BaaS EVs 2026: ఎలక్ట్రిక్ కారు కొనాలని చాలామందికి ఉంటుంది. కానీ వాటి ధరలు పెట్రోల్ & డీజిల్ కార్లతో పోలిస్తే ఎక్కువగా ఉండటం పెద్ద అడ్డంకిగా మారుతోంది. ఈ సమస్యను తగ్గించేందుకు కార్ల కంపెనీలు అనుసరిస్తున్న కొత్త విధానమే BaaS. అంటే, బ్యాటరీ-యాజ్-ఎ-సర్వీస్.
ఈ విధానంలో కారు కొనేటప్పుడు బ్యాటరీ ధరను చెల్లించాల్సిన అవసరమే ఉండదు. అంటే, కారు ధర నుంచి బ్యాటరీ పూర్తి ధర మైనస్ అవుతుంది. దీంతో కారు ప్రారంభ ధర భారీగ తగ్గుతుంది. అయితే, కారు కదలలాంటే బ్యాటరీ కావాలి కాబట్టి, ఆ బ్యాటరీని కారు కంపెనీ నుంచే అద్దెకు తీసుకుంటారు. బ్యాటరీ అద్దెను కిలోమీటర్ చొప్పున లేదా నెలవారీ చొప్పున చెల్లించాలి. ప్రస్తుతం టాటా, MG, సిట్రోయెన్, హ్యుందాయ్, మారుతి సుజుకి, కియా, మహీంద్రా & టయోటా వంటి కంపెనీలు BaaS విధానాన్ని అందిస్తున్నాయి.
టాటా టియాగో EV
దేశంలో అత్యంత తక్కువ ధరకు లభించే ఎలక్ట్రిక్ కార్లలో టాటా టియాగో EV ఒకటి. దీని సాధారణ ప్రారంభ ధర రూ.6.99 లక్షలు. BaaSతో రూ.4.69 లక్షలకే ప్రారంభమవుతుంది. అంటే మొదట చెల్లించాల్సిన మొత్తం రూ.2.30 లక్షలు తగ్గుతుంది. బ్యాటరీ కోసం కిలోమీటర్కు రూ.2.60 చొప్పున చెల్లించాలి.
MG కామెట్ EV
MG కామెట్ EV సాధారణ ధర రూ.7.80 లక్షల నుంచి మొదలవుతుంది. BaaSతో దీని ధర రూ.4.99 లక్షలకు తగ్గుతుంది. గరిష్ఠంగా రూ.2.81 లక్షల వరకు ఆదా అవుతుంది. బ్యాటరీ కోసం కిలోమీటర్కు రూ.3.20 చెల్లించాలి.
టాటా పంచ్ EV
టాటా పంచ్ EV, BaaSతో రూ.6.49 లక్షల నుంచి లభిస్తుంది. సాధారణంగా దీని ప్రారంభ ధర రూ.9.69 లక్షలు. అంటే రూ.3.20 లక్షల వరకు ఆదా చేయవచ్చు. బ్యాటరీ పరిమాణాన్ని బట్టి నెలకు రూ.4,688 నుంచి రూ.5,274 వరకు చెల్లించాలి.
ఇది కూడా చదవండి: మూడు స్క్రీన్లు, కొత్త బ్యాటరీ, AI ఫీచర్లు.. Mahindra BE 6 Sporteqలో అన్నీ ప్రత్యేకతలే!
సిట్రోయెన్ eC3X
సిట్రోయెన్ eC3Xలో BaaSతో భారీగా ఆదా చేయవచ్చు. దీని ప్రారంభ BaaS ధర రూ.6.89 లక్షలు. సాధారణ ధరతో పోలిస్తే గరిష్ఠంగా రూ.5.26 లక్షల వరకు తగ్గుతుంది. బ్యాటరీ ఛార్జీ కిలోమీటర్కు రూ.2.26. కనీసం నెలకు 2,000 కి.మీ. వినియోగానికి చెల్లించాలి.
కియా సైరోస్ EV
కియా సైరోస్ EV రేటు రూ.13.50 లక్షల నుంచి ప్రారంభమవుతుంది. BaaSతో రూ.7.99 లక్షలకే వస్తుంది. అంటే రూ.5.51 లక్షల వరకు ప్రారంభ వ్యయం సేవ్ అవుతుంది. 42kWh బ్యాటరీకి కిలోమీటర్కు రూ.3.30 చెల్లించాలి.
