visakhapatnam

Vijayasai Reddy About YSRCP: ఇండీ కూటమిలో వైసీపీ విలీనంపై మాజీ ఎంపీ విజయసాయిరెడ్డి సంచలన వ్యాఖ్యలు

Shankar Dukanam — Wed, 30 Sep 2026 15:22:36 +0530

ఆంధ్రప్రదేశ్‌లో తన పార్టీ భవిష్యత్ రాజకీయ పరిణామాలతో పాటు గంజాయి సాగుపై మాజీ ఎంపీ విజయసాయిరెడ్డి కీలక వ్యాఖ్యలు చేశారు. రాష్ట్రంలో గంజాయి సాగు, వినియోగం లేదని చెప్పడం సరికాదని, ఏదైనా ఒక రెఫరెన్స్‌తో వెళ్తే ఏ బడ్డీ కొట్టుకైనా వెళ్లినా గంజాయి దొరుకుతుందని, అంత విచ్చలవిడిగా లభిస్తోందని సంచలన వ్యాఖ్యలు చేశారు. గత 12 ఏళ్లలో వైఎస్ఆర్సీపీ, NDA కూటమి పాలనలో ఒక్క గ్రీన్ ఫీల్డ్ ఇరిగేషన్ ప్రాజెక్టు కూడా తీసుకురాలేకపోయారని విమర్శించారు. జగన్ ను జైల్లో పెట్టిన కాంగ్రెస్ పార్టీతో పొత్తు పెట్టుకునేందుకు వైసీపీ ఈరోజు ప్రయత్నిస్తుందంటే.. ఎంత సిగ్గులేని పార్టీనో అర్థం చేసుకోవాలంటూ ఘాటు వ్యాఖ్యలు చేశారు. విశాఖకు వచ్చిన ఆయన ఏబీపీ దేశంతో మాట్లాడుతూ పలు విషయాలు షేర్ చేసుకున్నారు. తాను స్థాపించనున్న కొత్త పార్టీలో యువత, జెన్-జీ (Gen-Z) కీలకం అవుతారని, యువతకు సగం సీట్లు ఇచ్చి ఎన్నికల బరిలో నిలుపుతామన్నారు

ప్రశ్న 1: ఏపీలో గంజాయి సాగు, వినియోగంపై విజయసాయిరెడ్డి స్పందన ఏమిటి?

జవాబు: రాష్ట్రంలో గంజాయి సాగు, వినియోగం లేదనడం మనస్సాక్షిని చంపుకోవడమేనని విజయసాయిరెడ్డి స్పష్టం చేశారు. ఏదైనా రెఫరెన్స్‌తో ఏ బడ్డీ కొట్టుకు వెళ్లినా గంజాయి దొరుకుతుందని, అంత విచ్చలవిడిగా లభిస్తోందని తెలిపారు.

ప్రశ్న 2: వైసీపీ ఓట్లు చీల్చడానికి పార్టీ పెట్టారని వినిపిస్తోంది. ఆ కామెంట్లపై ఏమంటారు ?

జవాబు: మా పార్టీకి ఓట్లు వస్తుంటాయంటే.. ప్రతి ఒక్కరూ గతంలో ఏదో ఒక పార్టీకి ఓటు వేసి ఉంటారు. పార్టీ సిద్ధాంతాలు, భావజాలాన్ని నమ్మినవారు ఓట్లు వేస్తారని నమ్ముతున్నాను. ఇప్పుడే పుట్టిన వారికి అయితే ఓటు హక్కు అయితే రాదు కదా. కొందరికి తొలిసారి ఓటు హక్కు వస్తుంది. కొత్త వారితో పాటు గతంలో వేరే పార్టీకి ఓటేసిన వారు సైతం మన సిద్ధాంతాలు నచ్చి మా వైపు రావొచ్చు.

ప్రశ్న 3: నూతన పార్టీలో యువత (జెన్-జీ), సీనియర్ నాయకుల పాత్ర ఎలా ఉండబోతోందని విజయసాయిరెడ్డి చెప్పారు?

జవాబు: నా పార్టీ జెన్-జీ (Gen-Z) ప్రాధాన్యత కలిగిన యువత పార్టీగా నడిపిస్తామని, యువతే ముందుండి రాష్ట్రాన్ని నడిపించాలని భావిస్తున్నాం. 34 శాతం మంది నారాయణస్వామి లాంటి సీనియర్ నాయకులకు అవకాశం ఇస్తాం.

Also Read: Kuppam Greenfield Airport: కుప్పం గ్రీన్‌ఫీల్డ్‌ ఎయిర్‌పోర్టుకు భూమి ఇచ్చేందుకు టీటీడీ బోర్డు అంగీకారం

ప్రశ్న 4: పార్టీ అధికారంలోకి వస్తే విజయసాయిరెడ్డి ముఖ్యమంత్రి అవుతారా ?

