vijayawada

AP Local Elections: ఏపీలో స్థానిక పోరు- తీవ్ర ఉద్రిక్తతల మధ్య నామినేషన్లు.. సుప్రీం ఆదేశాలతో ఎస్ఈసీ నిర్ణయంపై ఉత్కంఠ!

Satyaprasad Bandaru — Thu, 22 Oct 2026 20:56:27 +0530

AP Local Elections: ఏపీలో స్థానిక సంస్థల ఎన్నికలు రాజకీయంగా తీవ్ర ఉత్కంఠను రేపుతోంది. ఒకవైపు నామినేషన్ల పర్వంతో వివిధ నియోజకవర్గాల్లో భారీ ర్యాలీలు, సభలు సాగుతుండగా, మరోవైపు అభ్యర్థుల ఫిర్యాదులు, సవాళ్లు-ప్రతిసవాళ్లు, సుప్రీంకోర్టు ఆదేశాలు, ప్రధాన పార్టీల భేటీలతో రాష్ట్ర రాజకీయాలు ఒక్కసారిగా వేడెక్కాయి.

ఉద్రిక్తతల మధ్య నామినేషన్ల పర్వం

రాష్ట్రవ్యాప్తంగా స్థానిక సంస్థల స్థానాలకు నామినేషన్ల ప్రక్రియ ఊపందుకుంది. కూటమి అభ్యర్థులు, ప్రతిపక్ష వైఎస్సార్‌సీపీ అభ్యర్థులు తమ మద్దతుదారులతో కలిసి భారీ ర్యాలీగా వచ్చి నామినేషన్ పత్రాలను దాఖలు చేస్తున్నారు. అనేక చోట్ల ర్యాలీలు, నామినేషన్ కేంద్రాల వద్ద పోటాపోటీ నినాదాలు చోటుచేసుకున్నాయి. నామినేషన్ల దాఖలు చేయడంలో అడ్డంకులు ఎదురవుతున్నాయని, పలుచోట్ల హింసాత్మక ఘటనలు చోటుచేసుకున్నాయని పరస్పర ఆరోపణలు వస్తు్న్నాయి. నామినేషన్ కేంద్రాల వద్ద ఎలాంటి అవాంఛనీయ సంఘటనలు జరగకుండా బారికేడ్లు ఏర్పాటు చేసి, అదనపు పోలీసు బలగాలతో భారీ భద్రతను ఏర్పాటు చేశారు.

సుప్రీంకోర్టు ఆదేశాలు – ఎస్ఈసీ చర్యలు

నామినేషన్ల ప్రక్రియలో అడ్డంకులు ఎదురవుతున్నాయని వైఎస్సార్‌సీపీ వేసిన పిటిషన్‌పై విచారణ జరిపిన సుప్రీంకోర్టు, నామినేషన్ ప్రక్రియ పారదర్శకంగా జరగాలని, అభ్యర్థులందరికీ రక్షణ కల్పించాలని ఆదేశించింది. ఈ పరిణామాల నేపథ్యంలో, సుప్రీంకోర్టు ఆదేశాలతో రాష్ట్ర ఎన్నికల కమిషన్ 100 మున్సిపల్ స్థానాల్లో ఎన్నికల ప్రక్రియను తాత్కాలికంగా నిలిపివేస్తూ నిర్ణయం తీసుకుంది. నామినేషన్ల గడువు పొడిగింపు, అభ్యర్థుల తుది జాబితా ప్రకటనపై నివేదికల ఆధారంగా చర్యలు చేపడతామని తెలిపింది.

కూటమి వ్యూహాలు

స్థానిక పోరులో అనుసరించాల్సిన వ్యూహాలపై ప్రధాన రాజకీయ పార్టీల నాయకులు తీవ్ర స్థాయిలో సమీక్షలు నిర్వహిస్తున్నారు. సీఎం చంద్రబాబు, డిప్యూటీ సీఎం పవన్ కళ్యాణ్, బీజేపీ నేతలతో కలిసి ఎన్నికల పురోగతి, శాంతిభద్రతలపై ఉమ్మడి వ్యూహాలపై చర్చించారు. ఎన్నికలు పారదర్శకంగా జరగాలని, ఎస్ఈసీ నిర్ణయాలకు కట్టుబడి ఉంటామని స్పష్టం చేశారు.

ప్రతిపక్షం సవాళ్లు

వైఎస్సార్‌సీపీ అధినేత వైఎస్ జగన్ మోహన్ రెడ్డి పార్టీ ముఖ్య నేతలతో భేటీ అయి నామినేషన్ వేయలేకపోయిన అభ్యర్థుల పరిస్థితిపై, న్యాయపోరాటంపై చర్చలు జరిపారు. ప్రాంతీయంగా ఉద్రిక్తతలు చోటుచేసుకున్నప్పటికీ, జిల్లా యంత్రాంగం, ఎస్పీలు, కలెక్టర్ల నివేదికల ఆధారంగా ఎన్నికల కమిషన్ ప్రక్రియను ముందుకు తీసుకెళ్తోంది.

ఈసీ నిర్ణయంపై సర్వత్రా ఉత్కంఠ

ఏపీలో పట్టణ స్థానిక సంస్థల ఎన్నికల ప్రక్రియపై ఉత్కంఠ నెలకొంది. సుప్రీంకోర్టు ఇచ్చిన గడువు మరికొన్ని గంటల్లో ముగుస్తుండడంతో రాష్ట్ర ఎన్నికల సంఘం ఎలాంటి నిర్ణయం తీసుకుంటుందోనని ఉత్కంఠ కొనసాగుతోంది. సుప్రీంకోర్టు ఆదేశాలతో ఎస్‌ఈసీ అనిల్‌ చంద్ర పునేఠా ఇప్పటికే వివిధ జిల్లాల కలెక్టర్లు, ఎస్పీల నుంచి నివేదికలు తెప్పించుకున్నారు. ఎన్నికల సంఘం కార్యదర్శి మల్లికార్జున, ఐజీ రాజకుమారితో సమీక్ష నిర్వహించారు. సుప్రీంకోర్టు ఆదేశాల మేరకు ఇవ్వాల్సిన గడువు, ఇతర తేదీలపై కసరత్తు చేస్తున్నారు. మిగిలిన ఎన్నికల షెడ్యూల్‌కు ఎలాంటి ఆటంకం లేకుండా షెడ్యూల్ విడుదలపై పునేఠా కసరత్తు చేశారు. అంశాల వారీగా ఎస్‌ఈసీ నిర్ణయం ప్రకటించే ఛాన్స్ ఉంది. పలుచోట్ల నామినేషన్లు వేయనీయకుండా తమ అభ్యర్థులను అడ్డుకున్నారని వైసీపీ సుప్రీంకోర్టును ఆశ్రయించిన సంగతి తెలిసిందే. దీనిపై విచారణ చేపట్టిన సుప్రీంకోర్టు 25వ తేదీ వరకు అభ్యర్థుల జాబితా ప్రకటన నిలిపివేసి ఫిర్యాదులపై ఒక నిర్ణయం ప్రకటించాలని ఎస్ఈసీని ఆదేశించింది.

