Jio Maraket Listing: జియో జంబో లిస్టింగ్ రేపే.. రూ.10.3 లక్షల కోట్ల విలువతో స్టాక్ మార్కెట్‌లోకి ఎంట్రీ.. మార్కెట్ లో హుషారు

Visakha CII Summit: విశాఖలో ఘనంగా సీఐఐ భాగస్వామ్య సదస్సు.. ప్రగతి, సంప్రదాయాల సమ్మేళనంగా ఆంధ్రా వేదిక

Satyaprasad Bandaru — Thu, 12 Nov 2026 17:45:02 +0530

Visakha CII Summit: సాగర తీర నగరం విశాఖపట్నంలో గురువారం ఘనంగా ప్రారంభమైన భారత పరిశ్రమల సమాఖ్య భాగస్వామ్య సదస్సు (CII - Partnership Summit) వేదిక సరికొత్త శోభను సంతరించుకుంది. ఆహ్లాదకరమైన వాతావరణం, సరికొత్త ఆలోచనలకు ఊపిరిలూదేలా సదస్సు ప్రాంగణాన్ని అత్యద్భుతంగా తీర్చిదిద్దారు. గురువారం ఉదయం సదస్సును సీఎం చంద్రబాబు నాయుడు ప్రారంభించారు.

ప్లీనరీ హాల్, మూడు సమావేశ మందిరాలు, పెట్టుబడులకు అంకురార్పణ చేసే వ్యవస్థాపక మందిరంతో పాటు ఏపీ ఘన కీర్తిని ప్రపంచానికి చాటిచెప్పేలా ఏర్పాటు చేసిన ప్రదర్శన సందర్శకులను కట్టిపడేస్తోంది. రాష్ట్ర సంస్కృతి, సంప్రదాయాలు, నోరూరించే వంటకాలు, చేనేత-కలంకారీ హస్తకళలు, పర్యాటక సొబగులు, పారిశ్రామిక ప్రగతి, పెట్టుబడి అవకాశాలను ఈ వేదికపై కళ్లకు కట్టినట్లు ఆవిష్కరించారు.

కట్టిపడేస్తున్న చేనేత, కలంకారీ వైభవం

చేనేత, కలంకారీ కళలకు ఆంధ్రప్రదేశ్ పుట్టినిల్లు. రాష్ట్ర చేనేత, జౌళి శాఖ ఆధ్వర్యంలో ఏర్పాటు చేసిన స్టాల్స్ ప్రత్యేక ఆకర్షణగా నిలుస్తున్నాయి. శ్రీకాకుళం నుండి అనంతపురం వరకు రాష్ట్రవ్యాప్తంగా ప్రసిద్ధి చెందిన పట్టు, కలంకారీ వస్త్రాలను ప్రదర్శించారు. వస్త్రాల తయారీ విధానాన్ని ప్రత్యక్షంగా వివరించడం సందర్శకులను ఎంతగానో ఆకట్టుకుంటోంది. వీటితో పాటు విభిన్న రకాల అందమైన తివాచీలు చూపరులను మంత్రముగ్ధులను చేస్తున్నాయి.

‘హాల్ ఆఫ్ ఫేమ్’ – ‘టేస్ట్ ఆఫ్ ఆంధ్రా’

వివిధ రంగాల్లో విశేష సేవలందించి, రాష్ట్రానికి ఖ్యాతి తెచ్చిన మహనీయుల కీర్తిని చాటుతూ 'హాల్ ఆఫ్ ఫేమ్' పేరుతో లబ్ధప్రతిష్ఠుల చిత్రపటాలను ఏర్పాటు చేశారు. మరోవైపు, ఆంధ్రా రుచులను ప్రపంచానికి పరిచయం చేసే 'టేస్ట్ ఆఫ్ ఆంధ్రా' విభాగం సందర్శకులకు సరికొత్త అనుభూతిని పంచుతోంది. ప్రపంచ ప్రఖ్యాత అరకు కాఫీ ఘుమఘుమలతో పాటు, వంటకాలకు మరింత రుచిని జోడించే సుగంధ ద్రవ్యాలు, ప్రత్యేక మసాలా దినుసులు ప్రదర్శనలో ప్రత్యేక ఆకర్షణగా నిలిచాయి.

డిజిటల్ సొబగులతో పర్యాటకం, హస్తకళలు

ఏపీ పర్యాటక అందాలను ఆధునిక డిజిటల్ విధానంలో ఆవిషరించిన తీరు అద్భుతంగా ఉంది. ఎకో టూరిజం, ఆధ్యాత్మిక, వారసత్వ, సాంస్కృతిక పర్యాటక రంగాలతో పాటు రాష్ట్ర సంప్రదాయ జీవనశైలిని కళ్లకు కట్టినట్లు చూపుతున్నారు. అలాగే, 'మేకర్స్ స్టూడియో' విభాగంలో కొలువుదీరిన పెన్ కలంకారీ, కొండపల్లి బొమ్మలు, సవర ఆదివాసీ కళాకృతులు, ప్రఖ్యాత తోలుబొమ్మలు చూడముచ్చట గొలుపుతున్నాయి.

Also Read: పెట్టుబడిదారులకు చంద్రబాబు సావరిన్ గ్యారెంటీ .. ప్రభుత్వాలు మారినా రక్షణ - సీఐఐ సమ్మిట్‌లో కీలక ప్రకటన

పెట్టుబడుల స్వర్గధామంగా ఆంధ్రప్రదేశ్

ఆధునిక యుగంలో రాష్ట్రం సాధిస్తున్న శరవేగవంతమైన పారిశ్రామిక అభివృద్ధిని ఈ ప్రదర్శన అద్దం పడుతోంది. ముఖ్యంగా ఫుడ్ ప్రాసెసింగ్, గ్రీన్ ఎనర్జీ, గ్రీన్ అమ్మోనియా, ఉక్కు, ఉపాధి కల్పన రంగాల్లో రాష్ట్ర ప్రగతిని ఘనంగా వివరించారు. పెట్టుబడులకు ఉన్న విస్తృత అవకాశాలు, ప్రభుత్వ ప్రోత్సాహకాలను స్పష్టంగా తెలియజేస్తూ "పెట్టుబడుల స్వర్గసీమ ఆంధ్రప్రదేశ్‌లో పెట్టుబడులు పెట్టండి" అనే స్ఫూర్తిని పారిశ్రామికవేత్తల్లో నింపేలా ఈ ప్రదర్శన విజయవంతంగా కొనసాగుతోంది.

Also Read: ఏపీలో 23 పట్టణ స్థానిక సంస్థల ఎన్నికలకు నోటిఫికేషన్.. ఈ నెల 26న పోలింగ్

పాత ఆభరణాలు మార్చి కొత్త బంగారం కొనడం శుభమా కాదా? బంగారం మార్పిడి నియమాలు తెలుసుకోండి!