జవాబు: తాను ముఖ్యమంత్రిగా ఉండనని విజయసాయిరెడ్డి స్పష్టం చేశారు. కేవలం ఒక మార్గదర్శకుడిగా, మెంటార్‌గా ఉండి పార్టీకి దిశానిర్దేశం చేస్తానని చెప్పారు.

ప్రశ్న 5: వైఎస్ జగన్మోహన్ రెడ్డి పార్టీని ఇండీ కూటమిలో విలీనం అవుతుందని వినిపిస్తోంది. దీనిపై మీరేమంటారు. ?

జవాబు: జగన్మోహన్ రెడ్డి ఇండీ (I.N.D.I.A)కూటమిలో వైసీపీ పార్టీని విలీనం చేస్తారా లేదా అన్నది తనకు కచ్చితంగా తెలియదన్నారు. అయితే చర్చలు జరుపుతున్నారని రూమర్స్ వినిపిస్తున్నాయని.. త్వరలోనే వాస్తవాలు బయటకు వస్తాయన్నారు విజయసాయిరెడ్డి.

అధికారం లోకి వచ్చేంత వరకూ వాడుకున్నారు తరవాత కరివేపాకు వలె తీసి పడేశారని ఆవేదన వ్యక్తం చేశారు. తన రాజకీయ జీవితంతో ఎంతో ముడిపడి ఉన్న ఉత్తరాంధ్ర ఎమోషన్ తో చెబుతున్నాను.. ఇక్కడ నివాసం ఏర్పాటు చేసుకున్నాను. ఉత్తరాంధ్రకి కేంద్రం నెలకి 350 కోట్ల రూపాయలు ఇవ్వాలి కానీ కేటాయించడం లేదు. అటు వైసీపీ, ఇటు కూటమి పార్టీలకు సిద్ధాంతాలు లేవు, వారికి పదవులే ముఖ్యం. వారికి రాష్ట్ర ప్రయోజనాలు అక్కర్లేదని వ్యాఖ్యానించారు.

విశాఖ స్టీల్ ప్లాంట్ లో ప్రమాదం నేలపాలైన 150 టన్నుల ద్రవ ఉక్కు

ABP Desam — Wed, 30 Sep 2026 13:42:32 +0530

విశాఖపట్నం స్టీల్ ప్లాంట్‌లో జరిగిన ఘోర ప్రమాదంలో సుమారు 150 టన్నుల ద్రవ ఉక్కు నేలపాలైంది. ఉక్కు తయారీ సమయంలో ఒక్కసారిగా జరిగిన ఈ హఠాత్ పరిణామానికి సంబంధించిన వివరాలు కలకలం రేపగా, ప్రాణనష్టం తప్పడంతో అధికారులు ఊపిరి పీల్చుకున్నారు.

Vijayasai Reddy: ఏపీని కమ్మ, క్రిస్టియన్లు పాలిస్తున్నారు.. మేం గెలిస్తే ఆ కులాలకే సీఎం పదవి: విజయసాయిరెడ్ది

Shankar Dukanam — Wed, 30 Sep 2026 13:35:40 +0530

విశాఖపట్నం: విశాఖపట్నం వేదికగా మాజీ ఎంపీ విజయసాయిరెడ్డి కీలక వ్యాఖ్యలు చేశారు. ఆంధ్రప్రదేశ్ రాష్ట్రాన్ని కమ్మ, క్రిస్టియన్లు మాత్రమే పాలిస్తున్నారని.. బీసీ కులాల నుంచి ఎవ్వరూ సీఎం కాలేదని, మేం గెలిస్తే వెనుకబడిన కులాలకే సీఎం పదవి ఇస్తామన్నారు. విశాఖపట్నంలో నిర్వహించిన మీడియా సమావేశంలో రాజధాని అమరావతిని తాను వ్యతిరేకించలేదని స్పష్టం చేస్తూనే.. గత వైసీపీ పాలనను ఎండగట్టారు.

జగన్ వద్ద బ్యాడ్ చేసింది సజ్జలే

మాజీ ఎంపీ విజయసాయిరెడ్డి వైఎస్సార్‌సీపీ నాయకత్వంపై సంచలన వ్యాఖ్యలు చేశారు. వైసీపీ నేతలది ప్రజలపై బూటకపు ప్రేమ అని, తీవ్ర సంచలనం సృష్టించిన మద్యం కుంభకోణంలో తనకేమీ సంబంధం లేదన్నారు. దీనికి అసలు కర్త, కర్మ, క్రియ అంతా రాజ్ కేసిరెడ్డేనని స్పష్టం చేశారు. తనకు తెలిసిన వివరాలన్నీ ఇప్పటికే అధికారులకు వెల్లడించినట్లు తెలిపారు. సజ్జల రామకృష్ణారెడ్డి వైఖరి వల్లే పార్టీ తీవ్రంగా నష్టపోయిందని, వైఎస్ జగన్ వద్ద తనను ఒక దుర్మార్గుడిగా చిత్రీకరించింది ఆయనేనని విజయసాయిరెడ్డి తీవ్రస్థాయిలో ధ్వజమెత్తారు.