AP Deputy CMO Fake Account: డిప్యూటీ సీఎంవో పేరిట ఫేక్ వాట్సాప్ ఛానల్.. కఠిన చర్యలు ఉంటాయని పవన్ కార్యాలయం వార్నింగ్

Satyaprasad Bandaru — Thu, 22 Oct 2026 13:40:46 +0530

AP Deputy CMO Fake Account: ఏపీ డిప్యూటీ సీఎం ఆఫీస్ పేరిట ఒక ఫేక్ వాట్సాప్ ఛానల్‌ సోషల్ మీడియాలో సర్క్యూలేట్ అవుతుంది. దీనిపై డిప్యూటీ సీఎం కార్యాలయం స్పందించింది. “Deputy CMO, Andhra Pradesh” పేరుతో నడుస్తోన్న అనధికారిక వాట్సాప్ ఛానల్‌తో ఉప ముఖ్యమంత్రి కార్యాలయానికి ఎలాంటి సంబంధం లేదని స్పష్టం చేసింది. ఈ నకిలీ ఛానల్ ద్వారా డిప్యూటీ సీఎం ఆఫీస్ పేరు, గుర్తింపును దుర్వినియోగం చేస్తూ ప్రజలను తప్పుదోవ పట్టించేలా సంబంధం లేని అంశాలను ప్రచారం చేస్తున్నారని తెలిపింది. ఇటువంటి ఉద్దేశపూర్వక తప్పుడు ప్రచారాలు, అధికారిక హోదాను దుర్వినియోగం చేయడం ఏమాత్రం ఆమోదం కాదని హెచ్చరించింది.

చట్టపరమైన చర్యలు

ఈ వ్యవహారంపై ఇప్పటికే పోలీసులకు ఫిర్యాదు చేసి, ఎఫ్‌ఐఆర్ నమోదు చేయాలని కోరినట్లు డిప్యూటీ సీఎం కార్యాలయం అధికారులు వెల్లడించారు. ప్రభుత్వ కార్యాలయాల గుర్తింపును దుర్వినియోగం చేస్తే కఠిన చర్యలను తప్పవని హెచ్చరించారు. బాధ్యులైన వారిపై చట్టపరంగా చర్యలు తీసుకుంటామని స్పష్టం చేశారు.

Also Read: నో కన్వాయ్, నో సెక్యూరిటీ - చంద్రబాబు వద్దకు పవన్.. సుప్రీం తీర్పు వేళ సంచలన భేటీ!

ఆ ఛానల్ ను ఫాలో అవ్వొద్దు

డిప్యూటీ సీఎం ఆఫీస్ పేరిట చలామణీ అవుతున్న ఫేక్ వాట్సాప్ ఛానల్‌ను ప్రజలెవ్వరూ నమ్మొద్దని, ఫాలో అవ్వవద్దని, అందులోని సమాచారాన్ని ఇతరులకు షేర్ చేయవద్దని అధికారులు సూచించారు. అధికారిక సమాచారం కోసం ఉప ముఖ్యమంత్రి కార్యాలయానికి చెందిన వెరిఫైడ్ సోషల్ మీడియా ఖాతాలను, అధికారిక వాట్సప్ ఛానల్‌ను మాత్రమే ఫాలో అవ్వాలని విజ్ఞప్తి చేశారు.

Also Read: కుప్పం మున్సిపల్ ఎన్నికలు: 11 వార్డుల్లో టీడీపీ ఏకగ్రీవం, పార్టీ శ్రేణుల సంబరాలు

AP Elections: కుట్రలతో ఎన్నికలను అడ్డుకోవడమే వైసీపీ లక్ష్యం.. ఎస్ఈసీ నిర్ణయానికి కట్టుబడి ఉంటాం- కూటమి పార్టీల ఉమ్మడి ప్రకటన

Satyaprasad Bandaru — Thu, 22 Oct 2026 10:32:39 +0530

AP Elections: ఏపీ స్థానిక సంస్థల ఎన్నికలపై రాష్ట్ర ఎన్నికల కమిషన్ తీసుకునే ఏ నిర్ణయానికైనా తాము కట్టుబడి ఉంటామని ఎన్డీఏ కూటమి స్పష్టం చేసింది. ఈ మేరకు సీఎం చంద్రబాబు , ఉప ముఖ్యమంత్రి పవన్ కల్యాణ్, బీజేపీ రాష్ట్ర అధ్యక్షుడు పీవీఎన్ మాధవ్ ఉమ్మడి ప్రకటనను విడుదల చేశారు. రాష్ట్ర పునర్నిర్మాణమే లక్ష్యంగా 2024 ఎన్నికల్లో ప్రజల భారీ మెజార్టీతో గెలిపించారని, గడిచిన రెండేళ్లుగా సంక్షేమం, అభివృద్ధి, సుపరిపాలన అందిస్తున్నామని కూటమి నేతలు పేర్కొన్నారు. స్థానిక సంస్థల బలోపేతంతోనే రాష్ట్ర సమగ్రాభివృద్ధి సాధ్యమవుతుందని, సకాలంలో ఎన్నికలు పూర్తయితేనే 16వ ఆర్థిక సంఘం, కేంద్ర ప్రభుత్వం నుంచి రావాల్సిన నిధులు అందుతాయని స్పష్టం చేశారు.

Also Read: ఏపీలో మున్సిపల్, కార్పొరేషన్ ఎన్నికలకు బ్రేక్.. ఎస్ఈసీ సంచలన ప్రకటన.. అభ్యర్థుల తుది జాబితాపై ఉత్కంఠ!

వైసీపీ కుట్రలను తిప్పికొడతాం

మరోవైపు, ప్రతిపక్ష వైసీపీ ముందు నుంచీ ఎన్నికలను అడ్డుకోవడమే లక్ష్యంగా కుట్రలు చేస్తోందని కూటమి నేతలు ఆరోపిస్తున్నారు. ఇప్పటివరకు కోర్టుల్లో 59 సార్లు పిటిషన్లు వేసి ఎన్నికలు నిలిపివేసేందుకు యత్నించారని మండిపడ్డారు. ఎన్నికల ప్రక్రియ మొదలయ్యాక పలుచోట్ల హింసను సృష్టించడమే కాకుండా, పోలీసులపై దాడులు చేయడం, రోడ్లను తవ్వేయడం వంటి వికృత రాజకీయాలకు పాల్పడుతున్నారని మండిపడ్డారు.

