Family Jumps Into Godavari River: గోదావరిలో దూకి మరో కుటుంబం ఆత్మహత్యాయత్నం.. ఒకర్ని కాపాడిన జాలర్లు, ముగ్గురి కోసం గాలింపు

Realtor Ramreddy: ఫాంహౌస్‌లో ప్రముఖ రియల్టర్ రాంరెడ్డి ఆత్మహత్య

Satyaprasad Bandaru — Thu, 10 Sep 2026 18:16:00 +0530

Realtor Ramreddy: హైదరాబాద్‌లో ప్రముఖ రియల్టర్, హోమ్ ల్యాండ్ అధినేత బాణాల రాంరెడ్డి ఆత్మహత్య చేసుకున్నారు. రంగారెడ్డి జిల్లా కందుకూరు మండలం నేదునూరులోని ఆయన ఫాంహౌస్‌లో ఉరివేసుకుని బలవన్మరణానికి పాల్పడ్డారు. రాంరెడ్డి పటాన్‌చెరులో 280 ఎకరాల్లో కొత్త వెంచర్‌ ఏర్పాటు చేస్తున్నారు. ఈ క్రమంలో స్థానిక నేతలు, పలువురి ఒత్తిడితో ఆయన ఆత్మహత్యకు పాల్పడినట్లు తెలుస్తోంది. ఈ ఘటనపై పోలీసులు దర్యాప్తు చేస్తున్నారు. సూసైడ్ నోట్ ఆధారంగా కేసు నమోదు చేసుకుని దర్యాప్తు చేపట్టారు.

Also Read: చంపేస్తే బడికి సెలవు ఇస్తారని.. అర్ధరాత్రి రూమ్‌మేట్ గొంతు నులిమారు - ఈ పిల్లలు ఇలా తయారయ్యారేంటి? .. ఎక్కడో కాదు ఏపీలోనే!

280 ఎకరాల వెంచర్ వివాదం

రాంరెడ్డి గత కొంతకాలంగా హైదరాబాద్‌లోని మణికొండలో నివాసముంటున్నారు. 2018లో పటాన్‌చెరువు ప్రాంతంలో సుమారు 280 ఎకరాల భూమిని డెవలప్‌మెంట్ కోసం తీసుకుని వెంచర్ చేపట్టారు. అయితే ఆ భూమికి సంబంధించిన వివాదాలు, లిటిగేషన్లతో వెంచర్ అభివృద్ధి ఆలస్యమైనట్లు సమాచారం. ఆ వివాదాలను పరిష్కరించేందుకు భారీగా అప్పులు చేసినట్లు, మరోవైపు భూ యజమానులతో కూడా సమస్యలు తలెత్తినట్లు తెలుస్తోంది. వెంచర్ ఆలస్యం కావడంతో ఆర్థిక భారం పెరిగి ఆయన తీవ్ర ఒత్తిడిలో ఉన్నట్లు సమాచారం.

Also Read: స్నేహితుడితో ఉన్న వీడియో వైరల్ - ఇంటి బిడ్డను చంపిన తండ్రి, కొడుకు

సూసైడ్ నోట్ లభ్యం!

రాంరెడ్డి రాసినట్లుగా భావిస్తున్న సూసైడ్ నోట్‌ను కందుకూరు పోలీసులు స్వాధీనం చేసుకున్నారు. ఈ ఘటనపై కందుకూరు పోలీసులు కేసు నమోదు చేసి దర్యాప్తు చేపట్టారు. సీఐ వెంకటేశ్వర్లు ఆధ్వర్యంలో ఈ ఘటనపై విచారణ జరుగుతోంది. రాంరెడ్డి మృతదేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించారు. రాంరెడ్డి ఆత్మహత్యకు కారణాలపై పోలీసులు దర్యాప్తు చేస్తున్నారు.

Also Read: లోయలోకి దూసుకెళ్లిన లారీ, మంటలు చెలరేగి ఇద్దరు సజీవ దహనం- కడపలో ఘటన

Annamayya Gurukul School Incident: చంపేస్తే బడికి సెలవు ఇస్తారని.. అర్ధరాత్రి రూమ్‌మేట్ గొంతు నులిమారు - ఈ పిల్లలు ఇలా తయారయ్యారేంటి? .. ఎక్కడో కాదు ఏపీలోనే!

