vijayawada

AP Local Body Elections: ఏపీలో 23 పట్టణ స్థానిక సంస్థల ఎన్నికలకు నోటిఫికేషన్.. ఈ నెల 26న పోలింగ్

Satyaprasad Bandaru — Thu, 12 Nov 2026 13:11:10 +0530

AP Local Body Elections: రాష్ట్రంలో పెండింగ్ లో ఉన్న 23 పట్టణ స్థానిక సంస్థలకు నోటిఫికేషన్ విడుదలైంది. 4 కార్పొరేషన్, 19 మున్సిపాలిటీలకు ఈ నెల 14 నుంచి నామినేషన్లు స్వీకరించున్నట్లు ఎస్ఈసీ పునేఠా తెలిపారు. నవంబర్ 14 నుంచి నామినేషన్లు స్వీకరించనున్నారు. నవంబర్ 16 వరకు నామినేషన్లు స్వీకరిస్తారు. 17వ తేదీన నామినేషన్లు స్క్రూటినీ చేయనున్నారు. 19వ తేదీ వరకు నామినేషన్ల విత్ డ్రా ఉంటుంది. నవంబర్ 26న పోలింగ్, 30న కౌంటింగ్ ఉంటుందని ఎస్ఈసీ తెలిపారు. ఇటీవల 100 పట్టణ స్థానిక సంస్థల్లో ఎన్నికలు పూర్తయ్యాయి.

పంచాయతీ ఎన్నికలు

ఏపీలో పంచాయతీ ఎన్నికలను మూడు దశల్లో నిర్వహించనున్నట్లు ఎస్ఈసీ పునేఠా తెలిపారు. పంచాయతీ ఎన్నికల మొదటి విడత ఎన్నికలకు నవంబర్ 13న నోటిఫికేషన్ విడుదల చేయనున్నట్లు తెలిపారు. నవంబర్ 26న పోలింగ్, కౌంటింగ్ ఉంటుంది. రెండో విడత పంచాయతీ ఎన్నికలు నవంబర్ 29న , మూడో విడత ఎన్నికలు డిసెంబర్ 2న జరగనున్నాయి.

ఈ తాజా షెడ్యూల్‌లో రాష్ట్ర రాజకీయాలను శాసించే అత్యంత కీలకమైన కార్పొరేషన్లు, పట్టణాలు ఉండటం ఎన్నికల ప్రాధాన్యతను అమాంతం పెంచేసింది. శ్రీకాకుళం, కాకినాడ, రాజమహేంద్రవరం, మంగళగిరి–తాడేపల్లి వంటి నాలుగు ప్రతిష్టాత్మక కార్పొరేషన్లతో పాటు భీమవరం, తాడేపల్లిగూడెం, గుడివాడ, నరసరావుపేట, శ్రీకాళహస్తి సహా 15 మున్సిపాలిటీలు, 4 నగర పంచాయతీలలో అభ్యర్థుల భవితవ్యం తేలనుంది. నాలుగు కార్పొరేషన్లలోని 260 డివిజన్లు, 19 పురపాలక సంస్థలలోని 749 వార్డులకు రిజర్వేషన్ల ప్రక్రియ ఇప్పటికే కొలిక్కి రాగా.. మేయర్ పీఠాల కేటాయింపు ఆసక్తికరంగా మారింది. శ్రీకాకుళం, కాకినాడ మేయర్ స్థానాలను బీసీ మహిళలకు, రాజమహేంద్రవరాన్ని ఎస్సీ జనరల్‌కు, మంగళగిరి–తాడేపల్లి కార్పొరేషన్‌ను ఎస్టీ వర్గానికి రిజర్వ్ చేయడంతో ఆయా సామాజిక వర్గాల నేతలు టికెట్ల వేటలో నిమగ్నమయ్యారు.

ఎన్నికల సంఘం ఖరారు చేసిన క్యాలెండర్ ప్రకారం రేపు అంటే నవంబర్ 13 అధికారిక నోటిఫికేషన్ విడుదలై, నామినేషన్ల పర్వానికి తెరలేవనుంది. నవంబర్ 17 వరకు నామినేషన్లు స్వీకరించి, పరిశీలన, ఉపసంహరణ గడువు ముగిసిన అనంతరం నవంబర్ 26న పోలింగ్ నిర్వహించి, 30వ తేదీన ఫలితాలను ప్రకటిస్తారు. విశేషమేమిటంటే.. ఇదే నవంబర్ 26న రాష్ట్రంలో మూడు విడతల్లో జరగనున్న గ్రామ పంచాయతీ ఎన్నికల తొలి విడత పోలింగ్ కూడా జరగనుండటంతో, రేపటి నుంచే గ్రామీణ, పట్టణ ప్రాంతాల్లో ఒకేసారి ఎన్నికల జాతర మొదలుకాబోతోంది.

ఇప్పటికే 100 పురపాలక సంస్థల్లో తిరుగులేని ఆధిపత్యం ప్రదర్శించిన ఎన్డీయే కూటమి.. ఈ 23 స్థానాల్లోనూ క్లీన్ స్వీప్ చేసి తన పట్టును నిరూపించుకోవాలని పక్కా ప్రణాళికతో బరిలోకి దిగుతోంది. మరోవైపు, గత ఓటముల నుంచి తేరుకుని ఈ పెండింగ్ స్థానాల్లోనైనా గట్టి పోటీ ఇచ్చి ఉనికిని చాటుకోవాలని ప్రతిపక్ష వైఎస్సార్‌సీపీ వ్యూహాలు రచిస్తోంది. అటు పట్టణ డివిజన్లు, ఇటు పల్లె పంచాయతీలు ఒకేసారి సమరానికి సిద్ధమవుతుండటంతో నవంబర్ నెలాఖరు వరకు ఆంధ్రప్రదేశ్ రాజకీయం అత్యంత ఉత్కంఠభరితంగా సాగనుంది.

Vijayasai Reddy Politics:రెండు కుటుంబాల ఆధిపత్యానికి చెక్.. రాజకీయాల్లో మార్పులకు శ్రీకారం చుట్టాం: విజయసాయిరెడ్డి

Shankar Dukanam — Wed, 11 Nov 2026 19:24:31 +0530

Parivartan Rajniti Party | అమరావతి: ఆంధ్రప్రదేశ్ భవిష్యత్తు ఏ ఒక్క నేత చేతుల్లోనో, రెండు కుటుంబాల చేతుల్లోనో బంధీ కాకూడదని నూతన రాజకీయ ప్రయాణానికి శ్రీకారం చుట్టినట్లు మాజీ ఎంపీ విజయసాయిరెడ్డి (V Vijayasai Reddy) తెలిపారు. రాష్ట్రంలో సుదీర్ఘకాలంగా కొనసాగుతున్న కుటుంబ పాలనకు, అహంకారపు నాయకత్వానికి స్వస్తి పలకడమే ఈ పార్టీ ప్రధాన లక్ష్యం అన్నారు. తన రాజకీయ పార్టీ పేరు పరివర్తన రాజనీతి పార్టీ అని విజయవాడ వేదికగా ప్రకటించారు. అనంతరం విజయసాయిరెడ్డి మాట్లాడుతూ.. పదవులు, వారసత్వాలు తాత తండ్రుల నుండి కాకుండా కష్టం, అనుభవం ద్వారా సాధించుకోవచ్చని తన జీవితమే నిరూపించిందన్నారు.