RAMA — Fri, 6 Nov 2026 06:00:11 +0530

ధనత్రయోదశి 2026: ధన త్రయోదశి రోజు పాత ఆభరణాలను కొత్త బంగారంతో మార్చుకోవడం శుభప్రదమా కాదా? ఈ సంవత్సరం బంగారం ధరలు పెరగడం వల్ల..పాత ఆభరణాలను కొత్త వాటితో మార్చుకునే ట్రెండ్ కూడా వేగంగా పెరిగింది.

వరల్డ్ గోల్డ్ కౌన్సిల్ నిర్వహించిన ఒక సర్వే ప్రకారం, 76% మంది ప్రజలు తమ పాత ఆభరణాలను కొత్త వాటితో మార్చుకోవడానికి ఆసక్తి చూపారు. దీనర్థం ఈ సమస్య కేవలం మతపరమైనది మాత్రమే కాదు, బడ్జెట్‌కు కూడా సంబంధించినది.

Dhanteras Wishes 2026: శ్రీ మహాలక్ష్మి ధన్వంతరి శ్లోకాలతో ధన త్రయోదశి శుభాకాంక్షలు తెలియజేయండి!

పాత బంగారం ఇవ్వడం దురదృష్టమా?

ప్రాచీన మత గ్రంథాలు ప్రస్తుత చిల్లర బంగారు వినిమయ ప్రక్రియకు ఎలాంటి ప్రత్యక్ష నియమాలను అందించవు. అందువల్ల, ధంతేరస్ నాడు పాత బంగారం ఇవ్వడం "లక్ష్మీదేవిని తరిమివేస్తుంది" అనే వాదన శాస్త్రీయంగా నిరూపితమైన నియమం కాదు.

ధనత్రయోదశి సంప్రదాయం సంపదను పెంచుకోవడం , శుభప్రదమైన వస్తువులను ఇంటికి తీసుకురావడంపై దృష్టి పెడుతుంది. అందువల్ల, పాత లేదా ఉపయోగించని ఆభరణాలను కొత్త బంగారంతో మార్చుకోవడం అంటే సంపదను కోల్పోవడం కాదు, అది రూపాంతరం చెందడం.

ధార్మిక కుటుంబాలు ముందుగా పాత ఆభరణాలను పరిశీలించి, మార్చుకుని, శుభ సమయంలో కొత్త ఆభరణాలను లేదా నాణేలను ఇంటికి తీసుకురావడం ద్వారా ఇలా చేయవచ్చు. ఇది సంప్రదాయాన్ని, సౌకర్యాన్ని రెండింటినీ కాపాడుతుంది.

దీపావళి 2026: లక్ష్మీ పూజకు తక్కువ సమయమే! మీ నగర శుభ ముహూర్తం ఇదే

2026లో ఏ సమయం శుభప్రదమైనది?

ఈ ఏడాది ధన త్రయోదశి శుక్రవారం నవంబర్ 6వ తేదీ. హైదరాబాద్ లో ధన త్రయోదశి తిథి ఉదయం 10:32 గంటలకు ప్రారంభమవుతుంది. లక్ష్మీ-కుబేర పూజ, స్థిరమైన వృషభ కాలం సాయంత్రం 6:02 నుంచి 7:57 వరకు ఉంటుంది.

త్రయోదశి ప్రారంభమైన తర్వాత బంగారం కొనడానికి అనేక శుభప్రదమైన చౌఘడియాలు అందుబాటులో ఉంటాయి.

ఈసారి గమనించాల్సిన ఒక జ్యోతిష్య అంశం కూడా ఉంది
వక్రగతిలో ఉన్న శుక్రుడు నవంబర్ 6వ తేదీన కన్యారాశిలోకి ప్రవేశిస్తాడు. శుక్రుడికి సంపద, ఆభరణాలు , విలాసాలతో సంబంధం ఉంది.

దీని ఆచరణాత్మక సందేశం మరింత ముఖ్యం
ఆడంబరం కోసం అధికంగా ఖర్చు చేయవద్దు. ఉపయోగకరమైన, స్పష్టమైన ధర కలిగిన, మీ బడ్జెట్‌కు సరిపోయే ఆభరణాలను ఎంచుకోవడం ఉత్తమం.

దీపావళి 2026: 5 రోజుల పండుగ.. ప్రతి రోజుకు ఓ ప్రత్యేకత, విశిష్టత!

మార్పిడి చేసేటప్పుడు ఏం గమనించాలి?

పాత బంగారం స్వచ్ఛత, కరిగించడానికి అయ్యే ఖర్చు తగ్గింపు, బరువు, వినిమయ రేటు, తయారీ ఛార్జీలు , తుది బిల్లును విడివిడిగా తనిఖీ చేయండి. ఈ పండుగ సీజన్‌లో అధిక ధరల కారణంగా తేలికపాటి ఆభరణాలు..పాత బంగారం వినిమయం రెండింటిలోనూ పెరుగుదల కనిపించింది. అనేక ప్రధాన నగల వ్యాపారుల వద్ద ఇప్పుడు వినిమయం అమ్మకాలలో ఒక ముఖ్యమైన భాగంగా మారింది.

ధంతేరస్ 2026: ఈ 8 చోట్ల దీపాలు వెలిగిస్తే సంపద, శ్రేయస్సు ఖాయం!

గమనిక: ఆధ్యాత్మికవేత్తలు సూచించిన వివరాలు, ఆధ్యాత్మిక గ్రంధాల్లో పొందుపరిచిన సమాచారం ఆధారంగా అందించిన కథనం ఇది. వీటిని ఎంతవరకూ పరిగణలోకి తీసుకోవాలన్నది పూర్తిగా మీ వ్యక్తిగతం.

Stock Market Rally: మార్కెట్లలో సునామీ ర్యాలీ - 2000 పాయింట్లు ఎగబాకిన సెన్సెక్స్.. అసలైన కారణాలివే!

Raja Sekhar Allu — Thu, 5 Nov 2026 15:59:17 +0530

Crude Oil Price Drop Below 95 Dollars: దేశీయ స్టాక్ మార్కెట్లలో గురువారం మునుపెన్నడూ లేని రీతిలో రికార్డు స్థాయి ర్యాలీ నమోదైంది. ట్రేడింగ్ ముగిసే సమయానికి బొంబాయి స్టాక్ ఎక్స్చేంజ్ సూచీ సెన్సెక్స్ ఏకంగా 2,008.61 పాయింట్లు 2.60% మేర లాభపడి 79,310.01 పాయింట్ల వద్ద క్లోజ్ అయింది. అలాగే నేషనల్ స్టాక్ ఎక్స్చేంజ్ సూచీ నిఫ్టీ-50 కూడా 576.00 పాయింట్లు 2.40% ఎగబాకి 24,536.60 వద్ద ముగిసింది. ఒక్కరోజే సెన్సెక్స్ , నిఫ్టీలు ఇంత భారీ స్థాయిలో లాభపడటంతో దలాల్ స్ట్రీట్‌లోని ఇన్వెస్టర్ల సంపద దాదాపు రూ. 8 లక్షల కోట్లకు పైగా పెరిగింది.