Raja Sekhar Allu — Thu, 10 Sep 2026 12:02:18 +0530

Gyarampalle School Student Murder Attempt: పాఠశాలకు సెలవు ఇస్తారనే చిన్న ఆశతో, తోటి విద్యార్థి ప్రాణాలనే తీసేందుకు ఇద్దరు మైనర్లు ఒడిగట్టిన నమ్మలేని దారుణ ఘటన ఆంధ్రప్రదేశ్‌లోని అన్నమయ్య జిల్లాలో తీవ్ర కలకలం రేపింది. కేవలం బడికి సెలవు వస్తుందనే పిచ్చి ఆలోచనతో ఎనిమిదో తరగతి చదువుతున్న ఇద్దరు బాలురు.. తమతోనే ఒకే గదిలో ఉంటున్న రూమ్‌మేట్‌ను హత్య చేసేందుకు తెగబడ్డారు. గ్యారంపల్లెలోని ప్రభుత్వ గురుకుల పాఠశాల హాస్టల్‌లో అర్ధరాత్రి వేళ చోటుచేసుకున్న ఈ ఉదంతం విద్యాశాఖ అధికారులను, విద్యార్థుల తల్లిదండ్రులను తీవ్ర దిగ్భ్రాంతికి గురిచేసింది.

బాధితుడు, నిందితులు ముగ్గురూ గ్యారంపల్లె గురుకులంలో 8వ తరగతి చదువుతూ ఒకే రూమ్‌లో నివాసముంటున్నారు. పాఠశాలకు వెళ్లడం ఇష్టం లేని ఇద్దరు విద్యార్థులు, హాస్టల్‌లో ఎవరైనా విద్యార్థి చనిపోతే బడికి వారం రోజుల పాటు సెలవులు ప్రకటిస్తారనే తీవ్రమైన అపోహ పెంచుకున్నారు. ఈ ఆలోచనతోనే తమ రూమ్‌మేట్‌ను టార్గెట్ చేసుకుని, అతడు నిద్రిస్తున్న సమయంలో హత్య చేసి యాక్సిడెంట్‌గా లేదా సహజ మరణంగా చిత్రీకరించాలని పక్కా ప్లాన్ వేశారు.

అనుకున్న పథకం ప్రకారం అర్ధరాత్రి వేళ రూమ్‌మేట్ గాఢ నిద్రలో ఉండగా, ఇద్దరూ కలిసి అతని ముఖంపై దిండు గట్టిగా నొక్కి పట్టుకుని, గొంతు పిసికి చంపడానికి తీవ్రంగా ప్రయత్నించారు. అయితే ఊపిరాడక విలవిలలాడిన బాధితుడు సమయస్ఫూర్తితో, సర్వశక్తులూ ఒడ్డి వారి పిడికిలి నుంచి తప్పించుకుని గట్టిగా కేకలు వేశాడు. దీంతో భయాందోళనకు గురైన నిందితులు వెనక్కి తగ్గగా, బాధితుడు వెంటనే పరుగులు తీసి హాస్టల్ నిర్వాహకులకు, తోటి విద్యార్థులకు విషయం తెలిపాడు.

ఉదయాన్నే బాధితుడి ఫిర్యాదుతో రంగంలోకి దిగిన గురుకుల పాఠశాల అధికారులు, ఉపాధ్యాయులు తీవ్ర స్థాయిలో విచారణ చేపట్టారు. విచారణలో ఆ ఇద్దరు బాలురు చెప్పిన కారణాలు విని అధికారులు షాక్‌కు గురయ్యారు. బడికి సెలవులు వస్తాయనే ఉద్దేశంతోనే ఈ దారుణానికి ఒడిగట్టినట్లు నిందితులు ఒప్పుకోవడంతో.. వారిపై కఠిన చర్యలు తీసుకున్నారు. తోటి విద్యార్థుల భద్రతను దృష్టిలో ఉంచుకుని, ఆ ఇద్దరు విద్యార్థులకు తక్షణమే ట్రాన్స్‌ఫర్ సర్టిఫికేట్ ఇచ్చి పాఠశాల నుంచి పంపించివేశారు.

ఈ ఘటనతో గురుకుల పాఠశాలల్లో మైనర్ల మానసిక స్థితి, వారి ప్రవర్తనపై తీవ్రమైన ఆందోళన వ్యక్తమవుతోంది. బడికి సెలవు కోసం తోటి ప్రాణాన్ని తీసే స్థాయికి చిన్నారి మనస్సులు విషపూరితం కావడంపై విద్యావేత్తలు, సైకాలజిస్టులు దిగ్భ్రాంతి వ్యక్తం చేస్తున్నారు. పాఠశాలల్లో కేవలం చదువు మాత్రమే కాకుండా.. మానసిక పరిపక్వత, మంచి-చెడుల స్పృహ పెంచేలా కౌన్సెలింగ్ సెషన్లు నిర్వహించాల్సిన అవసరం ఉందనడానికి ఈ ఉదంతం ఒక హెచ్చరికగా నిలిచింది.

