగం చేశాడు. పూజారిపై దాడి చేసిన ఆ నిందితుడు అంతడితో ఆగకుండా కర్రతో అమ్మవారి విగ్రహంపై దాడి చేశాడు. ఇది గమనించిన భక్తులు వెంటనే అప్రమత్తమై ఆ వ్యక్తిని అడ్డుకుని చితకబాదారు. నిందితుల్ని పోలీసులకు అప్పగించారు.

చైతన్యపురి పోలీస్ స్టేషన్ పరిధిలోకి వచ్చే సంతోషిమాత ఆలయంలో శుక్రవారం ఉదయం జరిగిన ఘటన తీవ్ర కలకలం రేగింది. దిల్‌సుఖ్‌నగర్ బస్సు డిపో పక్కనే ఉన్న ప్రముఖ సంతోషిమాత టెంపుల్ లోకి ఉదయం దాదాపు 10:05 గంటల ప్రాంతంలో మహమ్మద్ అన్సారీ అనే వ్యక్తి ప్రవేశించి హల్‌చల్ చేశాడు. ఆలయంలోకి చొరబడిన అతడు "అల్లాహు అక్బర్" అని నినాదాలు చేస్తూ తన చేతిలో ఉన్న కర్రతో పూజారిపై దాడికి యత్నించాడు. అంతటితో ఆగకుండా ఏకంగా అమ్మవారి విగ్రహాన్ని కర్రతో కొడుతూ ధ్వంసం చేసే ప్రయత్నం చేశాడు.

ఈ ఆకస్మిక ఘటనతో అప్రమత్తం అయిన ఆలయ పూజారి, అక్కడున్న భక్తులు వెంటనే స్పందించి నిందితుడు అన్సారిని పట్టుకున్నారు. అనంతరం పూజారి, భక్తులు డయల్ 100 ద్వారా చైతన్యపురి పోలీసులకు సమాచారం అందించారు. సమాచారం అందుకున్న వెంటనే స్థానిక చైతన్యపురి పోలీసులు సంఘటనా స్థలానికి చేరుకుని, నిందితుడిని అదుపులోకి తీసుకుని పోలీస్ స్టేషన్‌కు తరలించారు. ప్రస్తుతం చైతన్యపురి పోలీసులు కేసు నమోదు చేసి దర్యాప్తు చేస్తున్నారు.

హైదరాబాద్‌లో DRI దాడి.. 4 ఏనుగు దంతాలు స్వాధీనం, ముగ్గురు అరెస్ట్

Satyaprasad Bandaru — Fri, 2 Oct 2026 11:42:28 +0530

Elephant Tusks Seized: హైదరాబాద్‌లో వన్యప్రాణుల అక్రమ రవాణాకు పాల్పడుతున్న ముగ్గురు వ్యక్తులను డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు అరెస్ట్ చేశారు. నిందితుల నుంచి దాదాపు 17 కిలోల బరువున్న నాలుగు ఏనుగు దంతాలను, అలాగే వాటితో చెక్కిన ఐవరీ (దంతపు) ట్రోఫీలను అధికారులు స్వాధీనం చేసుకున్నారు. కచ్చితమైన సమాచారంతో రంగంలోకి దిగిన DRI అధికారులు, నిందితులు ఏనుగు దంతాలను విక్రయిస్తున్న సమయంలో వారిని రెడ్‌హ్యాండెడ్‌గా పట్టుకున్నారు. వన్యప్రాణి సంరక్షణ చట్టం, 1972 (Wild Life (Protection) Act, 1972) లోని రూల్స్ ప్రకారం ఏనుగు దంతాలను స్వాధీనం చేసుకున్నట్లు అధికారులు తెలిపారు. స్వాధీనం చేసుకున్న ఏనుగు దంతాల మూలం, నిందితుల నెట్‌వర్క్, అక్రమ లావాదేవీలకు సంబంధించిన వివరాలపై దర్యాప్తు కొనసాగుతోందని పేర్కొన్నారు.

Also Read: హైదరాబాద్‌లో మేడ్ ఇన్ పాకిస్థాన్ కాస్మెటిక్స్ అమ్మకాలు- టాస్క్‌ఫోర్స్ మెరుపు దాడులు - ఇక్కడికెలా తెచ్చారు?

వన్యప్రాణి సంరక్షణ చట్టం ప్రకారం

1972 నాటి వన్యప్రాణి సంరక్షణ చట్టం ప్రకారం ఏనుగు దంతాల వ్యాపారం లేదా వాటితో తయారు చేసిన వస్తువుల అమ్మకం, కొనుగోలు చట్టరీత్యా తీవ్రమైన నేరం. ఈ చట్టాన్ని ఉల్లంఘిస్తే కఠినమైన జైలు శిక్ష, భారీ జరిమానాలు విధిస్తారు. దేశంలో వన్యప్రాణుల అక్రమ రవాణా, అంతర్జాతీయ జంతు సంబంధ ఉత్పత్తుల అక్రమ వ్యాపారాన్ని అడ్డుకోవడంలో డీఆర్ఐ కీలక పాత్ర పోషిస్తుంది. అటవీ, వన్యప్రాణి సంరక్షణ శాఖలతో సమన్వయం చేసుకుంటూ ఇలాంటి అసాంఘిక కార్యకలాపాలపై నిరంతరం నిఘా ఉంచుతుంది.

