Andhra University: వందేళ్ల ఆంధ్రా యూనివర్సిటీ మత వివాదాలకు వేదికగా మారుతోందా?

Andhra University: వందేళ్ల ఆంధ్రా యూనివర్సిటీలో పరిస్థితులు ఉద్రిక్తంగా ఉన్నాయి. చాలా కాలం తర్వాత పోలీసులు భారీ బలగాలను మోహరించాల్సి వచ్చింది.

వందేళ్ల ఆంధ్రా యూనివర్సిటీ మత వివాదాలకు వేదికగా మారుతోందా?

Source : Social Media

Show Quick Read

Key points generated by AI, verified by newsroom

Andhra University: వైజాగ్‌లోని ప్రఖ్యాత విశ్వ విద్యాలయం ఈ సంవత్సరంతో వందేళ్లు పూర్తి చేసుకుంది. కానీ ఈ వందేళ్లలో ఎన్నడూ లేనట్టు ప్రస్తుతం అక్కడ మత రాజకీయాలు మొదలవుతున్నాయా అన్న అనుమానం కలుగుతోంది అక్కడి పరిస్థితులు చూస్తుంటే. ఇంతవరకూ విద్యార్థి సమస్యలు, హాస్టల్ ఫీజులు లాంటి అంశాలపై వివాదాలు చెలరేగడం చూసిన AU తొలిసారి విద్యార్థుల మధ్య మతపరమైన ఘర్షణలకు సాక్షి గా నిలుస్తోంది.

రైట్ వింగ్ vs లెఫ్ట్ వింగ్ : AUలో  తీవ్ర ఉద్రిక్తత 

గత కొన్ని రోజులుగా AUలో RSS ప్రభావిత విద్యార్థులు వామపక్ష అనుబంధ విద్యాసంఘాల మధ్య తీవ్ర ఉద్రిక్త పరిస్థితులు నెలకొంటున్నాయి. అవి ఇప్పుడు ఒకరిపై ఒకరు పోలీస్ కంప్లైంట్‌లు ఇచ్చుకోవడం పరస్పర దాడులు చేసుకోవడం వరకూ వచ్చేసింది. ఏకంగా ఒకరిపై మరొకరు ఫిర్యాదులు చేసుకోవడం కోసం వైస్ ఛాన్స్‌లర్ కార్యాలయం ముందు గుమికూడటం సహా ఏకంగా దాడులు చేసుకునేంత వరకూ వచ్చేసింది. దీంతో అసలు VC ఎవరి ఫై ఎలాంటి చర్యలు తీసుకుంటారు ఈ వివాదానికి ఎలా ఫుల్ స్టాప్ పెడతారు అని అందరూ ఆసక్తిగా చూస్తున్నారు 

AUలోకి బయటి వ్యక్తులు వచ్చి విద్వేషాలు రెచగొడుతున్నారు : లక్ష్మి, PDSO సంఘ విద్యార్థి 

యూనివర్సిటీలోకి బయటి వ్యక్తులు వచ్చి మత విద్వేషాలు రెచ్చగొట్టడంతోనే పరిస్థితి ఉద్రిక్తంగా మారింది అని ఆంధ్రా యూనివర్సిటీ విద్యార్థి లక్ష్మీ అన్నారు. ఇలా ఇంతకుముందు ఎన్నడూ జరగలేదని తెలిపారు. కావాలనే RSS, ABVP వ్యక్తులమని కొందరు వచ్చి రోజూ సాయంత్రం పూట కాలేజీ గ్రౌండ్‌లో కర్రలు పట్టుకుని కవాతు, కసరత్తు చేస్తూ నినాదాలు చేస్తున్నారని పరోక్షంగా విద్యార్థుల మధ్య ఘర్షణ రేపే ప్రయత్నం చేస్తున్నారు అని ఆమె ఆరోపించారు. వాళ్లలో చాలామంది AU క్యాంపస్‌కు చెందిన వారు కాదని అలాంటి వారిని రానీయవద్దు అన్నందుకు తమపై దాడి చేశారని లక్ష్మి  తెలిపారు. ఆడపిల్లలమని చూడకుండా తమపై చెప్పులు, వాటర్ బాటిల్స్ విసిరారని అసహ్యకరమైన పదజాలం వాడుతున్నారని AUలో చదువుతున్న ఇంజనీరింగ్ విద్యార్థిని ప్రగతి అన్నారు. AUని కేవలం విద్యార్థులు వారి చదువుకు మాత్రమే పరిమితం చెయ్యాలని ఎలాంటి మతపరమైన అంశాలు యూనివర్సిటీలో ఉండొద్దనేది తమ డిమాండ్‌గా ఆమె తెలిపారు.

భారత మాతాకీ జై అనడం తప్పా : ABVP నేత  నితిన్ 

తాము గత 6నెలలుగా ప్రతీ రోజూ AU గ్రౌండ్స్‌లో కవాతు చేస్తున్నామని ఎలాంటి మత ప్రచారం చెయ్యడం లేదనీ అన్నారు ABVP విశాఖ జిల్లా కార్యదర్శి నితిన్. విద్యార్దుల్లో దేశ భక్తిని పెంపొందించేలా తాము కార్యక్రమాలు చేపడుతుంటే వామపక్ష ప్రేరేపిత విద్యార్థి సంఘాలు ముందుగా తమపై దాడి చేశాయని ABVP సంఘ నేతలు ఆరోపించారు. ఒకవైపు దేశ ప్రతిష్ట చాటేలా మిలన్ కార్యక్రమం వైజాగ్‌లో జరుగుతున్న రోజే దాని ప్రతిష్ట దెబ్బ తీసేలా SFI, PDSO లాంటి సంస్థలు పని చేస్తున్నాయని వారు ఆరోపించారు.

AUఫై పట్టు కోసమే మత వివాదాలు సృష్టిస్తున్నారా?

ఆంధ్రా యూనివర్సిటీకి ప్రపంచ వ్యాప్తంగా ఉన్న ప్రతిష్ట అందరికీ తెలిసిందే. వైజాగ్ నగరం ఒక గ్లోబల్ సిటీగా మారుతోన్న తరుణంలో నగరంతోపాటు AUపై కూడా పట్టు సాధించేందుకు అన్ని రాజకీయ పార్టీలు ప్రయత్నిస్తున్నాయని దాని ఫలితమే ఇలా విద్యార్థుల మధ్య విభేదాలు సృష్టించే కార్యక్రమం జరుగుతుందని అనుమానం వ్యక్తం చేశారు రెటైర్డ్ AU ప్రొఫెసర్ జాన్. ఆంధ్రా యూనివర్సిటీలో ఎన్నడూ ఇలాంటి మతపరమైన గొడవలు లేవని అందరూ కలిసి మెలిసి ఉంటారని చెబుతూనే ఇలాంటి వివాదాలపై ఆందోళన వ్యక్తం చేశారాయన. మరి దీనిపై యూనివర్సిటీ VC రాజశేఖర్ రెడ్డి ఎలాంటి చర్యలు తీసుకుని ఈ వివాదానికి ఆదిలోనే ఎలా ఫుల్ స్టాప్ పెడతారో అందరూ ఉత్కంఠ తో చూస్తున్నారు