Car Discontinue from 1st April: ఆర్థిక సంవత్సరం చివరి నెల తర్వాత దేశవ్యాప్తంగా ఎన్నో విషయాలు మారతాయి. మార్చి ఆర్థిక సంవత్సరంలో చివరి నెల. ఆటోమొబైల్ పరిశ్రమ గురించి చెప్పాలంటే ఏప్రిల్ 1వ తేదీ నుంచి కొత్త ఉద్గార నియమాల అమలు కారణంగా కార్ల తయారీదారులు స్థిర ప్రమాణాల వాహనాలను మాత్రమే విక్రయించగలరు. దాని ప్రకారం కంపెనీలు తమ వాహనాల ఇంజన్లను కూడా అప్‌డేట్ చేయడం ప్రారంభించాయి. కానీ ఇంజిన్‌ను అప్‌డేట్ చేయడానికి అధిక మొత్తంలో ఖర్చు అవుతున్న కారణంగా కంపెనీలు తక్కువ డిమాండ్ ఉన్న మోడళ్లను నిలిపివేస్తున్నాయి. అందువల్ల అటువంటి వాహనాల స్టాక్‌ను క్లియర్ చేయడానికి విపరీతమైన తగ్గింపులు కూడా లభించనున్నాయి.
హోండా ఐదు మోడళ్ల విక్రయాలను నిలిపివేయనుంది
ఏప్రిల్ 1వ తేదీ తర్వాత హోండాకు సంబంధించిన ఈ ఐదు మోడళ్లను కొనుగోలు చేయడం సాధ్యం కాదు. ఇందులో హోండా సిటీ 4వ జనరేషన్, 5వ జనరేషన్ (డీజిల్), హోండా అమేజ్ (డీజిల్), హోండా జాజ్, హోండా WR-V ఉన్నాయి. ఈ మోడళ్లలో కొన్ని ఇప్పటికే నిలిపివేయబడ్డాయి. ఇన్ స్టాక్ కార్లపై గొప్ప తగ్గింపు ఆఫర్‌లతో విక్రయిస్తున్నాయి.
మహీంద్రా మూడు మోడళ్ల విక్రయాలను నిలిపివేయనుంది
మహీంద్రాకు చెందిన మరాజో, ఆల్టురాస్ జీ4, కేయూవీ 100 కార్లను కూడా ఏప్రిల్ 1వ తేదీ తర్వాత నుంచి షోరూమ్‌ల నుంచి తీసివేస్తారు. స్టాక్‌లో ఉన్న ఈ కార్లపై కంపెనీ మంచి తగ్గింపులను అందిస్తోంది.
హ్యుందాయ్ రెండు మోడళ్ల విక్రయాలను నిలిపివేయనుంది
ఏప్రిల్ 1వ తేదీ తర్వాత షోరూమ్‌ల నుండి అదృశ్యమయ్యే మోడళ్లలో హ్యుందాయ్ నుండి రెండు కార్లు ఉన్నాయి, అవి హ్యుందాయ్ వెర్నా (డీజిల్), హ్యుందాయ్ అల్కాజార్ (డీజిల్). మార్కెట్లో డీజిల్ వాహనాల అమ్మకాలు తగ్గడం కూడా ఈ మోడళ్లను నిలిపివేయడానికి ఒక కారణం.
స్కోడా రెండు మోడళ్లను నిలిపివేయనుంది
స్కోడా ఆక్టావియా, స్కోడా సూపర్బ్‌లను కూడా కంపెనీ నిలిపివేస్తోంది. వాటిని నిలిపివేయడానికి ఒక కారణం వాటి అమ్మకాలు క్షీణించడం. ఈ కారణంగా ఈ మోడల్‌లను అప్‌డేట్ చేయకూడదని కంపెనీ నిర్ణయించుకుంది.
మారుతీ, టాటా, రెనాల్ట్, నిస్సాన్ తలో మోడల్‌ను నిలిపివేయనున్నాయి
మారుతి ఆల్టో 800, టాటా ఆల్ట్రోజ్, రెనో క్విడ్ 800, నిస్సాన్ కిక్స్ మోడల్స్ కూడా ఏప్రిల్ నుంచి షోరూమ్‌లలో కనిపించవు. స్టాక్‌లో ఉన్న ఈ కార్లపై కంపెనీలు మంచి తగ్గింపులను అందిస్తున్నాయి.
2023 ఫిబ్రవరిలో మహీంద్రా తన బొలెరోకి సంబంధించింది 9,782 యూనిట్లను విక్రయించింది. 2022 ఫిబ్రవరిలో ఈ సంఖ్య 11,045 యూనిట్లుగా ఉంది. బొలెరో 1.5 లీటర్ డీజిల్ ఇంజిన్‌ను పొందనుంది. ఇది 75 bhp శక్తిని, 210Nm టార్క్‌ను ఉత్పత్తి చేస్తుంది. అదే సమయంలో బొలెరో నియో ఇంజన్ 100 bhp శక్తిని, 240 Nm టార్క్‌ను ఉత్పత్తి చేస్తుంది. ఇది ఫైవ్ స్పీడ్ మాన్యువల్ ట్రాన్స్‌మిషన్ యూనిట్‌ను పొందుతుంది. బొలెరో ఎక్స్-షోరూమ్ ధర రూ.9.78 లక్షల నుంచి రూ. 10.79 లక్షల మధ్య ఉండగా, బొలెరో నియో సెవెన్ సీటర్ ఎక్స్ షోరూమ్ ధర రూ. 9.63 లక్షల నుంచి రూ. 12.14 లక్షల మధ్య ఉంది.