ఏనుగులు అంతరించిపోతున్న జీవుల జాబితాలో ఉన్నాయి. కేవలం దంతాల కోసమే అక్రమంగా ఏనుగులను వేటాడటం వల్ల పర్యావరణ సమతుల్యత దెబ్బతింటుంది. ఇలాంటి అక్రమ రవాణా సమాచారం తెలిస్తే వెంటనే అటవీ శాఖ అధికారులకు లేదా పోలీసులకు సమాచారం అందించాలని అధికారులు సూచిస్తున్నారు.

Also Read: ఒంగోలులో 'ఇరుముడి' తరహా ఘటన.. రిటైర్డ్ ఉద్యోగి ఇంటికి బాలికలను పంపిన వంట మనిషి!

Pakistan Cosmetics Hyderabad: హైదరాబాద్‌లో మేడ్ ఇన్ పాకిస్థాన్ కాస్మెటిక్స్ అమ్మకాలు- టాస్క్‌ఫోర్స్ మెరుపు దాడులు - ఇక్కడికెలా తెచ్చారు?

Raja Sekhar Allu — Thu, 1 Oct 2026 17:42:31 +0530

Pakistani Beauty Products Hyderabad: భాగ్యనగరంలో నిషేధిత, నాణ్యతా ప్రమాణాలు లేని ఉత్పత్తుల విక్రయాలపై హైదరాబాద్ టాస్క్‌ఫోర్స్ పోలీసులు విరుచుకుపడ్డారు. మేడ్ ఇన్ పాకిస్థాన్ లేబుళ్లతో కూడిన బ్యూటీ ప్రొడక్ట్స్ , కాస్మెటిక్స్‌ను అక్రమంగా విక్రయిస్తున్నారన్న విశ్వసనీయ సమాచారంతో టాస్క్‌ఫోర్స్ బృందాలు మెరుపు దాడులు నిర్వహించాయి. నాంపల్లి ప్రభుత్వ ఆసుపత్రి పరిసర ప్రాంతాలతో పాటు ఓల్డ్ సిటీ, హబీబ్ నగర్ పోలీస్ స్టేషన్ పరిధిలోని పలు కాస్మెటిక్ దుకాణాలు, మెడికల్ స్టోర్లలో బుధవారం సంయుక్త బృందాలు ఏకకాలంలో సోదాలు చేపట్టాయి.

నాంపల్లి, హబీబ్ నగర్ తదితర ప్రాంతాల్లో నిర్వహించిన ఈ సోదాల్లో భారీ ఎత్తున పాకిస్థాన్‌లో తయారైన సౌందర్య సాధనాలు, ఫేస్ క్రీమ్‌లను అధికారులు స్వాధీనం చేసుకున్నారు. ఈ దాడుల సందర్భంగా కేవలం పాక్ ఉత్పత్తుల విక్రయమే కాకుండా, ఎలాంటి అనుమతులు, సరైన బిజినెస్ లైసెన్సులు లేకుండానే కొన్ని దుకాణాలను నిర్వహిస్తున్నట్లు పోలీసులు గుర్తించారు. ఈ పాకిస్థానీ కాస్మెటిక్స్‌లో ప్రమాదకర రసాయనాలతో పాటు అత్యధిక స్థాయిలో మెర్క్యురీ ఉండే అవకాశాలు ఉన్నాయని పోలీసులు, వైద్య నిపుణులు హెచ్చరిస్తున్నారు. వీటిని వినియోగించడం వల్ల చర్మ సంబంధిత వ్యాధులు, అలర్జీలు, తీవ్రమైన మోచేతి లేదా ముఖంపై మచ్చలు రావడమే కాకుండా దీర్ఘకాలంలో కిడ్నీ సంబంధిత తీవ్ర సమస్యలు తలెత్తే ప్రమాదం ఉందని ఆందోళన వ్యక్తమవుతోంది. లాభాపేక్షతో ప్రజల ఆరోగ్యంతో చెలగాటమాడుతున్న వ్యాపారుల నిర్వాకంపై అధికారులు ఆగ్రహం వ్యక్తం చేస్తున్నారు.

unauthorised #Pakistan-made cosmetics seized from 3 Nampally shops in a Task Force-CDSCO raid in #Hyderabad. A suspected #Mumbai supplier allegedly linked to the supply chain is under probe, along with five local sellers. Investigation underway. pic.twitter.com/HzQLRKZvSu
— Ashish (@KP_Aashish) October 1, 2026