రాజధానిపై వైసీపీ మోసం చేసింది

విశాఖపట్నాన్ని రాజధాని చేస్తామని చెప్పి, మూడు రాజధానులు అంటూ వైసీపీ మాట తప్పిందని విజయసాయిరెడ్డి అన్నారు. నాడు విశాఖను రాజధానిగా ప్రకటించిన వైఎస్ జగన్.. నేడు 'మావిగన్' అంటూ విచిత్ర వ్యాఖ్యలు చేస్తున్నారని ఎద్దేవా చేశారు. విశాఖ అభివృద్ధి విషయంలో మాట తప్పినందుకు వైసీపీ అధినేత, పార్టీ నేతలు ఉత్తరాంధ్ర ప్రజలకు బహిరంగ క్షమాపణ చెప్పాలని డిమాండ్ చేశారు. అమరావతి రాజధానికి తాను ఎంతమాత్రం వ్యతిరేకం కాదన్న విజయసాయిరెడ్డి.. అధికారంలోకి వచ్చే వరకు వైసీపీ తనను వాడుకొని, ఆ తర్వాత 3 నెలల్లోనే పక్కన పెట్టి తనపై కుట్రలు, దుష్ప్రచారం చేసిందని ఆవేదన వ్యక్తం చేశారు.

Also Read: AP Local Body Elections 2026: ఏపీ స్థానిక సంస్థల ఎన్నికలు - తాడేపల్లి హుకుం.. క్షేత్రస్థాయిలో నైరాశ్యం! వైఎస్సార్‌సీపీలో రాజకీయ సంక్షోభం కనిపిస్తోందా?

ఉత్తరాంధ్ర హక్కులు, ప్రాంతీయ సమస్యలపై పోరాటం

ఉత్తరాంధ్ర అభివృద్ధిని రెండు పవర్ ఫుల్ కుటుంబాలు తీవ్రంగా నిర్లక్ష్యం చేశాయని విమర్శించారు. ఉత్తరాంధ్రలో చెరకు కర్మాగారాల మూసివేత వెనుక టిడిపి, వైసీపీ రెండు పార్టీల కుట్ర ఉందని ఆరోపించారు. కూటమి ప్రభుత్వం తక్షణమే స్పందించి మూతపడిన చెరకు ఫ్యాక్టరీలను తెరిపించాలని కోరారు. అలాగే రైవాడ రిజర్వాయర్ కోసం భూములు ఇచ్చిన రైతులకు నీరు అందలేదన్నారు. ఈ ప్రాంత సమగ్ర వికాసానికి శ్రీకృష్ణ కమిటీ నివేదికను అమలు చేయాలని, గిరిజన ప్రాంతాల హక్కుల పరిరక్షణకు తమ పార్టీ కృషి చేస్తుందని మాజీ ఎంపీ పేర్కొన్నారు.

1/70 చట్టం, జీవో నంబర్ 3లను సమగ్రంగా అమలు చేస్తామని, గిరిజనుల ఆర్థిక వ్యవస్థను బలోపేతం చేసేందుకు కృషి చేస్తామన్నారు. అలాగే పేదరికం కారణంగా మతమార్పిడికి గురైన వర్గాలను తిరిగి హిందూత్వంలోకి తెచ్చేందుకు ప్రయత్నిస్తామని చెప్పారు. త్వరలోనే కొత్త రాజకీయ పార్టీ పేరును అధికారికంగా ప్రకటిస్తానని, ఆ తర్వాత ప్రజా సమస్యల తెలుసుకునేందుకు పాదయాత్ర చేపడతానని విజయసాయిరెడ్డి స్పష్టం చేశారు.

Also Read: Case Filed On Veeramachaneni: వీఆర్‌కే డైట్ వీరమాచినేని రామకృష్ణపై కేసు నమోదు.. అనధికార వైద్య సలహాలు చేస్తున్నారని ఆరోపణలు!

