vijayawada

Govt Doctors Dismissed: ఏపీ ప్రభుత్వం కన్నెర్ర.. 70 మంది డాక్టర్లపై వేటు వేసిన మంత్రి సత్యకుమార్ !

Shankar Dukanam — Fri, 2 Oct 2026 16:08:47 +0530

AP Govt Doctors Dismissed | అమరావతి: రాష్ట్రంలో సుదీర్ఘకాలంగా అనధికారికంగా విధులకు దూరంగా ఉంటున్న డాక్టర్లపై ఆంధ్రప్రదేశ్ వైద్య ఆరోగ్య శాఖ కఠిన చర్యలు చేపట్టింది. ఈ క్రమంలోనే డైరెక్టర్ ఆఫ్ సెకండరీ హెల్త్ (డీఎస్‌హెచ్) పరిధిలో ఏడాదికిపైగా విధులకు గైర్హాజరవుతున్న 70 మంది సివిల్ అసిస్టెంట్ సర్జన్లను విధుల నుంచి శాశ్వతంగా తొలగించింది. ఏపీసీఎస్ (సీసీఏ) రూల్స్-1991లోని రూల్ నెంబర్ 20 ప్రకారం సంజాయిషీ నోటీసులు జారీ చేసిన తరువాత, ఈ నిర్ణయం తీసుకున్నట్లు డీఎస్‌హెచ్ చక్రధర్ బాబు వెల్లడించారు. తొలగించిన వారిలో గైనిక్, ఈఎన్‌టీ, జనరల్ మెడిసిన్ తదితర స్పెషాల్టీలకు చెందిన డాక్టర్లు ఉన్నారు. ఈ మేరకు డీఎస్‌హెచ్, డీఎంఈ అధికారులు రాష్ట్ర వైద్య ఆరోగ్య శాఖ మంత్రి సత్యకుమార్ యాదవ్‌కు పూర్తి వివరాలతో నివేదికను అందజేశారు.

మరొకవైపు డీఎస్‌హెచ్ పరిధిలోనే ఉన్న మరో 154 మంది గైర్హాజరీ డాక్టర్లపై కూడా నిబంధనల ప్రకారం చర్యలు వేర్వేరు దశల్లో సాగుతున్నాయి. గతంలో నోటీసుల అనంతరం విధుల్లో చేరేందుకు ముందుకొచ్చిన 78 మంది డాక్టర్లకు ఇంక్రిమెంట్ల కోత వంటి క్రమశిక్షణా చర్యలతో కూటమి ప్రభుత్వం తిరిగి అవకాశం కల్పించింది. ఇక డైరెక్టర్ ఆఫ్ మెడికల్ ఎడ్యుకేషన్ (DME) పరిధిలో ఎలాంటి అనుమతులు లేకుండా విధులకు దూరంగా ఉన్న 39 మంది డాక్టర్లకు ఏపీ ప్రభుత్వం చివరి అవకాశం ఇచ్చింది. ఇందులో ఐదుగురు ప్రొఫెసర్లు, నలుగురు అసోసియేట్ ప్రొఫెసర్లు, 30 మంది అసిస్టెంట్ ప్రొఫెసర్లు ఉన్నారు. గత మే నెలలోనే డీఎంఈ పరిధిలో 51 మంది వైద్యులను సర్వీసు నుంచి తొలగించగా, ప్రస్తుతం తుది నోటీసులకు స్పందించకపోతే ఈ 39 మందిపై కూడా వేటు వేయనున్నట్లు డీఎంఈ డాక్టర్ విష్ణువర్ధన్ తెలిపారు.

హెచ్‌ఓడీల వ్యాప్తంగా 493 మంది గైర్హాజరు – భర్తీకి జీరో వేకెన్సీ పాలసీ

డాక్టర్లు ప్రభుత్వ విధుల్లో చేరిన తర్వాత ప్రైవేట్ ప్రాక్టీస్ చేసుకోవడం, కేటాయించిన పోస్టింగ్‌లు నచ్చకపోవడం లేదా వ్యక్తిగత, కుటుంబ కారణాల వల్ల విధులకు దూరంగా ఉంటున్నట్లు అధికారులు గుర్తించారు. మొత్తం వైద్య ఆరోగ్య శాఖలోని అన్ని HOD (డీఎస్‌హెచ్, డీఎంఈ, ఎన్‌హెచ్‌ఎం, ఆయుష్, హెల్త్ యూనివర్సిటీ మొదలైనవి) పరిధిలో కలిపి మొత్తం 493 మంది డాక్టర్లు, సిబ్బంది అనధికారికంగా గైర్హాజరీలో ఉన్నట్లు లెక్క తేల్చారు.

ప్రజారోగ్యం దృష్ట్యా డాక్టర్లు, వైద్య సిబ్బంది గైర్హాజరీల విషయంలో ఎలాంటి ఉపేక్ష వహించవద్దని మంత్రి సత్యకుమార్ యాదవ్ అధికారులను ఆదేశించారు. నిబంధనల ప్రకారం తొలగింపు ప్రక్రియను గరిష్టంగా 3 నెలల వ్యవధిలో పూర్తి చేయాలన్నారు. డాక్టర్లు లేక ప్రజలకు వైద్య సేవలు దూరం కాకుండా ఉండేందుకు, ఖాళీ అయ్యే పోస్టులను జీరో వేకెన్సీ పాలసీ కింద వెంటనే కొత్త నియామకాలతో భర్తీ చేయాలని మంత్రి శాఖాపరమైన దిశా నిర్దేశం చేశారు.

Rayalaseema Fruit Bowl: ఫ్రూట్ బౌల్‌గా రాయలసీమ, నీళ్లుంటే రైతులు బంగారం పండిస్తారు: ఏపీ సీఎం చంద్రబాబు

Shankar Dukanam — Fri, 2 Oct 2026 15:13:51 +0530

మదనపల్లె: కరవు ప్రాంతం రాయలసీమ దశ-దిశను సమూలంగా మార్చేందుకు గ్లోబల్ హార్టికల్చర్ హబ్ ఏర్పాటు చేస్తున్నామని ఆంధ్రప్రదేశ్ ముఖ్యమంత్రి చంద్రబాబు స్పష్టం చేశారు. రాయలసీమను ఫ్రూట్ బౌల్ గా తీర్చిదిద్దుతామని పేర్కొన్నారు. అన్నమయ్య జిల్లా మదనపల్లెలో శుక్రవారం నాడు కేంద్ర ఆర్థిక మంత్రి నిర్మలా సీతారామన్‌తో కలిసి రాయలసీమ హార్టికల్చర్ హబ్, ఇండియన్ స్కూల్ ఆఫ్ అగ్రికల్చర్ (ISA)లకు ఆయన శంకుస్థాపన చేశారు. ఈ కార్యక్రమంలో డిప్యూటీ సీఎం పవన్ కల్యాణ్, మంత్రి నారా లోకేష్, రిలయన్స్ ఇండస్ట్రీస్ ఎగ్జిక్యూటివ్ డైరెక్టర్ అనంత్ అంబానీ సహా పలువురు ప్రముఖులు పాల్గొన్నారు.

