Force e-Traveller: ఫోర్స్‌ మోటార్‌ నుంచి కొత్త ఎలక్ట్రిక్‌ ట్రావెలర్స్‌, అంబులెన్స్‌.. తుది పరీక్షల్లో EVలు

Car Insurance: చిన్న గీత పడినా ఇన్సూరెన్స్‌ క్లెయిం చేస్తున్నారా? 'నో క్లెయిం బోనస్' కోల్పోతే భారీగా నష్టపోతారు! ఈ లెక్కలు చూడండి

Arun Kumar Veera — Thu, 12 Nov 2026 13:01:37 +0530

Car Insurance Claiming: కారు కొనాలంటే బీమా తీసుకోవడం తప్పనిసరి. వాహనానికి ప్రమాదం జరిగినప్పుడు లేదా ఏదైనా నష్టం వాటిల్లినప్పుడు ఆర్థిక భారం తగ్గించుకోవడానికి బీమా ఉపయోగపడుతుంది. అయితే కారు బీమా ఉందని ప్రతి చిన్న రిపేర్‌కూ క్లెయిం చేయడం మంచిదేనా అంటే.. కాదనే చెప్పాలి. ఎందుకంటే చిన్న మొత్తానికి క్లెయిం చేసినా భవిష్యత్తులో వచ్చే ప్రయోజనాలను కోల్పోయే ప్రమాదం ఉంటుంది. ముఖ్యంగా "నో క్లెయిం బోనస్" (NCB) పోతే తదుపరి ఏడాది బీమా ప్రీమియం పెరగొచ్చు. అందుకే ఎప్పుడు క్లెయిం చేయాలి? ఎప్పుడు సొంత డబ్బుతో మరమ్మతులు చేయించుకోవాలి? అనే విషయాలను తెలివిగా ఆలోచించాలి.

'నో క్లెయిం బోనస్' అంటే ఏమిటి?

కారు బీమా పాలసీ తీసుకున్న తర్వాత వరుసగా క్లెయిం చేయకుండా ఉంటే బీమా సంస్థలు నో క్లెయిం బోనస్ అందిస్తాయి. పాలసీని పునరుద్ధరించే సమయంలో ఈ ప్రయోజనం లభిస్తుంది. సాధారణంగా, ఇది సొంత వాహనానికి జరిగే నష్టానికి సంబంధించిన బీమా ప్రీమియంపై తగ్గింపుగా ఉంటుంది. వరుసగా ఐదేళ్ల పాటు క్లెయిం చేయకుండా ఉంటే ఈ తగ్గింపు గరిష్ఠంగా 50 శాతం వరకు చేరొచ్చు. అయితే.. బోనస్ శాతం, నిబంధనలు అనేవి బీమా సంస్థ, పాలసీని బట్టి మారుతాయి.

ఉదాహరణకు, మీ కారు బీమాలో సొంత వాహన నష్టానికి సంబంధించిన ప్రీమియం ఏడాదికి రూ.20,000 అనుకుందాం. మీకు 50 శాతం NCB ఉంటే, రూ.10,000 తగ్గింపు లభిస్తుంది. అంటే ప్రీమియం భారం గణనీయంగా తగ్గుతుంది.

చిన్న క్లెయిం చేస్తే ఎంత నష్టం?

ఇప్పుడు మీ కారుకు చిన్న గీత లేదా డ్యామేజ్‌ జరిగిందని అనుకుందాం. దానిని బాగు చేయించడానికి రూ.5,000 ఖర్చవుతుందని అనుకుందాం. మీ పాలసీలో రూ.2,000 తప్పనిసరి మినహాయింపు మొత్తం ఉంటే, అర్హత కలిగిన క్లెయిం కింద బీమా సంస్థ నుంచి సుమారు రూ.3,000 మాత్రమే రావచ్చు.

ఇది కూడా చదవండి: రెట్రో లుక్‌, మోడ్రన్‌ టచ్‌తో Vespa ఆల్‌-న్యూ ఎలక్ట్రిక్‌ స్కూటర్లు.. బ్యాటరీ కెపాసిటీ, రేంజ్, ఫీచర్ల వివరాలు

అయితే ఈ చిన్న క్లెయిం కారణంగా మీ NCB ప్రయోజనాన్ని కోల్పోయే అవకాశం ఉంది. దాంతో తదుపరి ఏడాది బీమా ప్రీమియం పెరగొచ్చు. ఇక్కడ, మీరు కోల్పోయే తగ్గింపు విలువ.. బీమా కంపెనీ నుంచి వచ్చిన రూ.3,000 కంటే ఎక్కువగా ఉంటే, చిన్న మరమ్మతు కోసం క్లెయిం చేయడం వల్ల ఈ ప్రయోజనం మీకు అందకపోవచ్చు. అందుకే మరమ్మతు ఖర్చుతో పాటు భవిష్యత్తులో కోల్పోయే NCB విలువను కూడా లెక్కించాలి.

క్లెయిం చేసే ముందు ఈ లెక్కలు వేయండి

1. మరమ్మతు ఖర్చు తెలుసుకోండి: ముందుగా, కారు రిపేర్‌ కోసం ఎంత ఖర్చవుతుందో అంచనా వేయించండి. అవసరమైతే బీమా సంస్థను కూడా సంప్రదించండి.

2. మీకు వచ్చే మొత్తం లెక్కించండి: తప్పనిసరి మినహాయింపు, ఇతర వర్తించే తగ్గింపులు పోగా బీమా సంస్థ ఎంత చెల్లిస్తుందో తెలుసుకోండి.

3. NCBపై ప్రభావం తెలుసుకోండి: క్లెయిం చేస్తే ప్రస్తుతం ఉన్న బోనస్‌కు, తదుపరి ఏడాది ప్రీమియంకు ఎలాంటి ప్రభావం ఉంటుందో బీమా సంస్థను అడగండి.

4. అదనపు రక్షణలు పరిశీలించండి: మీ పాలసీలో NCB ప్రొటెక్షన్ వంటి అదనపు సదుపాయాలు ఉన్నాయా? వాటి నిబంధనలు ఏమిటో తెలుసుకోండి. ఈ రక్షణ ఉన్నంత మాత్రాన అన్ని క్లెయింలకు బోనస్ అలాగే ఉంటుందని భావించకూడదు.

ఇది కూడా చదవండి: 55hp పవర్, 63Nm టార్క్‌ ఉన్నా ఈజీ రైడ్‌ ఇచ్చిన Royal Enfield Himalayan 750.. ఫీచర్లు ఎలా ఉపయోగపడ్డాయి?

పెద్ద ప్రమాదాల విషయంలో మాత్రం జాగ్రత్త

చిన్న గీతలు, స్వల్ప మరమ్మతుల కోసం ప్రతిసారీ బీమా క్లెయిం చేయడం ఆర్థికంగా ప్రయోజనకరం కాకపోవచ్చు. కానీ పెద్ద ప్రమాదం జరిగినప్పుడు, మరమ్మతులకు భారీ మొత్తం అవసరమైనప్పుడు బీమా రక్షణను ఉపయోగించుకోవడం ముఖ్యం. మరీ ముఖ్యంగా.. ఇతర వాహనాలకు లేదా వ్యక్తులకు నష్టం జరిగిన సందర్భాల్లో పాలసీ నిబంధనల ప్రకారం వెంటనే బీమా సంస్థకు సమాచారం ఇవ్వాలి.

కచ్చితంగా గుర్తుంచుకోవాల్సిన విషయం ఏమిటంటే.. బీమా ఉన్నంత మాత్రాన ప్రతి చిన్న ఖర్చుకూ డబ్బు తిరిగి పొందాలని భావించకూడదు. ఊహించని భారీ ఆర్థిక నష్టాల నుంచి రక్షణ కల్పించడం కోసం దానిని తెలివిగా ఉపయోగించుకోవాలి.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.

278cc ఇంజిన్, బ్రేంబో బ్రేక్స్, ప్రత్యేక స్టీరింగ్ సిస్టమ్.. Italjet Dragster 300 స్కూటర్‌ స్పెషాలిటీలు ఇవి

Arun Kumar Veera — Thu, 12 Nov 2026 12:43:48 +0530

Italjet Dragster 300 Launch: ఇటలీకి చెందిన ప్రముఖ ద్విచక్ర వాహన తయారీ సంస్థ Italjet భారత మార్కెట్లోకి అడుగుపెట్టేందుకు సిద్ధమవుతోంది. EICMA 2026 ప్రదర్శనలో తన Dragster స్కూటర్ల సిరీస్‌ను ఆవిష్కరించింది. Motohaus కంపెనీతో వ్యూహాత్మక భాగస్వామ్యం ద్వారా భారత్‌లోకి ప్రవేశించనుంది. కోల్హాపూర్‌కు చెందిన Motohaus ఇప్పటికే Brixton మోటార్‌సైకిళ్లు, VLF (Velocifero) వాహనాల పంపిణీ బాధ్యతలు నిర్వహిస్తోంది. ఈ నేపథ్యంలో, 2026 ఇండియా బైక్ వీక్ (IBW) సందర్భంగా Italjet Dragster 300ను భారత్‌లో లాంచ్‌ చేయనున్నారు. త్వరలో మన మార్కెట్‌లోకి రానున్న Italjet Dragster 300 గురించి తెలుసుకోవాల్సిన ఆరు ముఖ్యమైన విషయాలు ఇవే:

1. ఇంజిన్ ఎంత పవర్‌ఫుల్‌?

Italjet Dragster 300లో 278cc లిక్విడ్ కూల్డ్, సింగిల్ సిలిండర్ ఇంజిన్ ఉంటుంది. ఇది 8,250rpm వద్ద 23.8hp గరిష్ఠ శక్తిని, 6,250rpm వద్ద 26Nm టార్క్‌ను ఉత్పత్తి చేస్తుంది. ట్రాన్స్‌మిషన్ విషయానికి వస్తే ఇందులో సాధారణ సెంట్రిఫ్యూగల్ ట్రాన్స్‌మిషన్‌ను అందించారు. కంపెనీకి చెందిన పెద్ద Dragster మోడళ్లలో 6-స్పీడ్ గేర్‌బాక్స్ ఉండగా, ఈ స్కూటర్‌లో మాత్రం ఆ ఏర్పాటు లేదు.

2. సీట్ హైట్, బరువు ఎంత?

