tirupati

Nagari MPTC Election Result: ఇల్లత్తూరు ఎంపీటీసీ ఫలితంపై రోజా కన్నీళ్లు.. కౌంటింగ్ కేంద్రం వద్ద ధర్నాతో అరెస్ట్!

Shankar Dukanam — Sat, 7 Nov 2026 18:47:18 +0530

Nagari MPTC Election Controversy నగరి: చిత్తూరు జిల్లా నగరి నియోజకవర్గంలో కౌంటింగ్ కేంద్రం వద్ద మాజీ మంత్రి ఆర్కే రోజా హల్ చల్ చేశారు. ఇల్లత్తూరు ఎంపీటీసీ స్థానాల ఫలితం వివాదాస్పదంగా మారి కౌంటింగ్ కేంద్రం వద్ద ఉద్రిక్తతకు దారితీసింది. తొలిసారి నిర్వహించిన ఓట్ల లెక్కింపు సమయంలో వైఎస్సార్ కాంగ్రెస్ పార్టీ అభ్యర్థి 10 ఓట్ల మెజార్టీతో విజయం సాధించినట్లు కౌంటింగ్ అధికారులు వెల్లడించారు. ఆ తర్వాత తెలుగుదేశం పార్టీ (టీడీపీ) అభ్యర్థి రీకౌంటింగ్ కోరారు. దాంతో నిర్వహించిన రీకౌంటింగ్‌లో మాత్రం మరిన్ని చెల్లని ఓట్లు గుర్తించారు. ఈ క్రమంలో టీడీపీ అభ్యర్థి 3 ఓట్ల మెజార్టీతో గెలిచినట్లు ప్రకటించడంతో తీవ్ర వివాదం రేగింది.

ఈ పరిణామంపై వైసీపీ నాయకురాలు, మాజీ మంత్రి ఆర్కే రోజా తీవ్ర ఆగ్రహం వ్యక్తం చేశారు. అధికారులు ఏకపక్షంగా వ్యవహరిస్తున్నారని, ఎన్నికల లెక్కింపు ప్రక్రియను నిరసిస్తూ కౌంటింగ్ కేంద్రం వద్ద ధర్నాకు దిగారు. ఈ సందర్భంగా ఆమె తీవ్ర ఆవేదనకు గురై కంటతడి పెట్టుకున్నారు. ఎంపీటీసీ ఫలితాల మార్పు వెనుక కుట్ర జరిగిందని ఆరోపిస్తూ వైసీపీ శ్రేణులు ఆందోళన చేపట్టడంతో స్థానికంగా వాతావరణం వేడెక్కింది.

నగరి కౌంటింగ్‌ సెంటర్‌ వద్ద మాజీ మంత్రి ఆర్కే రోజా గారితో పోలీసులు దురుసు ప్రవర్తన విజయపురం మండలం ఇల్లత్తూరు వైయస్‌ఆర్‌సీపీ ఎంపీటీసీ అభ్యర్థి గెలుపొందినా.. ఎన్నికల ఫలితాలను మార్చేసి టీడీపీ గెలిచినట్లు ప్రకటించిన అధికారులు కౌంటింగ్ కేంద్రంలో ప్రశ్నించిన వైయస్‌ఆర్‌సీపీ అభ్యర్థిని బయటకు గెంటేసిన పోలీసులు విషయం తెలుసుకుని పోలీసులు, అధికారుల తీరుకు నిరసనగా కౌంటింగ్‌ కేంద్రం ముందు బైఠాయించి నిరసన తెలిపిన రోజా గారు. దాంతో పోలీసులు బలవంతంగా అరెస్ట్ #TDPGoons #CBNTurnedAPIntoBihar #SaveDemocracyInAP #SadistChandraBabu
— YSR Congress Party (@YSRCParty) November 7, 2026

