Hyundai Bayon vs Hyundai Creta Differences: హ్యుందాయ్ మోటార్ ఇండియా ఇటీవల లాంచ్‌ చేసిన మిడ్‌సైజ్ SUV.. బేయాన్. ఇప్పటికే ఈ విభాగంలో అత్యధిక ఆదరణ పొందుతున్న క్రెటాకు ఇప్పుడు బేయాన్ మరో ప్రత్యామ్నాయంగా నిలిచింది. బేయాన్ ధరలు రూ.10 లక్షల నుంచి రూ.18 లక్షల వరకు ఉన్నాయి. క్రెటాతో పోలిస్తే కొన్ని వేరియంట్ల ధరలు తక్కువే. అయితే, ధర తక్కువగా ఉందని బేయాన్‌నే కొనాలా? మంచి ఫీచర్లు, ఇంజిన్ ఆప్షన్లు ఉన్న క్రెటాను ఎంచుకోవాలా?.
పరిమాణంలో ఏది పెద్దది?
పరిమాణం విషయంలో క్రెటా కొంత పెద్దగా ఉంటుంది. బేయాన్ పొడవు 4,245mm కాగా.. క్రెటా పొడవు 4,330mm. అంటే క్రెటా 85mm ఎక్కువ పొడవు ఉంటుంది. బేయాన్ వెడల్పు 1,810mm కాగా.. క్రెటా వెడల్పు 1,790mm. ఎత్తులో మాత్రం క్రెటా ముందుంది. బేయాన్ ఎత్తు 1,605mm కాగా, క్రెటా ఎత్తు 1,635mm.
వీల్‌బేస్ విషయంలో పెద్దగా తేడా లేదు. బేయాన్‌లో 2,600mm వీల్‌బేస్ ఉండగా, క్రెటాలో 2,610mm ఉంది. గ్రౌండ్ క్లియరెన్స్ విషయంలో బేయాన్‌కు పైచేయి ఉంది. ఇందులో 205mm గ్రౌండ్ క్లియరెన్స్ లభిస్తుంది. క్రెటాలో ఇది 190mm మాత్రమే. బూట్ స్పేస్ విషయంలోనూ బేయాన్ ముందుంది. ఇందులో 505 లీటర్ల స్థలం ఉండగా, క్రెటాలో 433 లీటర్లు మాత్రమే ఉంది. అయితే క్రెటాలో 50 లీటర్ల ఇంధన ట్యాంక్ ఉండగా, బేయాన్‌లో 43 లీటర్ల ట్యాంక్ ఇచ్చారు.
ఇంజిన్, మైలేజీలో తేడాలివే
హ్యుందాయ్ బేయాన్‌లో 1.5 లీటర్ నేచురల్లీ ఆస్పిరేటెడ్ పెట్రోల్ ఇంజిన్ ఉంటుంది. ఇది 115HP శక్తిని, 144Nm టార్క్‌ను ఉత్పత్తి చేస్తుంది. దీనికి 6-స్పీడ్ మాన్యువల్ లేదా CVT గేర్‌బాక్స్ ఎంపికలు ఉన్నాయి.
క్రెటాలోనూ ఇదే 1.5 లీటర్ పెట్రోల్ ఇంజిన్ అందుబాటులో ఉంది. అయితే క్రెటాలో అదనంగా టర్బో పెట్రోల్, డీజిల్ ఇంజిన్ ఎంపికలు కూడా ఉన్నాయి. 1.5 లీటర్ టర్బో పెట్రోల్ ఇంజిన్ 163HP శక్తిని, 253Nm టార్క్‌ను అందిస్తుంది. డీజిల్ ఇంజిన్ 116HP శక్తిని, 250Nm టార్క్‌ను ఉత్పత్తి చేస్తుంది.
బేయాన్ పెట్రోల్ CVT వేరియంట్‌కు కంపెనీ ప్రకటించిన మైలేజీ 18.6 కి.మీ. కాగా, క్రెటా పెట్రోల్ CVT మైలేజీ 17.7 కి.మీ.గా ఉంది. అంటే బేయాన్ 0.9 కి.మీ. ఎక్కువ మైలేజీ ఇస్తుందని పేర్కొన్నారు. బేయాన్ మాన్యువల్ వేరియంట్ మైలేజీ వివరాలు ఇంకా వెల్లడించలేదు. 2027లో బేయాన్ CNG వెర్షన్ కూడా రానుంది.
