2026 Toyota Glanza Mileage: కారు కొనేటప్పుడు ధరతో పాటు మైలేజీకి కూడా చాలామంది ప్రాధాన్యం ఇస్తారు. ముఖ్యంగా రోజూ ఆఫీసులకు వెళ్లేవాళ్లు, కుటుంబ అవసరాల కోసం కారు కొనేవాళ్లు తక్కువ ఇంధన ఖర్చుతో ఎక్కువ దూరం ప్రయాణించే వాహనం కోసం చూస్తుంటారు. అలాంటి వారిని ఆకట్టుకునేలా కొత్త టయోటా గ్లాంజా 2026 మోడల్ మార్కెట్లోకి వచ్చింది. ఈ కారులో ఇంజిన్‌ను మార్చడంతో పాటు మైలేజీని కూడా మెరుగుపరిచారు. మరి... ఈ కారుకు పోటీగా మార్కెట్‌లో ఉన్న Maruti Baleno, Hyundai i20, Tata Altroz ఎంత మైలేజ్‌ ఇస్తున్నాయి? వీటితో పోలిస్తే గ్లాంజా ఎంత మైలేజీ ఇస్తుంది?.
2026 టయోటా గ్లాంజా ధరలు రూ.6.99 లక్షల నుంచి రూ.10.98 లక్షల ఎక్స్‌షోరూమ్ వరకు ఉన్నాయి. ఈ కొత్త మోడల్‌లో ప్రధాన మార్పు 1.2 లీటర్, 3 సిలిండర్‌ జెడ్‌ సిరీస్ పెట్రోల్ ఇంజిన్. పాత నాలుగు సిలిండర్ల ఇంజిన్‌తో పోలిస్తే ఇది కొంత తక్కువ శక్తిని జనరేట్ చేసినప్పటికీ, గతం కంటే మెరుగైన ఇంధన సామర్థ్యాన్ని ఇస్తుందని కంపెనీ పేర్కొంది. గ్లాంజాలో పెట్రోల్, సీఎన్‌జీ వేరియంట్లలో ఐదు గేర్ల మాన్యువల్ గేర్‌బాక్స్‌తో పాటు ఏఎంటీ ఎంపిక కూడా ఉంది.
పెట్రోల్ మైలేజీలో గ్లాంజా ప్రత్యేకత
2026 టయోటా గ్లాంజా పెట్రోల్ మాన్యువల్ వేరియంట్ లీటరుకు 23.80 కిలోమీటర్ల మైలేజీ ఇస్తుందని కంపెనీ ప్రకటించింది. ఏఎంటీ వేరియంట్ విషయానికి వస్తే ఈ సంఖ్య 24.77 కిలోమీటర్లుగా ఉంది. ఈ గణాంకాలు ప్రస్తుత విభాగంలో గ్లాంజాను ముందంజలో నిలుపుతున్నాయి.
మారుతి సుజుకి బలెనో కూడా ఇదే మైలేజీని అందిస్తుంది. ఈ రెండు కార్లు ఒకే తరహా ఇంజిన్ సాంకేతికతను పంచుకోవడమే ఇందుకు కారణం. పాత గ్లాంజాతో పోలిస్తే కొత్త మోడల్‌లో మైలేజీ గణనీయంగా పెరిగింది. మాన్యువల్ వేరియంట్‌లో లీటరుకు 22.35 కిలోమీటర్ల నుంచి 23.80 కిలోమీటర్లకు చేరింది. ఏఎంటీ వేరియంట్‌లో 22.94 కిలోమీటర్ల నుంచి 24.77 కిలోమీటర్లకు పెరిగింది.
టాటా ఆల్ట్రోజ్ పెట్రోల్ మాన్యువల్ వేరియంట్ లీటరుకు 19.33 కిలోమీటర్ల మైలేజీ ఇస్తుంది. ఈ లెక్కన గ్లాంజా మాన్యువల్ వేరియంట్ దానికంటే 4.47 కిలోమీటర్లు ఎక్కువ మైలేజీ ఇస్తుంది. ఆల్ట్రోజ్ పెట్రోల్ AMT మైలేజీ 18.5 నుంచి 19.33 kmpl వస్తుందని కంపెనీ వెల్లడించింది.
ARAI డేటా ప్రకారం, హ్యుందాయ్ ఐ20 పెట్రోల్ మాన్యువల్ 16 kmpl నుంచి 21 kmpl వరకు, పెట్రోల్ ఆటోమేటిక్ వేరియంట్ 19.65 kmpl నుంచి 20 kmpl వరకు మైలేజీ ఇస్తుంది.