వైసీపీ కోసం ఎంతో చేశా.. చివరికి అవమానాలు మిగిలాయి..

‘గతంలో వైఎస్సార్‌సీపీ నిర్మాణంలో ఇటుక ఇటుక పేర్చి కష్టపడిన నాకు చివరకు అవమానమే దక్కింది. నాయకత్వాన్ని గౌరవించడం విధేయత అనిపించుకుంటుంది. కానీ, అది బానిసత్వం కాకూడదు. 2019లో 151 స్థానాలు ఇచ్చిన రాష్ట్ర ప్రజలు, 2024 అసెంబ్లీ వైఎస్సార్‌సీపీని 11 సీట్లకే ఎందుకు పరిమితం చేశారో మాజీ సీఎం వైఎస్ జగన్ ఆత్మపరిశీలన చేసుకోవాలి. ప్రజలు తిరస్కరించింది సంక్షేమాన్ని కాదు, కేవలం నాయకుడి అహంకారాన్ని.. కార్యకర్తలను దూరం చేసుకున్న రాజకీయ సంస్కృతిని’ అన్నారు.

వైసీపీ, టీడీపీ తీరుపై నిలదీత.. రాష్ట్ర అప్పులపై ఆందోళన

మరోవైపు, గత అసెంబ్లీ ఎన్నికలకు ముందు ఇచ్చిన హామీలను చంద్రబాబు నాయుడు ప్రభుత్వం విస్మరించినందుకు ప్రజలు నిలదీస్తున్నారని విజయసాయిరెడ్డి అన్నారు. వారు పోస్టర్లలో చూపించే అభివృద్ధి రియల్ టైంలో కనిపించడం లేదన్నారు. రాష్ట్ర అప్పులు పుష్కర కాలంలో లక్ష కోట్ల నుంచి దాదాపు 10 లక్షల కోట్లకు చేరాయే తప్ప సంపద సృష్టి జరగలేదు అన్నారు. ఉద్యోగాలు లేక యువత, గిట్టుబాటు ధర లేక రైతులు అల్లాడుతున్నారు. రౌడీయిజం, రెడ్ బుక్ రాజ్యాంగం, రాజకీయం పేరిట కక్షసాధింపు చర్యలు చేపడితే టీడీపీ నేతృత్వంలోని కూటమి ప్రభుత్వం పతనం తప్పదన్నారు. తిరుమల లడ్డూ వివాదం వంటి సున్నితమైన అంశాలను రాజకీయం చేస్తూ హిందువుల మనోభావాలతో ఆడుకోవడం అత్యంత శోచనీయం అన్నారు. మన పరివర్తన రాజనీతి పార్టీ (PRP) ఏ ఒక్కరికీ B టీమ్ కాదని, 5 కోట్ల ఆంధ్రుల ఆత్మగౌరవానికి మాత్రమే జవాబుదారీగా నిలుస్తుందన్నారు.

66 శాతం సీట్లు యువతకే..

‘2029 ఎన్నికల్లో రాష్ట్రంలోని అన్ని నియోజకవర్గాల్లో పోటీ చేసి విజయం సాధించడమే మా లక్ష్యం. సామాజిక న్యాయంలో భాగంగా బిసి, ఎస్సి, ఎస్టి, మైనారిటీ వర్గాలకు జెండాలు మోసేందుకే కాకుండా రాష్ట్ర ప్రభుత్వాన్ని నడిపే స్థాయిలో ప్రాతినిధ్యం కల్పిస్తాం. రాబోయే ఎన్నికల్లో 66 శాతం ఎమ్మెల్యే, ఎంపీ టికెట్లను జెన్-జీ (Gen-Z), యువతకే కేటాయిస్తామని మాటిస్తున్నాను. మన పార్టీ మేనిఫెస్టో కేవలం కాగితాలకే పరిమితం కాకుండా, ప్రతి 3 నెలలకోసారి ప్రభుత్వ ఆదాయ వ్యయాలపై శ్వేతపత్రం విడుదల చేసే పారదర్శక పాలన అందిస్తాం. తమిళనాడు తరహాలోనే ఆంధ్రప్రదేశ్‌లో కూడా మూడో ప్రత్యామ్నాయం సాధ్యమని నిరూపిస్తాం. అవినీతి రహిత, ప్రక్షాళన రాజకీయాలకు ఈ వేదిక ద్వారా నాంది పలుకుతున్నామని’ విజయసాయిరెడ్డి తన ప్రసంగంలో స్పష్టం చేశారు.

Pawan Gifted Property To Children: విడాకుల వేళ పవన్ కళ్యాణ్ మాజీ భార్య అన్నా, పిల్లల పేరిట ఆస్తులు చిట్టా వైరల్ !

Shankar Dukanam — Wed, 11 Nov 2026 17:30:01 +0530

అమరావతి: ఏపీ డిప్యూటీ సీఎం పవన్ కళ్యాణ్, అన్నా కొణిదెల దంపతులు విడిపోతున్నట్లు ప్రకటించారు. అనంతరం పవన్ నుంచి అన్నా లెజినోవాకు భరణం ఎంత వస్తుందని చర్చ జరుగుతోంది. ఈ క్రమంలో అన్నా లెజినోవాతో పాటు పిల్లలకు పవన్ కళ్యాణ్ ఎంత ఆస్తి ఇచ్చారు? అనే అంశం సోషల్ మీడియాలో హాట్ టాపిక్‌గా మారింది. పవన్ కళ్యాణ్, అన్నా దంపతులు పరస్పర అంగీకారంతో విడిపోవడంతో భరణానికి సంబంధించిన అధికారిక వివరాలు బయటకు రాలేదు. కానీ ఎన్నికల అఫిడవిట్‌లో పవన్ కళ్యాణ్ సమర్పించిన ఆస్తుల వివరాలు ఇప్పుడు వైరల్ అవుతున్నాయి.