ఈ స్కూటర్ సీట్ హైట్ 770mmగా ఉంది. దీంతో వివిధ ఎత్తులున్న రైడర్లు దీన్ని సులభంగా నడిపే అవకాశం ఉంటుంది. దీని బరువు 128 కిలోలు. అలాగే 11 లీటర్ల సామర్థ్యం ఉన్న ఫ్యూయల్ ట్యాంక్‌ను అందించారు. పెర్ఫార్మెన్స్ స్కూటర్ అయినప్పటికీ సీటు ఎత్తు అందరికీ అందుబాటులో ఉండేలా రూపొందించడం ప్రత్యేకత.

ఇది కూడా చదవండి: BMW F 450 GS లో Base నుంచి GS Trophy వరకు నాలుగు వేరియంట్లు.. ఏ వేరియంట్‌ బెటర్‌?

3. ఇతర స్కూటర్లకు భిన్నంగా ఎలా ఉంటుంది?

Italjet Dragster 300లో ప్రత్యేకమైన ఇండిపెండెంట్ స్టీరింగ్ సిస్టమ్ (ISS) ఉంటుంది. ముందు భాగంలో హైడ్రోప్న్యూమాటిక్ సస్పెన్షన్‌ను అందించారు. ఇందులో స్ప్రింగ్‌ను అవసరానికి అనుగుణంగా అడ్జస్ట్ చేసుకునే అవకాశం ఉంది. సాధారణ స్కూటర్లలో కనిపించని ఈ ప్రత్యేకమైన సాంకేతికత దీనిని ఇతర పెర్ఫార్మెన్స్ స్కూటర్ల నుంచి భిన్నంగా నిలుపుతుంది.

ఇక, బయటకు కనిపించే ట్రెల్లిస్ ఫ్రేమ్ దీని డిజైన్‌కు ప్రత్యేక ఆకర్షణగా ఉంటుంది. బ్రేకింగ్ కోసం Brembo సంస్థకు చెందిన పరికరాలను ఉపయోగించారు. ఇవన్నీ కలిపి ఈ స్కూటర్‌కు స్పోర్టీ లుక్‌ను అందిస్తాయి.

4. భారత్‌లో ఎప్పుడు లాంచ్‌ అవుతుంది?

Italjet Dragster 300ను భారత్‌లో 2026 ఇండియా బైక్ వీక్ (IBW) సందర్భంగా విడుదల చేయాలని కంపెనీ ప్రణాళిక రూపొందించింది. మహారాష్ట్రలోని పంచగనిలో డిసెంబర్ 4న జరిగే ఈ కార్యక్రమంలో భారత మార్కెట్‌కు సంబంధించిన ప్రత్యేక వివరాలను వెల్లడించనుంది. ఇందులో ధర, భారత్‌లో అందుబాటులో ఉండే స్పెసిఫికేషన్లు, విక్రయాల ప్రారంభ సమయం వంటి వివరాలు ఉంటాయి.

5. ఎలాంటి ఫీచర్లు ఉన్నాయి?

భద్రత కోసం ఈ స్కూటర్‌లో డ్యూయల్ ఛానల్ ABSను స్టాండర్డ్‌గా అందిస్తున్నారు. అలాగే TFT డిస్‌ప్లే కూడా ఉంటుంది. అదనపు ఫీచర్లుగా యాంటీ థెఫ్ట్ సిస్టమ్, హీటెడ్ గ్రిప్స్‌ను యాక్సెసరీల రూపంలో అందించనున్నారు. అంటే ఇవి అన్ని వేరియంట్లలో ప్రామాణికంగా లభిస్తాయని భావించకూడదు. కొనుగోలు సమయంలో వీటి లభ్యత, ధరను డీలర్ వద్ద తెలుసుకోవాలి.

6. ఏయే రంగుల్లో లభిస్తుంది?

Italjet Dragster 300ను మూడు కలర్ ఆప్షన్లలో అందించనున్నారు. వైట్/ఎల్లో, బ్లాక్/రెడ్ & ఎల్లో/ఆరెంజ్ రంగుల్లో ఈ స్కూటర్ అందుబాటులోకి రానుంది. దీని ప్రత్యేకమైన డిజైన్‌కు ఈ రంగుల కలయిక మరింత ఆకర్షణను తీసుకురానుంది.

Electric Car Sales: భారత EV మార్కెట్‌లో సరికొత్త రికార్డు.. నవంబర్ 9 నాటికే 3.04 లక్షల ఎలక్ట్రిక్ కార్ల విక్రయాలు

Arun Kumar Veera — Thu, 12 Nov 2026 11:51:14 +0530

Electric Car Sales 2026 India: భారత ఎలక్ట్రిక్ ప్యాసింజర్ వాహనాల మార్కెట్‌లో 2026 సంవత్సరం సరికొత్త రికార్డు సృష్టించింది. దేశంలో తొలిసారిగా ఒక క్యాలెండర్ ఏడాదిలో EVల అమ్మకాలు 3 లక్షల యూనిట్ల మార్క్‌ను దాటాయి. Vahan డేటా ప్రకారం, 2026 జనవరి 1 నుంచి నవంబర్ 9 వరకు మొత్తం 3,04,701 ఎలక్ట్రిక్ ప్యాసింజర్ వాహనాలు కస్టమర్లకు డెలివరీ అయ్యాయి. గత ఏడాది కంటే ఇది 66 శాతం వృద్ధి.

2026 క్యాలెండర్ ఏడాది ముగియడానికి ఇంకా 52 రోజులు మిగిలి ఉండగానే, 2025లో నమోదైన 1,95,571 యూనిట్ల అమ్మకాలను ఈ ఏడాది విక్రయాలు దాటేశాయి. గత ఏడాది మొత్తం అమ్మకాల కంటే ప్రస్తుతం 56 శాతం ఎక్కువ వాహనాలు అమ్ముడయ్యాయి. మార్కెట్లో పెరిగిన EV మోడళ్లు, వాస్తవ వినియోగ పరిస్థితుల్లో మెరుగైన రేంజ్, పెట్రోల్ & డీజిల్ వాహనాలతో పోలిస్తే తక్కువ నిర్వహణ ఖర్చులు ఈ వృద్ధికి కారణమని తెలుస్తోంది.

నెలవారీ అమ్మకాల్లో భారీ పెరుగుదల

2026లో ప్రతి నెలా EV అమ్మకాలు గత ఏడాదితో పోలిస్తే మెరుగైన ఫలితాలు సాధించాయి. జనవరిలో 21,568 యూనిట్లు అమ్ముడవగా, ఫిబ్రవరిలో 16,300 యూనిట్లు నమోదయ్యాయి. మార్చిలో అమ్మకాలు 25,502కు చేరాయి.

ఏప్రిల్‌లో 25,984 యూనిట్లు, మేలో 28,416 యూనిట్లు అమ్ముడయ్యాయి. జూన్ నెలలో తొలిసారిగా నెలవారీ EV డెలివరీలు 30,000 మార్క్‌ను దాటి 33,640 యూనిట్లకు చేరాయి. ఆ తర్వాత వరుసగా ఐదు నెలల పాటు నెలవారీ అమ్మకాలు 30,000 యూనిట్లకు పైనే కొనసాగాయి.

జులైలో 34,717 యూనిట్లు, ఆగస్టులో 32,587 యూనిట్లు అమ్ముడయ్యాయి. సెప్టెంబర్‌లో, ఈ ఏడాదిలో ఇప్పటివరకు అత్యధికంగా 38,440 యూనిట్ల విక్రయాలు నమోదయ్యాయి. అక్టోబర్‌లో 37,516 యూనిట్లు అమ్ముడయ్యాయి. నవంబర్ మొదటి తొమ్మిది రోజుల్లోనే మరో 10,031 EVలు డెలివరీ అయ్యాయి.

ఇది కూడా చదవండి: ఫ్యామిలీతో లాంగ్ డ్రైవ్‌కు బెస్ట్ ఎలక్ట్రిక్ SUVలు.. ఒక్కసారి ఛార్జ్‌ చేస్తే 478km వరకు ప్రయాణం!

బ్రాండ్‌ల వారీగా టాటా టాప్

కంపెనీల వారీగా చూస్తే టాటా మోటార్స్ 1,20,895 యూనిట్ల అమ్మకాలతో మొదటి స్థానంలో ఉంది. మొత్తం మార్కెట్లో ఈ సంస్థకు 39.67 శాతం వాటా ఉంది.

మహీంద్రా 69,660 యూనిట్లతో రెండో స్థానంలో నిలిచింది. మార్కెట్ వాటా 22.86 శాతం. MG 56,988 యూనిట్ల అమ్మకాలతో 18.70 శాతం వాటాను సాధించి మూడో స్థానంలో ఉంది.

విన్‌ఫాస్ట్ 15,867 యూనిట్లతో నాలుగో స్థానంలో ఉండగా, మారుతి సుజుకి 12,390 యూనిట్లతో ఐదో స్థానంలో నిలిచింది. వీటి మార్కెట్ వాటాలు వరుసగా 5.20 శాతం & 4.06 శాతం.

కియా 7,612 యూనిట్లు, BYD 6,755 యూనిట్లు, హ్యుందాయ్ 6,013 యూనిట్లు అమ్మగలిగాయి. BMW 4,273 యూనిట్లు, మెర్సిడెస్ బెంజ్ 1,416 యూనిట్లను విక్రయించాయి. టెస్లా సేల్స్‌ 1,153 యూనిట్లుగా ఉన్నాయి.

ఇది కూడా చదవండి: Force e-Traveller: ఫోర్స్‌ మోటార్‌ నుంచి కొత్త ఎలక్ట్రిక్‌ ట్రావెలర్స్‌, అంబులెన్స్‌.. తుది పరీక్షల్లో EVలు

లగ్జరీ కార్ల సేల్స్‌

లగ్జరీ EV విభాగంలో లగ్జరీ EV విభాగంలో BMW తన ఆధిపత్యాన్ని కొనసాగిస్తోంది, 2026లో ఇప్పటివరకు ఈ సంస్థ 4,273 ఎలక్ట్రిక్ కార్లను విక్రయించింది. Mercedes-Benz 1,416 యూనిట్ల అమ్మకాలతో రెండో స్థానంలో ఉంది. టెస్లా మూడో స్థానంలోకి వచ్చింది, ఈ ఏడాది ఇప్పటివరకు 1,153 యూనిట్లను విక్రయించింది. వోల్వో 383 యూనిట్లతో నాలుగో స్థానంలో ఉంది. పోర్షే 83 యూనిట్లు, రోల్స్ రాయిస్ 6 యూనిట్లు, జాగ్వార్ ల్యాండ్ రోవర్ 4 యూనిట్లు, లోటస్ 3 యూనిట్లు & ఆడి 2 యూనిట్ల అమ్మకాలు నమోదు చేశాయి.