గతంలోనే పాకిస్తాన్ తో అన్ని రకాల వాణిజ్యాన్ని భారత్ ఆపేసింది. అయినా పాక్ వస్తువుల అక్రమ దిగుమతి, విక్రయాల అంశం దుమారానికి దారితీస్తోంది. నగరంలో పాక్ ఉత్పత్తులను పూర్తిగా నిషేధించి, ఇలాంటి దందాలకు పాల్పడుతున్న సూత్రధారులపై చట్టపరమైన కఠిన చర్యలు తీసుకోవాలని పలు వర్గాలు డిమాండ్ చేస్తున్నాయి. ఈ నిషేధిత కాస్మెటిక్స్ నగరానికి ఎలా వచ్చాయనే కోణంలో పోలీసులు లోతైన విచారణ జరుపుతున్నారు. ఇతర రాష్ట్రాల గుండా స్మగ్లింగ్ మార్గాల్లో తీసుకొచ్చారా? లేక ఆన్‌‌లైన్ సప్లై నెట్‌వర్క్ ఏమైనా ఉందా? అనే కోణంలో దర్యాప్తు వేగవంతం చేశారు. నిబంధనలను ఉల్లంఘించి చట్టవిరుద్ధంగా పాక్ ప్రొడక్ట్స్ విక్రయించే వ్యాపారులపై కఠిన చట్టాల కింద కేసులు నమోదు చేస్తామని, నగరవ్యాప్తంగా తనిఖీలు కొనసాగుతాయని పోలీసులు స్పష్టం చేశారు.

Irumudi Like Incident In Ongole: ఒంగోలులో 'ఇరుముడి' తరహా ఘటన.. రిటైర్డ్ ఉద్యోగి ఇంటికి బాలికలను పంపిన వంట మనిషి!

Satyaprasad Bandaru — Thu, 1 Oct 2026 12:56:48 +0530

Irumudi Like Incident In Ongole: ఇటీవల విడుదలైన ఇరుముడి మూవీలో స్కూల్ పిల్లలను ఓ ప్రజాప్రతినిధి వద్దకు ఓ టీచర్ పంపిస్తుంది. ఇలాంటి తరహా సంఘటనే ఏపీలోని ఒంగోలులో చోటుచేసుకుంది. జరుగుమల్లి ప్రభుత్వ బీసీ గర్ల్స్ హాస్టల్ పదో తరగతి విద్యార్థిని, తొమ్మిదో తరగతి విద్యార్థిని.. సెప్టెంబరు 29న ఉదయం 11 గంటల సమయంలో ఒంగోలు గోపాల్‌నగర్‌లో నివాసం ఉంటున్న రిటైర్డ్ ఉద్యోగి వెంకటరావు ఇంటికి వెళ్లారు. వంట మనిషి శారద చెప్పడంతో వారిద్దరూ అక్కడికి వెళ్లినట్లు అధికారుల విచారణలో తేలింది. రిటైర్డ్ ఉద్యోగి వెంకటరావు తమతో అసభ్యంగా ప్రవర్తించాడని బాలికలు చెప్పినట్లు అధికారులు తెలిపారు.

అసలేం జరిగింది?

ప్రకాశం జిల్లా మద్దిపాడు మండలం పెద్ద కొత్తపల్లి గ్రామానికి చెందిన ఇద్దరు బాలికలు స్నేహితులు. వీరు జరుగుమల్లి జిల్లా పరిషత్ హైస్కూల్‌లో ‌తొమ్మిది, పదో తరగతి చదువుతున్నారు. జరుగుమల్లి బీసీ హాస్టల్‌లో ఉంటూ చదువుకుంటున్నారు. వీరిద్దరూ మంగళవారం ఉదయం 11 గంటలకు జరుగుమల్లిలో ఆటో ఎక్కి ఒంగోలు గోపాల్ నగర్ ఉంటున్న డీఆర్‌‌డీఎ రిటైర్డ్ ఉద్యోగి వెంకటరావు ఇంటికి వెళ్లారు. బీసీ హాస్టల్లో వంట చేస్తున్న శారదకు వెంకట్రావుతో పరిచయం ఉంది. శారద బాలికలకు వెంకట్రావు సెల్ నెంబర్ ఇచ్చి అక్కడికి పంపించింది. వెంకట్రావు వీరిద్దరికీ బిర్యానీ తినిపించాడు. ఆ తర్వాత తన ఫోనులో వారికి నీలి చిత్రాలు చూపించాడు. వెంకట్రావు ప్రవర్తనపై అనుమానం వచ్చిన తొమ్మిదో తరగతి విద్యార్థిని తన స్నేహితురాలితో కలిసి అక్కడి నుంచి బయటకు వెళ్లిపోయారు. ఒంగోలు పార్కులో సాయంత్రం వరకు ఉండి, తిరిగి వెంకట్రావు ఇంటికి వెళ్లారు. ఆ సమయంలో అతడు బాలికల పట్ల అసభ్యకరంగా ప్రవర్తించారు. దీంతో బాలికలు డయల్ 112 నంబర్‌కు ఫోన్ చేసి సమాచారం అందించారు. ఈ ఘటనపై సమాచారం అందుకున్న పోలీసులు వెంకట్రావుని అదుపులోకి తీసుకున్నారు. అతడిని ఒంగోలు రెండో పట్టణ పోలీస్ స్టేషన్‌కు తరలించి పోక్సో కేసు నమోదు చేశారు.