2024 ఏపీ అసెంబ్లీ ఎన్నికల్లో పిఠాపురం నుంచి పోటీ చేసిన పవన్ కళ్యాణ్ దాఖలు చేసిన అఫిడవిట్ ప్రకారం.. హైదరాబాద్‌లోని జూబ్లీహిల్స్ రోడ్ నంబర్ 35, షేక్‌పేట్ పరిధిలో ఉన్న స్థిరాస్తిని అన్నా లెజినోవాతో కలిగిన సంతానం అయిన కొణిదెల పోలీనా అంజనీ, కొణిదెల మార్క్ శంకర్‌లకు సమాన వాటాలుగా బదిలీ చేసినట్లు తెలిపారు. ఈ ఆస్తి విలువ అఫిడవిట్‌లో ఒక్కొక్కరికి రూ.11 కోట్లుగా ఇచ్చినట్లు స్పష్టం చేశారు. మరోవైపు, బంజారాహిల్స్‌లోని ఎమ్మెల్యే కాలనీలో 3,336 చదరపు అడుగుల విస్తీర్ణంలో ఉన్న ఫ్లాట్‌ను అన్నా కొణిదెల పేరిట ఉందని తెలిపారు. దీని మార్కెట్ విలువ సుమారు రూ.1.95 కోట్లు అని అఫిడవిట్‌లో పవన్ కళ్యాణ్ వెల్లడించారు.

ఇక బ్యాంకు డిపాజిట్ల విషయానికొస్తే.. అన్నా లెజినోవా పేరిట సుమారు రూ.86 లక్షల డిపాజిట్లు ఉన్నట్లు అఫిడవిట్‌లో ఉంది. పిల్లల పేరిట కూడా లక్షల రూపాయల విలువైన చరాస్తులు ఉన్నట్లు వివరించారు. అయితే ఇవన్నీ ఎన్నికల సమయంలో పవన్ సమర్పించిన అఫిడవిట్‌లోని వివరాలు అని, వాటిని సోషల్ మీడియాలో వైరల్ చేస్తున్నారు. తాజాగా పవన్ కళ్యాణ్ విడాకుల అనంతరం మూడో భార్య అన్నాకు, సంతానం మార్క్ శంకర్, పోలేనా అంజనా పేరిట పేర్కొన్న ఆస్తుల వివరాలు హల్ చల్ చేస్తున్నాయి.

కాగా, పవన్ కళ్యాణ్ మొదటి భార్య నందినికి విడాకుల సమయంలో రూ.5 కోట్లు భరణం ఇచ్చారని ఎప్పటినుంచో ప్రచారంలో ఉంది. నటి రేణూ దేశాయ్ విషయానికి వస్తే కొన్ని ఆస్తులు రిజిస్టర్ చేశారని, ఆమె అంతగా ఆశించలేదని గతంలో వైరల్ అయింది. పిల్లల పోషణ కోసం ఖర్చులు పవన్ భరిస్తున్నారని తెలిసిందే. తాజాగా విడాకులు తీసుకున్న అన్నా లెజినోవాకు దాదాపు 1200 కోట్ల వరకు ప్రాపర్టీ ఇచ్చారని ప్రచారం జరుగుతోంది. దీనిపై ఆ దంపతులు మాత్రం ఎక్కడా స్పందించలేదు కనుక క్లారిటీ రావాల్సి ఉంది.

Vizag CII Partnership Summit: సీఐఐ భాగస్వామ్య సదస్సుకు ముస్తాబైన విశాఖ.. రాష్ట్ర సంస్కృతి ఉట్టిపడేలా ప్రభుత్వ ఏర్పాట్లు

Shankar Dukanam — Wed, 11 Nov 2026 16:23:35 +0530

విశాఖపట్నం: ఆంధ్రప్రదేశ్‌ను పెట్టుబడుల కేంద్రంగా మార్చేందుకు విశాఖపట్నంలోని ఆంధ్రా యూనివర్సిటీ ఇంజనీరింగ్ కళాశాల గ్రౌండ్స్‌లో ఈ నెల 12, 13 తేదీల్లో 31వ సీఐఐ భాగస్వామ్య సదస్సు జరగనుంది. ఈ అంతర్జాతీయ సదస్సు కోసం విశాఖ నగరం సర్వాంగ సుందరంగా ముస్తాబైంది. విదేశీ ప్రతినిధులు, పారిశ్రామికవేత్తలకు ఏపీ సంస్కృతి, సంప్రదాయాలు ఉట్టిపడేలా ఘన స్వాగతం పలికేందుకు రాష్ట్ర ప్రభుత్వం విస్తృత ఏర్పాట్లు చేసింది.

గిరిజన థింసా డాన్స్, గరగ నృత్యం, తప్పెట గుళ్లు వంటి జానపద సంప్రదాయ ప్రదర్శనలను సిద్ధం చేసింది. అలాగే ఏటికొప్పాక, కొండపల్లి బొమ్మలు, తోలుబొమ్మలాట, కూచిపూడి వంటి మన సాంప్రదాయ కళలను ప్రతిబింబించేలా సదస్సు ప్రాంగణాన్ని ప్రత్యేకంగా అలంకరించారు.

ఏపీ ప్రత్యేకతలు, పెట్టుబడి అవకాశాల ప్రదర్శన

ఈ సీఐఐ భాగస్వామ్య సదస్సులో ఆంధ్రప్రదేశ్ సముద్ర తీర ప్రాంత వైభవం, ఆతిథ్య శైలి, స్థానిక రుచులు, రాజధాని నగరం అమరావతి విశిష్టత, కడియం నర్సరీ వంటి ప్రత్యేకతలను చాటిచెప్పే ప్రత్యేక కళాకృతులను ఏర్పాటు చేశారు. వీటితో పాటు, రాష్ట్రంలో ఉన్న వనరులు, మౌలిక సదుపాయాలు, వివిధ రంగాల్లో ఉన్న పెట్టుబడి అవకాశాలను పారిశ్రామికవేత్తలకు వివరించేందుకు గాను వ్యవసాయం, ఉద్యాన పంటలు, ప్రతిష్ఠాత్మక అరకు కాఫీ, టూరిజం, లాజిస్టిక్స్, సోలార్ ఎనర్జీ వంటి కీలక విభాగాలకు సంబంధించి ప్రత్యేక స్టాళ్లు, ప్రాతినిధ్య కళాకృతులను అందుబాటులోకి తెచ్చారు.

అంతర్జాతీయ భేటీలు, ఒప్పందాలకై ప్రత్యేక ఏర్పాట్లు
పారిశ్రామికవేత్తలు, ప్రభుత్వ ప్రతినిధులు పెట్టుబడులపై చర్చలు జరిపేందుకు ఏపీ ప్రభుత్వం ప్రత్యేక సమావేశ ప్రాంగణాలను సిద్ధం చేసింది. ప్రధాన ప్లీనరీ హాల్‌తో పాటు, దిగ్గజ కంపెనీల చైర్మన్లు, సీఈఓలు ముఖ్యమంత్రి చంద్రబాబు నాయుడితో నేరుగా భేటీ అయ్యేందుకు మరో ప్రత్యేక హాల్‌ను రూపొందించారు.

