Hyderabad Airport Drug Bust: హైదరాబాద్ ఎయిర్‌పోర్టులో భారీగా హైడ్రోపోనిక్ గంజా పట్టివేత- స్మగ్లర్లు అంతా కవర్ చేశారు కానీ చిన్న తప్పు చేశారు !

Guntur Crime News: పోలీసులు వేధిస్తున్నారని ఆరోపిస్తూ సెల్ఫీ వీడియో తీసి మహిళ ఆత్మహత్య.. గుంటూరులో ఘటన

Shankar Dukanam — Sun, 24 May 2026 15:30:04 +0530

Bapatla Crime News | గుంటూరు: ఓ కేసు విషయమై పోలీసులు స్టేషన్‌కు పిలిపించి వేధిస్తున్నారంటూ ఆరోపిస్తూ ఒక మహిళ సెల్ఫీ వీడియో తీసుకొని ఆత్మహత్యకు పాల్పడిన ఘటన గుంటూరు జిల్లాలో తీవ్ర కలకలం రేపింది. బాధితురాలిని తిరుపతమ్మగా గుర్తించారు. ఆమె తన భర్తతో కలిసి తెనాలి కొత్తపేటలోని ఒక అపార్ట్‌మెంట్‌లో పనిమనిషిగా జీవనం సాగిస్తోంది. అయితే, సదరు అపార్ట్‌మెంట్‌కు చెందిన ఒక మహిళ.. తిరుపతమ్మ తన వద్ద బంగారం అడిగి తీసుకొని తిరిగి ఇవ్వడం లేదంటూ ఇటీవల స్థానిక పోలీసులకు ఫిర్యాదు చేసింది.

ఈ ఫిర్యాదు ఆధారంగా పోలీసులు తిరుపతమ్మను విచారణ నిమిత్తం స్టేషన్‌కు పిలిపించారు. ఈ క్రమంలో, అపార్ట్‌మెంట్‌లోని మహిళ తనపై బంగారం తీసుకున్నట్లు తప్పుడు ఫిర్యాదు చేసిందని, విచారణ పేరుతో స్టేషన్‌లో పోలీసులు తనను తీవ్రంగా వేధిస్తున్నారంటూ తిరుపతమ్మ ఒక సెల్ఫీ వీడియో రికార్డ్ చేసింది. అనంతరం మనస్తాపానికి గురై ఆమె పురుగుల మందు తాగింది. గమనించిన కుటుంబ సభ్యులు ఆమెను వెంటనే చికిత్స నిమిత్తం ఆసుపత్రికి తరలించారు. అక్కడ అత్యవసర విభాగంలో చికిత్స పొందుతూ ఆమె మృతిచెందింది. ఈ ఘటనపై సర్వత్రా ఆగ్రహం వ్యక్తమవుతుండగా, ఉన్నతాధికారులు కేసు నమోదు చేసి దర్యాప్తు చేపట్టారు.

Also Read: Hit And Run In Hyderabad: హైదరాబాద్‌లో ఘోరం.. కారుతో ఢీకొట్టి లాయర్ దారుణ హత్య! అదే కారణమా !

మద్యం మత్తులో పీఎస్ ఆవరణలో గొడవ.. పోలీసులకు గాయాలు
బాపట్ల జిల్లా కొల్లూరు పోలీసు స్టేషన్‌లో మద్యం మత్తులో రెండు వర్గాలు తలపడటంతో స్టేషన్ ఆవరణ రణరంగంగా మారింది. వేమూరు రోడ్డులోని ఓ వైన్ షాప్ ఎదుట నూడిల్స్ వ్యాపారి ఉప్పు జానకీరామ్‌పై, కొండూరు సురేష్ అనే వ్యక్తి మద్యం సీసాతో తలపై కొట్టి దాడి చేశాడు. తీవ్ర గాయాలైన జానకీరామ్ ఫిర్యాదు కోసం కొల్లూరు పోలీసు స్టేషన్‌కు వెళ్లాడు. ఈ విషయం తెలుసుకున్న అతని మేనల్లుడు బాలు ఆవేశంతో సురేష్ నివసించే కాలనీకి వెళ్లి కత్తి చూపించి వార్నింగ్ ఇచ్చాడు.

తనకు కత్తి చూపించి వార్నింగ్ ఇవ్వడంతో తీవ్ర ఆగ్రహానికి లోనైన సురేష్ అర్ధరాత్రి 12 గంటల సమయంలో సుమారు 30 మంది అనుచరులతో కలిసి కొల్లూరు పోలీసు స్టేషన్‌పైకి దాడికి వచ్చాడు. స్టేషన్ లోపలే ఇరువర్గాలు కొట్టుకోవడంతో జానకీరామ్, అతని సోదరి, బావ, మేనల్లుడు బాలు తీవ్రంగా గాయపడ్డారు. ఈ గొడవలో స్టేషన్ ముందు గది రక్తంతో తడిచిపోయింది. పీఎస్ లోపల కుర్చీలు, బల్లలు, కూలర్లను దుండగులు పూర్తిగా ధ్వంసం చేశారు.

Also Read: Murder Mystery: మోడల్ ట్విషా శర్మ మృతి కేసులో భర్త సమర్థ్ సింగ్ అరెస్ట్ - వేధింపుల నుంచి మరణం వరకు అసలేం జరిగింది?

ఈ దాడిని అడ్డుకునేందుకు ప్రయత్నించిన వేమూరు సీఐ వీరాంజనేయులు, ఇద్దరు కానిస్టేబుళ్లు, ఒక హోంగార్డుపై కూడా నిందితులు దాడి చేసి గాయపరిచారు. పీఎస్ బయట ఉన్న వాహనాన్ని తగలబెట్టేందుకు ప్రయత్నిస్తూ, వీడియో తీస్తున్న జర్నలిస్ట్ ఫోన్ లాక్కుని దాడికి యత్నించారు. చివరికి అదనపు బలగాలను రప్పించడంతో గంటన్నర తర్వాత ఎట్టకేలకు పరిస్థితి అదుపులోకి వచ్చింది. క్షతగాత్రులను చికిత్స నిమిత్తం గుంటూరు జీజీహెచ్‌కు తరలించగా, డీఎస్పీ శ్రీనివాసరావు కొల్లూరు పోలీస్ స్టేషన్‌కు చేరుకుని పరిశీలించి బాధ్యులపై కేసులు నమోదు చేస్తామని ప్రకటించారు.

Hit And Run In Hyderabad: హైదరాబాద్‌లో ఘోరం.. కారుతో ఢీకొట్టి లాయర్ దారుణ హత్య! అదే కారణమా !

Shankar Dukanam — Sat, 23 May 2026 15:26:52 +0530

Hyderabad Advocate Khaja Mohinuddin Murder | హైదరాబాద్: నగరంలోని మాసబ్‌ట్యాంక్ పరిధిలో శనివారం ఉదయం ఒక దారుణం చోటుచేసుకుంది. ఒక సీనియర్ న్యాయవాదిని దుండగులు కారుతో ఢీకొట్టి హతమార్చడం తీవ్ర కలకలం రేపింది. పోలీసులు తెలిపిన వివరాల ప్రకారం... అడ్వకేట్ కాజా మొయినుద్దీన్ శనివారం ఉదయం తన ఇంటి నుంచి బయటకు వచ్చారు. ఆయన తన కారులో బయలుదేరడాని సిద్ధంగా ఉన్నారు. కారు డోర్ తీస్తున్న సమయంలో ఓ కారు ఆయనను వెనుక నుండి వచ్చి అత్యంత వేగంగా ఢీకొట్టి వెళ్లిపోయింది.

ఈ ప్రమాదంలో అడ్వకేట్ మొయినుద్దీన్‌కు తీవ్రమైన గాయాలయ్యాయి. ఆయనను గమనించిన స్థానికులు, వెంటనే స్పందించి చికిత్స నిమిత్తం సమీపంలోని ఆసుపత్రికి తరలించారు. అయితే, ఆసుపత్రిలో ఐసీయూలో చికిత్స పొందుతూ లాయర్ మొయినుద్దీన్ మృతి చెందినట్లు డాక్టర్లు, పోలీసులు తెలిపారు.