ఇది కూడా చదవండి: దీపావళికి కొత్త హ్యాచ్‌బ్యాక్‌ కారు కొనాలనుకుంటున్నారా? టాటా నుంచి మారుతి వరకు లక్షల్లో డిస్కౌంట్లు!
బయటి రూపంలో ఏది ఆకట్టుకుంటుంది?
బయటి డిజైన్, ఫీచర్ల విషయంలో రెండు కార్ల మధ్య కొన్ని తేడాలు ఉన్నాయి. బేయాన్‌లో 17 అంగుళాల అల్లాయ్ వీల్స్ ఉంటాయి. క్రెటాలో 18 అంగుళాల అల్లాయ్ వీల్స్ అందించారు. రెండు కార్లలోనూ LED లైట్లు, వెనుక స్పాయిలర్, ఎలక్ట్రికల్‌గా సర్దుబాటు చేసుకునే & మడతపెట్టుకునే ORVMలు, రూఫ్ రెయిల్స్ ఉన్నాయి. రెండు కార్లలో సింగిల్ టోన్, డ్యూయల్ టోన్ రంగుల ఎంపికలు లభిస్తాయి.
ఇంటీరియర్, ఫీచర్లలో ఏకారుది పైచేయి?
క్యాబిన్ ఫీచర్ల విషయంలో బేయాన్ కొన్ని ప్రత్యేకతలను కలిగి ఉంది. ఇందులో 12.3 అంగుళాల ఇన్ఫోటైన్‌మెంట్ స్క్రీన్, 12.3 అంగుళాల డ్రైవర్ డిస్‌ప్లే ఉన్నాయి. క్రెటాలో ఈ స్క్రీన్లు 10.25 అంగుళాల పరిమాణంలో ఉంటాయి.
బేయాన్‌లో జనరేటివ్ AI వాయిస్ అసిస్టెంట్ ప్రత్యేక ఆకర్షణ. దీని సాయంతో నావిగేషన్, ఫోన్ కాల్స్, SMSలు, AC, సన్‌రూఫ్‌ను నియంత్రించవచ్చు. వాతావరణం, క్రీడలకు సంబంధించిన తాజా సమాచారాన్ని కూడా తెలుసుకోవచ్చు. రెండు కార్లలోనూ పానోరమిక్ సన్‌రూఫ్, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, వెంటిలేటెడ్ ఫ్రంట్ సీట్లు, 8-స్పీకర్ బోస్ ఆడియో వ్యవస్థ ఉన్నాయి.
కొన్ని కీలక ఫీచర్లలో క్రెటా ముందుంది. ఇందులో డ్యూయల్ జోన్ ఆటోమేటిక్ క్లైమేట్ కంట్రోల్, వెనుక ప్రయాణికుల కోసం వైర్‌లెస్ ఛార్జర్ ఉన్నాయి. డ్రైవర్ సీటుకు మెమరీ ఫంక్షన్‌తో కూడిన 8-వే పవర్ అడ్జస్ట్‌మెంట్ సదుపాయం ఉంది. ముందు ప్రయాణికుడి సీటుకు కూడా 8-వే పవర్ అడ్జస్ట్‌మెంట్ ఇచ్చారు. బాస్ మోడ్, వెనుక సన్‌షేడ్, ఎయిర్ ప్యూరిఫైయర్, కూల్డ్ గ్లోవ్ బాక్స్ వంటి ఫీచర్లు కూడా క్రెటాలోనే ఉన్నాయి.
ఇది కూడా చదవండి: ఫాస్టాగ్‌ యాన్యువల్‌ పాస్‌ vs లోకల్‌ పాస్‌ vs రెగ్యులర్‌ రీఛార్జ్‌.. మీకు ఏది బెస్ట్?
డ్రైవింగ్, సేఫ్టీ ఫీచర్లు
డ్రైవింగ్ సదుపాయాల్లో రెండు కార్లలోనూ దాదాపు ఒకే తరహా ఫీచర్లు ఉన్నాయి. నార్మల్, ఎకో, స్పోర్ట్ డ్రైవింగ్ మోడ్‌లు, ప్యాడిల్ షిఫ్టర్లు, అడాప్టివ్ క్రూయిజ్ కంట్రోల్, ఐడిల్ స్టార్ట్/స్టాప్ వ్యవస్థలు అందించారు.