Also Read: వైఎస్ వివేకా హత్య కేసులో ED దూకుడు - రూ. 40 కోట్ల సుపారీ గుట్టు విప్పేందుకేనా? సీబీఐ వదిలిన లింక్ పట్టేసుకుందా?

ఈ ఘటనపై బీసీ వెల్ఫేర్ అధికారులు ఆరా

ఈ సంఘటనపై బీసీ వెల్ఫేర్ అధికారి నిర్మల జ్యోతి, జరుగుమల్లి తహసీల్దార్ వెంకటేశ్వరరావు బీసీ హాస్టల్‌లో విచారణ చేపట్టారు. వంట మనిషి శారదను బాధ్యతను నుంచి తొలగించారు. హాస్టల్ వార్డెన్ తెరెజమ్మపై క్రమశిక్షణ ఉల్లంఘన చర్యలు తీసుకోవాలని ఆదేశించారు. అంతర్గత కమిటీ ఈ ఘటనపై విచారణ చేస్తున్నట్లు బీసీ వెల్ఫేర్ అధికారి నిర్మల జ్యోతి తెలిపారు. శారదను, తెరేజమ్మను విచారణ కోసం జరుగుమల్లి ఎస్‌ఐ భాగ్యరాజ్ ఒంగోలుకు తరలించారు.

Also Read: ఏపీ స్థానిక ఎన్నికలకు లైన్ క్లియర్ - 6 వారాల్లో ప్రక్రియ మొదలుపెట్టాలని హైకోర్టు ఆదేశం!

Case Filed On Veeramachaneni: వీఆర్‌కే డైట్ వీరమాచినేని రామకృష్ణపై కేసు నమోదు.. అనధికార వైద్య సలహాలు చేస్తున్నారని ఆరోపణలు!

Satyaprasad Bandaru — Wed, 30 Sep 2026 12:53:37 +0530

Case Filed On Veeramachaneni: హైదరాబాద్‌ రాయదుర్గంలోని ‘వీఆర్‌కే హెల్త్‌ కేర్‌ సెంటర్‌’ వ్యవస్థాపకుడు వీరమాచినేని రామకృష్ణ మరోసారి వివాదంలో చిక్కుకున్నారు. సోషల్ మీడియా వేదికగా అనధికార వైద్య సలహాలు ఇస్తూ, రోగుల ప్రాణాలతో చెలగాటమాడుతున్నారన్న ఆరోపణలతో ఆయనపై సైబరాబాద్‌ ఈవోడబ్ల్యూ పోలీసులు కేసు నమోదు చేశారు. నిర్మల్‌ జిల్లాకు చెందిన 30 ఏళ్ల యువకుడు కొంతకాలంగా డయాబెటిస్ తో బాధపడుతూ, రెగ్యులర్‌గా ఇన్సులిన్‌ వాడుతున్నారు. ఈ క్రమంలో సోషల్ మీడియాలో వచ్చిన వీఆర్‌కే డైట్‌ యాడ్ చూశాడు. ఎలాంటి మందులు వాడకుండానే కేవలం డైట్‌తోనే మధుమేహాన్ని పూర్తిగా నయం చేయవచ్చని ఆ యాడ్‌లో చూసి నిర్వాహకులను సంప్రదించాడు.

ఇందుకోసం రూ. 26 వేలు చెల్లించగా వీఆర్‌కే సిబ్బంది సూచించిన డైట్‌ను ఈ నెల 12న ప్రారంభించాడు. అయితే, ఆ డైట్‌ ప్రారంభించిన రెండు రోజులకే అతడు తీవ్రమైన డీహైడ్రేషన్‌కు గురై అస్వస్థతకు లోనయ్యాడు. కుటుంబ సభ్యులు వెంటనే అతడిని స్థానిక ఆసుపత్రికి తరలించగా, అత్యవసర చికిత్స అందించాల్సి వచ్చింది. ఈ చికిత్స కోసం బాధితుడికి రూ. 58 వేలకు పైగా ఆసుపత్రి బిల్లు అయింది. దీంతో మోసపోయామని గ్రహించిన బాధితుడు, తన ప్రాణాలకు ముప్పు తెచ్చేలా తప్పుడు వైద్య సలహాలు ఇచ్చారని ఈ నెల 24న రాయదుర్గం పోలీసులను ఆశ్రయించి ఫిర్యాదు చేశాడు. ఈ ఫిర్యాదుపై పోలీసులు కేసు నమోదు చేసి దర్యాప్తు చేస్తున్నారు.