రెట్రో లుక్‌, మోడ్రన్‌ టచ్‌తో Vespa ఆల్‌-న్యూ ఎలక్ట్రిక్‌ స్కూటర్లు.. బ్యాటరీ కెపాసిటీ, రేంజ్, ఫీచర్ల వివరాలు

Arun Kumar Veera — Thu, 12 Nov 2026 11:14:21 +0530

Vespa New Electric Scooters: పాపులర్‌ టూవీలర్‌ కంపెనీ Vespa, ప్రపంచ మార్కెట్లో కొత్త ఎలక్ట్రిక్ స్కూటర్ సిరీస్‌ను పరిచయం చేసింది. తనకంటూ ప్రత్యేక గుర్తింపు తెచ్చుకున్న రెట్రో డిజైన్‌ను కొనసాగిస్తూనే, కొత్త ఎలక్ట్రిక్ పవర్‌ట్రెయిన్‌తో ఈ స్కూటర్లను తీసుకొచ్చింది. మొత్తం మూడు మోడళ్లతో ఈ కొత్త సిరీస్‌ను అందుబాటులోకి తీసుకొచ్చింది, అవి - Sprint S, Primavera & Primavera Tech. వీటిలో రెండు మోడళ్లకు 2.3kWh బ్యాటరీ ప్యాక్ ఇవ్వగా, టాప్ మోడల్ Primavera Techలో పెద్ద 4.2kWh బ్యాటరీని అందించారు. ఈ టాప్ వేరియంట్ ఒక్కసారి ఛార్జ్ చేస్తే 80 కి.మీ. వరకు ప్రయాణిస్తుందని కంపెనీ చెబుతోంది.

రెట్రో డిజైన్‌తో ఎలక్ట్రిక్ పవర్‌ట్రెయిన్

Vespa కొత్త ఎలక్ట్రిక్ స్కూటర్లు, ఆ కంపెనీకి ప్రత్యేక గుర్తింపు అయిన రెట్రో డిజైన్ స్టైల్‌ను కొనసాగించాయి. పెట్రోల్ వెర్షన్లతో పోలిస్తే ఎగ్జాస్ట్ లేకపోవడమే ప్రధానమైన తేడా. ఈ మూడు స్కూటర్లలోనూ మోనోకాక్ ఛాసిస్‌ను ఉపయోగించారు. అలాగే ICE మోడళ్లలో కనిపించే ట్రైలింగ్ లింక్ ఫ్రంట్ సస్పెన్షన్‌ను కొనసాగించారు.

Sprint S & Primavera మోడళ్లలో 2.3kWh కెపాసిటీ గల రిమూవబుల్‌ బ్యాటరీ ప్యాక్ ఉంటుంది. వీటిలో 3.1kW మోటార్‌ అమర్చారు. ఇది 2.7kW నిరంతర శక్తిని అందిస్తుంది. గరిష్ఠ టార్క్ 200Nmగా ఉంది. ఈ రెండు స్కూటర్ల గరిష్ఠ వేగం గంటకు 45 కి.మీ. ఒక్కసారి ఛార్జ్ చేస్తే, WMTC ప్రమాణాల ప్రకారం, 68 కి.మీ. ప్రయాణించవచ్చు.

500W ఛార్జర్‌తో బ్యాటరీని 0 నుంచి 80 శాతం వరకు ఛార్జ్ చేయడానికి సుమారు నాలుగు గంటలు పడుతుందని కంపెనీ వెల్లడించింది. బ్యాటరీ అమర్చిన తర్వాత ఈ రెండు స్కూటర్ల బరువు 111 కిలోలు.

ఇది కూడా చదవండి: TVS RTR 125 LC Bike: టీవీఎస్‌ నుంచి నాలుగు కొత్త టూవీలర్లు.. వాటిలో మూడు ఎలక్ట్రిక్ స్కూటర్లే

Primavera Techలో పెద్ద బ్యాటరీ

ఈ కొత్త సిరీస్‌లో Primavera Tech టాప్ మోడల్‌గా నిలుస్తుంది. ఇందులో 4.2kWh బ్యాటరీ ప్యాక్‌ను అందించారు. దీని మోటార్ 3.6kW నిరంతర శక్తిని ఉత్పత్తి చేస్తుంది. పెద్ద బ్యాటరీ కారణంగా WMTC ప్రమాణాల ప్రకారం 80 కి.మీ. రేంజ్ అందిస్తుందని కంపెనీ పేర్కొంది.

ఫీచర్ల విషయానికి వస్తే.. Primavera Techలో 4.3 అంగుళాల TFT డిస్‌ప్లే ఉంటుంది. దీనికి స్మార్ట్‌ఫోన్ కనెక్టివిటీ, టర్న్ బై టర్న్ నావిగేషన్ సదుపాయాలు ఉన్నాయి. నావిగేషన్ సేవలు మొదటి మూడు సంవత్సరాలు ఉచితంగా లభిస్తాయి. ఆ తర్వాత వాటిని కొనసాగించాలంటే రెన్యువల్ చేసుకోవాల్సి ఉంటుంది. కీ లెస్ ఇగ్నిషన్, ఫైండ్‌ మై స్కూటర్‌ ఫీచర్ కూడా ఉన్నాయి. రైడర్ అవసరానికి అనుగుణంగా Eco & Power అనే రెండు రైడింగ్ మోడ్‌లను ఎంచుకోవచ్చు. ఈ స్కూటర్ బరువు 130 కిలోలు.

మూడు మోడళ్లలోనూ సాధారణ ఫీచర్లు

ఈ మూడు ఎలక్ట్రిక్ స్కూటర్లలోనూ Vespa ప్రత్యేక డిజైన్‌తో పాటు ఆల్ LED లైటింగ్‌ అందించారు. వీటికి 12/11 వీల్ సెటప్ ఉంది. ముందు భాగంలో 110 సెక్షన్, వెనుక భాగంలో 120 సెక్షన్ టైర్లను అమర్చారు. బ్రేకింగ్ కోసం ముందు 200mm డిస్క్, వెనుక 140mm డ్రమ్ బ్రేక్ ఇచ్చారు. అయితే Primavera Techలో అదనంగా సింగిల్ ఛానల్ ABS అందించారు.

ఇది కూడా చదవండి: గత నెలలో ఈ కార్ల కోసం జనం క్యూ కట్టారు.. టాప్ 10 లిస్ట్‌లో 7 మోడళ్లు మారుతి సుజుకీవే

భారత్‌లో లాంచ్ ఎప్పుడంటే?

ప్రస్తుతం Vespa భారత్‌లో 125, S వంటి పెట్రోల్ స్కూటర్లను విక్రయిస్తోంది. అయితే ఈ కొత్త ఎలక్ట్రిక్ స్కూటర్లను భారత మార్కెట్లో విడుదల చేసే విషయంపై కంపెనీ ఇప్పటివరకు అధికారిక ప్రకటన చేయలేదు. ఒకవేళ వీటిని భారత్‌కు తీసుకొస్తే.. డిజైన్, నిర్మాణ శైలి పరంగా Bajaj Chetak శ్రేణికి గట్టి పోటీ ఇవ్వవచ్చు. అంతేకాదు.. Hero, TVS, Honda, Suzuki వంటి సంప్రదాయ ద్విచక్ర వాహన సంస్థల ఎలక్ట్రిక్ స్కూటర్లతో పాటు Ather, River వంటి స్టార్టప్ కంపెనీల మోడళ్లతోనూ పోటీ పడాల్సి ఉంటుంది.

55hp పవర్, 63Nm టార్క్‌ ఉన్నా ఈజీ రైడ్‌ ఇచ్చిన Royal Enfield Himalayan 750.. ఫీచర్లు ఎలా ఉపయోగపడ్డాయి?

Arun Kumar Veera — Thu, 12 Nov 2026 10:47:23 +0530

Royal Enfield Himalayan 750 Details: రాయల్‌ ఎన్‌ఫీల్డ్‌ చరిత్రలో అతి ఎక్కువ పవర్‌ ఉన్న బైక్‌గా Himalayan 750 నిలిచింది. కొత్త ఇంజిన్‌తో పాటు పూర్తిగా కొత్త ఛాసిస్‌ను అభివృద్ధి చేసి Himalayan 750ని ఈ కంపెనీ తీసుకొచ్చింది. ఈ బండిని నడిపిన ఎక్స్‌పర్ట్‌లు.. ప్లస్‌లు, మైనస్‌లను రిపోర్ట్‌ చేశారు.

బరువు, సీటింగ్ పొజిషన్

Himalayan 750 కెర్బ్ వెయిట్ 224kg. Royal Enfield Classic, Bullet, Super Meteor 650 మోడళ్ల బరువు 240 కిలోల కంటే ఎక్కువగా ఉంటుంది. ఈ నేపథ్యంలో 750 బరువు ఆకట్టుకుంటుంది. అయినప్పటికీ Honda Transalp 750 కంటే ఇది సుమారు 8 కిలోలు ఎక్కువ.

Himalayan 750 సీటు ఎత్తు 815mm. Himalayan 450 కంటే దాదాపు 30 కిలోలు ఎక్కువ బరువు ఉన్నప్పటికీ, పార్కింగ్ వేగంతో నడిపేటప్పుడు కొందరు తక్కువ ఎత్తు ఉన్న రైడర్లకు దీనిని హ్యాండిల్‌ చేయడం ఈజీగా అనిపించింది. ఫ్యూయల్ ట్యాంక్ దగ్గర సీటు సన్నగా ఉండటం వల్ల కాళ్లు నేలకు సులభంగా అందుతాయి. బరువు కూడా కిందికి ఉన్నట్లు అనిపిస్తుంది.

సీటు ఎత్తును అడ్జస్ట్ చేసే సదుపాయం లేదు. అయితే కంపెనీ 20mm తక్కువ & 20mm ఎక్కువ ఎత్తు కలిగిన సీట్లను యాక్సెసరీలుగా అందించనుంది. స్టాండర్డ్ సీటు కూడా చాలా సౌకర్యంగా ఉంటుంది. వెడల్పైన హ్యాండిల్‌బార్ వల్ల రైడర్ పైభాగం సహజమైన పొజిషన్‌లో ఉంటుంది.