బిజినెస్ టూ బిజినెస్ (B2B), గవర్నమెంట్ టు బిజినెస్ (G2B) చర్చలతో పాటు, నూతన భాగస్వామ్యాలు, పెట్టుబడి ఒప్పందాలు (MoUs) కుదుర్చుకోవడానికి వేర్వేరు పరిసరాలను కేటాయించారు. ఒకే సమయంలో 2, 3 కార్యక్రమాలు నిర్వహించుకునేలా నిర్మించిన ఈ సమావేశ మందిరాల్లో సదస్సు ప్రారంభ, ముగింపు ఉత్సవాలతో పాటు 6 కీలక అంశాలపై లోతైన మేధో మధనం జరగనుంది.

800కు పైగా వాహనాలు సిద్ధం

సీఐఐ పార్టనర్‌షిప్ సమ్మిట్-2026 కు సుమారు 59 దేశాల నుంచి ప్రతినిధులు, 15 మంది విదేశీ మంత్రులు, 1,250 మందికి పైగా దేశ, అంతర్జాతీయ సీఈఓలు, పారిశ్రామికవేత్తలు హాజరుకానున్నారు. వారి రాక, వసతుల, రవాణా, భద్రత, ప్రోటోకాల్ అంశాలకు సంబంధించి వివిధ శాఖల సమన్వయంతో ఏర్పాట్లు చేశారు. ప్రతినిధులు, పారిశ్రామిక వేత్తల కోసం 800 కు పైగా పలు రకాల వాహనాలను రవాణా శాఖ సిద్ధం చేసింది. అలాగే దేశ, అంతర్జాతీయ సంస్థల సీఈవోలు, విదేశీ మంత్రులు, అంబాసిడర్ల కోసం ప్రత్యేకంగా బెంగుళూర్, హైదరాబాద్ నుంచి హై ఎండ్ లగ్జరీ వెహికల్స్ ను కూడా తెప్పిస్తున్నట్లు డిప్యూటీ ట్రాన్స్ పోర్ట్ కమిషనర్ శ్రీనివాస్ తెలిపారు. ఈ వాహనాల్ని ఏయూ జిమ్నాజియం గ్రౌండ్ లో సిద్ధంగా ఉంచుతారు.

AP Ration Items: ఏపీ రేషన్ కార్డుదారులకు గుడ్‌న్యూస్.. రాయితీపై నిత్యావసర సరుకులు పంపిణీ

Shankar Dukanam — Wed, 11 Nov 2026 13:16:27 +0530

AP Ration Cardholders | అమరావతి: రాబోయే క్రిస్మస్, సంక్రాంతి పండగల సందర్భంగా ఆంధ్రప్రదేశ్ ప్రభుత్వం పేద ప్రజలకు బిగ్ రిలీఫ్ ఇచ్చింది. బహిరంగ మార్కెట్‌లో నిత్యావసర సరుకుల ధరల భారాన్ని తగ్గించడమే లక్ష్యంగా, డిసెంబర్ నెల నుంచి వరుసగా 3 నెలల పాటు రాష్ట్రవ్యాప్తంగా రేషన్ కార్డుదారులకు భారీ రాయితీపై సరుకులను పంపిణీ చేయాలని ప్రభుత్వం నిర్ణయం తీసుకుంది. "మార్కెట్ ఇంటర్వెన్షన్" కార్యక్రమంలో భాగంగా సివిల్ సప్లయిస్ కమిషనర్ కె. కన్నబాబు ఈ మేరకు ఉత్తర్వులు జారీ చేశారు.

రాయితీ ధరలలో లభించే సరుకుల వివరాలు
రాష్ట్రంలోని చౌక ధరల దుకాణాలు (Ration Shops) ద్వారా అర్హులైన ప్రతి రేషన్ కార్డుదారునికి ఈ సరుకులను చౌకగా అందించనున్నారు.

కందిపప్పు: కిలో రూ. 100

పామాయిల్: లీటరు రూ. 125

గోధుమ పిండి: కిలో రూ. 25

ఈ ధరలకు రాయితీపై నిత్యావసరాలను నేరుగా లబ్ధిదారులకు అందించనున్నారు.

ప్రభుత్వంపై పడనున్న ఆర్థిక భారం

ఈ పండుగ కానుక ద్వారా రాష్ట్రంలోని లక్షలాది పేద కుటుంబాలకు నిత్యావసర సరుకుల కొనుగోలుతో ధరల భారం నుంచి ఉపశమనం లభించనుంది. 3 నెలల పాటు ఈ రాయితీ సరుకుల పంపిణీ కార్యక్రమాన్ని నిరంతరాయంగా అందించడానికిగాను కూటమి ప్రభుత్వంపై రూ. 300.60 కోట్ల మేర అదనపు ఆర్థిక భారం పడనుంది. ప్రజల సంక్షేమం దృష్ట్యా ఈ నిధులను వెచ్చించేందుకు ఏపీ ప్రభుత్వం అన్ని ఏర్పాట్లను వేగవంతం చేసింది.

Vijayasai Reddy Political Party: ఏపీ రాజకీయాల్లో కొత్త అధ్యాయం.. విజయసాయిరెడ్డి కొత్త పార్టీ Parivartan Rajniti Party.. పార్టీ జెండా చూశారా

Shankar Dukanam — Wed, 11 Nov 2026 11:29:22 +0530

అమరావతి: ఆంధ్రప్రదేశ్ రాజకీయాల్లో మరో కీలక పరిణామం చోటుచేసుకుంది. మాజీ ఎంపీ విజయసాయిరెడ్డి కొత్త రాజకీయ పార్టీ ప్రకటనతో రాష్ట్ర రాజకీయాల్లో సరికొత్త అధ్యాయానికి శ్రీకారం చుట్టారు. విజయవాడ ఏ కన్వెన్షన్ సెంటర్ వేదికగా తన పార్టీ పేరు పరివర్తన రాజనీతి పార్టీ (Parivartana Rajniti Party) అని బుధవారం ఉదయం ప్రకటించారు. తెలుపు, కాషాయ రంగులో పార్టీ జెండా రూపొందించారు. జెండా మధ్యలో ధర్మచక్రం ఇచ్చారు. రాష్ట్రంలో కొనసాగుతున్న రెండు కుటుంబాల రాజకీయ ఆధిపత్యానికి ప్రత్యామ్నాయంగా తమ పార్టీ నిలుస్తుందని ఆయన ప్రకటించారు.

ప్రస్తుతం ఏపీ రాజకీయాలు ప్రధానంగా టీడీపీ, వైఎస్సార్ కాంగ్రెస్ పార్టీల చుట్టూనే తిరుగుతున్నాయని విజయసాయిరెడ్డి అభిప్రాయపడ్డారు. ఈ 2 పార్టీలతో ప్రజలకు ప్రయోజనం లేదన్నారు. అందుకు భిన్నంగా ప్రజల ఆకాంక్షలు, రాష్ట్ర అభివృద్ధి, సంక్షేమం ప్రధాన ఎజెండాగా కొత్త రాజకీయ వేదికను నిర్మించాలనేది తన లక్ష్యమని వెల్లడించారు.