Also Read: డేటింగ్ పేరుతో పబ్‌కు తీసుకెళ్లి 29వేలు బిల్ కట్టించింది. హైదరాబాద్ టెకీకి షాక్ ఇచ్చిన సుందరి

కోర్టును ఆశ్రయించిన వైద్యులు

మరోవైపు, సోషల్ మీడియాలో ‘వీఆర్‌కే డైట్‌’ పేరిట అనధికార వైద్య సలహాలు ఇవ్వడమే కాకుండా, అల్లోపతి వైద్యులపై అనుచిత వ్యాఖ్యలు చేస్తున్నారంటూ ‘హెల్త్‌కేర్‌ రిఫార్మ్స్‌ డాక్టర్స్‌ అసోసియేషన్‌’ ఇటీవల కోర్టులో కేసు దాఖలు చేసింది. దీనికి సంబంధించి సిటీ సివిల్‌ కోర్టులో విచారణ జరగాల్సి ఉండగా, అది నవంబరు 25కి వాయిదా పడింది. ఈ వివాదంలో వీరమాచినేని రామకృష్ణకు కోర్టు సమన్లు కూడా జారీ చేసింది.

శాస్త్రీయ ఆధారాలు లేని, సోషల్ మీడియా డైట్లను గుడ్డిగా నమ్మి మధుమేహం వంటి దీర్ఘకాలిక వ్యాధులు ఉన్న వారు ఇన్సులిన్‌ లేదా సాధారణ మందులను ఆపేయడం వల్ల ప్రాణాపాయం సంభవించే ప్రమాదం ఉందని నిపుణులు హెచ్చరిస్తున్నారు. అర్హత లేని వ్యక్తులు వైద్య సలహాలు ఇవ్వడం, నిర్దిష్ట వ్యాధులను నయం చేస్తామని ప్రకటనలు చేయడం చట్టరీత్యా నేరమని వైద్య నిపుణులు తెలిపారు.

Also Read: హైదరాబాద్‌లో దారుణం.. పెళ్లి పేరుతో నమ్మించి ఓయోలో యువతి హత్య

Hyderabad Crime: హైదరాబాద్‌లో దారుణం.. పెళ్లి పేరుతో నమ్మించి ఓయోలో యువతి హత్య

Satyaprasad Bandaru — Wed, 30 Sep 2026 11:31:20 +0530

Hyderabad Crime: హైదరాబాద్‌లోని ఎస్‌ఆర్‌నగర్‌ పోలీస్‌ స్టేషన్‌ పరిధిలో దారుణ ఘటన వెలుగులోకి వచ్చింది. పెళ్లి చేసుకుంటానని నమ్మించి, లాడ్జికి తీసుకెళ్లిన ఒక వ్యక్తి యువతిని అత్యంత కిరాతకంగా కొట్టి హత్య చేసిన ఉదంతం స్థానికంగా సంచలనం సృష్టించింది.

వికారాబాద్‌ జిల్లా ధరూర్‌ మండలం నాగసమందర్‌ గ్రామానికి చెందిన బేగరి శిరీష (34) హైదరాబాద్‌లోని ఓ కస్టమర్‌ కేర్‌ సెంటర్‌లో ఉద్యోగం చేస్తుంది. ఇదే జిల్లా తాండూరు మండలం ఓబులాపూర్‌కు చెందిన పాత నేరస్థుడు అవుసలపల్లి శ్రీనివాస్‌ (38)తో ఆమెకు పరిచయం ఏర్పడింది. తనకు 2013లో వివాహం జరిగిందని, 2016లో భర్తతో విడాకులు తీసుకున్నట్లు శిరీష అతనికి చెప్పింది. ఇదే అదునుగా భావించిన శ్రీనివాస్‌.. ఆమెను పెళ్లి చేసుకుంటానని నమ్మించి తరచూ వెంట తిప్పుకునేవాడు.

లాడ్జిలో బస.. దారుణ హత్య

సెప్టెంబర్‌ 24న అర్ధరాత్రి ఇద్దరూ కలిసి అమీర్‌పేటలోని గోకుల్‌ ప్రైడ్‌ ఓయో లాడ్జికి వెళ్లారు. పోలీసుల వివరాల ప్రకారం.. నకిలీ ఆధార్‌ కార్డులను సమర్పించి, గణేష్‌, దుర్గ అనే పేర్లతో లాడ్జి రిసెప్షన్‌లో పేర్లు నమోదు చేసుకున్నారు. లాడ్జిలోని మొదటి అంతస్తులో ఉన్న 103వ గదిలో బస చేశారు. సెప్టెంబర్‌ 28 రాత్రి గదిలోనే శిరీషను శ్రీనివాస్‌ తీవ్రంగా కొట్టి హత్య చేసినట్లు పోలీసులు ప్రాథమికంగా నిర్ధారించారు. శిరీష తనను పెళ్లి చేసుకోవాలని నిలదీయడం వల్లే ఇద్దరి మధ్య తీవ్ర వాగ్వాదం, గొడవ జరిగి ఉంటుందని పోలీసులు భావిస్తున్నారు. ఈ గొడవలో ఆమెను హత్య చేసినట్లు తెలుస్తోంది.