ఇంజిన్, పనితీరు

Himalayan 750లో 743cc ప్యారలల్ ట్విన్ ఇంజిన్ ఉంది. బోర్‌ను పెంచడం ద్వారా ఈ ఇంజిన్‌ను అభివృద్ధి చేసినట్లు కంపెనీ తెలిపింది. ఇది దాదాపు 90 శాతం కొత్త ఇంజిన్. ఇందులో ride-by-wire థ్రోటిల్, కొత్త ఆయిల్ కూలింగ్ సిస్టమ్, కొత్త ఎయిర్ ఇన్‌టేక్ డిజైన్, ప్లేటెడ్ సిలిండర్ బోర్లు, హై పవర్ ఆల్టర్నేటర్ ఉన్నాయి. అలాగే 3 నుంచి 6 గేర్ల వరకు గేరింగ్‌ను మార్చారు.

ఈ ఇంజిన్ 55hp పవర్ & 63Nm టార్క్ ఉత్పత్తి చేస్తుంది. 650 ఇంజిన్‌తో పోలిస్తే పవర్, టార్క్ పెరిగాయి. అయితే రైడింగ్‌లో ప్రధానంగా రెండు మార్పులు కనిపిస్తాయి. ఇంజిన్ నుంచి వచ్చే సౌండ్ మరింత డీప్‌గా, ఆకర్షణీయంగా ఉంటుంది. మరో ముఖ్యమైన మార్పు పవర్ డెలివరీలో కనిపిస్తుంది.

గేరింగ్ వల్ల హైవేపై రైడింగ్ కూడా సౌకర్యంగా ఉంటుంది. 120kph వేగంతో ప్రయాణిస్తున్నప్పుడు ఇంజిన్ 5,000rpm కంటే కొద్దిగా తక్కువ వద్ద పనిచేస్తుంది. తక్కువ rpm వద్ద థ్రోటిల్ స్పందన చాలా స్మూత్‌గా ఉంటుంది. సిటీ ట్రాఫిక్‌లోనూ ఇంజిన్‌ను సులభంగా ఉపయోగించవచ్చు. అయితే 2వ గేర్ నుంచి 3వ గేర్‌కు మారేటప్పుడు కొంత గ్యాప్ అనిపిస్తుంది.

ఇది కూడా చదవండి: Kawasaki Z650 కంటే రూ.33,000 అదనపు ధరకు Kawasaki Z650 Sలో ఏం ఉంది? రెండు మోడళ్ల కంపారిజన్‌

హ్యాండ్లింగ్, సస్పెన్షన్

Himalayan 750లో 19-అంగుళాల ఫ్రంట్ వీల్ ఉంది. దీంతో ఈ బైక్ 450 కంటే ఎక్కువగా రోడ్ రైడింగ్‌కు అనుకూలంగా ఉంటుంది. కొన్ని కలర్ ఆప్షన్లలో క్రాస్ స్పోక్ వీల్స్ కూడా అందుబాటులో ఉంటాయి.

బైక్ హ్యాండ్లింగ్ నియంత్రణలో, వేగంగా స్పందించేలా & ఊహించిన విధంగా ఉంటుంది. పెద్ద బైక్ నడుపుతున్నామనే భావన ఉన్నప్పటికీ, బరువు ఎక్కువగా ఇబ్బంది పెట్టదు. కార్నర్లలోకి తిప్పడం కూడా సులభంగా ఉంటుంది. బైక్ నిటారుగా ఉన్న స్థితి నుంచి పూర్తిగా లీన్ అయ్యే వరకు క్రమంగా, నమ్మకంగా స్పందిస్తుంది.

ఎక్కువ లీన్ యాంగిల్‌లోనూ ఫుట్‌పెగ్స్ రోడ్డుకు తగలవు. టైర్లు మంచి గ్రిప్ అందిస్తాయి. స్పోక్ వీల్స్‌పై ఉన్న Vredestein బ్లాక్ ప్యాటర్న్ టైర్లు, అల్లాయ్ వీల్స్‌పై ఉన్న Ceat టైర్ల కంటే మెరుగైన గ్రిప్ ఇచ్చాయి.

బ్రేకింగ్ విషయంలో మాత్రం బైక్ బరువు, ఇనర్షియా కొంత తెలుస్తాయి. ట్విన్ డిస్క్ బ్రేక్ సెటప్ పని బాగానే చేసినప్పటికీ, ప్రారంభ బ్రేక్ బైట్ కొంత తక్కువగా ఉంటుంది. బలమైన బ్రేకింగ్ కోసం లివర్‌ను గట్టిగా నొక్కాల్సి వస్తుంది.

ఆఫ్-రోడ్ సామర్థ్యం

ఈ బైక్ ప్రధానంగా మెయిన్‌ రోడ్ రైడింగ్‌కే అనుకూలంగా ఉన్నప్పటికీ, తేలికపాటి ఆఫ్-రోడ్ ట్రయల్స్‌పైనా సరదాగా నడపవచ్చు. ముందు, వెనుక సస్పెన్షన్ ట్రావెల్ వరుసగా 190mm & 175mm. గ్రౌండ్ క్లియరెన్స్ 205mmగా ఉంది.

నిలబడి రైడ్ చేయడానికి అవసరమైన ఎర్గోనామిక్స్ బాగున్నాయి. టార్కీ ఇంజిన్ వల్ల వెనుక చక్రానికి మంచి డ్రైవ్ లభిస్తుంది. అవసరమైతే వెనుక టైర్‌ను సులభంగా స్పిన్ చేయవచ్చు. బరువు పెద్ద సమస్యగా అనిపించకపోయినా, సస్పెన్షన్ కొంత గట్టిగా ఉండటం వల్ల 450 మాదిరిగా వేగంగా ఆఫ్-రోడ్‌లో నడపాలనిపించదు. అయినప్పటికీ ట్రయల్స్‌ను పూర్తిగా దూరం పెట్టాల్సిన అవసరం లేదు.

ఫీచర్లు, టెక్నాలజీ

Himalayan 750 డిజైన్‌లో Royal Enfield తనకు ప్రత్యేకమైన రూపాన్ని కొనసాగించింది. దగ్గరగా పరిశీలిస్తే బైక్ ఫినిషింగ్ కూడా ఆకట్టుకుంటుంది. రౌండ్ LED హెడ్‌ల్యాంప్ చూడటానికి పరిచయమైన డిజైన్‌లో ఉన్నప్పటికీ, ఇది కొత్త జనరేషన్ యూనిట్. హై బీమ్ & లో బీమ్ రెండింటిలోనూ మెరుగైన వెలుతురు తీవ్రత, విస్తృత కాంతిని అందిస్తుందని కంపెనీ తెలిపింది.

ఇందులో 4-అంగుళాల రౌండ్ TFT డిస్‌ప్లే ఉంది. ఇది Himalayan 450లో ఉన్న డిస్‌ప్లేనే అయినప్పటికీ, 750లో అదనపు ఫీచర్లు ఉన్నాయి. ఎడమవైపు ఉన్న 5-వే టోగుల్ బటన్‌ను కూడా అప్‌డేట్ చేశారు. కొత్త బటన్ ఉపయోగించడానికి మరింత కచ్చితంగా ఉంటుంది. అయితే UIలో ఇంకా మెరుగుదలకు అవకాశం ఉంది. రైడింగ్ మోడ్స్‌లో సెట్టింగులను మార్చడం కొంత క్లిష్టంగా అనిపించింది.

ఈ బైక్‌లో 5 రైడింగ్ మోడ్స్ ఉన్నాయి. వీటితో పాటు క్రూయిజ్ కంట్రోల్, TPMS, లీన్ సెన్సిటివ్ ABS & ట్రాక్షన్ కంట్రోల్ వంటి ఫీచర్లు ఉన్నాయి. Heated Gripsను యాక్సెసరీగా పొందవచ్చు. అంతేకాకుండా ఇన్‌బిల్ట్ 4G SIM ద్వారా geofencing & వెహికల్ ట్రాకింగ్ వంటి ఫీచర్లు కూడా అందుబాటులో ఉంటాయి.

లోపాలు

లోపాల విషయానికి వస్తే, రైడింగ్ మోడ్స్ సంఖ్య ఎక్కువగా ఉన్నప్పటికీ వాటి మధ్య తేడా పెద్దగా కనిపించదు. Ambient temperature డిస్‌ప్లే కూడా కచ్చితంగా పనిచేయలేదని ఎక్స్‌పర్ట్‌లు గుర్తించారు. ముఖ్యంగా quickshifter లేకపోవడం లోటుగా అనిపించింది. ఆ ఫీచర్ ఉంటే రైడింగ్ అనుభవం మరింత మెరుగయ్యేదని అభిప్రాయం వ్యక్తమైంది.

లాంచ్, ధర అంచనా

Royal Enfield Himalayan 750ను నవంబర్ చివర్లో జరిగే MotoVerse ఫెస్టివల్‌లో లాంచ్ చేయనున్నారు. ధరపై ఇంకా స్పష్టత లేదు. అయితే 40 శాతం GST కారణంగా ధర ఆకర్షణీయంగా ఉండకపోవచ్చని ఎక్స్‌పర్ట్‌లు భావిస్తున్నారు. ఈ బైక్ ధరను రూ.5 లక్షల లోపు నిర్ణయిస్తే, ప్రీమియం అయినప్పటికీ అందుబాటులో ఉండే అడ్వెంచర్ టూరర్‌గా నిలిచే అవకాశం ఉంది.

TVS RTR 125 LC Bike: టీవీఎస్‌ నుంచి నాలుగు కొత్త టూవీలర్లు.. వాటిలో మూడు ఎలక్ట్రిక్ స్కూటర్లే

Arun Kumar Veera — Thu, 12 Nov 2026 09:22:04 +0530

TVS RTR 125 LC Details: టీవీఎస్‌ కంపెనీ, EICMA 2026లో నాలుగు కొత్త ఉత్పత్తులను ఆవిష్కరించింది. వీటిలో కొత్త RTR 125 LC మోటార్‌సైకిల్ ప్రత్యేక ఆకర్షణగా నిలిచింది. దీనితో పాటు యూరప్ మార్కెట్ కోసం Orbiter, X & M1S అనే మూడు ఎలక్ట్రిక్ స్కూటర్లను కూడా పరిచయం చేసింది. ఈ నాలుగు వాహనాల్లో.. Orbiter, X ఇప్పటికే భారత్‌లో అందుబాటులో ఉన్నాయి. అయితే యూరప్ మార్కెట్ కోసం X స్కూటర్‌లో వీల్ సెటప్‌ను మార్చారు. RTR 125 LC & M1S మోడళ్లను భారత్‌లో కూడా విడుదల చేసే అవకాశం ఉందని భావిస్తున్నప్పటికీ, కంపెనీ నుంచి ఇప్పటివరకు అలాంటి అధికారిక సంకేతాలు లేవు.