ఇల్లత్తూరు ఎంపీటీసీ స్థానాన్ని వైసీపీ కైవసం చేసుకున్నప్పిటికీ టీడీపీ గెలిచినట్లు ప్రకటించారని రోజా ఆరోపించారు. పోలీసులు వైసీపీ అభ్యర్థిని బయటకు నెట్టేశారని, ఎన్నికల అధికారులు, పోలీసుల తీరుకు నిరసనగా తాను కౌంటింగ్‌ కేంద్రం ముందు బైఠాయించినట్లు రోజా తెలిపారు. అయితే న్యాయం కోరిన రోజాపై పోలీసులు దౌర్జన్యానికి దిగారని, న్యాయం చేయడానికి బదులుగా ఆమెను పోలీసులు బలవంతంగా అరెస్ట్‌ చేశారని వైసీపీ నేతలు మండిపడ్డారు. టీడీపీ నేతలు నీతిమాలిన రాజకీయాలు చేస్తున్నారని ఆగ్రహం వ్యక్తం చేశారు. తమ పార్టీ అభ్యర్థి గెలిచినా డిక్లరేషన్‌ ఫాం ఇవ్వడం లేదని.. గెలిచే ధైర్యం లేనప్పుడు ఎన్నికలు ఎందుకు పెట్టారంటూ మండిపడ్డారు.

ఎంపీటీసీ, జెడ్పీటీసీ ఎన్నికల్లో కూటమి అభ్యర్థులు మెజార్టీ స్థానాల్లో గెలుపొందారు. జగన్ నియోజకవర్గం పులివెందుల జెడ్పీటీసీ స్థానాన్ని టీడీపీ కైవసం చేసుకుంది. అటు ఉత్తరాంధ్రలో బొత్స సత్యకుటుంబానికి సైతం కూటమి అభ్యర్థులు షాకిచ్చారు. బొండపల్లి జెడ్పీటీసీలో బొత్స కూతురు బొత్స అనూషపై టీడీపీ అభ్యర్థి పాశల నీరజ ఘన విజయం సాధించారు.

Pulivendula ZPTC Results: కూటమి ఖాతాలోకి పులివెందుల.. టీడీపీ జెడ్పీటీసీ అభ్యర్థి ఘన విజయం

Shankar Dukanam — Sat, 7 Nov 2026 13:39:28 +0530

పులివెందుల: ఆంధ్రప్రదేశ్‌లో పరిషత్‌ ఎన్నికల ఓట్ల లెక్కింపులో కూటమి అభ్యర్థులు దూసుకెళ్తున్నారు. మాజీ సీఎం, వైసీపీ అధినేత వైఎస్ జగన్ మోహన్ రెడ్డి సొంత జిల్లా కడపలోనూ టీడీపీ అభ్యర్థులు విజయాలు సాధిస్తున్నారు. ఇటివరకు వెలువడిన ఫలితాలు, తాజా ట్రెండ్స్‌లో కూటమి అభ్యర్థులు మేజారిటీ స్థానాల్లో ఆధిక్యంలో కొనసాగుతున్నారు. వైఎస్సార్ కడప జిల్లా పులివెందుల జడ్పీటీసీ స్థానాన్ని టీడీపీ తన ఖాతాలో వేసుకుంది. పులివెందుల స్థానంలో పోటీ చేసిన టీడీపీ అభ్యర్థి భారతి వైసీపీ అభ్యర్థి సావిత్రిపై 1,463 ఓట్ల మెజార్టీతో విజయం సాధించారు. మైదుకూరు జెడ్పీటీసీ టీడీపీ సొంతం చేసుకుంది. కడప జిల్లా మైదుకూరు జెడ్పీటీసీ స్థానంలో వైసీపీ అభ్యర్థిపై టీడీపీ అభ్యర్థి కృష్ణకిషోర్ విజయం సాధించారు. జిల్లాలోని పెద ముడియం మండలం సుద్దపల్లె ఎంపీటీసీ స్థానంలో టీడీపీ అభ్యర్థి ఎద్దుల సంజీవతి గెలుపొందారు.

రాష్ట్రవ్యాప్తంగా మొత్తం 659 జడ్పీటీసీ స్థానాల్లో 170కి పైగా చోట్ల, అలాగే మొత్తం 9,821 ఎంపీటీసీ స్థానాల్లో 2,000కు పైగా స్థానాల్లో కూటమి అభ్యర్థులు ఆధిక్యంలో కొనసాగుతున్నారు. వివిధ జిల్లాల్లో ఇప్పటివరకూ నమోదైన విజయాలను పరిశీలిస్తే, గుంటూరు జిల్లా జడవల్లి ఎంపీటీసీ స్థానంలో టీడీపీ అభ్యర్థి 74 ఓట్ల తేడాతో విజయం సాధించారు. తెనాలి మండలం హాఫ్‌పేట ఎంపీటీసీ స్థానాన్ని కూడా టీడీపీ దక్కించుకుంది. అలాగే పార్వతీపురం మన్యం జిల్లా సాలూరు మండలం గంజాయిభద్ర ఎంపీటీసీ స్థానంలో టీడీపీ అభ్యర్థి చిరంజీవి గెలుపొందగా, వైఎస్సార్ కడప జిల్లా పెద్దముడియం మండలం సుద్దపల్లె ఎంపీటీసీ స్థానాన్ని కూడా టీడీపీ కైవసం చేసుకుంది.