గత వైసీపీ హయాంలో ప్రతిపక్షాలు నామినేషన్లు కూడా వేయకుండా భయాందోళన సృష్టించి బలవంతపు ఏకగ్రీవాలు చేసుకున్నారని, నాటి ఎస్ఈసీ ప్రాణభయంతో కేంద్రానికి లేఖ రాస్తే ప్రత్యేక బలగాలతో భద్రత కల్పించిన విషయాన్ని ఈ సందర్భంగా గుర్తుచేశారు. ప్రజాస్వామ్యంపై విశ్వాసం ఉన్న కూటమి ప్రభుత్వం శాంతియుత, పారదర్శక ఎన్నికల నిర్వహణకు సంపూర్ణ సహకారం అందిస్తుందని, రాజ్యాంగబద్ధంగా ఎన్నికలు జరిగి ప్రతి ఇంటికీ అభివృద్ధి అందాలన్నదే తమ ధ్యేయమని తెలిపారు.

Also Read: నాదెండ్ల మనోహర్ వైపే గురి - జనసేనలో పిఏసి అధినేతను టార్గెట్ చేస్తోంది ఎవరు?

APలో ఎన్నికల కోడ్ , కనక దుర్గ ఆలయంలో సిఫార్సు దర్శనాలకు బ్రేక్! సామాన్యులకు గుడ్‌న్యూస్

RAMA — Thu, 22 Oct 2026 06:00:11 +0530

AP Election Code 2026: ఆంధ్రప్రదేశ్ రాష్ట్రవ్యాప్తంగా ఎన్నికల ప్రవర్తనా నియమావళి అమల్లోకి రావడంతో విజయవాడ ఇంద్రకీలాద్రిపై కొలువుతీరిన కనకదుర్గమ్మ దేవస్థాన అధికారులు కీలక నిర్ణయాలు తీసుకున్నారు. శ్రీ దుర్గా మల్లేశ్వర స్వామి దేవస్థానం అధికారులు సిఫార్సు దర్శనాలను పూర్తిగా నిలిపివేస్తున్నట్టు ప్రకటించారు. ఈ మేరకు ఆలయ ఎగ్జిక్యూటివ్ అధికారు ఈ మేరకు ఆలయ ఎగ్జిక్యూటివ్ అధికారి శీనా నాయక్ అధికారిక ప్రకటన విడుదల చేశారు.

ఇంద్రకీలాద్రి నుంచి విడుదలైన ప్రకటనలో ఏముందంటే..

ఎన్నికల నిబంధనలు అమల్లో ఉన్నంతవరకు ఎలాంటి సిఫార్సు లేఖల ఆధారంగా దర్శనాలు కల్పించబోమమని దేవస్థానం స్పష్టం చేసింది. ప్రజా ప్రతినిధులు, రాజకీయ ప్రమముఖులు లేదా ఇతర ప్రభావవంతమైన వ్యక్తులు ఇచ్చే సిఫార్సుల ద్వారా దర్శనానికి అనుమతి ఉండదని స్పష్టం చేశారు. ఈ నిర్ణయం ఎన్నికల ప్రవర్తనా నియమావళికి అనుగుమంగా తీసుకున్నామమని చెప్పారు. ఆలయ అధికారులు ఎటువంటి రాజకీయ ప్రభావానికి లేదా సిఫార్సులకు అవకాశం ఇవ్వకుండా ఈ నిర్ణయం తీసుకున్నామన్నారు.

చాణక్య నీతి: జీవితంలో ఈ ముగ్గురిని ఒప్పించొద్దు! మీ సమయం వృధా.

ఈ ఆంక్షలు అందరకీ కాదు..

ఈ ఆంక్షలు అందరకీ వర్తించవని..స్వయంగా విచ్చేసే ప్రోటాకాల్ పరిధిలో వ్యక్తులకు మాత్రం నిబంధనల ప్రకారం దర్శనం కల్పించనున్నట్టు ఈవో శీనా నాయక్ తెలిపారు. అంటే ప్రోటోకాల్ కేటగిరీలో ఉన్నవారు తాము స్వయంగా వచ్చి అమ్మవారిని దర్శించుకోవచ్చు కానీ వారు సిఫార్సు చేసిన వ్యక్తులకు అనుమతి ఉండదు.

సామాన్య భక్తులకు ఇబ్బంది ఉండదు

ఈ నిబంధనలు కేవలం సిఫార్సు లేఖలు తీసుకొచ్చినవారికి మాత్రమే..సామాన్య భక్తులకు ఎలాంటి ఆంక్షలు ఉండబోవని దేవస్థాన అధికారులు స్పష్టం చేశారు. సాధారణ, సత్వర దర్శన సౌకర్యాలు మామూలుగా కొనసాగుతాయన్నారు. భక్తులు ఎలాంటి ఇబ్బందులు ఎదుర్కోకుండా అమ్మవారిని సులువుగా దర్శించుకోవచ్చన్నారు. ఆలయ యంత్రాంగం సాధారణ భక్తుల సౌకర్యాలపై ప్రత్యేక దృష్టి సారించి దర్శన వ్యవస్థను సజావుగా నిర్వహించనుంది.

ఎన్నికల కోడ్ ముగిసేవరకూ..

ఎన్నికల ప్రవర్తనా నియమావళి ముగిసేవరకూ ఈ ఆంక్షలు అమల్లో ఉంటాయని ఈవో స్పష్టం చేశారు. ప్రజాప్రతినిధులు, ప్రముఖులు వారి ద్వారా వచ్చే భక్తులు ఈ విషయాన్ని గమనించి ఆలయ యంత్రాంగంతో పూర్తి స్థాయిలో సహకరించాలని విజ్ఞప్తి చేశారు. ఎన్నికల కాలంలో ఆలయ అధికారులు నిష్పక్షపాతంగా పనిచేయాలని, ఎలాంటి రాజకీయ ప్రభావం లేకుండా భక్తుల సేవను కొనసాగించాలనే దేవస్థానం లక్ష్యంగా పెట్టుకుంది

జీవిత భాగస్వామిగా 'అతను' లేదా 'ఆమె' ఎందుకు వచ్చారు? ఇది యాదృచ్ఛికమా, కర్మఫలమా? గరుడ పురాణంలో ఏముంది?

ఇంద్రకీలాద్రి కనకదుర్గ అమ్మవారిని కేవలం తెలుగు రాష్ట్రాల భక్తులు మాత్రమే కాదు ఇతర రాష్ట్రాల నుంచి వేలాది భక్తులు తరలివచ్చి అమ్మను దర్శించుకుంటారు. ఎన్నికల కోడ్ అమల్లో ఉన్నప్పుడు ఇలాంటి నిర్ణయాలు తీసుకోవడం ద్వారా ఆలయం తమమ నిష్పక్షపాత వైఖరిని స్పష్టం చేసుకుందని, సిఫార్సు లేఖలను ఆపేయడం వల్ల సాధారణ భక్తులు మరింత సులుభంగా దర్శనం చేసుకోగలకనే అభిప్రాయాలు వ్యక్తమవుతున్నాయి.