TVS RTR 125 LC: ఇంజిన్, పవర్ వివరాలు

కొత్త TVS RTR 125 LCలో 125cc సింగిల్ సిలిండర్ లిక్విడ్ కూల్డ్ ఇంజిన్‌ను అందించారు. ఈ ఇంజిన్ 9,000rpm వద్ద 14.7hp పవర్‌ను, 7,000rpm వద్ద 12Nm టార్క్‌ను ఉత్పత్తి చేస్తుంది. దీనికి 6-స్పీడ్ గేర్‌బాక్స్ ఉంది. స్లిప్ & అసిస్ట్ క్లచ్ కూడా ఉంది. ఈ బైక్ కోసం కొత్త ట్యూబ్యులర్ ట్రెల్లిస్ ఫ్రేమ్‌ను రూపొందించారు. కాస్ట్ స్వింగార్మ్‌ను కూడా కొత్తగా అందించారు.

సస్పెన్షన్ బాధ్యతలను KYB నిర్వహిస్తుంది. ముందు భాగంలో 41mm USD ఫోర్క్, వెనుక భాగంలో మోనోషాక్ ఉన్నాయి. టైర్ల విషయానికి వస్తే ముందు 100/80-17 టైర్, వెనుక 140/70R17 టైర్‌ను ఉపయోగించారు.

బ్రేకింగ్ కోసం Bybre బ్రేక్‌లను అందించారు. ముందు భాగంలో 300mm డిస్క్, వెనుక భాగంలో 240mm డిస్క్ ఉన్నాయి. భద్రత కోసం డ్యూయల్ ఛానల్ ABS స్టాండర్డ్‌గా వస్తుంది.

ఇది కూడా చదవండి: Honda CBR1000RR-R Fireblade: 2026, 2027 మోడళ్ల మధ్య తేడాలేంటి? కొత్తగా ఏ మారింది?

టెక్నాలజీ ఫీచర్లకు ప్రాధాన్యం

TVS ఈ RTR 125 LCని కొత్తగా బైక్ నడపడం ప్రారంభించే A1 లైసెన్స్ హోల్డర్లను దృష్టిలో పెట్టుకుని రూపొందించినట్లు కనిపిస్తోంది. ఇందులో టెక్నాలజీ ఫీచర్లకు ఎక్కువ ప్రాధాన్యం ఇచ్చారు. బైక్‌లో 5-అంగుళాల TFT డిస్‌ప్లే స్టాండర్డ్‌గా లభిస్తుంది. ఇందులో ఫుల్ స్క్రీన్ మ్యాప్ మిర్రరింగ్ సదుపాయం ఉంది. రైడింగ్ మోడ్‌లు కూడా అందించారు. వీటితో పాటు బ్లూటూత్‌ & స్మార్ట్‌ఫోన్ కనెక్టివిటీ ఫీచర్లు ఉన్నాయి.

యూరప్ కోసం మూడు ఎలక్ట్రిక్ స్కూటర్లు

RTR 125 LCతో పాటు TVS తన మూడు ఎలక్ట్రిక్ స్కూటర్లను కూడా యూరప్ మార్కెట్‌కు పరిచయం చేసింది. అవి Orbiter, X & M1S.

Orbiter స్కూటర్‌లో భారత్‌లో అందుబాటులో ఉన్న వెర్షన్‌తో పోలిస్తే ఎలాంటి మార్పులు చేయలేదు. X స్కూటర్‌లో మాత్రం కీలక మార్పు ఉంది. భారత్‌లో ఈ మోడల్‌కు 12-అంగుళాల వీల్స్ ఉండగా, యూరప్ వెర్షన్‌లో 14-అంగుళాల వీల్స్‌ను అందించారు.

M1S స్కూటర్ మాత్రం ప్రస్తుతం భారత్‌లో అందుబాటులో లేదు. ఇందులో 4.2kWh బ్యాటరీ ఉంటుంది. దీని మోటార్ గరిష్ఠంగా 12.5kW పవర్‌ను ఉత్పత్తి చేయగలదు. WMTC పరీక్షా విధానం ప్రకారం ఈ స్కూటర్ 120km రేంజ్‌ను అందిస్తుంది.

ఇది కూడా చదవండి: జనం ఎక్కువగా కొంటున్నది ఈ కంపెనీ ఎలక్ట్రిక్ స్కూటర్లనే.. అక్టోబర్‌లో రెట్టింపు అమ్మకాలు!

ధరలు, లాంచింగ్‌ టైమ్‌

ఈ నాలుగు కొత్త ఉత్పత్తుల ధరలను TVS ఇంకా ప్రకటించలేదు. వీటి లాంచ్‌ తేదీలపై కూడా కంపెనీ స్పష్టత ఇవ్వలేదు. ఒకవేళ RTR 125 LC భారత్‌లో ల్యాండ్‌ అయితే.. ఇందులో ఉన్న అధునాతన ఫీచర్ల కారణంగా TVS బైక్ లైనప్‌లో ఇది ఎక్కువ ధర పలికే అవకాశం ఉంది.

Best Selling Cars: గత నెలలో ఈ కార్ల కోసం జనం క్యూ కట్టారు.. టాప్ 10 లిస్ట్‌లో 7 మోడళ్లు మారుతి సుజుకీవే

Arun Kumar Veera — Thu, 12 Nov 2026 08:34:52 +0530

Most Selling Cars October 2026: భారత కార్ల మార్కెట్లో అక్టోబర్ 2026 అమ్మకాల గణాంకాలు ఆసక్తికరంగా ఉన్నాయి. ఈ నెలలో అత్యధికంగా అమ్ముడైన టాప్ 10 కార్ల జాబితాలో మారుతి సుజుకి ఆధిపత్యం కొనసాగించింది. మొత్తం 10 స్థానాల్లో ఏడు స్థానాలను మారుతి సుజుకి మోడళ్లే దక్కించుకున్నాయి. టాటా మోటార్స్ నుంచి రెండు కార్లు, మహీంద్రా నుంచి ఒక కారు ఈ జాబితాలో చోటు సంపాదించాయి.

అక్టోబర్‌ 2026 సేల్స్‌ లిస్ట్‌లో, Maruti Suzuki Wagon R మొదటి స్థానంలో నిలిచింది. Maruti Suzuki Brezza అత్యధిక వార్షిక వృద్ధిని నమోదు చేసింది. నెలవారీ అమ్మకాల పెరుగుదలలో Maruti Ertiga అగ్రస్థానంలో నిలిచింది. సెప్టెంబర్‌తో పోలిస్తే ఈ కారు అమ్మకాలు ఏకంగా 86.97 శాతం పెరిగాయి.

అక్టోబర్ 2026 టాప్ 10 కార్ల జాబితా

1. Maruti Suzuki Wagon R

అమ్మకాలు: 23,747 యూనిట్లు

అక్టోబర్ 2026లో Maruti Suzuki Wagon R మొదటి స్థానాన్ని దక్కించుకుంది. సెప్టెంబర్‌లో 18,835 యూనిట్లు అమ్ముడవగా, అక్టోబర్‌లో 23,747 యూనిట్లకు చేరాయి. గత ఏడాది అక్టోబర్‌లో అమ్ముడైన 18,970 యూనిట్లతో పోలిస్తే వార్షిక వృద్ధి 25.18 శాతంగా ఉంది. నెలవారీ ‍‌(సెప్టెంబర్‌తో పోలిస్తే) అమ్మకాల వృద్ధి 26.08 శాతంగా నమోదైంది.

2. Maruti Suzuki Brezza

అమ్మకాలు: 22,436 యూనిట్లు

రెండో స్థానంలో Maruti Suzuki Brezza నిలిచింది. అక్టోబర్‌లో 22,436 యూనిట్లు అమ్ముడయ్యాయి. గత ఏడాది ఇదే నెలలో 12,072 యూనిట్లు మాత్రమే అమ్ముడయ్యాయి. దీంతో వార్షిక వృద్ధి ఏకంగా 85.85 శాతంగా నమోదైంది. ఈ జాబితాలో ఇదే అత్యధిక YoY వృద్ధి. సెప్టెంబర్‌తో పోలిస్తే మాత్రం అమ్మకాలు 43.04 శాతం పెరిగాయి.

3. Tata Nexon

అమ్మకాలు: 21,966 యూనిట్లు

Tata Nexon మూడో స్థానం సాధించింది. అక్టోబర్‌లో 21,966 యూనిట్లు అమ్ముడయ్యాయి. సెప్టెంబర్‌లో 20,456 యూనిట్లు అమ్ముడవగా, నెలవారీ వృద్ధి 7.38 శాతంగా నమోదైంది. అయితే గత ఏడాది అక్టోబర్‌లో అమ్ముడైన 22,083 యూనిట్లతో పోలిస్తే అమ్మకాలు 0.53 శాతం తగ్గాయి.

ఇది కూడా చదవండి: Volkswagen కారు కొనండి లేదా ఎక్సేంజ్‌ చేయండి.. Tiguan మీద రూ.6 లక్షలు, Taigun మీద రూ.2.7 లక్షల వరకు ఆఫర్లు!

4. Maruti Suzuki Baleno

అమ్మకాలు: 20,919 యూనిట్లు

నాలుగో స్థానంలో Maruti Suzuki Baleno నిలిచింది. అక్టోబర్‌లో 20,919 యూనిట్లు అమ్ముడయ్యాయి. సెప్టెంబర్‌లో 25,392 యూనిట్లు అమ్ముడవడంతో పోలిస్తే నెలవారీ అమ్మకాలు 17.62 శాతం తగ్గాయి. అయితే గత ఏడాది అక్టోబర్‌తో పోలిస్తే 23.98 శాతం వార్షిక వృద్ధి నమోదైంది.