Anand Mahindra Post: రంపం దాడిలో ధైర్యం.. రాప్తాడు బాలికకు ఆనంద్ మహీంద్రా సెల్యూట్!

Shankar Dukanam — Fri, 6 Nov 2026 08:57:56 +0530

Anand Mahindra Salutes Girls Bravery in Raptadu Incident | ఆంధ్రప్రదేశ్‌లోని అనంతపురం జిల్లా రాప్తాడులో చోటుచేసుకున్న ఒక దారుణ సంఘటన అందరినీ తీవ్ర దిగ్భ్రాంతికి గురిచేసింది. ఓ వ్యక్తి ఆవేశంతో రంపంతో దాడి చేసేందుకు ప్రయత్నించిన సమయంలో, ఒక చిన్న బాలిక అత్యంత ధైర్యసాహసాలను ప్రదర్శించింది. తన ప్రాణాలను సైతం లెక్కచేయకుండా, ఎదుటివారిని రక్షించేందుకు ఆమె నిలబడిన తీరు, చూపిన తెగువ యావత్ దేశాన్ని కదిలించివేసింది. ఆమె త్వరగా కోలుకోవాలని అంతా ప్రార్థించారు.

రాప్తాడు ఘటనపై ఆనంద్ మహీంద్రా పోస్ట్

ఈ సంఘటనపై ప్రముఖ పారిశ్రామికవేత్త, మహీంద్రా గ్రూప్ చైర్మన్ ఆనంద్ మహీంద్రా సోషల్ మీడియా వేదిక 'ఎక్స్' (X) లో భావోద్వేగంగా స్పందించారు. భవిష్యత్తు ఎలా ఉంటుందో తెలుసుకోవడానికి మనం యువతరం వైపు చూస్తామని, కానీ ఇలాంటి సంఘటనలే నిజమైన ధైర్యం అంటే ఏంటో గుర్తుచేస్తాయని ఆయన వ్యాఖ్యానించారు.

We often look to the young to see what the future might hold. But sometimes, in the here and now, they remind us that courage is not the absence of fear, but the moment when concern for another human being becomes greater than fear for oneself. What an extraordinary young woman. 🫡
— anand mahindra (@anandmahindra) November 5, 2026

రాప్తాడు బాలిక లక్ష్మీకి సెల్యూట్.. ఆనంద్ మహీంద్రా పోస్ట్ వైరల్

"ధైర్యం అంటే కేవలం భయం లేకపోవడం కాదు. తన సొంత ప్రాణంపై ఉన్న భయం కంటే, ఎదుటివారిపై ఉన్న ప్రేమాభిమానాలు, ఆందోళన ఎక్కువైనప్పుడే అసలైన ధైర్యం బయటపడుతుంది" అని ఆనంద్ మహీంద్రా పేర్కొన్నారు. ఆ చిన్నారిని 'ఒక అసాధారణమైన అమ్మాయి' అని కొనియాడుతూ ఆయన ఆమెకు సెల్యూట్ చేశారు. ప్రస్తుతం ఆనంద్ మహీంద్రా చేసిన ఈ పోస్ట్ సోషల్ మీడియాలో విపరీతంగా వైరల్ అవుతోంది.