లాయర్‌ను కారుతో ఢీకొట్టిన అనంతరం నిందితులు అక్కడి నుండి వేగంగా పరారయ్యారు. దుండగులు కారుతో ఢీకొట్టిన దృశ్యాలు ఘటనా స్థలంలో ఉన్న సీసీటీవీ (CCTV) కెమెరాల్లో స్పష్టంగా రికార్డయ్యాయి. పాత కక్షల కారణంగానే ఈ హత్య జరిగిందా అనే కోణంలో పోలీసులు అనుమానిస్తున్నారు. ఈ ఘటనపై పోలీసులు కేసు నమోదు చేసి, సీసీటీవీ ఫుటేజ్ ఆధారంగా నిందితులను పట్టుకోవడానికి ప్రత్యేక బృందాలతో దర్యాప్తును వేగవంతం చేశారు.

Also Read: హైదరాబాద్ పోలీసుల వినూత్న ప్రయత్నం! దేశంలోనే తొలి ఏఐ కాప్‌రైటర్ యాప్ ప్రారంభం!

ఎవరీ ఖాజా మొయినుద్దీన్..
వక్ఫ్ బోర్డు భూముల రక్షణ కోసం నిరంతరం పోరాడుతున్నారు లాయర్ ఖాజా మొయినుద్దీన్‌. హైకోర్టు , సిటీ సివిల్‌ కోర్టులో ఆయన లాయర్‌గా సేవలు అందిస్తున్నారు. అయితే హిట్ అండ్ రన్ ఘటనలో కొందరు దుండగులు కారుతో ఢీకొట్టడంతో ఆయన ప్రాణాలు కోల్పోయారు. ఆయన తన ఇంటి వద్ద కారు ఎక్కుతున్న సమయంలో పక్కా ప్లాన్‌తో వెనుక నుంచి వాహనంతో బలంగా ఢీకొట్టి పరారైనట్లు అనుమానాలు వ్యక్తమవుతున్నాయి. తీవ్రంగా గాయపడిన ఆయననను హాస్పిటల్‌కు తరలించినా ప్రయోజనం లేకపోయింది. పరిస్థితి విషమించడంతో చికిత్స పొందుతూ మొయినుద్దీన్ మృతి చెందారు.

కబ్జాకు గురవుతున్న కోట్ల రూపాయల విలువైన వక్ఫ్ బోర్డు భూములను కాపాడేందుకు ఆయన చట్టపరమైన పోరాటాలు చేస్తుండటమే ఈ హత్యకు ప్రధాన కారణమని వినిపిస్తోంది. లేక వ్యక్తిగత కక్షలతో హత్య చేశారా అనే కోణాల్లోనూ పోలీసులు విచారణ చేపట్టారు. నెంబర్ ప్లేట్ లేని కారుతో ఉద్దేశపూర్వకంగానే ఢీకొట్టి హత్య చేశారని సైతం వినిపిస్తోంది.

Also Read: Bandi Bageerath POCSO case: బండి భగీరథ్‌ పోక్సో కేసులో పోలీస్ కస్టడీపై సస్పెన్స్‌! మే 26న కోర్టు తుది నిర్ణయం!

AI Copwriter Hyderabad Police: Hyderabad హైదరాబాద్ పోలీసుల వినూత్న ప్రయత్నం! దేశంలోనే తొలి ఏఐ కాప్‌రైటర్ యాప్ ప్రారంభం!

Khagesh — Sat, 23 May 2026 14:39:21 +0530

AI Copwriter Hyderabad Police: హైదరాబాద్‌ మరోసారి దేశానికే ఆదర్శంగా నిలిచింది. శాంతిభద్రతల పరిరక్షణలో ఇప్పటికే టెక్నాలజీని వాడుకోవడంలో ముందు ఉన్న హైదరాబాద్‌ పోలీసులు ఇప్పుడు ఆర్టిఫిషియ్ ఇంటెలిజెన్స్‌ సాయంతో సామాన్యుడికి మరింత చేరువయ్యేందుకు ఒక చారిత్రాత్మక అడుగు వేసింది. విదేశీయులు, వివిధ రాష్ట్రాల ప్రజలు ఫిర్యాదు చేయడానికి వచ్చినప్పుడు ఎదురయ్యే ప్రధాన సమస్య భాష. దీనికి శాశ్వత పరిష్కారమే AI కాప్‌రైటర్ యాప్.

శనివారం బంజారాహిల్స్‌లోని ఇంటిగ్రేటెడ్‌ కమాండ్ అండ్ కంట్రోల్‌ సెంటర్‌లో హైదరాబాద్ పోలీస్ కమిషనర్ సీవీ సజ్జనార్‌ ఈ యాప్‌ను లాంచ్‌ చేశారు. భారత్‌లోనే ఇటువంటి ఏఐ ఆధారిత బహుభాషా ఫిర్యాదులు నమోదు వ్యవస్థ ఇదే మొదటిదని చెప్పారు.

ఏంటీ ఏఐ కాప్‌రైట్‌

సాధారంగా ఒక బాధితుడు తనకు రాని భాషలో ఫిర్యాదు చేయాల్సి వస్తే, ఆ బాధ వర్ణనాతీతం. ఆ గ్యాప్‌ను భర్తీ చేసేదే ఈ ఏఐ కాప్‌రైటర్. ఇది ఒక అత్యాధునిక సాఫ్ట్‌వేర్ అప్లికేషన్. హిందీ, తమిళం, బెంగాళీ, మరాఠీ సహా మొత్తం పది రకాల భాషలను ఇది గుర్తిస్తుంది. బాధితుడు తన మాతృభాషలో ఫిర్యాదును చెబితే ఈ యాప్‌ ఆ మాటలను తక్షణమే టెక్ట్స్ రూపంలోకి మార్చి, పోలీసులకు అర్థమయ్యే భాషలోకి మారుస్తుంది.

హైదరాబాద్‌ ఇప్పుడు గ్లోబల్ సిటీ. ఇక్కడ కేవలం తెలుగు వారే కాదు, వేల సంఖ్యలో విదేశీయులు, లక్షల సంఖ్యలో ఇతర రాష్ట్రాల వలస కార్మికులు ఉంటున్నారు. ఇతర రాష్ట్రాల నుంచి వచ్చే వారు తెలుగు లేదా ఇంగ్లీష్‌లో ప్రావీణ్యం లేక తమకు జరిగిన అన్యాయాన్ని సరిగా వివరించలేకపోతున్నారు. ట్రాన్స్‌లేటర్స్‌ కోసం ఎదురు చూడటం వల్ల ఫిర్యాదు నమోదులో గంటల కొద్దీ ఆలస్యం జరుగుతుంది. బాధితుడు చెప్పిన మాటలకు, పోలీస్‌లు రాసుకున్న మాటలకు మధ్య అర్థం మారే ప్రమాదం ఉంది. ఏఐ వాడటం వల్ల బాధితుడి ప్రతి మాట యథాతథంగా రికార్డ్ అవుతుంది. ముఖ్యంగా మహిళలు, వృద్ధులు, వలస కూలీలకు పోలీసుల సేవలపై నమ్మకాన్ని పెంచడానికి ఈ టెక్నాలజీ తోడ్పడుతుందని కమిషనర్‌ సజ్జనార్ అభిప్రాయపడ్డారు.

ఎప్పటి నుంచి అమలులోకి వస్తుంది?

ఈ యాప్‌ ప్రారంభం మే 23న జరిగింది. తొలుత హైదరాబాద్ కమిషనరేట్ పరిధిలోని 80కంటే ఎక్కువ పోలీస్ స్టేషన్‌లలో దీనిని అందుబాటులోకి తీసుకొచ్చారు. త్వరలోనే మరింత విస్తరించే అవకాశం ఉంది. ఇకపై భాష రాని కారణంగా ఏ బాధితుడు కూడా పోలీస్ స్టేషన్‌్ మెట్లు ఎక్కడానికి వెనుకాడాల్సిన పని లేదు.

యాప్ ఎలా పని చేస్తుంది?

