BMW i5 lwb Electric Cars | లగ్జరీ వెహికల్స్ తయారు చేసే BMW భారత్‌లో పట్టు సాధించేందుకు సిద్ధమవుతోంది. భారత వినియోగదారుల అవసరాలకు తగ్గట్లుగా బీఎండబ్ల్యూ కంపెనీ ఇప్పుడు తన మోడళ్లను మరింత విశాలంగా, రీజనబుల్ ధరలో ఉండేలా తీసుకురావాలని చూస్తోంది. ఈ వ్యూహంలో భాగంగా BMW తన ప్రీమియం ఎలక్ట్రిక్ సెడాన్ i5 లాంగ్ వీల్బేస్ వెర్షన్‌ను ఆవిష్కరించింది.
ఈ కార్ అతిపెద్ద ప్రత్యేకత ఏంటంటే, CBUకి బదులుగా నేరుగా చెన్నై ప్లాంట్లోనే అసెంబుల్ చేయనున్నారు. దేశంలోనే అసెంబ్లీంగ్ చేయడం ద్వారా ఖర్చు భారీగా తగ్గుతుంది. దీంతో BMW కంపెనీ దీని ధరను తగ్గించుకుని, ఇతర లగ్జరీ కార్లకు గట్టి పోటీ ఇవ్వనుంది. భారత మార్కెట్‌లో అసెంబుల్ కానున్న BMW రెండో ఎలక్ట్రిక్ కార్‌గా మారనుంది. ఇది లగ్జరీ EV సెగ్మెంట్‌లో సంలచనాలకు కారణం కావొచ్చు.
669 కిలోమీటర్ల అద్భుతమైన రేంజ్
కొత్త BMW i5 LWBలో కంపెనీ 81.6 kWh కెపాసిటీ గల పెద్ద, పవర్‌ఫుల్ బ్యాటరీ ప్యాక్‌ను ఇస్తుంది. సింగిల్ ఎలక్ట్రిక్ మోటర్ సెటప్‌తో వచ్చే ఈ సెడాన్ ఒకసారి పూర్తిగా ఛార్జింగ్ చేస్తే దాదాపు 669 కిలోమీటర్ల వరకు దూసుకెళ్తుందని కంపెనీ పేర్కొంది. లాంగ్ రేంజ్ ఇవ్వడంతో వాహనదారులు పదే పదే ఛార్జింగ్ స్టేషన్ కోసం వెతకాల్సిన పనిలేదు. బీఎండబ్ల్యూ కంపెనీ ఇందులో రియర్ యాక్సిల్ ఎయిర్ సస్పెన్షన్ ఫీచర్‌ను కూడా చేర్చింది. ఇది భారత రోడ్లలోని గుంతలు, గతుకుల మార్గాలలో ఇబ్బంది లేకుండా వెళ్తుంది. భారత రోడ్లపై ఎదురయ్యే సవాళ్లను దృష్టిలో ఉంచుకుని ఈ ఎలక్ట్రిక్ కార్ గ్రౌండ్ క్లియరెన్స్‌ను గతంతో పోలిస్తే కొద్దిగా పెంచారు.
Also Read: KTM 390 Duke ఒకటే.. కానీ ఇంజిన్ వేరు, ధర వేరు - మీకు సరిపోయే వేరియంట్ ఏది?
ధర ఎంత ఉండొచ్చు
పాత ఇంపోర్టెడ్ స్టాండర్డ్ వీల్బేస్ వెర్షన్‌తో పోలిస్తే ఈ కొత్త లాంగ్ వీల్బేస్ మోడల్లో వెనుక కూర్చునే ప్రయాణికులకు ఎక్కువ నీ-రూమ్, లెగ్రూమ్ను ఇచ్చారు. కేబిన్‌లో లభించే లగ్జరీ ఫీల్, కంఫర్ట్ స్థాయి దీన్ని బిజినెస్ క్లాస్ రైడ్‌గా మారుస్తాయి. భారత్‌లోనే అసెంబుల్ అయ్యే మోడల్ ధర 1 కోటి రూపాయల లోపే ఉంటుందని భావిస్తున్నారు. గతంతో పోలిస్తే వినియోగదారులు తక్కువ ధరలోనే మరింత స్పేస్, ప్రీమియం ఫీచర్లు, పవర్‌ఫుల్ రేంజ్‌ను ఆస్వాదిస్తారు. ఈ కార్ మార్కెట్‌లో పెట్రోల్- డీజిల్ LWB మోడళ్లతో పాటు విక్రయాలు జరుపుకుంటుంది.
హవా కొనసాగిస్తున్న BMW X1 LWB
ఎలక్ట్రిక్ సెడాన్‌తో పాటు BMW భారత ఆటో మార్కెట్‌లో తన ఎంట్రీ-లెవల్ SUV X1 లో LWB పెట్రోల్ మోడల్‌ను రూ. 49.90 లక్షల ప్రారంభ ధరతో లాంచ్ చేసింది. ఇందులో 1.5 లీటర్ టర్బో పెట్రోల్ ఇంజిన్ ఇవ్వగా, ఇది 156 BHP శక్తిని ఉత్పత్తి చేస్తుంది.
ఈ కాంపాక్ట్ SUV వీల్‌బేస్‌ను 108mm పెంచారు. దీని రియర్ సీట్ స్పేస్ గతంతో పోలిస్తే చాలా ఎక్కువగా ఉంటుంది. తన సెగ్మెంట్‌లో X1 LWB ఇంత పొడవైన వీల్బేస్, ప్రీమియం కేబిన్ స్పేస్‌తో వినియోగదారులను ఆకర్షిస్తుంది.