Down Payment లేకుండా Jawa లేదా Yezdi Bikes ఇంటికి తీసుకెళ్లవచ్చు.. స్పెషల్ ఆఫర్లు

స్పోర్టీ లుక్‌తో వచ్చిన ఏప్రిలియా SXR GT 175 మ్యాక్సీ స్కూటర్.. ఇంజిన్‌, ఫీచర్లు, సౌకర్యం ఎలా ఉన్నాయి?

Arun Kumar Veera — Thu, 22 Oct 2026 17:31:45 +0530

Aprilia SXR GT 175 Review Telugu: స్కూటర్ అంటే అవసరాలకు ఉపయోగించుకునే సాదాసీదా వాహనంగా మాత్రమే కాకుండా... స్పోర్టీ లుక్, మంచి పెర్ఫార్మెన్స్‌, మోడ్రన్‌ ఫీచర్లు కూడా ఉండాలని కోరుకునేవారికి ఏప్రిలియా SXR GT 175 ఆకర్షణీయమైన ఎంపికగా నిలుస్తుంది. పెద్ద బాడీ, ప్రత్యేకమైన డిజైన్‌తో ఈ మ్యాక్సీ స్కూటర్ రోడ్డుపై ప్రత్యేకంగా కనిపిస్తుంది. ఇందులో 174.7cc ఇంజిన్, 5-అంగుళాల TFT డిస్‌ప్లే, 14-అంగుళాల వీల్స్ ఉన్నాయి. మరి ఈ స్కూటర్ రోజువారీ ప్రయాణాల్లో ఎలా పనిచేస్తుంది? దీని ప్రత్యేకతలు, లోపాలు ఏమిటో చూద్దాం.

డిజైన్: రోడ్డుపై ప్రత్యేక ఆకర్షణ

Aprilia SXR GT 175 డిజైన్ ఈ స్కూటర్‌కు ప్రధాన ఆకర్షణ. షార్ప్‌ బాడీ లైన్లు, ప్రత్యేకమైన ట్రైపాడ్ LED హెడ్‌ల్యాంప్, పెద్ద పరిమాణం దీనిని సాధారణ స్కూటర్లకు భిన్నంగా నిలబెడతాయి. 14-అంగుళాల వీల్స్ కారణంగా స్కూటర్‌కు గంభీరమైన రూపం వస్తుంది. ఈ 175 మోడల్ కోసం ప్రత్యేకమైన రంగులు, గ్రాఫిక్స్‌ను కూడా అందించారు.

సాధారణ కమ్యూటర్ స్కూటర్ కంటే స్పోర్టీ మ్యాక్సీ స్కూటర్‌లా కనిపించడం దీని ప్రత్యేకత. పార్కింగ్‌లోనూ ఇతర వాహనాల మధ్య సులభంగా గుర్తించగలిగే డిజైన్‌ను ఇది కలిగి ఉంది. కేవలం ప్రయాణ అవసరాల కోసమే కాకుండా, స్టైల్‌కు ప్రాధాన్యం ఇచ్చేవారిని కూడా ఈ స్కూటర్ ఆకట్టుకునే అవకాశం ఉంది.

ఇంజిన్, పనితీరు ఎలా ఉన్నాయి?

ఈ స్కూటర్‌లో 174.7cc, సింగిల్ సిలిండర్, ఎయిర్ కూల్డ్ ఇంజిన్‌ను అందించారు. ఇది 9.76 kW పవర్, 14.14 Nm టార్క్‌ను ఉత్పత్తి చేస్తుంది. కాగితంపై ఈ గణాంకాలు భారీగా కనిపించకపోయినా, నగర ప్రయాణాలకు అవసరమైన చురుకుదనాన్ని అందించేలా ఈ స్కూటర్ రూపొందించారు.

ఇది కూడా చదవండి: రూ.1.59 లక్షలకే 25hp పవర్.. కొత్త పల్సర్ N250SSలో ఈ ఫీచర్లు అదుర్స్!

పరిమాణం పెద్దగా ఉన్నప్పటికీ, ట్రాఫిక్‌లో నడపడం సులభంగా ఉంటుంది. తక్కువ వేగంతో ప్రయాణిస్తున్నప్పుడు మలుపులు తీసుకోవడం, ఇరుకైన ప్రదేశాల్లో స్కూటర్‌ను నియంత్రించడం సౌకర్యవంతంగా ఉంటుంది. 14-అంగుళాల వీల్స్ రోడ్డుపై స్థిరత్వాన్ని అందించడంతో పాటు, వేగంగా దిశ మార్చుకునే సామర్థ్యాన్ని కూడా కొనసాగిస్తాయి.

ముందు వైపు 220mm డిస్క్ బ్రేక్‌తో పాటు ABSను అందించారు. స్పోర్టీ స్వభావం ఉన్న స్కూటర్‌కు ఇది ముఖ్యమైన ఫీచర్. మొత్తం మీద, సాధారణ కమ్యూటర్ స్కూటర్ కంటే కొంత మెరుగైన పనితీరు కోరుకునేవారికి SXR GT 175 సరిపడే ఎంపికగా కనిపిస్తుంది.

TFT డిస్‌ప్లే, కనెక్టివిటీ ఫీచర్లు

ఈ స్కూటర్‌లో 5-అంగుళాల TFT ఇన్‌స్ట్రుమెంట్ కన్సోల్ ప్రధాన ఆకర్షణ. ఇందులో రైడింగ్‌కు అవసరమైన సమాచారాన్ని స్పష్టంగా చూడవచ్చు. డిస్‌ప్లే లేఅవుట్ కూడా చక్కగా ఉంటుంది.

Bluetooth కనెక్టివిటీ ద్వారా మ్యూజిక్, కాల్స్ నిర్వహించుకునే సదుపాయం ఉంది. నావిగేషన్, టర్న్ బై టర్న్ దిశల సమాచారం కూడా రోజువారీ ప్రయాణాల్లో ఉపయోగపడుతుంది. తెలియని ప్రాంతాలకు వెళ్లేవారికి ఈ ఫీచర్లు మరింత సౌకర్యాన్ని అందిస్తాయి.

ప్రాక్టికాలిటీ విషయంలోనూ ఏప్రిలియా కొన్ని అంశాలను పరిగణనలోకి తీసుకుంది. సీటు కింద స్టోరేజ్, గ్లోవ్‌బాక్స్ ఉండటంతో రోజువారీ అవసరాలకు సంబంధించిన వస్తువులను పెట్టుకోవచ్చు. గాలి నేరుగా తగలకుండా పెద్ద విండ్‌స్క్రీన్ కొంత రక్షణ కల్పిస్తుంది. అందువల్ల ఇది కేవలం ఆకర్షణీయంగా కనిపించే స్కూటర్ మాత్రమే కాదు. రోజువారీ వినియోగానికి ఉపయోగపడే ఫీచర్లు కూడా ఉన్నాయి.

ఇది కూడా చదవండి: ఈ స్కూటర్‌ ఎక్కితే, కింద పడిపోతామనే భయం ఉండదు! స్టాండ్ అవసరం లేని BMW Vision CE ఎలక్ట్రిక్‌ స్కూటర్

ఈ స్కూటర్‌లో ఉన్న లోపాలేంటి?

ఏప్రిలియా SXR GT 175లో కొన్ని లోపాలు కూడా ఉన్నాయి. దాదాపు ఐదున్నర అడుగుల ఎత్తు ఉన్నవాళ్లకు సీటు కొంచెం ఎత్తుగా అనిపించవచ్చు. స్కూటర్‌ను నియంత్రించడం సాధ్యమే అయినప్పటికీ, తక్కువ ఎత్తు ఉన్నవాళ్లు ఈ బండిని కొనే ముందు టెస్ట్ రైడ్ చేయడం మంచిది.

మరో లోపం రిమోట్ కీ లెస్ గో ఫీచర్ లేకపోవడం. రైడింగ్ సమయంలో ఇది పెద్ద సమస్యగా అనిపించకపోయినా, ఆధునిక స్కూటర్లలో ఆశించే సౌకర్యాల్లో ఇది ఒకటి. స్టోరేజ్ కంపార్ట్‌మెంట్లకు సెంట్రల్ లాకింగ్ వ్యవస్థ ఉంటే మరింత సౌకర్యంగా ఉండేది. అలాగే బయట నుంచే అందుబాటులో ఉండే ఫ్యూయల్ ఫిల్లర్ క్యాప్ ఉంటే పెట్రోల్ నింపడం సులభమయ్యేది.

ఈ లోపాలు మొత్తం రైడింగ్ అనుభవాన్ని దెబ్బతీయకపోయినా, ఈ ఫీచర్లు కూడా ఉండి ఉంటే రోజువారీ వినియోగం మరింత సౌకర్యంగా మారతుందని చెప్పవచ్చు.

ఏప్రిలియా SXR GT 175ని కొనవచ్చా?

ఆటోమేటిక్ ట్రాన్స్‌మిషన్ సౌకర్యంతో పాటు స్పోర్టీ డిజైన్, మెరుగైన రోడ్ ప్రెజెన్స్ కోరుకునేవారికి ఏప్రిలియా SXR GT 175 సరిపోతుంది. నగర ట్రాఫిక్‌లో సులభంగా నడపగలగడం, అప్పుడప్పుడు నగరం బయటకు ప్రయాణించేందుకు సరిపడే పనితీరు ఉండటం దీని ప్లస్ పాయింట్లు.

అయితే తక్కువ సీటు ఎత్తు, ప్రతి సౌకర్యవంతమైన ఫీచర్ తప్పనిసరిగా కావాలనుకునేవారు ఇతర మోడళ్లతో పోల్చుకోవాలి. కొనుగోలు చేసే ముందు సీటు ఎత్తు, రైడింగ్ పొజిషన్, స్టోరేజ్ అవసరాలను పరిశీలించడం మంచిది.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.

39hp పవర్.. ట్విన్ సిలిండర్ ఇంజిన్.. కేటీఎం డ్యూక్‌కు పోటీ.. Kawasaki Z300 గురించి ఇంకా మీకేం తెలుసు?