Srikakulam and Kuppam Airports: శ్రీకాకుళం, కుప్పం విమానాశ్రయాల ఏర్పాటుకు సైట్ క్లియరెన్స్ ఇచ్చిన మోకా

Shankar Dukanam — Fri, 6 Nov 2026 08:31:57 +0530

అమరావతి: ఆంధ్రప్రదేశ్‌లో నూతన విమానాశ్రయాల నిర్మాణానికి కీలక ముందడుగు పడింది. కుప్పం, శ్రీకాకుళం విమానాశ్రయాల ఏర్పాటుకు కేంద్ర పౌర విమానయాన శాఖ (మోకా) సైట్ క్లియరెన్స్ ఇచ్చింది. దీంతో ఆ విమానాశ్రయాల నిర్మాణానికి అవసరమైన తదుపరి చర్యలు చేపట్టేందుకు ఏపీ ప్రభుత్వానికి మార్గం సుగమమైంది. ఈ రెండింటికి సంబంధించిన భూములను రాష్ట్ర ప్రభుత్వం ఇప్పటికే గుర్తించింది. వీటిని ల్యాండ్ లార్డ్ (ప్రభుత్వానికి పూర్తి హక్కులు ఉండే) విధానంలో చేపట్టాలా లేక పీపీపీ (ప్రభుత్వ- ప్రైవేట్ భాగస్వామ్యం) విధానంలో నిర్మించాలా అనే అంశంపై రాష్ట్ర విమానాశ్రయాల అభివృద్ధి సంస్థ పంపిన ప్రతిపాదనలను ప్రభుత్వం పరిశీలిస్తున్నట్లు తెలుస్తోంది. దీనిపై స్పష్టత రాగానే మోకాకు సమాచారం అందించి, ఆసక్తి వ్యక్తీకరణ ప్రకటన (ఆర్‌ఎఫ్‌పీ) జారీ చేయనున్నట్లు ఉన్నతాధికారులు తెలిపారు.

ఏపీలో 9 విమానాశ్రయాల అభివృద్ధి

రాష్ట్రవ్యాప్తంగా మొత్తం 9 విమానాశ్రయాలను రూ.6,418 కోట్ల అంచనా వ్యయంతో అభివృద్ధి చేయాలని ఆంధ్రప్రదేశ్ ప్రభుత్వం ప్లాన్ చేస్తోంది. శ్రీకాకుళం, నాగార్జున సాగర్, తుని-అన్నవరం, తాడేపల్లిగూడెం, ఒంగోలు, అనంతపురం, అమరావతి, దగదర్తి, కుప్పంలను ఈ జాబితాలో చేర్చారు. ఇందులో కుప్పం, శ్రీకాకుళం, అమరావతి విమానాశ్రయాల స్థల క్లియరెన్స్ కోసం మోకాకు ప్రతిపాదనలు పంపగా.. ప్రస్తుతానికి కుప్పం, శ్రీకాకుళం విమానాశ్రయాలకు కేంద్రం నుంచి అనుమతులు వచ్చాయి. అలాగే ఉడాన్ 2.0 పథకం కింద నాగార్జున సాగర్ విమానాశ్రయాన్ని అభివృద్ధి చేసేందుకు వీలుగా మోకాకు ప్రత్యేకంగా దరఖాస్తు చేశారు.

శ్రీకాకుళం విమానాశ్రయం వివరాలు..

రూ.750.52 కోట్ల వ్యయంతో శ్రీకాకుళం విమానాశ్రయాన్ని మొదటి దశలో అభివృద్ధి చేయనున్నారు. ఇందుకోసం 1,185.56 ఎకరాల విస్తీర్ణంలో ముసాయిదా మాస్టర్‌ప్లాన్‌ను అధికారులు సిద్ధం చేశారు. ఈ ప్రాజెక్టును 2030 నాటికి పూర్తి చేయాలని లక్ష్యంగా పెట్టుకున్నారు. దీని అభివృద్ధికి సంబంధించి మూడు విధానాలను పరిశీలిస్తున్నారు.

ఎయిర్‌పోర్ట్ అథారిటీ ఆఫ్ ఇండియా (ఏఏఐ), ప్రైవేట్ భాగస్వామ్యం

ఎయిర్‌పోర్ట్ అథారిటీ ఆఫ్ ఇండియా, రాష్ట్ర ప్రభుత్వ ఉమ్మడి భాగస్వామ్యం

పూర్తిగా ఏఏఐ ద్వారానే విమానాశ్రయం నిర్మాణం చేయడం

ఈ మూడింటిలో ఒక విధానాన్ని త్వరలోనే ఖరారు చేయనున్నారు.