Former MP Vijayasai Reddy: తెలంగాణలోని ఏపీ హోంగార్డులను స్వరాష్ట్రానికి కేటాయించాలి: మాజీ ఎంపీ సాయిరెడ్డి విజ్ఞప్తి

Shankar Dukanam — Mon, 28 Sep 2026 10:43:20 +0530

Andhra Pradesh News | విశాఖపట్నం: కొత్త పార్టీ స్థాపిస్తానని ప్రకటన చేసిన మాజీ ఎంపీ విజయసాయిరెడ్డి గ్రౌండ్ లెవల్ పనులు ముమ్మరం చేశారు. ఓ వైపు వరుస ప్రెస్ మీట్స్ పెట్టి కొత్త పార్టీ ఏర్పాటుకు, రాష్ట్రంలో ప్రత్యామ్నాయ రాజకీయాలు ఎందుకు అవసరమో చెబుతున్నారు. ఈ క్రమంలో విభజన సమస్యల్లో ఒకటి విజయసాయిరెడ్డి స్పందించారు. ఆంధ్రప్రదేశ్ విభజన జరిగి ఇన్నేళ్లు గడుస్తున్నా, ఇంకా 500 మందికి పైగా ఏపీకి చెందిన హోంగార్డులు తెలంగాణలోనే కొనసాగుతున్నారు. ఈ విషయాన్ని ప్రస్తావిస్తూ కొత్త పార్టీ పెట్టేందుకు సిద్ధంగా ఉన్న విజయసాయి రెడ్డి ఎక్స్ వేదికగా ఆందోళన వ్యక్తం చేశారు. విడిపోయిన నాటి నుంచి స్వరాష్ట్రానికి రాకపోవడంతో ఆయా హోంగార్డులతో పాటు వారి కుటుంబాలు తీవ్రమైన ఇబ్బందులను ఎదుర్కొంటున్నాయని పేర్కొన్నారు.

2 రాష్ట్రాల్లోనూ స్థానికత సమస్యల కారణంగా వీరు సంక్షేమ పథకాలకు, ఇతర ప్రభుత్వ ప్రయోజనాలకు దూరమవుతున్నారని విజయసాయిరెడ్డి తెలిపారు. ఈ సమస్య తీవ్రతను దృష్టిలో ఉంచుకుని ఆంధ్రప్రదేశ్, తెలంగాణ ప్రభుత్వాలు తక్షణమే స్పందించాలని ఆయన కోరారు. రెండు రాష్ట్రాలు సమన్వయంతో చర్చించి, ఆ 500 మందికి పైగా ఉన్న హోంగార్డులను వీలైనంత త్వరగా ఆంధ్రప్రదేశ్‌కు కేటాయించి వారి సమస్యను శాశ్వతంగా పరిష్కరించాలని విజ్ఞప్తి చేశారు. ఉమ్మడి ఆంధ్రప్రదేశ్ విభజన జరిగి ఏళ్లు గడుస్తున్నా ఇంకా చాలా సమస్యలు పరిష్కారం కాలేదని తెలిసిందే.

ABP దేశం ఎఫెక్ట్: పరవాడ ఫార్మాసిటీ కాలుష్యంపై పవన్‌ కల్యాణ్‌ సీరియస్‌.. 95 పరిశ్రమలకు షోకాజ్ నోటీసులు!

ABP Desam — Sun, 27 Sep 2026 11:50:05 +0530

అనకాపల్లి జిల్లా పరవాడ ఫార్మాసిటీ పరిధిలో పరిశ్రమల రసాయన వ్యర్థాల వల్ల పర్యావరణం, ప్రజల ఆరోగ్యం తీవ్రంగా దెబ్బతింటున్న ఉదంతంపై ABP దేశం ప్రత్యేక వార్తా కథనానికి రాష్ట్ర ఉప ముఖ్యమంత్రి, పర్యావరణ-అటవీ శాఖ మంత్రి పవన్ కళ్యాణ్ తక్షణం స్పందించారు. పరవాడ ఫార్మాసిటీ సమీపంలోని డ్రెయిన్లు, వర్షపు నీటి కాలువల్లో నల్లటి రంగుతో కూడిన రసాయన నీరు ప్రవహిస్తోందని, తీవ్ర దుర్వాసన వస్తోందని ABP దేశం ఈ క్షేత్రస్థాయి వినాశనాన్ని వెలుగులోకి తెచ్చింది. పెద్ద చెరువు, మొల్లెడిగడ్డ, సన్యాసి చెరువు ప్రాంతాల్లో రాంకీ యాజమాన్యం ఎటువంటి శుద్ధి చేయకుండానే ఫార్మా రసాయన వ్యర్థ జలాలను బహిరంగంగా విడుదల చేయడంపై స్థానిక గ్రామస్థులు, రైతులు, మత్స్యకారులు వ్యక్తం చేస్తున్న తీవ్ర ఆగ్రహాన్ని ఈ కథనం ప్రతిబింబించింది.