ఆలయ అధికారులు భక్తులకు విజ్ఞప్తి చేస్తూ..ఎన్నికల కోడ్ అమలు సమయంలో ఆలయ నియమాలు పాటించాలని, అనవసరమైన సిఫార్సు లేఖలు తీసుకురాకుండా వచ్చి దర్శనం చేసుకోవాలని కోరారు.ఈ నిర్ణయం ఎన్నికల ప్రవర్తనా నియమావళి పట్ల ఆలయ యంత్రాంగం చూపుతున్న గౌరవాన్ని స్పష్టం చేస్తోందని..భక్తులు ఈ విషయాన్ని అర్థం చేసుకుని నిబంధనలు అనుసరించాలని కోరారు దేవస్థాన అధికారులు. ఎన్నికల కోడ్ ముగిసిన తర్వాత పరిస్థితులను పరిశీలించి తదుపరి నిర్ణయాలు తీసుకుంటామని చెప్పారు.

ఇంద్రకీలాద్రి దసరా 2026: పోటెత్తిన భక్తులు, 35 లక్షల లడ్డూలు, సరికొత్త రికార్డు!

RAMA — Thu, 22 Oct 2026 05:00:26 +0530

Vijayawada: ఇంద్రకీలాద్రి అక్టోబర్ 2026: విజయవాడ శ్రీ దుర్గా మల్లేశ్వర స్వామి వారి దేవస్థానంలో శరన్నవరాత్రి ఉత్సవాలు వైభవంగా జరిగాయ్. దసరా మహోత్సవాల సందర్భంగా శ్రీ కనకదుర్గ అమ్మవారి దర్శనార్థం భారీగా భక్తులు తరలివచ్చారు. లడ్డూ ప్రసాదం విక్రయాల్లో సరికొత్త రికార్డును నమోదు చేశాయి. దుర్గమ్మ దర్శనార్థం వచ్చిన లక్షల మంది భక్తులకు ఎటువంటి కొరత రాకుండా దేవాదాయ శాఖ కమిషనర్ పర్యవేక్షణతో దేవస్థానం పకడ్బందీ ప్రణాళికతో లడ్డూ ప్రసాదాన్ని అందుబాటులో ఉంచింది.

జీవిత భాగస్వామిగా 'అతను' లేదా 'ఆమె' ఎందుకు వచ్చారు? ఇది యాదృచ్ఛికమా, కర్మఫలమా? గరుడ పురాణంలో ఏముంది?

ఉత్సవాలు ప్రారంభమైన అక్టోబర్ 11 నుంచి అక్టోబర్ 21 దసరా మరుసటి రోజువరకూ భక్తుల రద్దీ ఇలా ఉంది

శరన్నవరాత్రి ఉత్సవాల్లో భాగంగా 10 రోజులలో మొత్తం 15,05,359 మంది భక్తులు అమ్మవారిని దర్శించుకోగా.. అక్టోబర్ 21 రాత్రి 7 గంటల సమయానికి సుమారు 1,55,000 మంది భక్తులు దర్శనం చేసుకున్నారు. దీంతో ఇప్పటివరకు మొత్తం 11 రోజుల్లో కనకదుర్గమ్మను దర్శించుకున్న భక్తుల సంఖ్య 16,60,359 కి చేరింది.

Garuda Purana: 'గరుడ పురాణం - టిబెటన్ బుక్ ఆఫ్ ది డెడ్' రెండూ ఒకటేనా? ఆత్మల గురించి ఏ పుస్తకంలో ఏముంది?

రోజువారీ భక్తుల దర్శనాల వివరాలు ఇలా ఉన్నాయ్..

ఆశ్వయుజ శుద్ధ పాడ్యమి మొదటి రోజు (11-10-2026): 1,47,242 మంది భక్తులు

ఆశ్వయుజ శుద్ధ విదియ రెండవ రోజు (12-10-2026): 1,50,437 మంది భక్తులు

ఆశ్వయుజ శుద్ధ తదియ మూడవ రోజు (13-10-2026): 1,44,467 మంది భక్తులు

ఆశ్వయుజ శుద్ధ చవితి నాలుగవ రోజు (14-10-2026): 1,17,802 మంది భక్తులు

ఆశ్వయుజ శుద్ధ పంచమి ఐదవ రోజు (15-10-2026): 1,27,178 మంది భక్తులు

ఆశ్వయుజ శుద్ధ షష్టి ఆరవ రోజు (16-10-2026): 2,32,258 మంది భక్తులు

ఆశ్వయుజ శుద్ధ సప్తమి ఏడవ రోజు (17-10-2026): 1,32,018 మంది భక్తులు

ఆశ్వయుజ శుద్ధ అష్టమి ఎనిమిదవ రోజు (18-10-2026): 1,54,871 మంది భక్తులు

ఆశ్వయుజ శుద్ధ నవమి తొమ్మిదవ రోజు (19-10-2026): 1,47,354 మంది భక్తులు

ఆశ్వయుజ శుద్ధ దశమి పదవ రోజు (20-10-2026): 1,51,732 మంది భక్తులు

ఆశ్వయుజ శుద్ధ ఏకాదశి పదకొండవ రోజు (21-10-2026): రాత్రి 7:00 గంటల వరకు 1,55,000 మంది భక్తులు

భక్తులకు ఎలాంటి అసౌకర్యం కలగకుండా క్యూలైన్లలో పటిష్టమైన ఏర్పాట్లు, మంచినీరు, ప్రసాదం పంపిణీ నిరంతరాయంగా కొనసాగుతున్నాయి. భక్తులు దేవస్థాన నిబంధనలు పాటిస్తూ ప్రశాంతంగా దర్శనాలు పూర్తి చేసుకుంటున్నారు.

Garuda Purana: మీరు స్వర్గానికి వెళతారా? నరకానికా? గరుడ పురాణం చెప్పిన ఈ రహస్యాలు తెలుసుకుంటే మీకే అర్థమవుతుంది!

లడ్డూ ప్రసాదం విక్రయాల్లో సరికొత్త రికార్డ్

ఈ ఏడాది దసరా శరన్నవరాత్రి మహోత్సవాల్లో లడ్డూ ప్రసాదం విక్రయాల్లో సరికొత్త రికార్డు...10 రోజుల్లో రికార్డు స్థాయిలో 30,69,048 లడ్డూల విక్రయం జరిగింది. ఈ సంఖ్య గతేడాది కన్నా 7.49 లక్షలు అధికం. ఇక 11వ రోజైన నేడు సాయంత్రం 6:00 గంటల వరకు 5,08,676 లడ్డూలు విక్రయం జరిగింది. ఇప్పటివరకూ విక్రయించిన లడ్డూల సంఖ్య 35,77,724. భక్తుల రద్దీకి అనుగుణంగా ఎలాంటి కొరత లేకుండా నిరంతరాయంగా లడ్డూ ప్రసాదం అందిస్తున్నారు దేవస్థానం అధికారులు.

2026 అక్టోబర్ 21-31 : ఈ 11 రోజులు మేషం, వృషభం, మిథునం, కర్కాటక రాశుల భవిష్యత్తు ఎలా ఉండబోతోంది?