Honor Killing Sarkhej: స్నేహితుడితో ఉన్న వీడియో వైరల్ - ఇంటి బిడ్డను చంపిన తండ్రి, కొడుకు

Raja Sekhar Allu — Thu, 10 Sep 2026 11:16:51 +0530

Staged Hit and Run Murder Ahmedabad: అది ఆగస్టు 12 అర్ధరాత్రి వేళ.. అహ్మదాబాద్ సర్కేజ్ పరిధిలోని సమృద్ధి డైరీ సమీపంలో ఒక ద్విచక్రవాహనం ఘోర ప్రమాదానికి గురైందంటూ పోలీసులకు సమాచారం అందింది. తన చెల్లెలు సోఫియా ఫారూఖ్ ను బైక్‌పై తీసుకెళ్తుండగా వెనుక నుంచి గుర్తుతెలియని వాహనం ఢీకొట్టి వెళ్లిపోయిందని, తీవ్రంగా గాయపడిన ఆమెను సోలా సివిల్ ఆసుపత్రికి తరలించగా చికిత్స పొందుతూ మరణించిందని ఆమె సోదరుడు హబిల్ ఫారూఖ్ న్నీరుమున్నీరయ్యాడు. తొలుత పోలీసులు దీనిని ఒక సాదాసీదా హిట్ అండ్ రన్ కేసుగా భావించి దర్యాప్తు ప్రారంభించారు. కానీ, క్షతగాత్రురాలి శరీరంపై ఉన్న గాయాలు, ఘటనా స్థలంలో ఉన్న ఆధారాలు ప్రమాద శైలికి భిన్నంగా ఉండటంతో ఆ అనుమానమే ఒక సంచలనాత్మక మర్డర్ మిస్టరీకి నాంది పలికింది.

రోడ్డు ప్రమాదంలో చెల్లి చనిపోయిందని పోలీసులకు అన్న ఫిర్యాదు

పోలీసులు ఈ కేసులో లోతుగా విచారణ చేపడుతున్న కొద్దీ సోదరుడి కథనంలో వరుస లోపాలు బయటపడ్డాయి. ప్రమాదం జరిగిందని చెప్తున్న తీరుకు, సోఫియా తలకు బలంగా తగిలిన గాయాలకు అస్సలు పొంతన కుదరలేదు. దీంతో పోలీసులు సాంకేతిక ఆధారాలు, సిసిటివి దృశ్యాలు , ఫోన్ కాల్ డేటాను విశ్లేషించడం ప్రారంభించారు. ఒకవైపు బైక్ యాక్సిడెంట్ అని చెప్తూనే, మరోవైపు కుటుంబ సభ్యుల ప్రవర్తన అనుమానాస్పదంగా మారడంతో ఎం-డివిజన్ ట్రాఫిక్ పోలీసులు , స్థానిక క్రైమ్ విభాగం ఈ మిస్టరీ చిక్కుముడులను విప్పడంపై దృష్టి సారించాయి.

దర్యాప్తులో తేలిన అసలు నిజం

పోలీసుల శైలి విచారణలో నిందితులు కక్కిన నిజాలు విస్తుపోయేలా చేశాయి. అది రోడ్డు ప్రమాదం కాదు, కన్న తండ్రి మహమ్మద్ ఫారూఖ్ , సొంత సోదరుడు హబిల్ ఫారూఖ్ కలిసి ఆడిన నాటకం! సోఫియా ఒక స్నేహితుడితో కలిసి ఉన్న వీడియో మూడు నెలల క్రితం సోషల్ మీడియాలో వైరల్ కావడంతో, కుటుంబ పరువు పోయిందనే కక్షను తండ్రీకొడుకులు పెంచుకున్నారు. ప్రణాళిక ప్రకారమే ఆగస్టు 12న ఆమెను గెల్జీపురా గ్రామం సమీపంలోని నిర్మానుష్య ప్రాంతానికి తీసుకెళ్లారు. ప్యాంట్‌లో దాచుకున్న ఇనుప సుత్తితో సోదరుడు హబిల్ ఆమె తలపై మూడుసార్లు బలంగా బాదగా, తండ్రి అతనికి సహాయం చేశాడు.

కటకటాల వెనక్కి పంపిన పోలీసులు

రక్తమడుగులో పడివున్న సోఫియాను, ఆమె బైక్‌ను ప్రధాన రహదారిపైకి తీసుకెళ్లి.. గుర్తుతెలియని వాహనం ఢీకొట్టినట్లు సీన్ క్రియేట్ చేశారు. పోలీసులను దారిమళ్లించడానికి స్వయంగా నిందితులే హిట్ అండ్ రన్ ఫిర్యాదు కూడా ఇచ్చారు. 'కుటుంబ పరువు' కాపాడుకోవడానికి సొంత కూతురినే సుత్తితో కొట్టి చంపేసి, యాక్సిడెంట్‌గా చిత్రీకరించేందుకు వేసిన ఈ స్కెచ్ చివరికి పోలీసుల చాకచక్యంతో పటాపంచలైంది. ప్రస్తుతం నిందితులిద్దరిపై హత్య కేసు నమోదు చేసి కటకటాల వెనక్కి నెట్టారు.