యువతకు పెద్దపీట.. కొత్త తరానికి అవకాశం

తన పార్టీ ద్వారా యువతకు రాజకీయాల్లో ఎక్కువ అవకాశాలు కల్పిస్తానని విజయసాయిరెడ్డి ఇప్పటికే స్పష్టం చేశారు. కొత్త తరం నాయకత్వాన్ని ప్రోత్సహిస్తూ, ప్రతి నియోజకవర్గంలోనూ సమర్థులైన నాయకులను తయారు చేస్తామన్నారు. ముఖ్యంగా ఉద్యోగాలు, విద్య, వ్యవసాయం, సాగునీటి ప్రాజెక్టులు, రాయలసీమ అభివృద్ధికి ప్రాధాన్యత ఇవ్వనున్నట్లు తెలిపారు.

2 కుటుంబాల రాజకీయాలకు చెక్ పడుతుందా?

టీడీపీ, వైసీపీ రాష్ట్ర రాజకీయాల్లో బలమైన పునాదులు కలిగిన పార్టీలు. ఇలాంటి పరిస్థితుల్లో విజయసాయిరెడ్డి మూడో ప్రత్యామ్నాయంగా పార్టీని తీసుకురావడం ఆసక్తికరంగా మారింది. రెండు ప్రధాన పార్టీలపై అసంతృప్తితో ఉన్న ఓటర్లను తనవైపు తిప్పుకోవడమే ఆయన ముందున్న ప్రధాన సవాలు.

విజయసాయిరెడ్డి వ్యూహం వర్కౌట్ అవుతుందా?

కొత్త పార్టీ ప్రకటనతోనే రాజకీయాల్లో ప్రభావం చూపడం అంత తేలిక కాదు. క్షేత్రస్థాయిలో బలమైన నాయకత్వం, కార్యకర్తల బలం, ప్రజల్లో నమ్మకం, స్పష్టమైన విధానాలు ఉంటేనే ప్రత్యామ్నాయ రాజకీయ శక్తిగా ఎదిగే అవకాశం ఉంటుంది. మరి విజయసాయిరెడ్డి కొత్త పార్టీ ఏపీ రాజకీయాల్లో నిజమైన మూడో శక్తిగా ఎదుగుతుందా? చంద్రబాబు, జగన్ పార్టీల ఆధిపత్యానికి గట్టి పోటీ ఇస్తుందా? లేక మరో రాజకీయ ప్రయోగంగానే మిగిలిపోతుందా? అన్నది రాబోయే రోజుల్లో తేలనుంది.

కొంతకాలం గ్యాప్ తీసుకుని యాక్టివ్ అయిన విజయసాయిరెడ్డి

గత పార్టీలో తనకు చేదు అనుభవాలు ఎదురుకావడంతో పార్టీ నుంచే కాదు, రాజకీయాల నుంచి తప్పుకోవాలని భావించినట్లు విజయసాయిరెడ్డి గతంలో తెలిపారు. ఎంపీ పదవితో పాటు వైసీపీకి రాజీనామా చేసిన సమయంలో తాను రాజకీయాల్లో కొనసాగనని సైతం పేర్కొన్న ఆయన కొన్ని రోజులపాటు సేంద్రీయ వ్యవసాయం చేస్తున్నట్లు వెల్లడించారు. అందుకు సంబంధించిన ఫొటోలను సైతం ఎక్స్ ఖాతాలో షేర్ చేసుకుంటూ తాను ప్రశాంతంగా ఉన్నట్లు పేర్కొన్నారు. అనంతరం కొన్ని రోజులకే తాను మళ్లీ పాలిటిక్స్ లో యాక్టివ్ అవుతానని హింట్ ఇచ్చారు. బీజేపీలో చేరతారని ప్రచారం జరగడంతో ఆ ప్రచారాన్ని సైతం ఖండించారు. ఎవరి జెండానో మోయడం తన లక్ష్యం కాదని స్పష్టం చేశారు. ఈ క్రమంలో కొత్త పార్టీ పెట్టాలని నిర్ణయించుకున్నట్లు ప్రకటించిన విజయసాయిరెడ్డి.. రెండు కుటుంబ పార్టీలకు ప్రత్యామ్నాయంగా, సరికొత్త రాజకీయ శక్తిగా ఎదుగుతామన్నారు. తాను మెంటర్, పార్టీ అధ్యక్షుడిగా మాత్రమే కొనసాగుతానని, సీఎం పదవి చేపట్టే ఉద్దేశం తనకు లేదని క్లారిటీ ఇచ్చేశారు.

CII Partnership Summit: ఈ 12, 13 తేదీల్లో సీఐఐ పార్టనర్షిప్ సమ్మిట్- విశాఖలో డ్రోన్లపై నిషేధం.. రెడ్ జోన్ అలర్ట్

Shankar Dukanam — Wed, 11 Nov 2026 08:20:12 +0530

Andhra Pradeshs Investments | విశాఖపట్నంలో 31వ సీఐఐ భాగస్వామ్య సదస్సు–2026ఆంధ్రప్రదేశ్‌ను పెట్టుబడులు, పారిశ్రామికాభివృద్ధికి ప్రధాన కేంద్రంగా తీర్చిదిద్దే లక్ష్యంతో ఆంధ్రప్రదేశ్ ప్రభుత్వం, భారత పరిశ్రమల సమాఖ్య (CII) సంయుక్తంగా ఈ నెల 12, 13వ తేదీల్లో విశాఖపట్నంలోని ఆంధ్ర యూనివర్సిటీ ప్రాంగణంలో 31వ సీఐఐ పార్టనర్‌షిప్ సమ్మిట్–2026ను అత్యంత ప్రతిష్ఠాత్మకంగా నిర్వహించనున్నాయి. గతేడాది సదస్సుకు భిన్నంగా, ఇప్పటికే నిర్వహించిన5 ప్రాంతీయ సదస్సుల ద్వారా రాష్ట్రానికి రూ.86 వేల కోట్ల పెట్టుబడులు వచ్చాయి. వివిధ రంగాలపై నిర్వహించిన ఈ ప్రాంతీయ సదస్సుల్లో కీలక చర్చలు జరగడంతో, ఈ ప్రధాన సదస్సుపై వ్యాపార, పారిశ్రామిక వర్గాలలో తీవ్ర ఆసక్తి నెలకొంది. ఈ సదస్సును నవంబర్ 12న ఉదయం దాదాపు 10.30 గంటలకు కేంద్ర హోంమంత్రి అమిత్ షా ప్రారంభిస్తారు. అమిత్ షా పర్యటనతో పాటు పలు దేశాల అంతర్జాతీయ ప్రముఖులు నగరానికి రానున్న క్రమంలో డ్రోన్లపై నిషేధం విధించారు.

