Harley-Davidson X440 S vs Royal Enfield Guerrilla 450: భారతీయ రోడ్లపై ఇప్పుడు 400సీసీ సెగ్మెంట్ బైకుల హవా నడుస్తోంది. ఒకప్పుడు కేవలం రాయల్ ఎన్ఫీల్డ్ మాత్రమే రాజ్యమేలిన ఈ విభాగంలో ఇప్పుడు అంతర్జాతీయ దిగ్గజం హార్లే డేవిడ్సన్ కూడా ఎంట్రీ ఇచ్చింది. మీరు మూడు లక్షల బడ్జెట్లో ఒక పవర్ఫుల్, స్టైలిష్, రెట్రో లుక్ ఉన్న బైక్ కోసం చూస్తున్నారా అయితే మీ ముందు రెండు అద్బుతమైన ఆప్షన్లు ఉన్నాయి. ఒకటి హార్లే డేవిడ్సన్ 440S, రెండోది రాయల్ ఎన్ఫీల్డ్ గెరిల్లా 450 అపెక్స్.
ఈ రెండు చూడటానికి రోడ్స్టర్లే అయినా, వీటి స్వభావం, పనితీరు, ఇచ్చే ఫీల్డ్ మాత్రం పూర్తిగా భిన్నం. ఈ రెండు బైకుల మధ్య ఉన్న తేడాలను, వీటీ ప్రత్యేకతలు గురించి తెలుసుకోండి.
ధర, వేరియంట్ల మధ్య తేడా
బైక్ కొనేటప్పుడు ఎవరైనా ముందుగా చూసేది ధర. హార్లే, రాయల్ ఎన్ఫీల్డ్ ధరలు ఒకదానికొకటి చాలా దగ్గరగా ఉండటం విశేషం. హార్లే డేవిడ్సన్ X440S ఎక్స్ షోరూమ్ ధర 2,59,000 రూపాయలుగా ఉంటే, రాయల్ ఎన్ఫీల్డ్ గెరిల్లా 450 అపెక్స్ 2,49, 194 నుంచి 2,56, 387 మధ్య ఉంటుంది.
ఒకప్పుడు హార్లే అంటే భారీ ధర అనుకునే వారు, కానీ ఇప్పుడు రాయల్ ఎన్ఫీల్డ్ ధరకు సమానంగా హార్లే బైక్ లభించడం వినియోగదారులకు కలిసొచ్చే అంశం.
డిజైన్, డైమన్సన్స్
రెట్రో లుక్ విషయంలో ఈ రెండు బైకులు తమదైన ముద్ర వేస్తాయి. రెండూ పొడవుగా, వెడల్పుగా ఉండి రోడ్పై మంచి ప్రెజెన్స్ను కలిగి ఉంటాయి. హార్లే డేవిడ్సన్ X440S బరువు 190.5 కేజీలుగు ఉండగా, గెరిల్లా 450 కొంచెం తేలికగా 185 కేజీలు ఉంటుంది. ట్రాపిక్లో లేదా పార్కింగ్ చేసేటప్పుడు గెరిల్లా కొంచెం ఈజీగా ఉంటుంది.
హార్లే సీటు ఎత్తు 805mm కాగా, గెరిల్లా 780mm మాత్రమే. దీని వల్ల తక్కువ ఎత్తు ఉన్న రైడర్లకు గెరిల్లా 450 అత్యంత సౌకర్యవంతంగా ఉంటుంది. గెరిల్లాలో రెడ్, బ్లాక్, గ్రే, గ్రీన్ వంటి బోల్డ్ కలర్స్ ఉన్నాయి. ముఖ్యంగా ఎరుపు రంగు బైక్ చాలా అగ్రెసివ్గా కనిపిస్తుంది. హార్లే మాత్రం సింపుల్గా బ్లాక్, ఆరెంజ్ రంగుల్లో మాత్రమే లభిస్తుంది.
ఫీచర్లు, సేఫ్టీ
టెక్నాలజీ పరంగా రెండు బైకులు నేటి కాలానికి తగ్గట్టుగా ఉన్నాయి. రెండింటిలోనూ టీఎఫ్టీ కన్సోల్, బ్లూటూత్ కనెక్టవిటీ వంటి ఫీచర్లు ఉన్నాయి. రాయల్ ఎన్ఫీల్డ్ గెరిల్లా 450లో సర్క్యులర్ టీఎఫ్టీ కన్సోల్ ఉంటుంది. ఇది చూడటానికి ప్రీమియంగా ఉండటమే కాకుండా చదవడానికి చాలా సులువుగా ఉంటుంది. ఇందులో ఎకో, పెర్ఫార్మెన్స్ అనే రెండు రైడింగ్ మోడ్లు ఉంటాయి.
