Monsoon Bike Safety Tips: జూన్ నెల వచ్చిందంటే చాలు, భానుడి తాపం నుంచి ఉపశమనం కలిగిస్తూ వర్షాలు పలకరిస్తాయి. ప్రకృతిపరంగా ఇది ఆహ్లాదకరంగా ఉన్నప్పటికీ, టూ-వీలర్ నడిపేవారికి మాత్రం ఇది పరీక్షా కాలం. వర్షాకాలంలో బైకర్లు ఎదుర్కొనే అత్యంత భయంకరమైన సమస్య స్కిడ్డింగ్. రోడ్లపై నీరు చేరడం, వాహనాలు నుంచి లీకైన ఆయిల్ వర్షపు నీటితో కలవడం వల్ల తారు రోడ్లు అద్దంలా మారిపోతున్నాయి. ఇలాంటి సమయంలో బైక్ టైర్లకు, రోడ్లకు మధ్య ఉండాల్సిన గ్రిప్ లేకపోవడంతో ప్రమాదాలు జరుగుతుంటాయి. అయితే, చాలా మందికి తెలియని విషయం ఏంటంటే, కేవలం టైర్లలో ఉండే గాలి మార్చడం ద్వారా ఈ ప్రమాదాలను చాలా వరకు నివారించవచ్చు.
టైర్ ప్రెజర్ నియమం-1-2 PSI సూత్రం ఎందుకు పాటించాలి?
సాధారణంగా మనం వేసవి కాలంలో టైర్లలో గాలిని కొంత తక్కువగా ఉంచుతాం, కానీ వర్షాకాలంలో వచ్చే సరికి నియమాలు పూర్తిగా మారుతాయి. వర్షాకాలంలో మీ బైక్ టైర్లలో గాలి ఎప్పుడూ కంపెనీ సూచించిన సాధారణ బ్రెజర్ కంటే 1 నుంచి 2 PSI తక్కువగా ఉండాలి.
టైర్లో గాలి తక్కువగా ఉన్నప్పుడు, టైర్ రోడ్డుపై కొద్దిగా వెడల్పుగా వెళ్తుంది. దీనిని టెక్నికల్ భాషలో కాంటాక్ట్ ప్యాచ్ అంటారు. గాలి తక్కువగా ఉండటం వల్ల టైర్ ఎక్కువ భాగం రోడ్డును తాకుతుంది. ఇది తడి రోడ్లపై బైక్కు అదనపు పట్టును అందిస్తుంది. ఒక వేళ మీరు టైర్లో ఎక్కువ గాలిని నింపితే టైర్ మధ్య భాగం మాత్రమే రోడ్డుకు ఆనుతుంది. దీని వల్ల బ్రేక్ వేయగానే బైక్ వేగంగా స్కిడ్ అయ్యే ప్రమాదం ఉంది.
సాధారణంగా 25-28 PSI ఉంటుంది. వర్షంలో దీనిని 26PSIకి పరిమితం చేయడం ఉత్తమం. సాధారణంగా 32-36 PSI ఉంటుంది. వర్షకాలంలో దీనిని 32 లేదా 33 PSIకి తగ్గించి ఉంచడం వల్ల రోడ్డుపై పట్టు లభిస్తుంది.
టైర్ గ్రిప్, థ్రెడ్ డెప్త్
కేవలం గాలి మాత్రమే కాదు, టైర్ కండిషన్ కూడా ముఖ్యం. మీ బైక్ టైర్లు అరిగిపోయి గుండుగా మారాయా అయితే వెంటనే జాగ్రత్త పడాలి. టైర్లపై ఉండే గీతలు లేదా థ్రెడ్స్ కేవలం డిజైన్ కోసం కాదు, అవి రోడ్డుపై ఉన్న నీటిని పక్కకు నెట్టివేసి, టైర్ నేరుగా రోడ్డును తాకేలా చేస్తాయి. టైర్ థ్రెడ్ డెప్త్ కనీసం 1.5mm నుంచి 2mm ఉండేలా చూసుకోండి. అంతకంటే తక్కువ ఉంటే ఆ టైరు వర్షంలో ప్రయాణానికి సురక్షితం కావు. అరిగిపోయిన టైర్లను వెంటనే మార్చుకోవడం మంచిది.