Arun Kumar Veera — Thu, 22 Oct 2026 12:47:16 +0530

Kawasaki Z300 Details In Telugu: జపాన్‌కు చెందిన ప్రముఖ ద్విచక్ర వాహన తయారీ సంస్థ కవాసాకి తన Z సిరీస్‌లో కొత్త స్ట్రీట్ నేకెడ్ బైక్ Z300ను తీసుకొచ్చింది. పెద్ద బైక్ Z900 నుంచి స్ఫూర్తి పొందిన డిజైన్, 296cc ట్విన్ సిలిండర్ ఇంజిన్ ఈ బైక్‌కు ప్రత్యేక ఆకర్షణగా నిలుస్తున్నాయి. Ninja 300 ప్లాట్‌ఫామ్ ఆధారంగా రూపొందించిన ఈ మోడల్.. KTM 390 Duke, TVS Apache RTR 310 వంటి బైక్‌లకు పోటీగా నిలుస్తుంది.

కవాసాకి Z300 కొనేవాళ్లు ముందుగానే తెలుసుకోవాల్సిన 5 ముఖ్యమైన విషయాలు:

1. ఇంజిన్ సామర్థ్యం ఎంత? పవర్ ఎంత?

కవాసాకి Z300లో 296cc లిక్విడ్ కూల్డ్, ప్యారలల్ ట్విన్ సిలిండర్ ఇంజిన్‌ను అందించారు. ఈ ఇంజిన్ 11,000rpm వద్ద 39hp గరిష్ఠ పవర్‌ను ఉత్పత్తి చేస్తుంది. అలాగే 10,000rpm వద్ద 26.1Nm టార్క్‌ను అందిస్తుంది. దీనికి 6 స్పీడ్ గేర్‌బాక్స్‌ను జత చేశారు.

ఇదే ఇంజిన్‌ను కవాసాకి నింజా 300లోనూ ఉపయోగిస్తున్నారు. అయితే, Z300లో ఫెయిరింగ్ ఉండదు. వెడల్పైన సింగిల్ పీస్ హ్యాండిల్‌బార్‌ను అందించారు. దీంతో రైడర్ నిటారుగా కూర్చుని ప్రయాణించవచ్చు. నింజా 300తో పోలిస్తే నగర ప్రయాణాలకు అనువైన సౌకర్యవంతమైన రైడింగ్ అనుభవాన్ని అందించే అవకాశం ఉంది.

2. ఏయే ఫీచర్లు ఉన్నాయి?

కవాసాకి Z300లో స్మార్ట్‌ఫోన్ కనెక్టివిటీకి మద్దతు ఇచ్చే కొత్త ఇన్‌స్ట్రుమెంట్ క్లస్టర్‌ను అందించారు. ఇది నింజా 300లోని అనలాగ్, సెమీ డిజిటల్ మీటర్‌తో పోలిస్తే ఆధునిక అప్‌డేట్‌గా చెప్పవచ్చు. అయితే, బైక్ ఆవిష్కరణ కార్యక్రమంలో ఒకటి కంటే ఎక్కువ రకాల డిస్‌ప్లేలు కనిపించాయి. వాటిలో ఒకటి నెగటివ్ LCD డిస్‌ప్లేలా కనిపించగా, మరొకటి తెల్లటి బ్యాక్‌లైట్‌తో ఉంది. ఇది TFT డిస్‌ప్లే అయి ఉండవచ్చని ఎక్స్‌పర్ట్‌లు భావిస్తున్నారు. దీంతో Z300ను వేర్వేరు వేరియంట్లలో అందించే అవకాశం ఉందనే అంచనాలు ఉన్నాయి. అయితే, ఎన్ని వేరియంట్లు ఉంటాయి? ఏ వేరియంట్‌లో ఏ ఫీచర్లు ఉంటాయి? అనే విషయాలను కవాసాకి ఇంకా పూర్తిగా వెల్లడించలేదు.

ఇది కూడా చదవండి: RE Bear 650 Review: ఇంటర్‌సెప్టర్ 650 ఉండగా బేర్ 650 ఎందుకు కొనాలి? మూడు నెలల వాడకంలో తెలిసిన ఆసక్తికర విషయాలివే!

3. ఏయే రంగుల్లో లభిస్తుంది?

కవాసాకి Z300ను ప్రారంభంలో రెండు రంగుల్లో అందిస్తున్నారు. అవి గ్రీన్, బ్లాక్. స్పోర్టీ రూపాన్ని ఇష్టపడేవారిని ఆకట్టుకునేలా ఈ రంగులను ఎంపిక చేశారు. Z900 తరహా సుగోమి డిజైన్ శైలి ఈ బైక్‌కు ప్రత్యేక గుర్తింపును ఇస్తుంది. షార్ప్‌ ఎలిమెంట్స్‌, అగ్రెసివ్‌గా కనిపించే ముందు భాగం, నేకెడ్ బైక్ డిజైనింగ్‌ దీని ఆకర్షణను పెంచుతాయి.

4. ఏయే బైక్‌లతో పోటీ ఉంటుంది?

భారత మార్కెట్లో కవాసాకి Z300కు ప్రధానంగా కేటీఎం 390 డ్యూక్, టీవీఎస్ అపాచీ RTR 310 పోటీ ఇవ్వనున్నాయి. ఈ రెండు బైక్‌లలోనూ సింగిల్ సిలిండర్ ఇంజిన్లు ఉన్నాయి. స్పోర్టీ రైడింగ్‌కు అనుగుణంగా వీటి ఛాసిస్‌ను రూపొందించారు. Z300లో మాత్రం ట్విన్ సిలిండర్ ఇంజిన్ ఉండటం దీని ప్రత్యేకత. ఇంజిన్ స్మూత్‌ పెర్ఫార్మెన్స్‌, రైడింగ్ సమయంలో మెరుగైన అనుభూతిని కోరుకునేవారికి ఈ ఇంజిన్‌ ఆకర్షణీయంగా ఉండవచ్చు.

అయితే, గరిష్ఠ పనితీరు విషయంలో ప్రత్యర్థి బైక్‌లతో పోలిస్తే Z300 ఎలా నిలుస్తుందనేది వాస్తవ రైడింగ్ పరీక్షల తర్వాతే స్పష్టమవుతుంది. కవాసాకి బ్రాండ్ గుర్తింపు, ట్విన్ సిలిండర్ ఇంజిన్ ఈ బైక్‌కు ప్రత్యేకతను అందిస్తున్నాయి.

ఇది కూడా చదవండి: కేటీఎం డ్యూక్, టీవీఎస్ అపాచీకి గట్టి పోటీ.. Kawasaki Z300 లాంచ్‌.. ఈ బండి ప్రత్యేకతలు ఇవే!

5. కవాసాకి Z300 ధర ఎంత?

కవాసాకి Z300 ఎక్స్‌షోరూమ్ ధరను రూ.3.24 లక్షలుగా నిర్ణయించారు. మరోవైపు.. కేటీఎం 390 డ్యూక్ ధర రూ.2.85 లక్షలు (ఎక్స్‌షోరూమ్) కాగా, టీవీఎస్ అపాచీ RTR 310 ధర రూ.2.30 లక్షలు (ఎక్స్‌షోరూమ్).

మొత్తంగా చూస్తే.. 296cc ట్విన్ సిలిండర్ ఇంజిన్, స్పోర్టీ డిజైన్, స్మార్ట్‌ఫోన్ కనెక్టివిటీతో కవాసాకి Z300 కొత్త ఎంపికగా నిలవనుంది. అయితే, కొనుగోలు చేసే ముందు వేరియంట్లు, పూర్తి ఫీచర్ల వివరాలను పరిశీలించడం మంచిది.

Top 10 Best Selling SUVs: బడ్జెట్‌ కార్లలో ఏది నంబర్ వన్? అమ్మకాల్లో ముందున్న టాప్ 10 SUVల లిస్ట్‌

Arun Kumar Veera — Thu, 22 Oct 2026 11:40:14 +0530

Top 10 most selling SUVs 2026: భారత్‌లో బడ్జెట్‌ SUV కార్లపై, ముఖ్యంగా 4 మీటర్ల లోపు పొడవు (సబ్-4 మీటర్‌) ఉండే కాంపాక్ట్ SUVలపై ప్రజలు ఎక్కువ ఆసక్తి చూపిస్తున్నారు. కుటుంబ అవసరాలకు సరిపోయే పరిమాణం, ఆకర్షణీయమైన డిజైన్, ఆధునిక ఫీచర్లు ఈ కార్లకు ఆదరణ పెంచుతున్నాయి. తాజాగా, 2026 ఏప్రిల్ నుంచి సెప్టెంబర్ వరకు జరిగిన అమ్మకాల గణాంకాలు కూడా ఇదే విషయాన్ని స్పష్టం చేస్తున్నాయి. ఈ ఆరు నెలల్లో దేశవ్యాప్తంగా 8,13,657 కాంపాక్ట్ SUVలు అమ్ముడయ్యాయి. గత ఏడాది ఇదే కాలంతో పోలిస్తే అమ్మకాలు 28 శాతం పెరిగాయి. ఈ విభాగంలో టాటా పంచ్ మొదటి స్థానాన్ని దక్కించుకోగా, టాటా నెక్సాన్ రెండో స్థానంలో నిలిచింది. మారుతి ఫ్రాంక్స్ మూడో స్థానాన్ని కైవసం చేసుకుంది. మరి టాప్ 10లో ఏయే కార్లు ఉన్నాయి? వాటి అమ్మకాలు ఎంత నమోదయ్యాయి?

టాప్ 10 కార్ల అమ్మకాల వివరాలు

1. టాటా పంచ్

ఈ జాబితాలో టాటా పంచ్ అగ్రస్థానం సాధించింది. 2026 ఏప్రిల్ నుంచి సెప్టెంబర్ వరకు మొత్తం 1,23,287 యూనిట్లు అమ్ముడయ్యాయి. గత ఏడాది ఇదే కాలంలో 73,455 యూనిట్లు మాత్రమే విక్రయమయ్యాయి. దీంతో అమ్మకాలు ఏకంగా 68 శాతం పెరిగాయి. ఈ జాబితాలో ఇదే అత్యధిక వృద్ధి. పెట్రోల్, CNG, ఎలక్ట్రిక్ వెర్షన్లు అందుబాటులో ఉండటం, 2026 జనవరిలో వచ్చిన అప్‌డేట్లు ఈ కారుకు మరింత ఆదరణ తీసుకొచ్చాయి.