Kadapa News: లోయలోకి దూసుకెళ్లిన లారీ, మంటలు చెలరేగి ఇద్దరు సజీవ దహనం- కడపలో ఘటన

Shankar Dukanam — Tue, 8 Sep 2026 07:49:08 +0530

Kadapa Lorry Accident | కడప జిల్లాలోని గువ్వల చెరువు ఘాట్ రోడ్డులో భారీ రోడ్డు ప్రమాదం చోటుచేసుకుంది. సిమెంట్ లోడుతో వెళ్తున్న ఒక లారీ అదుపుతప్పి, ఘాట్ రోడ్డులోని ప్రహరీ గోడను బలంగా ఢీకొడుతూ లోయలోకి దూసుకెళ్లింది. ఈ ప్రమాదంలో లారీలో ఒక్కసారిగా భారీగా మంటలు చెలరేగాయి. లోయలో పడిన లారీలో మంటలు వేగంగా వ్యాపించడంతో, అందులోనే చిక్కుకుపోయిన డ్రైవర్, క్లీనర్ బయటకు రాలేక సజీవ దహనమైనట్లు సమాచారం.

ఇది అటవీ ప్రాంతం కావడంతో లారీ నుంచి ఎగసిపడిన మంటలు చుట్టుపక్కల ఉన్న చెట్లకు, పొదలకు కూడా విస్తరించాయి. సమాచారం అందుకున్న వెంటనే పోలీసులు, అగ్నిమాపక సిబ్బంది వెంటనే అక్కడికి చేరుకుని పరిశీలించారు. అగ్నిమాపక సిబ్బంది ఫైరింజన్ల ద్వారా మంటలను అదుపులోకి తీసుకొచ్చేందుకు తీవ్రంగా శ్రమిస్తున్నారు. గువ్వలచెరువు ఘాట్ రోడ్డు ప్రమాదానికి సంబంధించిన పూర్తి వివరాలు ఇంకా తెలియాల్సి ఉంది.

Man Burnt Alive In Car: దుండిగల్‌లోని బౌరంపేటలో కారులో మంటలు.. వ్యక్తి సజీవ దహనం- కేసు నమోదు

Shankar Dukanam — Mon, 7 Sep 2026 15:26:38 +0530

Hyderabad Crime News | మేడ్చల్: దుండిగల్ పోలీస్ స్టేషన్ పరిధిలోని బౌరంపేటలో సోమవారం ఉదయం దారుణం చోటుచేసుకుంది. ఓపెన్ ఏరియాలో నిలిపి ఉంచిన కారులో ప్రమాదవశాత్తు లేదా అనుమానాస్పద స్థితిలో మంటలు చెలరేగడంతో, అందులోని వ్యక్తి కారులోనే సజీవంగా కాలిపోయి మృతిచెందారు. స్థానికుల సమాచారం మేరకు సెప్టెంబర్ 7వ తేదీ ఉదయం 7 గంటల ప్రాంతంలో రుద్ర కన్స్ట్రక్షన్స్ సమీపంలో కారు కాలుతున్నట్లు గమనించారు. సమాచారం అందుకున్న దుండిగల్ పోలీసులు వెంటనే ఘటనా స్థలానికి చేరుకుని పరిశీలించారు.

మృతుడిని బౌరంపేట ప్రణీత్ ప్రణవ్ విలాస్‌కు చెందిన కార్తీక్ (40)గా పోలీసులు గుర్తించారు. ఆయన తండ్రి పేరు రాధాకృష్ణ అని, కార్తీక్ లాండ్రీ వ్యాపారం నిర్వహిస్తూ జీవనం సాగిస్తున్నట్లు పోలీసుల ప్రాథమిక విచారణలో తేలింది. కార్తీక్ భార్య గత రెండున్నర సంవత్సరాలుగా ఆయనకు దూరంగా ఉంటోందని, దీనికి తోడు కొంతకాలంగా ఆయన తీవ్ర అనారోగ్యంతో పాటు ఆర్థిక ఇబ్బందులతో బాధపడుతున్నట్లు పోలీసులు ప్రాథమికంగా గుర్తించారు.

ఈ మానసిక కుంగుబాటు, ఆర్థిక ఇబ్బందుల నేపథ్యంలోనన కార్తీక్ ఆత్మహత్యకు పాల్పడి ఉండవచ్చనే కోణంలో పోలీసులు విచారణను ముమ్మరం చేశారు. అయితే మృతికి గల ఖచ్చితమైన వివరాలు, కారణాలు దర్యాప్తులో బహిర్గం అవుతాయని పోలీసులు స్పష్టం చేశారు. ఈ ఘటనపై కేసు నమోదు చేసిన దుండిగల్ పోలీసులు అన్ని కోణాల్లో లోతుగా దర్యాప్తు చేపట్టారు.

