Asha Bhosle Net Worth: సింగర్ మాత్రమే కాదు.. బిజినెస్ ద్వారా ఆశా భోంస్లేకు భారీగా ఆధాయం.. ఆమె ఆస్తుల విలువ ఎంతంటే

Asha Bhosle Death News: ప్రముఖ గాయని ఆశా భోంస్లే అనారోగ్యంతో తుదిశ్వాస విడిచారు. ముంబైలోని బ్రీచ్ క్యాండీ ఆసుపత్రిలో చికిత్స పొందుతూ ఆదివారం నాడు ఆమె కన్నుమూశారు.

లెజెండరీ సింగర్ ఆశా భోంస్లే

Source : social media

Asha Bhosle Passes Away | ముంబై: లెజెండరీ సింగర్ ఆశా భోంస్లే (92) మరణంతో సంగీత ప్రపంచంలో తీవ్ర విషాదం నెలకొంది. స్వర కోకిల ఆశా భోంస్లే ముంబై బ్రీచ్ కాండీ ఆసుపత్రిలో ఆదివారం తుదిశ్వాస విడిచారు. ఆమె భౌతికంగా మన మధ్య లేకపోయినా భోంస్లే పాడిన పాటలు ఎప్పటికీ అభిమానులను పలకరిస్తూనే ఉంటాయి. ఆశా భోంస్లే కేవలం ఒక గొప్ప గాయని మాత్రమే కాదు, సక్సెస్‌ఫుల్ పారిశ్రామికవేత్త కూడా అన్న ముంబై వాసులకు తప్పా బయటివారికి అంతగా  తెలియకపోవచ్చు. ఆశా భోంస్లే వ్యాపారం, ఆమె ఆస్తుల విలువ ఎంత ఉంటుందోనని ఇక్కడ తెలుసుకుందాం.

అంతర్జాతీయ రెస్టారెంట్ చైన్

తన అద్భుతమైన గాత్రంతో కోట్లాది ప్రజల మనసు గెలిచిన ఆశా భోంస్లే వంటల పట్ల తనకున్న ఇస్టాన్ని ఒక విజయవంతమైన రెస్టారెంట్ బ్రాండ్‌గా మార్చారు. దానికి ఆమె తన పేరు Asha's Restaurant అని పెట్టారు. ఆమె మొదటి రెస్టారెంట్‌ను 2002లో దుబాయ్‌లోని వాఫీ సిటీ మాల్‌లో ఓపెన్ చేశారు. తరువాత ఈ వ్యాపారం అంతర్జాతీయ స్థాయికి విస్తరించింది. ఈ రెస్టారెంట్ బ్రాంచులు దుబాయ్, అబుదాబి, కువైట్, ఖతార్, బహ్రెయిన్‌లతో పాటు యూకేలోని బర్మింగ్‌హామ్,  మాంచెస్టర్ నగరాల్లో ఉన్నాయంటే ఆమె ఆలోచన ఎంత గొప్పగా ఉంటుందో తెలుపుతుంది.

ఈ రెస్టారెంట్ ప్రత్యేకత ఏమిటి ?

Ashas Restaurant వాయువ్య భారత వంటకాలతో త్వరగానే ప్రజాదరణ పొందింది. ఈ బ్రాండ్‌ను ఇతరుల కంటే భిన్నంగా నిలిపిన అంశం.. ఆశా భోంస్లే వ్యక్తిగతంగా రెస్టారెంట్ వ్యవహారాలు పర్యవేక్షించేవారు. ఆమె సొంతంగా మెనూను సిద్ధం చేయడమే కాకుండా, వంటల్లో ఉపయోగించే మసాలా దినుసులను కూడా ఎంపిక చేసేవారు. దీనివల్ల కస్టమర్లకు ఇంటి భోజనం తిన్న అనుభూతితో పాటు ప్రీమియం డైనింగ్ ఎక్స్‌పీరియన్స్ లభించేది. నేడు ఈ బ్రాండ్‌కు ప్రపంచవ్యాప్తంగా డజనుకు పైగా రెస్టారెంట్లు ఉండగా.. ఇది ప్రతిష్టాత్మకమైన మిచెలిన్ గైడ్ (Michelin Guide) లో కూడా చోటు దక్కించుకుంది. 

ఆశా భోంస్లే ఆస్తుల విలువ ఎంత?
కేవలం రెస్టారెంట్ వ్యాపారం ద్వారా వచ్చే ఆదాయం గురించి చెప్పడానికి అధికారిక లెక్కలు అందుబాటులో లేవు. అయినప్పటికీ, రెస్టారెంట్ చైన్ ఆమెకు ఒక ప్రధాన ఆదాయ వనరుగా ఉంది. పలు రిపోర్టుల ప్రకారం, లెజెండరీ సింగర్ ఆశా భోంస్లే మొత్తం ఆస్తి విలువ దాదాపు 200 కోట్ల నుండి 250 కోట్ల రూపాయల మధ్య ఉంటుందని అంచనా. ఈ ఆస్తిలో ఎక్కువ భాగం ఆమె గ్లోబల్ రెస్టారెంట్ బిజినెస్ ద్వారా సమకూరింది. దీనితో పాటు ఆమెకు మ్యూజిక్ రాయల్టీలు, కచేరీలు,  సినిమాల్లో ప్లేబ్యాక్ సింగింగ్ ద్వారా ఆదాయం లభించింది. 

కొన్ని నివేదికల ప్రకారం, 2012లో ఆమె తన బ్రాండ్‌ను విస్తరించడానికి సుమారు 2 మిలియన్ డాలర్లు ఇన్వెస్ట్ చేశారు. ఇందులో భారత్‌లోనే ప్రారంభించిన వెంచర్లు కూడా ఉన్నాయి. దుబాయ్, కువైట్ సహా యూకే వంటి దేశాలలో ఆమె రెస్టారెంట్లు ప్రీమియం డైనింగ్ విభాగం కిందకు వస్తాయి. కనుక వీటిలో లాభాలు సైతం ఎక్కువగా ఉంటాయని తెలుస్తోంది. 

మరిన్ని చదవండి

లెజెండరీ సింగర్ ఆశా భోంస్లే కన్నుమూత - ప్రధాని మోదీ సహా సినీ, రాజకీయ ప్రముఖుల తీవ్ర దిగ్భ్రాంతి

ఆశా భోంస్లే 8 దశాబ్దాల సుదీర్ఘ ప్రస్థానం - వేలాది పాటలతో అరుదైన రికార్డులు... కెరీర్, వరించిన అవార్డులివే