కుప్పం విమానాశ్రయం వివరాలు

కుప్పం విమానాశ్రయానికి సంబంధించి మొదటి దశను రూ.734 కోట్లతో అభివృద్ధి చేయాలని నిర్ణయించగా, రెండు దశలు కలిపి మొత్తం రూ.1,142.10 కోట్లు ఖర్చు చేసేలా సమగ్ర ప్రతిపాదనలను అధికారులు రూపొందించారు. కుప్పం ఎయిర్ పోర్ట్ కోసం 1,788 ఎకరాలను ప్రభుత్వం గుర్తించగా, ఇప్పటికే 1,300 ఎకరాల భూసేకరణ పూర్తయింది. భూసేకరణకు రూ.198.75 కోట్లు, మౌలిక సదుపాయాల కల్పనకు రూ.146 కోట్లు ఖర్చు చేయనున్నారు. త్వరలోనే ఈ విమానాశ్రయాల నిర్మాణాన్ని ఏ విధానంలో అభివృద్ధి చేయనున్నారో ప్రభుత్వం నిర్ణయం తీసుకోనుంది.

Tirumala Laddu Case: తిరుమల లడ్డూ కేసులో సుప్రీంకోర్టు కీలక నిర్ణయం.. విచారణ ఏపీలోనే!

Satyaprasad Bandaru — Thu, 5 Nov 2026 13:31:33 +0530

Tirumala Laddu Case: కోట్లాదిమంది వెంకటేశ్వర స్వామి భక్తుల విశ్వాసాలతో ముడిపడి ఉన్న తిరుమల లడ్డూ ప్రసాదం కల్తీ ఆరోపణల కేసులో సుప్రీంకోర్టు కీలక నిర్ణయం తీసుకుంది. ఈ కేసు విచారణను ఏపీ వెలుపలకు మరో రాష్ట్రానికి బదిలీ చేయాలంటూ దాఖలైన పిటిషన్‌ను సీజేఐ నేతృత్వంలోని ధర్మాసనం నిరాకరించింది.

విచారణ ఏపీలోనే

ఈ కేసు విచారణను ఏపీ వెలుపల వేరే రాష్ట్రానికి మార్చాల్సిన అవసరం లేదని స్పష్టం చేసిన సుప్రీంకోర్టు, కేసు విచారణను ఏపీలోనే కొనసాగించేందుకు గ్రీన్ సిగ్నల్ ఇచ్చింది. విచారణ పారదర్శకంగా జరగాలన్న ఉద్దేశంతోనే సుప్రీంకోర్టు గతంలో సిట్ ఏర్పాటుకు ఆదేశించిన విషయం తెలిసిందే.

అసలేం జరిగింది?

తిరుమల శ్రీవారి లడ్డూ ప్రసాదం తయారీలో వాడే నెయ్యిలో కల్తీ జరిగిందనే ఆరోపణలు దేశవ్యాప్తంగా తీవ్ర సంచలనం సృష్టించాయి. దీనిపై పలువురు నేతలు, భక్తులు సుప్రీంకోర్టును ఆశ్రయించారు. అయితే, ఏపీలో విచారణ నిష్పాక్షికంగా జరగకపోవచ్చనే అనుమానంతో కేసును వేరే రాష్ట్రానికి బదిలీ చేయాలని దాఖలైన విజ్ఞప్తిని సుప్రీంకోర్టు తాజాగా పరిశీలించి, తిరస్కరించింది. ఏపీలోనే న్యాయ ప్రక్రియ కొనసాగుతుందని తేల్చిచెప్పడంతో ఈ అంశంలో కొనసాగుతున్న ఉత్కంఠకు తెరపడింది.

ఈడీ చర్యలు

తిరుమల శ్రీవారి లడ్డూ ప్రసాదానికి నెయ్యి కల్తీ వినియోగంపై ఈడీ కీలక చర్యలు చేపట్టింది. మనీలాండరింగ్ నిరోధక చట్టం కింద నిందితులు, వారి కుటుంబ సభ్యులు, సంస్థలకు చెందిన రూ.129.85 కోట్ల విలువైన స్థిర, చర ఆస్తులను తాత్కాలికంగా అటాచ్ చేసింది. ఈడీ హైదరాబాద్ జోనల్ ఆఫీసు ఈ చర్యలు చేపట్టింది. అటాచ్‌మెంట్‌తో కలిపి ఈ కేసులో ఇప్పటివరకు జప్తు లేదా ఫ్రీజ్ చేసిన ఆస్తుల విలువ రూ.132.55 కోట్లకు చేరినట్లు తెలుస్తోంది.