MG విండ్సర్ EV
భారత్లో BaaS విధానాన్ని తొలిసారిగా తీసుకొచ్చిన మోడళ్లలో MG విండ్సర్ EV ఒకటి. దీని BaaS ధర రూ.9.99 లక్షల నుంచి స్టార్టవుతుంది. సాధారణ ధరతో పోలిస్తే, BaaSతో రూ.4.71 లక్షల వరకు ఆదా చేయవచ్చు. 38kWh బ్యాటరీకి కిలోమీటర్కు రూ.3.99; 52.9kWh బ్యాటరీకి కిలోమీటర్కు రూ.4.50 చెల్లించాలి.
ఇది కూడా చదవండి: ఒకసారి ఛార్జ్ చేస్తే 1003 కిలోమీటర్ల రేంజ్ ఇచ్చే కారు! కొత్త చర్చ దారి తీస్తున్న డెంజా N8 మైండ్బ్లోయింగ్ ఫీచర్స్!
హ్యుందాయ్ క్రెటా ఎలక్ట్రిక్
క్రెటా ఎలక్ట్రిక్కు కూడా BaaS సదుపాయం అందుబాటులో ఉంది. దీని BaaS ధర రూ.10.99 లక్షల నుంచి మొదలవుతుంది. సాధారణ ధర రూ.18.03 లక్షలతో పోలిస్తే రూ.7.04 లక్షల వరకు మిగులుతుంది. 42kWh బ్యాటరీకి కిలోమీటర్కు రూ.3.90 చెల్లించాలి.
మారుతి సుజుకి ఈ విటారా
మారుతి ఈ విటారా BaaSతో రూ.10.99 లక్షల నుంచి లభిస్తుంది. 49kWh బ్యాటరీకి కిలోమీటర్కు రూ.3.99; 61kWh బ్యాటరీకి రూ.4.39 చెల్లించాలి. వేరియంట్ను బట్టి రూ.5.20 లక్షల నుంచి రూ.5.65 లక్షల వరకు ప్రారంభ ధరలో ఆదా చేయవచ్చు.
మహీంద్రా BE 6 స్పోర్టెక్
ఇటీవలే BaaS కిందకు వచ్చిన మోడల్ ఇది. 59kWh బ్యాటరీ ఉన్న One & Two వేరియంట్లకు మాత్రమే ఈ పథకం వర్తిస్తుంది. BaaSతో ప్రారంభ ధర రూ.11.45 లక్షలు. సాధారణ ధరతో పోలిస్తే రూ.8 లక్షలు తగ్గుతుంది. బ్యాటరీ కోసం కిలోమీటర్కు రూ.3.75 చెల్లించాలి.
కియా కరెన్స్ క్లావిస్ EV
కియా కరెన్స్ క్లావిస్ EV కూడా BaaSతో అందుబాటులో ఉంది. ఇది ఈ జాబితాలోని ఏకైక MPV. ప్రారంభ BaaS ధర రూ.12.88 లక్షలు. 42kWh బ్యాటరీకి కిలోమీటర్కు రూ.3.30; 51.4kWh బ్యాటరీకి రూ.3.80 చెల్లించాలి. BaaSతో గరిష్ఠంగా రూ.6.10 లక్షల వరకు మిగిల్చుకోవచ్చు.
MG ZS EV
MG ZS EV కొనేవాళ్లకు BaaSతో రూ.13 లక్షల నుంచే అందుబాటులోకి వస్తుంది. సాధారణ ధరతో పోలిస్తే సుమారు రూ.5 లక్షల వరకు ఆదా చేయవచ్చు. 50.3kWh బ్యాటరీకి కిలోమీటర్కు రూ.4.50 చెల్లించాలి.
టయోటా అర్బన్ క్రూయిజర్ ఇబెల్లా
టయోటా ఇబెల్లా BaaS ధర రూ.15.25 లక్షల నుంచి మొదలవుతుంది. సాధారణ ధర రూ.23.60 లక్షలు. అంటే రూ.8.35 లక్షల వరకు ప్రారంభ వ్యయం తగ్గుతుంది. 61kWh బ్యాటరీకి కిలోమీటర్కు రూ.4.99 చెల్లించాలి.
BaaS విధానం వల్ల ఎలక్ట్రిక్ కార్ల ప్రారంభ ధర భారీగా తగ్గుతుంది. ముఖ్యంగా తక్కువ బడ్జెట్లో EV కొనాలనుకునేవారికి ఇది మంచి ఆప్షన్. అయితే కారు ధరతో పాటు ప్రతి కిలోమీటర్కు చెల్లించే బ్యాటరీ ఛార్జీని కూడా లెక్కించాలి. రోజువారీ ప్రయాణం ఎక్కువగా ఉండేవాళ్లు మొత్తం ఖర్చును ముందుగానే అంచనా వేసుకోవడం మంచిది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.