80-20 rule for electric vehicles: ఎలక్ట్రిక్ వాహనాల (EV) విషయంలో 80-20 రూల్ అనేది బ్యాటరీ జీవితకాలాన్ని పెంచడానికి, ఛార్జింగ్ సమయాన్ని ఆదా చేయడానికి వాహన తయారీదారులు, నిపుణులు సూచించే ఒక అత్యుత్తమ పద్ధతి. సింపుల్గా చెప్పాలంటే, మీ వాహనం బ్యాటరీని ఎప్పుడూ 20 శాతం కంటే తగ్గకుండా, 80 శాతం కంటే పెరగకుండా ఛార్జ్ చేయడమే.
80-20 రూల్ అంటే ఏమిటి?
సాధారణంగా మనం మొబైల్ ఫోన్లను 100% వరకు ఛార్జ్ చేస్తాం. కానీ ఎలక్ట్రిక్ వాహనాల్లో వాడే లిథియం-అయాన్ బ్యాటరీల స్వభావం వేరుగా ఉంటుంది. బ్యాటరీ స్థాయి 20 శాతం కంటే తక్కువకు పడిపోయినా లేదా 100 శాతం వరకు పూర్తిగా నిండినా, బ్యాటరీ సెల్స్పై విపరీతమైన ఒత్తిడి పెరుగుతుంది. అందుకే బ్యాటరీని 20% నుంచి 80% మధ్య ఉంచడం వల్ల అది కంఫర్ట్ జోన్ లో ఉంటుంది. దీనివల్ల బ్యాటరీ సామర్థ్యం త్వరగా తగ్గకుండా ఉంటుంది.
80% తర్వాత ఛార్జింగ్ ఎందుకు నెమ్మదిస్తుంది?
EV బ్యాటరీ 20% నుండి 80% వరకు చాలా వేగంగా ఛార్జ్ అవుతుంది. కానీ 80% దాటిన తర్వాత 100% అవ్వడానికి చాలా ఎక్కువ సమయం తీసుకుంటుంది. దీనిని ఒక ఉదాహరణతో చెప్పవచ్చు. ఒక ఖాళీ థియేటర్లోకి జనం వేగంగా వెళ్లగలరు. కానీ థియేటర్ దాదాపు నిండిన తర్వాత మిగిలిన వారు తమ సీట్లను వెతుక్కుని కూర్చోవడానికి సమయం పడుతుంది . బ్యాటరీలో అయాన్లు నిండే కొద్దీ వేడి పెరుగుతుంది, కాబట్టి భద్రత దృష్ట్యా సాఫ్ట్వేర్ ఛార్జింగ్ వేగాన్ని తగ్గిస్తుంది.
బ్యాటరీ జీవితకాలం
ప్రతి బ్యాటరీకి నిర్ణీత సంఖ్యలో ఛార్జింగ్ సైకిల్స్ ఉంటాయి. బ్యాటరీని ప్రతిరోజూ 100% ఛార్జ్ చేయడం వల్ల లోపల రసాయన చర్యలు వేగంగా జరిగి, కాలక్రమేణా బ్యాటరీ పవర్ స్టోరేజ్ సామర్థ్యం తగ్గిపోతుంది. అదే 80-20 రూల్ పాటిస్తే, బ్యాటరీ వేడెక్కడం తగ్గుతుంది. దాని జీవితకాలం సాధారణం కంటే మరికొన్ని ఏళ్లు ఎక్కువగా వస్తుంది.
సమయం , ఖర్చు ఆదా
పబ్లిక్ ఛార్జింగ్ స్టేషన్ల వద్ద 80% నుండి 100% వరకు ఛార్జ్ చేయడానికి పట్టే సమయంలో, మీరు మరో 100 కిలోమీటర్ల దూరం ప్రయాణించవచ్చు. వేగంగా ఛార్జింగ్ ముగించుకోవడం వల్ల మీ సమయం ఆదా అవ్వడమే కాకుండా, మిగతా వాహనదారులకు కూడా స్టేషన్ అందుబాటులోకి వస్తుంది. అలాగే వాహనం వెళ్తున్నప్పుడు ఆటోమేటిక్గా బ్యాటరీ ఛార్జ్ అవ్వడం సరిగ్గా పనిచేయాలంటే బ్యాటరీలో కొంత ఖాళీ అంటే 80% వద్ద ఉండటం ఉండటం అవసరం.
సుదూర ప్రయాణాలు వెళ్లేటప్పుడు మాత్రం 100% ఛార్జ్ చేసుకోవడంలో తప్పులేదు. కానీ రోజువారీ అవసరాలకు 80-20 రూల్ పాటించడం వల్ల మీ ఎలక్ట్రిక్ వాహనం బ్యాటరీ ఆరోగ్యంగా ఉంటుంది . రీప్లేస్మెంట్ ఖర్చులు తప్పుతాయి.