Also Read: వరుస తుపాన్లతో ఏపీకి తీవ్ర నష్టం - ప్రత్యేక ఆర్థిక ప్యాకేజీ ఇవ్వాలి.. కేంద్ర హోంమంత్రి అమిత్ షాకు పి.వి.ఎన్. మాధవ్ లేఖ!

డెయిరీల ఆస్తులు అటాచ్

ఈడీ చర్యల్లో భాగంగా భోలే బాబా ఆర్గానిక్ డెయిరీ మిల్క్ ప్రైవేట్ లిమిటెడ్, శ్రీ వైష్ణవి డెయిరీ స్పెషాలిటీస్ ప్రైవేట్ లిమిటెడ్ లకు చెందిన ఆస్తులను అటాచ్ చేసినట్లు సమాచారం. భోలే బాబా డెయిరీ ప్రమోటర్లు విపిన్ జైన్, పోమిల్ జైన్, వారి ఫ్యామిలీలకు చెందిన ఆస్తులపైనా ఈడీ చర్యలు తీసుకుంది. సుకృతి ఫుడ్స్ ప్రైవేట్ లిమిటెడ్ ప్రమోటర్ కైలాష్ చంద్ మంగ్లా, ఆయన కుటుంబ సభ్యులకు చెందిన స్థిర, చర ఆస్తులను కూడా ఈడీ అటాచ్ చేసింది.

Also Read: చంద్రగిరి ఎన్నికల్లో మాస్ ట్విస్ట్ -చెవిరెడ్డికి పులివర్తి సుధారెడ్డి షాక్..సైలెంట్‌గా వెళ్లిపోయిన మాజీ ఎమ్మెల్యే!

Pulivarthi Sudha Vs Chevireddy Bhaskar Reddy: చంద్రగిరి ఎన్నికల్లో మాస్ ట్విస్ట్ -చెవిరెడ్డికి పులివర్తి సుధారెడ్డి షాక్..సైలెంట్‌గా వెళ్లిపోయిన మాజీ ఎమ్మెల్యే!

Raja Sekhar Allu — Thu, 5 Nov 2026 11:03:04 +0530

AP Local Body Elections Chandragiri High Drama: చిత్తూరు జిల్లా తిరుపతి సరిహద్దులోని చంద్రగిరి నియోజకవర్గం ఎంపీటీసీ, జడ్పీటీసీ ఎన్నికల పోలింగ్ వేళ అనూహ్యమైన, ఆసక్తికరమైన రాజకీయ ఘట్టం చోటుచేసుకుంది. నియోజకవర్గంలో మొదటి నుంచీ ఉద్రిక్తతలు సృష్టించి, ప్రశాంతంగా పోలింగ్ జరగకుండా అడ్డుకునేందుకు ప్రయత్నిస్తున్నారనే ఆరోపణలు ఎదుర్కొంటున్న వైఎస్సార్‌సీపీ సీనియర్ నేత, మాజీ ఎమ్మెల్యే చెవిరెడ్డి భాస్కర్ రెడ్డికి స్థానిక ఎమ్మెల్యే పులివర్తి నాని సతీమణి పులివర్తి సుధారెడ్డి దిమ్మతిరిగే షాక్ ఇచ్చారు. పోలింగ్ కేంద్రాల వద్దకు వెళ్లి గందరగోళం సృష్టించేందుకు యత్నిస్తున్న చెవిరెడ్డి వ్యూహాలను సుధారెడ్డి నేరుగా రంగంలోకి దిగి తిప్పికొట్టడం నియోజకవర్గంలో చర్చనీయాంశమైంది.

