2026 Bajaj Pulsar NS125 కొత్త అవతార్.. ఇక LCD డిస్‌ప్లేతో పాటు మరిన్ని ఫీచర్లు!

రూ.లక్షల్లో కొత్త కారు, రూ.వేలల్లో మెయింటెనెన్స్‌ ఖర్చు! క్యాబ్‌లో తిరగడమే బెటర్‌ ఐడియానా?

Arun Kumar Veera — Thu, 1 Oct 2026 14:53:50 +0530

Purchasing a car or book a cab: సొంత కారు కొనడం ప్రతి కుటుంబం కల. సొంత కారు ఉంటేనే జీవితంలో ఒక పైమెట్టుకు చేరుకున్నామని అనుకుంటాం. కానీ, ప్రస్తుతం నగర జీవితం మారుతోంది. ఇబ్బందులతో పాటు ఖర్చులు కూడా పెరుగుతున్నాయి. ఆఫీస్‌ లేదా వ్యాపార పనులపై నగరంలో రోజూ తిరగడానికి కారు కొనాలా? అవసరమైనప్పుడు క్యాబ్‌ బుక్‌ చేసుకోవాలా? అనే ప్రశ్న ఇప్పుడు చాలామందిలో మొదలైంది. దీనికి కారణం కారు ధర మాత్రమే కాదు. కారు కొన్న తర్వాత వచ్చే ఖర్చులు కూడా భారీగానే ఉంటాయి. మరోవైపు యాప్‌ ఆధారిత క్యాబ్‌ సేవలు అందుబాటులోకి రావడంతో సొంత కారు లేకుండానే రోజువారీ ప్రయాణాలు చేయడం సులభమైంది.

ఉదాహరణకు..

రూ.20 లక్షల కారు కొన్నారని అనుకుందాం. ముందుగా రూ.4 లక్షలు డౌన్‌ పేమెంట్‌ చెల్లించి.. మిగిలిన రూ.16 లక్షలను ఐదేళ్ల రుణంగా తీసుకుంటే నెలవారీ EMI సుమారు రూ.30,000 నుంచి రూ.32,000 వరకు ఉండొచ్చు. వడ్డీ రేటు, రుణ కాలవ్యవధి వంటి అంశాలను బట్టి ఈ మొత్తం మారుతుంది.

ఇంతటితో కారు ఖర్చు పూర్తికాదు. రోజూ 50 నుంచి 70 కిలోమీటర్లు ప్రయాణిస్తే ఇంధనానికే నెలకు సుమారు రూ.20,000 వరకు ఖర్చయ్యే అవకాశం ఉంది. వారాంతపు ప్రయాణాలు, విమానాశ్రయ ప్రయాణాలు, నగరంలో ఇతర అవసరాలు కూడా ఉంటే ఈ మొత్తం ఇంకా పెరగొచ్చు.

దీనికి బీమా, సర్వీసింగ్‌, నిర్వహణ, టైర్ల వంటి వినియోగ వస్తువుల ఖర్చులను కలిపితే నెలకు మరో రూ.5,000 నుంచి రూ.8,000 వరకు ఖర్చు కావచ్చు.

ఇక నగరాల్లో మరో పెద్ద సమస్య పార్కింగ్‌. అపార్ట్‌మెంట్‌లో ప్రత్యేక పార్కింగ్‌ కోసం చెల్లించే మొత్తం, కార్యాలయం వద్ద పార్కింగ్‌ ఛార్జీలు, మాల్స్‌ & వాణిజ్య ప్రాంతాల్లో గంటల వారీ ఫీజులు.. ఇవన్నీ అదనపు భారమే. పార్కింగ్‌ స్థలం కోసం రోడ్లపై తిరుగుతూ సమయం కోల్పోవడం కూడా మరో సమస్య.

ఇవన్నీ కలిపితే కారు యాజమాన్యానికి నెలకు రూ.60,000కు పైగా ఖర్చయ్యే అవకాశం ఉంది. ఇందులో కారు విలువ తరుగుదలను (డిప్రిసియేషన్‌) కూడా కలిపితే వాస్తవ భారం మరింత పెరుగుతుంది. కొత్త కారు షోరూమ్‌ నుంచి బయటకు వచ్చిన వెంటనే దాని మార్కెట్‌ విలువ తగ్గడం ప్రారంభమవుతుంది.

ఇది కూడా చదవండి: టెక్టన్‌ కంటే పెద్ద కారు త్వరలోనే రాబోతోంది.. నిస్సాన్‌ కొత్త 7 సీటర్‌ SUV ఫొటోలు లీక్‌!

సొంత కారు కొనకుండా క్యాబ్‌లపైనే ఆధారపడితే పరిస్థితి ఎలా ఉంటుంది?

ఆఫీసుకు రోజువారీ ప్రయాణాలు, విమానాశ్రయ ప్రయాణాలు, క్లయింట్‌ మీటింగ్‌లు, వారాంతపు విహారాలు & అప్పుడప్పుడు నగరం బయట ప్రయాణాలకు ప్రీమియం క్యాబ్‌ సేవలను ఉపయోగించే వ్యక్తికి నెలకు సుమారు రూ.40,000 వరకు ఖర్చయ్యే అవకాశం ఉంది. అయితే ఇది పూర్తిగా ప్రయాణ దూరం, క్యాబ్‌ రకం & ప్రయాణాల సంఖ్యపై ఆధారపడి ఉంటుంది.

ఇక్కడే కారు యాజమాన్యంలోని కొన్ని కనిపించని ఖర్చులు బయటపడతాయి. ట్రెవ్‌ మొబిలిటీ వ్యవస్థాపకుడు నవీన్‌ గుప్తా చెప్పిన ప్రకారం.. క్యాబ్‌లు లేదా షేర్డ్‌ మొబిలిటీని ఉపయోగించే వారికి EMI, సర్వీసింగ్‌, బీమా పునరుద్ధరణ, అనూహ్య మరమ్మతులు, టైర్ల మార్పు, డిప్రిసియేషన్‌, రీసేల్‌ విలువ & పార్కింగ్‌ వంటి ఖర్చులు ఉండవు. అవసరమైనప్పుడు ప్రయాణానికి మాత్రమే డబ్బు చెల్లిస్తారు.

యువ ఉద్యోగులు, వ్యాపారవేత్తలు, కార్పొరేట్‌ ఉద్యోగులు & తరచుగా ప్రయాణించే వారికి ఈ విధానం ఆకర్షణీయంగా మారుతోందని గుప్తా చెబుతున్నారు. అంటే సొంత వాహనం కలిగి ఉండటం కంటే అవసరమైనప్పుడు రవాణా సేవను పొందడానికే కొందరు ప్రాధాన్యం ఇస్తున్నారు.

ఇది కూడా చదవండి: కైలాక్‌ నుంచి కొడియాక్‌ వరకు బాదుడు.. స్కోడా కార్ల ధరలు రూ.20,000 వరకు పెంపు

అందరికీ క్యాబ్‌ ప్రయాణమే ఆర్థికంగా అనుకూలం కాదు

పిల్లలు లేదా వృద్ధులు ఉన్న కుటుంబాలకు రోజూ క్యాబ్‌లు బుక్‌ చేయడం ఖర్చుతో కూడుకున్నదే. స్కూల్‌కు, ఆసుపత్రికి వెళ్లడం, వారాంతపు కార్యక్రమాలు & సెలవుల సమయంలో తరచుగా ప్రయాణించాల్సి వస్తే సొంత కారు ఉపయోగకరంగా ఉంటుంది.

రోజూ ఎక్కువ దూరం ప్రయాణించే వారికి కూడా కారు కొనడం సమంజసం కావచ్చు. ఉదాహరణకు ఉద్యోగం కోసం నగరాల మధ్య తరచుగా ప్రయాణించే వ్యక్తికి ప్రతిరోజూ క్యాబ్‌ బుక్‌ చేయడం కంటే సొంత వాహనం మరింత సౌకర్యవంతంగా ఉండొచ్చు.

అర్ధరాత్రి లేదా తెల్లవారుజామున ప్రయాణాలు చేయాల్సి వచ్చేవారు, పని కోసం పరికరాలు తీసుకెళ్లేవారు & ప్రజా రవాణా లేదా క్యాబ్‌ సేవలు పరిమితంగా ఉన్న ప్రాంతాల్లో నివసించేవారికి కూడా సొంత కారు ఉపయోగపడుతుంది.