సేఫ్టీ విషయంలో బేయాన్‌కు కొంత ఆధిక్యం ఉంది. ఇందులో లెవల్ 2+ ADAS వ్యవస్థ ఉంది. క్రెటాలో లెవల్ 2 ADAS మాత్రమే లభిస్తుంది. బేయాన్‌లో మ్యాప్ ఆధారిత హైవే డ్రైవింగ్ అసిస్ట్, క్రూయిజ్ కంట్రోల్ వంటి అదనపు సదుపాయాలు ఉన్నాయి. అయితే క్రెటాలో ముందు, వెనుక డాష్‌క్యామ్‌లు ఉన్నాయి. బేయాన్‌లో ఈ ఫీచర్ లేదు.
రెండు కార్లలోనూ ఆరు ఎయిర్‌బ్యాగులు, 360 డిగ్రీల కెమెరా, ముందు & వెనుక పార్కింగ్ సెన్సర్లు, ఎలక్ట్రానిక్ పార్కింగ్ బ్రేక్, TPMS, హిల్ స్టార్ట్ అసిస్ట్, హిల్ డిసెంట్ కంట్రోల్ ఉన్నాయి. నాలుగు చక్రాలకూ డిస్క్ బ్రేకులు, ఎలక్ట్రానిక్ స్టెబిలిటీ కంట్రోల్, ట్రాక్షన్ కంట్రోల్ సదుపాయాలు ఉన్నాయి.
ధరల విషయంలో ఏది లాభదాయకం?
బేయాన్ పెట్రోల్ మాన్యువల్ వేరియంట్ల ధరలు రూ.10 లక్షల నుంచి రూ.16.65 లక్షల వరకు ఉన్నాయి. క్రెటా మాన్యువల్ వేరియంట్ల ధరలు రూ.10.91 లక్షల నుంచి రూ.17.28 లక్షల వరకు ఉన్నాయి. అంటే ప్రారంభ వేరియంట్‌లో బేయాన్ రూ.91,000 వరకు తక్కువ ధరకు లభిస్తుంది. టాప్ వేరియంట్‌లో ఈ వ్యత్యాసం రూ.63,000.
పెట్రోల్ CVT వేరియంట్లలోనూ బేయాన్ ధర తక్కువగానే ఉంది. బేయాన్ ధరలు రూ.13.85 లక్షల నుంచి రూ.18 లక్షల వరకు ఉండగా, క్రెటా ధరలు రూ.14.50 లక్షల నుంచి రూ.18.69 లక్షల వరకు ఉన్నాయి. ఇక్కడ ప్రారంభ వేరియంట్‌లో రూ.65 వేలు, టాప్ వేరియంట్‌లో రూ.69,000 వరకు ధర వ్యత్యాసం ఉంది.
అయితే టర్బో పెట్రోల్, డీజిల్ ఇంజిన్ ఎంపికలు కావాలనుకునేవారికి క్రెటా మాత్రమే అందుబాటులో ఉంది. అలాగే అదనపు సౌకర్యాలు, వెనుక ప్రయాణికుల కోసం ప్రత్యేక ఫీచర్లు కోరుకునేవారికి క్రెటా మంచి ఎంపికగా ఉంటుంది.
ఏది కొనాలి?
తక్కువ ధర, పెద్ద బూట్ స్పేస్, మెరుగైన ప్రకటిత పెట్రోల్ CVT మైలేజీ, ఆధునిక డిస్‌ప్లేలు, అదనపు ADAS ఫీచర్లు కావాలనుకునేవారు బేయాన్‌ను పరిశీలించవచ్చు.
ఎక్కువ ఇంజిన్ ఎంపికలు, డీజిల్, టర్బో పెట్రోల్, అదనపు క్యాబిన్ సౌకర్యాలు కోరుకునేవారికి క్రెటా మెరుగైన ఎంపిక. అంతేకాదు, క్రెటాకు 2027లో కొత్త తరం మోడల్ రానున్న నేపథ్యంలో ప్రస్తుత మోడల్‌పై డీలర్ డిస్కౌంట్లు లభించే అవకాశం ఉంది.
గమనిక: పేర్కొన్న ధరలన్నీ ఎక్స్-షోరూమ్ ధరలు. వేరియంట్, నగరాన్ని బట్టి ధరల్లో మార్పులు ఉండవచ్చు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.