Clash at Jubilee Hills Pub: జూబ్లీహిల్స్ పబ్ లో అర్ధరాత్రి గొడవ.. ఎంపీ సోదరుడు సహా పలువురిపై కేసు నమోదు

Shankar Dukanam — Sun, 6 Sep 2026 23:30:26 +0530

Clash at Jubilee Hills Kara Kara Pub | హైదరాబాద్ జూబ్లీహిల్స్ దసపల్ల హోటల్‌లోని కారా కారా పబ్‌లో అర్ధరాత్రి జరిగిన గొడవపై పోలీసులు సుమోటోగా కేసు నమోదు చేశారు. పబ్‌లో మద్యం మత్తులో కాంగ్రెస్ ఎంపీ అనిల్ కుమార్ యాదవ్ సోదరుడు, సన్‌రైజర్స్ హైదరాబాద్ టీమ్ మేనేజర్ అరవింద్ యాదవ్ రచ్చ చేశారని, దీంతో రెండు వర్గాల మధ్య తీవ్ర ఘర్షణ చోటుచేసుకుందని పోలీసులు తెలిపారు.

ఈ ఘటనపై ఎస్ఐ సందీప్ రెడ్డి ఇచ్చిన ఫిర్యాదు ఆధారంగా పోలీసులు ఇరు వర్గాలపైనా కేసు నమోదు చేశారు. ఈ గొడవలో ఎంపీ అనిల్ కుమార్ సోదరుడితో పాటు సుమారు 20 మంది పాల్గొన్నట్లు పోలీసులు ప్రాథమికంగా గుర్తించారు.

ప్రస్తుతం సీసీటీవీ ఫుటేజ్ ఆధారంగా విచారణ జరుపుతున్నామని, బాధ్యులపై కఠిన చర్యలు తీసుకుంటామని తెలిపారు. అలాగే, అనుమతించిన సమయం కంటే ఎక్కువ సమయం పబ్‌ను నడిపినందుకు కారా కారా పబ్ యాజమాన్యంపై కూడా సుమోటోగా మరొక కేసు నమోదు చేసినట్లు పోలీసులు వెల్లడించారు.

Hyderabad Tragedy: రాంనగర్‌లో గణేష్ ఆగమన్ లో తొక్కిసలాట ! బద్రీనాథ్ అనే యువకుడి మృతితో విషాదం

Shankar Dukanam — Sun, 6 Sep 2026 12:34:06 +0530

Tragedy in Hyderabad Ramnagar Ganesh Aagaman Celebrations | హైదరాబాద్: రామ్‌నగర్ గణేష్ ఆగమన్ వేడుకల్లో భారీగా బాణసంచా కాలుస్తూ, డీజే హోరు మధ్య జరిగిన తొక్కిసలాటలో బద్రీనాథ్ అనే యువకుడు దుర్మరణం చెందాడు. ఈ ఘటనలో పలువురికి తీవ్ర గాయాలయ్యాయి.

హైదరాబాద్ లోని వారసిగూడ పోలీస్ స్టేషన్ పరిధిలో శనివారం రాత్రి జరిగిన గణేష్ ఆగామన్ (ఆగమన) ఊరేగింపులో విషాదం చోటుచేసుకుంది. రాంనగర్ చౌరస్తాలో 'శ్రీ గణపతి ఫ్రెండ్స్ అసోసియేషన్' ఆధ్వర్యంలో భారీ వినాయక విగ్రహాన్ని మండపానికి తరలించేందుకు భారీ సెట్టింగ్‌లు, డీజే శబ్దాలు, సాంస్కృతిక నృత్యాలతో కోలాహలంగా వేడుకలు నిర్వహించారు. ఈ ఉత్సవాల్లో పాల్గొని ఉత్సాహంగా డ్యాన్స్ చేస్తున్న 18 సంవత్సరాల ఒక యువకుడు ఒక్కసారిగా స్పృహతప్పి కిందపడిపోయాడు. మిగతా భక్తులు అతడ్ని గమనించక తొక్కుకుంటూ వెళ్లినట్లు తెలుస్తోంది.

యువకుడు బద్రీనాథ్ కిందపడిపోవడం గమనించిన స్థానికులు డ్యాన్స్ చేస్తున్న వారికి విషయం తెలిపినప్పటికీ, వారు అతడిని పక్కకు పడవేసి వెళ్లిపోవడం తీవ్ర విమర్శలకు దారితీసింది. ఆ సమయంలో అక్కడే విధులు నిర్వర్తిస్తున్న ఒక ట్రాఫిక్ కానిస్టేబుల్ వెంటనే స్పందించి, అంబులెన్స్ లో ఆ యువకుడిని గాంధీ ఆసుపత్రికి తరలించారు. అయితే, ఆసుపత్రిలో పరీక్షించిన డాక్టర్లు యువకుడు అప్పటికే గుండెపోటుతో (Heart Attack) మృతి చెందినట్లు నిర్ధారించారు.

మృతి చెందిన యువకుడి వివరాలు ఇంకా తెలియరాలేదని వారసిగూడ పోలీసులు తెలిపారు. మృతదేహాన్ని గాంధీ ఆసుపత్రి మార్చురీకి తరలించిన పోలీసులు, మృతుడి గుర్తింపు కోసం విచారణ వేగవంతం చేశారు. ఈ ఘటనతో రామ్‌నగర్‌లో స్థానికంగా తీవ్ర విషాద ఛాయలు అలుముకున్నాయి.