కదిలిన యంత్రాంగం: ఏపీ పీసీబీ కీలక చర్యలు
ఈ కథనాన్ని తీవ్రంగా పరిగణించిన ఉప ముఖ్యమంత్రి పవన్ కళ్యాణ్ , తక్షణమే ఆ ప్రాంతంలో పర్యటించి వాస్తవ పరిస్థితులపై సమగ్ర నివేదిక సమర్పించాలని ఆంధ్రప్రదేశ్ కాలుష్య నియంత్రణ మండలి (APPCB) అధికారులను ఆదేశించారు. మంత్రి ఆదేశాలతో రంగంలోకి దిగిన అధికారులు పీసీబీ తనిఖీలు చేపట్టి క్రింది కీలక నిర్ణయాలు తీసుకున్నారు:

* 95 పరిశ్రమలకు షోకాజ్ నోటీసులు: శుద్ధి చేయని వ్యర్థాలతో కూడిన నీటిని వర్షపు నీటి కాలువల్లోకి విడుదల చేసినట్లు నిర్ధారించి, ఫార్మాసిటీ పరిధిలోని అన్ని (మొత్తం 95) కంపెనీలకు ఏపీపీసీబీ వివరణ కోరుతూ షోకాజ్ నోటీసులు జారీ చేసింది. వీటికి సమాధానం ఇవ్వడానికి 7 రోజుల గడువు విధించారు.
* వ్యర్థాల నిర్వహణ డిజిటలీకరణ: పరిశ్రమల్లో వ్యర్థాల నిర్వహణను పూర్తిగా ఆన్‌లైన్ మానిటరింగ్ పరిధిలోకి తేవాలని ఆదేశించారు.
* సీసీటీవీ నిఘా: తేదీ, సమయం నమోదయ్యేలా సీసీటీవీ కెమెరాలను ఏర్పాటు చేసి, శుద్ధి చేసిన వ్యర్థాలకు సంబంధించిన ఫుటేజీని కనీసం 6 నెలల పాటు భద్రపరచాలని స్పష్టం చేశారు.
* కఠినమైన దిద్దుబాటు చర్యలు: వర్షపు నీటిని నిల్వ చేసే ప్రత్యేక ఏర్పాట్లు చేయాలని, ఎట్టి పరిస్థితుల్లోనూ కలుషిత నీరు పరిశ్రమల వెలుపలికి రాకూడదని నిర్దేశించారు. కన్‌సెంట్ టు ఆపరేట్ (CTO), హాజర్డస్ వేస్ట్ అనుమతుల నిబంధనలను కచ్చితంగా పాటించాలని ఆదేశించారు.

తీవ్ర ఆవేదనలో రైతాంగం.. ప్రభుత్వం హెచ్చరిక

ఈ రసాయన కాలుష్యం కారణంగా భూగర్భజలాలు కలుషితమై చర్మ వ్యాధులు, కిడ్నీ సమస్యలు, క్యాన్సర్ వంటి ప్రాణాంతక జబ్బుల బారిన పడుతున్నామని స్థానికులు ఆందోళన చెందుతున్నారు. గతంలో పెద్ద చెరువులో టన్నుల కొద్దీ చేపలు చనిపోయి మత్స్యకారుల ఉపాధి దెబ్బతింది. మరోవైపు, విషతుల్యమైన నీటి వల్ల పంట పొలాలు బీడువారడమే కాకుండా, కలుషిత గడ్డి మేసి, విషపు నీరు తాగి పశువులు మృత్యువాత పడుతుండటంతో పాడి రైతులు ఆర్థికంగా కుదేలవుతున్నారు.

ఈ నేపథ్యంలో అక్రమంగా మురుగునీరు లేదా ప్రమాదకర వ్యర్థాలను విడిచిపెడితే పర్యావరణ నిబంధనల ప్రకారం పరిశ్రమలపై అత్యంత కఠినమైన క్రిమినల్ చర్యలు తీసుకుంటామని ఏపీ పీసీబీ హెచ్చరించింది. ఈ మేరకు ఏపీ పీసీబీ అధికారులు తీసుకున్న చర్యల నివేదికను ఉప ముఖ్యమంత్రి కార్యాలయానికి సమర్పించారు. ABP దేశం అందించిన బాధ్యతాయుతమైన వార్తా కథనం వల్లే నేడు ప్రభుత్వం యుద్ధప్రాతిపదికన చర్యలు చేపట్టి, స్థానిక రైతాంగానికి, ప్రజలకు న్యాయం జరిగేలా అడుగులు వేసింది.