2. టాటా నెక్సాన్

టాటా నెక్సాన్ 1,11,919 యూనిట్ల అమ్మకాలతో రెండో స్థానంలో నిలిచింది. గత ఏడాది ఇదే కాలంలో 89,557 యూనిట్లు అమ్ముడయ్యాయి. దీంతో అమ్మకాలు 25 శాతం పెరిగాయి. విభిన్న ఇంజిన్ ఎంపికలు, అనేక వేరియంట్లు, ఆధునిక ఫీచర్లు ఈ కారుకు ప్రధాన బలంగా నిలుస్తున్నాయి.

ఇది కూడా చదవండి: రెనాల్ట్‌ డస్టర్‌ హైబ్రిడ్‌ vs మారుతి విక్టోరిస్‌ హైబ్రిడ్‌.. మైలేజీ, ఫీచర్లు, ధరలో ఏది ఎక్కువ బెనిఫిట్‌ ఇస్తుంది?

3. మారుతి ఫ్రాంక్స్

మారుతి ఫ్రాంక్స్ 1,10,135 యూనిట్ల అమ్మకాలతో మూడో స్థానాన్ని దక్కించుకుంది. గత ఏడాదితో పోలిస్తే అమ్మకాలు 43 శాతం పెరిగాయి. పెట్రోల్, టర్బో పెట్రోల్, CNG ఎంపికలతో పాటు మాన్యువల్, ఆటోమేటిక్ గేర్‌బాక్స్‌లను ఎంచుకునే అవకాశం ఉంది.

4. మారుతి బ్రెజ్జా

మారుతి బ్రెజ్జా 80,516 యూనిట్ల అమ్మకాలతో నాలుగో స్థానంలో ఉంది. అయితే, గత ఏడాదితో పోలిస్తే అమ్మకాలు 5 శాతం తగ్గాయి. ఇటీవల అప్‌డేట్ చేసిన బ్రెజ్జాలో టర్బో పెట్రోల్ ఇంజిన్, కొత్త 6 స్పీడ్ మాన్యువల్ గేర్‌బాక్స్‌తో పాటు అదనపు ఫీచర్లను తీసుకొచ్చారు. దీంతో రాబోయే నెలల్లో అమ్మకాలు పెరుగుతాయని కంపెనీ ఆశిస్తోంది.

5. హ్యుందాయ్ వెన్యూ

హ్యుందాయ్ వెన్యూ 68,836 యూనిట్ల అమ్మకాలతో ఐదో స్థానంలో నిలిచింది. గత ఏడాదితో పోలిస్తే అమ్మకాలు 38 శాతం పెరిగాయి. పెట్రోల్, టర్బో పెట్రోల్, డీజిల్ ఇంజిన్ ఎంపికలతో ఈ SUV అందుబాటులో ఉంది. కొన్ని ఇంజిన్ వేరియంట్లలో ఆటోమేటిక్ గేర్‌బాక్స్ సదుపాయం కూడా ఉంది.

6. కియా సోనెట్

కియా సోనెట్ 56,929 యూనిట్ల అమ్మకాలతో ఆరో స్థానాన్ని సంపాదించింది. గత ఏడాదితో పోలిస్తే అమ్మకాలు 21 శాతం పెరిగాయి. ఇంజిన్ ఎంపికల విషయంలో హ్యుందాయ్ వెన్యూతో కొన్ని పోలికలు ఉన్నాయి. ఆకర్షణీయమైన డిజైన్, ఫీచర్లు ఈ కారుకు మార్కెట్లో ఆదరణ తెస్తున్నాయి.

ఇది కూడా చదవండి: RC Renewal: గడువు ముగిసిన RC రెన్యువల్ చేయకపోతే భారీ జరిమానా.. పారివాహన్‌ పోర్టల్‌లో ఇలా అప్లై చేయండి!

7. మహీంద్రా XUV 3XO

మహీంద్రా XUV 3XO 52,851 యూనిట్ల అమ్మకాలతో ఏడో స్థానంలో ఆగింది. గత ఏడాదితో పోలిస్తే అమ్మకాలు 19 శాతం పెరిగాయి. ఈ జాబితాలో నమోదైన వృద్ధి రేటు ఇదే అత్యల్పం. అమ్మకాలను పెంచుకునేందుకు మహీంద్రా వేరియంట్లలో మార్పులు చేయడంతో పాటు CNG వెర్షన్‌ను కూడా తీసుకొచ్చింది.

8. మహీంద్రా బొలెరో

మహీంద్రా బొలెరో 51,720 యూనిట్ల అమ్మకాలతో ఎనిమిదో స్థానంలో ఉంది. గత ఏడాదితో పోలిస్తే అమ్మకాలు 30 శాతం పెరిగాయి. ఈ వాహనంలో 76hp పవర్, 210Nm టార్క్ అందించే డీజిల్ ఇంజిన్ ఉంటుంది. వెనుక చక్రాలకు పవర్ అందించే విధానంతో ‍‌(rear-wheel drive) వస్తుంది. 5+2 సీటింగ్ అమరిక దీని ప్రత్యేకత.

9. హ్యుందాయ్ ఎక్స్‌టర్

హ్యుందాయ్ ఎక్స్‌టర్ 46,156 యూనిట్ల అమ్మకాలతో తొమ్మిదో స్థానంలో నిలిచింది. గత ఏడాదితో పోలిస్తే అమ్మకాలు 40 శాతం పెరిగాయి. టాటా పంచ్‌కు పోటీగా నిలిచే ఈ SUV పెట్రోల్, CNG ఇంజిన్ ఎంపికలతో అందుబాటులో ఉంది. సరసమైన ధరలో SUV కొనాలనుకునే వారికి ఇది ఒక ప్రత్యామ్నాయంగా నిలుస్తోంది.

10. మహీంద్రా థార్ 3 డోర్

మహీంద్రా థార్ 3 డోర్ 25,424 యూనిట్ల అమ్మకాలతో పదో స్థానాన్ని దక్కించుకుంది. గత ఏడాదితో పోలిస్తే అమ్మకాలు 34 శాతం పెరిగాయి. ఈ జాబితాలో నాలుగు చక్రాలకు పవర్ అందించే 4x4 వ్యవస్థతో ఉన్న ఏకైక మోడల్ ఇదే. పెట్రోల్, డీజిల్ ఇంజిన్ ఎంపికలతో లభిస్తుంది. ఆఫ్‌రోడింగ్‌ను ఇష్టపడేవారికి ఈ కారు ప్రత్యేక ఆకర్షణగా నిలుస్తోంది.

ఈ ఏడాది అమ్మకాలు 15 లక్షలు దాటుతాయా?

2026 ఆర్థిక సంవత్సరం మొత్తం మీద కాంపాక్ట్ SUVల అమ్మకాలు 14,73,422 యూనిట్లతో రికార్డు సృష్టించాయి. ప్రస్తుత ఆర్థిక సంవత్సరం తొలి ఆరు నెలల్లోనే 8,13,657 యూనిట్లు అమ్ముడయ్యాయి. ఇది గత ఆర్థిక సంవత్సరం మొత్తం అమ్మకాలలో సుమారు 55 శాతం. గత ఆరు నెలల్లో 28 శాతం వృద్ధి నమోదవడం, పండుగల సీజన్‌లో కొనుగోళ్లు పెరిగే అవకాశం ఉండటం ఈ విభాగానికి కలిసొచ్చే అంశాలు. ఎలక్ట్రిక్ SUVలపై ఆసక్తి పెరుగుతుండటం కూడా మార్కెట్‌కు ఊతమివ్వవచ్చు. ఇదే వేగం కొనసాగితే 2026-27 ఆర్థిక సంవత్సరంలో కాంపాక్ట్ SUVల అమ్మకాలు తొలిసారిగా 15 లక్షల యూనిట్లను దాటే అవకాశం ఉంది.

కేటీఎం డ్యూక్, టీవీఎస్ అపాచీకి గట్టి పోటీ.. Kawasaki Z300 లాంచ్‌.. ఈ బండి ప్రత్యేకతలు ఇవే!

Arun Kumar Veera — Thu, 22 Oct 2026 11:16:43 +0530

Kawasaki Z300 launched: కవాసాకి కంపెనీ భారత మార్కెట్లో తన Z సిరీస్‌కు చెందిన Z300 బైక్‌ను లాంచ్‌ చేసింది. ఈ బైక్ ఎక్స్‌షోరూమ్ ధరను రూ.3.24 లక్షలుగా నిర్ణయించింది. స్పోర్టీ డిజైన్, పవర్‌ఫుల్‌ ట్విన్ సిలిండర్ ఇంజిన్, మోడ్రన్‌ ఫీచర్లతో వచ్చిన ఈ మోడల్.. ప్రీమియం బైక్‌లను కోరుకునేవారికి మరో ఆప్షన్‌గా నిలవనుంది. Ninja 300 ఆధారంగా రూపొందించిన ఈ బైక్‌లో Z900 డిజైన్ లక్షణాలను కూడా చూడొచ్చు.

296cc ఇంజిన్.. 39hp పవర్

కవాసాకి Z300లో 296cc లిక్విడ్ కూల్డ్, ప్యారలల్ ట్విన్ సిలిండర్ ఇంజిన్‌ను అందించారు. ఇదే ఇంజిన్‌ను నింజా 300లోనూ ఉపయోగిస్తున్నారు. ఈ ఇంజిన్ 11,000rpm వద్ద 39hp గరిష్ఠ పవర్‌ను ఉత్పత్తి చేస్తుంది. అలాగే 10,000rpm వద్ద 26.1Nm టార్క్‌ను అందిస్తుంది.