Also Read: తల్లి మందిలిస్తే తండ్రి నవ్వాడట - గొంతు కోసి చంపేసిన కొడుకు - సైకో అంటే వీడే !

గణేష్ విగ్రహం తీసుకురావడానికి ఇంత హంగామా, ఆర్బాటాలు, డీజేలు అవసరమా.. ప్రశాంతంగా తీసుకెళ్లవచ్చు కదా అని నెటిజన్లు కామెంట్ చేస్తున్నారు. పైగా ఓ యువకుడు కింద పడిపోయాడని చెప్పినా వినిపించుకోకుండా వెళ్లిపోవడంతో ఓ నిండు ప్రాణం బలైందని మండిపడుతున్నారు. ముఖ్యంగా యువత జాగ్రత్తగా ఉండాలని, లేకపోతే వారి కుటుంబాలకు తీరని ఆవేదన మిగిల్చిన వారవుతారని అధికారులు సూచిస్తున్నారు.

FIR నమోదైన తర్వాత నిందితుల అరెస్టు తప్పనిసరి కాదా? చట్టాలు ఏం చెబుతున్నాయి

Shankar Dukanam — Sun, 6 Sep 2026 11:58:04 +0530

FIR Terms and Conditions | సాధారణంగా పోలీస్ స్టేషన్‌లో FIR నమోదు చేయగానే నిందితులను అరెస్టు చేస్తారని భావన ప్రజల్లో ఉంటుంది. కానీ చట్టప్రకారం కచ్చితంగా అరెస్ట్ చేయడం అన్ని సందర్భాలలో అవసరం ఉండదు. ఎఫ్‌ఐఆర్ అనేది ఒక సంఘటనకు సంబంధించిన ప్రాథమిక సమాచారం మాత్రమే. దాని ఆధారంగా పోలీసులు కేసు దర్యాప్తు చేపడతారు. దర్యాప్తులో ఆధారాలు సేకరించడం, సాక్షుల వాంగ్మూలాలు నమోదు చేయడం, ఘటనా స్థలాన్ని పరిశీలించాలి. అవసరమైతే ఫోరెన్సిక్ తనిఖీలు చేస్తారు. అరెస్టు అనేది పరిస్థితిని బట్టి పోలీసులు ఉపయోగించే ఒక ప్రత్యామ్నాయం మాత్రమే.

నేరం తీవ్రత ఆధారంగా అరెస్టులు

భారతీయ న్యాయ సంహిత (BNSS) సెక్షన్ 35లో వారెంట్ లేకుండా అరెస్టు చేసే నిబంధనల గురించి పేర్కొన్నారు. ఒక వ్యక్తి పోలీస్ అధికారి ముందే ఏదైనా తీవ్రమైన నేరానికి (Cognizable Offence) పాల్పడితే, లేదా ఏదైనా నమ్మదగిన ఫిర్యాదు/సమాచారం ఆధారంగా 7 ఏళ్ల వరకు శిక్ష పడే అవకాశం ఉన్న నేరానికి పాల్పడ్డాడని అనుమానిస్తే మేజిస్ట్రేట్ అనుమతి లేకుండా అతడిని అరెస్టు చేయవచ్చు.

సుప్రీంకోర్టు ఆదేశాలు

ఇటీవల సుప్రీంకోర్టు ఈ అంశంపై స్పష్టత ఇచ్చింది. జస్టిస్ ఎం.ఎం. సుందరేష్, జస్టిస్ ఎన్. కోటీశ్వర్ సింగ్‌లతో కూడిన ధర్మాసనం గరిష్టంగా 7 ఏళ్ల వరకు శిక్ష పడే కేసుల్లో నేరుగా అరెస్టు చేయడం ఒక నిబంధన కాదు. అది ఒక మినహాయింపు మాత్రమేనని పేర్కొంది. అలాంటి కేసుల్లో BNSS సెక్షన్ 35(3) కింద ముందుగా నిందితుడికి నోటీసు ఇవ్వడం తప్పనిసరి. నిందితులు దర్యాప్తు అధికారి ముందు హాజరై తన వైఖరిని తెలపవచ్చు. అరెస్టు చేయడం అనేది దర్యాప్తు అధికారి విచక్షణకు సంబంధించిన అధికారమని, కానీ విధిగా చేయాల్సిన పని కాదని కోర్టు స్పష్టం చేసింది.