ఈ యాప్ పని తీరు అత్యంత పారదర్శకంగా , వేగంగా ఉంటుంది. బాధితులు చెప్పే విషయాల ఆడియోను టెక్స్ట్ రూపంలోకి మారుస్తుంది. సెకన్ల వ్యవధిలోనే పోలీస్‌ ఆఫీసర్ స్క్రీన్ మీద డిస్‌ప్లే చేస్తుంది. ప్రతి ఐదు సెకన్లకు సమాచారం అప్డేట్ చేస్తుంది. ఫిర్యాదు నమోదు కాగానే అది ఆటోమేటిక్‌గా పీడీఎఫ్ రూపంలోకి మారుతుంది. రికార్డు చేసిన ఫిర్యాదు ఎవరు మార్చడానికి లేదా టాంపరింగ్ చేయడానికి వీలు లేదు. ఇందులో ఫిర్యాదు తీసుకున్న అధికారి పేరు, కచ్చితమైన సమయం ఆటోమేటిక్‌గా నమోదు అవుతుంది. బాధితులు చెప్పినవి, నిందితుడి వాంగ్మూలం, సాక్షుల సాక్ష్యాలను ఈ యాప్ విడి విడిగా రికార్డు చేస్తుంది.

యాప్ వెనుకున్నది ఎవరు?

ఈ వినూత్న ఆలోచనను వాస్తవరూపంలోకి తీసుకురావడానికి హైదరాబాద్ పోలీసులు బ్లూకౌడ్ సాఫ్ట్‌టెక్ సొల్యూషన్స్‌ తో కలిసి పని చేస్తున్నారు. ఈ యాప్ ఫిర్యాదులు తీసుకోవడమే కాదు కోర్టులో నిందితులకు శిక్ష పడేలా చేయడంలో కీలక పాత్ర పోషిస్తుంది. బాధితుడు చెప్పిన ప్రతి మాటను యథాతథంగా రికార్డు చేయడం వల్ల కేసు దర్యాప్తులో స్పష్టత ఉంటుంది. దీని వల్ల తప్పుడు సమాచారం నమోదు అయ్యే ఛాన్స్ ఉండదు. తద్వారా న్యాయస్థానాల్లో కేసు బలంగా నిలబడుతుంది.

Bandi Bhagirath Case: బండి భగీరథ్‌ పోక్సో కేసులో కేంద్రమంత్రిని సిట్ విచారిస్తుందా? వాట్సాప్ చాట్స్, కాల్ రికార్డింగ్స్ కీలకమేనా? మాజీ డీసీపీ రెడ్డన్న ఎక్స్‌క్లూజివ్‌ ఇంటర్వ్యూ!

M Seshu — Fri, 22 May 2026 16:35:49 +0530

Bandi Bhagirath Case: హై ప్రొఫైల్ కేసుగా మారిన బండి భగీరథ్‌ పోక్సో కేసుపై సిట్ విచారణ ఎలా సాగనుంది? డిజిట్‌ ఆధారాలు శిక్ష పడేలా చేస్తాయా? బండి సంజయ్‌ను కూడా సిట్ అధికారులు విచారిస్తారా అనే అంశాలపై ఏబీపీ దేశం ప్రతినిధితో రిటైర్డ్ డీసీపీ బి. రెడ్డన్న పంచుకున్న విశ్లేషణాత్మక వివరాలు చూద్దాం.

ABP దేశం: బండి భగీరథ్‌పై పోక్సో కేసులో సిట్ విచారణ ఎలా సాగుతోంది? వాట్సప్ చాట్, కాల్ రికార్డింగ్స్ , వీడియోలు కీలక మారుతాయా?

బి. రెడ్డన్న, మాజీ డీసీపీ: బండి భగీరథ్‌పై పోక్సో కేసులో వాళ్లిద్దరి మధ్య వాట్సప్ చాటింగ్, ఫోన్ కాల్స్ మాత్రమేకాదు అన్ని అధారాలను క్షుణ్ణంగా పరిశీలిస్తారు సిట్ అధికారులు. అంతేకాదు సోషల్ మీడియాలో ఇతర మాద్యమాల ద్వారా చాటింగ్ డేటాను కూడా ఆధారాలుగా తీసుకుంటారు. ఘటనకు ముందు తరువాత వీళ్లు ఎవరిని కలిశారు. ఎక్కడ తిరిగారు. మధ్యవర్తులు ఎవరైనా ఈ కేసులో మాట్లడారా? ఏం మాట్లడారు. ఇలా వాళ్లందరినీ పోలీసులు పిలిపించి, సమగ్రంగా విచారిస్తారు. పోలీసు విచారణలో లేదా న్యాయస్దానంలో విచారణ జరిగే క్రమంలో ఎవరైతే మైనర్ బాధితురాలు లేదా బాధితుడి ఫోటో అత్యంత గోప్యంగా ఉంచుతారు. వీటిని బహిర్గతం చేస్తే చట్టపరంగా కఠిన చర్యలుంటాయి. బాధిత అమ్మాయి చెప్పిన సమాచారాన్ని స్పెషల్ కోర్టులో ఇన్ కెమెరాలో వన్ బై వన్ విచారణ చేస్తారు. జడ్జి చాంబర్‌లో ఇతరులు చూడకుండా విచారణ జరపడమేకాదు, మొత్తం విచారణలో ఏం ప్రశ్నలు అడిగారు, బాధితురాలు ఎలా సమాధానం చెప్పింది అనే అన్ని విషయాలను పూర్తిగా వీడియో రికార్డ్ చేస్తారు. పోక్సో కేసులో నిందితుడ్ని సైతం ఇదే విధంగా విచారిస్తారు. అలా వీడియో రికార్డ్ చేయడంతోపాటు వాళ్లు ఏం మాట్లడారు అనేది పూర్తి గోప్యంగా ఉంచుతారు. కేవలం కోర్టులో జడ్జికి మాత్రమే వీడియో వివరాలు అందజేస్తారు.

ABP దేశం: బండి భగీరథ్ తండ్రిని కలిస్తే బెదరించారని బాధితురాలి తల్లి చెబుతోంది, నిందితుడి తండ్రిని విచారిస్తారా?

బి. రెడ్డన్న, మాజీ డీసీపీ: బండి భగీరథ్‌పై నమోదైన పోక్సో కేసులో ప్రతీ ఒక్కరినీ విచారించవచ్చు. మధ్యవర్తిగా వ్యవహరించిన వ్యక్తితో పాటు బాధితురాలి కుటుంబ సభ్యులను అక్కడకు తీసుకెళ్లిన డ్రైవర్‌ను సైతం విచారిస్తారు. ఈ నేపథ్యంలో నిందితుడు బండి భగీరథ్ తండ్రిని కూడా విచారించవచ్చు. ఈ కేసుతో ప్రమేయం ఉన్నవాళ్లు ఎవరైనా, వాళ్లు ఏ హోదాలో ఉన్నా విచారణ ఎదుర్కోక తప్పదు. సీఎం హత్య చేస్తే కచ్చితంగా విచారిస్తారో ఇది కూడా అంతే. పోలీసు అధికారి రేప్ చేస్తే కేసు అవుతుంది, అదేస్దాయిలో ప్రజాప్రతినిధులను కూడా విచారిస్తారు. పెద్ద హోదాలో ఉన్నా విచారించే హక్కు పోలీసు అధికారులకు ఉంటుంది. సాక్షిగా అయితే సాక్షిగా విచారిస్తారు. బెదిరించారు అని తేలితే, ప్రలోభ పెట్టారని ఆధారాలను చూపితే, కచ్చితంగా చట్టపరంగా చర్యలు ఉంటాయి.

ABP దేశం: పోక్సో కేసులో మీడియా హద్దులేంటి..?