రెండు రోజుల పాటు సాగే ఈ సదస్సులో వివిధ దేశాల ప్రభుత్వ ప్రతినిధులు, మంత్రులు, దౌత్యవేత్తలు, బహుళజాతి సంస్థల అధినేతలు, ప్రముఖ పారిశ్రామికవేత్తలు పాల్గొంటారు. ఈ కార్యక్రమంలో ముఖ్యమంత్రి చంద్రబాబు పాల్గొని అంతర్జాతీయ ప్రతినిధులతో ప్రత్యేకంగా సమావేశమవుతారు. రాష్ట్రంలో ఉన్న మౌలిక సదుపాయాలు, పెట్టుబడి అవకాశాలు, తయారీ, సాంకేతిక రంగాల అవకాశాలతో పాటు ప్రభుత్వం అమలు చేస్తున్న పారిశ్రామిక విధానాలను సీఎం వివరించనున్నారు.

Take a 360° spin around the preparations for the **31st CII Partnership Summit!** 🎥✨ A complete view of the arrangements. **Visakhapatnam is gearing up to welcome the world!** 🌏🤝 #CIIPartnershipSummit #CII2026 #360DegreeView #Visakhapatnam #AndhraPradesh https://t.co/NoiMRy6O6d
— I&PR VISAKHAPATNAM (@DIPROVIZAG) November 10, 2026

అంతర్జాతీయ ప్రతినిధులుతో సీఎం భేటీలు

సదస్సులో భాగంగా సింగపూర్, యునైటెడ్ అరబ్ ఎమిరేట్స్ (UAE), గ్వాటెమాలా, స్లోవేకియా దేశాలకు చెందిన ప్రభుత్వ ప్రతినిధులు, మంత్రులు, రాయబారులతో పాటు జపాన్, రష్యా దౌత్యవేత్తలతో సీఎం చంద్రబాబు భేటీ అవుతారు. అంతేకాకుండా, ప్రపంచ మేధోసంపత్తి సంస్థ (WIPO) డైరెక్టర్ జనరల్ డాక్టర్ డారెన్ టాంగ్, జపాన్ రీసెర్చ్ ఇన్‌స్టిట్యూట్‌కు చెందిన 'ఇన్‌స్టిట్యూట్ ఫర్ ఇంటర్నేషనల్ స్ట్రాటజీ' చైర్మన్‌తో కూడా సీఎం ప్రత్యేకంగా సమావేశమవుతారు. ఈ సదస్సులో ఆటోమొబైల్, పునరుత్పాదక ఇంధనం (Renewable Energy), ఫుడ్ ప్రాసెసింగ్, నిర్మాణ సామగ్రి, మౌలిక సదుపాయాలు, తయారీ, సాంకేతిక రంగాలకు చెందిన కియా మోటార్స్, రెన్యూ, మాండెలెజ్ ఇండియా, సెయింట్ గోబెయిన్, నాల్కో, లెవిస్టా వంటి దిగ్గజ సంస్థల ప్రతినిధులు భాగస్వాములు కానున్నారు.స్పేస్ స్టార్టప్‌లు, మహిళా సాధికారతకు ప్రాధాన్యంఈ సదస్సులో అంతరిక్ష సాంకేతికత (Space Tech), పరిశోధన, తయారీ రంగాల్లో పెట్టుబడులను ఆకర్షించడమే లక్ష్యంగా స్పేస్ రంగ స్టార్టప్‌లు ప్రత్యేక ఆకర్షణగా నిలవనున్నాయి. హాథోర్ రాకెట్స్, అగ్నికుల్, బెల్లాట్రిక్స్ ఏరోస్పేస్, స్కైరూట్ వంటి భారతదేశ ప్రముఖ ప్రైవేటు అంతరిక్ష సంస్థల ప్రతినిధులతో సీఎం చంద్రబాబు ప్రత్యేకంగా సమావేశం కానున్నారు.

మరోవైపు, మహిళా ఆర్థిక సాధికారత, పారిశ్రామిక రంగంలో మహిళల భాగస్వామ్యం, మహిళా వ్యాపారవేత్తలకు ప్రోత్సాహం అందించేందుకు విశాఖ నోవోటెల్‌లో 'విమెన్ అండ్ గ్రోత్ సమ్మిట్–2026' పేరుతో ప్రత్యేక సమావేశం నిర్వహించనున్నారు. ఈ కార్యక్రమంలో కూడా ముఖ్యమంత్రి చంద్రబాబు పాల్గొంటారు.కేంద్ర మంత్రులతో రాష్ట్ర అభివృద్ధిపై చర్చలుసదస్సు సందర్భంగా కేంద్రమంత్రులు నితిన్ గడ్కరీ, పీయూష్ గోయల్, చిరాగ్ పాశ్వాన్‌, ప్రహ్లాద్ జోషి, సర్బానంద సోనోవాల్‌లతో ముఖ్యమంత్రి చంద్రబాబు వరుస భేటీలు కానున్నారు. వివిధ రంగాల్లో పారిశ్రామికాభివృద్ధికి తీసుకోవాల్సిన చర్యలు, రాష్ట్రానికి అందాల్సిన కేంద్ర చేయూత, వివిధ వర్గాలకు కల్పించాల్సిన వెసులుబాట్లపై చర్చించనున్నారు. అలాగే, అంతర్జాతీయ పరిణామాల వల్ల రాష్ట్ర పరిశ్రమలపై పడుతున్న ప్రభావాన్ని కేంద్ర మంత్రుల దృష్టికి తీసుకెళ్లనున్నారు.

ఒకరోజు ముందే సీఎం సమావేశాలు

సమ్మిట్‌కు ఒకరోజు ముందుగానే సీఎం చంద్రబాబు పలువురు అంతర్జాతీయ ప్రతినిధులు, పారిశ్రామికవేత్తలతో అమరావతి, విశాఖల్లో సమావేశాలు నిర్వహించనున్నారు. సింగపూర్ మంత్రి గాన్ సియో హువాంగ్‌తో అమరావతిలో బుధవారం సమావేశమవుతారు. అనంతరం విశాఖ చేరుకుని వివిధ భేటీల్లో పాల్గొంటారు. డబ్ల్యూఐపీవో డైరెక్టర్ జనరల్ డారెన్ టాంగ్, యూఏఈ మంత్రి అబ్దుల్లా బిన్ తౌక్ అల్ మార్రీ, రెన్యూ సంస్థ సీఈవో సుమంత్ సిన్హా, జపాన్ రాయబారి కీచి ఒనోలతో నేడు సమావేశం కానున్నారు. సాయంత్రం సీఐఐ సీఈవోలతో సమావేశం, అంతర్జాతీయ ప్రతినిధులు, పారిశ్రామికవేత్తల కోసం ఏర్పాటు చేసిన విందులో ఆయన పాల్గొంటారు.