సెప్టెంబర్‌ 29 తెల్లవారుజామున సుమారు 3.30 గంటల సమయంలో శ్రీనివాస్‌ ఒక్కడే గది నుంచి బయటకు వచ్చాడు. తాను గది ఖాళీ చేస్తున్నానని రిసెప్షన్‌లో చెప్పి బిల్లు చెల్లించాడు. అంతేకాకుండా, గదిలో ఉన్న శిరీష ఉదయం 9 గంటలకు టిఫిన్‌‌ తెచ్చుకుని బయటకు వెళ్లిపోతుందని సిబ్బందిని నమ్మించి అక్కడి నుంచి పరారయ్యాడు.

పోలీసుల ఎంట్రీ

ఉదయం చాలాసేపటి వరకు ఆ గది తలుపులు తెరుచుకోకపోవడంతో లాడ్జి సిబ్బందికి అనుమానం వచ్చింది. కాలింగ్‌ బెల్‌ మోగించినా లోపల నుంచి ఎలాంటి స్పందన రాలేదు. దీంతో అప్రమత్తమైన సిబ్బంది వెంటనే పోలీసులకు సమాచారం ఇచ్చారు. సమాచారం అందుకున్న ఎస్‌ఆర్‌ నగర్ పోలీసులు వెంటనే ఘటనా స్థలానికి చేరుకున్నారు. లాడ్జి సిబ్బంది వద్ద ఉన్న అదనపు తాళంతో గది తలుపులు తెరిచి చూడగా.. శిరీష మంచంపై విగతజీవిగా పడి ఉంది. మృతురాలి సోదరుడి ఫిర్యాదుతో పోలీసులు కేసు నమోదు చేసి, పరారీలో ఉన్న నిందితుడు శ్రీనివాస్‌ కోసం గాలింపు చర్యలు చేపట్టారు.

Tragedy in Medchal Malkajgiri: రైలు ఢీకొని 100 గొర్రెలు మృత్యువాత.. మేడ్చల్ మల్కాజిగిరి జిల్లాలో ఘటన

Shankar Dukanam — Tue, 29 Sep 2026 10:56:21 +0530

Medchal Malkajgiri Train Accident | ఘట్‌కేసర్: మేడ్చల్ మల్కాజిగిరి జిల్లా ఘట్‌కేసర్ రైల్వేస్టేషన్ పరిధిలో తీవ్ర విషాదం చోటుచేసుకుంది. రైలు ఢీకొని సుమారు వందకు పైగా గొర్రెలు అక్కడికక్కడే మృతిచెందినట్లు తెలుస్తోంది. అషాపూర్ సమీపంలోని కేఫాల్ వద్ద మంగళవారం ఉదయం ఈ దుర్ఘటన జరిగింది. కాజీపేట నుంచి హైదరాబాద్ వైపు వెళ్తున్న దక్షిణ్‌ ఎక్స్‌ప్రెస్ (Dakshin Express) పట్టాలపై నిద్రిస్తున్న గొర్రెల మందపై నుంచి వెళ్లడంతో ఈ ప్రమాదం సంభవించిందని పోలీసులు తెలిపారు.

ప్రమాద జరిగిన సమయంలో గొర్రెల కాపర్లు రైల్వే ట్రాక్‌కు కొద్దిదూరంలో నిద్రిస్తుండటంతో ఈ ప్రమాదం జరిగింది. తెల్లవారుజామున రైలు వచ్చే సమయంలో శబ్దానికి గొర్రెలు భయాందోళనకు గురై ట్రాక్‌పైకి పరుగులు తీయడంతో ఎక్కువ గొర్రెలు మృత్యువాత పడ్డాయి. ఈ క్రమంలో వేగంగా వస్తున్న దక్షిణ ఎక్స్‌ప్రెస్ గొర్రెలను ఢీకొట్టడంతో అవి చనిపోయాయి.

సమాచారం అందుకున్న రైల్వే అధికారులు, పోలీసులు వెంటనే అక్కడికి చేరుకుని పరిశీలించారు. ప్రమాద తీవ్రతకు గొర్రెలు శరీరావయవాలు ఛిద్రమై ట్రాక్‌పై పడిపోవడంతో ఆ ప్రాంతమంతా అత్యంత విషాదకరంగా మారింది. జీవనాధారమైన గొర్రెలు మృత్యువాత పడటంతో గొర్రెల కాపర్లు కన్నీరుమున్నీరుగా విలపిస్తున్నారు. అధికారులు ఈ ఘటనపై కేసు నమోదు చేసి వివరాలు సేకరిస్తున్నారు.

Hyderabad Crime: 'దిశ' ఘటన ప్రదేశంలో మరో దారుణం.. మహిళపై క్యాబ్ డ్రైవర్ అత్యాచారయత్నం!