బి. రెడ్డన్న, మాజీ డీసీపీ: ఈ కేసులో ప్రమేయం ఉన్న ప్రతీ ఒక్కరినీ ముందుగా విచారించిన తరువాత, వాళ్లిచ్చిన సమాచారం ఆధారంగా నిందితుడ్ని కస్టడీకీ కోరే అవకాశాలున్నాయి. నిందితుడు ఇచ్చే సమాధానాలు ఆధారంగా అవసరమైతే 2 లేదా అంతకంటే ఎక్కువ రోజులు కస్టడీలోకి తీసుకుని విచారిస్తారు. బాధితురాలు మైనర్ కావడంతో ఈ కేసులో మెడికల్ ఎగ్జామినేషన్ విషయంలో చాలా జగ్రత్తలు పాటిస్తారు. మెడికల్ ఎగ్జామిన్ చేస్తున్న డాక్టర్ ఎట్టి పరిస్దితిలోనూ బాధితురాలి ఐడెంటీని ఎక్కడా బహిర్గతం చేయకూడాదు. పోలీసు అధికారులు సైతం సాక్షులను, పంచనామా ద్వారా సేకరించిన ఆధారాలు సీల్డ్ కవర్‌లో కోర్టులో జడ్జికి సమర్పిస్తారు. పూర్తి వివరాలతో ఛార్జిషీట్ దాఖలు చేస్తారు. విచారణ క్రమంలో ఏ రోజు ఎవరిని విచారించారో బయటకు చెప్పకూడాదు. కేసు విచారణపై సోషల్ మీడియాలో ,య్యూట్యూబ్ ఛానెల్స్‌లో ఇష్టమొచ్చినట్లు థంబ్ నెయిల్ పెడితే వాళ్లు కూడా శిక్షార్హులవుతారు. చాలా కేసుల్లో సోషల్ మీడియా యాక్టీవ్‌గా ఉంటుంది. అలా ఈ కేసుల్లో వ్యవహరిస్తే చట్టపరంగా కఠిన చర్యలు తీసుకోవచ్చు.

ABP దేశం: రాజకీయ ప్రాభల్యం ఉన్న ఈ కేసులో విచారణ అధికారులపై రాజకీయ ఓత్తిడి ప్రభావం చూపుతుందా?

బి. రెడ్డన్న, మాజీ డీసీపీ: ఉద్యోగాలు పణంగా పెట్టి పోలీసు అధికారులు ఎప్పుడూ ఉద్యోగాలు చేయరు. చట్టానికి లోబడే పనిచేస్తారు. చట్టం అతిక్రమిస్తే పోలీసులు సైతం జైలుకు వెళ్లక తప్పదు. అలా అనేకమంది జైలుకు వెళ్లిన అధికారులున్నారు. చట్టం ముందు ఎవరైనా ఒక్కటే. పోలీసులు సైతం ఇందుకు అతీతులు కాదు. ఒత్తిడి అనేది చాలా కేసుల్లో ఉంటుంది. నిందితుల ప్రాబల్యం ఉన్న ప్రతీ కేసులో ఒత్తిడి ఉంటుంది కానీ విచారణ అధికారులు అవేవీ పట్టించుకోరు. అలా ప్రభావం చూపితే, వాళ్లే జైలుకు వెళ్లక తప్పదు.

ABP దేశం: బండి భగీరథ్ కేసులో జీవిత ఖైదును డిసైడ్ చేసే కీలక ఆధారాలేంటి.?

బి. రెడ్డన్న, మాజీ డీసీపీ: నిందితురాలి హోమ్ నుంచి సెమన్ వస్తుంది. ఆ సెమన్ కలెక్ట్ చేస్తారు. నిందితుడి బ్లెడ్ గ్రూప్ టెస్ట్ చేస్తారు. ఆ సెమన్ అతనిదే అని తెలిస్తే రేప్ చేశాడని చెప్పడానికి అంతకంటే మించి ఆధారం ఇంకేముంటుంది. ఈ ఒక్క ఆధారంతోనే జైలు శిక్ష డిసైడ్ అవుతుంది. నేతరం తీవ్రతను బట్టి ఈ కేసుల్లో ఏడేళ్ల నుంచి జీతకాలం జైలు శిక్షపడిన సందర్భలున్నాయి. ఇటీవల వరంగల్‌లో 33ఏళ్లు జైలు శిక్ష విధించారు. విదేశాల్లో 200 ఏళ్లు జైలు కూడా విధించారు. మైనర్ అమ్మాయి లేదా అబ్బాయి ఎవరో మనకు తెలియక పోయినా దారినపోతూ జరిగింది చూసినా, ఆ సాక్ష్యులు చెప్పిన ఆధారాలతో కూడా కేసు నమోదు చేసి విచారణ చేస్తారు. అరెస్ట్, రిమాండ్, ఆ తర్వాత సాక్ష్యాల సమీకరించాలని అనుకుంటే పోలీసు కస్టడీలో తీసుకుని నిందితుడ్ని విచారిస్తారు. సెక్స్ చేసేటప్పుడు కండోమ్ వాడాను, దాచేశానని నిందితుడు విచారణలో చెబితే, సెక్షన్ 27 ఇండియన్ ఎవిడెన్స్ యాక్ట్ కింద చార్జ్ షీట్‌లో అతనికి వ్యతిరేకంగా పెడతారు. ఇలా కేసును అన్ని కోణాల్లో పూర్తి స్థాయిలో విచారణ పూర్తి చేస్తారు. సీల్డ్ కవర్‌లో జడ్జికి మాత్రమే ఆధారాలను సమర్పిస్తారు సిట్ అధికారులు. ఆధారాలను పరిశీలించిన న్యాయమూర్తి విచక్షణపైన శిక్ష ఆధారపడి ఉంటుంది. పదేళ్లు, ఏడు లేదా జీవితకాలం ఒక్కోసారి ఉరి శిక్ష కూడా విధించిన సందర్భాలున్నాయి.

Machilipatnam Lecturer Joshua Arrested: మాయాటలతో యువతికి కామర్స్ లెక్చరర్ వల! గుట్టురట్టు చేసిన భార్య! రెడ్‌ హ్యాండెడ్‌గా పోలీసులకు అప్పగింత!

Khagesh — Fri, 22 May 2026 12:59:50 +0530

Machilipatnam Lecturer Joshua Arrested: కృష్ణా జిల్లా మచిలీపట్నంలో కామర్స్‌ లెక్చర్‌గా పని చేస్తున్న భర్త అక్రమ బాగోతాన్ని ఒక భార్య సమాజానికి బహిర్గతం చేసింది. ఉద్యోగం పేరుతో ఓ నిస్సహాయ యువతిని లోబరుచుకునేందుకు ప్రయత్నించిన భర్తకు సడెన్ సర్‌ప్రైజ్‌ ఇస్తూ పోలీసులతో కలిసి రౌండప్ చేసి పట్టుకుంది. సమాజంలో గురువుగా గౌరవం పొందాల్సిన వ్యక్తి చేసిన నీచమైన పనికి స్థానికులు అసహ్యించుకుంటున్నారు.

ఉద్యోగం ఆశ చూపించి గదికి...

పోలీసులు, స్థానికులు, భార్య కథనం ప్రకారం... జాషువా అనే వ్యక్తి ప్రస్తుతం అవనిగడ్డలోని ప్రభుత్వ కళాశాలలో లెక్చర్‌గా పని చేస్తున్నాడు. గతంలో ఓ మహిళా కాలేజీలోనూ సేవలు అందించాడు. ఈ క్రమంలోనే ఉద్యోగ వేటలో ఉండి ఆర్థిక ఇబ్బందుల్లో ఉన్న ఒక యువతి అతనికి పరిచయమైంది.

ఆమె నిస్సహాయతను అదునుగా చేసుకున్న జాషువా, తనకు తెలిసిన రికమండేషన్లుతో ఉద్యోగం ఇప్పిస్తానని నమ్మబలికాడు. అందుకోసం మచిలీపట్నంలోని గొడుగుపేటలో ఒక ఇంటికి పిలిచాడు. ఉద్యోగం కావాలంటే తన కోరిక తీర్చాలంటూ సదరు యువతిని ఒప్పించాడు.

సీన్‌లోకి భార్య ఎంట్రీ... దేహశుద్ధి

యువతితో కలిసి లెక్చరర్‌ జాషువా గదిలో ఉన్న సమయంలోనే అతని భార్య పక్కా ప్లాన్‌తో ఎంట్రీ ఇచ్చింది. తలుపులు బద్దలు కొట్టి లోపలికి వెళ్లి భర్తను రెడ్‌హ్యాండెడ్‌గా పట్టుకుంది. అనంతరం పోలీసులకు విషయం చేరవేసింది. దీంతో చుట్టుప్కల వారు గుమిగూడటంతో జరిగిందంతా వివరించి, లెక్చరర్ అని కూడా చూడకుండా దేహశుద్ధి చేసింది.