5. Maruti Suzuki Dzire

అమ్మకాలు: 20,649 యూనిట్లు

Maruti Suzuki Dzire ఐదో స్థానంలోకి వచ్చి ఆగింది. అక్టోబర్‌లో 20,649 యూనిట్లు అమ్ముడయ్యాయి. సెప్టెంబర్‌లో 17,754 యూనిట్లు అమ్ముడవగా, నెలవారీ వృద్ధి 16.31 శాతంగా ఉంది. గత ఏడాది అక్టోబర్‌లో 20,791 యూనిట్లు అమ్ముడయ్యాయి. దీంతో వార్షికంగా 0.68 శాతం తగ్గుదల నమోదైంది.

6. Maruti Suzuki Ertiga

అమ్మకాలు: 20,641 యూనిట్లు

Maruti Suzuki Ertiga ఆరో స్థానంలో దక్కించుకుంది. అక్టోబర్‌లో 20,641 యూనిట్లు అమ్ముడయ్యాయి. సెప్టెంబర్‌లో 11,040 యూనిట్లు మాత్రమే అమ్ముడవడంతో పోలిస్తే నెలవారీ వృద్ధి 86.97 శాతంగా నమోదైంది. టాప్ 10 జాబితాలో ఇదే అత్యధిక MoM వృద్ధి. గత ఏడాది అక్టోబర్‌తో పోలిస్తే అమ్మకాలు 2.76 శాతం పెరిగాయి.

7. Tata Punch

అమ్మకాలు: 20,525 యూనిట్లు

ఏడో స్థానంలో Tata Punch ఉంది. అక్టోబర్‌లో 20,525 యూనిట్లు అమ్ముడయ్యాయి. సెప్టెంబర్‌లో 20,333 యూనిట్లు అమ్ముడవడంతో పోలిస్తే 0.94 శాతం నెలవారీ వృద్ధి నమోదైంది. గత ఏడాది అక్టోబర్‌లోని 16,810 యూనిట్లతో పోలిస్తే అమ్మకాలు 22.10 శాతం పెరిగాయి.

8. Maruti Suzuki Fronx

అమ్మకాలు: 20,014 యూనిట్లు

ఎనిమిదో స్థానంలో Maruti Suzuki Fronx నిలిచింది. అక్టోబర్‌లో 20,014 యూనిట్లు అమ్ముడయ్యాయి. సెప్టెంబర్‌లో 19,282 యూనిట్లు అమ్ముడవగా, నెలవారీ వృద్ధి 3.80 శాతంగా ఉంది. గత ఏడాది అక్టోబర్‌తో పోలిస్తే 17.71 శాతం వార్షిక వృద్ధి నమోదైంది.

9. Mahindra Scorpio

అమ్మకాలు: 19,353 యూనిట్లు

Mahindra Scorpioది తొమ్మిదో స్థానం. అక్టోబర్‌లో 19,353 యూనిట్లు అమ్ముడయ్యాయి. సెప్టెంబర్‌లో 17,313 యూనిట్లు అమ్ముడవడంతో పోలిస్తే 11.78 శాతం నెలవారీ వృద్ధి నమోదైంది. గత ఏడాది అక్టోబర్‌లో అమ్ముడైన 17,880 యూనిట్లతో పోలిస్తే 8.24 శాతం పెరుగుదల కనిపించింది.

10. Maruti Suzuki Swift

అమ్మకాలు: 18,866 యూనిట్లు

టాప్ 10 జాబితాలో చివరి ప్లేస్‌లో Maruti Suzuki Swift ఉంది. అక్టోబర్‌లో 18,866 యూనిట్లు అమ్ముడయ్యాయి. సెప్టెంబర్‌లోని 17,399 యూనిట్లతో పోలిస్తే 8.43 శాతం నెలవారీ వృద్ధి నమోదైంది. గత ఏడాది అక్టోబర్‌లో అమ్ముడైన 15,542 యూనిట్లతో పోలిస్తే వార్షిక వృద్ధి 21.39 శాతంగా ఉంది.

మొత్తం అమ్మకాల్లోనూ భారీ వృద్ధి

టాప్ 10 కార్ల మొత్తం అమ్మకాలు అక్టోబర్ 2026లో 2,09,116 యూనిట్లకు చేరాయి. సెప్టెంబర్‌లో ఇవి 1,83,489 యూనిట్లుగా ఉన్నాయి. దీంతో నెలవారీ వృద్ధి 13.97 శాతంగా నమోదైంది. గత ఏడాది అక్టోబర్‌లోని 1,78,111 యూనిట్లతో పోలిస్తే ఈసారి మొత్తం అమ్మకాలు 17.41 శాతం పెరిగాయి.

Volkswagen కారు కొనండి లేదా ఎక్సేంజ్‌ చేయండి.. Tiguan మీద రూ.6 లక్షలు, Taigun మీద రూ.2.7 లక్షల వరకు ఆఫర్లు!

Arun Kumar Veera — Thu, 12 Nov 2026 06:01:47 +0530

Volkswagen Discounts November 2026: వోక్స్‌వ్యాగన్‌ కంపెనీ తన కార్లపై భారీ డిస్కౌంట్లు ప్రకటించింది. Taigun, Virtus, Tiguan R-Line & Tayron మోడళ్లపై ఆకర్షణీయమైన ప్రయోజనాలు అందిస్తోంది. మోడల్, వేరియంట్, తయారీ సంవత్సరం ఆధారంగా ఈ ఆఫర్లు మారతాయి. క్యాష్‌ డిస్కౌంట్‌తో పాటు ఎక్స్ఛేంజ్ బెనిఫిట్స్, లాయల్టీ రివార్డులు, కార్పొరేట్ ఆఫర్లు కూడా ఉన్నాయి. Tiguan R-Lineపై అత్యధికంగా రూ.6 లక్షల వరకు ప్రయోజనాలు పొందవచ్చు. Taigunపై రూ.2.7 లక్షల వరకు తగ్గింపు అందుబాటులో ఉంది. ఈ ఆఫర్లు ఈ నెలాఖరు (నవంబర్‌ 2026) వరకే వర్తిస్తాయి.

వోక్స్‌వ్యాగన్‌ ప్రకటించిన ప్రయోజనాల్లో.. లాయల్టీ బెనిఫిట్ లేదా కార్పొరేట్ ఆఫర్.. ఈ రెండింటిలో ఒకదానిని మాత్రమే ఎంచుకోవాలి, రెండింటినీ కలిపి పొందలేరు.

Volkswagen Tiguan R-Lineపై రూ.6 లక్షల వరకు తగ్గింపు

నవంబర్ ఆఫర్లలో Volkswagen Tiguan R-Line పాత వేరియంట్‌పై అత్యధిక ప్రయోజనాలు అందిస్తున్నారు. ఈ మోడల్‌పై రూ.3.5 లక్షల నగదు తగ్గింపు ఉంది. అదనంగా రూ.2 లక్షల ఎక్స్ఛేంజ్ బెనిఫిట్, మరో రూ.50,000 అదనపు ప్రయోజనం కలిపి మొత్తం రూ.6 లక్షల వరకు ఆదా చేసుకోవచ్చు. అయితే ఈ అదనపు రూ.50,000 ప్రయోజనానికి సంబంధించిన అర్హత వివరాలు స్పష్టంగా లేవు. కాబట్టి కొనుగోలు చేసే ముందు డీలర్‌ను సంప్రదించి నిర్ధారించుకోవాలి.

Volkswagen Taigunపై రూ.2.7 లక్షల వరకు డిస్కౌంట్

Volkswagen Taigun MY2025 Topline 1.0 TSI MT వేరియంట్‌పై ఈ నెలలో అత్యధికంగా రూ.2.7 లక్షల వరకు ప్రయోజనాలు లభిస్తున్నాయి. ఇందులో రూ.2 లక్షల నగదు తగ్గింపు, రూ.30,000 ఎక్స్ఛేంజ్ బెనిఫిట్ & రూ.40,000 వరకు కార్పొరేట్ ప్రయోజనం ఉన్నాయి.

MY2025 Topline 1.0 TSI AT వేరియంట్‌పై రూ.1.5 లక్షల నగదు తగ్గింపు అందిస్తున్నారు. ఇదే వేరియంట్ MY2026 మోడల్‌పై రూ.1 లక్ష తగ్గింపు ఉంది. GT Plus విభాగంలో MY2025 GT Plus Chrome 1.5 TSI DSG వేరియంట్‌పై రూ.2 లక్షల డిస్కౌంట్‌ లభిస్తుంది. GT Plus Chrome & GT Plus Sport మాన్యువల్ వేరియంట్లపై రూ.1.51 లక్షల చొప్పున తగ్గుతుంది. MY2025 GT Plus Sport 1.5 TSI DSG వేరియంట్‌పైనా రూ.1.51 లక్షల క్యాష్‌ డిస్కౌంట్‌ అందిస్తున్నారు.

Comfortline 1.0 TSI MT, GT-Line సహా ఇతర వేరియంట్లపై రూ.50,000 నుంచి రూ.80,900 వరకు నగదు తగ్గింపులు ఉన్నాయి. ఇవి మోడల్ తయారీ సంవత్సరం, వేరియంట్ ఆధారంగా మారతాయి. అర్హత కలిగిన Taigun వేరియంట్లపై రూ.30,000 ఎక్స్ఛేంజ్ బెనిఫిట్, రూ.20,000 లాయల్టీ బెనిఫిట్ కూడా పొందవచ్చు. కస్టమర్ కేటగిరీని బట్టి కార్పొరేట్ ప్రయోజనాలు రూ.5,000 నుంచి రూ.40,000 వరకు ఉన్నాయి.

Volkswagen Tayronపై రూ.2 లక్షల వరకు ప్రయోజనాలు

Volkswagen Tayron కొనేవాళ్లకు కూడా ఈ నెలలో మంచి ఆఫర్లు ఉన్నాయి. ఈ మోడల్‌పై రూ.1 లక్ష నగదు తగ్గింపు, రూ.50,000 ఎక్స్ఛేంజ్ బెనిఫిట్, మరో రూ.50,000 అదనపు ప్రయోజనం కలిపి మొత్తం రూ.2 లక్షల వరకు ఆదా చేసుకోవచ్చు.