ఈ ఇంజిన్‌కు 6 స్పీడ్ గేర్‌బాక్స్‌ను జత చేశారు. రెండు సిలిండర్లతో కూడిన ఇంజిన్ కావడంతో ప్రయాణ సమయంలో సున్నితమైన పనితీరును అందించే అవకాశం ఉంది. అయితే, వాస్తవ రోడ్లపై ఇంజిన్ పనితీరు ఎలా ఉంటుందనేది రైడింగ్ పరిస్థితులపై ఆధారపడి ఉంటుంది.

Z900 తరహా డిజైన్

Z300లో ప్రధాన ఆకర్షణ దాని డిజైన్. కవాసాకి పెద్ద బైక్ అయిన Z900 నుంచి స్ఫూర్తి పొందిన ‘సుగోమి’ స్టైల్‌ను ఇందులో ఉపయోగించారు. షార్ప్‌ డిజైనింగ్‌, దూకుడుగా కనిపించే ముందు భాగం, కండలు తిరిగినట్లుగా కనిపించే మస్క్యులర్‌ బాడీ డిజైన్ దీనికి ప్రత్యేక గుర్తింపును ఇస్తాయి. స్ట్రీట్‌ఫైటర్ శైలికి అనుగుణంగా వెడల్పైన, నిటారుగా ఉండే సింగిల్ పీస్ హ్యాండిల్‌బార్‌ను అందించారు. రైడర్ సౌకర్యాన్ని దృష్టిలో ఉంచుకుని కూర్చునే భంగిమను రూపొందించారు. నగర ప్రయాణాలతో పాటు స్పోర్టీ రైడింగ్‌ను ఇష్టపడేవారిని ఆకట్టుకునేలా దీని రూపకల్పన ఉంది.

ఇది కూడా చదవండి: హీరోయిన్‌ ఫాతిమా సనా షేక్‌ కోసం కస్టమైజ్డ్‌ రాయల్‌ ఎన్‌ఫీల్డ్‌ బైక్‌.. రెడ్‌ సీటు, క్రోమ్‌ లుక్‌తో అదుర్స్‌!

ఆధునిక ఫీచర్లు

ఈ బైక్‌లో రివర్స్ LCD ఇన్‌స్ట్రుమెంట్ క్లస్టర్‌ను అందించారు. ఇది నింజా 500లోని డిస్‌ప్లే తరహాలో ఉంటుంది. బైక్‌కు డ్యూయల్ ఛానల్ ABS కూడా ఉంది. అకస్మాత్తుగా బ్రేకులు వేసినప్పుడు చక్రాలు లాక్ అయ్యే ప్రమాదాన్ని తగ్గించడంలో ABS సహాయపడుతుంది.

కవాసాకి Z300ను లైమ్ గ్రీన్, బ్లాక్ అనే రెండు రంగుల్లో అందిస్తున్నారు. ఈ రంగులు బైక్ స్పోర్టీ రూపాన్ని మరింత ఆకర్షణీయంగా చూపిస్తాయి.

ఫ్రేమ్, సస్పెన్షన్ వివరాలు

Z300లో నింజా 300లో ఉపయోగించిన ట్యూబ్యులర్ ఫ్రేమ్‌నే కొనసాగించారు. ముందు భాగంలో 37mm టెలిస్కోపిక్ ఫోర్క్‌ను ఏర్పాటు చేశారు. వెనుకవైపు ప్రీలోడ్ సర్దుబాటు చేసుకునే మోనోషాక్ సస్పెన్షన్‌ను అందించారు.

చక్రాలు, బ్రేకింగ్ వ్యవస్థ కూడా నింజా 300 నుంచి తీసుకున్నవే కావచ్చు. ఉంది. ఇందులో 17 అంగుళాల అల్లాయ్ వీల్స్ ఉండొచ్చని భావిస్తున్నారు. ముందు భాగంలో 290mm పెటల్ డిస్క్, వెనుక భాగంలో 220mm పెటల్ డిస్క్ బ్రేకులు ఉండే అవకాశం ఉంది. అయితే, ఈ వివరాలను కొనుగోలు చేసే ముందు అధికారిక స్పెసిఫికేషన్లతో నిర్ధారించుకోవడం మంచిది.

ఇది కూడా చదవండి: BMW F 450 RR వేరియంట్లలో ఎలాంటి ఫీచర్లు ఉన్నాయి? టాప్‌ మోడల్‌లో స్పెషల్‌ ఏంటి?

కేటీఎం, టీవీఎస్ బైక్‌లతో పోటీ

భారత మార్కెట్లో కవాసాకి Z300కు.. KTM 390 Duke, TVS Apache RTR 310 ప్రధాన ప్రత్యర్థులుగా నిలవనున్నాయి. కేటీఎం 390 డ్యూక్ ధర రూ.2.85 లక్షలు (ఎక్స్‌షోరూమ్) కాగా, టీవీఎస్ అపాచీ RTR 310 ధర రూ.2.30 లక్షలు (ఎక్స్‌షోరూమ్). ఇవి రెండూ సింగిల్ సిలిండర్ ఇంజిన్‌తో వచ్చే బైక్‌లు.

ఈ రెండు మోడళ్ల కంటే కవాసాకి Z300 ధర ఎక్కువగా ఉన్నప్పటికీ, ట్విన్ సిలిండర్ ఇంజిన్ దీని ప్రత్యేకత. ఇంజిన్ పనితీరులో సున్నితత్వాన్ని కోరుకునే వారికి ఇది ఆకర్షణీయమైన ఎంపిక కావచ్చు. పైగా.. కేటీఎం, టీవీఎస్ బైక్‌లు స్పోర్టీ రైడింగ్‌కు అనుగుణమైన పెర్ఫార్మెన్స్‌ ఇస్తాయి, కవాసాకి మాత్రం స్మూత్‌ పెర్ఫార్మెన్స్‌కు ప్రాధాన్యం ఇస్తోంది.

ఈ స్కూటర్‌ ఎక్కితే, కింద పడిపోతామనే భయం ఉండదు! స్టాండ్ అవసరం లేని BMW Vision CE ఎలక్ట్రిక్‌ స్కూటర్

Arun Kumar Veera — Thu, 22 Oct 2026 10:37:26 +0530

BMW self-balancing electric scooter: స్కూటర్‌ ఆగినప్పుడు కింద కాలు పెట్టాల్సిన అవసరం లేకుండా దానంతట అదే నిలబడితే ఎలా ఉంటుంది? పైగా హెల్మెట్ అవసరం లేని ప్రయాణం కూడా అదే స్కూటర్‌ అందిస్తే.. ఈ ఆలోచనకు రూపమిస్తోంది బీఎండబ్ల్యూ మోటరాడ్. తన విజన్ సీఈ ఎలక్ట్రిక్ స్కూటర్ కాన్సెప్ట్‌కు భారత్‌లో డిజైన్ పేటెంట్ దాఖలు చేసింది. దీంతో ఈ వినూత్న స్కూటర్‌పై ఆసక్తి పెరిగింది. అయితే, భారత్‌లో ఈ స్కూటర్ విడుదల ఖాయమైందని ఇప్పుడే చెప్పలేం.

వినూత్న డిజైన్‌తో Vision CE

బీఎండబ్ల్యూ మోటరాడ్ విజన్ సీఈ కాన్సెప్ట్‌ను 2025లో జరిగిన IAA మొబిలిటీ షోలో తొలిసారిగా ఆవిష్కరించింది. నగరాల్లో ప్రయాణాన్ని మరింత సులభంగా, సౌకర్యవంతంగా మార్చాలన్న లక్ష్యంతో ఈ నమూనాను రూపొందించింది. సాధారణ స్కూటర్లకు భిన్నంగా ఇందులో ప్రత్యేకమైన రక్షణ వ్యవస్థను ఏర్పాటు చేసింది.

ఈ స్కూటర్‌లో ప్రధాన ఆకర్షణ లోహపు గొట్టాలతో రూపొందించిన సేఫ్టీ కేజ్. దీనికి అనుసంధానంగా నాలుగు పాయింట్ల సీటుబెల్ట్‌ను అందించారు. ప్రమాదాల సమయంలో ప్రయాణికుడికి అదనపు రక్షణ కల్పించాలన్నది ఈ రూపకల్పన వెనుక ఉన్న ఆలోచన. ఈ వ్యవస్థతో హెల్మెట్, సాధారణ రైడింగ్ రక్షణ పరికరాలు లేకుండానే ప్రయాణించే అవకాశం ఉంటుందని కంపెనీ తన కాన్సెప్ట్‌లో సూచించింది. అయితే, ఇది కంపెనీ ప్రతిపాదించిన ఆలోచన మాత్రమే. వాస్తవ వినియోగంలో భద్రత, చట్టపరమైన నిబంధనలకు సంబంధించిన వివరాలు ఇంకా వెల్లడికాలేదు.

ఇది కూడా చదవండి: Bajaj Pulsar N250SS: రూ.1.59 లక్షలకే 25hp పవర్.. కొత్త పల్సర్ N250SSలో ఈ ఫీచర్లు అదుర్స్!

25 ఏళ్ల క్రితమే ఇలాంటి ఆలోచన

బీఎండబ్ల్యూ గతంలోనూ ఇలాంటి ప్రయోగం చేసింది. సుమారు 25 ఏళ్ల క్రితం తీసుకొచ్చిన C1 స్కూటర్‌లోనూ సేఫ్టీ కేజ్, సీటుబెల్ట్ వంటి అంశాలకు ప్రాధాన్యం ఇచ్చింది. సాధారణ ద్విచక్ర వాహనాల తరహాలో కాకుండా, ప్రయాణికుడికి అదనపు రక్షణ కల్పించే విధంగా దాన్ని రూపొందించింది. ఇప్పుడు విజన్ సీఈతో అదే ఆలోచనను విద్యుత్ వాహనాల కాలానికి అనుగుణంగా మరోసారి ముందుకు తీసుకొచ్చింది.