అరకు లోయలోని బలురోడ గ్రామంలో పొంగిపొర్లుతున్న జలపాతాలు

ABP Desam — Thu, 24 Sep 2026 16:17:12 +0530

అరకు లోయ అందాలు వర్షాకాలంలో మరింత రెట్టింపు అవుతాయి. తాజాగా అరకులోని బలురోడ గ్రామంలో కురుస్తున్న వర్షాలకు జలపాతాలు ఉప్పొంగి ప్రవహిస్తూ పర్యాటకులను కట్టిపడేస్తున్నాయి.

వైజాగ్ బీచ్ లో కమ్ముకున్న మేఘాలు భయపెడుతున్న రాకాసి అల్లలు

ABP Desam — Thu, 24 Sep 2026 13:05:22 +0530

టూరిస్టులని ఎంతగానో అలరించే వైజాగ్ బీచ్‌ ప్రస్తుతం భయానక వాతావరణాన్ని తలపిస్తోంది. ఆకాశం నల్లటి మేఘాలతో కమ్ముకుపోగా, సముద్రంలో ఎగసిపడుతున్న రాకాసి అలలు తీర ప్రాంత ప్రజలను, పర్యాటకులను హడలెత్తిస్తున్నాయి. అలల ఉద్ధృతి ఎక్కువగా ఉండటంతో అధికారులు బీచ్‌ల వైపు వెళ్లకుండా ప్రజలను అప్రమత్తం చేస్తున్నారు.

అగనంపూడిలో కూలిన భారీ చెట్టు రోడ్డుపై ట్రాఫిక్ జామ్.. రంగంలోకి పోలీసులు..!

ABP Desam — Thu, 24 Sep 2026 12:35:00 +0530

విశాఖపట్నం పరిధిలోని అగనంపూడి ప్రాంతంలో ఒక్కసారిగా భారీ చెట్టు రోడ్డుపై కూలడంతో తీవ్ర కలకలం రేగింది. ఈ ఘటన కారణంగా రాకపోకలు పూర్తిగా నిలిచిపోయి కిలోమీటర్ల మేర భారీగా ట్రాఫిక్ జామ్ అయింది. సమాచారం అందుకున్న వెంటనే ట్రాఫిక్ పోలీసులు అప్రమత్తమై రంగంలోకి దిగి, చెట్టును తొలగించే పనులను వేగవంతం చేశారు.

AP TG Heavy Rains: కళింగపట్నం వద్ద తీరందాటనున్న తీవ్రవాయుగుండం.. ఏపీలో ఫ్లాష్ ఫ్లడ్స్ హెచ్చరిక, తెలంగాణలో అతి భారీ వర్షాలు

Satyaprasad Bandaru — Wed, 23 Sep 2026 19:04:13 +0530

AP TG Heavy Rains: బంగాళాఖాతంలో తీవ్రవాయుగుండం ప్రభావంతో తెలుగు రాష్ట్రాల్లో భారీ వర్షాలు కురుస్తున్నాయి. పశ్చిమ మధ్య,వాయువ్య బంగాళాఖాతంలో తీవ్రవాయుగుండం గడిచిన 6 గంటల్లో గంటకు 5 కి.మీ వేగంతో కదులుతుందని ఏపీ విపత్తుల నిర్వహణ సంస్థ తెలిపింది. వాయుగుండం ప్రస్తుతానికి గోపాల్‌పూర్‌కు 150 కి.మీ, కళింగపట్నానికి 50 కి.మీ, ఒడిశాలోని పూరీకి 250 కి.మీ, విశాఖపట్నానికి 120 కి.మీ దూరంలో కేంద్రీకృతమై ఉంది. బుధవారం రాత్రికు తీవ్రవాయుగుండంగా విశాఖపట్నం- గోపాల్‌పూర్ మధ్య కళింగపట్నం సమీపంలో తీరం దాటే అవకాశం ఉందని పేర్కొంది. దీని ప్రభావంతో ఈరోజు రాత్రి, రేపు కోస్తాంధ్రలో విస్తారంగా వర్షాలు కురుస్తాయని వాతావరణ శాఖ తెలిపింది. ఉత్తరాంధ్ర తీరం వెంబడి 55-65 కి.మీ వేగంతో ఈదురుగాలులు వీస్తాయని తెలిపింది.

కళింగపట్నం వద్ద తీరం దాటనున్న వాయుగుండం

కళింగపట్నానికి సమీపంలో బుధవారం రాత్రి 8 - 12 గంటల మధ్య తీవ్ర వాయుగుండం తీరం దాటే అవకాశముందని విశాఖలోని తుపాను హెచ్చరికల కేంద్రం పేర్కొంది. తీరం దాటే సమయంలో 50-70 కి.మీ వేగంతో ఈదురుగాలులు వీస్తాయని, తీర ప్రాంతాల్లో ఫ్లాష్‌ ఫ్లడ్స్‌ వచ్చే అవకాశం ఉందని పేర్కొంది. లోతట్టు ప్రాంతాల ప్రజలు పూర్తి అప్రమత్తంగా ఉండాలని సూచించింది. కళింగపట్నం, విశాఖపట్నం, కాకినాడ, గంగవరం పోర్టుల్లో మూడో నెంబర్ ప్రమాద హెచ్చరిక జారీ అయింది.