ఈ సందర్భంగా సీఎం చంద్రబాబు మాట్లాడుతూ.. ప్రాథమిక రంగం వృద్ధిలో హార్టికల్చర్‌ది కీలక పాత్ర అని, రాబోయే రోజుల్లో మరో 6 లక్షల హెక్టార్లలో ఉద్యాన పంటలను విస్తరించి రాయలసీమ ప్రాంతాన్ని ఫ్రూట్ బౌల్ గా తీర్చిదిద్దుతామని ధీమా వ్యక్తం చేశారు. రాయలసీమ రైతుల శ్రమను కొనియాడిన సీఎం చంద్రబాబు సరిపడా సాగునీరు అందిస్తే ఈ నేలలో బంగారం పండించే సత్తా ఇక్కడి రైతులకు ఉందన్నారు. 20 రకాల పంటల్లో ఏ పంటనైనా పండించగల ప్రతిభ ఈ ప్రాంత రైతుల సొంతమని, ఉత్పత్తులకు సరైన మార్కెటింగ్ సౌకర్యం కల్పిస్తే సంపద సృష్టిస్తారని కితాబిచ్చారు.

ఈ గ్లోబల్ హార్టికల్చర్ హబ్ ద్వారా పంటల సాగుతో పాటు ధరల స్థిరీకరణ సాధ్యమని చంద్రబాబు అభిప్రాయపడ్డారు. ఎన్టీఆర్ హయాంలో ప్రారంభమైన సాగునీటి ప్రాజెక్టులను ముందుకు తీసుకెళ్తున్నామని.. హంద్రీనీవా ప్రాజెక్ట్ నీళ్లు రాకపోతే మదనపల్లె నుంచి పెద్ద ఎత్తున వలసలు ఉండేవన్నారు. రాయలసీమను కరవు నుంచి కాపాడేందుకు డ్రిప్ ఇరిగేషన్, వాటర్ షెడ్ పథకాలు, పంటకుంటల ద్వారా జలసంరక్షణకు ప్రాధాన్యత ఇస్తున్నామని తెలిపారు. రూ.35 వేల కోట్లతో 36 ప్రాజెక్టులను వచ్చే మూడేళ్లలో పూర్తి చేసి జాతికి అంకితం చేస్తామని హామీ ఇచ్చారు. అలాగే హంద్రీనీవా ఫేజ్-2, వెలిగొండ ఫేజ్-2, మడకశిర బ్రాంచ్ కెనాల్ విస్తరణ ప్రాజెక్టు పనులను వేగవంతం చేస్తున్నామని తెలిపారు.

పర్యావరణ పరిరక్షకుడు అనంత్ అంబానీ: సీఎం చంద్రబాబు ప్రశంసలు

ఈ కార్యక్రమంలో అథితిగా పాల్గొన్న రిలయన్స్ ఇండస్ట్రీస్ ఎగ్జిక్యూటివ్ డైరెక్టర్ అనంత్ అంబానీపై ఏపీ సీఎం చంద్రబాబు ప్రశంసల వర్షం కురిపించారు. అనంత్ అంబానీ కేవలం ఒక విజన్ ఉన్న యువ పారిశ్రామికవేత్త మాత్రమే కాదని, గొప్ప పర్యావరణ పరిరక్షకుడని కొనియాడారు. గుజరాత్‌లోని జామ్‌నగర్‌లో ఏకంగా 3,500 ఎకరాలలో వంతార పేరుతో జంతువుల పునరావాస కేంద్రాన్ని ఏర్పాటు చేసి మూగజీవులను సంరక్షిస్తున్నారని పేర్కొన్నారు. తిరుమల శ్రీ వేంకటేశ్వర స్వామివారిపై ఉన్న అపారమైన భక్తిశ్రద్ధలతో పర్యావరణహితం కోసం ఇటీవల తిరుమలకు ఉచితంగా ఎలక్ట్రిక్ బస్సులను అందజేశారని సీఎం చంద్రబాబు గుర్తుచేసుకున్నారు.

Also Read: Anant Ambani: నన్ను ఆంధ్రా బిడ్డగా భావించండి... ఏపీకి ఏం చేయగలనో గైడ్ చేయండి: సీఎం చంద్రబాబును కోరిన అనంత్ అంబానీ

CM Chandrababu: వచ్చే మూడేళ్లలో 35 వేల కోట్లతో మరో 36 ప్రాజెక్టులు.. పేదలకు ఇళ్ల పట్టాలు పంపిణీలో సీఎం చంద్రబాబు

Shankar Dukanam — Wed, 30 Sep 2026 17:29:58 +0530

విజయవాడ: పోలవరం ప్రాజెక్టును వచ్చే ఏడాదికి పూర్తి చేసి గ్రావిటీ ద్వారా నీటిని అందిస్తామని ఆంధ్రప్రదేశ్ ముఖ్యమంత్రి స్పష్టం చేశారు. వైసీపీ అడ్డంకులు సృష్టించినా పట్టుదలతో పట్టిసీమ పూర్తి చేసి ఇప్పటివరకు 490 టీఎంసీల నీటిని తెచ్చామని, ఎల్ నినో (EL Nino) సమయంలో డెల్టా, విజయవాడను దాహార్తి లేకుండా కాపాడామన్నారు. ప్రతిరోజూ సముద్రంలోకి వృథాగా పోతున్న నీటిలో 100 టీఎంసీలు వాడుకోగలిగితే ప్రాంతమంతా సస్యశ్యామలం అవుతుందని పేర్కొన్నారు. వచ్చే మూడేళ్లలో రూ.35,000 కోట్లతో 36 ప్రాజెక్టులు పూర్తి చేస్తామని, 2028 కృష్ణా పుష్కరాల నాటికి సమృద్ధిగా నీళ్లు అందిస్తామన్నారు. గోదావరి- కావేరి నదుల అనుసంధానంతో దక్షిణాది రాష్ట్రాలకు నీటి కొరత తీరుతుందని, డెల్టాలో పొదుపు చేసిన నీటిని రాయలసీమకు తరలిస్తామని చెప్పుకొచ్చారు.