CM Chandrababu: రెబల్స్‌పై వేటు తప్పదు.. సీఎం చంద్రబాబు వార్నింగ్.. సుప్రీం ఆదేశాలపై టీడీపీ స్పష్టత

Satyaprasad Bandaru — Wed, 21 Oct 2026 17:51:38 +0530

CM Chandrababu: ఏపీలో స్థానిక సంస్థల ఎన్నికలు ఉత్కంఠ వాతావరణం జరుగుతున్నాయి. టీడీపీ అధినేత, సీఎం చంద్రబాబు పార్టీ నేతలకు తీవ్ర హెచ్చరిక జారీ చేశారు. స్థానిక ఎన్నికల బరిలో రెబల్ అభ్యర్థులు ఉంటే పార్టీ నుంచి సస్పెన్షన్ వేటు తప్పదని తేల్చిచెప్పారు. అదే సమయంలో, మున్సిపల్ ఎన్నికల నామినేషన్ల అంశంలో సుప్రీంకోర్టు ఇచ్చిన తీర్పుపై వైసీపీ తప్పుడు ప్రచారం చేస్తోందని టీడీపీ తెలిపింది.

రెబల్స్ పై వేటు

స్థానిక ఎన్నికల ప్రచారం, ఎంపీటీసీ, జడ్పీటీసీ అభ్యర్థుల ఎంపికపై సీఎం చంద్రబాబు పార్టీ ముఖ్యనేతలతో టెలికాన్ఫరెన్స్ నిర్వహించారు. ఈ సందర్భంగా ఆయన పలు కీలక సూచనలు చేశారు. బరిలో ఉన్న రెబల్ అభ్యర్థులతో మాట్లాడి నామినేషన్లను వెంటనే విత్ డ్రా చేసుకోవాలని స్పష్టం చేశారు. జనసేన, బీజేపీ అభ్యర్థులు పోటీలో ఉన్న స్థానాల్లో కూడా టీడీపీ రెబల్స్ లేకుండా చూడాలని ఆదేశించారు. క్షేత్రస్థాయిలో సీట్ల సర్దుబాటు సాఫీగా సాగేలా కూటమి నేతలు సమన్వయంతో వ్యవహరించాలని పిలుపునిచ్చారు. టికెట్లు దక్కని ఆశావహులకు భవిష్యత్తులో నామినేటెడ్ పదవుల్లో తగిన గుర్తింపు ఇస్తామని, ప్రజలకు సేవ చేసే మంచి అభ్యర్థులనే ఎంపిక చేయాలని దిశానిర్దేశం చేశారు.

చెప్పాం.. చేస్తున్నాం.. నినాదంతో

సార్వత్రిక ఎన్నికల సమయంలో ఇచ్చిన హామీలను ప్రభుత్వం నెరవేరుస్తోందని, సంక్షేమం, అభివృద్ధి కార్యక్రమాలను ‘చెప్పాం.. చేస్తున్నాం’ అనే నినాదంతో ప్రజల్లోకి తీసుకెళ్లాలని నాయకులకు చంద్రబాబు సూచించారు. స్థానిక ఎన్నికల్లోనూ ప్రజల ఆశీర్వాదం పొందేలా ప్రతి ఒక్కరూ కష్టపడి పనిచేయాలని పిలుపునిచ్చారు.

Also Read: పల్నాడు, కడప, అన్నమయ్య జిల్లాల్లో మళ్లీ ఉద్రిక్తత.. పలుచోట్ల టీడీపీ, వైసీపీ రాళ్ల దాడులు

సుప్రీంకోర్టు తీర్పుపై వైసీపీ దుష్ప్రచారం

మున్సిపల్ ఎన్నికల నామినేషన్లపై సుప్రీంకోర్టు ఇచ్చిన ఆదేశాలపై వైసీపీ తప్పుడు కథనాలను ప్రచారం చేస్తోందని టీడీపీ ఆరోపించింది. 19 ప్రాంతాల్లో నామినేషన్ల గడువును పెంచినట్లు వైసీపీ చేస్తోన్న ప్రచారంలో నిజం లేదని స్పష్టం చేశారు. ఆయా ప్రాంతాల్లో అందిన ఫిర్యాదులను మాత్రమే పునఃపరిశీలించాలని సుప్రీంకోర్టు సూచించిందని చెప్పారు. తిరస్కరించిన నామినేషన్లు లేదా మళ్లీ స్వీకరణపై తుది నిర్ణయం రాష్ట్ర ఎన్నికల సంఘానిదే అని సుప్రీంకోర్టు చెప్పిందని పేర్కొంది. ఎన్నికల నిర్వహణపై సుప్రీంకోర్టు ఎలాంటి అభ్యంతరాలు వ్యక్తం చేయలేదని టీడీపీ స్పష్టం చేసింది.

Also Read: కుప్పం మున్సిపల్ ఎన్నికలు: 11 వార్డుల్లో టీడీపీ ఏకగ్రీవం, పార్టీ శ్రేణుల సంబరాలు

Sharmila: విజయసాయిరెడ్డి ఇంటికి వెళ్లిన వైఎస్ షర్మిల.. కుమార్తె వివాహానికి ఆహ్వానం

Shankar Dukanam — Wed, 21 Oct 2026 17:49:30 +0530

Sharmila Daughter Anjalis Wedding | విజయవాడ: ఏపీ కాంగ్రెస్ చీఫ్ వైఎస్ షర్మిల తన కుమార్తె వివాహ వేడుకకు సంబంధించి ఆహ్వానాలు అందజేస్తున్నారు. ఇదివరకే తెలుగు రాష్ట్రాల్లో పలువురు ప్రముఖులతో పాటు తమిళనాడు సీఎం జోసెఫ్ విజయ్‌ని తన కుమార్తె అంజిలిరెడ్డి వివాహానికి ఆహ్వానించారు. తాజాగా మాజీ ఎంపీ విజయసాయిరెడ్డిని తన కుమార్తె వివాహ వేడుకకు హాజరుకావాలని ఆహ్వానించారు. విజయసాయిరెడ్డి నివాసానికి వెళ్లిన షర్మిలకు ఆయన కుటుంబసభ్యులు ఆత్మీయ స్వాగతం పలికారు. నవంబర్ 25న అంజిలిరెడ్డి, రఘురామ్ రెడ్డిల వివాహానికి హాజరై కొత్త జంటను ఆశీర్వదించాలని కోరారు.

వెడ్డింగ్ కార్డ్ ఇవ్వడానికి షర్మిల వచ్చి తమ కుటుంబాన్ని వివాహ వేడుకకు ఆహ్వానించారని విజయసాయిరెడ్డి తెలిపారు. ఈ మేరకు పలు ఫొటోలు ఎక్స్ ఖాతాలో పోస్ట్ చేశారు. డాక్టర్‌ YSR మనుమరాలు, షర్మిలమ్మ కుమార్తె అంజిలి Wedding Invitation ఇచ్చి కుటుంబ సమేతంగా వచ్చి వధూవరులను ఆశీర్వదించాల్సిందిగా ఆహ్వానించారని పోస్టులో పేర్కొన్నారు.