Volkswagen Virtusపై రూ.1.66 లక్షల వరకు తగ్గింపు

Volkswagen Virtus MY2025 Highline 1.0 TSI AT వేరియంట్‌పై అత్యధికంగా రూ.96,500 క్యాష్‌ డిస్కౌంట్‌ అందిస్తున్నారు. దీనికి రూ.30,000 ఎక్స్ఛేంజ్ బెనిఫిట్, అర్హులైన వారికి రూ.40,000 కార్పొరేట్ ప్రయోజనం కూడా కలిస్తే మొత్తం రూ.1,66,500 వరకు ఆదా చేసుకోవచ్చు.

MY2025 Highline 1.0 TSI MT వేరియంట్‌పై రూ.61,000 నగదు తగ్గింపు లభిస్తుంది. Topline 1.0 TSI MT & AT వేరియంట్లపై MY2025 కార్లకు రూ.75,000 చొప్పున తగ్గింపు అందిస్తున్నారు. MY2026 Topline మాన్యువల్ వేరియంట్‌పై రూ.50,000, ఆటోమేటిక్ వేరియంట్‌పై రూ.70,000 డిస్కౌంట్‌ వర్తిస్తుంది.

1.5 TSI వేరియంట్ల విషయానికి వస్తే.. MY2025 GT Plus Chrome DSGపై రూ.75,000, GT Plus Sport DSGపై రూ.50,000 తగ్గింపు అందుబాటులో ఉంది. MY2026లో ఈ రెండు వేరియంట్లపై రూ.60,000 చొప్పున క్యాష్‌ డిస్కౌంట్‌ అందిస్తున్నారు. ఎంపిక చేసిన Virtus వేరియంట్లపై రూ.30,000 ఎక్స్ఛేంజ్ బెనిఫిట్, రూ.20,000 లాయల్టీ బెనిఫిట్ కూడా ఉన్నాయి.

కొనే ముందు ఇవి గుర్తుంచుకోండి

Volkswagen కార్లపై ప్రకటించిన డిస్కౌంట్లు నగరం, డీలర్‌షిప్, స్టాక్ లభ్యతను బట్టి మారవచ్చు. ముఖ్యంగా MY2025, MY2026 మోడళ్ల మధ్య ఆఫర్లలో తేడా ఉంది. కాబట్టి.. కారు తయారీ సంవత్సరం, వేరియంట్, ఎక్స్ఛేంజ్ అర్హత, కార్పొరేట్ లేదా లాయల్టీ ప్రయోజనాల వివరాలను ముందుగానే తెలుసుకోవాలి. తుది ధర, వర్తించే అన్ని ఆఫర్లను స్థానిక Volkswagen డీలర్ వద్ద నిర్ధారించుకున్న తర్వాతే కొనుగోలు నిర్ణయం తీసుకోవడం మంచిది.

Kawasaki Z650 కంటే రూ.33,000 అదనపు ధరకు Kawasaki Z650 Sలో ఏం ఉంది? రెండు మోడళ్ల కంపారిజన్‌

Arun Kumar Veera — Wed, 11 Nov 2026 14:00:45 +0530

Kawasaki Z650 vs Kawasaki Z650 S Differences: కవాసకి, మన మార్కెట్లోకి కొత్త Z650 S మోటార్‌సైకిల్‌ను లాంచ్‌ చేసింది. అంతర్జాతీయ మార్కెట్‌కు పరిచయమైన ఏడాది తర్వాత ఈ బైక్ భారత్‌కు వచ్చింది. ఇప్పటికే మన దగ్గర ఉన్న ఉన్న స్టాండర్డ్ Z650తో పోలిస్తే Z650 Sలో కొత్త డిజైన్‌తో పాటు కొన్ని ఎర్గోనామిక్ మార్పులు, అదనపు ఫీచర్లు యాడ్‌ అయ్యాయి.

రెండు బైక్‌లలోనూ 649cc ప్యారలల్ ట్విన్, లిక్విడ్ కూల్డ్ ఇంజిన్ ఉంటుంది. ఇది 8,000rpm వద్ద 68hp పవర్, 6,700rpm వద్ద 64Nm టార్క్‌ను ఉత్పత్తి చేస్తుంది. ట్రెల్లిస్ ఫ్రేమ్, సస్పెన్షన్ యూనిట్లు, 15 లీటర్ల ఫ్యూయల్ ట్యాంక్ & 130mm గ్రౌండ్ క్లియరెన్స్ కూడా రెండింటిలో ఒకేలా ఉన్నాయి. అయితే.. కొత్త Z650 S కోసం స్టాండర్డ్ మోడల్ ‍‌(Z650) కంటే రూ.33,000 ఎక్కువ ధర నిర్ణయించడానికి కారణాలేంటి?.

1. రైడింగ్ పొజిషన్‌లో మార్పులు

Z650 Sలో చేసిన ముఖ్యమైన మార్పుల్లో రైడింగ్ పొజిషన్ ఒకటి. స్టాండర్డ్ Z650తో పోలిస్తే ఇందులో సీటు ఎత్తు పెరిగింది. 2025 Z650లో సీటు ఎత్తు 790mm ఉండగా, కొత్త Z650 Sలో 805mmగా ఉంది. అంటే 15mm పెరిగింది. పిలియన్ సీటు కూడా స్టాండర్డ్ మోడల్‌తో పోలిస్తే 10mm ఎత్తుగా, 20mm వెడల్పుగా ఉంటుంది. రెండు సీట్ల ఎత్తు పెరగడానికి మందమైన ఫోమ్ ఉపయోగించడమే కారణమని కవాసకి తెలిపింది.

మరో ముఖ్యమైన మార్పు హ్యాండిల్‌బార్. Z650 Sలో ఇది అదనంగా 30mm వెడల్పు ఉంటుంది. అంతేకాకుండా కొద్దిగా పైకి వాలినట్లు ఉంటుంది. వెడల్పైన హ్యాండిల్‌బార్ వల్ల బైక్‌ను మలుపుల్లో తిప్పడం సులభం కావచ్చు. పైకి వాలిన పొజిషన్ స్పోర్టియర్ రైడింగ్ అనుభూతిని ఇస్తుంది.

రైడర్ ఫుట్‌పెగ్స్‌ను కూడా వెనుకకు జరిపారు. ఈ మార్పులు కొత్త Z650 Sను స్టాండర్డ్ Z650 కంటే స్పోర్టియర్‌గా మార్చేలా ఉన్నాయి.

బరువు విషయంలోనూ తేడా ఉంది. Z650 S కెర్బ్ వెయిట్ 193 కిలోలు. స్టాండర్డ్ మోడల్‌తో పోలిస్తే ఇది 5 కిలోలు ఎక్కువ. ముందు భాగంలోని కొత్త ఫెయిరింగ్, కొత్త హ్యాండిల్‌బార్ & రేడియేటర్ గార్డ్ వంటి అదనపు పరికరాల వల్ల బరువు పెరిగి ఉండవచ్చని అంచనా.

2. డిజైన్‌లో కొత్త Sugomi స్టైల్

రెండు బైక్‌ల మధ్య తేడాను సులభంగా గుర్తించాలంటే వాటి డిజైన్‌ను చూడాలి. Z650 Sలో.. Z900 నుంచి తీసుకున్న కొత్త Sugomi డిజైన్ ఎలిమెంట్స్‌ ఉన్నాయి. కొత్త మోడల్ మొత్తం మరింత షార్ప్‌గా, సన్నగా కనిపిస్తుంది.

ముఖ్యంగా హెడ్‌లైట్ డిజైన్‌లో ఈ మార్పు స్పష్టంగా కనిపిస్తుంది. ఇందులో మూడు యూనిట్లతో కూడిన హెడ్‌లైట్ సెటప్ ఉంది. ఇది Z900 డిజైన్‌ను పోలి ఉంటుంది. టెయిల్‌లైట్‌ను కూడా కొత్తగా మార్చారు. Ninja 500 వంటి ఆధునిక కవాసకి బైక్‌ల డిజైన్‌కు దగ్గరగా ఉండేలా తీర్చిదిద్దారు.

భారత్‌లో స్టాండర్డ్ Z650కు 2025 తర్వాత అప్‌డేట్ రాలేదు. అంతర్జాతీయ మార్కెట్లోనూ 2026 నుంచి ఈ మోడల్‌కు అప్‌డేట్ లేదు. భవిష్యత్తులో స్టాండర్డ్ Z650కు కూడా Z650 S తరహా కొత్త డిజైన్ వచ్చే అవకాశం ఉందని అంచనా. అయితే దీనిపై కంపెనీ ఎలాంటి టైమ్‌లైన్ ప్రకటించలేదు.

3. ఫీచర్లు & ఎలక్ట్రానిక్స్‌లో తేడాలు

ఫీచర్ల విషయంలో రెండు బైక్‌ల మధ్య భారీ తేడాలు లేవు. అయితే Z650 Sకు ప్రత్యేకంగా అప్‌షిఫ్ట్-ఓన్లీ కవాసకి క్విక్‌షిఫ్టర్‌ (KQS)ను యాక్సెసరీగా పొందే అవకాశం ఉంది. స్టాండర్డ్ Z650లో ఈ సదుపాయం లేదు.

బ్రేక్ రోటర్ల పరిమాణం రెండు మోడళ్లలో ఒకేలా ఉంటుంది. కానీ డిజైన్‌లో మార్పు చేశారు. Z650లో పెటల్ డిస్క్‌లు ఉండగా, Z650 Sలో సాధారణ రౌండెడ్‌ డిస్క్‌లను అందించారు.

రెండు బైక్‌లలోనూ 4.3-అంగుళాల TFT డిస్‌ప్లే ఉంటుంది. అయితే Z650 Sలో కొత్త లేఅవుట్‌ను ఇచ్చారు. ఇది Z900 డిస్‌ప్లేను పోలి ఉంటుంది. Kawasaki Rideology యాప్ ద్వారా స్మార్ట్‌ఫోన్ కనెక్టివిటీ కూడా లభిస్తుంది.

Z650 Sలో రైడింగ్ లాగ్స్ వంటి అదనపు సమాచారం చూసుకునే అవకాశం ఉంది. అయినప్పటికీ రెండు బైక్‌లలోనూ టర్న్-బై-టర్న్ నావిగేషన్ సపోర్ట్ లేదు. బ్లూటూత్‌ ద్వారా ఫోన్ & SMS అలర్ట్స్ మాత్రమే చూపిస్తుంది.