అభివృద్ధి, సంక్షేమం.. పీ4 రూపంలో సంపద సృష్టి

అభివృద్ధి, సంక్షేమమే కూటమి ప్రభుత్వానికి రెండు కళ్లు అని, భవిష్యత్తులో సంపద సృష్టికే అభివృద్ధి పథంలో ముందుకు సాగుతున్నామని సీఎం చంద్రబాబు పేర్కొన్నారు. ఇప్పటికే 1.50 లక్షల కోట్లు అభివృద్ధి పనులపై ఖర్చు చేశామన్నారు. ప్రతి నెల 1వ తేదీనే పెన్షన్లు ఇస్తున్నామని, గత ప్రభుత్వ 32,000 కోట్ల రూపాయల విద్యుత్ ఛార్జీల భారాన్ని మించి ఛార్జీలు పెంచబోమని హామీ నిలబెట్టుకున్నామని తెలిపారు. అన్నా క్యాంటీన్లు, మత్స్యకారులు, నేతన్నలు, ఆటోడ్రైవర్లు, వడ్డెర్లు, గీత కార్మికులకు వివిధ పథకాల ద్వారా చేయూత ఇస్తున్నామని తెలిపారు. పేదల జీవితాల్లో వెలుగులు నింపేందుకు P4 కార్యక్రమాన్ని తెచ్చామని, కుప్పంలో ఒక కూలీ మహిళ టీవీఎస్ దత్తతతో పారిశ్రామికవేత్తగా మారి 20 మందికి ఉపాధి ఇచ్చే స్థాయికి ఎదిగిందని పేర్కొన్నారు.

మహిళా సాధికారత.. ఉచిత ప్రయాణం

స్త్రీ శక్తి పథకం ద్వారా కూటమి ప్రభుత్వం మహిళలకు ఉచిత బస్సు ప్రయాణంతో డబ్బులు ఆదా అవుతున్నాయని సీఎం చంద్రబాబు తెలిపారు. డ్వాక్రా మహిళల ఉత్పత్తులకు స్వయం బ్రాండ్ కింద మార్కెటింగ్ సదుపాయం కల్పిస్తున్నాం. కేంద్ర గణాంక శాఖ నివేదిక ప్రకారం విమెన్ వర్క్ ఫోర్సులో విశాఖపట్నం (42 శాతం), విజయవాడ (37 శాతం) ముందంజలో ఉన్నాయని, పారిశ్రామికవేత్తల్లో 30 శాతం మంది మహిళలే ఉండటం గర్వకారణమని చెప్పారు.

రాక్షసులు యజ్ఞాలను అడ్డుకున్నట్లుగా గొడ్డలి పార్టీ

రాష్ట్రంలో ఇప్పటికే 5.5 లక్షల ఇళ్లు పూర్తి చేసి కూటమి ప్రభుత్వం అందించిందని, వచ్చే ఏడాదిలోగా మరో 5.5 లక్షల ఇళ్లు నిర్మిస్తామని సీఎం చంద్రబాబు ప్రకటించారు. ప్రతి పేదవానికి ఇంటి స్థలం, ఇల్లు, మంచి నీటి కుళాయి అందించడమే లక్ష్యమని పేర్కొన్నారు. అయితే పూర్వకాలంలో రాక్షసులు యజ్ఞాలను అడ్డుకున్నట్లే, ఇప్పుడు గొడ్డలి పార్టీ పేదలకు పట్టాలు ఇస్తుంటే కోర్టులు, లేఖల ద్వారా అడ్డుపడుతోందని మండిపడ్డారు. అమరావతి నిర్మాణాలను అడ్డుకోవడానికి ప్రపంచ బ్యాంకుకు లేఖలు రాయడం, చెరకు తోటలు తగులబెట్టడం వంటి పిచ్చి పనులు చేశారని విమర్శించారు.

Vijayasai Reddy About YSRCP: ఇండీ కూటమిలో వైసీపీ విలీనంపై మాజీ ఎంపీ విజయసాయిరెడ్డి సంచలన వ్యాఖ్యలు

Shankar Dukanam — Wed, 30 Sep 2026 15:22:36 +0530

ఆంధ్రప్రదేశ్‌లో తన పార్టీ భవిష్యత్ రాజకీయ పరిణామాలతో పాటు గంజాయి సాగుపై మాజీ ఎంపీ విజయసాయిరెడ్డి కీలక వ్యాఖ్యలు చేశారు. రాష్ట్రంలో గంజాయి సాగు, వినియోగం లేదని చెప్పడం సరికాదని, ఏదైనా ఒక రెఫరెన్స్‌తో వెళ్తే ఏ బడ్డీ కొట్టుకైనా వెళ్లినా గంజాయి దొరుకుతుందని, అంత విచ్చలవిడిగా లభిస్తోందని సంచలన వ్యాఖ్యలు చేశారు. గత 12 ఏళ్లలో వైఎస్ఆర్సీపీ, NDA కూటమి పాలనలో ఒక్క గ్రీన్ ఫీల్డ్ ఇరిగేషన్ ప్రాజెక్టు కూడా తీసుకురాలేకపోయారని విమర్శించారు. జగన్ ను జైల్లో పెట్టిన కాంగ్రెస్ పార్టీతో పొత్తు పెట్టుకునేందుకు వైసీపీ ఈరోజు ప్రయత్నిస్తుందంటే.. ఎంత సిగ్గులేని పార్టీనో అర్థం చేసుకోవాలంటూ ఘాటు వ్యాఖ్యలు చేశారు. విశాఖకు వచ్చిన ఆయన ఏబీపీ దేశంతో మాట్లాడుతూ పలు విషయాలు షేర్ చేసుకున్నారు. తాను స్థాపించనున్న కొత్త పార్టీలో యువత, జెన్-జీ (Gen-Z) కీలకం అవుతారని, యువతకు సగం సీట్లు ఇచ్చి ఎన్నికల బరిలో నిలుపుతామన్నారు

ప్రశ్న 1: ఏపీలో గంజాయి సాగు, వినియోగంపై విజయసాయిరెడ్డి స్పందన ఏమిటి?