ఆగినా కింద పడదు.. ఇదే ప్రత్యేకత

విజన్ CEలో మరో కీలకమైన ఫీచర్ సెల్ఫ్ బ్యాలెన్సింగ్ వ్యవస్థ. సాధారణ ద్విచక్ర వాహనం ట్రాఫిక్ సిగ్నల్ వద్ద ఆగినప్పుడు, బ్యాలెన్స్‌ కోసం రైడర్ కాలు కింద పెట్టాలి. కానీ ఈ కాన్సెప్ట్ స్కూటర్ ఆగిన స్థితిలోనూ తన బ్యాలెన్స్‌ను కాపాడుకునేలా రూపొందించారు. దీంతో ప్రతిసారి కాలు కింద పెట్టాల్సిన అవసరం ఉండదని కంపెనీ వెల్లడించిన కాన్సెప్ట్‌ స్పష్టం చేస్తోంది. అయితే, ఈ వ్యవస్థ ఎలా పనిచేస్తుంది? ఏ సాంకేతిక పరిజ్ఞానాన్ని ఉపయోగిస్తుంది? దాని పనితీరు ఎంతవరకు సమర్థంగా ఉంటుంది? వంటి వివరాలను బీఎండబ్ల్యూ ఇంకా వెల్లడించలేదు.

ఎలక్ట్రిక్‌ డ్రైవ్.. వివరాలు మాత్రం గోప్యం

విజన్ సీఈలో కాలుష్య ఉద్గారాలు విడుదల చేయని ఎలక్ట్రిక్‌ డ్రైవ్‌ను ఉపయోగించనున్నారు. అయితే, బ్యాటరీ సామర్థ్యం, ఒక్కసారి ఛార్జింగ్ చేస్తే ప్రయాణించగల దూరం, గరిష్ఠ వేగం, మోటార్ శక్తి వంటి వివరాలను కంపెనీ ప్రకటించలేదు. ఈ స్కూటర్ రూపకల్పనలో తక్కువ ఎత్తులో ఉండే నిర్మాణం, పొడవైన వీల్‌బేస్ ప్రత్యేకంగా కనిపిస్తాయి. ఇప్పటికే మార్కెట్లో ఉన్న BMW CE 04 ఎలక్ట్రిక్ స్కూటర్‌లోనూ ఇలాంటి రూపకల్పన లక్షణాలు కనిపిస్తాయి.

భారత్‌లో విడుదల ఎప్పుడంటే?

BMW మోటరాడ్ ఇప్పటికే భారత్‌లో CE 04 ఎలక్ట్రిక్ స్కూటర్‌ను విక్రయిస్తోంది. దీని ఎక్స్‌షోరూమ్ ధర రూ.15.25 లక్షలు. ఈ నేపథ్యంలో విజన్ CE పేటెంట్ దాఖలు ఆసక్తికరంగా మారింది. అయితే, డిజైన్ పేటెంట్ దాఖలు చేసినంత మాత్రాన ఈ వాహనాన్ని మార్కెట్లోకి తీసుకొస్తారని అర్థం కాదు. కొత్త డిజైన్‌పై హక్కులను కాపాడుకోవడం, భవిష్యత్తులో దాని వినియోగ అవకాశాలను పరిశీలించడం వంటి కారణాలతోనూ కంపెనీలు పేటెంట్లు దాఖలు చేస్తాయి.

విజన్ సీఈ ఇప్పటికే ఇతర మార్కెట్లలోనూ పేటెంట్ ప్రక్రియలో కనిపించింది. భారత్‌లోనూ ఈ డిజైన్‌కు పేటెంట్ దాఖలు చేయడం కంపెనీ ఆసక్తిని సూచిస్తోంది. కానీ భారత్‌లో విడుదల తేదీ, ధర, సాంకేతిక వివరాలు, ఉత్పత్తి ప్రణాళికపై బీఎండబ్ల్యూ ఎలాంటి అధికారిక ప్రకటన చేయలేదు. కాబట్టి ప్రస్తుతానికి విజన్ సీఈ వెహికల్‌ను భవిష్యత్తుకు సంబంధించిన ఒక వినూత్న కాన్సెప్ట్‌గా చూడాలి. ఇది ఎప్పుడు ఉత్పత్తి దశకు చేరుతుంది? భారత మార్కెట్లోకి వస్తుందా? అన్న ప్రశ్నలకు సమాధానం రావాలంటే బీఎండబ్ల్యూ అధికారిక ప్రకటన కోసం వేచి చూడాల్సిందే.

Bajaj Pulsar N250SS: రూ.1.59 లక్షలకే 25hp పవర్.. కొత్త పల్సర్ N250SSలో ఈ ఫీచర్లు అదుర్స్!

Arun Kumar Veera — Thu, 22 Oct 2026 09:43:42 +0530

Bajaj Pulsar N250SS launched: టూవీలర్‌ కంపెనీ బజాజ్ ఆటో, యూత్‌ కోసం తన పల్సర్ సిరీస్‌లో మరో కొత్త బైక్‌ను లాంచ్‌ చేసింది. పల్సర్ N250SS పేరుతో తీసుకొచ్చిన ఈ మోడల్ ధరను రూ.1.59 లక్షలుగా నిర్ణయించింది. సాధారణ N250తో పోలిస్తే ఇందులో ఇంజిన్, గేర్‌బాక్స్, సాంకేతిక ఫీచర్లలో కీలక మార్పులు చేసింది. ముఖ్యంగా 6 స్పీడ్ గేర్‌బాక్స్, క్విక్‌షిఫ్టర్, గూగుల్ మ్యాప్స్ సదుపాయంతో కూడిన TFT డిస్‌ప్లే ఈ బైక్‌కు ప్రధాన ఆకర్షణగా నిలుస్తున్నాయి.

ఇప్పటికే పల్సర్ N160SSలో ఇలాంటి మార్పులను తీసుకొచ్చిన బజాజ్.. ఇప్పుడు N250 సిరీస్‌లోనూ ఈ అప్‌డేట్లను అందించింది. కొత్త ఫీచర్లతో మెరుగైన రైడింగ్ అనుభవాన్ని అందించడమే లక్ష్యంగా ఈ మోడల్‌ను రూపొందించింది.

ధర ఎంతంటే?

బజాజ్ పల్సర్ N250SS ఎక్స్‌షోరూమ్ ధర రూ.1.59 లక్షలు. సాధారణ పల్సర్ N250తో పోలిస్తే ఇది రూ.14,000 ఎక్కువ. అయినప్పటికీ, ప్రధాన ప్రత్యర్థి బైక్‌లతో పోలిస్తే దీని ధర తక్కువగా ఉంది.

Suzuki Gixxer 250 ధర రూ.1.85 లక్షలుగా ఉండగా, ఇటీవల పరిచయమైన Hero Xtreme 250R కార్బన్ ధర రూ.1.98 లక్షలుగా ఉంది. ఈ ధరలను దృష్టిలో పెట్టుకుంటే కొత్త పల్సర్ N250SS ధర పరంగా పోటీదారుల కంటే తక్కువ స్థాయిలో ఉంది. ఈ ధరలన్నీ ఎక్స్‌షోరూమ్ ధరలు.

ఇంజిన్‌లో కీలక మార్పులు

కొత్త పల్సర్ N250SSలో 249cc సామర్థ్యం కలిగిన ఎయిర్ & ఆయిల్ కూల్డ్ ఇంజిన్‌ను అందించారు. ఇందులో ఇప్పుడు నాలుగు వాల్వ్‌ల హెడ్‌ను ఉపయోగించారు. ఈ ఇంజిన్ గరిష్ఠంగా 25hp పవర్, 22Nm టార్క్‌ను ఉత్పత్తి చేస్తుంది.

సాధారణ N250లో 24.5hp పవర్, 21.5Nm టార్క్ లభిస్తాయి. దీంతో కొత్త మోడల్‌లో పవర్, టార్క్ స్వల్పంగా పెరిగాయి. ఈ మార్పులు ఇంజిన్ పనితీరును మరింత మెరుగుపరచడంలో తోడ్పడనున్నాయి.

6 స్పీడ్ గేర్‌బాక్స్.. క్విక్‌షిఫ్టర్

పాత 5 స్పీడ్ గేర్‌బాక్స్ స్థానంలో కొత్త బైక్‌లో 6 స్పీడ్ గేర్‌బాక్స్‌ను అందించారు. దీంతో రైడింగ్ సమయంలో గేర్లను మరింత అనువుగా మార్చుకునే అవకాశం ఉంటుంది. అంతేకాదు, క్లచ్ ఉపయోగించకుండా పై గేర్లకు మారేందుకు వీలుగా క్విక్‌షిఫ్టర్‌ను కూడా ప్రామాణిక ఫీచర్‌గా ఇచ్చారు.

కొత్త ఎలక్ట్రానిక్ థ్రోటిల్ బాడీని కూడా ఇందులో చేర్చారు. దీని ద్వారా రైడింగ్ మోడ్‌లను అందుబాటులోకి తీసుకొచ్చారు. రైడింగ్ పరిస్థితులకు అనుగుణంగా బైక్ పనితీరును ఎంచుకునే అవకాశం ఈ ఫీచర్ ద్వారా లభిస్తుంది.

టెక్నాలజీకి పెద్దపీట

కొత్త పల్సర్ N250SSలో 5 అంగుళాల TFT డిస్‌ప్లేను అందించారు. సాధారణ మోడల్‌లోని LCD తెర స్థానంలో ఇది వచ్చింది. ఈ డిస్‌ప్లే ద్వారా గూగుల్ మ్యాప్స్‌ను మిర్రరింగ్ చేసుకోవచ్చు. అంటే ప్రయాణ మార్గాన్ని బైక్ తెరపై చూసుకుంటూ గమ్యస్థానానికి చేరుకోవచ్చు.

ఇంకా.. సర్దుబాటు చేసుకునే లీవర్లు, USB Type-C ఛార్జింగ్ పోర్ట్, పానిక్ బ్రేక్ అలర్ట్, హజార్డ్ స్విచ్ వంటి ఫీచర్లను కూడా చేర్చారు. అకస్మాత్తుగా బ్రేకులు వేసినప్పుడు వెనుక వచ్చే వాహనాలను అప్రమత్తం చేయడంలో పానిక్ బ్రేక్ అలర్ట్ ఉపయోగపడుతుంది. అత్యవసర పరిస్థితుల్లో హజార్డ్ స్విచ్ ద్వారా హెచ్చరిక లైట్లను ఆన్ చేయవచ్చు.