భార్య ఏం చెప్పిందంటే...." మాకు పెళ్లై 25 ఏళ్లు దాటింది. పెళ్లైన మొదటి రోజు నుంచే ఇతనికి మహిళలతో అక్రమ సంబంధాలు పెట్టుకునే అలవాటు ఉంది. నిలదీస్తే నన్ను దారుణంగా కొట్టేవాడు. ఈ మధ్య ఒక మహిళ మా ఇంటికి వచ్చి పెళ్లి చేసుకోవాలంటూ గొడవ చేసింది. అప్పుడు మా పిల్లలు ఇతనికి బుద్ది చెప్పారు. అయినా బద్ది మార్చుకోలేదు. ఇక్కడికి వచ్చి మళ్లీ అదే వేషాలు వేస్తున్నాడు" అని భార్య వాపోయింది.

లెక్చరర్ అని అద్దెకు ఇస్తే...

ఈ ఘటనతో గొడుగుపేటలోని సదురు ఇంటి యజమానులు కూడా షాక్‌కి గురయ్యారు. లెక్చరర్ ఉద్యోగం అని చెప్తేనే ఇంటిని అద్దెకు ఇచ్చామని, ఇలాంటి క్యారెక్టర్‌ లేని అని తెలియదని పేర్కొంటున్నారు. వెంటనే అతని సామానులు బయటపడేశారు. భార్య ఫిర్యాదు మేరకు పోలీసులు జాషువాను అదుపులోకి తీసుకున్నారు. స్టేషన్‌కు తరలించారు. కేసు నమోదు చేసి పూర్తి స్థాయి విచారణ జరుపుతున్నారు.

Nowhera Shaik Arrested: నౌహీరా షేక్ అరెస్ట్.. ఫేక్ ఐడీతో దొరికిన హీరా గ్రూప్ ఎండీ

Khagesh — Fri, 22 May 2026 08:23:20 +0530

Nowhera Shaik Arrested: హీరా గోల్డ్ కుంభకోణంలో కీలక మలుపు. ప్రధాన నిందితురాలు నౌహీరా షేక్‌ను ఈడీ అధికారులు గురుగ్రామ్‌లో అరెస్టు చేశారు. సుప్రీం కోర్టు ఆదేశాలను ధిక్కరించి నకిలీ ఐడీలతో పరారీలో ఉన్న ఆమెను టెక్నికల్ ఇంటెలిజెన్స్ సాయంతో పట్టుకున్నారు. 5600 కోట్ల మోసం కేసులో తాజా అప్‌డేట్స్ ఇక్కడ చదవండి.

దేశవ్యాప్తంగా సంచలనం సృష్టించిన హీరా గోల్డ్ కోట్ల కుంభకోణంలో మరో కీలక మలుపు చోటు చేసుకుంది. గత కొంతగాలంగా అధికారులు కళ్లు గప్పి తిరుగుతున్న హీరా గ్రూప్ అధినేత్ర నౌహీరా షేక్ ఎట్టకేలకు ఎన్‌ఫోర్స్‌మెంట్‌ డైరెక్టరేట్ అధికారులకు చిక్కింది. హర్యానాలోని గురుగ్రామ్‌లో ఒక అద్దె ఇంట్లో మారువేషంలో తలదాచుకున్న ఆమెను టెక్నికల్ ఇంటెలిజెన్స్ సాయంతో అధికారులు మే 21న అదుపులోకి తీసుకున్నారు.

నకిలీ ఐడీలతో పరారీ

నౌహీరా షేక్ తనపై ఉన్న నాన్ బెయిలబుల్ వారెంట్ల నుంచి తప్పించుకోవడానికి నకిలీ ఆధార్‌ కార్డును, ఇతర పోర్జరీ పత్రాలను ఉపయోగించినట్టు ప్రాథమిక విచారణలో తేలింది. ఏప్రిల్ 8, న సుప్రీంకోర్టు ఆమెకు లొంగిపోవాలని వారం రోజుల గడువు ఇచ్చింది. అయితే ఆమె లొంగిపోకుండా పరారీలోకి వెళ్లడంతో ఈడీ నిఘా పెట్టి ఆమెను పట్టుకుంది. ఆమెను ఢిల్లీ నుంచి విమానంలో హైదరాబాద్‌కు తరలించి, బేగంపేటలోని న్యాయమూర్తి ముందు ప్రవేశపెట్టనున్నారు. ఆమెపై నకిలీ పత్రాల వినియోగానికి సంబంధించిన గురుగ్రామ్‌ పోలీసులు విడిగా కేసు నమోదు చేసే ఛాన్స్ ఉంది.

నౌహీరా షేక్ కుంభకోణం కేసులో సుప్రీంకోర్టు అనేకసార్లు ఆమెకు అవకాశాలు ఇచ్చింది. తొలుత జనవరి 2021లో ఇన్వెస్టర్ల సొమ్మును సెటిల్ చేస్తానన్న హామీపై ఆమెకు మధ్యంతర బెయిల్ మంజూరు చేసింది. కానీ రూ. 580 కోట్ల డిపాజిట్ చేయాలన్న కోర్టు ఆదేశాలను ఆమె పాటించలేకపోయింది.

2025 మార్చి 5న జరిగిన విచారణలో జస్టిస్ జేబీ పార్దివాలా నేతృత్వంలోని ధర్మాసనం ఆమెకు చివరి అవకాశం ఇస్తూ, మూడు నెలల్లోగా పాతిక కోట్లు డిపాజిట్ చేయాలని ఆదేశించింది. ఆ మొత్తాన్ని చెల్లించని పక్షంలో బెయిల్ ఆటోమేటిక్‌గా రద్దు అవుతుందని కోర్టు స్పష్టం చేసింది. ఆమె ఆ మొత్తాన్ని చెల్లించకపోవడమే కాకుండా, ఈడీ వేలం వేస్తున్న ఆస్తుల రిజిస్ట్రేషన్ ప్రక్రియకు కూడా సహకరించడం లేదని కోర్టు ఆగ్రహం వ్యక్తం చేసింది. ఫలితంగా ఆమె బెయిల్ రద్దు కావడంతో ఈ అరెస్టు అనివార్యమైంది.

ఏంటీ హీరా గోల్డ్ స్కామ్‌

హీరా గోల్డ్ ఎగ్జిమ్‌ ప్రైవేట్ లిమిటెడ్‌ పేరుతో నౌహీరా షేక్ ఒక భారీ ఇన్వెస్ట్మెంట్‌ నెట్‌వర్క్ను సృష్టించింది. దీని వెనుక ఉన్న ప్రధాన ఆకర్షణ హలాల్ ఇన్వెస్ట్‌మెంట్‌. వడ్డీ తీసుకోవడం ఇస్లాం ధర్మానికి విరుద్ధమని నమ్మే ముస్లిం వర్గాన్ని ఆమె లక్ష్యంగా చేసుకుంది. తమది వడ్డీ వ్యాపారం కాదని, బంగారం వ్యాపారంలో భాగస్వామ్య అని నమ్మబలికింది.

ఏడాదికి ఏకంగా 36 శాతం లాభం ఇస్తామని నమ్మించి వేల కోట్లు వసూలు చేసింది. సుమారు 1.72 లక్షల మంది ఇన్వెస్టర్లు ఈ పథకంలో చిక్కుకున్నారు. ఈడీ అంచనాల ప్రకారం దీని విలువ 3000 కోట్ల నుంచి 5900 కోట్ల వరకు ఉండొచ్చు.

మొదట్లో ఇన్వెస్టర్లకు క్రమం తప్పకుండా లాభాలు పంపిణీ చేసి నమ్మకం కలిగించిన నౌహీరా, తర్వాత కొత్త ఇన్వెస్టర్ల నుంచి వచ్చే డబ్బుతో పాత వారికి చెల్లింపులు చేసే పోంజీ స్కీమ్‌ నడిపినట్టు అధికారులు గుర్తించారు. 2018లో చెల్లింపులు ఆగిపోవడంతో బాధితులు పోలీసులను ఆశ్రయించారు.