అందుకే కారు కొనాలా? క్యాబ్‌లోనే తిరగాలా? అనే నిర్ణయం ప్రతి ఒక్కరి ప్రయాణ అవసరాలపై ఆధారపడి ఉంటుంది. కారు ఎక్కువ సమయం పార్కింగ్‌లోనే ఉండి.. EMI, బీమా, నిర్వహణ & పార్కింగ్‌ ఖర్చులు మాత్రం కొనసాగితే సొంత వాహనం ఆర్థికంగా భారంగా మారొచ్చు. అదే కారును కుటుంబం మొత్తం తరచుగా ఉపయోగిస్తే లేదా రోజూ ఎక్కువ దూరం ప్రయాణిస్తే దాని ప్రయోజనం పెరుగుతుంది.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.

Royal Enfield Himalayan 440: లాంచ్‌ అయిన నెలకే భారీ డిమాండ్‌.. 6 నెలల వెయిటింగ్‌ పిరియడ్‌, బుకింగ్స్‌ నిలిపివేత

Arun Kumar Veera — Thu, 1 Oct 2026 14:00:44 +0530

Royal Enfield Himalayan 440 Price And Features Telugu: ఇండియాలో ఇటీవల లాంచ్‌ అయిన ఓ కొత్త అడ్వెంచర్‌ బైక్‌కు భారీ డిమాండ్‌ ఏర్పడింది. దీంతో వెయిటింగ్‌ పిరియడ్‌ ఏకంగా ఆరు నెలలకు చేరింది. కస్టమర్ల నుంచి వస్తున్న బుకింగ్స్‌ను తట్టుకోలేక, ఆ కంపెనీ కొత్త బుకింగ్స్‌ను తాత్కాలికంగా నిలిపివేసింది. ఆ బైక్‌ మరేదో కాదు.. రాయల్‌ ఎన్‌ఫీల్డ్‌ హిమాలయన్‌ 440.

భారత్‌లో, సెప్టెంబర్‌ 4, 2026న హిమాలయన్‌ 440ను రాయల్‌ ఎన్‌ఫీల్డ్‌ లాంచ్‌ అయింది. దీని ప్రారంభ ఎక్స్‌షోరూమ్‌ ధర రూ.2.29 లక్షలు. లాంచ్‌ అయిన వెంటనే ఈ అడ్వెంచర్‌ బైక్‌కు భారీ స్పందన వచ్చింది, కొనడానికి జనం ఎగబడ్డారు. డెలివరీలు ప్రారంభమైన తర్వాత బుకింగ్స్‌ ఇంకా వేగంగా పెరిగాయి. ప్రస్తుతం ఈ బైక్‌కు వెయిటింగ్‌ పీరియడ్‌ దాదాపు ఆరు నెలలకు చేరినట్లు తెలుస్తోంది. దీంతో, మరింత మంది కస్టమర్లను వెయిటింగ్‌ లిస్ట్‌లో చేర్చకుండా రాయల్‌ ఎన్‌ఫీల్డ్‌ బుకింగ్స్‌ను తాత్కాలికంగా నిలిపివేసింది.

ఉత్పత్తి పెంచే అవకాశం

బుకింగ్స్‌ను ఆపిన సమయంలో, కంపెనీ ఈ బండి ఉత్పత్తి సామర్థ్యాన్ని పెంచే ప్రయత్నం చేసే అవకాశం ఉంది. ఉత్పత్తి పెరిగి పెండింగ్‌ బుకింగ్స్‌ తగ్గిన తర్వాత మళ్లీ బుకింగ్స్‌ను ప్రారంభించనున్నట్లు తెలుస్తోంది. కస్టమర్లు ఎంతకాలం వేచి చూడాలో స్పష్టత లేకుండా కొత్త బుకింగ్స్‌ తీసుకోవడం కంపెనీకి ఇష్టం లేదని సమాచారం.

అంటే హిమాలయన్‌ 440 కొనాలని చూస్తున్నవాళ్లు ప్రస్తుతం బుకింగ్‌ కోసం కూడా మరికొంత సమయం వేచి చూడాల్సిందే. అయితే బుకింగ్స్‌ ఎప్పుడు తిరిగి ప్రారంభమవుతాయనే విషయాన్ని రాయల్‌ ఎన్‌ఫీల్డ్‌ ఇంకా వెల్లడించలేదు.

ధర పెరగదట!

హిమాలయన్‌ 440కు ఉన్న ప్రధాన ఆకర్షణల్లో దాని ధర కూడా ఒకటి. భారత మార్కెట్‌లో అందుబాటులో ఉన్న ఫుల్‌ సైజ్‌ అడ్వెంచర్‌ బైక్‌లలో తక్కువ ధర ఉన్న మోడళ్లలో ఇది ఒకటి. అంతేకాదు.. హిమాలయన్‌ 450తో పోలిస్తే దీని ధర గణనీయంగా తక్కువ.

ఇది కూడా చదవండి: కుర్రాళ్ల బైక్‌ Triumph Tracker 400ను కేవలం రూ.30,000 డౌన్‌పేమెంట్‌తోనే సొంతం చేసుకోండి!

బుకింగ్స్‌ మళ్లీ ప్రారంభించినప్పుడు హిమాలయన్‌ 440 ధర పెంచే ఆలోచన రాయల్‌ ఎన్‌ఫీల్డ్‌కు లేదని తెలుస్తోంది. అంటే ప్రస్తుతానికి రూ.2.29 లక్షల ప్రారంభ ధరనే కొనసాగించే అవకాశం ఉంది. అయితే బుకింగ్స్‌ పునఃప్రారంభ తేదీని కంపెనీ ఇంకా ప్రకటించలేదు.

443cc ఇంజిన్‌

హిమాలయన్‌ 440లో కొత్త 443cc సింగిల్‌ సిలిండర్‌ లాంగ్‌ స్ట్రోక్‌ ఇంజిన్‌ ఉంది. ఈ ఇంజిన్‌ 6,250rpm వద్ద 25.4bhp పవర్‌ను, 4,000rpm వద్ద 34Nm టార్క్‌ను ఉత్పత్తి చేస్తుంది. దీనికి 6 స్పీడ్‌ గేర్‌బాక్స్‌ను జత చేశారు. పాత హిమాలయన్‌ 411లో ఉన్న 5 స్పీడ్‌ గేర్‌బాక్స్‌తో పోలిస్తే ఇందులో అదనంగా ఒక గేర్‌ ఉంది.

డిజైన్‌ పరంగా హిమాలయన్‌ 411కు ఉన్న అడ్వెంచర్‌ బైక్‌ రూపాన్ని కొత్త మోడల్‌ కొనసాగిస్తుంది. రైడింగ్‌ పొజిషన్‌ కూడా నిటారుగా ఉంటుంది. ముందు భాగంలో 21 అంగుళాల వీల్‌, వెనుక 17 అంగుళాల వీల్‌ ఉన్నాయి.

సస్పెన్షన్‌ విషయానికి వస్తే.. ముందు భాగంలో 200mm, వెనుక భాగంలో 180mm ట్రావెల్‌ ఉంది. గ్రౌండ్‌ క్లియరెన్స్‌ 220mmగా ఉంది. బ్రేకింగ్‌ కోసం ముందు 300mm డిస్క్‌, వెనుక 240mm డిస్క్‌ అందించారు.

డ్యూయల్‌ ఛానల్‌ ABS‌ స్టాండర్డ్‌గా లభిస్తుంది. ఆఫ్‌రోడ్‌ రైడింగ్‌ సమయంలో ఉపయోగించుకునేందుకు ABS‌ స్విచబుల్‌ మోడ్‌ కూడా ఉంది.

ఇది కూడా చదవండి: ట్రయంఫ్ ట్రాకర్ 400 పెర్ఫార్మెన్స్‌ టెస్ట్.. యాక్సిలరేషన్‌, బ్రేకింగ్ వ్యవస్థల నిజమైన పనితీరు ఇదే!

మూడు రంగుల్లో..

హిమాలయన్‌ 440ను సెలా బ్లాక్‌, మస్టాంగ్‌ బ్రౌన్‌ & నెలాంగ్‌ వైట్‌ రంగుల్లో కొనుగోలు చేయవచ్చు. ప్రారంభ దశలో డెలివరీ అయ్యే బైక్‌లపై ప్రత్యేకమైన 10 ఏళ్ల హిమాలయన్‌ యాన్యువల్‌ బ్యాడ్జ్‌ కూడా ఉంటుంది. హిమాలయన్‌ అడ్వెంచర్‌ బైక్‌ తొలిసారి మార్కెట్‌లోకి వచ్చి పదేళ్లు పూర్తవుతున్న సందర్భంగా దీనిని అందిస్తున్నారు.

