Second Hand Cars 2026: భారతదేశంలో సెకండ్హ్యాండ్/యూజ్డ్ కార్ల మార్కెట్ వేగంగా విస్తరిస్తున్న నేపథ్యంలో, ఏ కారుకు ఎక్కువ రీసేల్ విలువ ఉంటుందనే విషయం కొనుగోలుదారులకు కీలకంగా మారింది. ఈ నేపథ్యంలో, ఇటీవల Spinny (సెకండ్హ్యాండ్ కార్లు అమ్మే కంపెనీ) సహకారంతో నిర్వహించిన యూజ్డ్ కార్ స్టడీ 2026 (Used Car Study 2026) లో ఆసక్తికరమైన విషయాలు తెలిశాయి. మిడ్సైజ్ సెడాన్ విభాగంలో హ్యుందాయ్ వెర్నా (Hyundai Verna) అత్యుత్తమ రీసేల్ వాల్యూని నిలబెట్టుకోగా, హోండా సిటీ (Honda City) అత్యధిక డిప్రెషియేషన్ను నమోదు చేసింది.
Spinny అందించిన వాస్తవ లావాదేవీల ఆధారంగా ఈ అధ్యయనం నిర్వహించారు. 2025 జనవరి 1 నుంచి ఆగస్టు 31 వరకు దేశవ్యాప్తంగా విక్రయించిన సెకండ్హ్యాండ్ కార్ల డేటాను విశ్లేషించి ఈ నివేదికను రూపొందించారు. ఇందులో. దేశంలోని ప్రధాన నగరాలు - ఢిల్లీ-NCR, బెంగళూరు, హైదరాబాద్, పుణె, చెన్నై, ముంబై, లక్నో, అహ్మదాబాద్ & కోల్కతా నగరాల్లో జరిగిన విక్రయాల వివరాలను పరిగణనలోకి తీసుకున్నారు.
ఈ అధ్యయనం ప్రకారం, మిడ్సైజ్ సెడాన్ విభాగంలో Hyundai Verna Petrol Manual అత్యంత స్థిరమైన రీసేల్ విలువను నమోదు చేసింది. ఆకర్షణీయమైన డిజైన్, ఆధునిక ఫీచర్లు, మెరుగైన డ్రైవింగ్ అనుభవం & తక్కువ నిర్వహణ ఖర్చులు Vernaకు యూజ్డ్ కార్ల మార్కెట్లో మంచి డిమాండ్ తీసుకొచ్చినట్లు నివేదిక పేర్కొంది. ఐదేళ్ల తర్వాత కూడా ఈ కారు తన విలువను ఇతర మోడళ్లతో పోలిస్తే మెరుగ్గా నిలబెట్టుకుంది.
ఇది కూడా చదవండి: EV మార్కెట్లో ఆధిపత్యం ఎవరిది? టెస్లాదా లేక BYDదా? ఈ లెక్కలు మిమ్మల్ని షాకిస్తాయి!
మరోవైపు Honda City Petrol Manual ఈ విభాగంలో అత్యధిక డిప్రెషియేషన్ను నమోదు చేసింది. ప్రస్తుతం ఐదేళ్ల పాత Honda City కార్లు వాటి ప్రారంభ ఆన్రోడ్ ధరలో దాదాపు సగం విలువకే విక్రయమవుతున్నాయని అధ్యయనం వెల్లడించింది. అంటే ఇతర పోటీ మోడళ్లతో పోలిస్తే Honda City విలువ వేగంగా తగ్గినట్లు స్పష్టమవుతోంది.
యూరోపియన్ బ్రాండ్లలో Volkswagen Virtus & Skoda Slavia మధ్య కూడా పోలిక నిర్వహించారు. ఈ రెండు కార్లు ఒకే ప్లాట్ఫామ్పై రూపొందించినప్పటికీ, Volkswagen Virtus రీసేల్ విలువను కొద్దిగా మెరుగ్గా నిలబెట్టుకున్నట్లు అధ్యయనం తెలిపింది. దీంతో యూజ్డ్ కార్ల కొనుగోలుదారులు Virtusకు అధిక ప్రాధాన్యం ఇస్తున్నట్లు తెలుస్తోంది.