ఈ జిల్లాలకు రెడ్ అలర్ట్

ఇవాళ శ్రీకాకుళం, విజయనగరం, పార్వతీపురం మన్యం, అల్లూరి జిల్లాలకు రెడ్ అలర్ట్ చేసింది వాతావరణ శాఖ. విశాఖ, అనకాపల్లి, కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు జిల్లాలకు ఆరెంజ్ అలర్ట్‌ జారీ చేసింది. ఎన్టీఆర్‌, కృష్ణా, గుంటూరు, నంద్యాల, కర్నూలు, అనంతపురం జిల్లాకు ఎల్లో అలర్ట్ జారీచేసింది. గురువారం అల్లూరి, ఏలూరు జిల్లాలకు రెడ్ అలెర్ట్, శ్రీకాకుళం, విజయనగరం, విశాఖ, పార్వతీపురం మన్యం, విశాఖ, అనకాపల్లి జిల్లాలకు ఆరెంజ్ అలర్ట్ జారీ చేసింది. తూర్పుగోదావరి, పశ్చిమగోదావరి, కాకినాడ, ఎన్టీఆర్‌, కృష్ణా, పల్నాడు, గుంటూరు జిల్లాలకు ఎల్లో అలర్ట్‌ జారీ చేసింది. ఈ నెల 25న అల్లూరి, ఏలూరు, ఎన్టీఆర్‌ జిల్లాలకు ఎల్లో అలర్ట్ జారీ చేసింది.

రాష్ట్రాలకు బీజేపీ కొత్త ఇన్‌ఛార్జ్‌లు.. ఏపీకి అరవింద్, టీజీకి సునీల్ భన్సల్.. తెలుగు వారికి ఎక్కడంటే!

తెలంగాణలో వాతావరణం

తీవ్ర వాయుగుండం ప్రభావం తెలంగాణపై కూడా కనిపిస్తుంది. బుధవారం అతి భారీ వర్షాలు, గురు, శుక్రవారాల్లో అతి నుంచి అత్యంత భారీ వర్షాలు కురుస్తాయని వాతావరణ శాఖ తెలిపింది. ఇవాళ వరంగల్, ఖమ్మం జిల్లాలతో పాటు పెద్దపల్లి, సూర్యాపేట జిల్లాలకు ఆరెంజ్ అలర్ట్ జారీ చేసింది. ఉమ్మడి ఆదిలాబాద్, కరీంనగర్, మహబూబ్‌నగర్‌తో పాటు నిజామాబాద్, నల్గొండ జిల్లాలకు ఎల్లో హెచ్చరికలు జారీ చేసింది.

Also Read: ఏపీలో అతి భారీ వర్షాలు.. ప్రభావిత జిల్లాల కంట్రోల్ రూము నెంబర్లు ఇవే!

AP Control Room Numbers: ఏపీలో అతి భారీ వర్షాలు.. ప్రభావిత జిల్లాల కంట్రోల్ రూము నెంబర్లు ఇవే!

Satyaprasad Bandaru — Wed, 23 Sep 2026 15:34:14 +0530

AP Control Room Numbers: బంగాళాఖాతంలో వాయుగుండం ప్రభావంతో కృష్ణా జిల్లాతో సహా కోస్తాంధ్ర జిల్లాల్లో భారీ వర్షాలు కురిసే అవకాశం ఉంది. ఈ నేపథ్యంలో కృష్ణా జిల్లా అధికారులు అప్రమత్తమయ్యారు. ప్రజలకు తక్షణ సహాయం, సమాచారం అందించేందుకు మచిలీపట్నంలోని జిల్లా కలెక్టరేట్‌లో 24 గంటలూ పనిచేసే జిల్లా స్థాయి కంట్రోల్ రూమ్‌ను ఏర్పాటు చేసినట్లు జిల్లా కలెక్టర్ డి.కె. బాలాజీ తెలిపారు. రాష్ట్ర వ్యాప్తంగా వర్ష ప్రభావిత జిల్లాల్లో కంట్రోల్ రూము నెంబర్లు ఏర్పాటు చేశారు. ఏపీ ప్రభుత్వం కంట్రోల్ రూము నెంబర్లను ప్రకటించింది.