ఖరీదైన కార్లకే కాదు.. తక్కువ ధర కార్లలోనూ ADAS సేఫ్టీ ఫీచర్లు! సుజుకి కొత్త ప్లాన్ ఇదే

Arun Kumar Veera — Thu, 1 Oct 2026 13:17:31 +0530

Suzuki cars with ADAS: ఇటీవలి కాలంలో, కారు కొనేటప్పుడు భద్రతకు ఎక్కువ ప్రాధాన్యం ఇస్తున్నారు. అయితే అధునాతన భద్రత సాంకేతికతలు ఇప్పటివరకు ఖరీదైన కార్లకే పరిమితమయ్యాయి. ఈ పరిస్థితిని మార్చేందుకు సుజుకి కీలక ప్రణాళికతో ముందుకు వస్తోంది. భవిష్యత్‌లో భారత్‌లో విక్రయించే తన కార్లలో ADASలోని కీలక భద్రత ఫీచర్లను అందుబాటులోకి తీసుకురావాలని కంపెనీ భావిస్తోంది.

తక్కువ ఖర్చుతో ADAS

తక్కువ ధర కార్లలో కూడా ADAS టెక్నాలజీలను అందించేందుకు సుజుకి ప్రత్యేకంగా తక్కువ ఖర్చుతో కూడిన వ్యవస్థను అభివృద్ధి చేస్తోంది. భారతదేశంలోని రహదారుల పరిస్థితులకు అనుగుణంగా ఈ టెక్నాలజీని రూపొందిస్తోంది. దీని ద్వారా ప్రమాదాలను నివారించే భద్రత ఫీచర్లు ఎక్కువ మంది కార్ల కొనుగోలుదారులకు అందుబాటులోకి తీసుకురావాలని కంపెనీ లక్ష్యంగా పెట్టుకుంది.

కీలక భద్రత ఫీచర్లు స్టాండర్డ్‌గా?

భవిష్యత్‌ కార్లలో ఆటోమేటిక్‌ ఎమర్జెన్సీ బ్రేకింగ్‌, లేన్‌ డిపార్చర్‌ ప్రివెన్షన్‌ వంటి కీలక ADAS ఫీచర్లను స్టాండర్డ్‌గా అందించాలని సుజుకి భావిస్తోంది. అయితే అదనపు సౌకర్యాలు & ఇతర అధునాతన ఫీచర్లను ఖరీదైన వేరియంట్లకు పరిమితం చేసే అవకాశం ఉంది.

భారత ట్రాఫిక్‌ పరిస్థితులకు తగ్గట్టుగా, ఖర్చును నియంత్రిస్తూ అవసరమైన భద్రతా ఫీచర్లను మాత్రమే అందించే విధానాన్ని సుజుకి ‘జస్ట్‌-రైట్‌ ADAS’గా పేర్కొంటోంది.

ముందు రాడార్‌ లేకుండానే ADAS

సాధారణంగా ADAS వ్యవస్థల్లో కెమెరాలతో పాటు రాడార్‌ సెన్సర్లను కూడా ఉపయోగిస్తారు. అయితే ఖర్చును తగ్గించేందుకు సుజుకి కొత్త మార్గాన్ని అనుసరిస్తోంది. అధిక రిజల్యూషన్‌ కెమెరాలు & AI చిప్‌లను ఉపయోగించి ముందుభాగంలో ప్రత్యేక రాడార్‌ అవసరం లేని వ్యవస్థను అభివృద్ధి చేస్తోంది.

అదే సమయంలో డ్రైవర్‌ & కారులోని ప్రయాణికుల పర్యవేక్షణ వ్యవస్థలను కూడా ADASతో అనుసంధానం చేయాలని కంపెనీ భావిస్తోంది. ఈ విధానం ద్వారా ఖర్చు గణనీయంగా తగ్గుతుందని సుజుకి చెబుతోంది. ప్రస్తుత లక్ష్యం ప్రకారం భద్రత పనితీరు సమానంగా లేదా మెరుగ్గా ఉండేలా వ్యవస్థను రూపొందించాలని కంపెనీ ప్రయత్నిస్తోంది.

అయితే ఇది ప్రస్తుతం అభివృద్ధి దశలో ఉన్న టెక్నాలజీ మాత్రమే. ఉత్పత్తి కార్లలో అమలు చేసే వ్యవస్థకు సంబంధించిన పనితీరు ఫలితాలను సుజుకి ఇంకా వెల్లడించలేదు.

ప్రమాదానికి ముందు.. ప్రమాదం తర్వాత

కారు భద్రతను సుజుకి రెండు విధాలుగా చూస్తోంది. ప్రమాదం జరగకుండా నివారించడం ఒకటి. ప్రమాదం జరిగినప్పుడు కారులోని ప్రయాణికులను రక్షించడం రెండోది. ADAS ద్వారా ప్రమాదాలను నివారించే ప్రయత్నం చేస్తూనే.. ఢీకొన్న సమయంలో ప్రయాణికులకు మెరుగైన రక్షణ కల్పించే తేలికపాటి వాహన బాడీలపైనా కంపెనీ పనిచేస్తోంది.

కొత్త ఎలక్ట్రానిక్‌ వ్యవస్థతో ఖర్చు తగ్గింపు

సుజుకి ADAS ప్రణాళిక దాని ‘SDV Right’ వ్యూహంలో భాగం. భవిష్యత్‌ కార్లలో ఎలక్ట్రానిక్‌ వ్యవస్థను సరళీకృతం చేయడమే దీని ఉద్దేశం. కమ్యూనికేషన్‌, విద్యుత్‌ పంపిణీ & బాడీ కంట్రోల్‌ విధులను ఒకే సెంట్రల్‌ జోన్‌ ECUలోకి తీసుకురావాలని కంపెనీ భావిస్తోంది.

సుజుకి అంచనా ప్రకారం, ప్రస్తుత వ్యవస్థతో పోలిస్తే ఈ కొత్త కంట్రోలర్‌ సుమారు 30 శాతం తక్కువ ఖర్చుతో తయారవుతుంది. బరువు కూడా దాదాపు 15 శాతం తగ్గే అవకాశం ఉంది.

కొత్త ADASను తొలుత ఏ మోడళ్లలో అందిస్తారు? ఎప్పటి నుంచి అమల్లోకి వస్తుంది? అనే వివరాలను సుజుకి ఇంకా వెల్లడించలేదు. ప్రస్తుతం మారుతి సుజుకి కార్లలో బలెనోకు ఇటీవల వచ్చిన ఫేస్‌లిఫ్ట్‌తో ADAS సూట్‌ అందుబాటులోకి వచ్చింది. భవిష్యత్‌లో తక్కువ ధర కార్లలోనూ ఈ టెక్నాలజీని అందించే అవకాశం ఉంది.

కొత్త కారు కొనడానికి మీ బడ్జెట్‌ రూ.6 లక్షల లోపే ఉందా? అయినా పర్లేదు, ఎన్నో ఆప్షన్లు

Arun Kumar Veera — Thu, 1 Oct 2026 12:49:00 +0530

Best Cars Under Rs 6 lakh 2026: ఈ పండక్కి కొత్త కారు కొనాలని చూస్తున్నారా? బడ్జెట్‌ రూ.6 లక్షల లోపే ఉందా? అయినా పర్లేదు, మీకు ఎన్నో ఆప్షన్లు ఉన్నాయి. ముఖ్యంగా చిన్న కుటుంబాలు, తొలిసారి కారు కొనేవారికి ఈ కార్లు ఉపయోగకరంగా ఉంటాయి. ఈ దసరా పండుగకు కొత్త కారు ఇంటికి తీసుకురావాలని ప్లాన్ చేస్తుంటే.. ముందుగా ధరలు, ఫీచర్లు, అవసరాలకు సరిపోయే మోడల్‌ను పరిశీలించాలి.

తెలుగు రాష్ట్రాల్లో ప్రస్తుతం అందుబాటులో ఉన్న ఎక్స్‌-షోరూమ్‌ ధరలను పరిశీలిస్తే.. రూ.6 లక్షల లోపులో ప్రారంభమయ్యే 11 కార్లు కనిపిస్తున్నాయి. ఇందులో మారుతి సుజుకి, టాటా మోటార్స్‌, రెనాల్ట్‌, సిట్రోయెన్‌, హ్యుందాయ్‌, నిస్సాన్‌ వంటి కంపెనీల మోడళ్లు ఉన్నాయి.

Maruti Suzuki S-Presso

తక్కువ బడ్జెట్‌లో అందుబాటులో ఉన్న కార్లలో మారుతి సుజుకి ఎస్‌-ప్రెస్సో ఒకటి. దీని ధర రూ.3.50 లక్షల నుంచి ప్రారంభమవుతోంది. చిన్న పరిమాణం కారణంగా నగరాల్లో నడపడానికి అనుకూలంగా ఉంటుంది.

Maruti Suzuki Alto K10

మారుతి సుజుకి ఆల్టో K10 కూడా తక్కువ బడ్జెట్‌ కార్లలో ఒకటి. దీని ధర రూ.3.70 లక్షల నుంచి స్టార్టవుతుంది. చిన్న కారు కోరుకునేవారికి ఇది మరో ఆప్షన్‌.

