New Toll Gate Rules India: మన దేశంలోని జాతీయ రహదారులపై బారియర్-లెస్ టోలింగ్ సిస్టమ్ దిశగా కేంద్ర ప్రభుత్వం కీలక అడుగులు వేస్తోంది. ఈ క్రమంలో వాహనదారుల కోసం కీలకమైన & కఠినమైన కొత్త నిబంధనలను అమల్లోకి తీసుకొచ్చింది. ఇకపై టోల్ ప్లాజాల వద్ద పెండింగ్ టోల్ బకాయిలు ఉంటే, ఆ వాహనానికి RC ట్రాన్స్ఫర్, ఫిట్నెస్ సర్టిఫికెట్, పర్మిట్ రెన్యువల్ లాంటి సర్వీసులు అందుబాటులో ఉండవు.
కొత్త నిబంధనలు చేరుస్తూ, కేంద్ర రోడ్డు రవాణా మరియు రహదారుల మంత్రిత్వ శాఖ (MoRTH) ‘Central Motor Vehicles Rules, 2026’లో మార్పులు చేసింది. జాతీయ రహదారులపై ప్రయాణించిన వాహనాల టోల్ ఫీజులు వసూలు చేయడంలో పారదర్శకత తీసుకురావడమే ఈ మార్పుల ప్రధాన ఉద్దేశం.
టోల్ బకాయిలు ఉంటే ఏమవుతుంది?
కేంద్ర మంత్రిత్వ శాఖ స్పష్టంగా తెలిపిన ప్రకారం, ఏ వాహనానికైనా టోల్ బకాయిలు ఉంటే 'నో అబ్జెక్షన్ సర్టిఫికెట్' (No Objection Certificate / NOC) ఇవ్వరు. NOC లేకపోతే వాహనాన్ని మరో రాష్ట్రానికి లేదా జిల్లాకు బదిలీ చేయడం సాధ్యం కాదు. అలాగే ఫిట్నెస్ సర్టిఫికెట్ రెన్యువల్, వాణిజ్య వాహనాలకు పర్మిట్ రెన్యువల్ వంటి పనులు కూడా నిలిచిపోతాయి.
"అన్పెయిడ్ యూజర్ ఫీజ్"కు కొత్త నిర్వచనం
సవరించిన నిబంధనల్లో, "అన్పెయిడ్ యూజర్ ఫీజ్" (Unpaid User Fee) అనే పదానికి కొత్త నిర్వచనం ఇచ్చారు. ఎలక్ట్రానిక్ టోల్ కలెక్షన్ (ETC) సిస్టమ్ ద్వారా వాహనం జాతీయ రహదారి సెక్షన్ను దాటినట్లు రికార్డ్ అయ్యి, సంబంధిత టోల్ ఫీజు చెల్లించకపోతే, దాన్ని పెండింగ్ టోల్గా పరిగణిస్తారు.
Form 28లో కీలక మార్పులు
వాహన బదిలీకి అవసరమైన Form 28లో కూడా మార్పులు చేశారు. ఇకపై దరఖాస్తుదారు తన వాహనంపై ఏవైనా పెండింగ్ టోల్ డిమాండ్లు ఉన్నాయో, లేదో చెప్పాలి, ఉంటే వాటి వివరాలు వెల్లడించాల్సి ఉంటుంది. డిజిటల్ విధానాలను ప్రోత్సహిస్తూ, Form 28ను ఆన్లైన్ పోర్టల్ ద్వారా ఎలక్ట్రానిక్గా జారీ చేసే సౌకర్యం కూడా కల్పించారు.
MLFF టోల్ సిస్టమ్ ఏమిటి?
రాబోయే రోజుల్లో అమల్లోకి రానున్న మల్టీ-లేన్ ఫ్రీ ఫ్లో (Multi-Lane Free Flow / MLFF) టోల్ సిస్టమ్ ద్వారా వాహనాలు టోల్ ప్లాజాల వద్ద ఆగాల్సిన అవసరం ఉండదు. ANPR కెమెరాలు, AI అనలిటిక్స్, FASTag RFID సిస్టమ్ సహాయంతో వాహనాన్ని గుర్తించి, టోల్ ఆటోమేటిక్గా కట్ అవుతుంది.
నిబంధనలు ఉల్లంఘిస్తే శిక్షలు
టోల్ చెల్లించని వాహనదారులకు ఈ-నోటీసులు పంపిస్తారు. అవి కూడా పట్టించుకోకపోతే FASTag సస్పెన్షన్, VAHAN సంబంధిత పెనాల్టీలు విధించే అవకాశం ఉంది.
ప్రభుత్వం ఏమంటోంది?
జాతీయ రహదారుల అభివృద్ధి, నిర్వహణ కోసం ఈ నిబంధనలు కీలకమని కేంద్రం చెబుతోంది. 2026లో దేశవ్యాప్తంగా బారియర్-లెస్ టోలింగ్ను ప్రాధాన్యత అంశంగా అమలు చేస్తామని కేంద్ర రహదారుల శాఖ మంత్రి నితిన్ గడ్కరీ ఇప్పటికే స్పష్టం చేశారు. టోల్ వసూలు ఖర్చు ప్రస్తుతం ఉన్న 15 శాతం నుంచి 3 శాతానికి తగ్గుతుందని కూడా ఆయన వెల్లడించారు.
వాహనదారులు ఏం చేయాలి?
మీ వాహనానికి సంబంధించిన FASTag టోల్ హిస్టరీని చెక్ చేసుకోవడం, పెండింగ్ బకాయిలు ఉంటే వెంటనే క్లియర్ చేయడం ఇప్పుడు చాలా అవసరం. లేదంటే భవిష్యత్తులో వాహన బదిలీ, ఫిట్నెస్, పర్మిట్ విషయంలో సమస్యలు తప్పవు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.