జవాబు: రాష్ట్రంలో గంజాయి సాగు, వినియోగం లేదనడం మనస్సాక్షిని చంపుకోవడమేనని విజయసాయిరెడ్డి స్పష్టం చేశారు. ఏదైనా రెఫరెన్స్‌తో ఏ బడ్డీ కొట్టుకు వెళ్లినా గంజాయి దొరుకుతుందని, అంత విచ్చలవిడిగా లభిస్తోందని తెలిపారు.

ప్రశ్న 2: వైసీపీ ఓట్లు చీల్చడానికి పార్టీ పెట్టారని వినిపిస్తోంది. ఆ కామెంట్లపై ఏమంటారు ?

జవాబు: మా పార్టీకి ఓట్లు వస్తుంటాయంటే.. ప్రతి ఒక్కరూ గతంలో ఏదో ఒక పార్టీకి ఓటు వేసి ఉంటారు. పార్టీ సిద్ధాంతాలు, భావజాలాన్ని నమ్మినవారు ఓట్లు వేస్తారని నమ్ముతున్నాను. ఇప్పుడే పుట్టిన వారికి అయితే ఓటు హక్కు అయితే రాదు కదా. కొందరికి తొలిసారి ఓటు హక్కు వస్తుంది. కొత్త వారితో పాటు గతంలో వేరే పార్టీకి ఓటేసిన వారు సైతం మన సిద్ధాంతాలు నచ్చి మా వైపు రావొచ్చు.

ప్రశ్న 3: నూతన పార్టీలో యువత (జెన్-జీ), సీనియర్ నాయకుల పాత్ర ఎలా ఉండబోతోందని విజయసాయిరెడ్డి చెప్పారు?

జవాబు: నా పార్టీ జెన్-జీ (Gen-Z) ప్రాధాన్యత కలిగిన యువత పార్టీగా నడిపిస్తామని, యువతే ముందుండి రాష్ట్రాన్ని నడిపించాలని భావిస్తున్నాం. 34 శాతం మంది నారాయణస్వామి లాంటి సీనియర్ నాయకులకు అవకాశం ఇస్తాం.

Also Read: Kuppam Greenfield Airport: కుప్పం గ్రీన్‌ఫీల్డ్‌ ఎయిర్‌పోర్టుకు భూమి ఇచ్చేందుకు టీటీడీ బోర్డు అంగీకారం

ప్రశ్న 4: పార్టీ అధికారంలోకి వస్తే విజయసాయిరెడ్డి ముఖ్యమంత్రి అవుతారా ?

జవాబు: తాను ముఖ్యమంత్రిగా ఉండనని విజయసాయిరెడ్డి స్పష్టం చేశారు. కేవలం ఒక మార్గదర్శకుడిగా, మెంటార్‌గా ఉండి పార్టీకి దిశానిర్దేశం చేస్తానని చెప్పారు.

ప్రశ్న 5: వైఎస్ జగన్మోహన్ రెడ్డి పార్టీని ఇండీ కూటమిలో విలీనం అవుతుందని వినిపిస్తోంది. దీనిపై మీరేమంటారు. ?

జవాబు: జగన్మోహన్ రెడ్డి ఇండీ (I.N.D.I.A)కూటమిలో వైసీపీ పార్టీని విలీనం చేస్తారా లేదా అన్నది తనకు కచ్చితంగా తెలియదన్నారు. అయితే చర్చలు జరుపుతున్నారని రూమర్స్ వినిపిస్తున్నాయని.. త్వరలోనే వాస్తవాలు బయటకు వస్తాయన్నారు విజయసాయిరెడ్డి.

అధికారం లోకి వచ్చేంత వరకూ వాడుకున్నారు తరవాత కరివేపాకు వలె తీసి పడేశారని ఆవేదన వ్యక్తం చేశారు. తన రాజకీయ జీవితంతో ఎంతో ముడిపడి ఉన్న ఉత్తరాంధ్ర ఎమోషన్ తో చెబుతున్నాను.. ఇక్కడ నివాసం ఏర్పాటు చేసుకున్నాను. ఉత్తరాంధ్రకి కేంద్రం నెలకి 350 కోట్ల రూపాయలు ఇవ్వాలి కానీ కేటాయించడం లేదు. అటు వైసీపీ, ఇటు కూటమి పార్టీలకు సిద్ధాంతాలు లేవు, వారికి పదవులే ముఖ్యం. వారికి రాష్ట్ర ప్రయోజనాలు అక్కర్లేదని వ్యాఖ్యానించారు.

Onions Price: ఏపీలో రైతు బజార్లలో రూ.35కే కేజీ ఉల్లిపాయలు విక్రయం

Shankar Dukanam — Tue, 29 Sep 2026 18:58:39 +0530

అమరావతి: నిత్యావసర సరుకుల ధరలు ఆకాశాన్ని అంటుతున్నాయి. సామాన్యుల జేబులు గుల్ల అవుతున్నాయి. నిత్యం పెరిగే ధరలతో సామాన్య ప్రజలు పడుతున్న ఇబ్బందిని గుర్తించిన ఆంధ్రప్రదేశ్ కీలక నిర్ణయం తీసుకుంది. నాణ్యమైన ఉల్లిపాయలను బుధవారం (సెప్టెంబర్) నుంచి రాష్ట్రంలోని రైతు బజార్లలో కేజీ రూ. 35 వంతున సబ్సిడీ ధరకు విక్రయించనున్నట్లు మంత్రులు కింజరాపు అచ్చెన్నాయుడు, నాదెండ్ల మనోహర్ వెల్లడించారు.

కూటమి ప్రభుత్వం చేపట్టిన ధరల స్థిరీకరణ చర్యల్లో భాగంగా ఈ నిర్ణయం తీసుకున్నామని, మొదటి విడతలో భాగంగా విజయవాడ నగరంలోని అన్ని రైతు బజార్లలో ఈ సబ్సిడీ ఉల్లి విక్రయాలు ప్రారంభమవుతాయని వారు తెలిపారు. ఈ పథకం కింద అర్హులైన ప్రతి కుటుంబానికి నెలకు 2 కేజీల చొప్పున సబ్సిడీ ఉల్లిపాయలను విక్రయించనున్నారు.