Renault Kwid

రెనాల్ట్‌ క్విడ్‌ ధర రూ.4.53 లక్షల నుంచి ప్రారంభమవుతోంది. ఎస్‌యూవీ తరహా డిజైన్‌ లక్షణాలతో ఈ కారు కనిపిస్తుంది.

ఇది కూడా చదవండి: భారత్‌లో అత్యంత చౌకైన 7 సీటర్ కార్లు ఇవే.. మీకు ఏది బెస్ట్, ధర చూసి కొనేయండి

Maruti Suzuki Celerio

మారుతి సుజుకి సెలెరియో ఆన్‌రోడ్‌ ధర రూ.4.70 లక్షల నుంచి మొదలవుతోంది.

Tata Tiago

టాటా టియాగో ధర రూ.4.77 లక్షల నుంచి ప్రారంభమవుతోంది. భద్రత విషయంలో టాటా కార్లకు ఉన్న గుర్తింపు కారణంగా ఈ మోడల్‌పై కూడా కొనుగోలుదారులు ఆసక్తి చూపుతున్నారు.

Maruti Suzuki Wagon R

మారుతి సుజుకి వ్యాగన్‌ఆర్‌ ప్రారంభ ఆన్‌రోడ్‌ ధర రూ.4.99 లక్షలు. ఎక్కువ క్యాబిన్‌ స్పేస్‌ కోరుకునే కుటుంబాలకు ఇది పరిశీలించదగిన ఆప్షన్‌.

Citroen C3 X

సిట్రోయెన్‌ C3 X ధర కూడా రూ.4.99 లక్షల నుంచి మొదలవుతోంది.

మిగిలిన మోడళ్ల విషయానికి వస్తే.. Tata Aeris ధర రూ.5.29 లక్షల నుంచి ప్రారంభమవుతోంది. Maruti Eeco ధర రూ.5.28 లక్షల నుంచి ఉంది. Hyundai Grand i10 Nios రూ.5.60 లక్షల నుంచి, Nissan Magnite రూ.5.68 లక్షల నుంచి ప్రారంభమవుతున్నాయి.

టాటా ఏరిస్‌, మారుతి ఈకో, హ్యుందాయ్‌ గ్రాండ్‌ ఐ10 నియోస్‌, నిస్సాన్‌ మాగ్నైట్‌ తప్ప మిగిలిన 7 మోడళ్లను రూ.5 లక్షల (ఎక్స్‌షోరూమ్‌) ధర లోపే కొనుగోలు చేయవచ్చు.

ఇది కూడా చదవండి: రూ.9.19 లక్షల ధరలో రెండు మంచి సెడాన్లు.. బూట్ స్పేస్, మైలేజీ, ఫీచర్లలో రెండిటి మధ్య తేడాలు

పైన చెప్పినవన్నీ ఆయా మోడళ్ల బేస్‌ వేరియంట్లు, వాటి ఎక్స్‌షోరూమ్‌ ధరలు. RTO రుసుములు, ఇన్సూరెన్స్‌, ఇతర అవసరమైన ఖర్చులు కలిపితే ఆన్‌రోడ్‌ ధర వస్తుంది, ఇది ఎక్స్‌-షోరూమ్‌ ధర కంటే ఎక్కువగా ఉంటుందని గమనించండి. తెలుగు రాష్ట్రాల్లోని నగరం, షోరూమ్‌ను బట్టి ఆన్‌రోడ్‌ ధరల్లో చిన్నపాటి మార్పులు కూడా ఉండవచ్చు.

కారు కొనేటప్పుడు కేవలం ప్రారంభ ధరను మాత్రమే చూడకూడదు. కాస్త ఖర్చు ఎక్కువైనా, మీ అవసరానికి సరిపోయే వేరియంట్‌ను ఎంచుకోవాలి. దసరా సమయంలో కంపెనీలు, డీలర్లు అందించే ఆఫర్లను కూడా పరిశీలిస్తే తుది ధరలో కొంత ప్రయోజనం పొందే అవకాశం ఉంటుంది.

టెక్టన్‌ కంటే పెద్ద కారు త్వరలోనే రాబోతోంది.. నిస్సాన్‌ కొత్త 7 సీటర్‌ SUV ఫొటోలు లీక్‌!

Arun Kumar Veera — Thu, 1 Oct 2026 11:46:52 +0530

Upcoming Nissan 7-seater SUV: నిస్సాన్‌ నుంచి మరో కొత్త SUV రాబోతోంది. ఇప్పటికే భారత మార్కెట్‌లో కొత్త మోడళ్లతో బలోపేతం అవుతున్న నిస్సాన్‌.. ఇప్పుడు 7 సీటర్‌ SUVపై ఫోకస్‌ పెట్టింది. ఈ కొత్త SUVని కంపెనీ రహస్యంగా పరీక్షిస్తోంది. తాజాగా, ఈ కారు టెస్టింగ్‌ సమయంలో కెమెరాకు చిక్కింది. టెక్టన్‌ ఆధారంగా ఈ SUV రూపొందుతున్నప్పటికీ.. డిజైన్‌ విషయంలో చాలా మార్పులు ఉండనున్నాయి.

కొత్త 7 సీటర్‌ SUVని 2027లో భారత మార్కెట్‌లోకి తీసుకురానున్నట్లు నిస్సాన్‌ గతంలోనే ప్రకటించింది. నిస్సాన్‌ టెక్టన్‌తో ఈ కొత్త SUVకి కొన్ని పోలికలు ఉన్నప్పటికీ.. ఇది కేవలం టెక్టన్‌కు ఎక్స్‌టెన్షన్‌ వెర్షన్‌ మాత్రం కాదని కంపెనీ స్పష్టం చేసింది. టెక్టన్‌ మాదిరిగానే CMF-B ప్లాట్‌ఫామ్‌ను ఉపయోగించినా.. కొత్త SUVని ప్రత్యేకంగా అభివృద్ధి చేస్తున్నట్లు నిస్సాన్‌ ఇండియా తెలిపింది.

భారీగా మారనున్న సైజు

టెస్టింగ్‌లో కనిపించిన SUV పూర్తిగా క్యామోఫ్లాజ్‌తో ఉంది. అయినప్పటికీ దాని పరిమాణంలో మార్పులు స్పష్టంగా కనిపిస్తున్నాయి. 5 సీటర్‌ టెక్టన్‌తో పోలిస్తే కొత్త SUV పొడవుగా కనిపిస్తోంది. వెనుక చక్రాల తర్వాత భాగం ఎక్కువగా ఉంది. వెనుక క్వార్టర్‌ ప్యానెల్‌ పొడవుగా ఉంటుంది. వెనుక క్వార్టర్‌ గ్లాస్‌ కూడా పెద్దదిగా కనిపిస్తోంది.

ముందు భాగంలో టెక్టన్‌లో కనిపించే ఇన్‌వర్టెడ్‌ L ఆకారపు LED డేటైమ్‌ రన్నింగ్‌ ల్యాంప్స్‌ ఉంటాయి. LED హెడ్‌ల్యాంప్స్‌ కూడా కొనసాగనున్నాయి. అయితే క్యామోఫ్లాజ్‌ కారణంగా గ్రిల్‌, బంపర్‌ వివరాలు పూర్తిగా బయటకు కనిపించలేదు. కొత్త SUVలో వీటిని కొంతవరకు మార్చే అవకాశం ఉంది.

వెనుక భాగంలో మాత్రం డిజైన్‌ మార్పులు స్పష్టంగా కనిపిస్తున్నాయి. టెక్టన్‌లో కనిపించే C ఆకారపు LED టెయిల్‌ ల్యాంప్స్‌కు బదులుగా కొత్త SUVలో బూమరాంగ్‌ ఆకారపు టెయిల్‌ ల్యాంప్స్‌ ఉన్నాయి. ఇవి కిందివైపు కూడా విస్తరించినట్లు కనిపిస్తున్నాయి. రెండు టెయిల్‌ ల్యాంప్స్‌ను కలిపే LED లైట్‌ బార్‌ కూడా మరింత మందంగా ఉంది. వెనుక విండ్‌షీల్డ్‌ ఫ్లాట్‌గా ఉండేలా డిజైన్‌ చేశారు.

మూడు వరుసల సీట్లు

కొత్త నిస్సాన్‌ SUVలో మూడు వరుసల సీట్లు ఉంటాయి. మొత్తం ఏడుగురు ప్రయాణించేలా 5+2 లేఅవుట్‌ ఉండే అవకాశం ఉంది. క్యాబిన్‌ పూర్తి వివరాలు ఇంకా వెల్లడికాలేదు. అయితే టెక్టన్‌తో పోలిస్తే పెద్ద SUV కావడంతో అదనపు ఫీచర్లు కూడా అందించే అవకాశం ఉంది.