ఇది కూడా చదవండి: 743cc ఇంజిన్, 6-యాక్సిస్ IMU, క్రూయిజ్ కంట్రోల్.. హిమాలయన్ 750 ప్రత్యేకతలు చాలానే ఉన్నాయి

రైడర్ ఎయిడ్స్ విషయంలో రెండు మోడళ్లలోనూ ఒకే ఫీచర్లు ఉన్నాయి. అవి:

- మూడు స్థాయిల కవాసకి ట్రాక్షన్‌ కంట్రోల్‌ (KTRC)
- డ్యూయల్ ఛానల్ ABS
- స్లిప్-అండ్-అసిస్ట్ క్లచ్

4. Kawasaki Z650 S, Z650 ధరలు

Kawasaki Z650 S ధర: రూ.7.59 లక్షలు (ఎక్స్‌షోరూమ్)

Kawasaki Z650 ధర: రూ.7.26 లక్షలు (ఎక్స్‌షోరూమ్)

ఏ బైక్ కొనడం మంచిది?

Kawasaki Z650 Sలో కొత్త డిజైన్, పెరిగిన సీటు ఎత్తు, వెడల్పైన హ్యాండిల్‌బార్, వెనుకకు జరిపిన ఫుట్‌పెగ్స్ వంటి మార్పులు ఉన్నాయి. అదనంగా క్విక్‌షిఫ్టర్ యాక్సెసరీ ఆప్షన్ కూడా ప్రత్యేకతగా నిలుస్తుంది. అయితే ఇంజిన్, ఫ్రేమ్, సస్పెన్షన్, ఫ్యూయల్ ట్యాంక్ సామర్థ్యం వంటి కీలక అంశాలు రెండు బైక్‌లలోనూ ఒకేలా ఉన్నాయి. కాబట్టి కొత్త డిజైన్ & స్పోర్టియర్ రైడింగ్ పొజిషన్ కావాలనుకునేవారు Z650 Sను పరిశీలించవచ్చు. తక్కువ ధరలో దాదాపు అదే ఇంజిన్, ప్రధాన ఫీచర్లు కావాలనుకునేవారు స్టాండర్డ్ Z650ను పరిశీలించవచ్చు. మీకు ఏ బైక్‌ సరిపోతుందో తెలుసుకోవడానికి ముందుగా రెండింటినీ టెస్ట్ రైడ్ చేయడం మంచిది.

Force e-Traveller: ఫోర్స్‌ మోటార్‌ నుంచి కొత్త ఎలక్ట్రిక్‌ ట్రావెలర్స్‌, అంబులెన్స్‌.. తుది పరీక్షల్లో EVలు

Arun Kumar Veera — Wed, 11 Nov 2026 11:59:18 +0530

Force Motors Electric Travellers: మన మార్కెట్లో ఎలక్ట్రిక్ వాహనాల వినియోగం క్రమంగా పెరుగుతుండేసరికి, ఫోర్స్‌ మోటార్స్‌ కూడా ఎలక్ట్రిక్ వాహనాల (Force Motors EVs) ప్లాన్‌లను వేగవంతం చేస్తోంది. ఈ కంపెనీకి చెందిన పాపులర్‌ Traveller ప్లాట్‌ఫామ్ ఆధారంగా రూపొందించిన ఎలక్ట్రిక్ వాహనాలను 2027 మొదటి త్రైమాసికంలో విడుదల చేయాలని లక్ష్యంగా పెట్టుకుంది. అంటే, 2027 జనవరి-మార్చి మధ్యకాలంలో ఇవి మార్కెట్లోకి వచ్చే అవకాశం ఉంది. ప్రారంభ లైనప్‌లో ఎలక్ట్రిక్ అంబులెన్స్ కూడా ఉంటుందని సమాచారం. ఇప్పటికే వాహనాల డెవలప్‌మెంట్‌ పూర్తయిందని కంపెనీ మేనేజింగ్ డైరెక్టర్ ప్రసన్ ఫిరోడియా వెల్లడించారు. ప్రస్తుతం తుది పరీక్షలు & హోమోలోగేషన్ ప్రక్రియ కొనసాగుతున్నాయి.

ARAI టెస్టులు కొనసాగింపు

2024 Auto Expoలో ఎలక్ట్రిక్ Traveller మోడల్‌ను Force Motors ప్రదర్శించింది. అయితే ఇప్పటివరకు వీటి వాణిజ్య విక్రయాలు ప్రారంభం కాలేదు. తాజాగా కంపెనీ మేనేజింగ్ డైరెక్టర్ చెప్పిన ప్రకారం, వాహనాల అభివృద్ధి పనులు పూర్తయ్యాయి. ప్రస్తుతం ఆటోమోటివ్‌ రీసెర్చ్‌ అసోసియేషన్ ఆఫ్‌ ఇండియా (ARAI) వద్ద తుది పరీక్షలు, హోమోలోగేషన్ ప్రక్రియ జరుగుతోంది. ఈ ప్రక్రియ పూర్తయిన తర్వాత ఈ ఎలక్ట్రిక్‌ వాహనాలను మార్కెట్లోకి తీసుకురావాలని కంపెనీ భావిస్తోంది. అయితే ధరలు, పూర్తి స్పెసిఫికేషన్లను ఇంకా వెల్లడించలేదు.

అంబులెన్స్ నుంచి స్కూల్ బస్ వరకు.. వివిధ వేరియంట్లు

Traveller ప్లాట్‌ఫామ్‌ను ఇప్పటికే అనేక రకాల వాణిజ్య అవసరాలకు ఉపయోగిస్తున్నారు. అంబులెన్స్‌లు, స్కూల్ బస్సులు, ఉద్యోగుల రవాణా వాహనాలు, పోలీస్ వ్యాన్లు & డెలివరీ వాహనాలు ఇందులో ఉన్నాయి. ఇప్పుడు ఇదే ప్లాట్‌ఫామ్‌పై వివిధ ఎలక్ట్రిక్ వేరియంట్లను తీసుకురావాలని Force Motors ప్రణాళిక వేస్తోంది. దీంతో సాధారణ ప్రయాణికుల రవాణాకే పరిమితం కాకుండా, వివిధ కమర్షియల్ విభాగాల్లోనూ ఎలక్ట్రిక్ వాహనాలను అందించే అవకాశం ఉంటుంది.

ముఖ్యంగా, ఎలక్ట్రిక్ అంబులెన్స్ ఈ లైనప్‌లో కీలకంగా మారనుంది. సాధారణ ప్యాసింజర్ వాహనాలతో పోలిస్తే అంబులెన్స్‌ల వినియోగ అవసరాలు భిన్నంగా ఉంటాయి. అందువల్ల రేంజ్, ఛార్జింగ్ సమయం & వాహనం నిరంతరం అందుబాటులో ఉండటం వంటి అంశాలు చాలా ముఖ్యం.

ఇది కూడా చదవండి: మిస్‌ఫైరింగ్ నుంచి 'చెక్ ఇంజిన్' లైట్ వరకు.. ఇంజిన్‌కు ప్రమాదం తెచ్చే 3 సమస్యలు ఇవే

సిద్ధమవుతున్న Urbania ఎలక్ట్రిక్ వెర్షన్

Traveller EVలతో పాటు Force Motors తన Urbania పీపుల్ క్యారియర్‌కు కూడా ఎలక్ట్రిక్ వెర్షన్‌ను డెవలప్‌ చేస్తోంది. అయితే ఈ మోడల్ హోమోలోగేషన్ దశకు చేరుకోవడానికి ఇంకా కొన్ని నెలల సమయం పట్టనుంది. ఇతర వాహన ప్లాట్‌ఫామ్‌లను కూడా దశలవారీగా ఎలక్ట్రిక్‌గా మార్చాలని ఈ కంపెనీ భావిస్తోంది.

కమర్షియల్ EVల వినియోగంలో సవాళ్లు

ఎలక్ట్రిక్ వాహనాలను ఉపయోగించే ఫ్లీట్ ఆపరేటర్లకు కొన్ని ముఖ్యమైన అంశాలు కీలకం. EV నిర్వహణ ఖర్చులు, ప్రయాణించగల దూరం, ఛార్జింగ్ మౌలిక సదుపాయాల లభ్యత వంటి అంశాలను వారు పరిగణనలోకి తీసుకుంటారు. ఈ నేపథ్యంలో.. స్కూల్ ట్రాన్స్‌పోర్ట్ విభాగం ఎలక్ట్రిక్ వాహనాలను ముందుగా తీసుకొచ్చే అవకాశం ఉంది. ఎందుకంటే స్కూల్ బస్సులకు సాధారణంగా నిర్ణీత రూట్లే ఉంటాయి. రోజువారీ ప్రయాణ దూరాన్ని కూడా ముందుగానే అంచనా వేయవచ్చు. కానీ టూరిజం & నగరాల మధ్య ప్రయాణించే వాహనాల విషయంలో ఈ పరిస్థితి భిన్నంగా ఉంటుంది. వీటి ప్రయాణ మార్గాలు, దూరాలు ముందుగా నిర్ణయించడం కష్టం. కాబట్టి, వీటి విషయంలో ఛార్జింగ్ ప్లానింగ్ కూడా సవాలుగా మారవచ్చు.

రూ.3,000 కోట్ల పెట్టుబడితో విస్తరణ

Force Motors.. తయారీ సామర్థ్యం, ఇంజినీరింగ్, ఎలక్ట్రిఫికేషన్, హైబ్రిడ్ డ్రైవ్‌లైన్ టెక్నాలజీ & డిజిటలైజేషన్ విభాగాల్లో మొత్తం రూ.3,000 కోట్ల పెట్టుబడి పెడుతోంది. ఉత్పత్తి సామర్థ్యాన్ని 85,000 వాహనాలకు పెంచుకోవాలని కూడా లక్ష్యంగా పెట్టుకుంది. ఈ విస్తరణలో Traveller EV ప్రాజెక్ట్ కూడా ముఖ్యమైన భాగంగా ఉండనుంది.

ఇది కూడా చదవండి: పెట్రోల్, డీజిల్, CNG కార్లను నడిపే ముందు ఎంత సేపు ఆన్‌లో ఉంచాలి? కంపెనీలు ఏం చెబుతున్నాయి?

ధరలు, పూర్తి వివరాలు ఎప్పుడు?

ప్రస్తుతానికి Force Motors Traveller EVల ధరలు లేదా పూర్తి సాంకేతిక వివరాలు తెలియలేదు. 2027 జనవరి-మార్చి మధ్య మార్కెట్‌లోకి తీసుకురావడానికి ముందు ఈ వివరాలు వెల్లడయ్యే అవకాశం ఉంది.