హార్లే డేవిడ్సన్ X440Sలో డైమండ్ కట్ వీల్స్, మెషిన్డ్ ఇంజిన్ ఫిన్స్ వంటి అందమైన ఎలిమెంట్స్ ఉన్నాయి. ఇందులో ఇ-సిమ్ ఫీచర్లు ఉన్నప్పటికీ , రోజువారీ జీవితంలో అవి పెద్దగా ఉపయోగపడకపోవచ్చని నిపుణులు అభిప్రాయం.
ఇంజిన్ పని తీరు
ఈ రెండు బైక్లు మధ్య అసలైన తేడా ఇక్కడే కనిపిస్తుంది. వీటి ఇంజిన్లు పని చేసే తీరు పూర్తిగా వేర్వేరు. హార్లే డేవిడ్సన్ X440Sలో 440cc ఎయిర్ అండ్ ఆయిల్ కూల్డ్ ఇంజిన్ ఉంది. ఇది 27.3PS పవర్, 38Nm టార్క్ను ఉత్పత్తి చేస్తుంది. ఈ బైక్ పూర్తిగా టార్క్పై ఆధారపడి నడుస్తుంది. తక్కువ ఆర్పీఎం వద్దే ఇది అద్భుతమైన పవర్ ఇస్తుంది. హైవేపై 100kmph వేగంతో వెళ్తున్నప్పుడు కూడా ఇంజిన్ చాలా ప్రశాంతంగా అలసట లేకుండా ఉంటుంది. రిలాక్స్డ్గా రైడ్ చేయాలనుకునే వారికి ఇది బెస్ట్ ఛాయిస్.
రాయల్ఎనఫీల్డ్ గెరిల్లా 450లో 452cc లిక్విడ్ కూల్డ్ ఇంజిన్ ఉంది. ఇది 40PS పవర్, 40Nm టార్క్ను ఇస్తుంది. గెరిల్లా ఇంజిన్ మూడు వేల ఆర్పీఎం దాటిన తర్వాత అసలైన విశ్వరూపం చూపిస్తుంది. అకస్మాత్తుగా పవర్ పెరగం వల్ల రైడర్కు ఒకరకమైన థ్రిల్ కలుగుతుంది. ఇది వేగంగా దూసుకుపోయే స్వభావం కలిగి ఉంటుంది.
ఎవరు ఏ బైక్ కొనుగోలు చేయాలి
సిటీలో హూందాగా తిరుగుతూ అప్పుడప్పుడు హైవే ట్రిప్పులకు వెళ్లాలనుకుంటే హార్లే X440S బాగుంటుంది. అదే మీరు అడ్రినాలిన్ రష్ కోరుకునే యువకులైతే, వేగమే ప్రాధాన్యత అయితే గెరిల్లా 450 మీకు సెట్ అవుతుంది.
మీ బడ్జెట్ రూ. ౩ లక్షల లోపు ఉండి, బ్రాండ్ వాల్యూ, కంఫర్ట్ కావాలనుకున్న్పుడు హార్లే వైపు చూడండి. అదే అడ్వాన్స్డ్ లిక్విడ్ కూల్డ్ ఇంజిన్, ఎక్కువ పవర్ కావాలనుకుంటే గెరిల్లా సరైంది. కాస్త పొట్టిగా ఉన్న వారు, ట్రాఫిక్లో సులువుగా బైక్ నడపాలనుకునే వారు గెరిల్లా 450ను ఎంచుకోవచ్చు. గంభీరమైన శబ్దం, రిలాక్స్డ్ క్రూజింగ్ కావాలనుకునే వారు హార్లేను టెస్ట్ రైడ్ చేయాలి.
చివరిగా చెప్పాలంటే, రాయల్ ఎన్ఫీల్డ్ గెరిల్లా 450 అనేది ఒక పవర్ఫుల్ రోడ్స్టర్, ఇది రైడర్ నుంచి కొంచెం ఎక్కువ ఏకాగ్రతను కోరుకుంటుంది. కానీ అద్భుతమైన థ్రిల్ ఇస్తుంది. హార్లే డేవిడ్సన్ X440S మాత్రం ఒక క్లాసిక్ బైక్. ఇది మిమ్మల్ని ప్రశాంతంగా గమ్యానికి చేరుస్తుంది.