పెద్ద ఇంజిన్‌తో వచ్చే అవకాశం

ఇంజిన్‌ విషయంలో కూడా నిస్సాన్‌ కీలక మార్పు చేయనుంది. టెక్టన్‌లో ఉన్న 1.0 లీటర్‌ టర్బో పెట్రోల్‌ ఇంజిన్‌ను 7 సీటర్‌ SUVలో అందించే అవకాశం లేదు. దానికి బదులుగా టెక్టన్‌లోని 1.3 లీటర్‌ 4 సిలిండర్‌ డైరెక్ట్‌ ఇంజెక్షన్‌ టర్బో పెట్రోల్‌ ఇంజిన్‌ను ఉపయోగించే అవకాశం ఉంది.

ఈ ఇంజిన్‌తో 6 స్పీడ్‌ మాన్యువల్‌ గేర్‌బాక్స్‌ & 6 స్పీడ్‌ వెట్‌ డ్యూయల్‌ క్లచ్‌ ఆటోమేటిక్‌ గేర్‌బాక్స్‌ ఆప్షన్లు వచ్చే అవకాశం ఉంది. ఫ్రంట్‌ వీల్‌ డ్రైవ్‌ వ్యవస్థ ఉండొచ్చని తెలుస్తోంది.

ఇది కూడా చదవండి: Best Bikes Under Rs 1 Lakh: తక్కువ బడ్జెట్ అయితే ఈ బైక్‌లు కొనండి.. ఇంజిన్‌లో పవర్‌ఫుల్, మైలేజ్‌లో బెస్ట్

ధర ఎంత?

భారత మార్కెట్‌లో ఈ కొత్త 7 సీటర్‌ SUV ధర రూ.18 లక్షల నుంచి రూ.22 లక్షల (ఎక్స్‌షోరూమ్‌) మధ్య ఉండొచ్చని అంచనా. మార్కెట్‌లోకి వచ్చిన తర్వాత మహీంద్రా XUV 7XO, టాటా సఫారీ & హ్యుందాయ్‌ అల్కాజర్‌ వంటి 3 వరుసల SUVలకు ఇది పోటీ ఇవ్వనుంది.

కైలాక్‌ నుంచి కొడియాక్‌ వరకు బాదుడు.. స్కోడా కార్ల ధరలు రూ.20,000 వరకు పెంపు

Arun Kumar Veera — Thu, 1 Oct 2026 10:10:13 +0530

Skoda hike prices from October 2026: కొత్త కారు కొనాలని ప్లాన్ చేస్తున్నవాళ్లకు షాకింగ్‌ న్యూస్‌. స్కోడా కారు కొనాలంటే ఇకపై జేబుకు మరింత చిల్లు పడనుంది. ఇండియన్‌ మార్కెట్‌లో తన కార్ల ధరలను స్కోడా పెంచింది. అక్టోబర్ 1, 2026 నుంచి ఈ ధరల పెంపు అమల్లోకి వచ్చింది.

స్కోడా ఇండియా పోర్ట్‌ఫోలియోలోని అన్ని మోడళ్లపై ధరలు గరిష్ఠంగా 1.2 శాతం వరకు పెరిగాయి. అయితే, పెంచిన ధర ఏ మోడల్‌ను బట్టి మారుతుంది. వేరియంట్‌ను బట్టి కూడా ధర మారుతుంది. ధరల పెంపును గరిష్ఠ రూ.20,000కు పరిమితం చేసినట్లు స్కోడా తెలిపింది.

ఇన్‌పుట్‌ ఖర్చులు పెరగడం & నిర్వహణ వ్యయాలు అధికం కావడంతో ఈ నిర్ణయం తీసుకున్నట్లు స్కోడా వెల్లడించింది. ప్రస్తుతం ఈ కంపెనీ భారత మార్కెట్‌లో కైలాక్‌, స్లావియా, కుషాక్‌, కొడియాక్‌ మోడళ్లను విక్రయిస్తోంది.

మోడళ్లు - పెరిగిన ధరలు

Kylaq ధర ప్రస్తుతం రూ.7.59 లక్షల నుంచి రూ.12.99 లక్షల వరకు ఉంది. గరిష్ఠంగా 1.2 శాతం పెంపును లెక్కిస్తే రూ.15,588 వరకు అదనపు భారం పడుతుంది.

Slavia ధర ప్రస్తుతం రూ.10 లక్షల నుంచి రూ.18.19 లక్షల వరకు ఉంది. ఈ మోడల్‌పై గరిష్ఠంగా రూ.20,000 వరకు ధర పెరగొచ్చు.

Kushaq ధర రూ.10.69 లక్షల నుంచి రూ.18.99 లక్షల మధ్య ఉంది. ఈ కారుపైనా గరిష్ఠంగా రూ.20,000 వరకు పెంపు ఉంటుంది.

Kodiaq ధర రూ.36.99 లక్షల నుంచి రూ.66.99 లక్షల వరకు ఉంది. ఈ ప్రీమియం ఎస్‌యూవీపై గరిష్ఠంగా రూ.20,000 వరకు ధర పెరగొచ్చు.

ఇది కూడా చదవండి: Renault Triber 7-సీటర్‌ ఫ్యామిలీ కారు.. రూ.1.16 లక్షల డౌన్‌పేమెంట్‌ చాలు, మిగిలింది EMIల్లో చూసుకోవచ్చు

పైన చెప్పిన లెక్కలు గరిష్ఠంగా 1.2 శాతం పెంపును ఆధారంగా చేసుకుని చేసిన అంచనాలు మాత్రమే. మోడల్‌ & వేరియంట్‌ వారీగా ఖచ్చితమైన కొత్త ధరలను స్కోడా ఇంకా ప్రకటించలేదు. కాబట్టి వాస్తవ ధరల పెంపు కొంత తక్కువగా ఉండే అవకాశం కూడా ఉంది.

ఇది రెండోసారి

స్కోడా కార్ల ధరలు ఈ ఏడాది ఇప్పటికే ఒకసారి పెరిగాయి. జనవరిలో జరిగిన ధరల సవరణలో స్లావియా, కైలాక్‌, కుషాక్‌ కొనేవాళ్లకు షాక్‌ తగిలింది. స్లావియా ధర గరిష్ఠంగా రూ.34,000 వరకు పెరిగింది. కైలాక్‌ రేటు రూ.19,000 వరకు పెరిగింది. కుషాక్‌ ధర రూ.5,000 నుంచి రూ.7,000 వరకు పెరిగింది.

ఇప్పుడు మరోసారి ధరల పెంపుతో కొత్త కారు కొనేవాళ్లపై అదనపు భారం పడనుంది. ముఖ్యంగా, ఈ పండుగల సీజన్‌లో కార్లకు డిమాండ్ పెరిగే సమయంలో ఈ నిర్ణయం అమల్లోకి రావడం గమనార్హం.

ఇదిలా ఉంటే, స్లావియా ఫేస్‌లిఫ్ట్‌ (Slavia Facelift) అక్టోబర్ 6న మార్కెట్‌లోకి రానుంది. ఈ కొత్త మోడల్‌ కోసం ఇప్పటికే బుకింగ్స్‌ కూడా ప్రారంభమయ్యాయి.

ఇది కూడా చదవండి: Renault Triber కొనేవాళ్ల అసలు ఛాయిస్ ఇదే.. ఈ వేరియంట్‌లో ఫీచర్లు & పవర్ రెండూ పక్కా!

ఇటీవల, మారుతి సుజుకి, హ్యుందాయ్‌, కియా, మహీంద్రా & టాటా మోటార్స్‌ వంటి కంపెనీలు కూడా ధరలను పెంచాయి.

Best Bikes Under Rs 1 Lakh: తక్కువ బడ్జెట్ అయితే ఈ బైక్‌లు కొనండి.. ఇంజిన్‌లో పవర్‌ఫుల్, మైలేజ్‌లో బెస్ట్

Shankar Dukanam — Thu, 1 Oct 2026 05:31:34 +0530

Bikes Under Rs 1 lakh | ఒకవేళ మీ బడ్జెట్ తక్కువగా ఉండి, మీరు రోజూ ఆఫీసు లేదా మార్కెటింగ్ వర్క్ మీద జర్నీ కోసం బైక్ కొనాలనుకుంటే అనేక మంచి ఆప్షన్లు ఉన్నాయి. తక్కువ ధర కలిగిన బైక్‌లలో సైతం శక్తివంతమైన ఇంజిన్, మెరుగైన మైలేజ్, అవసరమైన ఫీచర్లు లభిస్తున్నాయి. సెప్టెంబర్ లెక్కల ప్రకారం ₹1 లక్ష బడ్జెట్‌లో హీరో, హోండా, బజాజ్, టీవీఎస్ వంటి బ్రాండ్లకు చెందిన పలు బైక్‌లు మార్కెట్లో విక్రయాల్లో దూసుకెళ్తున్నాయి.