ఇప్పటికే ఉత్పత్తి నిలిపేసిన Maruti Ciaz కూడా ఆసక్తికర ఫలితాన్ని నమోదు చేసింది. ముఖ్యంగా ఒక సంవత్సరం & మూడు సంవత్సరాల వయస్సున్న Ciaz కార్లు అదే వయస్సు గల ఇతర మిడ్సైజ్ సెడాన్లతో పోలిస్తే మెరుగైన రీసేల్ వాల్యూ ఇచ్చినట్లు నివేదిక వెల్లడించింది. మార్కెట్లో ఈ మోడల్కు ఇప్పటికీ కొంత స్థిరమైన డిమాండ్ కొనసాగుతున్నట్లు ఇది సూచిస్తోంది.
ధరల పరంగా చూస్తే, Spinny ద్వారా విక్రయించిన ఐదేళ్ల పాత మిడ్సైజ్ సెడాన్ల సగటు విక్రయ ధర రూ.9.38 లక్షలుగా నమోదైంది. మూడు సంవత్సరాల పాత కార్ల సగటు ధర రూ.11.25 లక్షలు కాగా, ఒక సంవత్సరం పాత కార్ల సగటు ధర రూ.12.95 లక్షలుగా ఉంది.
ఇది కూడా చదవండి: టాటా సియెర్రా EV వేరియంట్లలో పవర్ట్రెయిన్ ఆప్షన్లు ఇవే.. మీ అవసరానికి సరిపడే కాంబినేషన్ ఏది?
డిప్రెషియేషన్ పరంగా ఐదేళ్ల పాత మిడ్సైజ్ సెడాన్ల సగటు విలువ 43 శాతం తగ్గింది. మూడు సంవత్సరాల కార్లలో ఈ తగ్గుదల 34.8 శాతం కాగా, ఒక సంవత్సరం పాత కార్లలో 24.8 శాతంగా నమోదైంది. వాహనం వయస్సు పెరిగే కొద్దీ రీసేల్ వాల్యూ తగ్గుతున్నప్పటికీ... బ్రాండ్ ఇమేజ్, డిమాండ్, విశ్వసనీయత & నిర్వహణ ఖర్చులు కూడా ఇక్కడ కీలక పాత్ర పోషిస్తున్నాయని అధ్యయనం స్పష్టం చేసింది.
ఈ అధ్యయనంలో, వాహనం తయారైన ఏడాది ఆన్రోడ్ ధరను ఆధారంగా తీసుకుని, 2025లో అదే కారు రీసేల్ ధరతో పోల్చి డిప్రెషియేషన్ను లెక్కించారు. ఒకే ఇంధన రకంలో ఉన్న వేర్వేరు వేరియంట్ల ధరలను సగటుగా పరిగణించారు. నిలిపివేసిన పవర్ట్రెయిన్లు, రూ.30 లక్షలకు పైబడిన ప్రీమియం కార్లు, EVలు & తక్కువ సంఖ్యలో విక్రయమైన మోడళ్లను ఈ అధ్యయనంలో చేర్చలేదు.
మొత్తంగా చూస్తే, మిడ్సైజ్ సెడాన్ కొనుగోలు చేయాలనుకునే వారికి Hyundai Verna అత్యుత్తమ రీసేల్ వాల్యూ ఇస్తున్న మోడల్గా నిలిచింది. భవిష్యత్తులో కారును విక్రయించే సమయంలో మంచి విలువ పొందాలనుకునే వారికి ఈ అధ్యయనం ఉపయోగకరమైన మార్గదర్శకంగా నిలుస్తుంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.