Satyaprasad Bandaru — Mon, 28 Sep 2026 15:19:53 +0530

Hyderabad Crime: హైదరాబాద్‌ శివారులో మరో దారుణం చోటుచేసుకుంది. శంషాబాద్‌ పరిధిలో "దిశ" దారుణం జరిగిన ప్రదేశంలో ఓ మహిళపై క్యాబ్‌ డ్రైవర్‌ అత్యాచారయత్నానికి పాల్పడ్డాడు. అయితే ఈ ఘటన ఆలస్యంగా వెలుగులోకి వచ్చింది. నల్గొండ జిల్లా దేవరకొండ శివాజీనగర్‌కు చెందిన ఓ మహిళ క్యాబ్‌లో శంషాబాద్‌ నుంచి ఇంటికి బయలుదేరింది. శంషాబాద్ పరిధిలోని తుండుపల్లి వద్ద ‘దిశ’ ఘటన జరిగిన ప్రదేశంలోని టోల్‌ప్లాజా వద్ద నుంచి క్యాబ్ డ్రైవర్‌ రూట్‌ మార్చాడు. కొత్వాల్‌గూడ సమీపంలో నిర్మానుష్య ప్రాంతానికి తీసుకెళ్లి ఆ మహిళపై అత్యాచారానికి యత్నించాడు.

Also Read: ఇబ్రహీంపట్నంలో వీడిన మహిళ దారుణ హత్య మిస్టరీ.. వివాహితను హత్య చేసింది ప్రియుడే!

రూ.60 వేల బ్యాగ్ చోరీ

దీంతో భయాందోళనకు గురైన మహిళ.. క్యాబ్‌ దిగి పెద్దగా కేకలు వేసింది. ఆమె వద్ద ఉన్న రూ.60 వేల డబ్బు ఉన్న బ్యాగును లాక్కొని క్యాబ్ డ్రైవర్‌ అక్కడి నుంచి పారిపోయాడు. బాధితురాలు ఈ ఘటనపై శంషాబాద్ ఆర్జీఐఏ పోలీసులకు ఫిర్యాదు చేసింది. బాధితురాలి ఫిర్యాదు మేరకు పోలీసులు కేసు నమోదు చేసి పరారీలో ఉన్న క్యాబ్‌ డ్రైవర్‌ కోసం ప్రత్యేక టీమ్ లతో గాలింపు చేపట్టారు. 2019, నవంబర్‌ 27న జరిగిన ‘దిశ’ సంఘటన దేశవ్యాప్తంగా సంచలనం సృష్టించింది. ఆరోజు రాత్రి తుండుపల్లి వద్ద నలుగురు యువకులు ‘దిశ’పై అత్యాచారం చేసి, అతి దారుణంగా హత్య చేశారు. అనంతరం పోలీసుల ఎన్ కౌంటర్లో నిందితులు మృతి చెందిన విషయం తెలిసింది. దిశ సంఘటన జరిగిన ప్రదేశానికి సమీపంలో తాజా ఘటన చోటుచేసుకుంది.

Also Read: ఔటర్ పై రోడ్డు ప్రమాదంలో ఇద్దరు మృతి.. టైర్ పేలడంతో పల్టీలు కొట్టిన ఆటో

Crime News: ఇబ్రహీంపట్నంలో వీడిన మహిళ దారుణ హత్య మిస్టరీ.. వివాహితను హత్య చేసింది ప్రియుడే!

Shankar Dukanam — Sat, 26 Sep 2026 13:37:39 +0530

ఇబ్రహీంపట్నం: ఎన్టీఆర్ జిల్లా ఇబ్రహీంపట్నంలో సంచలనం సృష్టించిన కళ్యాణి అలియాస్‌ దుర్గ (29) దారుణ హత్య కేసు మిస్టరీని పోలీసులు చేధించారు. భవానీపురానికి చెందిన షఫి అనే వ్యక్తి ఈ దారుణానికి పాల్పడినట్లు పోలీసులు ప్రాథమికంగా నిర్ధారించారు. పోలీసులు తెలిపిన వివరాల ప్రకారం.. మృతురాలు కళ్యాణితో నిందితుడు షఫికి కొంతకాలంగా వివాహేతర సంబంధం ఉంది. ఈ క్రమంలోనే కొన్నాళ్ల క్రితం కళ్యాణి తన కుమారుడిని షఫికి అప్పగించింది. అయితే, తన కుమారుడిని తిరిగి ఇచ్చేయాలని ప్రియుడిపై కళ్యాణి పదే పదే ఒత్తిడి తెచ్చింది.

ఈ కుమారుడి విషయమై ఇద్దరి మధ్య గొడవలు జరుగుతున్నాయి. దీంతో తీవ్ర ఆగ్రహానికి గురైన షఫి, 10 రోజుల కిందట కళ్యాణిని దారుణంగా హత్య చేశాడని పోలీసులు తెలిపారు. హత్య చేసిన అనంతరం ఆధారాలు లభించకుండా ఉండేందుకు మృతదేహాన్ని ముక్కలు ముక్కలుగా నరికి సమీపంలోని కెనాల్‌లో పడేశాడు. లభ్యమైన శరీర భాగాలకు సంబంధించిన ఫోటోలను పోలీసులు ఇన్‌స్టా సహా సోషల్ మీడియాలో పోస్ట్ చేశారు. మృతురాలి చేతిపై ఉన్న ప్రత్యేకమైన టాటూ ఆధారంగా ఆమె సోదరుడు డెడ్ బాడీ కళ్యాణిదని గుర్తించారు. స్థానిక మీడియా సహకారంతోనే ఈ కేసును వేగంగా చేధించామని ఇబ్రహీంపట్నం సీఐ సుబ్రహ్మణ్యం వెల్లడించారు.