హీరో స్ప్లెండర్ ప్లస్ బైక్

తక్కువ బడ్జెట్ బైక్‌ల విషయానికి వస్తే హీరో స్ప్లెండర్ ప్లస్ పేరు ప్రముఖంగా వినిపిస్తోంది. సెప్టెంబర్ లిస్టింగ్ ప్రకారం దీని ఆన్-రోడ్ ధర దాదాపు రూ. 95,860 నుంచి ప్రారంభమవుతుంది. అలాగే మైలేజ్ లీటరుకు దాదాపు 63 కి.మీ. ఇందులో 97.2 cc ఇంజిన్ వస్తుంది. ఈ బైక్ రోజూ నడిపేవారికి సరిగ్గా సరిపోతుంది. దీని తక్కువ బరువు, మంచి ఫ్యూయల్ ఎఫిషియెన్సీ బైకును రోజువారీ వినియోగించేలా చేస్తుంది. ఒకవేళ మీరు నగరంలో ఎక్కువగా వినియోగిస్తే.. మీ మొదటి ప్రాధాన్యత మైలేజ్ అనుకుంటే హీరో స్ప్లెండర్ ప్లస్ మీకు బాగా సెట్ అవుతుంది.

హోండా షైన్ 100.. బజాజ్ ప్లాటినా 100

తక్కువ బడ్జెట్‌లో వచ్చే కమ్యూటర్ బైక్‌ల జాబితాలో హోండా షైన్ 100 ఉంటుంది. హైదరాబాద్‌లో షైన్ ఆన్-రోడ్ ధర దాదాపు రూ.84,000 నుంచి ప్రారంభమవుతుంది. మైలేజ్ లీటరుకు దాదాపు 65 కి.మీ వెళ్తుంది. ఇందులో 98.98 cc ఇంజిన్ ఇచ్చారు. మరోవైపు హైదరాబాద్‌లో బజాజ్ ప్లాటినా 100 ధర 93,167 నుంచి ప్రారంభమవుతుంది. ఈ బైక్ 99.59 cc ఇంజిన్‌తో రాగా, 8.2 PS మ్యాగ్జిమం పవర్, 8.3 Nm మ్యాగ్జిమం టార్క్‌ను అందిస్తుంది. మెరుగైన ఫ్యూయల్ ఎఫిషియెన్సీ, కంఫర్టెక్ టెక్నాలజీని కంపెనీ అందిస్తోంది. ప్లాటినా 100 లో పొడవైన సీటుతో పాటు సస్పెన్షన్ సెటప్ ఇచ్చారు. అందువల్ల రోజువారీ జర్నీలో కంఫర్ట్ ఉండేలా చేశారు. మీ బడ్జెట్ దాదాపు ₹75,000 ఆసరాలో ఉంటే ఈ బైక్‌ను పరిశీలించవచ్చు.

టీవీఎస్ స్పోర్ట్, బజాజ్ సీటీ 110ఎక్స్

తక్కువ ధరలో మంచి మైలేజ్ ఇచ్చే బైక్‌లలో టీవీఎస్ స్పోర్ట్ ఒకటి. టీవీఎస్ కంపెనీ వెబ్‌సైట్‌లో దీని సెల్ఫ్ స్టార్ట్ వేరియంట్ల ఎక్స్-షోరూమ్ ధర రూ.69,100 నుంచి ఉన్నాయి. ఆన్ రోడ్ ధర రూ. 92,800 ఉంది. బజాజ్ సీటీ 110ఎక్స్ (CT 110X) ఆన్ రోడ్ ధర రూ. 91,888 నుంచి ప్రారంభమవుతుంది. ఇందులో 115.45 cc ఇంజిన్ వస్తుంది. 9.5 PS పవర్, 9.9 Nm మ్యాగ్జిమం టార్క్‌ను అందిస్తుంది. ఇంజిన్ కెపాసిటీ ఎక్కుగా ఉండాలని కోరుకుంటే బజాజ్ సీటీ 110ఎక్స్ ఒక మంచి ఆప్షన్ కానుంది.

Renault Triber 7-సీటర్‌ ఫ్యామిలీ కారు.. రూ.1.16 లక్షల డౌన్‌పేమెంట్‌ చాలు, మిగిలింది EMIల్లో చూసుకోవచ్చు

Arun Kumar Veera — Wed, 30 Sep 2026 12:09:11 +0530

Renault Triber Price, Down Payment, Loan and EMI Details: మధ్యతరగతి కుటుంబాల సొంత కారు కల నెరవేర్చడంలో రెనాల్ట్‌ ట్రైబర్ ముందంజలో ఉంది. తక్కువ ధరలోనే ఎక్కువ స్పేస్ అందించే ఈ ఏడు సీట్ల MPV దేశవ్యాప్తంగా మంచి ఆదరణ పొందుతోంది. తెలుగు రాష్ట్రాల్లో ఈ కారు ఆన్‌రోడ్‌ ధర దాదాపు రూ.7.07 లక్షల నుంచి ప్రారంభమవుతుంది. కస్టమర్‌ ఈ మొత్తాన్ని ఒకేసారి కట్టాల్సిన అవసరం లేకుండా, ముందుగా కనీస డౌన్‌పేమెంట్‌ రూ.1.16 లక్షలు కడితే చాలు. మిగిలిన డబ్బును సులభమైన వాయిదాల్లో చెల్లించేలా వివిధ బ్యాంక్‌లు EMI స్కీమ్‌లను అందిస్తున్నాయి.

స్టైలిష్ డిజైన్ & స్పేషియస్ ఇంటీరియర్స్
రెనాల్ట్‌ ట్రైబర్ డిజైన్ పరంగా చాలా ఆకర్షణీయంగా ఉంటుంది. ఇందులో సరికొత్త LED ప్రొజెక్టర్ హెడ్‌లాంప్స్, మస్క్యులర్ గ్రిల్ & రూఫ్ రయిల్స్ ఉన్నాయి. లోపల ఏడుగురు ప్రయాణించేలా సౌకర్యవంతమైన సీటింగ్ వ్యవస్థ ఉంది. మూడో వరుస సీట్లను అవసరాన్ని బట్టి తొలగించి బూట్ స్పేస్ పెంచుకునే సదుపాయం ఇచ్చారు.

ఇంజిన్ సామర్థ్యం & మైలేజ్
ఈ కారులో 1.0 లీటర్ 3 సిలిండర్ పెట్రోల్ ఇంజిన్ అందించారు. ఇది 72 PS పవర్ & 96 Nm టార్క్‌ను ఉత్పత్తి చేస్తుంది. 5 స్పీడ్ మాన్యువల్ & AMT గేర్‌బాక్స్ ఆప్షన్లు అందుబాటులో ఉన్నాయి. లీటరుకు సుమారు 18 నుంచి 20 కిలోమీటర్ల వరకు మైలేజ్ లభిస్తుంది.

హైదరాబాద్‌లో తాజా ఎక్స్‌-షోరూమ్‌ & ఆన్‌రోడ్‌ ధరలు
హైదరాబాద్ మార్కెట్‌లో రెనాల్ట్‌ ట్రైబర్ బేస్ వేరియంట్ Authentic Petrol Manual ఎక్స్-షోరూమ్ ధర రూ. 5,80,875 వద్ద ప్రారంభమవుతుంది. RTO రిజిస్ట్రేషన్, ఇన్సూరెన్స్ & ఇతర చార్జీలు కలిపి హైదరాబాద్‌లో ఆన్‌రోడ్ ధర రూ. 7.07 లక్షల నుంచి మొదలై టాప్ వేరియంట్‌కు రూ. 10.45 లక్షల వరకు ఉంటుంది.

విజయవాడలో తాజా ఎక్స్‌-షోరూమ్‌ & ఆన్‌రోడ్‌ ధరలు
విజయవాడ మార్కెట్‌లో కూడా రెనాల్ట్‌ ట్రైబర్ బేస్ వేరియంట్ ఎక్స్-షోరూమ్ ధర రూ. 5,80,875 వద్ద ప్రారంభమవుతుంది. RTO రిజిస్ట్రేషన్, ఇన్సూరెన్స్ & ఇతర చార్జీలు కలిపి ఇక్కడ ఆన్‌రోడ్ ధర రూ. 6.97 లక్షల నుంచి మొదలై టాప్ వేరియంట్‌కు రూ. 10.45 లక్షల వరకు ఉంటుంది.