ఈ ఊహించని బుల్ రన్‌కు ప్రధాన కారణం ముడిచమురు ధరలు అంతర్జాతీయ మార్కెట్లో దారుణంగా పతనం కావడమే. పశ్చిమాసియాలో ఉద్రిక్తతలు సడలుతున్నట్లు వచ్చిన వార్తలు, అమెరికా-ఇరాన్ మధ్య మధ్యవర్తిత్వం ద్వారా చర్చలు పురోగతి సాధిస్తున్నాయనే నివేదికలతో బ్రెంట్ క్రూడ్ ధర బ్యారెల్‌కు 95 డాలర్ల దిగువకు పడిపోయింది. భారత్ తన ముడిచమురు అవసరాల్లో 85 శాతానికి పైగా దిగుమతి చేసుకుంటుంది కాబట్టి, క్రూడ్ ధరలు పడిపోవడం వల్ల ద్రవ్యోల్బణ ఒత్తిళ్లు తగ్గి కంపెనీల కార్పొరేట్ లాభాలు మరియు వాణిజ్య లోటు మెరుగుపడతాయనే నమ్మకం ఇన్వెస్టర్లలో బలపడింది.

మరొక ప్రధాన కారణం అంతర్జాతీయ రాజకీయాలు మరియు విదేశీ ఇన్వెస్టర్ల రీ-ఎంట్రీ. ఇటీవల జరిగిన అమెరికా మిడ్‌టర్మ్ ఎన్నికల ఫలితాలు వెలువడి గ్లోబల్ మార్కెట్లలో అస్థిరత తొలగిపోవడం ప్రపంచవ్యాప్తంగా సానుకూల వాతావరణాన్ని తెచ్చిపెట్టింది. దీనికి తోడు గత కొన్ని రోజులుగా నిరంతరం సెల్లింగ్ చేసిన విదేశీ వ్యవస్థాగత ఇన్వెస్టర్లు మళ్లీ భారత ఈక్విటీ మార్కెట్లలోకి భారీగా నిధులను పంప్ చేయడం ప్రారంభించారు. రూపాయి విలువ కూడా డాలర్‌తో పోలిస్తే రెండు వారాల గరిష్ట స్థాయికి బలపడటం మార్కెట్లకు అదనపు బలాన్నిచ్చింది.

🚨 BREAKING: MILESTONE UNLOCKED FOR INDIA INC.! 🇮🇳📈 India's stock market has officially made history as the total market capitalization of all BSE-listed companies crosses the ₹500 LAKH CRORE ($6+ TRILLION) mark for the first time ever! 💥🚀 What drove today's massive market surge? 👇 1️⃣ Strong FII Comeback: Foreign Institutional Investors turned net buyers, pouring in over ₹7,280+ crore in aggressive inflows. 2️⃣ Crude Oil Relief: Brent crude posted a sharp weekly drop (~16%), easing macroeconomic pressure and boosting domestic sentiments. 3️⃣ Global Market Tailwinds: A sharp relief rally across global equity indices pushed Sensex up over 1,600+ points during the session. 📊 The Big Picture: From ₹400 lakh crore to ₹500 lakh crore, India’s equity market trajectory underscores solid domestic retail participation, resilience, and expanding long-term institutional backing. What are your top picks for this historic market rally? Let us know below! 👇 #IndianStockMarket #Sensex #Nifty50 #BSE #Nifty #MarketCap #BullMarket #Investing #IndiaEconomy
— Holy Cow AMFI Registered (@CashOnWork) November 5, 2026

వ్యాపార రంగాల పరంగా చూస్తే బ్రాడ్-బేస్డ్ కొనుగోళ్లు జరిగాయి. బ్యాంకింగ్, ఆటో, ఫైనాన్షియల్ సర్వీసెస్ , ఐటీ రంగాలు మార్కెట్‌ను ముందుకు నడిపాయి. నిఫ్టీ-50 లో బజాజ్ ఫైనాన్స్ దాదాపు 7.7% లాభంతో టాప్ గెయినర్‌గా నిలవగా, శ్రీరామ్ ఫైనాన్స్ (6.1%), మహీంద్రా అండ్ మహీంద్రా (5.6%), మారుతి సుజుకి (5.5%) , టాటా మోటార్స్ భారీ లాభాలను మూటగట్టుకున్నాయి. ఐసీఐసీఐ బ్యాంక్, కొటక్ మహీంద్రా బ్యాంక్, అదానీ పోర్ట్స్ వంటి దిగ్గజ షేర్లు 52 వారాల నూతన గరిష్ట స్థాయిలను తాకాయి.

అంతర్జాతీయంగా తగ్గిన చమురు సెగ, విదేశీ పెట్టుబడుల ప్రవాహం, గ్లోబల్ మార్కెట్ల సానుకూల సంకేతాలు భారత స్టాక్ మార్కెట్లకు పండుగ వాతావరణాన్ని తీసుకొచ్చాయి. దీర్ఘకాలికంగా భారత ఆర్థిక వ్యవస్థ బలంగా ఉందన్న అంచనాలతో ఇన్వెస్టర్లలో సెంటిమెంట్ మళ్లీ బలపడటం వల్ల రాబోయే రోజుల్లో నిఫ్టీ 25,000 మార్కును చేరేందుకు మార్గం సుగమమైందని మార్కెట్ విశ్లేషకులు భావిస్తున్నారు.

మన చేతిలో ఉండే స్మార్ట్ఫోన్ వెనుక ఉన్న జర్నీ తెలుసా ?

ABP Desam — Mon, 2 Nov 2026 15:10:05 +0530

ప్రతిరోజూ మనం ఉదయం లేచింది మొదలు రాత్రి పడుకునే వరకు విడిచిపెట్టని వస్తువు ఏదైనా ఉందంటే అది మన చేతిలో ఉండే స్మార్ట్‌ఫోనే. కేవలం ఒక కమ్యూనికేషన్ డివైస్‌గా ప్రారంభమైన ఈ చిన్న పరికరం.. నేడు మన ప్రపంచాన్ని శాసించే స్థాయికి ఎలా చేరుకుంది? దీని వెనుక దశాబ్దాల శాస్త్ర సాంకేతిక ప్రయాణం, ఎంతోమంది శాస్త్రవేత్తల శ్రమ దాగి ఉంది.

Nita Mukesh Ambani Anant Ashray: అనాథలకోసం కర్జాత్‌లో 100 ఎకరాల టౌన్‌షిప్‌.. నీతా అంబానీ కొత్త ప్రాజెక్ట్.

ARYA — Sun, 1 Nov 2026 22:16:46 +0530

Nita Mukesh Ambani Anant Ashray: రిలయన్స్ ఫౌండేషన్ ఆధ్వర్యంలో మహారాష్ట్రలోని కర్జాత్‌లో 100 ఎకరాల విస్తీర్ణంలో భారీ టౌన్‌షిప్‌ ఏర్పాటు చేయనున్నారు. అనాథ పిల్లలు, వృద్ధులు, ఎదుగుదలకు సంబంధించిన లోపాలున్న వారికి జీవితకాలం నివాసం, వైద్యం, విద్య, పునరావాస సేవలు అందించడమే ఈ ప్రాజెక్టు లక్ష్యం. ముంబై సమీపంలోని కర్జాత్‌లో ఈ ప్రాజెక్టును రిలయన్స్ ఫౌండేషన్ ఫౌండర్, చైర్‌పర్సన్ నీతా ఎం. అంబానీ ఆదివారం భూమిపూజ చేసి ప్రారంభించారు. తన భర్త ముఖేష్ అంబానీ పేరు మీదుగా నీతా ముఖేష్ అంబానీ అనంత్ ఆశ్రయ్ అని ఈ టౌన్‌షిప్‌కు పేరు పెట్టారు. దశలవారీగా దీని నిర్మాణ పనులు చేపట్టనున్నారు.