3 రోజులు డ్రోన్లపై నిషేధం.. రెడ్ జోన్ ప్రకటన

CII పార్టనర్‌షిప్ సమ్మిట్‌లో సీఎం చంద్రబాబు, కేంద్ర హోం మంత్రి అమిత్ షా, పలు దేశాల అంతర్జాతీయ ప్రతినిధులు పాల్గొంటున్న కారణంగా విశాఖలో డ్రోన్లపై నవంబర్ 11 నుంచి 13 వరకు నిషేధం విధించారు. విశాఖ సిటీ పోలీసులు కీలక ఆదేశాలు జారీ చేశారు. ముఖ్యంగా ఆంధ్రా యూనివర్సిటీ ఇంజినీరింగ్ (AU) కాలేజీ చుట్టూ 3 కిలోమీటర్ల పరిధిని 72 గంటల పాటు రెడ్ జోన్‌గా ప్రకటించారు. ఈ పరిధిలో డ్రోన్ కెమెరాలు వినియోగించరాదని హెచ్చరించారు. నిబంధనలు ఉల్లంఘిస్తే క్రిమినల్ కేసులు నమోదు చేసి చర్యలు తీసుకుంటామని హెచ్చరించారు.

ఈ 13న బంగాళాఖాతంలో అల్పపీడనం.. మత్స్యకారులకు హెచ్చరిక

Shankar Dukanam — Tue, 10 Nov 2026 19:02:07 +0530

అమరావతి: ఇటీవల సంభవించిన అర్నబ్, మురసు తుపానులతో ఏపీలో పలు జిల్లాల్లో భారీ వర్షాలు కురిశాయి. ఆ వర్షాలు, వరదల కారణంగా రాష్ట్రంలో వేల కోట్ల నష్టం వాటిల్లింది. తాజాగా ఏపీకి మరో వర్ష ముప్పు తప్పదనిపిస్తోంది. ఆగ్నేయ బంగాళాఖాతంలో ఈ నెల 13న ఒక నూతన అల్పపీడనం ఏర్పడే అవకాశముందని భారత వాతావరణ శాఖ (IMD) వెల్లడించింది. ఈ అల్పపీడనం క్రమంగా వాయవ్య దిశగా పయనిస్తూ, తర్వాతి 24 గంటల్లో మరింత బలపడి బలమైన అల్పపీడనంగా మారే వీలుందని వాతావరణ అధికారులు తెలిపారు.

ఈ అల్పపీడన ప్రభావంతో ఈ నెల 14, 15 తేదీల్లో ఆగ్నేయ బంగాళాఖాతం, అండమాన్ సముద్ర ప్రాంతాల్లో సముద్రం తీవ్ర అలజడిగా మారి అలల ఉద్ధృతి పెరిగే అవకాశముంది. ఈ సమయంలో గంటకు 40 నుండి 60 కిలోమీటర్ల వేగంతో ఈదురుగాలులు వీచే అవకాశం ఉంది. కనుక ఆ సమయంలో మత్స్యకారులు ఎవరూ సముద్రంలోకి వేటకు వెళ్లవద్దని వాతావరణ శాఖ కఠిన హెచ్చరికలు జారీ చేసింది. అల్పపీడనం గమనాన్ని అధికారులు నిశితంగా పరిశీలిస్తున్నారు. ఏపీలో పలు జిల్లాల్లో వర్షాలు కురిసే అవకాశం ఉందన్నారు.

Father Name Rule: ప్రభుత్వ రికార్డుల్లో తండ్రి పేరు తప్పనిసరి నిబంధన తొలగించాలి.. ఏపీ బాలల హక్కుల కమిషన్ డిమాండ్

Satyaprasad Bandaru — Tue, 10 Nov 2026 18:10:18 +0530

Father Name Rule: ప్రభుత్వ దరఖాస్తులు, అధికారిక రికార్డులు, ధ్రువీకరణ పత్రాలలో తండ్రి పేరు నమోదు చేయాలనే తప్పనిసరి నిబంధనను, చట్టపరంగా అవసరం లేని చోట తొలగించాలని ఆంధ్రప్రదేశ్ రాష్ట్ర బాలల హక్కుల పరిరక్షణ కమిషన్ (AP SCPCR) పిలుపునిచ్చింది. విజయవాడలో చిల్డ్రన్ ఆఫ్ ఇండియా ఫౌండేషన్‌తో సంయుక్తంగా నిర్వహించిన 'తండ్రి పేరు తప్పనిసరి నిబంధనను తొలగించడం' అనే అంశంపై రాష్ట్ర స్థాయి వర్క్ షాప్‌లో కమిషన్ ఈ కీలక సిఫార్సు చేసింది.

ఈ వర్క్ షాప్‌లో ముఖ్య అతిథిగా పాల్గొన్న AP SCPCR చైర్మన్ వేటుకూరి ఏ.వి.ఎస్.ఎస్.ఎన్. రాజు మాట్లాడుతూ, ప్రతి చిన్నారికి స్వతంత్ర గుర్తింపు, గౌరవం ఉంటాయని, తల్లిదండ్రుల వైవాహిక స్థితి లేదా కుటుంబ నేపథ్యం ఆధారంగా వారి భవిష్యత్తును నిర్ణయించకూడదని చెప్పారు. ఐక్యరాజ్యసమితి బాలల హక్కుల కన్వెన్షన్ సూత్రాలను ప్రస్తావిస్తూ, వివక్ష లేని సమాజం, బాలల శ్రేయస్సుకు ప్రాధాన్యత ఇవ్వాల్సిన అవసరాన్ని గుర్తు చేశారు.

ఇబ్బందులు ఎదుర్కొంటున్న ఒంటరి తల్లులు, పిల్లలు

ప్రస్తుత నిబంధనల వల్ల ఒంటరి తల్లులు, అవివాహిత మహిళలు, వితంతువులు, విడాకులు పొందినవారు, చట్టబద్ధ సంరక్షకుల వద్ద పెరుగుతున్న పిల్లలు తీవ్ర ఇబ్బందులు ఎదుర్కొంటున్నారని కమిషన్ గుర్తించింది. తండ్రి వివరాలు లేవనే నెపంతో జనన ధ్రువీకరణ పత్రాలు, పాఠశాల ప్రవేశాలు, ఉపకార వేతనాలు, సంక్షేమ పథకాలు వంటి అత్యవసర సేవలు పిల్లలకు దూరం కాకూడదని చైర్మన్ స్పష్టం చేశారు. హక్కులు కల్పించాల్సిన రికార్డులే వారి అభివృద్ధికి అడ్డంకులుగా మారకూడదన్నారు.