కనీస డౌన్‌పేమెంట్‌ & ఫైనాన్స్
వివిధ ఫైనాన్స్ కంపెనీలు & ప్రముఖ బ్యాంకులు కారు ఆన్‌రోడ్ ధరపై 80 శాతం వరకు రుణం అందిస్తున్నాయి. కస్టమర్‌ కనీసం రూ.1.16 లక్షలు డౌన్‌పేమెంట్ చెల్లించి ఈ కారును సొంతం చేసుకోవచ్చు. SBI, HDFC, ICICI & యాక్సిస్ బ్యాంకులు ఏడాదికి 8.5% నుంచి 14% మధ్య వడ్డీ రేట్లతో ఆటో లోన్స్ ఇస్తున్నాయి.

10% వడ్డీ రేటుతో వివిధ కాలపరిమితులకు EMI లెక్కలు

మీరు విజయవాడలో రెనాల్ట్‌ ట్రైబర్ బేస్ వేరియంట్‌ను కొనాలని భావిస్తే, కనీసం రూ.1.16 లక్షల డౌన్‌పేమెంట్ చెల్లిస్తే, మిగిలిన రూ.5.81 లక్షలను బ్యాంక్‌ లోన్‌గా ఇస్తుంది. బ్యాంక్‌ ఈ రుణంపై ఏడాదికి 10% వడ్డీ వసూలు చేస్తుంది అనుకుంటే, 4 ఏళ్ల నుంచి 7 ఏళ్ల ఆప్షన్లకు EMI వివరాలు:

4 ఏళ్ల కాలపరిమితికి ‍‌(48 నెలలు) EMI రూ. 14,722
5 ఏళ్ల కాలపరిమితికి ‍‌(60 నెలలు) EMI రూ. 12,333
6 ఏళ్ల కాలపరిమితికి ‍‌(72 నెలలు) EMI రూ. 10,754
7 ఏళ్ల కాలపరిమితికి ‍‌(84 నెలలు) EMI రూ. 9,636

ఇదే బేస్‌ వేరియంట్‌ కోసం రూ.2 లక్షలు డౌన్‌పేమెంట్ చేసి మిగిలిన రూ.4.97 లక్షలను లోన్‌ తీసుకుంటే, ఈ రుణంపై ఏడాదికి 10% వడ్డీ అనుకుంటే, EMI వివరాలు:

4 ఏళ్ల కాలపరిమితికి ‍‌(48 నెలలు) EMI రూ. 12,592
5 ఏళ్ల కాలపరిమితికి ‍‌(60 నెలలు) EMI రూ. 10,549
6 ఏళ్ల కాలపరిమితికి ‍‌(72 నెలలు) EMI రూ. 9,198
7 ఏళ్ల కాలపరిమితికి ‍‌(84 నెలలు) EMI రూ. 8,242

ఈ ప్రకారం.. మీరు రూ.2 లక్షలు డౌన్‌పేమెంట్ చేసి, మిగిలిన డబ్బు చెల్లించడానికి 7 ఏళ్ల కాలపరిమితిని ఎంచుకుంటే నెలకు కేవలం రూ.8,242 EMIతో ఈ కారు మీ సొంతం అవుతుంది.

రెనాల్ట్‌ షోరూమ్‌కు వెళ్లేముందే మీ సిబిల్ స్కోర్‌ను కూడా చెక్‌ చేసుకోండి. సిబిల్ స్కోర్ 750 కంటే ఎక్కువగా ఉంటే బ్యాంకులు 10% కంటే తక్కువ వడ్డీకే లోన్ ఇచ్చే అవకాశం ఉంది. మీ సిబిల్‌ స్కోర్‌ను బట్టి డౌన్‌పేమెంట్‌, వడ్డీ రేట్లు మారతాయి. అలాగే, నగరాన్ని బట్టి ఆన్‌రోడ్‌ ధరల్లో వ్యత్యాసం ఉండవచ్చు.

Renault Triber కొనేవాళ్ల అసలు ఛాయిస్ ఇదే.. ఈ వేరియంట్‌లో ఫీచర్లు & పవర్ రెండూ పక్కా!

Arun Kumar Veera — Wed, 30 Sep 2026 11:18:27 +0530

Renault Triber Price, Mileage And Features Telugu: రెనాల్ట్‌ ట్రైబర్‌ కొనేవాళ్లు.. తమ అవసరానికి ఏ వేరియంట్ సరిపోతుందో తెలుసుకోవడం చాలా ముఖ్యం. 2025లో ఫేస్‌లిఫ్ట్ రూపంలో వచ్చిన ఈ 7 సీటర్ కారులో రెనాల్ట్‌ కీలక మార్పులు చేసింది. కొత్త డిజైన్‌తో పాటు ఫీచర్లు, భద్రత పరికరాలు, ఇంజిన్ ఎంపికలను కూడా అప్‌డేట్ చేసింది. ప్రస్తుతం ట్రైబర్ 4 ప్రధాన వేరియంట్లలో అందుబాటులో ఉంది, అవి - అథెంటిక్, ఎవల్యూషన్, టెక్నో, ఎమోషన్. ఈ నాలుగు వేరియంట్లలోనూ సహజ పెట్రోల్ ఇంజిన్‌తో పాటు కొత్త టర్బో పెట్రోల్ ఎంపిక కూడా అందుబాటులో ఉంది.

అథెంటిక్ వేరియంట్‌
ట్రైబర్ ప్రారంభ ధర రూ.5.80 లక్షలు (ఎక్స్-షోరూమ్). ఎంట్రీ లెవల్ అథెంటిక్ వేరియంట్‌లోనే 6 ఎయిర్‌బ్యాగ్స్, టైర్ ప్రెజర్ మానిటరింగ్ సిస్టమ్, ఎలక్ట్రానిక్ స్టెబిలిటీ ప్రోగ్రామ్, ట్రాక్షన్ కంట్రోల్, హిల్ స్టార్ట్ అసిస్ట్ వంటి భద్రత ఫీచర్లు ఉన్నాయి. 14 అంగుళాల స్టీల్ వీల్స్, మాన్యువల్ AC, పవర్ విండోస్, డిజిటల్ ఇన్‌స్ట్రుమెంట్ క్లస్టర్, వెనుక పార్కింగ్ సెన్సర్లు కూడా లభిస్తాయి.

ఎవల్యూషన్ వేరియంట్‌
రూ.6.73 లక్షల (ఎక్స్-షోరూమ్) నుంచి ప్రారంభమయ్యే ఎవల్యూషన్ వేరియంట్‌లో ఫీచర్ల జాబితా మరింత పెరుగుతుంది. అథెంటిక్ వేరియంట్‌లో ఉన్న ఫీచర్లతో పాటు 8 అంగుళాల టచ్‌స్క్రీన్, వైర్డ్ ఆండ్రాయిడ్ ఆటో & యాపిల్ కార్‌ప్లే, 4 స్పీకర్ల సౌండ్ సిస్టమ్, స్టీరింగ్ మౌంటెడ్ కంట్రోల్స్, రియర్ వ్యూ కెమెరా కూడా ఇందులో లభిస్తాయి. ఈ వేరియంట్‌తోనే ట్రైబర్‌లో రోజువారీ ఉపయోగానికి అవసరమైన ముఖ్యమైన సౌకర్యాలు మెరుగ్గా అందుతాయి.

టెక్నో వేరియంట్‌
రూ.7.44 లక్షల (ఎక్స్-షోరూమ్) నుంచి లభించే టెక్నో వేరియంట్‌లో పైన చెప్పిన అన్ని ఫీచర్లతో పాటు మరిన్ని అదనపు ఫీచర్లు ఉన్నాయి. 15 అంగుళాల స్టీల్ వీల్స్, LED టెయిల్ ల్యాంప్స్, ఎలక్ట్రికల్లీ అడ్జస్టబుల్ & ఆటో ఫోల్డింగ్ ORVMలు, రియర్ వైపర్, వాషర్ & డీఫాగర్, డ్రైవర్ సీట్ ఎత్తు సర్దుబాటు, ఆర్మ్‌రెస్ట్ వంటి సౌకర్యాలు ఇందులో ఉన్నాయి. రెండో & మూడో వరుసలకు 12V సాకెట్ కూడా లభిస్తుంది.

ఇక టెక్నో టర్బో ధర రూ.8.53 లక్షలు (ఎక్స్-షోరూమ్). ఈ వేరియంట్‌లో కొత్త 1.0 లీటర్ టర్బో పెట్రోల్ ఇంజిన్ ఉంటుంది. ఇది 100hp శక్తి & 180Nm టార్క్ ఉత్పత్తి చేస్తుంది. 5-స్పీడ్ MTతో మాత్రమే వస్తుంది. సాధారణ ఇంజిన్‌తో పోలిస్తే ఇది 28hp ఎక్కువ శక్తిని అందిస్తుంది. ఎక్కువ మంది ప్రయాణికులతో కారును నడిపే వారికి ఈ అదనపు శక్తి ఉపయోగపడుతుంది.