5 వేల మందికి జీవితకాల సంరక్షణ

ఈ టౌన్‌షిప్‌లో 5,000 మందికి పైగా వ్యక్తులకు జీవితకాల నివాస సదుపాయాలు కల్పించాలని లక్ష్యంగా పెట్టుకున్నారు. అక్కడ ఆశ్రయం పొందేవారితో పాటు.. వారి సంరక్షకులువైద్య నిపుణులు, ఇతర సిబ్బంది కలిపి ఈ టౌన్‌షిప్‌లో 15వేల మంది నివాసం ఉండనున్నారు. నివాస సదుపాయాలతో పాటు ప్రత్యేక వైద్య సేవలు, పునరావాసం, విద్య, వృత్తి నైపుణ్య శిక్షణ వంటి సదుపాయాలు ఒకే ప్రాంగణంలో ఏర్పాటు చేయనున్నారు.

ఈ సమాజంలో ఏ తోడూ లేని అనాథలకు . ప్రత్యేక సంరక్షణ అవసరమైన వారికి సురక్షితమైన ఇల్లు, వైద్య సహాయం, అభివృద్ధికి అవసరమైన అవకాశాలు కల్పించడమే తమ లక్ష్యమని తెలిపారు. నీతా అంబానీ తెలిపారు. [quote author=నీతా అంబానీ]“నాకు, నా కుటుంబానికి ‘నీతా ముఖేష్ అంబానీ అనంత్ ఆశ్రయ్’ ఎంతో మనసుకు దగ్గరైన కార్యక్రమం. వైకల్యాలు ఉన్నవారు, ఇల్లు అవసరమైన పిల్లలు, సంరక్షణ, ఆప్యాయత కోరుకునే వృద్ధుల కోసం ప్రేమతో కూడిన ఒక ఇంటిని నిర్మించే దిశగా ఇది తొలి అడుగు. కుటుంబ వాతావరణంతో కూడిన ఆప్యాయత, వైద్య సహాయం, ప్రత్యేక సంరక్షణ ఒకేచోట అందుబాటులో ఉండే సమాజాన్ని నిర్మించాలని మేము కోరుకుంటున్నాం. ప్రకృతి ఒడిలో నివసిస్తూ, నేర్చుకోవడానికి, పనిచేయడానికి, స్నేహితులను సంపాదించుకోవడానికి, పండుగలు, వేడుకలను ఆనందంగా జరుపుకోవడానికి ప్రతి ఒక్కరికీ అవకాశం ఉండాలి.”[/quote]

ఆమె ఇంకా మాట్లాడుతూ.. “ఒక తల్లిగా నాకున్న అతిపెద్ద కోరిక ఒక్కటే. తమ తర్వాత తమ పిల్లలను ఎవరు చూసుకుంటారోనని జీవితమంతా ఆందోళన చెందే తల్లిదండ్రులు.. తమ పిల్లలకు ఎప్పటికీ ఒక ఇల్లు, ఒక కుటుంబం ఉంటాయనే నమ్మకంతో ప్రశాంతంగా ఉండగలగాలి. అన్నింటికంటే ముఖ్యంగా, ‘నీతా ముఖేష్ అంబానీ అనంత్ ఆశ్రయ్’ ప్రతి వయసులోని ప్రతి ఒక్కరికీ గౌరవప్రదంగా జీవించే అవకాశాన్ని కల్పించాలని, ప్రతి కొత్త రోజును ఆశతో స్వాగతించేలా చేయాలని మేము ఆశిస్తున్నాం” అని నీతా అంబానీ పేర్కొన్నారు.

ఎనిమిది గ్రామాలుగా టౌన్‌షిప్‌ నిర్మాణం

ఈ టౌన్‌షిప్‌లో మొత్తం ఎనిమిది నివాస గ్రామాలు ఉంటాయి. భారతదేశంలోని నదుల పేర్లతో వీటికి పేర్లు పెట్టనున్నారు. ప్రతి గ్రామానికి ప్రత్యేక రంగులు, చిహ్నాలు, సెన్సరీ గార్డెన్లు ఏర్పాటు చేస్తారు. నివాసితులు తమ పరిసరాలను సులభంగా గుర్తించేందుకు ఇవి ఉపయోగపడతాయి.

ప్రతి ఇంట్లో కుటుంబ వాతావరణం ఉండేలా ప్రత్యేక సంరక్షకులు, హౌస్ పేరెంట్స్‌ను నియమించనున్నారు. నివాసితుల ఆరోగ్యం, విద్య, నైపుణ్యాభివృద్ధి, ఉపాధి, వ్యక్తిగత సంక్షేమానికి అనుగుణంగా ప్రత్యేక సంరక్షణ ప్రణాళికలు రూపొందిస్తారు. కనీసం ప్రతి ఆరు నెలలకు ఒకసారి వీటిని సమీక్షిస్తారు.

ఈ ప్రాంగణంలో ఆసుపత్రి, ఆలయం, ఆటస్థలాలు, తోటలు, వ్యవసాయ క్షేత్రాలు, వర్క్‌షాప్‌లు, కేఫ్‌లు కూడా ఏర్పాటు చేయనున్నారు.

ఈ ప్రాజెక్టులో భాగంగా ప్రత్యేక ఆసుపత్రిని నిర్మించనున్నారు. డెవలప్‌మెంటల్ మెడిసిన్, ఎపిలెప్సీ చికిత్స, ప్రత్యేక అవసరాలున్నవారికి డెంటల్ కేర్, పాలియేటివ్ కేర్ వంటి సేవలు అందుబాటులో ఉంటాయి.

పునరావాసంలో భాగంగా ఫిజియోథెరపీ, ఆక్యుపేషనల్ థెరపీ, స్పీచ్ థెరపీ, హైడ్రోథెరపీ సేవలు కల్పిస్తారు.

సంరక్షణతో పాటు ఉపాధి కూడా..

సంరక్షణ కల్పించడమొక్కటే కాదు.. అక్కడ ఉండే వారికి ఓ వ్యాపకంగా.. అలాగే వారికి ఓ ఉపాధి మార్గంగా కూడా కొన్ని కార్యక్రమాలు చేపడుతున్నారు వంటశాలలు, బేకరీ, కేఫ్‌లు, క్రాఫ్ట్ స్టూడియోల ద్వారా నివాసితులకు వృత్తి నైపుణ్యాలు నేర్పించి ఉపాధి అవకాశాలు కల్పించనున్నారు. కుటుంబ సభ్యులకు తాత్కాలిక విశ్రాంతి కల్పించే రెస్పైట్ హోమ్స్, మొబైల్ మెడికల్ క్లినిక్‌లు, హాస్పిస్ విభాగం, వైకల్యాల సంరక్షణ నిపుణుల కోసం జాతీయ శిక్షణ అకాడమీ కూడా ఈ ప్రాజెక్టులో భాగంగా ఉంటాయి.