అయితే లబ్ధిదారులు తమ ఆధార్ కార్డు లేదా రేషన్ కార్డును చూపించి ఉల్లిపాయలను పొందేందుకు అధికారులు అవకాశం కల్పించారు. విజయవాడలో ప్రజా స్పందన, డిమాండ్‌ను బట్టి ఈ సబ్సిడీ విక్రయాలను రాష్ట్ర వ్యాప్తంగా ఉన్న అన్ని రైతు బజార్లకు త్వరలోనే విస్తరిస్తామని మంత్రులు అచ్చెన్నాయుడు, నాదెండ్ల మనోహర్ స్పష్టం చేశారు. మార్కెట్‌లో ఉల్లి ధరల భారాన్ని తగ్గించి, ధరల స్థిరీకరణ చేసి సామాన్య ప్రజలకు ఉపశమనం కలిగించడమే తమ ప్రధాన లక్ష్యమన్నారు. ప్రజలు ఈ అవకాశాన్ని సద్వినియోగం చేసుకోవాలని మంత్రులు కోరారు.

CM Chandrababu: వైసీపీ 880 కి.మీ రోడ్లు.. రెండేళ్లలో కూటమి 6,500 కి.మీ- పవన్ కళ్యాణ్‌పై సీఎం చంద్రబాబు ప్రశంసలు

Shankar Dukanam — Tue, 29 Sep 2026 17:59:02 +0530

Chandrababu Lauds Deputy CM Pawan Kalyan | ఉదయగిరి: గత వైసీపీ ప్రభుత్వం ఐదేళ్ల పాలనలో కేవలం 880 కిలోమీటర్ల సీసీ రోడ్లను మాత్రమే నిర్మించిందని, అయితే కూటమి ప్రభుత్వం కేవలం రెండేళ్ల పాలనలో ఏకంగా 6,500 కిలోమీటర్ల మేర సీసీ రోడ్లు వేసి సరికొత్త చరిత్ర సృష్టించిందని సీఎం చంద్రబాబు అన్నారు. గత ప్రభుత్వంలో కోట్ల రూపాయల నిధులు నేరుగా వైసీపీ దొంగల జేబుల్లోకి వెళ్లాయని తీవ్రస్థాయిలో విమర్శలు గుప్పించారు.

నెల్లూరు జిల్లా ఉదయగిరిలో నిర్వహించిన ‘పల్లె పండుగ-3.0’ కార్యక్రమంలో ఏపీ సీఎం చంద్రబాబు పాల్గొని ప్రసంగించారు. రాష్ట్రంలోని పల్లెల్లో సరికొత్త అభివృద్ధి కార్యక్రమాలకు నాంది పలుకుతున్నామని ఆయన స్పష్టం చేశారు. డిప్యూటీ సీఎం పవన్ కళ్యాణ్ నాయకత్వంలో ఇప్పటివరకు నిర్వహించిన 3 ‘పల్లె పండుగ’ కార్యక్రమాలు గ్రామీణ ప్రాంతాల్లో విశేష ఆదరణ పొంది, అద్భుతమైన విజయాన్ని సాధించాయని ప్రశంసించారు. జనసేనాని పవన్ కళ్యాణ్ ఒక ఉద్యమ స్ఫూర్తితో గ్రామాలను సమగ్రంగా అభివృద్ధి చేస్తున్నారని, ఈ సందర్భంగా ఆయనకు ప్రత్యేక అభినందనలు తెలియజేస్తున్నానని సీఎం చంద్రబాబు పేర్కొన్నారు.

సంక్షేమం, అభివృద్ధి, సుపరిపాలనతో తాము రాష్ట్రాన్ని మళ్లీ ప్రగతి పథంలో నిలబెట్టామన్నారు. 2024 ఎన్నికల్లో ప్రజలు ఇచ్చిన తీర్పుతో ఏర్పడిన డబుల్ ఇంజన్ సర్కార్ తమ నమ్మకాన్ని నిలబెట్టుకుంటూ జెట్ స్పీడ్‌తో దూసుకెళ్తోందని పేర్కొన్నారు. నాటి కంటే ఇప్పుడు ఎన్డీఏ (NDA) హవా మరింత పెరిగిందని, త్వరలో రాబోయే పంచాయతీ ఎన్నికల్లో టీడీపీ, జనసేన, బీజేపీల కూటమిని భారీ మెజార్టీతో గెలిపించేందుకు మహిళలు, ప్రజలు సిద్ధంగా ఉన్నారని ధీమా వ్యక్తం చేశారు.

గత వైసీపీ ప్రభుత్వ హయాంలో జరిగిన విధ్వంసానికి పల్లెలు తీవ్రంగా నష్టపోయాయని, రహదారుల నిండా గుంతలు, వెలగని వీధి దీపాలు ఉండేవన్నారు. ఆఖరికి పారిశుధ్యం కోసం బ్లీచింగ్ పౌడర్ కొట్టలేని దయనీయ స్థితి నాటిదని చంద్రబాబు అన్నారు. ఆ దుస్థితి నుంచి పవన్ కళ్యాణ్ పంచాయతీరాజ్ వ్యవస్థను మళ్లీ గాడిలో పెట్టి, గ్రామీణ వికాసంలో తనదైన మార్క్ చూపించారని డిప్యూటీ సీఎంను ప్రశంసించారు.

రాష్ట్రవ్యాప్తంగా ఉన్న 13,326 గ్రామాల్లో ఒకేసారి గ్రామసభలు నిర్వహించి పవన్ కళ్యాణ్ పల్లెల అభివృద్ధికి శ్రీకారం చుట్టారని తెలిపారు. దాదాపు రెండున్నర దశాబ్దాల సుదీర్ఘ నిరీక్షణ తర్వాత పంచాయతీరాజ్ శాఖలోని వివిధ హోదాల్లో ఉన్న 10 వేల మంది ఉద్యోగులకు ఒకేసారి ప్రమోషన్లు కల్పించిన ఘనత ఈ ప్రభుత్వానికే దక్కుతుందన్నారు. అలాగే 15వ ఆర్థిక సంఘం నిధులు రూ. 4,136 కోట్లను నేరుగా పంచాయతీలకు విడుదల చేశారు. లక్షకు పైగా పంటకుంటల తవ్వకం, పశువుల కోసం తాగునీటి తొట్టెల నిర్మాణం వంటి పనులు చేపట్టి, ఏకంగా 13 జాతీయ అవార్డులను పంచాయతీరాజ్ శాఖ సాధించిందని పేర్కొన్నారు.