Also Read: గోదావరిలో దూకి మరో కుటుంబం ఆత్మహత్యాయత్నం.. ఒకర్ని కాపాడిన జాలర్లు, ముగ్గురి కోసం గాలింపు

పోలీసులు ఎప్పుడు అరెస్టు చేస్తారు

నోటీసు అందిన తర్వాత కూడా నిందితుడు పోలీసుల ఎదుట విచారణకు హాజరు కాకపోతే సెక్షన్ 35(6), 35(1)(బి) కింద అరెస్టు చేయవచ్చు. నిందితుడు ఆధారాలు మాయం చేసే అవకాశం ఉందని, సాక్షులను బెదిరించవచ్చని, పరారయ్యే ప్రమాదం ఉందని భావిస్తే కూడా పోలీసులు అరెస్టు చేయవచ్చు. నిందితుడు దర్యాప్తునకు సహకరించకపోతే లేదా నోటీసు పంపినా హాజరు కాకపోతే పోలీసులు మేజిస్ట్రేట్ నుంచి అరెస్టు వారెంట్ పొందవచ్చు. ఆ తర్వాత ఆ వారెంట్ ఆధారంగా నిందితులను అరెస్టు చేయవచ్చు.

వయోవృద్ధులకు వేరే నిబంధనలు

చట్టం వయోవృద్ధులకు, బలహీన వర్గాలకు ప్రత్యేక రక్షణ కల్పిస్తుంది. సెక్షన్ 35(7) ప్రకారం ఒకవేళ నేరానికి పడే శిక్ష 3 ఏళ్ల కంటే తక్కువ ఉండి, నిందితుల వయస్సు 60 ఏళ్లు లేదా అంతకంటే ఎక్కువ ఉన్నట్లయితే, లేదా వారు వైకల్యం/ అశక్తత కలిగి ఉంటే పోలీసులు వెంటనే అరెస్టు చేయకూడదు. ఇలాంటి కేసుల్లో అరెస్టు చేయడానికి ముందు ఉన్నతాధికారి నుంచి ముందస్తు అనుమతి తీసుకోవాలి.

Madanapalle Lady Don: మదనపల్లె లేడీడాన్ ఇంట్లో తనిఖీలు.. భారీగా ఆస్తి పత్రాలు, ఫోర్జరీ డాక్యుమెంట్లు స్వాధీనం!

Satyaprasad Bandaru — Sun, 6 Sep 2026 11:27:05 +0530

Madanapalle Lady Don: చిన్న గదిలో ఉంటూ.. వ్యవసాయ కూలీగా జీవితం మొదలుపెట్టిన ఓ మహిళ మాజీ మంత్రి కీలక అనుచరుడి సాయంతో లేడీ డాన్‌గా ఎదిగింది. ఆమె మదలనపల్లెకు చెందిన కోనేటి సులోచన. స్థానికంగా ‘లేడీ డాన్‌’గా చలామణి అవుతూ అనేక అక్రమాలకు పాల్పడింది. శనివారం కోనేటి సులోచన ఇంట్లో పోలీసులు తనిఖీలు నిర్వహించారు. మాజీ మంత్రి ముఖ్య అనుచరుడితో చేతులు కలిపి వందల కోట్ల విలువైన భూములను అక్రమంగా కాజేసిన వ్యవహారం వెలుగులోకి రావడంతో.. కోర్టు ఆదేశాలతో తనిఖీలు నిర్వహించారు. మదనపల్లె డీఎస్పీ బుచ్చిరాజు ఆధ్వర్యంలో సీఐలు మోహన్‌ కుమార్, రాజారెడ్డి, మహమ్మద్‌ రఫీలతో కూడిన మూడు టీమ్‌లు నిర్వహించాయి. సులోచన నివాసంతో పాటు ఆమె సోదరుడు శ్రీనివాసులు ఇంట్లో తనిఖీలు చేశారు.

ఫోర్జరీ సంతకాలు

పోలీసులు తనిఖీల్లో 50 రకాల కీలక ఆస్తి డాక్యుమెంట్స్ స్వాధీనం చేసుకున్నారు. వీటిల్లో 15 ఫోర్జరీ సంతకాలు చేసి ఉంచిన పాత ఖాళీ బాండు పేపర్లు బయటపడ్డాయి. అప్పులు ఇచ్చినట్లు నమ్మించి, వారి నుంచి బలవంతంగా ఖాళీ బాండ్లపై సంతకాలు తీసుకుని ఆస్తులు లాక్కోవడానికి వీటిని ఉపయోగించినట్లు పోలీసుల దర్యాప్తులో తేలింది. ఈ పత్రాలను ఫోరెన్సిక్‌ సైన్స్‌ లాబొరేటరీకి పంపినట్లు డీఎస్పీ తెలిపారు.