చుట్టుపక్కల గ్రామాలకూ సేవలు

ఈ ప్రాజెక్టు కేవలం టౌన్‌షిప్‌లో నివసించే వారికే పరిమితం కాదు. చుట్టుపక్కల గ్రామాలు, జిల్లాలకు కూడా కొన్ని సేవలను విస్తరించనున్నారు. ఈ ప్రాంతానికి చెందిన సుమారు 1,000 మందికి థెరపీ, విద్య, ఉపాధి అవకాశాలు అందించాలని ప్రణాళిక రూపొందించారు. ఆటిజం, సెరిబ్రల్ పాల్సీ, ఎపిలెప్సీ, అభివృద్ధి సంబంధిత వైకల్యాలు, సంక్లిష్ట ఆరోగ్య సమస్యలతో బాధపడుతూ నిరంతర సంరక్షణ అవసరమైన వారికి ఈ ప్రాజెక్టు ద్వారా సహాయం అందించనున్నారు.

రిలయన్స్ ఇండస్ట్రీస్‌కు చెందిన సేవా విభాగమైన రిలయన్స్ ఫౌండేషన్ ఇప్పటికే ఆరోగ్యం, విద్య, గ్రామీణ అభివృద్ధి, క్రీడలు, మహిళా సాధికారత తదితర రంగాల్లో పనిచేస్తోంది. దేశవ్యాప్తంగా 98,000కు పైగా గ్రామాలు, పట్టణ ప్రాంతాల్లో 10 కోట్ల మందికి పైగా ప్రజలకు తమ కార్యక్రమాల ద్వారా సేవలు అందించినట్లు ఫౌండేషన్ వెల్లడించింది.

Alphabet Stock Crash: చరిత్రలోనే తొలిసారిగా అల్ఫాబెట్‌ షేర్లు భారీ పతనం.. ఒకే రోజులో ఆవిరైన రూ.47 లక్షల కోట్లు!

Satyaprasad Bandaru — Sat, 31 Oct 2026 14:36:18 +0530

Alphabet Stock Crash: టెక్ దిగ్గజం గూగుల్ మాతృసంస్థ ‘అల్ఫాబెట్’ (Alphabet) స్టాక్ మార్కెట్ చరిత్రలోనే అత్యంత దారుణమైన పతనాన్ని చూసింది. గురువారం ట్రేడింగ్‌లో కంపెనీ షేర్లు దాదాపు 13% మేర పతనమయ్యాయి. దీంతో ఒక్క రోజే కంపెనీ మార్కెట్ విలువలో ఏకంగా 475 బిలియన్ డాలర్లు (భారత కరెన్సీలో సుమారు రూ. 47 లక్షల కోట్లకు పైగా) ఆవిరైపోయాయి. 2004లో కంపెనీ పబ్లిక్ లిస్టింగ్ అయినప్పటి నుంచి ఒకే రోజులో ఇంతటి భారీ పతనం నమోదు కావడం ఇదే మొదటిసారి. అమెరికా స్టాక్ మార్కెట్ చరిత్రలోనే ఒక రోజులో సంభవించిన రెండో అతిపెద్ద నష్టంగా ఇది రికార్డులకెక్కింది.

మార్కెట్ పతనానికి కారణాలు

వాల్‌స్ట్రీట్ అంచనాలు అందకపోవడం- ఆల్ఫాబెట్ మూడో త్రైమాసికంలో 127.6 బిలియన్ల డాలర్ల మొత్తం ఆదాయాన్ని సాధించినప్పటికీ, ప్రధానమైన సెర్చ్ ఇంజిన్ ఆదాయం అంచనాలను అందుకోలేకపోయింది. సెర్చ్ ఆదాయం 63 బిలియన్ డాలర్లు చేరినా, వాల్‌స్ట్రీట్ ఆశించిన 65 బిలియన్ డాలర్ల కంటే తక్కువగా నమోదైంది.

ఏఐ రేసు, తగ్గుతున్న రెవెన్యూ- చాట్‌జీపీటీ, క్లాడ్ వంటి ఏఐ చాట్‌బాట్‌ల వాడకం పెరగడం, సెర్చ్‌లో ఏఐ సమ్మరీలు రావడం వల్ల ప్రకటనల ఆదాయంపై ప్రభావం పడుతోందనే ఆందోళనలు వ్యక్తమవుతున్నాయి. అదే సమయంలో ఏఐ చిప్స్, డేటా సెంటర్ల మౌలిక సదుపాయాల కోసం భారీగా ఖర్చు చేస్తుండటంతో కంపెనీ ఫ్రీ క్యాష్ ఫ్లో సుమారు 9 బిలియన్ డాలర్ల లోటులోకి జారింది.

భవిష్యత్ వ్యయాలపై సంకేతాలు- రాబోయే రోజుల్లో ఏఐ మౌలిక సదుపాయాల కోసం ఖర్చులు మరిన్ని పెరుగుతాయని, స్వల్పకాలంలో లాభాల రాబడి స్పష్టంగా లేకపోవడంతో ఇన్వెస్టర్లు షేర్లను విక్రయించడానికి మొగ్గు చూపారు.

Also Read: జియో జాక్‌పాట్..మార్కెట్‌లోకి వచ్చిన మొదటిరోజే దేశంలో రెండో అతిపెద్ద కంపెనీగా అవతరణ.. షేర్ ఎంత పెరిగిందంటే..

ఏఐ ఒత్తిడి

ఈ త్రైమాసికంలో గూగుల్ క్లౌడ్ ఆదాయం 31 బిలియన్ డాలర్లకు చేరడం, జెమిని యాప్ 1 బిలియన్ వినియోగదారులను దాటడం వంటి సానుకూల అంశాలు ఉన్నప్పటికీ, సెర్చ్ వ్యాపారంపై పడుతున్న దెబ్బ ఇన్వెస్టర్లను భయపెట్టింది. కేవలం అల్ఫాబెట్ మాత్రమే కాకుండా, మైక్రోసాఫ్ట్, అమెజాన్ వంటి ఇతర క్లౌడ్ దిగ్గజాలు కూడా ఏఐపై రికార్డు స్థాయిలో పెట్టుబడులు పెడుతుండటంతో ఉచిత నగదు ప్రవాహ లోటును ఎదుర్కొంటున్నాయి. మే నెలలో నమోదైన గరిష్ఠ స్థాయిల నుంచి ఇప్పటివరకు అల్ఫాబెట్ దాదాపు 1.4 ట్రిలియన్ డాలర్ల మార్కెట్ విలువను కోల్పోవడం గమనార్హం.

జియో జాక్‌పాట్..మార్కెట్‌లోకి వచ్చిన మొదటిరోజే దేశంలో రెండో అతిపెద్ద కంపెనీగా అవతరణ.. షేర్ ఎంత పెరిగిందంటే..