డాక్టర్‌ వైయస్సార్‌గారి మనుమరాలు, శ్రీమతి షర్మిలమ్మ కుమార్తె అయిన “చిరంజీవి అంజిలి” “Wedding Invitation” ఇచ్చి కుటుంబ సమేతంగా వచ్చి వధూవరులను ఆశీర్వదించాల్సిందిగా శ్రీమతి షర్మిలమ్మ ఈరోజు ఆహ్వానించారు. https://t.co/SD7gKq1Q5L
— Vijayasai Reddy V (@VSReddy_MP) October 21, 2026

అంజిలి రెడ్డి - సోమల రఘురామ్ రెడ్డిల ఎంగేజ్‌మెంట్ సెప్టెంబర్ 24న ఘనంగా నిర్వహించారు. నవంబర్ 25న వివాహం జరిపించాలని రెండు కుటుంబాల పెద్దలు నిశ్చయించారు. అలాగే డిసెంబర్ 5న రిసెప్షన్ నిర్వహించనున్నట్లు ఇదివరకే వెల్లడించారు.

సెప్టెంబర్ 24న గ్రాండ్‌గా ఎంగేజ్‌మెంట్

ఏపీసీసీ అధ్యక్షురాలు వైఎస్ షర్మిల, బ్రదర్ అనిల్ దంపతుల కుమార్తె వైఎస్ అంజిలి రెడ్డి నిశ్చితార్థ వేడుక సెప్టెంబర్ 24న అత్యంత వైభవంగా జరిగింది. ఇరు కుటుంబ సభ్యులు, కొద్దిమంది ముఖ్య ప్రముఖుల సమక్షంలో వైఎస్ అంజిలి రెడ్డి - సోమల రఘురామ్ రెడ్డిల నిశ్చితార్థ కార్యక్రమం ఘనంగా నిర్వహించారు.

ఈ శుభకార్యానికి తెలంగాణ ముఖ్యమంత్రి రేవంత్ రెడ్డి తన సతీమణి గీతతో కలిసి హాజరై కాబోయే వధూవరులను ఆశీర్వదించారు. సీఎం రేవంత్ రెడ్డితో పాటు పలువురు రాష్ట్ర మంత్రులు, విపక్ష నాయకులు ఈ వేడుకకు విచ్చేసి నూతన జంటకు శుభాకాంక్షలు తెలిపారు. నిశ్చితార్థం పూర్తయిన అనంతరం వైఎస్ షర్మిల సోషల్ మీడియాలో కుమార్తెను ఉద్దేశించి ఒక భావోద్వేగమైన సందేశాన్ని పంచుకోగా, ఈ వేడుక వీడియోలు నెట్టింట వైరల్‌గా మారాయి.

AP MPTC ZPTC Elections: పల్నాడు, కడప, అన్నమయ్య జిల్లాల్లో మళ్లీ ఉద్రిక్తత.. పలుచోట్ల టీడీపీ, వైసీపీ రాళ్ల దాడులు

Shankar Dukanam — Wed, 21 Oct 2026 14:22:29 +0530

అమరావతి: ఏపీలో ఎంపీటీసీ, జెడ్పీటీసీ ఎన్నికల నామినేషన్లు ప్రారంభమైన తొలిరోజే పలు జిల్లాల్లో ఉద్రిక్తతలు చోటుచేసుకున్నాయి. పల్నాడు జిల్లాలోని నరసరావుపేట, మాచర్ల, ముప్పాళ్ల ప్రాంతాల్లో ఎంపీటీసీ, జడ్పీటీసీ నామినేషన్ల దాఖలు సందర్భంగా తీవ్ర ఉద్రిక్త పరిస్థితులు నెలకొన్నాయి. అభ్యర్థులు నామినేషన్లు దాఖలు చేయడానికి వెళ్తున్న సమయంలో టీడీపీ, వైసీపీ శ్రేణుల మధ్య తీవ్ర వాగ్వాదం, తోపులాట చోటుచేసుకుంది. ఇరువర్గాలు ఒకరిపైకొకరు పోటీపడి నినాదాలు చేసుకుని, చివరికి దాడులకు దిగడంతో నామినేషన్ కేంద్రాల వద్ద తీవ్ర ఘర్షణ వాతావరణం ఏర్పడింది. సమాచారం అందుకున్న పోలీసులు తక్షణమే రంగంలోకి దిగి, పరిస్థితిని అదుపులోకి తెచ్చేందుకు ఇరువర్గాల నాయకులను, కార్యకర్తలను చెదరగొట్టారు.

పుంగనూరులో వైసీపీ, టీడీపీ వర్గీయుల మధ్య రాళ్ల దాడి

స్థానిక సంస్థల (ఎంపీటీసీ, జడ్పీటీసీ) నామినేషన్ల పర్వం అన్నమయ్య జిల్లాల్లోనూ పలుచోట్ల తీవ్ర ఉద్రిక్తతలకు దారితీసింది. అన్నమయ్య జిల్లా పుంగనూరులోని మున్సిపల్ హైస్కూల్ సమీపంలో వైసీపీ, టీడీపీ వర్గీయుల మధ్య చెలరేగిన వివాదం పరస్పరం రాళ్ల దాడికి దారితీసింది. అప్రమత్తమైన పోలీసులు వెంటనే రంగంలోకి దిగి పరిస్థితిని అదుపులోకి తెచ్చారు.

మరోవైపు కడప జిల్లా పరిషత్ కార్యాలయం వద్ద సైతం టీడీపీ, వైసీపీ కార్యకర్తలు పరస్పరం దాడులకు దిగారు. ఈ క్రమంలో గుర్తుతెలియని వ్యక్తులు వారిపై రాళ్లు రువ్వడంతో అక్కడ భయాందోళన వాతావరణం నెలకొంది. పల్నాడు జిల్లా నరసరావుపేట ఆర్డీవో ఆఫీసులోని నామినేషన్ కేంద్రం వద్ద పిడుగురాళ్ల జడ్పీటీసీ వైసీపీ అభ్యర్థి భారతి, ఆమె భర్త లక్ష్మారెడ్డిపై ప్రత్యర్థులు దాడికి పాల్పడ్డారు. గాయాలపాలైన లక్ష్మారెడ్డిని చికిత్స నిమిత్తం ఆస్పత్రికి తరలించారు.

