Metro Rail In Vijayawada and Visakhapatnam: విజ‌య‌వాడ‌, విశాఖ మెట్రో రైల్ ప్రాజెక్టు టెండ‌ర్ల‌కు ఆహ్వానం, జాయింట్ వెంచ‌ర్స్ కు అవ‌కాశం

Visakhapatnam Metro Rail Project: విజయవాడ, విశాఖపట్నంలలో మెట్రో రైలు ప్రాజెక్టులకు ఏపీ ప్రభుత్వం టెండర్లు ఆహ్వానించింది. మెట్రో రైల్ టెండ‌ర్ల‌లో పాల్గొనేందుకు జాయింట్ వెంచ‌ర్స్ కు అవ‌కాశం కల్పించారు.

విజ‌య‌వాడ‌, విశాఖ మెట్రో రైల్ ప్రాజెక్టుకు టెండ‌ర్లు

Source : Indian Tech & Infra/ X

Vijayawada Metro Rail Project: అమరావతి: ఆంధ్రప్రదేశ్ రాష్ట్రంలో మెట్రో రైల్ ప్రాజెక్టులను వేగంగా పూర్తి చేయడానికి కొన్ని కీలక నిర్ణయాలు తీసుకున్నారు. విజయవాడ, విశాఖపట్నం మెట్రో రైల్ టెండర్లలో భాగస్వామ్యం కోసం జాయింట్ వెంచర్స్ (JV) కు అవకాశం ఇవ్వాలని అధికారులు నిర్ణయించారు. ప్రీ బిడ్డింగ్ మీటింగ్ కు హాజరైన కాంట్రాక్ట్ సంస్థ‌ల నుంచి వ‌చ్చిన విన‌తితో ఈ నిర్ణ‌యం తీసుకున్నారు. వీటిలో గరిష్టంగా 3 కంపెనీలు కలసి టెండర్‌ను వేయడానికి అనుమతించనున్నారు.  ఏపీ మెట్రో రైల్ కార్పొరేషన్ ఎండీ ఎన్పీ రామకృష్ణా రెడ్డి ఆధ్వర్యంలో తీసుకున్న ఈ నిర్ణయాలు, ప్రాజెక్టు పనులు వేగవంతం చేస్తాయి. విశాఖ మెట్రో టెండ‌ర్ల‌కు అక్టోబ‌ర్ 10, విజ‌య‌వాడ మెట్రో టెండ‌ర్ల‌కు అక్టోబ‌ర్ 14 వ తేదీ తుది గ‌డువు విధించారు.

పనుల విభజన, తగ్గనున్న వ్యయం
ఇటీవల జరిగిన అధ్యయనాల ప్రకారం చిన్న చిన్న ప్యాకేజీలుగా విశాఖ, విజయవాడ మెట్రో రైలు పనులను విభజించడం వల్ల ప్రాజెక్ట్ నిర్మాణంలో ఆలస్యం జరుగుతుందని అధికారులు భావిస్తున్నారు. దీనివల్ల నిర్మాణ వ్యయం కూడా భారీగా పెరుగుతుంది. అందువల్ల, జాయింట్ వెంచర్స్ విధానానికి అవకాశం ఇచ్చారు. ఈ మెట్రో ప్రాజెక్టులను రికార్డు టైమ్‌లో పూర్తి చేయాలని లక్ష్యంగా, పనులను పెద్ద ప్యాకేజీలుగా నిర్వహించాలని నిర్ణయం తీసుకున్నారు.

విశాఖ, విజయవాడ మెట్రో టెండర్ల వివరాలు
మెట్రో ఫేజ్-1లో విశాఖపట్నంలో 46.23 కిలోమీటర్లు, విజయవాడలో 38 కిలోమీటర్లు మెట్రో సివిల్ పనులకు అంతర్జాతీయ స్థాయిలో టెండర్లు ఆహ్వానించారు. విశాఖపట్నం మెట్రో టెండర్ల దాఖలుకు అక్టోబర్ 10వ తేదీ, విజయవాడ టెండర్లకు అక్టోబర్ 14వ తేదీని తుది గడువుగా నిర్ణయించారు. జాయింట్ వెంచర్ నిర్ణయాలతో ప్రాజెక్టు పనులు వేగంగా పూర్తవుతాయని అధికారులు భావిస్తున్నారు.