ARYA — Wed, 28 Oct 2026 21:13:02 +0530

Jio Share Price:
దేశీయ స్టాక్ మార్కెట్లో జియో ప్లాట్‌ఫామ్స్ (Jio Platforms) సంచలనం సృష్టించింది. రిలయన్స్ ఇండస్ట్రీస్‌కు చెందిన ఈ డిజిటల్ సేవల సంస్థ బుధవారం (అక్టోబర్ 28) స్టాక్ ఎక్స్ఛేంజీల్లో గ్రాండ్ ఎంట్రీ ఇచ్చిన తొలిరోజే దూకుడు చూపించింది. NSE, BSE రెండింట్లోనూ జియో షేర్‌లు భారీగా పెరగడంతో కంపెనీ మార్కెట్ కాపిటలైజేషన్ 13లక్షల కోట్లకు చేరింది. రత స్టాక్ మార్కెట్లో రిలయన్స్ ఇండస్ట్రీస్ తర్వాత రెండో అత్యంత విలువైన కంపెనీగా జియో నిలిచింది.

జియో షేరు తొలి రోజు ట్రెండ్ ఎలా ఉంది? Jio Market Listing

జియో ప్లాట్‌ఫామ్స్ ఐపీఓలో ఒక్కో షేరు ధరను రూ.1,119గా నిర్ణయించారు. అయితే, స్టాక్ మార్కెట్లో లిస్టింగ్ అయినప్పుడు బీఎస్ఈ (BSE), ఎన్ఎస్ఈ (NSE) రెండింటిలోనూ రూ.1,358 వద్ద ట్రేడింగ్ ప్రారంభమైంది. ఇది ఐపీఓ ధర కంటే 21.36 శాతం ఎక్కువ.ట్రేడింగ్ ప్రారంభమైన తర్వాత షేరు మరింత పెరిగింది. బీఎస్ఈలో రూ.1,375 స్థాయిని తాకింది. రోజంతా కొనుగోళ్ల మద్దతుతో లాభాల్లో కొనసాగిన షేరు చివరకు రూ.1,419 వద్ద ముగిసింది.

ఐపీఓ ధర రూ.1,119తో పోలిస్తే ముగింపు ధర రూ.300 ఎక్కువ. అంటే తొలి రోజే 26.81 శాతం లాభం నమోదైంది.

రూ.13.05 లక్షల కోట్లకు చేరిన మార్కెట్ క్యాపిటలైజేషన్

జియో షేర్ల భారీ పెరుగుదలతో కంపెనీ మార్కెట్ విలువ కూడా బాగా పెరిగింది. ఐపీఓ ధర వద్ద సుమారు రూ.10.30 లక్షల కోట్లుగా ఉన్న మార్కెట్ క్యాపిటలైజేషన్, తొలి రోజు పెరిగిన 27శాతంతో ఏకంగా 13.05 లక్షల కోట్లకు చేరింది. అంటే ఒక్క రోజులోనే కంపెనీ మార్కెట్ విలువ సుమారు రూ.2.75 లక్షల కోట్లు పెరిగింది.ఈ భారీ పెరుగుదలతో జియో ప్లాట్‌ఫామ్స్ భారత స్టాక్ మార్కెట్లో అత్యంత విలువైన కంపెనీల జాబితాలో రెండో స్థానాన్ని దక్కించుకుంది. మొదటి స్థానం జియో పేరెంట్ కంపెనీ రిలయన్స్ ఇండస్ట్రీస్‌దే. ఇప్పుడు 13లక్షల కోట్ల మార్కెట్ వాల్యూతో JIO... భారతీ ఎయిర్‌టెల్‌ను అధిగమించింది.

లిస్టింగ్‌కు వచ్చిన అంబానీ ఫ్యామిలీ

జియో ఇవాళ మార్కెట్‌లో లిస్టింగ్‌కు రావడంతో ఈ కంపెనీ ప్రమోటర్లు, దేశంలోనే అతిపెద్ద బిజినెస్‌ ఫ్యామిలీల్లో ఒకటైన అంబానీ పరివారం.. మొత్తం తరలివచ్చింది. కుటుంబ సభ్యులంతా NSEకి వచ్చారు. RIL ఛైర్మన్ ముఖేష్, నీతా అంబానీ, JIO ఎండీ ఆకాష్ అంబానీ.. డైరక్టర్లు ఈషా అంబానీ.. అనంత్‌అంబానీ.. ఇతర కుటుంబసభ్యులు హాజరయ్యారు. ఈ సమావేశంలో అనంత్‌ అంబానీ భావోద్వేగంగా మాట్లాడటంతో ముఖేష్ కంటతడి కూడా పెట్టుకున్నారు.

IPO ఇన్వెస్టర్లకు ఎంత లాభం?

జియో ఐపీఓలో షేర్లు పొందిన ఇన్వెస్టర్లకు తొలి రోజే మంచి లాభం లభించింది. ఒక్కో షేరును రూ.1,119కు కొనుగోలు చేసిన వారికి, రూ.1,419 ముగింపు ధర ప్రకారం ఒక్కో షేరుపై రూ.300 లాభం వచ్చింది. ఐపీఓలో ఒక లాట్‌లో 12 షేర్లు ఉన్నందున, ఒక లాట్ పొందిన ఇన్వెస్టర్‌కు ముగింపు ధర ఆధారంగా సుమారు రూ.3,600 లాభం వచ్చినట్లు లెక్క. జియో ప్లాట్‌ఫామ్స్ పబ్లిక్ ఇష్యూ ద్వారా సుమారు రూ.30,213 కోట్లు సమీకరించింది. మొత్తం 27 కోట్ల కొత్త షేర్లను ఈ ఐపీఓలో జారీ చేశారు. అక్టోబర్ 21 నుంచి 23 వరకు జరిగిన ఈ ఐపీఓకు ఇన్వెస్టర్ల నుంచి భారీ స్పందన లభించింది. మొత్తం 22.19 రెట్లు సబ్‌స్క్రిప్షన్ నమోదైంది. సంస్థాగత పెట్టుబడిదారుల నుంచి ముఖ్యంగా బలమైన డిమాండ్ కనిపించింది. ఐపీఓ ప్రారంభమైన 100 నిమిషాల్లోనే పూర్తిగా సబ్‌స్క్రైబ్ కావడం కూడా ఈ ఇష్యూ ప్రత్యేకతగా నిలిచింది.

మార్కెట్‌ డల్‌గా ఉన్నా జియో ఏమాత్రం తగ్గలేదు. బుధవారం సెన్సెక్స్ 353 పాయింట్లు తగ్గగా, నిఫ్టీ 50 కూడా నష్టాల్లో ముగిసింది. అయినప్పటికీ జియో షేరు మాత్రం 27శాతం పైకి ఎగిసింది.