పల్నాడు జిల్లాలో నేతల హౌస్ అరెస్టులు

ఎంపీటీసీ, జడ్పీటీసీ నామినేషన్ల ప్రక్రియ సందర్భంగా పల్నాడు జిల్లాలో ఎలాంటి అవాంఛనీయ ఘటనలు జరగకుండా పోలీసులు ముందస్తు చర్యలు చేపట్టారు. పలువురు కీలక వైసీపీ నేతలను గృహనిర్బంధం చేయడంతో పాటు మరికొందరిని అదుపులోకి తీసుకున్నారు. మాచర్లలో మాజీ ఎమ్మెల్యే పిన్నెల్లి రామకృష్ణారెడ్డిని, పిడుగురాళ్లలో గురజాల మాజీ ఎమ్మెల్యే కాసు మహేశ్‌రెడ్డిని, వినుకొండలో మాజీ ఎమ్మెల్యే బొల్లా బ్రహ్మనాయుడిని బయటకు రాకుండా పోలీసులు వారి నివాసాల్లోనే హౌస్ అరెస్ట్ చేశారు. నరసరావుపేట నియోజకవర్గంలో పల్నాడు జిల్లా రైతు విభాగం అధ్యక్షుడు అన్నెం పున్నారెడ్డి సహా రొంపిచర్ల మండలానికి చెందిన మాజీ సర్పంచ్‌లు, స్థానిక నేతల నివాసాల వద్ద పోలీసు పహారా ఏర్పాటు చేసి, శాంతిభద్రతలను పరిరక్షించేందుకు భద్రతను కట్టుదిట్టం చేశారు.

Also Read: AP Local Body Election: నామినేషన్ దాఖలు పొడిగింపుపై ఏపీ ఎస్ఈసీకి సుప్రీంకోర్టు కీలక ఆదేశాలు

నరసరావుపేటలో వైయస్‌ఆర్‌సీపీ జెడ్పీటీసీ అభ్యర్థిగా నామినేషన్ వేయడానికి వస్తే.. టీడీపీ గూండాలు దాదాపు 10 మంది నా చీర లాగి వివస్త్రను చేయడానికి ప్రయత్నించారని వంగా పద్మావతి ఆరోపించారు. నామినేషన్ పత్రాలతో పాటు హ్యాండ్ బ్యాగ్‌ను కూడా రోడ్డుపైనే చించేశారని ఆవేదన వ్యక్తం చేశారు.

ప్రొద్దుటూరులో ఎమ్మెల్సీ రమేష్ యాదవ్ ని పోలీసులు హౌస్ అరెస్ట్ చేశారు. జెడ్పీటిసి, ఎంపీటీసీ నామినేషన్ వేయకుండా వైసీపీ అభ్యర్థులను అడ్డుకునేందుకు కుట్రలు చేస్తున్నారని ఆరోపించారు. అభ్యర్థులకి మద్దతుగా వెళ్లాలని చూస్తున్న రమేష్ యాదవ్ కి నోటీసులు ఇచ్చి హౌస్ అరెస్ట్ చేశారని పార్టీ నేతలు అంటున్నారు.

AP Local Body Election: నామినేషన్ దాఖలు పొడిగింపుపై ఏపీ ఎస్ఈసీకి సుప్రీంకోర్టు కీలక ఆదేశాలు

Shankar Dukanam — Wed, 21 Oct 2026 12:27:03 +0530

AP Urban Local Bodies Election | న్యూఢిల్లీ: ఆంధ్రప్రదేశ్‌లో మున్సిపల్ ఎన్నికల నామినేషన్ల దాఖలుపై సుప్రీంకోర్టు కీలక తీర్పునిచ్చింది. శాంతిభద్రతల సమస్యల కారణంగా అభ్యర్థులు నామినేషన్లు వేయలేకపోయారని భావించే ప్రాంతాల్లో, నామినేషన్ల గడువును పొడిగించే అంశంపై గురువారంలోగా నిర్ణయం తీసుకోవాలని రాష్ట్ర ఎన్నికల కమిషన్ ను ఆదేశించింది. వైఎస్సార్‌సీపీ (YSRCP) సమర్పించిన వినతులు, వీడియో ఆధారాలను పరిశీలించి నిర్ణయం ప్రకటించాలని స్పష్టం చేసింది. ఈ ఆదేశాలతో ఏపీలో మున్సిపల్ ఎన్నికల వేళ రాజకీయ వేడి మరింత పెరిగింది. నామినేషన్లు దాఖలు చేసేందుకు గడువు ముగిసినా, కొన్ని చోట్ల తమ అభ్యర్థులు నామినేషన్లు వేయకుండా అడ్డుకున్నారని వైసీపీ ఆరోపిస్తోంది. హింస, బెదిరింపుల కారణంగా కొన్నిచోట్ల పోటీకి దూరంగా ఉండాల్సి వచ్చిందంటూ.. గడువు పొడిగించాలని సుప్రీంకోర్టును ఆశ్రయించింది.

అభ్యర్థుల తుది జాబితా 25కి వాయిదా

వైసీపీ దాఖలు చేసిన పిటిషన్‌ను విచారించిన జస్టిస్ జోయ్‌మల్య బాగ్చి, జస్టిస్ వి. మోహనలతో కూడిన ప్రత్యేక ధర్మాసనం ఈ ఆదేశాలు జారీ చేసింది. అక్టోబర్ 21న విడుదల కావాల్సిన అభ్యర్థుల తుది జాబితా ప్రచురణను నిలిపివేసి.. అక్టోబర్ 25వ తేదీ వరకు వాయిదా వేయాలని ఎస్‌ఈసీని కోరింది. ఒకవేళ నామినేషన్ల సమయాన్ని పొడిగించాలని ఎస్‌ఈసీ నిర్ణయిస్తే, ఆ ప్రకటన వెలువడిన సమయం నుండి మరో 48 గంటల పాటు అదనపు గడువు ఇవ్వాలని సుప్రీంకోర్టు స్పష్టం చేసింది. నామినేషన్ కేంద్రాల వద్ద అభ్యర్థులకు తగిన రక్షణ కల్పించాలని, పోలీసు బందోబస్తు పెంచాలని, సీసీటీవీ నిఘా ఏర్పాటు చేయాలని ఏపీ డీజీపీని ధర్మాసనం ఆదేశించింది. నామినేషన్ల గడువు పొడిగింపుపై హైకోర్టు నిరాకరించడంతో వైసీపీ సుప్రీంకోర్టును ఆశ్రయించింది. ఈ వ్యవహారానికి సంబంధించి ఎస్‌ఈసీ, రాష్ట్ర ప్రభుత్వం తగిన నివేదికలు సమర్పించాలని పేర్కొంటూ తదుపరి విచారణను అక్టోబర్ 27కి వాయిదా వేసింది.

స్వేచ్ఛగా, పారదర్శకంగా ఎన్నికలు నిర్వహించడమే ప్రాథమిక రాజ్యాంగ సూత్రమని సుప్రీంకోర్టు ధర్మాసనం వ్యాఖ్యానించింది. ప్రజాస్వామ్యంలో పోటీ చేసే అభ్యర్థులు అడ్డంకులు లేకుండా నామినేషన్లు వేయడం ఎన్నికల ప్రక్రియలో అత్యంత కీలకమని తెలిపింది. సాధారణంగా ఎన్నికల నిర్వహణలో న్యాయస్థానాలు జోక్యం చేసుకోనప్పటికీ, ఒక ప్రధాన ప్రతిపక్ష పార్టీ ఆధారాలతో సహా అభ్యంతరాలు వ్యక్తం చేసినప్పుడు, స్వేచ్ఛా ఎన్నికలకు భంగం కలిగే పరిస్థితులు ఉన్నప్పుడు న్యాయసమీక్ష చేసే అధికారం రాజ్యాంగ వ్యవస్థలకు ఉంటుందని ధర్మాసనం పేర్కొంది. సమర్పించిన ఆధారాలను పరిశీలించిన మీదట వైఎస్సార్‌సీపీ విజ్ఞప్తిలో ప్రాథమికంగా వాస్తవం ఉందని భావిస్తూ ఈ ఉత్తర్వులు జారీ చేసినట్లు తెలిపింది.