అసలేం జరిగింది..

పశ్చిమ గోదావరి జిల్లా ఆకివీడు మండలం చిన తడినాడకు చెందిన కళ్యాణికి చిన్నప్పుడే తల్లి మరణించింది. తండ్రి తడినాలోనే చిన్న చిన్న పనులు చేస్తుండేవాడు. కల్యాణికి సోదరుడు ఉన్నాడు. గన్నవరం సమీపంలోని ఓ అనాథాశ్రమంలో తండ్రి వీరిని చేర్చగా అక్కడే పెరిగారు. ఇద్దరు మేజర్లు అయిన అనాథాశ్రమం నుంచి బయటకు వచ్చారు. మంగళగిరిలో ఓ వ్యక్తిని వివాహం చేసుకుని అక్కడే స్థిరపడింది.

భర్తతో విభేదాల కారణంగా వేరుగా ఉంటూ మంగళగిరిలోని ఒక హోటల్‌లో సప్లయర్‌గా పనిచేస్తోంది. ఈ నెల 17న ఆమె అదృశ్యం కాగా, అదే రోజు ఇబ్రహీంపట్నంలోని చన్నీళ్ల కాలువలో ఆమె శరీర భాగాలు ముక్కలుగా నరికిన స్థితిలో కనిపించడంతో పోలీసులు కేసు నమోదు చేశారు. కేసు దర్యాప్తులో భాగంగా పరిసర ప్రాంతాల్లోని 200కు పైగా సీసీటీవీ కెమెరాలను పరిశీలించినప్పటికీ ప్రాథమికంగా ఎలాంటి ఆధారాలు లభించలేదు. దీంతో మృతురాలి దుస్తులు, చేతిపై ఉన్న ప్రత్యేక టాటూ, కాలి పట్టీల ఫోటోలను పోలీసులు సోషల్ మీడియాలో ప్రచారం చేశారు. ఇన్స్టాగ్రామ్‌లో ఈ ఫోటోలను చూసిన ఆమె సోదరుడు గుర్తించి ఇబ్రహీంపట్నం పోలీసులను సంప్రదించడంతో మృతురాలి వివరాలు వెలుగులోకి వచ్చాయి. కళ్యాణిని మంగళగిరిలోనే దారుణంగా హత్య చేసి శరీర భాగాలను కాలువలో పడేసి ఉంటారని పోలీసులు అనుమానిస్తున్నారు.

Hyderabad ORR Accident: ఔటర్ పై రోడ్డు ప్రమాదంలో ఇద్దరు మృతి.. టైర్ పేలడంతో పల్టీలు కొట్టిన ఆటో

Shankar Dukanam — Sat, 26 Sep 2026 13:13:03 +0530

Hyderabad Outer Ring Road | కీసర: హైదరాబాద్ ఔటర్ రింగ్ రోడ్డుపై శుక్రవారం రోడ్డు ప్రమాదం చోటుచేసుకుంది. కూలీలతో ప్రయాణిస్తున్న అశోక్ లేలాండ్ ఆటో వెనుక వైపు టైర్ హఠాత్తుగా పేలిపోవడంతో వాహనం అదుపుతప్పి రోడ్డుపైనే పల్టీ కొట్టింది. ఈ ప్రమాదలో ఇద్దరు కూలీలు మృతిచెందగా, మరో 11 మంది తీవ్రంగా గాయపడ్డారు. మేడ్చల్ జిల్లా కీసర పోలీస్ స్టేషన్ పరిధిలోని ORR పై ఈ ప్రమాదం జరిగింది. ఈ ఘటన జరిగిన సమయంలో కూలీలు కీసర నుంచి షామీర్‌పేట్ వైపు ఆటోలో వెళ్తున్నారు.

పొట్టకూటి కోసం కూలీ పనులకు వెళ్తున్న వారి జీవితాలు రోడ్డు ప్రమాదంతో తెల్లారిపోయాయి. ఆ కుటుంబాల్లో తీవ్ర విషాదాన్ని నింపాయి. మృతులను మహారాష్ట్ర ప్రాంతానికి చెందిన వలస కూలీలుగా పోలీసులు ప్రాథమికంగా గుర్తించారు. సమాచారం అందుకున్న కీసర పోలీసులు వెంటనే అక్కడికి స్థలానికి చేరుకుని పరిశీలించారు. గాయపడిన కూలీలను సమీపంలోని ఆసుపత్రికి తరలించి చికిత్స అందిస్తున్నారు. ఈ ప్రమాదంపై పోలీసులు కేసు నమోదు చేసి దర్యాప్తు చేపట్టారు.