Medical Emergency: ఆసుపత్రి బిల్లుకు భయపడొద్దు - మిమ్మల్ని కూల్‌గా ఉంచే ఉపాయాలు ఇవే!

 New Healthcare Payment Solutions: మన దేశంలో వైద్య చికిత్సల ఖర్చులు పెరగడమే తప్ప తరగడం లేదు. నేషనల్‌ హెల్త్ ప్రొఫైల్ 2023 ప్రకారం, దేశంలో వైద్య ద్రవ్యోల్బణం (Medical Inflation) మొత్తం ద్రవ్యోల్బణాన్ని అధిగమించి, గత సంవత్సరంలో దాదాపు 14 శాతానికి చేరుకుంది. ఈ పెరుగుదల వల్ల మధ్య తరగతి & తక్కువ ఆదాయ కుటుంబాలు అప్పుల్లో కూరుకుపోతున్నాయి. అధిక ఆదాయ వర్గాలు కూడా ఊహించని ఆర్థిక భారం మోయాల్సి వస్తోంది. ఈ సమస్యకు పరిష్కారాలు కూడా ఉన్నాయి. . భారం లేకుండా వైద్య ఖర్చులను భరించడానికి కొత్త హెల్త్‌కేర్‌ పేమెంట్‌ సొల్యూషన్స్‌ మార్కెట్‌లో అందుబాటులో ఉన్నాయి.

మన దేశంలో ఆరోగ్య సంరక్షణ ఖర్చులను పెంచుతున్న అంశాలు

సరికొత్త సాంకేతికలు: అత్యాధునిక వైద్య సాంకేతికతలు, అధునాతన చికిత్సలు సాధారణంగా ఎక్కువ ధరలతో ఉంటాయి. ఉదాహరణకు, రోబోటిక్ సర్జరీలు, మాలిక్యులర్ డయాగ్నస్టిక్స్ వంటివి.

నాన్-కమ్యూనికబుల్ డిసీజ్‌లు (NCDs): మధుమేహం, రక్తపోటు, గుండె సంబంధ సమస్యలు వంటి జీవనశైలి వ్యాధులు పెరుగుతున్నాయి. వీటికి దీర్ఘకాల సంరక్షణ & ఖరీదైన మందులు అవసరం.

హాస్పిటల్ ఇన్‌ఫ్రాస్ట్రక్చర్: అనేక ప్రైవేట్ ఆసుపత్రులు గ్లోబల్ స్టాండర్డ్స్‌కు అనుగుణంగా మౌలిక సదుపాయాలపై భారీగా పెట్టుబడి పెడుతున్నాయి, ఇది చికిత్స ఖర్చులను పెంచుతుంది.

మందుల ధరలు: ఔషధాల ధరలను పరిమితం చేసేలా ప్రభుత్వం ప్రయత్నాలు చేస్తున్నప్పటికీ, పేటెంట్ పొందిన మందులు & ప్రత్యేక చికిత్సల ఔషధాల ధరలు ఎక్కువగానే ఉన్నాయి.

మెడికల్ టూరిజం: భారతదేశం, గ్లోబల్‌ మెడికల్ టూరిజం హబ్‌గా మారింది. ఎక్కువ ఫీజ్‌ చెల్లించడానికి సిద్ధంగా ఉన్న అంతర్జాతీయ రోగులకు మన ఆసుపత్రులు ప్రాధాన్యత ఇవ్వడంతో, భారతీయులపైనా ఆ భారం పడుతోంది.

హెల్త్‌కేర్ పేమెంట్‌ సొల్యూషన్స్

వైద్య ద్రవ్యోల్బణం విసురుతున్న ఆర్థిక సవాళ్లను ఎదుర్కోవడానికి చాలా ఆరోగ్య సంరక్షణ చెల్లింపు పరిష్కారాలు మార్కెట్‌లో ఉన్నాయి.

ప్రభుత్వ పథకాలు: ఆయుష్మాన్ భారత్ ప్రధాన్ మంత్రి జన్ ఆరోగ్య యోజన (PM-JAY) వంటి భారత ప్రభుత్వ కార్యక్రమాలు ఆర్థికంగా వెనుకబడిన కుటుంబాలకు ఆరోగ్య కవరేజీని అందిస్తున్నాయి. 