DA Hike For Govt Employees: దీపావళికి ముందు ప్రభుత్వ ఉద్యోగులకు 3 శాతం DA పెంపును ప్రకటించిన కేంద్రం

Shankar Dukanam — Wed, 28 Oct 2026 18:41:46 +0530

న్యూఢిల్లీ: ప్రధాని నరేంద్ర మోదీ అధ్యక్షతన జరిగిన కేంద్ర కేబినెట్ సమావేశంలో దీపావళి ముందు కేంద్ర ప్రభుత్వ ఉద్యోగులకు Dearness Allowance 3 శాతం పెంపునకు నిర్ణయం తీసుకున్నారు. ఈ పెంపు కోసం కేంద్రం రూ.10,016 కోట్లు ఆమోదించింది. అక్టోబర్ 28న జరిగిన కేబినెట్ భేటీలో తీసుకున్న నిర్ణయం ప్రకారం, DA రేటు ప్రాథమిక వేతనంలో 60 శాతం నుంచి 63 శాతానికి పెరుగుతుంది. చాలా రోజులుగా ఎదురుచూస్తున్న ఈ ప్రకటనపై అంచనాల తర్వాత, మోదీ కేబినెట్ తీసుకున్న నిర్ణయం ఉద్యోగులకు ఆర్థిక ఉపశమనం కలిగించనుంది.

ఇంతకీ DA అంటే ఏమిటి?

Dearness Allowance (DA) అనేది ధరల పెరుగుదలను ఎదుర్కొనేందుకు ప్రభుత్వ ఉద్యోగులకు ప్రభుత్వం ఇచ్చే అదనపు చెల్లింపుగా చెప్పవచ్చు. ఇది బేసిక్ శాలరీలో శాతంగా లెక్కించనున్నారు. ఆ సమయంలో ద్రవ్యోల్బణాన్ని పరిగణనలోకి తీసుకుని డీఏ నిర్ణయిస్తారు. ఈ భత్యం ఉద్యోగి ప్రాథమిక వేతనానికి అదనంగా చెల్లిస్తారు. రోజురోజుకూ ఖర్చులు పెరుగుతున్న వేళ వారి కొనుగోలు శక్తిని నిలకడగం ఉంచడంలో భాగంగా ప్రభుత్వాలు డీఏ ప్రకటిస్తుంటాయి.

ఉద్యోగుల జీతాలు ఎంత పెరుగుతాయి?

ఈ 3 శాతం డీఏ పెంపుతో ఉద్యోగులకు ప్రతి నెలా వారి ప్రాథమిక జీతాన్ని బట్టి అదనపు మొత్తం లభిస్తుంది. ఒకవేళ ఓ ఉద్యోగికి రూ.25,000 ప్రాథమిక జీతం ఉంటే.. సవరించిన 63 శాతం డీఏ ప్రకారం రూ.15,750 లభిస్తుంది. దీంతో ఇతర భత్యాలు, డిడక్షన్స్ మినహాయించి, వారి బేసిక్ శాలరీ, DA కలిపి రూ.40,750 అవుతుంది.

ప్రస్తుతం ఉన్న 60 శాతం డీఏ ప్రకారం, ఆ ఉద్యోగికి DAగా రూ.15,000 వచ్చేది. తాజాగా మూడు శాతం DA పెంపుతో నెలవారీ ఆదాయంలో రూ.750 అదనంగా జమ అవుతుంది.

సంవత్సరానికి రెండుసార్లు DA

కేంద్రం సాధారణంగా DAను ఏడాదికి 2 సార్లు సవరిస్తుంది. ఈ మార్పులు ఒక డీఏ జనవరి నుంచి, రెండో డీఏ జూలై నుంచి అమల్లోకి వస్తాయి. జనవరి సవరణపై నిర్ణయాలు సాధారణంగా మార్చి లేదా ఏప్రిల్‌లో తీసుకుంటారు. జూలై సవరణను సాధారణంగా సెప్టెంబర్ నెలలో లేదా అక్టోబర్‌లో ప్రకటిస్తుంటారు. ఈ డీఏ పెంపు ద్రవ్యోల్బణంతో అనుసంధానమైన స్థిరమైన సూత్రం ఆధారంగా నిర్ణయిస్తారు. అందువల్ల ప్రతి సవరణలో డీఏ పెంపు శాతంలో స్వల్ప వ్యత్యాసం ఉండటాన్ని గమనించవచ్చు.

గతంలో డీఏ నిర్ణయాలు

2014లో అధికారంలోకి వచ్చినప్పటి నుంచి ప్రధాని నరేంద్ర మోదీ నేతృత్వంలోని కేంద్ర ప్రభుత్వం అనేక DA పెంపులను ప్రకటించింది. ప్రస్తుతానికి అందుబాటులో ఉన్న లెక్కల ప్రకారం చూస్తే, 2014లో ఈ కరువుభత్యం 7 శాతం పెరిగింది. ఆ తర్వాతి 3 సంవత్సరాల్లో డీఏ ప్రతి ఏడాదీ 6 శాతం చొప్పున పెంచుతూ నిర్ణయాలు తీసుకున్నారు.

కాగా, COVID-19 వైరస్ వ్యాప్తి ఆందోళన కలిగించిన సమయంలో మాత్రం కేంద్ర ప్రభుత్వం కొంతకాలం ఉద్యోగులకు DA పెంపులను తాత్కాలికంగా నిలిపివేసింది. నిలిపివేసిన ఆ డీఏ విడతలను తరువాత పలు దఫాలుగా విడుదల చేశారు.

తాజా ప్రకటన దీపావళి పండుగకు ముందు రావడంతో, పండుగ సీజన్‌కు సిద్ధమవుతున్న కేంద్ర ప్రభుత్వ ఉద్యోగులకు కేంద్ర ప్రభుత్వం శుభవార్త అందించినట్లు అయింది. దాదాపుగా ప్రతి ఏడాది ఇదే సమయంలో కేబినెట్ సమావేశమై డీఏపై నిర్ణయాలు తీసుకుంటూ వస్తోంది.

Jio ఈ దేశం గుండెచప్పుడు.. చిన్న అంబానీ Heart Touching స్పీచ్కు ఏడ్చేసిన పెద్ద అంబానీ

ABP Desam — Wed, 28 Oct 2026 16:14:20 +0530

రిలయన్స్ జియో స్టాక్ మార్కెట్ లిస్టింగ్ వేదికగా అనంత్ అంబానీ భావోద్వేగపూరితంగా ప్రసంగించారు. 'జియో ఈ దేశం గుండెచప్పుడు' అంటూ ఆయన చేసిన హార్ట్ టచింగ్ స్పీచ్‌ను వింటూ వేదికపైనే ముఖేష్ అంబానీ కన్నీరు పెట్టుకున్నారు. ఈ భావోద్వేగ సన్నివేశం అందరినీ ఆకట్టుకుంది.