వర్క్ షాప్ ప్రధాన సిఫార్సులు

చట్టపరంగా అవసరం లేని పక్షంలో తండ్రి పేరు నమోదు తప్పనిసరి కాకూడదు.
ప్రత్యామ్నాయంగా తల్లి లేదా చట్టబద్ధ సంరక్షకుని పేరును అనుమతించాలి.
తండ్రి పేరు లేదనే కారణంతో విద్య, గుర్తింపు పత్రాలు, సంక్షేమ ఫలాలను నిరాకరించకూడదు.
ప్రభుత్వ దరఖాస్తు ఫామ్‌లు, ఆన్‌లైన్ పోర్టళ్లలో అవసరమైన మార్పులు చేయాలి.
క్షేత్రస్థాయి అధికారులకు స్పష్టమైన మార్గదర్శకాలు జారీ చేసి, అవగాహన కల్పించాలి.
ఫిర్యాదుల కోసం ప్రత్యేకంగా పరిష్కార వ్యవస్థను ఏర్పాటు చేయాలి.

Also Read:అరకు - రాజమండ్రి మధ్య సరికొత్త గ్రీన్ హైవే.. విశాఖను టచ్ చేయకుండా రయ్ రయ్

ప్రభుత్వ ఉత్తర్వులు అవసరం

ఈ కార్యక్రమంలో పాల్గొన్న రాష్ట్ర మహిళా కమిషన్ చైర్‌పర్సన్ డాక్టర్ రాయపాటి శైలజ మాట్లాడుతూ, ఏ చిన్నారీ అవకాశాలకు దూరం కాకుండా చూసేందుకు సంబంధిత శాఖల సమన్వయంతో ప్రభుత్వ ఉత్తర్వు జారీ చేయాలని కోరారు. కుటుంబ పరిస్థితులతో సంబంధం లేకుండా మహిళలు, పిల్లలందరికీ సమాన అవకాశాలు కల్పించాలన్నారు. ఈ సంస్కరణ తండ్రులను మినహాయించడం కోసం కాదని, పిల్లల గౌరవం, వ్యక్తిగత గోప్యత, సమానత్వాన్ని పరిరక్షించేందుకు ఉద్దేశించిన బాలల హిత పరిపాలనా సంస్కరణ అని కమిషన్ స్పష్టం చేసింది. ఈ మేరకు రాష్ట్రవ్యాప్తంగా అన్ని శాఖలకు వర్తించేలా పరిపాలనా సర్క్యులర్ జారీ చేయాలని ప్రభుత్వానికి విజ్ఞప్తి చేసింది.

Also Read: పవన్ కళ్యాణ్‌ను వ్యక్తిగతంగా టార్గెట్ చేయవద్దు: క్యాడర్‌కు వైసీపీ అధినేత ఆదేశాలు

MPP ZP Schedule: ఏపీలో ఎంపీపీ, జడ్పీ ఛైర్మన్ల ఎన్నికలకు నోటిఫికేషన్‌ విడుదల

Satyaprasad Bandaru — Tue, 10 Nov 2026 18:03:10 +0530

MPP ZP Schedule: ఏపీలో స్థానిక సంస్థల ఎన్నికల ప్రక్రియ అంతిమ ఘట్టానికి చేరుకుంది. మండల ప్రజా పరిషత్‌ (ఎంపీపీ), జిల్లా పరిషత్‌ (జడ్పీ) ఛైర్మన్‌, వైస్‌ ఛైర్మన్ల పరోక్ష ఎన్నికలకు రాష్ట్ర ఎన్నికల సంఘం (ఎస్‌ఈసీ) మంగళవారం నోటిఫికేషన్‌ విడుదల చేసింది.

ఎస్‌ఈసీ ప్రకటించిన షెడ్యూల్ ప్రకారం.. ఈనెల 19న ఎంపీపీల ఎన్నిక, 20న జిల్లా పరిషత్‌ ఛైర్మన్‌, వైస్‌ ఛైర్మన్ల ఎన్నికలు జరగనున్నాయి. ఇందుకోసం ప్రత్యేక సమావేశాలు నిర్వహించాలని ఎన్నికల సంఘం అధికారులను ఆదేశించింది. మొత్తం 659 మండల ప్రజాపరిషత్‌లు, 28 జిల్లా పరిషత్‌లలో ఛైర్మన్‌, వైస్‌ ఛైర్మన్‌ స్థానాలకు ఎన్నిక నిర్వహించనున్నారు. ఈ పరోక్ష ఎన్నికల ప్రక్రియను ‘చేతులు ఎత్తే పద్ధతి’ ద్వారా చేపడతారు.

ఎంపీటీసీ, జడ్పీటీసీ స్థానాల్లో

ఈనెల 7న వెలువడిన ఎంపీటీసీ, జడ్పీటీసీ ఎన్నికల ఫలితాల్లో అధికార కూటమి ప్రభంజనం సృష్టించిన సంగతి తెలిసిందే. రాష్ట్రవ్యాప్తంగా ఎన్నికలు జరిగిన 582 జడ్పీటీసీ స్థానాల్లో కూటమి 499 స్థానాలను (85.73%) కైవసం చేసుకుంది. ఇందులో టీడీపీ 407, జనసేన 72, బీజేపీ 20 స్థానాల్లో విజయం సాధించగా, ఏడు జిల్లాల్లో కూటమి క్లీన్‌స్వీప్‌ చేసింది. ప్రతిపక్ష వైసీపీ 76 స్థానాలకే (13.05%) పరిమితమవ్వగా, ఇతరులు 7 చోట్ల గెలుపొందారు.

Also Read: 2024 ఎన్నికల కంటే అత్యుత్తమ ఫలితాలు, మెరుగైన స్ట్రైక్ రైట్.. కూటమి విజయంపై సీఎం చంద్రబాబు

అత్యధిక స్థానాల్లో కూటమి

అలాగే, ఎంపీటీసీ స్థానాల్లోనూ ఏకగ్రీవాలతో కలిపి కూటమి 7,799 స్థానాలను సొంతం చేసుకుంది. ఇందులో టీడీపీ 6,585, జనసేన 1,044, బీజేపీ 170 ఉన్నాయి. వైసీపీ 1,801 స్థానాలు గెలుచుకోగా, ఇతరులు, స్వతంత్రులు 195 స్థానాల్లో విజయం సాధించారు. జడ్పీటీసీ, ఎంపీటీసీల్లో సాధించిన స్పష్టమైన మెజారిటీతో రాష్ట్రంలోని దాదాపు అన్ని జడ్పీలు, మెజారిటీ ఎంపీపీలను కూటమి సునాయాసంగా కైవసం చేసుకోనుంది.

Also Read: పవన్ కళ్యాణ్‌ను వ్యక్తిగతంగా టార్గెట్ చేయవద్దు: క్యాడర్‌కు వైసీపీ అధినేత ఆదేశాలు