ఎవరీ నౌహీరా షేక్

తిరుపతికి చెందిన ఒక సాధారణ కూరగాయల వ్యాపారి కుమార్తె అయిన నౌహీరా షేక్, తొలుత ఖురాన్ టీచర్‌గా తన ప్రస్థానాన్ని ప్రారంభించింది. తన పేరు ముందు ఆలిమా, డాక్టర్, వంటి బిరుదులను తగిలించుకొని మతపరమైన విశ్వాన్ని పెట్టుబడిగా మార్చుకుంది. 2007లో హీరా గోల్డ్ సంస్థను స్థాపించి, ముంబై, హైదరాబాద్ కేంద్రాలుగా తన కార్యకలాపాలను విస్తరించింది. తాను ఘనా నుంచి బంగారం దిగుమతి చేసుకుంటానని ప్రచారం చేసుకునేది. ఇన్వెస్టర్ల నమ్మకాన్ని చూరగొనడానికి ఆమె ఫొటో ఎడిటింగ్ సాఫ్ట్‌వేర్‌తో నకిలీ అవార్డులను కూడా సృష్టించినట్టు ఆరోపణలు ఉన్నాయి.

రాజకీయాల్లోకి వచ్చిన నౌహీరా

వ్యాపారం వేల కోట్లకు చేరానే నౌహీరా రాజకీయాల్లోకి వచ్చింది. 2017లో అల్‌ ఇండియా మహిళా ఎంపవర్‌మెంట్ పార్టీ ఏర్పాటు చేసింది. వజ్రం గుర్తుతో ఎన్నికల బరిలో దిగింది. 2018 కర్ణాటక ఎన్నికల్లో 224 స్థానాల్లో పోటీ చేసి ఒక్క సీటు కూడా గెలవలేకపోయింది. ఆ తర్వాత తెలంగాణ ఎన్నికల్లోనూ ఇదే పరిస్థితి. ఈ ఎన్నికల ప్రచారం కోసం ఇన్వెస్టర్ల సొమ్మును పెద్ద ఎత్తున ఖర్చు చేసినట్టు బాలీవుడ్ నటులను ప్రచారానికి రప్పించినట్టు ఆధారాలు లభించాయి. ఈ రాజకీయ ఖర్చుల వల్లనే ఇన్వెస్టర్లకు చెల్లింపులు ఆగిపోయాయని కొందరి వాదన.

ఆస్తుల వేలం

బాధితులకు సొమ్ము తిరిగి చెల్లించేందుకు ఈడీ నౌహీరాకు చెందిన పలు ఆస్తలను అటాచ్ చేసింది. నవంబర్‌ 21, 2025న హైదరాబాద్‌లోని ఒక స్థిరాస్తిని ఈడీ 19. 64కోట్లకు వేలం వేసింది. ఇప్పటి వరకు వేలం ద్వారా, ఇతర మార్గాల్లో సుమారు 93. 63 కోట్లు వసూలు అయ్యాయి. సుమారు 428 కోట్ల విలువైన ఆస్తులను ఈడీ ఇప్పటికే స్వాధీనం చేసుకుంది. నౌహీరా, ఆమె బంధువులకు చెందిన రెండు కోట్ల విలువైన 12 విలాసవంతమైన వాహనాలను కూడా ఈడీ సీజ్ చేసింది. వీటిని కూడా వేలం వేయాలని కోర్టును కోరింది.

నౌహీరా షేక్ తన వద్ద ఉన్న ఆస్తుల జాబితాను పూర్తి స్థాయిలో ఇవ్వడం లేదని, కొన్ని వివాదాస్పద ఆస్తులను మాత్రమే చూపిస్తోందని ఈడీ కోర్టుకు తెలిపింది. ముఖ్యంగా టౌలీచౌకీలలోని 753 కోట్ల విలువై ఆస్తిపై అనేక వివాదాలు, ఆక్రమణలు ఉన్నట్టు తేలింది.

తెలంగాణ హైకోర్టు కీలక ఆదేశాలు

21 మే 2026న తెలంగాణ హైకోర్టులో నౌహీరా తరఫున న్యాయవాదులు తమపై ఉన్న నాన్‌బెయిలబుల్ వారెంట్లపై స్టే ఇవ్వాలని పిటిషన్ వేశారు. అయితే జస్టిస్‌ ఈవి వేణుగోపాల్ ఆ అభ్యర్థనను తోసిపుచ్చారు. ఈడీ, రాష్ట్ర ప్రభుత్వానికి కౌంటర్ దాఖలు చేయాలని ఆదేశిస్తూ, ప్రస్తుతానికి నౌహీరాను అధికారుల ముందు లొంగిపోవాలని సూచించారు. ఈ పరిస్థితుల్లోనే గురుగ్రామ్‌లో ఆమెను ఈడీ అధికారులు అరెస్టు చేశారు.

బాధితులకు న్యాయం ఎప్పుడు

దాదాపు 8 ఏళ్లుగా సాగుతున్న కేసులో బాధితులు తమ సొమ్ము కోసం ఎదురు చూస్తున్నారు. నౌహీరా షేక్ అరెస్టు అవ్వడం ఇది మొదటిసారి కాదు, కానీ ప్రతిసారీ ఆమె కోర్టు నుంచి ఉపశమనం పొందుతూ వచ్చింది. అయితే ఈసారి సుప్రీంకోర్టు, హైకోర్టులు ఆమె వైఖరిపై తీవ్ర ఆగ్రహంతో ఉన్నాయి. ఒక వేళ ఆమె 25 కోట్లు చెల్లించకపోతే బెయిల్ శాశ్వతంగా రద్దయ్యి, తదుపరి విచారణ జైలు నుంచే కొనసాగుతుంది.

Wife Stabs Husband Case Telangana: భర్తను చంపిన భార్యకు జైలు శిక్ష రద్దు.. కేవలం రూ. 500 జరిమానా! ఎందుకో తెలుసా?

Raja Sekhar Allu — Thu, 21 May 2026 16:29:05 +0530

Culpable Homicide Not Amounting to Murder: తెలంగాణ హైకోర్టు ఏప్రిల్ 1న ఒక సంచలన తీర్పును వెలువరించింది. భర్తను కత్తితో పొడిచి చంపిన కేసులో ఒక మహిళకు విధించిన జైలు శిక్షను రద్దు చేస్తూ, కేవలం 500 రూపాయల జరిమానాతో ఆమెను విడిచిపెట్టింది. 2026 ఏప్రిల్ 1న వెలువడిన ఈ తీర్పు, క్షణికావేశంలో జరిగిన నేరాలు , ఆ సమయం నాటి పరిస్థితులను న్యాయస్థానాలు ఎంత లోతుగా పరిశీలిస్తాయనే దానికి నిదర్శనంగా నిలిచింది.

అసలు ఏం జరిగిందంటే.. అసిఫాబాద్‌ దంపతుల మధ్య మనస్పర్థల కారణంగా గత నెల రోజులుగా విడివిడిగా ఉంటున్నారు. ఒకరోజు భర్త పిల్లల కోసం ఖర్జూరాలు తీసుకుని భార్య ఇంటికి వచ్చాడు. అయితే, ఆమెను చూడగానే ఆయన ఆగ్రహంతో ఊగిపోయాడు. అసభ్య పదజాలంతో దూషిస్తూ, ఆమె తల్లిదండ్రులను కూడా తిట్టడం మొదలుపెట్టాడు. దీంతో తీవ్ర ఆవేదనకు లోనైన భార్య, క్షణికావేశంలో ఇంట్లోని కత్తిని తీసుకుని భర్త గొంతుపై పొడిచింది. తీవ్ర గాయంతో ఆయన అక్కడికక్కడే ప్రాణాలు కోల్పోయాడు.

ఈ కేసు విచారణ చేపట్టిన ఆసిఫాబాద్ సెషన్స్ కోర్ట్ , 2011 సెప్టెంబర్ 8న ఆమెను దోషిగా తేల్చింది. నిందితురాలికి ఐపీసీ సెక్షన్ 304 పార్ట్-II హత్యాయత్నం కాని మరణం కింద నాలుగేళ్ల కఠిన కారాగార శిక్షతో పాటు 500 రూపాయల జరిమానా విధించింది. అయితే, తన నేరాన్ని ఆమె ఎక్కడా నిరాకరించలేదు కానీ, ఆ పరిస్థితుల్లో తానూ అలా చేయాల్సి వచ్చిందని పేర్కొంటూ హైకోర్టును ఆశ్రయించింది.