గ్రామీణ, పట్టణ ప్రాంతాల మౌలిక సదుపాయాల కల్పనపై ఏపీ ప్రభుత్వం ప్రత్యేక దృష్టి సారించిందని సీఎం చంద్రబాబు వివరించారు. అమరజీవి 'పొట్టి శ్రీరాములు జలధార' పథకం కింద జల్ జీవన్ మిషన్ (JJM) పనులను త్వరలోనే ప్రారంభించనున్నట్లు తెలిపారు. ప్రతి గ్రామంలోనూ ఇళ్ల ముందు సీసీ రోడ్ల నిర్మాణం చేపడుతున్నామని, దీనివల్ల గ్రామీణ ప్రయాణం సురక్షితంగా, సౌకర్యవంతంగా మారుతుందన్నారు. నాటి వైసీపీ ప్రభుత్వంలో అభివృద్ధి నిధులు దారిమళ్లి దొంగల జేబుల్లోకి వెళ్లాయని, నేడు మాత్రం ప్రజల కళ్లకు కనిపించేలా అభివృద్ధి పనులు చేసి చూపిస్తున్నామని సీఎం చంద్రబాబు స్పష్టం చేశారు.

మాజీ సీఎం జగన్ మోహన్ రెడ్డిని బీజేపీ దగ్గరకు రానీయడం లేదు: ఏపీ మంత్రి సంచలనం

Vijaya Sarathi — Tue, 29 Sep 2026 15:01:23 +0530

అమరావతి: మాజీ ముఖ్యమంత్రి, వైసీపీ అధినేత జగన్ మోహన్ రెడ్డి ని బీజేపీ రగ్గరకు రానీయడం లేదని అన్నారు ఏపీ వైద్య శాఖ మంత్రి బీజేపీ కీలక నేత సత్యకుమార్ యాదవ్. చాలామంది ఇటీవలి కాలంలో జగన్ మోహన్ రెడ్డి ని బీజేపీ దూరం పెడుతుందని అనుకుంటున్నారని కానీ అసలు దగ్గరకే రానీయడం లేదని తీవ్ర వ్యాఖ్యలు చేశారు. అందుకే ఇన్నాళ్లు కప్పుకున్న ముసుగు తీసేసి కమ్యూనిస్ట్ లతో మీటింగ్స్ పెడుతున్నారని కూడా అన్నారు సత్య కుమార్.

నిజంగానే బీజేపీకి, జగన్ కూ దూరం పెరిగిందా?

డైరెక్ట్ గా NDA లో చేరకపోయినా బీజేపీతో సన్నిహితం గానే ఉంటూ వచ్చారు జగన్. ఆయన ముఖ్యమంత్రి గా ఉన్న సమయంలో కూడా బీజేపీ తో దోస్తీ కొనసాగించారు. ఎన్నడూ లేనిది ప్రధాని మోదీ కాళ్ళకు నమస్కరించే ప్రయత్నం చేయడం అడగకముందే రాష్ట్రపతి ఎన్నిక సమయంలో NDA కాండిడేట్ కు మద్దతు పలకడం ఇలా బీజేపీ కీ దగ్గరయ్యే ఏ ప్రయత్నం కూడా జగన్ వదులుకోలేదు. 2014-19 మధ్యలో NDA నుండి టీడీపీ బయటకు వచ్చేసినప్పుడు స్వయంగా మోదీ కూడా జగన్ ట్రాప్ లో టీడీపీ పడింది అంటూవ్యాఖ్యలు చేశారు. ఆ తరువాత బీజేపీ కీ చాలా నమ్మకమైన స్నేహితుడి గా జగన్ ఉంటూ వచ్చారు. 2019 ఎన్నికల్లో గెలిచాక ఆ స్నేహం మరింత బలపడింది.

సమీకరణాలు మార్చేసిన పవన్ కళ్యాణ్

అయితే జగన్ - బీజేపీ దోస్తానాకు దెబ్బ కొట్టింది పవన్ కళ్యాణ్ అనే చెప్పాలి. బీజేపీ అప్పట్లో జగన్ మోహన్ రెడ్డి ని డైరెక్ట్ గా NDA తో కలవమని ఆఫర్ ఇచ్చిందని దానికీ జగన్ మోహన్ రెడ్డి ఒప్పుకోక పోవడం తో వారి మధ్య దూరం పెరిగింది అనే ప్రచారం ఉంది. దానికి ప్రధాన కారణం జగన్ మోహన్ రెడ్డి కీ మైనార్టీ వర్గాల్లో ఉన్న బలమైన ఓటు బ్యాంక్ అనే విశ్లేషణలు అప్పట్లో వినబడ్డాయి. వాస్తవాలు ఏమైనప్పటికీ జగన్ మాత్రం ఎన్డీఏ తో డైరెక్ట్ గా కలవడానికి ఇష్టపడలేదు. అదే సమయంలో టిడిపి -జనసేన కలవడం టిడిపి తో బిజెపి మరోసారి కలిసేలా పవన్ కళ్యాణ్ మధ్యవర్తిత్వం వహించడం వంటి సంఘటన లు చకచకా జరిగిపోయాయి.

ఈలోపు 2024 ఎన్నికల రావడం తో జగన్ ఒంటరిగానే ఎన్నికలకు వెళ్ళి ఓటమి పాలయ్యారు. ఆ తర్వాత కూడా బిజెపితో సన్నిహితంగానే ఉండడానికి జగన్ ట్రై చేసినా కూటమి లో ఉన్న బీజేపీ గతంలోలా జగన్ పట్ల మరి అంత సన్నిహితంగా ఉండలేని పరిస్థితి ఏర్పడింది. ఢిల్లీలో ఉన్న బిజెపి ప్రభుత్వం కూడా టీడీపీ ఎంపీల సంఖ్య ఫై భారీగా ఏర్పడాల్సిన పరిస్థితి వచ్చింది. దానితో బిజెపి జగన్ ల మధ్య గ్యాప్ పెరిగింది.