కొనుగోలుదారులకు ఎంతవరకు ఉపయోగం?

పవర్‌లో స్వల్ప పెరుగుదలతో పాటు అదనపు గేర్, క్విక్‌షిఫ్టర్, ఆధునిక డిస్‌ప్లే వంటి ఫీచర్లు కొత్త పల్సర్ N250SSకు ప్రత్యేకతను తీసుకొచ్చాయి. ముఖ్యంగా రోజువారీ ప్రయాణాలతో పాటు అప్పుడప్పుడు సుదూర ప్రయాణాలు చేసేవారికి ఈ అప్‌డేట్లు ఉపయోగపడే అవకాశం ఉంది. అయితే, బైక్ మైలేజ్, వాస్తవ రోడ్లపై పనితీరు, రైడింగ్ మోడ్‌ల ప్రభావం వంటి అంశాలపై పూర్తి అంచనా వేయాలంటే మరిన్ని వివరాలు అవసరం.

RC Renewal: గడువు ముగిసిన RC రెన్యువల్ చేయకపోతే భారీ జరిమానా.. పారివాహన్‌ పోర్టల్‌లో ఇలా అప్లై చేయండి!

Arun Kumar Veera — Thu, 22 Oct 2026 09:33:14 +0530

Vehicle Registration Certificate Renewal: ఏదైనా మోటారు వాహనాన్ని రోడ్డుపై నడపాలంటే డ్రైవింగ్ లైసెన్స్‌తో పాటు రిజిస్ట్రేషన్ సర్టిఫికెట్ (RC) కూడా తప్పనిసరి. వాహనం RTOలో రిజిస్టర్ అయినట్లు ఈ సర్టిఫికెట్ నిర్ధారిస్తుంది. అయితే చాలామంది వాహన యజమానులు RC గడువు తేదీని పట్టించుకోరు. దీనివల్ల జరిమానాలు పడటంతో పాటు ఇన్సూరెన్స్ క్లెయిమ్ సమయంలోనూ ఇబ్బందులు ఎదురయ్యే అవకాశం ఉంది. అందుకే RC గడువు ముగియకముందే రెన్యువల్ చేసుకోవడం ముఖ్యం.

సాధారణంగా, ఏదైనా ప్రైవేట్ వాహనానికి రిజిస్ట్రేషన్ తేదీ నుంచి 15 సంవత్సరాల వరకు RC చెల్లుబాటులో ఉంటుంది. ఆ తర్వాత ప్రతి ఐదేళ్లకు ఒకసారి రెన్యువల్ చేయించుకోవాలి. RC గడువు ముగియడానికి 60 రోజుల ముందు నుంచే Parivahan Sewa పోర్టల్ ద్వారా దరఖాస్తు చేసుకోవచ్చు. అయితే రెన్యువల్ ఆమోదానికి ముందు వాహనాన్ని RTOలో తనిఖీ చేయించాల్సి రావచ్చు.

RC రెన్యువల్‌కు అవసరమైన డాక్యుమెంట్లు ఇవే

RC రెన్యువల్ కోసం దరఖాస్తు చేసే ముందు కొన్ని ముఖ్యమైన పత్రాలను సిద్ధంగా ఉంచుకోవాలి.

- Form 25: రిజిస్ట్రేషన్ రెన్యువల్ కోసం దరఖాస్తు ఫారం.
- పాత RC: ఇప్పటికే ఉన్న రిజిస్ట్రేషన్ సర్టిఫికెట్.
- ఇన్సూరెన్స్ సర్టిఫికెట్: చెల్లుబాటులో ఉన్న థర్డ్ పార్టీ లేదా సమగ్ర బీమా పత్రం.
- PUC సర్టిఫికెట్: వాహనం కాలుష్య ప్రమాణాలకు అనుగుణంగా ఉన్నట్లు తెలిపే ధ్రువపత్రం.
- రోడ్ ట్యాక్స్ రసీదు: వర్తించే రోడ్ ట్యాక్స్ చెల్లించినట్లు ఆధారం.
- గుర్తింపు పత్రం: ఆధార్ కార్డు, PAN కార్డు లేదా ప్రభుత్వం ఆమోదించిన ఇతర గుర్తింపు పత్రం.
- చిరునామా రుజువు: ఆధార్, ఓటర్ ID లేదా అంగీకరించిన ఇతర పత్రం.
- ఫిట్‌నెస్ సర్టిఫికెట్: వర్తించే వాహనాలకు, ముఖ్యంగా వాణిజ్య వాహనాలకు అవసరం కావచ్చు.
- ఛాసిస్, ఇంజిన్ నంబర్ పెన్సిల్ ప్రింట్: RTO నిబంధనల ప్రకారం అడగవచ్చు.

వాహనం రకం, రాష్ట్రం, సంబంధిత RTO ఆధారంగా డాక్యుమెంట్లలో మార్పులు ఉండవచ్చు.

ఇది కూడా చదవండి: మహీంద్రా కార్లపై దసరా బంపర్‌ ఆఫర్లు.. ఏ కారుపై ఎంత డిస్కౌంట్‌ ఉందంటే?

Parivahan పోర్టల్‌లో RC రెన్యువల్ ఎలా చేయాలి?

RC రెన్యువల్ కోసం ఆన్‌లైన్‌లో దరఖాస్తు చేయడం సులభమే. ఇందుకోసం ఈ విధానాన్ని అనుసరించాలి.

1. ముందుగా Parivahan Sewa అధికారిక వెబ్‌సైట్ (https://parivahan.gov.in/) ఓపెన్ చేయాలి.
2. అందులో ‘Online Services’ విభాగానికి వెళ్లి ‘Vehicle Related Services’ ఎంపిక చేసుకోవాలి.
3. మీ వాహనం రిజిస్టర్ అయిన రాష్ట్రాన్ని ఎంచుకుని సంబంధిత RTOను సెలెక్ట్ చేయాలి.
4. వాహనం రిజిస్ట్రేషన్ నంబర్ నమోదు చేయాలి. అవసరమైతే ఛాసిస్ నంబర్‌లోని చివరి ఐదు అంకెలను కూడా ఇవ్వాలి.
5. అందుబాటులో ఉన్న సేవల్లో ‘Renewal of Registration’ ఎంపిక చేసుకోవాలి.
6. వాహనం మోడల్, తయారీ సంవత్సరం, ఇంజిన్ నంబర్, ఛాసిస్ నంబర్ వంటి వివరాలను సరిచూసుకుని అప్లికేషన్ పూర్తి చేయాలి.
7. అడిగిన డాక్యుమెంట్లను స్కాన్ చేసి అప్‌లోడ్ చేయాలి.
8. వర్తించే రెన్యువల్ ఫీజును ఆన్‌లైన్‌లో చెల్లించాలి.
9. వాహన తనిఖీ అవసరమైతే RTO అపాయింట్‌మెంట్ బుక్ చేసుకోవాలి.
10. నిర్ణయించిన తేదీన వాహనాన్ని, ఒరిజినల్ డాక్యుమెంట్లను RTOకు తీసుకెళ్లాలి. తనిఖీ, డాక్యుమెంట్ వెరిఫికేషన్ పూర్తయ్యాక దరఖాస్తుపై నిర్ణయం తీసుకుంటారు.

అప్లికేషన్ ఆమోదం పొందిన తర్వాత రెన్యువల్ చేసిన RCను సంబంధిత విధానం ప్రకారం రిజిస్టర్డ్ చిరునామాకు పంపవచ్చు. అప్లికేషన్ స్టేటస్‌ను కూడా ఆన్‌లైన్‌లో చెక్ చేసుకోవచ్చు.

RC రెన్యువల్ ఫీజు ఎంత?

RC రెన్యువల్ ఫీజు వాహనం రకాన్ని బట్టి మారుతుంది. Central Motor Vehicles Rules, 1989లోని Rule 81 ప్రకారం వర్తించే ప్రాథమిక ఫీజులు ఈ విధంగా ఉంటాయి.

- మోటార్‌సైకిల్: రూ.300
- మీడియం ప్యాసింజర్ వాహనం: రూ.1,000
- హెవీ ప్యాసింజర్ వాహనం: రూ.1,500
- దిగుమతి చేసుకున్న మోటార్‌సైకిల్: రూ.2,500
- దిగుమతి చేసుకున్న మోటార్ వాహనం: రూ.5,000
- ఇన్‌వాలీడ్‌ క్యారేజ్‌: రూ.50
- త్రీ వీలర్, క్వాడ్రిసైకిల్ లేదా ప్రైవేట్ లైట్ మోటార్ వెహికల్: రూ.600
- ట్రాన్స్‌పోర్ట్ త్రీ వీలర్ లేదా లైట్ మోటార్ వెహికల్: రూ.1,000
- మీడియం గూడ్స్ వెహికల్: రూ.1,000
- హెవీ గూడ్స్ వెహికల్: రూ.1,500
- ఇతర వాహన కేటగిరీలు: రూ.3,000

ఇవి ప్రాథమిక ఫీజులు మాత్రమే. ఆలస్యంగా రెన్యువల్ చేయడం, స్మార్ట్ కార్డు జారీ, వాహన తనిఖీ వంటి వాటికి అదనపు ఛార్జీలు వర్తించవచ్చు. వాహనం రకం, వర్తించే నిబంధనల ఆధారంగా ఆలస్య రుసుము మారుతుంది. అందువల్ల చెల్లించే ముందు Parivahan పోర్టల్ లేదా మీ RTOలో తాజా ఫీజులను నిర్ధారించుకోవాలి.

RC రెన్యువల్ స్టేటస్ ఎలా చెక్ చేయాలి?