ఎమోషన్ వేరియంట్
టాప్-స్పెక్ ఎమోషన్ వేరియంట్ ధర రూ.8.05 లక్షల (ఎక్స్-షోరూమ్) నుంచి ప్రారంభమవుతుంది. ఇందులో.. పైన మూడు వేరియంట్లలో ఉన్న ఫీచర్లతో పాటు ఆటోమేటిక్ AC, వైర్‌లెస్ ఆండ్రాయిడ్ ఆటో & యాపిల్ కార్‌ప్లే, వైర్‌లెస్ ఛార్జింగ్, 7 అంగుళాల TFT డిజిటల్ ఇన్‌స్ట్రుమెంట్ క్లస్టర్, పుష్ బటన్ స్టార్ట్, ఆటోమేటిక్ హెడ్‌ల్యాంప్స్, రెయిన్ సెన్సింగ్ వైపర్స్, ఫ్రంట్ పార్కింగ్ సెన్సర్లు వస్తాయి. సహజ పెట్రోల్ ఇంజిన్‌తో AMT ఎంపిక కూడా ఈ వేరియంట్‌లోనే లభిస్తుంది.

రంగులు
ట్రైబర్‌లో మొత్తం తొమ్మిది రంగుల ఎంపికలు ఉన్నాయి. వీటిలో ఆరు సింగిల్ టోన్ రంగులు. మూడు డ్యూయల్ టోన్ రంగులు. డ్యూయల్ టోన్ రంగులు ఎమోషన్ వేరియంట్‌కు మాత్రమే అందుబాటులో ఉన్నాయి.

ఫీచర్లు, ధర & పనితీరును కలిపి చూస్తే టెక్నో టర్బో వేరియంట్‌పై ప్రజల ఆసక్తి కనిపిస్తోంది. రూ.8.53 లక్షలకు 100hp టర్బో ఇంజిన్‌తో పాటు అవసరమైన కీలక ఫీచర్లు లభిస్తాయి. టాప్ ఎమోషన్‌లో అదనపు సౌకర్యాలు ఎక్కువగా ఉన్నా, వాటి కోసం మరింత ఖర్చు చేయాల్సి ఉంటుంది. అందుకే ఎక్కువ శక్తి కోరుకునే ట్రైబర్ కొనుగోలుదారులకు టెక్నో టర్బో ఒక ముఖ్యమైన ఎంపికగా నిలుస్తోంది.

2026 Bajaj Pulsar NS125 కొత్త అవతార్.. ఇక LCD డిస్‌ప్లేతో పాటు మరిన్ని ఫీచర్లు!

Arun Kumar Veera — Wed, 30 Sep 2026 09:49:24 +0530

2026 Bajaj Pulsar NS125 Details: బజాజ్ ఆటో తన ఎంట్రీ లెవల్ స్పోర్టీ కమ్యూటర్ బైక్ పల్సర్ NS125ను అప్‌డేట్ చేయడానికి సిద్ధమవుతోంది. 2026 మోడల్‌కు సంబంధించిన వివరాలు లీక్ అయ్యాయి. ఈ కొత్త బైక్ ఇప్పటికే డీలర్‌షిప్‌ల వద్ద కనిపించినట్లు లీక్‌ అయిన ఫోటోలను బట్టి తెలుస్తోంది. బైక్‌లు డీలర్‌షిప్‌లకు చేరాయి కాబట్టి, త్వరలోనే అధికారిక లాంచ్ జరిగే అవకాశం ఉంది.

కొత్త LCD డిస్‌ప్లే

2026 పల్సర్ NS125లో కనిపించే ప్రధాన మార్పు కొత్త ఇన్‌స్ట్రుమెంట్ క్లస్టర్. ప్రస్తుతం ఉన్న నెగెటివ్ LCD యూనిట్ స్థానంలో కొత్త ఫుల్ కలర్ LCD డిస్‌ప్లే రానుంది. బజాజ్ ఇటీవల అప్‌డేట్ చేసిన ఇతర పల్సర్ మోడళ్లకు అనుగుణంగా ఈ మార్పు చేసింది.

ఇటీవల అప్‌డేట్ అయిన పల్సర్ 125, పల్సర్ 150 & N160లో కూడా ఇలాంటి డిస్‌ప్లేలు అందుబాటులో ఉన్నాయి. NS125లోని కొన్ని అధిక వేరియంట్లకు 5 అంగుళాల TFT డిస్‌ప్లే కూడా వచ్చే అవకాశం ఉంది. ఇదే డిస్‌ప్లే N160 SS, పల్సర్ 125, పల్సర్ 150, NS200 & NS400Zలోని కొన్ని వేరియంట్లలో కనిపిస్తుంది.

ఈ TFT డిస్‌ప్లే వస్తే గూగుల్ మ్యాప్స్ మిర్రరింగ్, కనెక్టెడ్ ఫీచర్లు వంటి సౌకర్యాలు లభించే అవకాశం ఉంది. అయితే ఇవి ఏ వేరియంట్లలో ఉంటాయనే విషయాన్ని బజాజ్ అధికారికంగా ప్రకటించాల్సి ఉంది.

కొత్త రంగుల్లో పల్సర్ NS125

డిస్‌ప్లేతో పాటు బజాజ్ కొత్త కలర్ ఆప్షన్లను కూడా తీసుకురానుంది. డీలర్‌షిప్‌ల వద్ద కనిపించిన బైక్‌లలో బ్లాక్ & రెడ్, బ్లాక్ & నియాన్ గ్రీన్, బ్లాక్ & గ్రే కలర్ కాంబినేషన్లు ఉన్నాయి.

కొత్త గ్రాఫిక్స్‌తో NS125 మరింత స్పోర్టీగా కనిపించనుంది. ఇటీవల అప్‌డేట్ చేసిన పల్సర్ మోడళ్లకు అనుగుణంగా దీని డిజైన్ కూడా ఉండనుంది. ముఖ్యంగా యువతను ఆకట్టుకునేలా రంగులు & గ్రాఫిక్స్‌లో మార్పులు చేసినట్లు తెలుస్తోంది.

ఇంజిన్‌లో మార్పులు లేవు

కొత్త NS125లో యాంత్రికంగా పెద్ద మార్పులు ఉండకపోవచ్చని తెలుస్తోంది. ప్రస్తుతం ఉన్న 124.45cc, ఎయిర్ కూల్డ్, 4-స్ట్రోక్, SOHC, 4-వాల్వ్ ఇంజిన్ కొనసాగుతుంది. ఈ ఇంజిన్ సుమారు 12hp శక్తిని 8,500rpm వద్ద అందిస్తుంది. 11Nm టార్క్‌ను 7,000rpm వద్ద విడుదల చేస్తుంది.

ఈ ఇంజిన్‌కు 5-స్పీడ్ గేర్‌బాక్స్ ఉంటుంది. పనితీరు పరంగా ఇది అప్‌డేట్ చేసిన క్లాసిక్ పల్సర్ 125 కంటే కొంత ఎక్కువ శక్తిని అందిస్తుంది. 124.8cc ఇంజిన్‌తో వచ్చే TVS రైడర్‌కు కూడా ఇది పోటీగా ఉంటుంది.

ధర ఎంత ఉండొచ్చు?

ప్రస్తుతం బజాజ్ పల్సర్ NS125 ప్రారంభ ధర రూ.99,622గా ఉంది. ఇది ఎక్స్-షోరూమ్ ధర. బజాజ్ N125 ధర రూ.92,270 (ఎక్స్-షోరూమ్) నుంచి ప్రారంభమవుతుంది. అప్‌డేట్ చేసిన క్లాసిక్ పల్సర్ 125 ధర సుమారు రూ.92,900 (ఎక్స్-షోరూమ్‌)గా ఉంది.

కొత్త LCD లేదా TFT డిస్‌ప్లే కారణంగా NS125 ధరలో కొంత పెరుగుదల ఉండే అవకాశం ఉంది. ఇదే జరిగితే, 125cc విభాగంలోని ఇతర ఫీచర్ రిచ్ బైక్‌ల ధరలతో దీని ధర మరింత దగ్గరగా ఉంటుంది. అంటే, కాంపిటీటివ్‌ ప్రైస్‌ ఉంటుంది.

ఇప్పటికే కొత్త NS125 డీలర్‌షిప్‌లకు చేరుకున్నట్లు సమాచారం. లాంచ్ & డెలివరీలు త్వరలోనే ప్రారంభమయ్యే అవకాశం ఉంది. అయితే ధర, వేరియంట్లు, ఫీచర్లపై బజాజ్ నుంచి అధికారిక ప్రకటన రావాల్సి ఉంది.