CM Chandrababu: చాయ్ విక్రేత నుంచి దేశ ప్రధానిగా ఎదిగిన మోదీ: కెపాసిటీ బిల్డింగ్‌కు నిదర్శనమన్న సీఎం చంద్రబాబు

Shankar Dukanam — Tue, 29 Sep 2026 14:43:17 +0530

విజయవాడ: రైల్వే స్టేషన్‌లో చాయ్ విక్రేత స్థాయి నుంచి దేశ ప్రధానిగా ఎదిగిన నరేంద్ర మోదీ కెపాసిటీ బిల్డింగ్‌కు ఒక ఉదాహరణ అని ఏపీ సీఎం చంద్రబాబు కొనియాడారు. ఆంధ్రప్రదేశ్‌కు చెందిన ఒక టీచర్ కూడా ఈ కెపాసిటీ బిల్డింగ్ శిక్షణ ద్వారా సామర్థ్యాలు పెంచుకుని వేదికపైకి వచ్చి మాట్లాడగలిగారని గుర్తుచేశారు. విజయవాడలో కెపాసిటీ బిల్డింగ్ కమిషన్ నిర్వహించిన 'మిషన్ కర్మయోగి' వర్క్‌షాప్‌లో ఏపీ సీఎం చంద్రబాబు నాయుడు ప్రసంగించారు. ప్రభుత్వ ఉద్యోగుల కెపాసిటి బిల్డింగ్‌లో అత్యుత్తమ రాష్ట్రంగా ఆంధ్రప్రదేశ్‌కు మొదటి స్థానం దక్కిందన్నారు. ఆర్ధిక శాఖ ముఖ్యకార్యదర్శి పీయూష్ కుమార్, ఏపీఎస్ డీపీఎస్ ఎగ్జిక్యూటివ్ డైరెక్టర్ అలపర్తి వెంకటేశ్వరరావుతో పాటు కెపాసిటీ బిల్డింగ్‌లో రెండో స్థానంలో నిలిచిన కర్ణాటక, మూడో స్థానంలో ఒడిశా రాష్ట్రాలకు సీఎం చంద్రబాబు అవార్డులు ప్రదానం చేశారు.

మన ముందు ఆర్టిఫిషియల్ ఇంటెలిజెన్స్ (AI) వంటి అత్యధునాతన సాంకేతిక పరిజ్ఞానం, అపారమైన అవకాశాలు, యువత ఆకాంక్షలు ఉన్నాయన్నారు. ప్రజల అంచనాలకు, ఆకాంక్షలకు అనుగుణంగా మన పాలనా వ్యవస్థలు, ప్రభుత్వం సేవలను ఏ మేరకు అందించగలవనేదే ఇప్పుడు అత్యంత కీలకమైన అంశమని పేర్కొన్నారు. రాబోయే 20 సంవత్సరాలు భారత ప్రగతికి అత్యంత కీలకమైన సమయమని, ఈ కాలంలోనే మన వ్యవస్థలు విప్లవాత్మకమైన మార్పులను సంతరించుకోవాల్సిన అవసరం ఉందన్నారు.

విజయవాడలోని అంబేద్కర్ కళావేదికలో జరిగిన మిషన్ కర్మయోగి వర్క్‌షాప్‌లో గౌరవ ముఖ్యమంత్రి శ్రీ నారా చంద్రబాబు నాయుడు నేడు పాల్గొని ప్రసంగించారు. ఈ వర్క్‌షాప్‌కు ఏపీతో పాటు తెలంగాణ, కర్ణాటక, కేరళ, తమిళనాడు, ఒడిశా, పుదుచ్చేరి రాష్ట్రాలకు చెందిన అధికారులు హాజరయ్యారు. ప్రభుత్వ ఉద్యోగుల… pic.twitter.com/BwYq4ZJLsP
— CMO Andhra Pradesh (@AndhraPradeshCM) September 29, 2026

భారత్‌లోని అవకాశాలను సద్వినియోగం చేసుకునేందుకు ప్రధాని మోదీ 'ఐగాట్ - మిషన్ కర్మయోగి' కార్యక్రమాన్ని ప్రారంభించారని తెలిపారు. దీని ద్వారా రాష్ట్ర స్థాయి నుంచి క్షేత్రస్థాయి వరకు ప్రభుత్వ అధికారులు, ఉద్యోగులు ఆన్‌లైన్‌లో ఎప్పటికప్పుడు శిక్షణ పొందితేనే ప్రజలకు నాణ్యమైన సేవలు అందించగలమని అన్నారు. 1978లో సంస్కరణలు ప్రారంభించిన చైనా కొన్ని దశాబ్దాల్లోనే తన సామర్థ్యాలను విపరీతంగా పెంచుకుని ఆర్థికంగా ఉన్నత స్థాయికి చేరిందని పేర్కొన్నారు. అదే స్థాయిలో వనరులు, అవకాశాలు ఉన్న భారత్ ఎందుకు వెనుకబడిందో క్షేత్రస్థాయిలో పరిశీలించుకోవాలని సూచించారు.

ఇప్పటికే గూగుల్, మైక్రోసాఫ్ట్ వంటి అంతర్జాతీయ అగ్రగామి కంపెనీలకు భారత టెకీలే నాయకత్వం వహిస్తూ ప్రపంచవ్యాప్తంగా తమ నైపుణ్యాలను నిరూపించుకున్నారని చంద్రబాబు గుర్తుచేశారు. గతంలో ఐటీ విప్లవం వచ్చిందని, ఇప్పుడు ఏఐ కాలం నడుస్తోందని, దానికి అనుగుణంగా మన పాలనా వ్యవస్థలు మారాల్సిందేనని అన్నారు. ప్రగతికి అడ్డుగా నిలిచే అనవసరమైన పాత నిబంధనలను తొలగించి, 'జన్ విశ్వాస్' సంస్కరణల ద్వారా నిబంధనలను సులభతరం చేయాల్సిన అవసరం ఎంతైనా ఉందని చంద్రబాబు స్పష్టం చేశారు.

దసరా ఉత్సవాల సందర్భంగా విజయవాడ వచ్చే భక్తులు, భవానీలు ఈ ఏర్పాట్ల గురించి తెలుసుకోండి!