ఆన్‌లైన్‌లో దరఖాస్తు చేసిన తర్వాత Parivahan Sewa పోర్టల్‌లోనే దరఖాస్తు పురోగతిని తెలుసుకోవచ్చు. ఇందుకోసం సంబంధిత రాష్ట్రాన్ని ఎంచుకుని వాహనం వివరాలను నమోదు చేయాలి. ఆ తర్వాత అప్లికేషన్ లేదా రిజిస్ట్రేషన్ స్టేటస్ విభాగంలోకి వెళ్లి దరఖాస్తు ఏ దశలో ఉందో పరిశీలించాలి.

డాక్యుమెంట్ల పరిశీలన, ఫీజు చెల్లింపు, అవసరమైతే వాహన తనిఖీ పూర్తయ్యాకే రెన్యువల్‌కు ఆమోదం లభిస్తుంది. కాబట్టి RC గడువు ముగిసే వరకు వేచి చూడకుండా ముందుగానే దరఖాస్తు చేసుకోవడం మంచిది. దీనివల్ల చివరి నిమిషంలో ఎదురయ్యే ఇబ్బందులను తగ్గించుకోవచ్చు.

కొత్త లుక్‌లో Tata Nexon EV, త్వరలోనే లాంచ్.. కేబిన్‌లో మార్పులు

Shankar Dukanam — Thu, 22 Oct 2026 05:30:25 +0530

ప్రస్తుతం భారత్‌లో టాటా వాహనాలకు క్రేజ్ ఎక్కువగా ఉంది. ఎందుకంటే వాహనదారులు టాటా వాహనాలపై నమ్మకంగా ఉన్నారు. టాటా కంపెనీకి చెందిన సక్సెస్ సాధించిన కార్లలో టాటా నెక్సాన్ అగ్రస్థానంలో నిలిచింది. ఇప్పుడు ఈ SUVకి సంబంధించి ఒక పెద్ద వార్త వెలుగులోకి వచ్చింది. E కంపెనీ ఇప్పుడు నెక్సాన్ ఈవీని కొత్త రూపంలో లాంచ్ చేయాలని చూస్తోంది. ఇటీవల ఈ కొత్త ఎలక్ట్రిక్ కారును టెస్టింగ్ చేస్తున్న సమయంలో రోడ్లపై చూశారు.

దీంతో కారు లవర్స్ ఈ కొత్త మోడల్ మార్కెట్‌లోకి ఎప్పుడు వస్తుందా అని ఉత్సాహంగా ఉన్నారు. మరి కొత్త రూపంలో రానున్న నెక్సాన్ ఈవీలో ఏయే మార్పులు రానున్నాయి అందుబాటులో ఉన్న వివరాలివే.

కాస్త మారనున్న లుక్

టెస్టింగ్ మోడల్ ఫోటోలు చూస్తే, టాటా కంపెనీ దీని ఫ్రంట్, రియర్ ప్రొఫైల్‌లో కొన్ని పెద్ద మార్పులు చేయబోతున్నట్లు తెలుస్తోంది. గాలి ఒత్తిడి వీలైనంత తక్కువగా ఉండి రేంజ్ మెరుగుపడేలా కారు ముందు భాగాన్ని ఏరోడైనమిక్‌గా చేస్తున్నారు. ఇందులో కొత్త ఎల్‌ఈడీ హెడ్‌లైట్ అసెంబ్లీ, కనెక్టెడ్ డిఆర్‌ఎల్‌, కొత్త డిజైన్ గ్రిల్స్ అందించవచ్చు. మెరుగైన ఎయిర్‌ఫ్లో, ఫ్యూచరిస్టిక్ లుక్ కోసం కొత్త ఏరో-డిజైన్ అల్లాయ్ వీల్స్ ఇస్తున్నారు. కారు బంపర్ లుక్ కూడా గతంలో కంటే మరింత మస్కులర్, స్పోర్టీ లుక్‌లో రూపొందించారు.

రేంజ్ మెరుగయ్యే ఛాన్స్

కొత్త టాటా నెక్సాన్ ఈవీ డ్రైవింగ్ రేంజ్, పవర్ పెర్ఫార్మెన్స్ మెరుగయ్యే అవకాశాలున్నాయి. తాజా నివేదికల ప్రకారం కంపెనీ ఇందులో కొత్త జనరేషన్ బ్యాటరీ ప్యాక్, మెరుగైన ఎలక్ట్రిక్ మోటారును అమర్చవచ్చు. కొత్త థర్మల్ మేనేజ్‌మెంట్, అడ్వాన్స్‌డ్ రీజనరేటివ్ బ్రేకింగ్ సిస్టమ్ అందుబాటులోకి రావడం వల్ల అధిక రేంజ్ ఇచ్చే ఛాన్స్ ఉంటుంది. దీనివల్ల లాంగ్ జర్నీ సమయంలో పదే పదే ఛార్జింగ్ స్టేషన్‌ను వెతుక్కునే ఇబ్బంది నుంచి ఉపశమనం లభిస్తుంది. దీంతో పాటు ఫాస్ట్ ఛార్జింగ్ సపోర్ట్‌ను సెట్ చేయనున్నారు.

Also Read: 700 కి.మీ రేంజ్‌తో Mercedes కొత్త ఎలక్ట్రిక్ SUV కారు.. 2.5 సెకన్లలో 100 కి.మీ వేగం

కేబిన్‌లోనూ మార్పులు

మరోవైపు, కారు కేబిన్‌లో ప్రయాణికుల సౌకర్యం, హైటెక్ ఎక్స్‌పీరియన్స్2పై పూర్తిగా ఫోకస్ చేస్తారు. ఇందులో పెద్ద ఫ్లోటింగ్ టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ డ్రైవర్ డిస్ప్లే, కొత్త టూ స్పోక్ ఇల్లుమినేటెడ్ స్టీరింగ్ వీల్ రానున్నాయి. కనెక్టివిటీ కోసం వైర్‌లెస్ ఆండ్రాయిడ్ ఆటో, కనెక్టెడ్ కార్ టెక్నాలజీ, ఆపిల్ కార్‌ప్లే వంటి ఫీచర్లు అందించనున్నారు.

సేఫ్టీ పరంగా ఈ కారులో 6 ఎయిర్‌బ్యాగ్‌లు, 360 డిగ్రీ రియర్ వ్యూ కెమెరా, ఎలక్ట్రానిక్ స్టెబిలిటీ కంట్రోల్, అడ్వాన్స్‌డ్ డ్రైవర్ అసిస్టెన్స్ సిస్టమ్ (ADAS) ఫీచర్లు కూడా చేర్చవచ్చు.

ధరపై క్లారిటీ లేదు

టాటా మోటార్స్ నుంచి న్యూ లుక్ వస్తున్నప్పటికీ నెక్సాన్ ఈవీ లాంచ్ తేదీని ఇంకా ప్రకటించలేదు. టెస్టింగ్ ఫేజ్, ప్రొడక్షన్ రెడీనెస్‌ను బట్టి చూస్తే, కంపెనీ త్వరలోనే భారత మార్కెట్లో లాంచ్ చేయవచ్చని భావిస్తున్నారు. టాటా నెక్సాన్ కంటే దీని ధర ఎక్కువగా ఉండనుంది. పాత మోడల్ కంటే కాస్త ఎక్కువ ధర ఉంటుందని భావిస్తున్నారు.

Also Read: మహీంద్రా కార్లపై దసరా బంపర్‌ ఆఫర్లు.. ఏ కారుపై ఎంత డిస్కౌంట్‌ ఉందంటే?

700 కి.మీ రేంజ్‌తో Mercedes కొత్త ఎలక్ట్రిక్ SUV కారు.. 2.5 సెకన్లలో 100 కి.మీ వేగం

Shankar Dukanam — Wed, 21 Oct 2026 17:20:45 +0530

లగ్జరీ కార్ల తయారీ సంస్థ మెర్సిడెస్ (Mercedes) ఆటో మార్కెట్‌లో పెద్ద సంచలనం సృష్టించింది. కంపెనీ నుంచి తొలి ఆల్ ఎలక్ట్రిక్ పెర్ఫార్మెన్స్ కార్ Mercedes-AMG GT SUVను ఆవిష్కరించింది. ఈ కారును మెర్సిడెస్ తన ప్రత్యేక AMG హై-పెర్ఫార్మెన్స్ ఆర్కిటెక్చర్‌పై సొంతంగా రూపొందించింది. ఇది సాధారణ ఎలక్ట్రిక్ కారు కాదు. స్పోర్ట్స్ కార్‌కి ఉండే సూపర్ ఫాస్ట్ వేగం, పెద్ద సైజు SUV దీని ప్రత్యేకత. ఈ కారులో వినియోగదారులకు 1,169 bhp పవర్, సింగిల్ ఛార్జ్‌లో 700 కిలోమీటర్ల వరకు రేంజ్ ఇస్తుంది. Mercedes ఈ మెరిసే ఎలక్ట్రిక్ SUVలో ఏ ప్రత్యేక ఫీచర్లు, టెక్నాలజీ ఉన్నాయో వివరాలు ఇక్కడ తెలుసుకోండి.

బెస్ట్ వేరియంట్లు, స్పోర్టీ లుక్

ఈ సూపర్ ఎలక్ట్రిక్ కారును మెర్సిడెస్ కంపెనీ మార్కెట్లోకి 3 అద్భుత వేరియంట్లు తీసుకొచ్చింది. వాటి పేర్లు GT 53, GT 55, అలాగే టాప్ మోడల్ GT 63 ఉన్నాయి. భారత్‌లో దీని ధర, లభ్యతపై Mercedes ఎలాంటి ప్రకటన చేయలేదు. లుక్ విషయానికి వస్తే, ముందు భాగంలో నిలువు స్లాట్లతో AMG-స్పెషల్ రేడియేటర్ గ్రిల్, స్టార్ ఆకారంలో ఉన్న LED డే-టైమ్ రన్నింగ్ లైట్లు కనిపిస్తాయి. కార్ వెనుక భాగంలో టర్బైన్ నుంచి ఆరు గుండ్రని టెయిల్‌లైట్లు ఉన్నాయి. ఇవి రాత్రివేళ దీనికి స్పెషల్ లుక్ ఇస్తాయి. వాహనాన్ని అధిక వేగంలో స్థిరంగా ఉంచేందుకు ఇందులో యాక్టివ్ రూఫ్ స్పాయిలర్ వంటి టెక్నాలజీని ఉపయోగించారు.