కేంద్ర, రాష్ట్ర ప్రభుత్వాలు కలిసి చేపడుతున్న ప్రాజెక్టులు

విజయవాడ, విశాఖల్లో మెట్రోలకు ఏపీ ప్రభుత్వం టెండర్లు ఆహ్వానించింది. కేంద్ర, రాష్ట్ర ప్రభుత్వాలు 50:50 భాగస్వామ్యంతో ఈ ప్రాజెక్టులను చేపట్టనున్నాయి. మొత్తం రూ.21,616 కోట్లతో విశాఖ, విజయవాడ మెట్రో రైలు ప్రాజెక్టులకు టెండర్లకు ఇటీవల అనుమతి ఇచ్చింది. ఇందులో భాగంగా రూ.10,118 కోట్లతో విజయవాడ మెట్రో రైలు ప్రాజెక్టు, రూ.11,498 కోట్లతో విశాఖ మెట్రో రైలుకు టెండర్లు ఆహ్వానించింది. ఈ రెండు మెట్రో రైలు ప్రాజెక్టులను జాయింట్ వెంచర్స్ కు అవకాశం కల్పించింది. విశాఖ మెట్రోకు ఏపీ ప్రభుత్వ వాటాగా రూ.4,101 కోట్లు, సీఆర్డీఏ నుంచి విజయవాడ మెట్రోకు రూ. 3,497 కోట్లు ఇస్తారు. విశాఖ మెట్రోకు వీఎంఆర్డీఏ నుంచి నిధులు కేటాయిస్తారు.   

విజయవాడ మెట్రో రైలు పొడవు  మొత్తం 66.15 కి.మీ, ఇందులో ఫేజ్-1  ప్రాజెక్టు 38.40 కిలోమీటర్లు, రెండు కారిడార్లుగా నిర్మించనున్నారు. గన్నవరం నుంచి పండిత్ నెహ్రూ బస్ స్టేషన్ వరకు 25.95 కి.మీ ఒక కారిడార్, నెహ్రూ బస్ స్టేషన్ నుంచి పెనమలూరు వరకు 12.45 కి.మీ రెండో కారిడార్ గా నిర్మించనున్నారు. ఫేజ్-1లో మొత్తం 34 స్టేషన్లు, అన్నీ ఎలివేటెడ్‌గా ఉండనున్నాయి. విజయవాడలో 66 కిలోమీటర్ల మేర డబుల్ డెక్కర్ మెట్రో రైలు ప్రాజెక్టు చేపడుతున్నారు.    

విశాఖపట్నం మెట్రో రైలు పొడవు 76.90 కిలోమీటర్లు.  ఫేజ్-1 ప్రాజెక్టు 46.23 కిలోమీటర్లు. మొత్తం 3 కారిడార్లు ఉంటుంది.  స్టీల్ ప్లాంట్ జంక్షన్ నుంచి కొమ్మాది జంక్షన్ వరకు 29 స్టేషన్లు, 34.40 కి.మీ మొదటి కారిడార్,  గురుద్వారా నుంచి ఓల్డ్ పోస్ట్ ఆఫీస్ వరకు 6 స్టేషన్లు 08 కి.మీ. రెండో కారిడార్. తాటిచెట్లపాలెం నుంచి చిన్న వాల్తేర్ వరకు 7 స్టేషన్లు 6.75 కి.మీ, మూడో కారిడార్ గా చేపడతారు. మొత్తం 99.75 ఎకరాల భూమి కావాలి. దీని ఖర్చు రూ.882 కోట్లుగా అంచనా. విశాఖలో 76.90 కిలోమీటర్ల మేర డబుల్ డెక్కర్ మెట్రో రైలు నిర్మించనున్నారు.

మరిన్ని చదవండి

విజయవాడలో 10 రోజులపాటు ట్రాఫిక్‌ మళ్లింపులు, రూట్ మ్యాప్ చూసుకుని వెళ్లండి

బోండా ఉమపై జనసైనికులు అతిగా స్పందిస్తున్నారా? వివాదం మధ్యలో దూరిన అంబటి రాంబాబు