RAMA — Tue, 29 Sep 2026 13:20:03 +0530

Dasara Mahotsavalu 2026: విజయవాడ ఇంద్రకీలాద్రిపై దసరా మహోత్సవాల సన్నద్ధత, భక్తులకు ఏర్పాట్లు, భద్రత, ట్రాఫిక్ నియంత్రణ , పారిశుద్ధ్యంపై దేవస్థానంలో ఉన్నత స్థాయి సమావేశం జరిగింది

దసరా ఉత్సవాలకు, భవానీ దీక్షల విరమణకు దాదాపు 25 లక్షల మంది భక్తులు వచ్చే అకాశం ఉందన్నారు జిల్లా ఇన్ ఛార్జ్ మంత్రి సత్యకుమార్ యాదవ్. ఈ మేరకు ఘాట్ రోడ్లు, పార్కింగ్ ప్రాంతాలు, దర్శన మార్గాలను సమన్వయం చేస్తూ పటిష్టమైన కార్యాచరణ రూపొందించామన్నారు. క్యూలైన్లలో భక్తులకు షెడ్లు, తాగునీటి సరఫరా, కూర్చునేందుకు సదుపాయాలు, అన్నప్రసాదం అందించే ఏర్పాటు చేస్తామన్నారు. క్యూలైన్లలో ఇంకా ఎంత సమయం నిల్చోవాలి, దర్శనానికి ఎంత టైమ్ పడుతుందో తెలియజేస్తూ ఎల్‌ఈడీ / డిజిటల్ స్క్రీన్లను అమర్చుతున్నామని పేర్కొన్నారు.

సామాన్య భక్తులు ఎంతో సంతృప్తిగా అమ్మవారిని దర్శనం చేసుకుని వెళ్లేలా ప్రణాళికలు రూపొందించామన్నారు విజయవాడ ఎంపీ కేశినేని శివనాథ్ - చిన్ని. క్యూలైన్లలో చిన్నారుల కోసం పాలు, బిస్కెట్లు పంపిణీ చేసేందుకు కేంద్రాలు ఏర్పాటుచేస్తున్నామని చెప్పారు. సామాన్య భక్తులకే ప్రథమ ప్రాధాన్యత ఇవ్వాలని స్పష్టం చేశారు శాసనమండలి సభ్యులు వర్ల రామయ్య.

వివిధ శాఖల సిబ్బంది తమ విధులతో సంబంధం లేకుండా కొండపైకి రావడం వల్ల కొన్ని ప్రదేశాలలో రద్దీ నియంత్రణ సవాలుగా మారుతోందన్నారు దేవాదాయ శాఖ కమిషనర్ కె. రామచంద్ర మోహన్. దేవస్థానం ఇంజినీరింగ్ అధికారులు, AEOలు సమన్వయంతో ఈ సమస్యను అధిగమించాలని ఆదేశించారు గతంలో మూలా నక్షత్రం రోజు రద్దీ పెరిగిపోయి వేలాది భక్తులు దర్శనం చేసుకోకుండానే వెనుతిరిగారని గుర్తు చేశారు. అలాంటి సమస్యలు ఈ ఏడాది రాకూడదన్నారు.

శాంతిభద్రతల పరిరక్షణ కోసం బందోబస్తు ఏర్పాటు చేస్తున్నామన్నారు పోలీస్ కమిషనర్ ఎస్.వి. రాజశేఖర్ బాబు . AI కెమెరాలు, CCTV పర్యవేక్షణ, కంట్రోల్ రూమ్ ద్వారా 24 గంటలూ కొండపై, పరిసర ప్రాంతాలలో నిఘా కొనసాగుతుందన్నారు. భక్తుల రాకపోకలకు అనుగుణంగా ట్రాఫిక్ ప్రణాళికను అమలు చేస్తున్నామని ..పార్కింగ్ ప్రదేశాల నుంచి భక్తులకు ఉచిత షటిల్ బస్సులు అందుబాటులో ఉంటాయన్నారు. దసరా మహోత్సవాల నిర్వహణలో అన్ని శాఖల అధికారులు, సిబ్బందిని సమన్వయం చేస్తూ విధుల కేటాయింపులు పూర్తి చేసినట్లు తెలిపారు జిల్లా జాయింట్ కలెక్టర్ ఇలక్కియ. 24 గంటలు పనిచేసే వైద్య శిబిరాలు, ప్రథమ చికిత్స కేంద్రాలు, అత్యవసర సేవల కోసం అంబులెన్సులు సిద్ధంగా ఉంచామన్నారు.

ఇంద్రకీలాద్రిపై దసరా ఉత్సవాల ఏర్పాట్లు, ప్రధాన విశేషాలు

నూతన పూజా మండపంలో ఖడ్గమాలార్చన, కుంకుమార్చన, శ్రీచక్ర నవావరణార్చన, చండీహోమాలు శాస్త్రోక్తంగా నిర్వహిస్తారు.

ఆర్జిత సేవల టికెట్లను దేవాదాయ శాఖ అధికారిక వెబ్‌సైట్ ద్వారా *‘మనమిత్ర’ వాట్సాప్ నెంబర్ (9552300009)* ద్వారా భక్తులు పొందవచ్చు.

పరోక్ష సేవలను బుక్ చేసుకున్న భక్తుల గోత్రనామాలతో ప్రత్యేక పూజలు నిర్వహించి, ప్రసాదాలను వారి చిరునామాకు తపాలా ద్వారా పంపేలా ఏర్పాట్లు చేశారు.

ఉత్సవాల సందర్భంగా ప్రతిరోజు సాయంత్రం 4 గంటలకు శ్రీ మల్లేశ్వర స్వామి వారి నగరోత్సవం నిర్వహిస్తారు

జీపీఎస్ (GPS) ఆధారిత పారిశుద్ధ్య పర్యవేక్షణ వ్యవస్థ ఏర్పాటు చేశారు. కమాండ్ కంట్రోల్ రూమ్ ద్వారా భక్తుల ఫిర్యాదులను తక్షణమే పరిష్కరిస్తారు.

అన్ని ప్రభుత్వ విభాగాలు, పోలీస్ యంత్రాంగం, మున్సిపల్ అధికారులు, దేవస్థానం సిబ్బంది సమన్వయంతో... ఇంద్రకీలాద్రిపై దసరా మహోత్సవాలు-2026ను అత్యంత వైభవంగా నిర్వహించాలని సమావేశం తీర్మానించింది.

దేవాలయాల్లో 344 అర్చక, వైదిక పోస్టులు: రాత పరీక్ష, ఇంటర్వ్యూతో పారదర్శక భర్తీ!

RAMA — Tue, 29 Sep 2026 12:42:57 +0530