బ్రేకింగ్ టెక్నిక్
తడి రోడ్లపై సడెన్ బ్రేకింగ్ వేయడం అంటే ప్రమాదాన్ని ఆహ్వానించడమే. ఎప్పుడూ ముందు, వెనుక బ్రేకులను ఒకేసారి వేయాలి. మీ బైక్లో ఏబీఎస్ లేకపోతే, బ్రేక్ను ఒకేసారి గట్టిగా నొక్కకుండా, మెల్లిమెల్లిగా నొక్కుతూ వదులుతూ బ్రేక్స్ వేయాలి. దీని వల్ల టైర్లు లాక్ అవ్వకుండా బైక్ అదుపులో ఉంటుంది. యాంటీ లాక్ బ్రేకింగ్ సిస్టమ్ ఉన్న బైక్లలో స్కిడ్ అయ్యే ప్రమాదం చాలా తక్కువ.
వర్షంలో రోడ్డుపై కనిపించే కొన్ని భాగాలు పెద్ద ప్రమాదాలకు కారణమవుతాయి. రోడ్లపై వేసే తెల్లటి, పసుపు రంగు పెయింట్ లైన్లు వర్షపు నీరు పడగానే సోపు నీళ్లలా జారుతాయి. వాటిపై బ్రేక్ వేయడం లేదా బైక్ టర్న్ చేయడం ప్రమాదకరం. ఇనుప మ్యాన్హోల్ మూతలు వర్షంలో అత్యంత ప్రమాదకరంగా మారుతాయి. వాటిపై నుంచి వెళ్లేటప్పుడు బైక్ స్ట్రెయిట్గా ఉండేలా చూసుకోవాలి.
ఆక్వాప్లానింగ్ అంటే ఏంటీ?
వర్షంలో బైక్ నడిపేటప్పుడు గంటకు 40 నుంచి 50 కిలోమీటర్ల వేగాన్ని మించకూడదు. వేగం పెరిగే కొద్దీ టైర్ రోడ్పై ఆనకుండా నీటి పొరపై తేలుతూ వెళ్తుంది. దీనినే ఆక్వాప్లానింగ్ అంటారు. ఈ స్థితిలో బైక్పై మీకు ఎలాంటి కంట్రోల్ ఉండదు. వేగం తక్కువగా ఉంటే ప్రమాదం జరిగినా కంట్రోల్ చేసుకోవడం సులభం అవుతుంది.
వర్షాకాలంలో బైక్ చెకప్ లిస్ట్
మీ రైడ్ సురక్షితం చేసుకోవడానికి కొన్ని జాగ్రత్తలు తీసుకోవాలి.
| టైర్ ప్రెజర్ | కంపెనీ సూచన కంటే 1-2 PSI తక్కువగా ఉంచండి. |
| బ్రేక్ ప్యాడ్స్ | వర్షంలో బ్రేక్ లైనర్స్ త్వరగా అరుగుతాయి. అరిగిపోతే వెంటనే మార్చండి |
| చైన్ లూబ్రికేష్ | వర్షపు నీటికి చైన్ గ్రీస్ పోతుంది. కాబట్టి వరానికి ఒకసారి చైన్ లూబ్ వాడండి. |
| లైట్లు, ఇండికేటర్లు | వర్షంలో విజిబిలిటీ తక్కువగా ఉంటుంది. కాబట్టి ఇవి పక్కాగా పనిచేయాలి. |
వర్షాకాలంలో ప్రయాణమనేది కేవలం రైడింగ్ నైపుణ్యంపైనే కాకుండా, బైక్ మెయింటెనెన్స్పై కూడా ఆధారపడి ఉంటుంది. ప్రతివారం డిజిటల్ మీటర్ ఉన్న బంకుల్లో టైర్ ప్రెజర్ చెక్ చేయించుకోవడం, వేగాన్ని నియంత్రణలో ఉంచుకోవడం వంటి చిన్న జాగ్రత్తలు మీ ప్రాణాలను కాపాడుతాయి.