కేబిన్‌లో సూపర్ లగ్జరీ, AI టెక్నాలజీ

Mercedes AMG GT SUV ఇంటీరియర్ ఒక విమానం కాక్‌పిట్‌లా ఎక్స్‌పీరియన్స్ ఇస్తుంది. డాష్‌బోర్డ్‌పై డ్రైవర్ కోసం 10.2 అంగుళాల డిజిటల్ ఇన్‌స్ట్రుమెంట్ క్లస్టర్, మధ్యలో 14 అంగుళాల టచ్‌స్క్రీన్ ఇచ్చారు. ముందు కూర్చునే వారికి వినోదం కోసం ప్రత్యేకంగా మరో 14 అంగుళాల స్క్రీన్ ఇచ్చారు. కార్ కేబిన్‌లో పనోరమిక్ గ్లాస్ రూఫ్ లభిస్తుంది. మీ అవసరానికి తగ్గట్లుగా దాన్ని ఒక బటన్ నొక్కి పారదర్శకంగా లేదా పూర్తిగా మసకగా మార్చుకోవచ్చు.

ఈ వాహనంలో Mercedes తాజా ఆపరేటింగ్ సిస్టమ్‌ ఇచ్చారు. ఇందులో ChatGPT, Microsoft Bing, గూగుల్ జెమినీ వంటి అతిపెద్ద ఆర్టిఫిషియల్ ఇంటెలిజెన్స్ అసిస్టెంట్లు నేరుగా ఇన్‌బిల్ట్‌గా వస్తాయి.

కేవలం 12 నిమిషాల్లో బ్యాటరీ ఫుల్

Mercedes-AMG ఈ కారులో 800-వోల్ట్ ఆధునిక బ్యాటరీ ఇచ్చింది. కంపెనీ ఇందులో 106kWh, 128kWh సామర్థ్యాలున్న 2 వేర్వేరు బ్యాటరీ ఆప్షన్లు ఇవ్వనుంది. పెద్ద 128kWh బ్యాటరీ సాయంతోనే ఈ కారు 700 కిలోమీటర్ల రేంజ్ ఇవ్వనుంది. ఈ కారు 710kW వరకు అల్ట్రా ఫాస్ట్ DC ఛార్జింగ్‌ను సపోర్ట్ చేస్తుంది. ఈ చార్జర్ సాయంతో పెద్ద బ్యాటరీని కేవలం 10 నిమిషాలు ఛార్జ్ చేస్తే 450 కిలోమీటర్ల వరకు రేంజ్ లభిస్తుంది. ఈ భారీ కారును కేవలం 12 నిమిషాల్లో 10 నుంచి 80 శాతం వరకు ఛార్జింగ్ చేయవచ్చు.

మంచి వేగం, రాకెట్‌లాంటి పవర్

పవర్ పరంగా Mercedes ఈ కారును రెండు వేర్వేరు ఎలక్ట్రిక్ మోటార్ కాన్ఫిగరేషన్లతో మార్కెట్లోకి తీసుకొచ్చింది. బేస్ వేరియంట్ GT 53లో రెండు మోటార్లు ఉన్నాయి. ఇవి కలిసి 544 బీహెచ్‌పీ పవర్, 800 nm టార్క్ ఇస్తాయి. ఇక మిడ్ వేరియంట్ GT 55లో ఈ పవర్ 816 బీహెచ్‌పీ వరకు పెరుగుతుంది.

ఇందులో 3 పవర్‌ఫుల్ మోటార్లను ఇస్తున్నారు. ఈ మోటార్లు కలిసి కారుకు 1,169 బీహెచ్‌పీ పవర్ 2,000 ఎన్ఎమ్ పీక్ టార్క్‌ను అందిస్తాయి. ఈ పవర్ కారణంగా ఈ SUV కేవలం 2.5 సెకన్లలో 0 నుంచి 100 కి.మీ/ గం వేగాన్ని అందుకుంటుంది. ఈ కారు టాప్ స్పీడ్ గంటకు 270 కిలోమీటర్లు.

Down Payment లేకుండా Jawa లేదా Yezdi Bikes ఇంటికి తీసుకెళ్లవచ్చు.. స్పెషల్ ఆఫర్లు

Shankar Dukanam — Wed, 21 Oct 2026 10:16:34 +0530

Yezdi Bikes | భారత్‌లో నవరాత్రి పండుగల సమయంలో ఆటోమొబైల్ మార్కెట్‌లో అనేక రకాల ఆఫర్లు కనిపిస్తుంటాయి. ఈ ఆఫర్లు దసరా నుంచి దీపావళి వరకు కొనసాగుతాయి. ఈ మధ్యకాలంలో పలు కంపెనీలు రకరకాల ఆఫర్లు ఇచ్చి సేల్స్ పెంచుకునేందుకు ప్రయత్నిస్తాయి. ఇప్పుడు జవా, యేజ్దీ కంపెనీల బైక్స్ కూడా తన వినియోగదారులకు అలాంటి ఆఫర్‌ అందిస్తోంది.

ఈ ఫెస్టివల్ ఆఫర్ కింద బైక్ లవర్స్ తమ క్లాసిక్ లేదా అడ్వెంచర్ బైక్‌ను ఎలాంటి డౌన్ పేమెంట్ లేకుండా తమ ఇంటికి తీసుకెళ్లవచ్చు. ఎందుకంటే కంపెనీ పలు ప్రముఖ బ్యాంకులు, ఫైనాన్సింగ్ భాగస్వాములతో చర్చలు జరిపింది. జవా, యేజ్దీ బైక్‌లపై ఎలాంటి ప్రత్యేక ఆఫర్లు లభిస్తున్నాయో, ఆ వివరాలు ఇక్కడ తెలుసుకుందాం.

జీరో డౌన్ పేమెంట్ ఆఫర్

జవా, యేజ్దీ మోటార్ సైకిల్స్ తీసుకొచ్చిన ఈ కొత్త ఫెస్టివ్ ఫైనాన్స్ ప్లాన్ కస్టమర్లకు జీరో డౌన్ పేమెంట్ ఆప్షన్ అందిస్తున్నాయి. మీరు బైక్ డెలివరీ తీసుకునేటప్పుడు ఒక్క రూపాయి కూడా ప్రారంభ డౌన్ పేమెంట్‌గా చెల్లించాల్సిన అవసరం లేదు. కంపెనీ 100 శాతం ఆన్ రోడ్ ఫండింగ్ సదుపాయాన్ని అందిస్తోంది. ఇందులో బైక్ ఎక్స్ షోరూమ్ ధరతో పాటు ఇన్సూరెన్స్, RTO రిజిస్ట్రేషన్ ఖర్చులు ఈజీ లోన్ ప్రక్రియలో చేర్చుతారు.

ఈజీ EMI అవకాశం

మరోవైపు వినియోగదారుల బడ్జెట్‌ను దృష్టిలో ఉంచుకుని కంపెనీ ఈ పండుగ సీజన్‌లో తక్కువ వడ్డీ రేటు, అత్యంత చౌకైన EMI స్కీమ్‌లను ప్రవేశపెట్టింది. వినియోగదారులు తమ సౌకర్యాన్ని బట్టి 1 ఏడాది నుంచి 5 సంవత్సరాల వరకు వెహికల్ లోన్ ఆప్షన్ తీసుకోవచ్చు. ఎంపిక చేసిన బ్యాంక్ క్రెడిట్, డెబిట్ కార్డ్‌ల ద్వారా లోన్ అప్లై చేసుకునే వినియోగదారులకు ప్రాసెసింగ్ ఫీజులో మినహాయింపు, పేపర్ లెస్ వర్క్ (డాక్యుమెంటేషన్) వంటి సౌకర్యాలు ఇస్తాయి. దీనివల్ల లోన్ అప్రూవల్ ప్రక్రియ వేగంగా, సులభంగా అవుతుంది.

ఈ మోడల్స్‌పై ఆఫర్

జవా, యేజ్దీ బ్రాండ్‌లకు చెందిన దాదాపు అన్ని ప్రముఖ బైక్ కంపెనీలపై ఈ ప్రత్యేక ఫైనాన్స్ ఆఫర్ లిమిటెడ్ టైం వరకు ఇస్తారు. ఇందులో జవా 350, జవా పెరాక్, జవా 42, 42 బాబర్ వంటి మోడళ్లు బైక్ లవర్స్‌కు ఉన్నాయి. ఈ మోడల్స్ తమ రెట్రో డిజైన్‌తో ఫేమస్ అయ్యాయి. ఇక ఆఫ్‌రోడింగ్, లాంగ్ జర్నీ ఇష్టపడే వారి కోసం యేజ్దీ అడ్వెంచర్, యేజ్దీ రోడ్‌స్టర్, యేజ్దీ స్క్రాంబ్లర్ వంటి పవర్ ఫుల్ వాహనాలపై కూడా జీరో డౌన్ పేమెంట్, స్పెషల్ EMI డీల్స్ బెనిఫిట్స్ పొందవచ్చు.

ఈ ఆఫర్ ఎప్పటి వరకు..

కంపెనీలు అందిస్తున్న ఈ ఆఫర్లు దేశవ్యాప్తంగా ఉన్న జవా, యేజ్దీ డీలర్‌షిప్‌లలో లిమిటెడ్ టైం వరకు మాత్రమే అందుబాటులో ఉంటాయి. ఈ పండుగ సీజన్‌లో కొత్త బైక్ కొనాలని ఆలోచిస్తున్న వినియోగదారులు షోరూమ్‌కు వెళ్లి బైక్‌ కొనవచ్చు. పండుగ సమయంలో వాహనాల డిమాండ్, వెయిటింగ్ పీరియడ్ దృష్టిలో ఉంచుకుని, సమయానికి డెలివరీ రావడానికి వినియోగదారులు సరైన సమయానికి తమకు నచ్చిన మోడల్, కలర్ ఆప్షన్‌ను బుక్ చేసుకోవాలని సూచించారు.