కంట్రోల్ రూము నెంబర్లు

విశాఖ జోన్-1- 9490610019
విశాఖ జోన్-2 - 9849628880
విశాఖ జోన్-3 - 9491030722
అనకాపల్లి - 9490610023
కశింకోట - 8333810597
నర్సీపట్నం - 9491030723
పాడేరు - 9490610027
కాకినాడ - 9490610856
పెద్దాపురం - 9493178728
జగ్గంపేట - 9490610097
రాజమహేంద్రవరం టౌన్ - 9490610855
రాజమహేంద్రవరం రూరల్ - 9490610859
నిడదవోలు - 9493177540
అమలాపురం - 9490610101
కొత్తపేట - 9493178821
రంపచోడవరం - 8309771508
ఏలూరు - 9440904037
జంగారెడ్డిగూడెం - 9491030712
భీమవరం - 9490610143
తాడేపల్లిగూడెం - 9493177806
నరసాపురం - 7382050943
శ్రీకాకుళం- 9701400865
టెక్కలి - 9490610050.
పలాస - 08945241084
పాలకొండ - 8332843546
పార్వతీపురం - 9398594750
విజయనగరం టౌన్ & రూరల్ - 9490610102
బొబ్బిలి - 9490610121
టోల్ ఫ్రీ నెంబర్- 1912
కార్పొరేట్ ఆఫీస్- 8331018762

రేపు తెల్లవారుజామున తీరం దాటే అవకాశం

పశ్చిమ మధ్య, దానికి ఆనుకుని ఉన్న వాయువ్య బంగాళాఖాతంలో ఏర్పడిన అల్పపీడనం గత ఆరు గంటల్లో గంటకు 17 కిలోమీటర్ల వేగంతో పశ్చిమ వాయువ్య దిశగా కదులుతూ బలపడుతుంది. ఈ డిప్రెషన్ తదుపరి 12 గంటల్లో డీప్ డిప్రెషన్‌గా బలపడే అవకాశం ఉందని, అనంతరం పశ్చిమ-వాయువ్య దిశగా కదులుతూ విశాఖపట్నం–గోపాలపురం మధ్య ఉత్తరాంధ్ర-దక్షిణ ఒడిశా తీర ప్రాంతాన్ని 23వ తేదీ రాత్రి నుంచి 24వ తేదీ తెల్లవారుజాము మధ్య డీప్ డిప్రెషన్‌గా తీరం దాటే అవకాశం ఉందని వాతావరణ శాఖ అంచనా వేసింది. దీంతో ఈ నెల 25వ తేదీ వరకు కోస్తాంధ్ర జిల్లాల్లో అక్కడక్కడా అత్యంత భారీ వర్షాలు కురిసే అవకాశం ఉన్నందున కృష్ణా జిల్లా యంత్రాంగం ముందస్తు చర్యలు చేపట్టింది.

Also Read: ఏపీలో అతి భారీ వర్షాలు.. ప్రభావిత జిల్లాల కంట్రోల్ రూము నెంబర్లు ఇవే!

కృష్ణా జిల్లా కంట్రోల్ రూమ్ ఏర్పాటు

భారీ వర్షాలకు సంబంధించి ప్రజల నుంచి వచ్చే ఫిర్యాదులు, సమాచారం అధికారులకు తెలియజేసేందుకు కలెక్టరేట్‌లో ఏర్పాటు చేసిన కంట్రోల్ రూమ్ 24 గంటలూ పనిచేయనుంది. ప్రజలు భారీ వర్షాలు, నీటి నిల్వలు, వరద పరిస్థితులను 08672-252399 నెంబర్‌కు తెలియజేయవచ్చని జిల్లా కలెక్టర్ తెలిపారు. కంట్రోల్ రూమ్ నిరంతరాయంగా పనిచేసేలా సిబ్బందిని షిఫ్ట్‌ల వారీగా నియమించారు.

కంట్రోల్ రూమ్‌కు వచ్చే ఫోన్ కాల్స్‌లో ప్రజలు తెలియజేసే భారీ వర్షాల పరిస్థితి, సమస్యలు, ఫిర్యాదులను సిబ్బంది నమోదు చేసి, కంట్రోల్ రూమ్ ఇన్ కార్యాలయ సూపరింటెండెంట్, కోఆర్డినేషన్ విభాగానికి తెలియజేసి చర్యలు చేపట్టేలా ఆదేశాలు జారీ చేస్తారు. భారీ వర్షాల నేపథ్యంలో ప్రజలు అప్రమత్తంగా ఉండాలని, అధికార యంత్రాంగం నుంచి వచ్చే సూచనలను పాటించాలని కృష్ణా జిల్లా కలెక్టర్ డి.కె. బాలాజీ సూచించారు.

Also Read: ఆకతాయి పనికి మునిగిన గ్రామం, ప్రాణభయంతో కొండమీదకు ప్రజలు పరుగులు.. నంద్యాల జిల్లాలో ఘటన