Low Maintenance Cars India: ప్రస్తుతం వేగంగా పరుగెడుతున్న ప్రపంచంలో కారు లగ్జరీగా చూసే రోజు ఎప్పుడో పోయింది. ఇప్పుడు ఆ పరిస్థితి పూర్తిగా మారిపోయింది. కారు అనేది అవసరంగా మారిపోయింది. బ్యాంకులు సులభంగా రుణాలు ఇస్తున్నాయి. అందుకే కారు ఇంటికి తెచ్చుకోవడం చాలా ఈజీ అయిపోయింది. కానీ తర్వాత మెయింటెనెన్స్ విషయంలో మాత్రం భారం తప్పదు. సర్వీసింగ్ ఖర్చులు, విడిభాగాల ధరలు, వార్షిక నిర్వహణ భారంతో చాలా మంది వాహనదారులు ఇబ్బంది పడుతుంటారు.
కారు కొనే సమయంలో మైలేజీకి ఎంత ప్రాధాన్యత ఇస్తామో, దాని మెయింటెనెన్స్ గురించి కూడా అంతే శ్రద్ధతో తెలుసుకోవాలి. ఒక వేళ మీరు తక్కువ ఖర్చుతో కూడిన నిర్వహణ కలిగిన కారు కోసం చూస్తున్నట్టైతే భారతీయ మార్కెట్లో కొన్ని హ్యాచ్బ్యాక్ కార్లు మీకు అద్భుతమైన ఎంపికలుగా నిలుస్తాయి. ముఖ్యంగా మారుతీ సుజుకి, టాటా మోటార్స్,హ్యూందాయ్ వంటి కంపెనీలు ఈ విభాగంలో ముందు వరుసలో ఉన్నాయి.
చాలా మంది కారు కొనే సమయంలో కేవలం ధరను మాత్రమే పరిగణలోకి తీసుకుంటారు. కానీ ప్రతి ఏటా చేయించాల్సిన సర్వీసింగ్, ఆయిల్ మార్పులు, ఇతర చిన్న చిన్న రిపేర్లు మీ నెలసరి ఖర్చులను పెంచేస్తాయి. వార్షిక మెయింటెనెన్స్ ఖర్చు ఐదువేల రూపాయల లోపు ఉంటే అది సామాన్య మధ్యతరగతి కుటుంబానికి పెద్ద భారం అనిపించదు. అందుకే సరసమైన ధరతోపాటు తక్కువ నిర్వహణ ఖర్చు ఉండే కార్లకు డిమాండ్ పెరుగుతోంది.
రెనాల్ట్ క్విడ్
తక్కువ నిర్వహణ ఖర్చు జాబితాలో అన్నింటికంటే రెనాల్ట్ క్విడ్ ముందంజలో ఉంది. ఇది చూడటానికి ఒక చిన్న ఎస్యూవీ తరహాలో స్టైలిష్గా ఉంటుంది. తక్కువ ధరలో మంచి లుక్ కోరుకునే వారికి ఇది సరైన ఎంపిక. సుమారు 2500 నుంచి3000 వరకు నిర్వహణ ఖర్చు ఉంటుంది.
మారుతీ సుజుకి ఆల్టో కే 10
మధ్యతరగతి భారతీయుల మొదటి ప్రాధాన్యత ఎప్పుడూ మారుతీ సుజుకీ ఆల్టో వైపే ఉంటుంది. ఆల్టో కే 10 ప్రత్యేకంగా మధ్య తరగతి కుటుంబాల అవసరాలకు అనుగుణంగా రూపొందించారు. దీని వార్షిక మెయింటెనెన్స్ ఖర్చు 3500 నుంచి 4500 వరకు ఉంటుంది.
మారుతీ సుజుకి వ్యాగన్ ఆర్
విశాలమైన స్పేస్, సౌకర్యం కోరుకునే కుటుంబాలకు వ్యాగన్ ఆర్ నమ్మకమైనదిగా ఉంటోంది.దీని నిర్వహణ ఖర్చు 3500 నుంచి 5000 వరకు ఉంటుంది.
టాటా టియాగో, టాటా పంచ్
టాటా మోటార్స్ ఇటీవల కాలంలో తన కార్ల నాణ్యత, భద్రతో వినియోగదారుల మనసు గెలుచుకుంది. టియాగో, పంచ్్ మోడళ్లకు మార్కెట్లో భారీ డిమాండ్ ఉంది. ఈ చిన్న కార్ల సర్వీసింగ్ ఖర్చు ఏడాదికి మూడు వేల నుంచి ఐదు వేల వరకు ఉంటుంది.
హ్యూందాయ్ గ్రాండ్ ఐ10
కొంచెం ప్రీమియం ఫీచర్లు, మెరుగైన బిల్ట్ క్వాలిటీ కోరుకునే వారికి ఈ కారు ఉత్తమ ఎంపిక. ఇతర హ్యాచ్ బ్యాక్లతో పోలిస్తే ఇది కొంచెం ఖరీదైనదిగా అనిపించవచ్చు. దీని ఫీచర్లు దృష్ట్యా నిర్వహణ ఖర్చు సమంజసంగానే ఉంటుంది. దీనికి ఏడాదికి అయ్యే నిర్వహణ ఖర్చు నాలుగువేల ఐదు వందల నుంచి ఆరు వేల వరకు ఉంటుంది.
మెయింటెనెన్స్ ఖర్చు తగ్గించుకోవాలంటే ఏం చేయాలి?
మెయింటెనెన్స్ ఖర్చులను అదుపులో ఉంచుకోవడానికి క్రమం తప్పకుండా సర్వీసింగ్ చేయించడం చాలా అవసరం. సాదరంగా ప్రతి పదివేల కిలోమీటర్లకు లేదా ఏడాదికి ఒకసారి సర్వీసింగ్ చేయించడం వల్ల కారు ఇంజిన్ లైఫ్ బాగుంటుంది. కంపెనీ సూచించిన అధికారిక సర్వీస్ సెంటర్లోనే సర్వీసింగ్ చేయించాలి. దీని వల్ల పెద్ద పెద్ద మరమ్మతులు రాకుండా చూసుకోవచ్చు.