తెలంగాణ హైకోర్టు ఈ అప్పీల్‌ను విచారిస్తూ కీలక వ్యాఖ్యలు చేసింది. నిందితురాలు భర్తను పొడిచిన మాట వాస్తవమే అయినా, అది కేవలం ఆవేశంలో తీసుకున్న నిర్ణయమే తప్ప, అతడిని చంపాలనే ముందస్తు ప్రణాళిక లేదని కోర్టు అభిప్రాయపడింది. ఆ సమయంలో తన చర్య వల్ల భర్త చనిపోతాడనే విషయం ఆమెకు స్పష్టంగా తెలిసి ఉండకపోవచ్చని, కేవలం గాయపరచాలనే ఉద్దేశం మాత్రమే ఉండి ఉంటుందని ధర్మాసనం పేర్కొంది.

కేసు పూర్వాపరాలను, నిందితురాలు ఇప్పటికే అనుభవించిన మానసిక క్షోభను పరిగణనలోకి తీసుకున్న హైకోర్టు.. శిక్షా కాలాన్ని భారీగా తగ్గించింది. ఆమెకు విధించిన నాలుగేళ్ల జైలు శిక్షను రద్దు చేస్తూ, ట్రయల్ కోర్ట్ విధించిన 500 రూపాయల జరిమానాను చెల్లిస్తే సరిపోతుందని తీర్పునిచ్చింది. చట్టపరంగా నేరం రుజువైనప్పటికీ, మానవీయ కోణంలో పరిస్థితులను విశ్లేషించి హైకోర్టు ఈ ఉదారతను ప్రదర్శించింది.

FBI Shuts India Call Centre: కాల్ సెంటర్ ఇక్కడ - దోచుకునేది మాత్రం అమెరికన్లను - వేల కోట్లు కొట్టేసిన ముఠాను పట్టేసిన FBI

Raja Sekhar Allu — Thu, 21 May 2026 15:38:35 +0530

India-based Telemarketing Fraud: అమెరికాలో ఉంటున్న వృద్ధులను లక్ష్యంగా చేసుకుని, టెక్ సపోర్ట్ పేరుతో వారి జీవితకాల పొదుపును కొల్లగొడుతున్న ఒక భారీ అంతర్జాతీయ కుంభకోణాన్ని అమెరికా దర్యాప్తు సంస్థ FBI బట్టబయలు చేసింది. భారత్ కేంద్రంగా నడుస్తున్న ఒక కాల్ సెంటర్‌ను మూసివేయించిన ఎఫ్‌బీఐ, ఈ మోసాలకు సహకరించిన ఇద్దరు అమెరికన్ టెక్ ఎగ్జిక్యూటివ్‌లను కూడా అరెస్టు చేసింది. సాధారణంగా భారతీయులను నైజీరియన్లు మోసం చేస్తున్నారని మనం వింటుంటాం, కానీ ఈ కేసులో కొందరు భారతీయులే అమెరికన్లను మోసం చేశారు.

ఈ స్కామ్ ఎలా జరుగుతుందంటే.. అమెరికన్ల కంప్యూటర్ స్క్రీన్‌లపై అకస్మాత్తుగా మీ సిస్టమ్ వైరస్ బారిన పడింది అని ఒక నకిలీ పాప్-అప్ మెసేజ్ వస్తుంది. భయపడిన వృద్ధులు ఆ మెసేజ్‌లో ఉన్న నంబర్‌కు ఫోన్ చేయగానే, అది భారత్‌లోని కాల్ సెంటర్‌కు కనెక్ట్ అవుతుంది. అక్కడ పనిచేసే వారు టెక్ సపోర్ట్ ఏజెంట్లలా నటించి, సాఫ్ట్‌వేర్ క్లీనింగ్ పేరుతో వందల నుండి వేల డాలర్లను వసూలు చేస్తారు. గతేడాది ఒక్క అమెరికాలోనే ఇలాంటి టెక్ సపోర్ట్ స్కామ్‌ల వల్ల ప్రజలు ఏకంగా 2.1 బిలియన్ డాలర్లు అంటే సుమారు రూ.17,500 కోట్లు సంపదను కోల్పోయారు.

ఈ అక్రమ వ్యాపారానికి వెన్నుదన్నుగా నిలిచిన ఆడమ్ యంగ్ , హారిసన్ గెవిర్ట్జ్ అనే ఇద్దరు అమెరికన్లు తమ తప్పును అంగీకరించారు. వీరు నడుపుతున్న టెలికాం కంపెనీ ద్వారానే ఈ మోసపూరిత కాల్స్ రూటింగ్ అయ్యేవి. విచారణలో భాగంగా ఐదుగురు భారతీయులు సాహిల్ నారంగ్, చిరాగ్ సచ్‌దేవా, అబ్రార్ అంజుమ్, మనీష్ కుమార్ , జగమీత్ సింగ్ విర్క్ ఇప్పటికే దోషులుగా తేలారు. తమ స్వార్థం కోసం వృద్ధుల జీవితాలను చిన్నాభిన్నం చేసిన ఈ నిందితులకు జూన్ 16, 2026 న కోర్టు శిక్ష ఖరారు చేయనుంది.

వృద్ధులు గౌరవానికి, రక్షణకు అర్హులు.. వారిని లక్ష్యంగా చేసుకుంటే శిక్ష తప్పదు అని ఎఫ్‌బీఐ బాస్టన్ విభాగం హెచ్చరించింది. ఈ స్కామర్లు కేవలం డబ్బునే కాదు, బాధితుల మానసిక ప్రశాంతతను కూడా హరించారని దర్యాప్తు అధికారులు తీవ్రంగా ఖండించారు. ప్రతి కాల్ వెనుక ఒక అమాయక వ్యక్తి అవమానానికి, ఆర్థిక విధ్వంసానికి గురవుతున్నాడని ఆవేదన వ్యక్తం చేశారు. కేవలం రోడ్ ఐలాండ్ అనే చిన్న ప్రాంతంలోనే బాధితులు సుమారు 5.7 మిలియన్ డాలర్లు పోగొట్టుకున్నారంటే ఈ మోసం ఎంత విస్తృతంగా ఉందో అర్థం చేసుకోవచ్చు.

🚨#BREAKING: #YourFBI has shut down a call center operation in India that defrauded hundreds of elderly victims here in the U.S. & abroad out of millions of dollars through tech support scams, & two senior executives who operated a business that enabled it, have just admitted to… pic.twitter.com/zlSWOspKQ7
— FBI Boston (@FBIBoston) May 20, 2026

భారత్-అమెరికా మధ్య ఉన్న సహకారంతో ఇలాంటి కాల్ సెంటర్లపై నిరంతరం దాడులు జరుగుతున్నా, కొత్త రూపాల్లో ఈ ముఠాలు పుట్టుకొస్తూనే ఉన్నాయి. ఇలాంటి అంతర్జాతీయ క్రైమ్ నెట్‌వర్క్‌లను ఛేదించడం ద్వారా డిజిటల్ భద్రతపై ప్రజల్లో నమ్మకాన్ని పెంచాలని ఎఫ్‌బీఐ లక్ష్యంగా పెట్టుకుంది. ఈ కేసు ద్వారా భారత్‌లోని నకిలీ కాల్ సెంటర్ల నిర్వహకులకు, వారికి సహకరించే విదేశీ శక్తులకు గట్టి హెచ్చరిక పంపినట్లయింది.

Attapur Kidnap: అత్తాపూర్ అమ్మాయి కిడ్నాప్ అంతా ఉత్తదే - ఇంత పని చేశారా?

Raja Sekhar Allu — Wed, 20 May 2026 20:05:38 +0530

Attapur Kidnap Case Twist: హైదరాబాద్ అత్తాపూర్‌లో మంగళవారం రాత్రి ఒక యువతిని కారులో బలవంతంగా ఎక్కించుకుని వెళ్లారని అది కిడ్నాపేనని ప్రచారం కావడం కలకలం రేపింది. ఇదంతా కిడ్నాప్ కాదని, కేవలం స్నేహితుల మధ్య జరిగిన గొడవ అని పోలీసులు తేల్చేశారు. కిడ్నాప్ అయినట్లు భావించిన యువతి మలక్‌పేటలోని తన నివాసంలో సురక్షితంగా ఉన్నట్లు రాజేంద్రనగర్ పోలీసులు గుర్తించారు.

