Electric Cars Under 50k Downpayment: సొంతంగా ఒక ఫోర్ వీలర్ కొనుగోలు చేయాలనేది చాలా మంది కల. దీని కోసం లక్షల రూపాయలు చేతిలో ఉండాలి, బ్యాంకు బ్యాలెన్స్ కూడా అదే స్థాయిలో ఉండాలని చాలా మంది భావిస్తుంటారు. కానీ మీకు నెలకు 10వేల రూపాయలు ఈఎంఐ చెల్లించే సంపాదన ఉంటే చాలు కారు మీ సొంతం అవుతుంది. మరోవైపు పెట్రోల్ భారం లేకుండా తక్కువ నిర్వహణ ఖర్చు కలిగిన ఈవీలనే సొంతం చేసుకోవచ్చు.
చాలా మందిలో ఎలక్ట్రిక్ కారు అంటే 15 లక్షల నుంచి 20 లక్షల వరకు ఖర్చు అవుతుందనే అపోహ ఉంది. కానీ ప్రస్తుతం మన దేశంలో కేలవ 50వే డౌన్పేమెంట్తో నెల నెలా 10వే EMI చెల్లిస్తూ సొంతం చేసుకోగలిగే బెస్ట్ ఎంట్రీ లెవల్ ఎలక్ట్రిక్ కార్లు అందుబాటులోకి వచ్చాయి.
ఎంజీ కామెట్ ఈవీ
భారత మార్కెట్లో లభించే అత్యంత కాంపాక్ట్, సరసమైన ఎలక్ట్రిక్ కారుగా ఎంజీ కామెట్ ఈవీ గుర్తింపు పొందింది. ముఖ్యంగా రోజువారీ ఆఫీసు పనుల కోసం సిటీ ట్రాఫిక్లో తిరిగే ఐటీ ఉద్యోగులకు, చిన్న కుటుంబాలకు ఇది ఒక అద్భుతమైన ఎంపిక.
ఈ కారు ఎక్స్ షోరూమ్ ధర సుమారు 6.41 లక్షల నుంచి ప్రారంభమవుతుంది. మీరు 50వేల రూపాయల డౌన్పేమెంట్ చెల్లించి, 9.5 శాతం వడ్డీ రేటుతో 7 ఏళ్ల కాలపరిమితికి లోన్ తీసుకుంటే నెలకు సుమారు 9500 నుంచి 10200 వరకు EMI చెల్లించాల్సి ఉంటుంది.
ఇందులో 17.3kwh లిథియం-అయాన్ బ్యాటరీ ప్యాక్ ఉంటుంది. ఒక్కసారి పూర్తి ఛార్జింగ్ చేస్తే కంపెనీ చెప్పిన ప్రకారం 230 కిలోమీటర్ల రేంజ్ లభిస్తుంది. దీని నిర్వహణ ఖర్చు చాలా తక్కువ. కిలోమీటర్కు కేవలం 80 పైసల నుంచి రూపాయి మాత్రమే. పెట్రోల్ కారుతో పోలిస్తే దాదాపు పదో వంతు ఖర్చు.
టాటా టియాగో ఈవీ
మధ్యతరగతి ప్రజలకు అత్యంత ఇష్టమైన బ్రాండ్ టాటా మోటార్స్ నుంచి వచ్చిన ఎంట్రీ- లెవల్ హ్యాచ్బ్యాక్ టాటా టియాగో ఈవీ ప్రస్తుతం దేశంలో అత్యధికంగా అమ్ముడవుతున్న ఎలక్ట్రిక్ కార్లలో ఒకటిగా నిలిచింది.
దీని బేస్ వేరియంట్ ఎక్స్ షోరూమ్ ధర సుమారు 7.99 లక్షలు. వివిధ బ్యాంకులు అందించే 90 శాతం నుంచి 95శాతం ఆన్రోడ్ ఫైనాన్షియల్ స్కీమ్స్ ద్వారా, మీరు 50 వేల నుంచి 70వేల వరకు ప్రారంభ డౌన్పేమెంట్ చెల్లిస్తే సరిపోతుంది. మిగతా మొత్తాన్ని 7 ఏళ్ల వ్యవధికి లోన్గా తీసుకుంటే నెలకు 10500 నుంచి 11200 వరకు EMI చెల్లించాల్సి ఉంటుంది.
ఇందులో రెండు బ్యాటరీ ఆప్షన్లు ఉన్నాయి. 19.2kwh బ్యాటరీ 250 కిలోమీటర్ల రేంజ్ ఇస్తుండగా, 24kwh లాంగ్ రేంజ్ బ్యాటరీ 315 కిలోమీటర్ల రేంజ్ అందిస్తుంది. ముఖ్యంగా దీనికి 4-స్టార్ గ్లోబల్ ఎన్క్యాప్ సేఫ్టీ రేటింగ్ ఉంది.
టాటా పంచ్ ఈవీ
మీరు హ్యాచ్ బ్యాక్ కాకుండా కొంచెం పవర్ఫుల్ ఎస్యూవీ లుక్ ఉన్న కారు కోరుకుంటే టాటా పంచ్ ఈవీ సరైన ఎంపిక. కొత్త తరం acti.ev ప్లాట్ఫామ్పై రూపొందించిన ఈ కారు అద్భుతమైన రోడ్ ప్రెజెన్స్ను కలిగి ఉంది.
దీని ఎంట్రీ లెవల్ వేరియంట్ ధర 9.99 లక్షలు. పండుగ ఆఫర్స్, పాత కారును ఎక్స్చేంజ్ చేయడం ద్వారా మీరు 50 వేల నుంచి 75వేల డౌన్పేమెంట్ ఆప్షన్ను సద్వినియోగం చేసుకోవచ్చు. 7 ఏళ్ల లోన్ తీసుకుంటే ఈఎంఐ 12, 500 నుంచి 13వేల వరకు ఉంటుంది కానీ ఎక్స్చేంజ్ బోనస్లతో దీనిని పదివేలకు తగ్గించుకోవచ్చు.
పెట్రోల్ కారుతో పోలిస్తే ఎలక్ట్రిక్ కారును వాడటం వల్ల నెలకు సుమారు ఆరు వేల నుంచి ఏడు వేల వరకు ఇంధన ఖర్చుు ఆదా చేయవచ్చు. నెలకు వెయ్యి కిలోమీటర్లు తిరిగితే పెట్రోల్ కారుకు ఎనిమిది వేల వరకు ఖర్చు అవుతుంది. అయితే ఈవీకి అయ్యే కరంట్ బిల్లు కేవలం వెయ్యి నుంచి 1200 మాత్రమే. ఈ ఆదా చేసే మొత్తాన్ని మీ ఈఎంఐకి మళ్లించడం ద్వారా, కేవలం మూడు వేల నుంచి నాలుగు వేల నికర వ్యయంతో మీరు కారును నడుపుకోవచ్చు.