కోట్లలో దందాలు

సులోచన పేరుపై బండకమ్మమీదపల్లెలో రూ.60 కోట్ల విలువైన 502 చదరపు గజాల స్థలం, బిల్డింగ్, పొన్నూటిపాళ్యంలో 1.75 ఎకరాల భూమి ఉన్నట్లు అధికారులు గుర్తించారు. ఫోర్జరీ పవర్‌ ఆఫ్‌ అటార్నీ దస్తావేజును ఉపయోగించి 10 కోట్ల విలువైన 47 సెంట్ల భూమిని ఆక్రమించినట్లు పోలీసులు గుర్తించారు. ఈ భూమిని మాజీ మంత్రి భార్య పేరిట 2023 జూన్‌లో గిఫ్ట్‌డీడ్‌గా మార్చినట్లు గుర్తించారు. గతంలో కోట్ల విలువైన భూములను అక్రమంగా రాయించుకున్నారని బాధితులుచ్చిన ఫిర్యాదుతో పోలీసులు దర్యాప్తు చేపట్టారు. ఈ నేపథ్యంలో మదనపల్లె లేడీ డాన్ అక్రమాలు వెలుగులోకి వస్తున్నాయి.

Also Read: గోదావరిలో దూకి మరో కుటుంబం ఆత్మహత్యాయత్నం.. ఒకర్ని కాపాడిన జాలర్లు, ముగ్గురి కోసం గాలింపు

14 క్రిమినల్ కేసులు

అయితే పోలీసుల తనిఖీలు చేస్తున్న క్రమంలో సులోచన ఇంట్లో లేదు. ఆమె విజయవాడలో ఉన్నట్లు గుర్తించారు. సులోచన ఇంట్లో స్వాధీనం చేసుకున్న పత్రాల వివరాలను ఇంట్లో ఉన్న ఆమె పిల్లలకు అందజేశారు. బాధితుడు మార్పు వెంకటేష్‌ నాయుడు ఇచ్చిన ఫిర్యాదుతో కోర్టు ఆదేశాలతో పోలీసులు తనిఖీలు నిర్వహించనట్లు సమాచారం. లేడీడాన్ సులోచనపై మదనపల్లె ఒకటో, రెండో పట్టణ, పోలీసు స్టేషన్లలో 14 క్రిమినల్‌ కేసులు, రౌడీషీట్‌ ఉండడం గమనార్హం.

Family Jumps Into Godavari River: గోదావరిలో దూకి మరో కుటుంబం ఆత్మహత్యాయత్నం.. ఒకర్ని కాపాడిన జాలర్లు, ముగ్గురి కోసం గాలింపు

Shankar Dukanam — Sat, 5 Sep 2026 11:44:28 +0530

West Godavari Crime News | యలమంచిలి: మరో కుటుంబం గోదావరిలో దూకి ఆత్మహత్యకు యత్నించింది. ఇటీవల ఏఈ నూకరాజు కుటుంబం గోదావరిలోకి దూకి ఆత్మహత్య చేసుకున్న ఘటన మరువక ముందే మరో విషాదం చోటుచేసుకుంది. భార్యాభర్తలు, ఇద్దరు పిల్లలతో కలిసి గోదావరి నదిలోకి దూకారు. పశ్చిమ గోదావరి జిల్లాలోని యలమంచిలి మండలం చించినాడ బ్రిడ్జి వద్ద ఓ కుటుంబం గోదావరి నదిలోకి దూకి ఆత్మహత్యాయత్నం చేయడం కలకలం రేపుతోంది.

కుటుంబం గోదావరి నదిలోకి దూకినట్లు గమనించిన వెంటనే అక్కడే ఉన్న జాలర్లు వివాహితను కాపాడారు. ఆమె భర్తతో పాటు ఇద్దరు పిల్లల కోసం గోదావరిలో గాలింపు చర్యలు చేపట్టారు. సమాచారం అందుకున్న పోలీసులు అక్కడికి చేరుకుని గజ ఈతగాళ్ల సాయంతో సహాయక చర్యలు చేపట్టారు. ఆర్థిక సమస్యలతో కుటుంబం ఆత్మహత్యాయత్నం చేసినట్లు ప్రాథమికంగా భావిస్తున్నారు. పూర్తి వివరాలు తెలియాల్సి ఉంది.

వీరు ఎక్కడి నుంచి వచ్చారు..

ఆత్మహత్యకు యత్నించింది తణుకుకు చెందిన నంబూరి శ్రీనివాస్ కుటుంబం. శనివారం (సెప్టెంబర్ 5న) ఉదయం యలమంచిలి మండలంలోని చించినాడ బ్రిడ్జి వద్దకు వచ్చింది. ఆపై భార్యాభర్తలు, ఇద్దరు పిల్లలతో కలిసి ఒక్కసారిగా పైనుంచి గోదావరి నదిలోకి దూకింది. ఇది గమనించిన జాలర్లు శ్రీనివాస్‌ భార్య పద్మినిని రక్షించారు. శ్రీనివాస్‌తో పాటు కొడుకు వెంకటేశ్వర్‌, కుమార్తె నిత్యశ్రీ గల్లంతయ్యారు. జాలర్లు రక్షించిన తరువాత పద్మినిని చికిత్స కోసం ఏలూరు ప్రభుత్వాసుపత్రికి తరలించినట్లు తెలుస్తోంది.