Jio Maraket Listing: జియో జంబో లిస్టింగ్ రేపే.. రూ.10.3 లక్షల కోట్ల విలువతో స్టాక్ మార్కెట్‌లోకి ఎంట్రీ.. మార్కెట్ లో హుషారు

ARYA — Tue, 27 Oct 2026 20:54:33 +0530

Jio Listing: దేశీయ మొబైల్ దిగ్గజం జియో రేపు మార్కెట్‌లో అడుగుపెడుతోంది. జియో మార్కెట్ లిస్టింగ్‌పై భారీ అంచనాలున్నాయి. రిలయన్స్ ఇండస్ట్రీస్‌కు చెందిన టెలికాం, డిజిటల్ సేవల సంస్థ జియో ప్లాట్‌ఫామ్స్ (Jio Platforms) అక్టోబర్ 28, బుధవారం స్టాక్ ఎక్స్ఛేంజీల్లో లిస్ట్ కానుంది. ఈ ఐపీఓ ద్వారా కంపెనీ విలువ సుమారు రూ.10.3 లక్షల కోట్లకు చేరింది. దీంతో భారత కార్పొరేట్ రంగంలో అత్యంత విలువైన కంపెనీల జాబితాలో జియో కీలక స్థానాన్ని దక్కించుకోనుంది.

ఈ ఐపీఓలో భాగంగా కంపెనీ ఒక్కో షేరును రూ.1,119 ధరకు కేటాయించింది. మొత్తం 27 కోట్ల కొత్త షేర్లను జారీ చేసింది. ఈ ధర ప్రకారం మార్కెట్ క్యాపిటలైజేషన్ పరంగా జియో ప్లాట్‌ఫామ్స్ ప్రస్తుతం దేశంలో నాలుగో అతిపెద్ద కంపెనీగా నిలుస్తోంది. రిలయన్స్ ఇండస్ట్రీస్, భారతీ ఎయిర్‌టెల్, హెచ్‌డీఎఫ్‌సీ బ్యాంక్ తర్వాతి స్థానంలో ఉంది.

మార్కెట్‌లోకి భారీ ఎంట్రీ

ప్రపంచంలోనే అతిపెద్ద కంపెనీల్లో ఒకటైన రిలయెన్స్ గ్రూపు నుంచి విడిగా లిస్టింగ్ అవుతున్న JIO... మార్కెట్‌లోకి అతి భారీ ఎంట్రీ అనుకోవచ్చు. రూ.10 లక్షల కోట్లకు పైగా విలువతో ఐపీఓకు వచ్చిన తొలి భారతీయ కంపెనీగా జియో ప్లాట్‌ఫామ్స్ నిలిచినట్లు ప్రీ-లిస్టింగ్ వివరాలు సూచిస్తున్నాయి. ఐపీఓ ధర ఆధారంగా జియో ప్లాట్‌ఫామ్స్ విలువ రూ.10.3 లక్షల కోట్లుగా ఉంది. ప్రస్తుతం రిలయన్స్ ఇండస్ట్రీస్ మార్కెట్ విలువ రూ.16.2 లక్షల కోట్లు కాగా, భారతీ ఎయిర్‌టెల్ విలువ రూ.12.2 లక్షల కోట్లు. హెచ్‌డీఎఫ్‌సీ బ్యాంక్ మార్కెట్ క్యాపిటలైజేషన్ రూ.10.6 లక్షల కోట్లుగా ఉంది.

జియో షేర్లు అక్టోబర్ 28న నేషనల్ స్టాక్ ఎక్స్ఛేంజ్ (NSE), బాంబే స్టాక్ ఎక్స్ఛేంజ్ (BSE)ల్లో లిస్ట్ కానున్నాయి. లిస్టింగ్ తర్వాత మార్కెట్లో షేర్లకు లభించే ధర ఆధారంగా కంపెనీ అసలు మార్కెట్ విలువ నిర్ణయమవుతుంది.

20 శాతం ప్రీమియంతో లిస్ట్ అయితే ఏమవుతుంది?

జియో ఐపీఓకు వచ్చిన స్పందన.. సబ్‌స్క్రిప్షన్‌ జరిగిన తీరు.. గ్రే మార్కెట్ ప్రీమియం అంచనాలు లిస్టింగ్‌పై ఆసక్తిని పెంచుతున్నాయి. షేర్లు ఐపీఓ ధర కంటే ఎక్కువ ధరకు ప్రారంభమయ్యే అవకాశాలపై మార్కెట్ వర్గాలు దృష్టి సారించాయి. ఒక్కో షేరు రూ.1,119 ధరపై 20 శాతం ప్రీమియంతో లిస్ట్ అయితే, దాని ధర సుమారు రూ.1,340కు చేరుతుంది. ఈ ధర వద్ద కంపెనీ మార్కెట్ విలువ రూ.12.3 లక్షల కోట్లను దాటే అవకాశం ఉంది.అదే జరిగితే, రిలయన్స్ ఇండస్ట్రీస్ తర్వాత దేశంలో రెండో అత్యంత విలువైన లిస్టెడ్ కంపెనీగా జియో ప్లాట్‌ఫామ్స్ అవతరించవచ్చు. అయితే, ఇది ఒక అంచనా మాత్రమే. వాస్తవ లిస్టింగ్ ధర మార్కెట్ పరిస్థితులు, పెట్టుబడిదారుల డిమాండ్‌పై ఆధారపడి ఉంటుంది.

టాటా, అదానీ గ్రూపులకు రిలయన్స్ నుంచి గట్టి పోటీ?

జియో ప్లాట్‌ఫామ్స్ లిస్టింగ్‌తో రిలయన్స్ గ్రూప్ మొత్తం మార్కెట్ విలువ మరింత పెరిగే అవకాశం ఉంది. రిలయన్స్ ఇండస్ట్రీస్, జియో ప్లాట్‌ఫామ్స్ కలిపి చూస్తే వాటి మార్కెట్ క్యాపిటలైజేషన్ రూ.27 లక్షల కోట్లను మించనుంది.

2026 అక్టోబర్ 27 నాటికి టాటా గ్రూప్‌కు చెందిన స్టాక్ మార్కెట్లలో లిస్టయిన 32 కంపెనీల మొత్తం మార్కెట్ విలువ సుమారు రూ.25.7 లక్షల కోట్లుగా ఉంది. అదానీ గ్రూప్‌కు చెందిన 11 లిస్టెడ్ కంపెనీల మార్కెట్ విలువ దాదాపు రూ.16.6 లక్షల కోట్లుగా నమోదైంది.

జియో షేరు రూ.1,340 వద్ద లిస్ట్ అయితే, రిలయన్స్ గ్రూప్ మొత్తం మార్కెట్ విలువ రూ.30 లక్షల కోట్లకు చేరువయ్యే అవకాశం ఉంది. అయితే, లిస్టింగ్ తర్వాత జియో షేరు ధర ఎలా కదులుతుందనే దానిపైనే తుది విలువ ఆధారపడి ఉంటుంది.

అక్టోబర్ 28న జరగనున్న లిస్టింగ్‌పై ఇప్పుడు ఇన్వెస్టర్లు, మార్కెట్ విశ్లేషకులు ఆసక్తిగా ఎదురుచూస్తున్నారు. జియోకు మార్కెట్ ఎంత విలువ కట్టనుంది? ఐపీఓ ధరతో పోలిస్తే షేరు ఎంత ప్రీమియంతో ప్రారంభమవుతుంది? అనేది రేపు తేలనుంది.