Tata Sierra Real World Mileage: కొత్త టాటా సియెర్రా మార్కెట్లోకి వచ్చినప్పటి నుంచి డిజైన్, స్పేస్, ప్రీమియం ఫీల్ కారణంగా భారీగా ఆకర్షిస్తోంది. పాత సియెర్రా పేరును తిరిగి తీసుకువచ్చిన టాటా మోటార్స్, ఈసారి ఆధునిక టెక్నాలజీతో, స్మార్ట్ ప్యాకేజింగ్తో ఈ SUVను రూపొందించింది. పెట్రోల్, టర్బో పెట్రోల్, డీజిల్ ఇంజిన్ ఆప్షన్లతో, రూ. 11.49 లక్షల నుంచి రూ. 21.29 లక్షల ఎక్స్-షోరూమ్ ధర పరిధిలో ఇది అందుబాటులో ఉంది.
అయితే, ఈ కారును కొనాలనుకుంటున్న చాలా మంది అడుగుతున్న ముఖ్యమైన ప్రశ్న ఒక్కటే - నిజ జీవితంలో ఈ కార్ ఎంత మైలేజ్ ఇస్తోంది?. సాధారణంగా, కంపెనీ చెప్పే గణాంకాలు వేరే - రోజువారీ వాడకంలో వచ్చే లెక్కలు వేరే అని అందరికీ తెలుసు. అందుకే, ఈ కథనంలో టాటా సియెర్రా డీజిల్ ఆటోమేటిక్ వేరియంట్కు సంబంధించిన రియల్ వరల్డ్ మైలేజ్ టెస్ట్ వివరాలను తెలుసుకుందాం.
డీజిల్ ఆటోమేటిక్లో డ్రైవ్ మోడ్లు
టాటా సియెర్రా డీజిల్ ఆటోమేటిక్ వేరియంట్లో రెండు డ్రైవ్ మోడ్లు ఉన్నాయి - సిటీ, స్పోర్ట్. ఇంధన పొదుపు కోసం ప్రత్యేకంగా ఉండే ఎకానమీ మోడ్, ఆటోమేటిక్ ఇంజిన్ స్టాప్-స్టార్ట్ సిస్టమ్ ఇందులో లేవు. ఈ ఫీచర్లు లేకపోవడం వల్ల మైలేజ్పై ప్రభావం ఉంటుందేమో అనే అనుమానం చాలామందికి ఉంటుంది.
ఈ SUVలో 1.5 లీటర్ డీజిల్ ఇంజిన్ ఉంది. ఇది 118hp శక్తి, 280Nm టార్క్ను ఇస్తుంది. ఇదే ఇంజిన్ టాటా నెక్సాన్లో కూడా కనిపిస్తుంది. అయితే, సియెర్రాలో అవుట్పుట్ కొద్దిగా పెరిగింది. మరో ముఖ్యమైన తేడా గేర్బాక్స్. నెక్సాన్లో డీజిల్ AMT ఉండగా, సియెర్రాలో 6-స్పీడ్ టార్క్ కన్వర్టర్ ఆటోమేటిక్ గేర్బాక్స్ ఇచ్చారు.
సిటీ డ్రైవింగ్లో మైలేజ్
నిజ జీవిత టెస్టింగ్లో, ఎక్స్పర్ట్లు సిటీ మోడ్లో నడిపినప్పుడు టాటా సియెర్రా డీజిల్ ఆటోమేటిక్ లీటరుకు 11.53 కి.మీ. మైలేజ్ నమోదు చేసింది. ట్రాఫిక్, సిగ్నల్స్, AC వాడకం వంటి సాధారణ పరిస్థితుల్లో ఈ లెక్క రావడం గమనార్హం. SUV సైజ్, బరువు దృష్టిలో పెట్టుకుంటే, ఇది మంటి సంఖ్యగానే చెప్పుకోవచ్చు.
హైవే మీద ఇంధన సామర్థ్యం
హైవే డ్రైవింగ్లో ఈ SUV మరోసారి ఆశ్చర్యపరిచింది. స్థిరమైన వేగంతో నడిపినప్పుడు లీటరుకు 14.56 కి.మీ. మైలేజ్ ఇచ్చింది. ఇది, పెద్ద 2.0 లీటర్ డీజిల్ ఇంజిన్తో వచ్చే టాటా హారియర్ మైలేజ్కు దగ్గరగా ఉండటం విశేషం. దీని వల్ల, లాంగ్ డ్రైవ్స్, హైవే ట్రిప్స్ ఎక్కువగా చేసే వారికి సియెర్రా మంచి ఎంపికగా మారుతుంది.
మొత్తం సగటు మైలేజ్
సిటీ, హైవే రెండింటినీ కలిపి చూసుకుంటే, టాటా సియెర్రా డీజిల్ ఆటోమేటిక్ వేరియంట్కు సగటు రియల్ వరల్డ్ మైలేజ్ లీటరుకు 13.05 కి.మీ.లుగా నమోదైంది.
టెస్ట్ ఎలా నిర్వహించారు?
ఎక్స్పర్ట్లు, ఈ రియల్ వరల్డ్ మైలేజ్ టెస్ట్కు ముందు కార్ ట్యాంక్ను పూర్తిగా నింపారు. కంపెనీ సూచించిన టైర్ ప్రెషర్ పాటించారు. నగరం, హైవేలో ఫిక్స్డ్ రూట్లలో, ఒకే వ్యక్తితో కారును నడిపారు. ACని 22 డిగ్రీల వద్ద ఫుల్ ఆటో మోడ్లో ఉపయోగించారు. సాధారణ వినియోగదారుడు చేసేలా ఆడియో సిస్టమ్, ఇండికేటర్లు వంటివి వాడారు. ప్రతి రన్ తర్వాత మళ్లీ ట్యాంక్ నింపి మైలేజ్ను లెక్కించారు.
కంపెనీ లెక్కకు దగ్గరగానే ఉందా?
మొత్తానికి, కంపెనీ ప్రకటించిన గణాంకాలకు చాలా దగ్గరగా సియెర్రా నిజ జీవితంలో మైలేజ్ ఇస్తోంది అని చెప్పవచ్చు. భారీ SUV అయినప్పటికీ, డీజిల్ ఆటోమేటిక్లో ఈ స్థాయి ఇంధన సామర్థ్యం ఇవ్వడం టాటా సియెర్రాకు ప్లస్ పాయింట్. రోజువారీ వాడకం, లాంగ్ డ్రైవ్స్ రెండింటికీ ఇది బ్యాలెన్స్డ్ ప్యాకేజీగా కనిపిస్తోంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.