నామినేషన్లు వేయకుండా అడ్డుకున్నారని, బలవంతపు ఏకగ్రీవాలు/ ఘర్షణలు జరిగాయని వైఎస్సార్‌సీపీ తమ పిటిషన్‌లో పేర్కొన్న సమస్యాత్మక ప్రాంతాలు:

కనిగిరి
దర్శి
పుంగనూరు
రాయచోటి
రాజంపేట
మైదుకూరు
ఎర్రగుంట్ల
ప్రొద్దుటూరు
పిడుగురాళ్ల
మాచర్ల
గురజాల
దాచేపల్లి
కమలాపురం
చిలకలూరిపేట
సత్తెనపల్లి
వినుకొండ
ఆళ్లగడ్డ
నగరి
తాడిపత్రి
సుప్రీంకోర్టు ఆదేశాల ప్రకారం ఈ 19 మున్సిపాలిటీలకు సంబంధించి నామినేషన్లపై రాష్ట్ర ఎన్నికల సంఘం (SEC) మరోసారి పరిశీలించనుంది.

ఎన్నికల నిర్వహణ అనేది రాష్ట్ర ఎలక్షన్ కమిషన్ SEC పరిధిలోని అంశమని.. ఇందులో కోర్టులు జోక్యం చేసుకోరాదని SEC తరపు న్యాయవాది పరమేశ్వరన్, ప్రభుత్వం తరపు న్యాయవాది ముకుల్ రోహత్గీ వాదనలు వినిపించారు. ప్రతిపక్షానికి ఎన్నికల్లో ఆసక్తి లేదని, తమ సానుకూల మీడియా నేరేటివ్ కోసం ప్రయత్నిస్తున్నారని చెప్పారు. దీనిని ధర్మాసనం ఎన్నటికీ అంగీకరించలేదు. దాదాపు 63శాతం మంది అభ్యర్థులు పిటిషన్ దాఖలు చేశారని.. దీనర్థం అన్ని చోట్ల ఏకగ్రీవాలు కాబోతున్నాయని కోర్టు అభిప్రాయపడింది. హింస జరిగినట్లు, నామినేషన్ పత్రాలు లాక్కెల్లినట్లు వీడియోలు ఉన్నాయని.. ఇవన్నీ YSRCP పిటిషన్‌ను అంగీకరించేందుకు కారణమవుతున్నాయని సుప్రీంకోర్టు తెలిపింది. ఎన్నికల నిర్వహణ SEC పరిధిలోని అంశమైనప్పటికీ... ఎన్నికలు స్వేచ్చగా, పక్షపాతం లేకుండా నిర్వహించడం రాజ్యాంగ ధర్మమని.. ఆ స్ఫూర్తి అమలయ్యేలా చూడటం కోర్టుల కర్తవ్యమని ధర్మాసనం స్పష్టం చేసింది.

ఈ వివాదానికి కారణమేంటి..?

అక్టోబర్ 16 నుంచి 18 వరకు జరిగిన మున్సిపల్, నగర పంచాయతీ ఎన్నికల నామినేషన్ల ప్రక్రియలో.. పుంగనూరు, రాయచోటి సహా పలు ప్రాంతాల్లో హింసాత్మక ఘటనలు చోటుచేసుకున్నాయని వైసీపీ ఆరోపించింది. తమ అభ్యర్థులపై దాడులు చేశారని, నామినేషన్ పత్రాలను లాక్కొని చించేశారని, కొన్ని చోట్ల నామినేషన్ కేంద్రాలకు వెళ్లకుండా అడ్డుకున్నారని ఆ పిటిషన్‌లో పేర్కొంది.

ఈ పరిస్థితుల్లో నామినేషన్ల గడువు పొడిగించడంతో పాటు, అభ్యర్థులకు రక్షణ కల్పించాలని వైసీపీ కోరింది. ప్రభావిత వార్డుల్లో ఏకగ్రీవ ఎన్నికల ప్రకటనలను నిలిపివేయాలని కూడా విజ్ఞప్తి చేసింది. ఈ అంశంపై ఏపీ హైకోర్టును ఆశ్రయించిన వైసీపీకి నిరాశ ఎదురైంది. నామినేషన్ల గడువు ముగిసిన తర్వాత దాన్ని పొడిగించాలని ఆదేశించడం ఎన్నికల ప్రక్రియలో జోక్యం చేసుకోవడమే అవుతుందని అక్టోబర్ 18న ఏపీ హైకోర్ట్ అభిప్రాయపడింది. దీనిపై చివరి అస్త్రంగా YSRCP సుప్రీంకోర్టులో స్పెషల్ లీవ్ పిటిషన్ దాఖలు చేసింది.

Vijayawada Gold Smuggling: విజయవాడలో రూ.5.84 కోట్ల విలువైన బంగారం, విదేశీ కరెన్సీ సీజ్.. బంగ్లాదేశ్ నుంచి హైదరాబాద్‌కు

Shankar Dukanam — Wed, 21 Oct 2026 10:59:45 +0530

విజయవాడ: బంగ్లాదేశ్ నుంచి అక్రమంగా హైదరాబాద్‌కు తరలిస్తున్న బంగారం, కరెన్సీని అధికారులు స్వాధీనం చేసుకున్నారు. విజయవాడలో డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు 3 కేజీలకు పైగా బంగారంతో పాటు విదేశీ కరెన్సీని స్వాధీనం చేసుకున్నారు.

బంగ్లాదేశ్ నుంచి అక్రమంగా హైదరాబాద్‌కు తరలిస్తుండగా సమాచారం అందుకున్న అధికారులు ఆకస్మిక తనిఖీలు చేపట్టారు. ఈ క్రమంలో విజయవాడలో ఓ వాహనాన్ని తనిఖీ చేయగా కేజీల కొద్ది బంగారంతో పాటు 60 వేల అమెరికా డాలర్లు, 20 వేల వరకు యూరోల విదేశీ కరెన్సీని అధికారులు గుర్తించారు. స్వాధీనం చేసుకున్న బంగారం, విదేశీ కరెన్సీ మొత్తం విలువ సుమారు రూ. 5.84 కోట్లు ఉంటుందని డీఆర్‌ఐ అధికారులు వెల్లడించారు. ఈ అక్రమ రవాణా వెనుక ఉన్న ముఠా సభ్యులను అదుపులోకి తీసుకుని కేసు నమోదు చేశారు. ఈ ఘటనపై సమగ్ర విచారణ జరుపుతున్నారు.