ప్రైవేటు పథకాలు: ప్రైవేటు ఆరోగ్య బీమా సంస్థలు కూడా వ్యక్తులు & కుటుంబాల అవసరాలకు సరిపోయే ఆరోగ్య బీమా పథకాలను అమ్ముతున్నాయి. ఆరోగ్య బీమా పథకాలకు కొన్ని ప్రత్యేక ఫీచర్లను అదనంగా యాడ్‌ చేస్తున్నాయి. అవి:

టాప్-అప్ ప్లాన్‌లు: వీటి ద్వారా, పాలసీహోల్డర్‌ తన బేస్ ఇన్సూరెన్స్‌కు మించి కవరేజీని పొడిగించుకోవచ్చు.

క్రిటికల్ ఇల్‌నెస్ పాలసీలు: క్యాన్సర్ లేదా గుండె జబ్బుల వంటి తీవ్రమైన పరిస్థితుల్లో ఏకమొత్తంలో చెల్లింపులు అందుతాయి.

నగదు రహిత చికిత్స: వైద్య చికిత్స సమయంలో జేబు నుంచి డబ్బు తీసే అవసరాన్ని తగ్గిస్తుంది.

వైద్య రుణాల కోసం డిజిటల్ ప్లాట్‌ఫామ్‌లు
EMIల్లో తిరిగి చెల్లించే వీలున్న మెడికల్ లోన్‌లు, హెల్త్‌కేర్-ఫోకస్డ్ పేమెంట్ యాప్‌లకు ప్రజల్లో ఆదరణ పెరుగుతోంది. ఈ యాప్‌లు/లోన్లు తక్షణం డబ్బును అందిస్తాయి. తద్వారా, ఆ కుటుంబం తన పొదుపు/పెట్టుబడులను కదిలించకుండా నాణ్యమైన వైద్య సేవలు పొందొచ్చు. ఖరీదైన చికిత్సల కోసం వడ్డీ లేని EMIలను అందించడానికి అనేక ఆసుపత్రులు ఆర్థిక సంస్థలతో ఒప్పందాలు కుదుర్చుకుంటున్నాయి.

కంపెనీ యాజమాన్యాల నుంచి హెల్త్‌ కవరేజ్‌
ఉద్యోగి ఆరోగ్య సంరక్షణపై శ్రద్ధ పెడుతున్న చాలా కంపెనీలు ఉద్యోగి & అతని కుటుంబ సభ్యుల కోసం ఆరోగ్య బీమా ప్రయోజనాలను అందిస్తున్నాయి. ఇందుకోసం, కొన్ని కంపెనీలు ప్రీమియంలో కొంత భాగాన్ని ఉద్యోగుల నుంచి వసూలు చేస్తుండగా, మరికొన్ని కంపెనీలు ప్రీమియం మొత్తాన్ని తామే చెల్లిస్తున్నాయి.

క్రౌడ్ ఫండింగ్ ప్లాట్‌ఫామ్‌లు
Ketto, ImpactGuru, Milaap వంటి వెబ్‌సైట్‌లు ఖరీదైన వైద్య చికిత్సల కోసం నిధులు సమీకరణలో సాయపడుతున్నాయి. 

సబ్‌స్క్రిప్షన్ ఆధారిత ఆరోగ్య సంరక్షణ
హెల్త్‌కేర్ కంపెనీలు, నెలవారీ చెల్లింపులతో సబ్‌స్క్రిప్షన్ మోడల్‌లను ప్రవేశపెడుతున్నాయి. వీటి ద్వారా అపరిమిత డాక్టర్ సంప్రదింపులు, రోగ నిర్ధారణ పరీక్షలు & మందులపై డిస్కౌంట్‌, ఎక్స్‌పర్ట్‌ కన్సల్టేషన్‌ వంటివి అందిస్తున్నాయి.
 
మరో ఆసక్తికర కథనం: అత్యవసర పరిస్థితుల్లో పీఎఫ్‌ డబ్బును ఎలా విత్‌డ్రా చేయాలి? - పూర్తి సమాచారం ఇదే!