ఇది కూడా చదవండి: 2026 Toyota Glanza Faceliftలో అదిరిపోయే ఫీచర్లు.. కానీ ఈ 3 విషయాల్లో నిరాశ తప్పదు!
సీఎన్‌జీ మైలేజీలోనూ అదే జోరు
పెట్రోల్‌తో పాటు సీఎన్‌జీ కార్లను కోరుకునేవారికి గ్లాంజా మరో ఆకర్షణగా నిలుస్తోంది. కొత్త గ్లాంజా సీఎన్‌జీ మాన్యువల్ వేరియంట్ కిలోకు 33.61 కిలోమీటర్ల మైలేజీ ఇస్తుందని కంపెనీ పేర్కొంది. సీఎన్‌జీ ఏఎంటీ వేరియంట్ కిలోకు 34.47 కిలోమీటర్ల మైలేజీని అందిస్తుంది.
మారుతి బలెనో సీఎన్‌జీ కూడా ఇదే గణాంకాలను నమోదు చేసింది. దీంతో ఈ రెండు కార్లు మైలేజీ విషయంలో సమానంగా నిలిచాయి. పాత గ్లాంజా సీఎన్‌జీ మాన్యువల్ వేరియంట్ కిలోకు 30.61 కిలోమీటర్ల మైలేజీ ఇచ్చేది. కొత్త మోడల్‌లో ఈ సంఖ్య 33.61 కిలోమీటర్లకు పెరిగింది. అంటే కిలోకు 3 కిలోమీటర్ల మెరుగుదల నమోదైంది.
టాటా ఆల్ట్రోజ్ సీఎన్‌జీ మాన్యువల్ వేరియంట్ కిలోకు 27.8 కిలోమీటర్ల మైలేజీ ఇస్తుంది. దీనితో పోలిస్తే గ్లాంజా సీఎన్‌జీ మాన్యువల్ వేరియంట్ కిలోకు 5.81 కిలోమీటర్లు ఎక్కువ మైలేజీ ఇస్తుంది. ఆల్ట్రోజ్ సీఎన్‌జీ ఏఎంటీ మైలేజీ వివరాలు ఇంకా వెల్లడించలేదు.
ఐ20లో సీఎన్‌జీ ఎంపిక లేదు
ఈ నాలుగు కార్లలో హ్యుందాయ్ ఐ20 మాత్రమే సీఎన్‌జీ వేరియంట్‌తో అందుబాటులో లేదు. మిగిలిన కార్లలో పెట్రోల్‌తో పాటు సీఎన్‌జీ ఎంపికలు ఉన్నాయి. మాన్యువల్, ఆటోమేటెడ్ మాన్యువల్ గేర్‌బాక్స్‌లను కూడా ఎంచుకోవచ్చు. అయితే, కారు కొనే ముందే ప్రతి వేరియంట్‌కు సంబంధించిన నిజమైన మైలేజీ వివరాలను పరిశీలించడం మంచిది.
ఇది కూడా చదవండి: 2026 Toyota Glanza Facelift లుక్‌ అదిరిపోయింది.. కొత్త ఇంజిన్, ADAS ఫీచర్లు, CNG ఆటోమేటిక్ కూడా!
ఇంజిన్ ఎంపికల విషయంలోనూ కొన్ని తేడాలు ఉన్నాయి. టాటా ఆల్ట్రోజ్‌లో డీజిల్ ఇంజిన్ ఎంపిక ఉంది. హ్యుందాయ్ ఐ20 ఎన్‌ లైన్‌లో టర్బో పెట్రోల్ ఇంజిన్ అందుబాటులో ఉంది. ఈ రెండు ఎంపికలు 2026 టయోటా గ్లాంజాలో లేవు.
మొత్తంగా చూస్తే.. ప్రకటించిన మైలేజీ గణాంకాల ప్రకారం పెట్రోల్, సీఎన్‌జీ విభాగాల్లో టయోటా గ్లాంజా, మారుతి బాలెనో ముందంజలో ఉన్నాయి. అయితే, వాస్తవ రహదారి పరిస్థితుల్లో వచ్చే మైలేజీ డ్రైవింగ్ విధానం, ట్రాఫిక్, రహదారి పరిస్థితులను బట్టి మారుతుంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.