చిక్కని కారు.. చిక్కుముడి విప్పిన ఫోన్ పే !

నెంబర్ ప్లేట్ లేని కారులో యువతిని తీసుకెళ్లడంతో పోలీసులు మొదట సీసీటీవీల ఆధారంగా దర్యాప్తు ప్రారంభించారు. అయితే, సాంకేతిక పరిజ్ఞానాన్ని వాడిన పోలీసులు ఒక అద్భుతమైన క్లూను పట్టుకున్నారు. ఘటనకు ముందు ఆ యువతి సమీపంలోని రత్నదీప్ సూపర్ మార్కెట్‌లో కొన్ని వస్తువులు కొనుగోలు చేసి ఫోన్ పే ద్వారా నగదు చెల్లించింది. ఆ ట్రాన్సాక్షన్ ఐడీ ఆధారంగా ఆమె ఫోన్ నంబర్, చిరునామాను పోలీసులు నిమిషాల్లో ట్రేస్ చేశారు.

డీసీపీ శ్రీనివాస్ క్లారిటీ- కిడ్నాప్ కాదు!

రాజేంద్రనగర్ జోన్ డీసీపీ శ్రీనివాస్ ఈ కేసుపై స్పందిస్తూ.. ఆ యువతిని ఎవరూ కిడ్నాప్ చేయలేదని స్పష్టం చేశారు. కారులో వచ్చింది ఆమెకు తెలిసిన స్నేహితులే. వారి మధ్య ఏదో విషయంలో చిన్నపాటి వాగ్వాదం జరిగింది. ఆ కోపంలో వారు ఆమెను బలవంతంగా కారులో ఎక్కించుకుని వెళ్లారు. ఆ తర్వాత ఆమెను మలక్‌పేట్‌లోని తన ఇంటి వద్ద దింపేసి వెళ్లారు అని ఆయన వెల్లడించారు.ఆసుపత్రి బయట సెక్యూరిటీ గార్డులు చూస్తుండగానే యువతిని కారులోకి లాగడం, ఆమె కేకలు వేయడం చూసిన స్థానికులు అది కిడ్నాప్ అని భావించి పోలీసులకు ఫిర్యాదు చేశారు. అయితే, చివరకు అది స్నేహితుల మధ్య వ్యవహారమని తెలియడంతో అందరూ ఊపిరి పీల్చుకున్నారు.

పోలీసుల హెచ్చరిక

ప్రజా సమక్షంలో ఇలాంటి గొడవలకు దిగడం వల్ల అనవసరమైన భయాందోళనలు కలుగుతాయని, బాధ్యతారాహిత్యంగా వ్యవహరించిన సదరు యువతి మరియు ఆమె స్నేహితులపై కౌన్సెలింగ్ ఇచ్చే అవకాశం ఉందని సమాచారం. ఏదేమైనా, ఒక చిన్న డిజిటల్ పేమెంట్ ఆధారంగా పోలీసులు కేసును ఇంత వేగంగా ఛేదించడం విశేషం.

Hyderabad Airport Drug Bust: హైదరాబాద్ ఎయిర్‌పోర్టులో భారీగా హైడ్రోపోనిక్ గంజా పట్టివేత- స్మగ్లర్లు అంతా కవర్ చేశారు కానీ చిన్న తప్పు చేశారు !

Raja Sekhar Allu — Wed, 20 May 2026 18:02:09 +0530

DRI Seizure Hydroponic Ganja: హైదరాబాద్ శంషాబాద్ విమానాశ్రయం వేదికగా మరోసారి భారీ డ్రగ్స్ నెట్‌వర్క్ గుట్టురట్టయ్యింది. థాయిలాండ్ రాజధాని బ్యాంకాక్ నుంచి అక్రమంగా తరలిస్తున్న రూ. 3.05 కోట్ల విలువైన డ్రగ్స్‌ను డైరెక్టరేట్ ఆఫ్ రెవెన్యూ ఇంటెలిజెన్స్ అధికారులు పక్కా సమాచారంతో పట్టుకున్నారు. బ్యాంకాక్ నుంచి వచ్చిన ఇద్దరు భారతీయ ప్రయాణికుల నుంచి సుమారు 8.705 కిలోల అత్యంత నాణ్యమైన గంజాయిని అధికారులు స్వాధీనం చేసుకున్నారు.

వాటర్ బాటిళ్లు, స్నాక్స్ టిన్లలో గుట్టుగా

తనిఖీల నుంచి తప్పించుకునేందుకు స్మగ్లర్లు అనుసరించిన పద్ధతి చూసి అధికారులు సైతం విస్తుపోయారు. పట్టుబడిన డ్రగ్స్‌ను 24 నల్లటి ప్యాకెట్లలో ప్యాక్ చేసి.. వాటిని ఇన్సులేటెడ్ వాటర్ బాటిళ్లు, చిప్స్ టిన్లు, ఫుడ్ కంటైనర్లు, కార్డ్ బోర్డ్ బాక్సులలో అత్యంత చాకచక్యంగా దాచారు. అయితే, పక్కాగా అందిన ఇంటెలిజెన్స్ సమాచారంతో అధికారులు ప్రయాణికుల లగేజీని క్షుణ్ణంగా తనిఖీ చేయడంతో అసలు రంగు బయటపడింది.

The #DRI #Hyderabad officials seized 8.705 kgs High-Grade #Cannabis (#Hydroponic #Ganja), valued ₹3.05 crore, at RGIA, #HyderabadAirport, from two passengers, arriving from #Bangkok, the #drugs packets were concealed inside water bottles, food tins boxes.

Acting on specific… pic.twitter.com/o9VfVUHGcR
— Surya Reddy (@jsuryareddy) May 20, 2026

హైడ్రోపోనిక్ గంజా అంటే ఏంటి?

సాధారణ గంజాయి కంటే ఇది ఎంతో శక్తివంతమైనది , ఖరీదైనది. నేల అవసరం లేకుండా కేవలం నీటి ఆధారిత పోషకాలతో , కృత్రిమ కాంతిలో ఇండోర్ సెటప్‌లో దీనిని సాగు చేస్తారు. ఇందులో టిహెచ్‌సి స్థాయిలు ఎక్కువగా ఉండటం వల్ల డ్రగ్ మాఫియాలో దీనికి విపరీతమైన డిమాండ్ ఉంటుంది. అందుకే దీని ధర కోట్లలో పలుకుతుంది.

ఎన్డీపీఎస్ చట్టం కింద అరెస్టు

డ్రగ్స్ తరలిస్తున్న ఇద్దరు ప్రయాణికులను అధికారులు అదుపులోకి తీసుకున్నారు. వారి వద్ద ఉన్న డ్రగ్స్ నార్కోటిక్ డ్రగ్ డిటెక్షన్ కిట్ పరీక్షలో పాజిటివ్‌గా తేలడంతో, వారిద్దరినీ NDPS చట్టం కింద అరెస్ట్ చేశారు. ప్రస్తుతం వీరిని విచారిస్తున్న అధికారులు, ఈ స్మగ్లింగ్ వెనుక ఉన్న అంతర్జాతీయ నెట్‌వర్క్ ఎక్కడ ఉందో, వీరు ఎవరికి డెలివరీ చేయాల్సి ఉందో ఆరా తీస్తున్నారు.

The DRI on Tuesday, May 19, seized eight kgs of hydroponic ganja worth Rs 3 crore at the Hyderabad airport and arrested two persons.

During systematic examination of the check-in baggage of two Indian passengers arriving from Bangkok, 24 black-coloured packets containing… pic.twitter.com/KC5N9osx4s
— The Siasat Daily (@TheSiasatDaily) May 20, 2026

వరుస ఘటనలతో అలర్ట్!

గత కొద్ది నెలలుగా బ్యాంకాక్ నుంచి హైదరాబాద్‌కు డ్రగ్స్ తరలిస్తున్న కేసులు పెరుగుతుండటంతో కస్టమ్స్ మరియు డిఆర్ఐ అధికారులు నిఘా తీవ్రం చేశారు. మార్చి నెలలో కూడా సుమారు రూ. 9 కోట్ల విలువైన హైడ్రోపోనిక్ వీడ్‌ను పట్టుకున్న సందర్భాలు ఉన్నాయి.