ఎన్నికల వాతావరణాన్ని చెడగొట్టవద్దని చెవిరెడ్డికి సుధారెడ్డి సూచన

ఎన్నికల వాతావరణాన్ని చెడగొట్టవద్దని, ప్రశాంతంగా ఓటింగ్ జరగనివ్వాలని సుధారెడ్డి నేరుగా చెవిరెడ్డికే సూచించడం గమనార్హం. తెలుగుదేశం పార్టీ నేతలను, కార్యకర్తలను అనవసరంగా రెచ్చగొట్టే యత్నాలు మానుకోవాలి అని ఆమె చెవిరెడ్డి ముఖం ముందే సూటిగా స్పష్టం చేశారు. పోలింగ్ జరుగుతున్న ప్రాంతాలను పరిశీలించేందుకు తామిద్దరం కలిసే వెళ్దామని, దమ్ముంటే ఇద్దరం ఒకే కారులో వెళ్లి క్షేత్రస్థాయి పరిస్థితులను చూద్దామని ఆమె విసిరిన సవాలుతో చెవిరెడ్డి భాస్కర్ రెడ్డి తీవ్ర నివ్వెరపోయారు. ఊహించని ఈ పరిణామంతో ఏం మాట్లాడాలో తెలియక చెవిరెడ్డి సైలెంట్ గా వెళ్లిపోయారు.

చంద్రగిరి పరిషత్ ఎన్నికల్లో ఆసక్తికర పరిణామం. చంద్రగిరి నియోజకవర్గంలో ప్రశాంతంగా పోలింగ్ జరగకుండా అడ్డుకునేందుకు ప్రయత్నిస్తున్న చెవిరెడ్డికి దిమ్మతిరిగే షాక్ ఇచ్చిన ఎమ్మెల్యే పులివర్త నాని గారి సతీమణి సుధారెడ్డి గారు . ప్రశాంతంగా ఎన్నికలు జరగనీయండన్న అంటూ సుధారెడ్డి సూచన. టీడీపీ నేతలను అనవసరంగా రెచ్చగొద్దంటూ నేరుగా చెవిరెడ్డికే చెప్పిన పులివర్తి నాని సతీమణి. పోలింగ్ జరుగుతున్న ప్రాంతాలకు కలిసే వెళ్దామంటూ చెవిరెడ్డికి చెప్పిన సుధారెడ్డి. అవసరమైతే నేతలతో కలిసి ఒకే కారులో వెళ్దామన్న సుధారెడ్డి. సుధారెడ్డి సూచనతో కంగుతిన్న చెవిరెడ్డి. సైలెంటుగా అక్కడి నుంచి జారుకునే ప్రయత్నం చేసిన చెవిరెడ్డి భాస్కర్ రెడ్డి. చెవిరెడ్డి ఎటువైపు వెళ్తుంటే అటు వైపే వెళ్దామని... కారు తీయాలంటూ చెవిరెడ్డి వెనుకే వెళ్లిన పులివర్తి నాని గారి సతీమణి.
— Varun ఉవాచ ( o+ve) (@VKsaysso) November 5, 2026

చెవిరెడ్డి వెంటే వెళ్తానన్న సుధారెడ్డి

తెలుగుదేశం నేతలు ప్రదర్శించిన ఈ ఆత్మవిశ్వాసంతో డిఫెన్స్‌లో పడ్డ చెవిరెడ్డి భాస్కర్ రెడ్డి, అక్కడి నుంచి సైలెంట్‌గా జారుకునే ప్రయత్నం చేశారు. అయితే ఆయనను అంతటితో వదలకుండా.. కారు తీయండి, చెవిరెడ్డి ఎటువైపు వెళ్తుంటే మనం కూడా అటువైపే వెళ్దాం అంటూ సుధారెడ్డి తన వాహనంలో ఆయన వెనుకే వెళ్లడం చంద్రగిరి ఎన్నికల బరిలో అసలైన సీన్‌గా మారింది. ఏరియాలో దౌర్జన్యాలు చేయాలని చూసిన వైఎస్సార్‌సీపీ శ్రేణులను సుధారెడ్డి తన వ్యూహాత్మక అడుగులతో కట్టిపడేశారని టీడీపీ కేడర్ పండగ చేసుకుంటోంది.

ఉద్రిక్తతలు తలెత్తకుండా జాగ్రత్తలు

గతంలో చంద్రగిరి నియోజకవర్గంలో ఎన్నికల సమయంలో చెవిరెడ్డి వర్గం ఏకపక్షంగా వ్యవహరించేదని, కానీ ఈసారి కూటమి ప్రభుత్వం అధికారంలో ఉండటం, స్థానిక ఎమ్మెల్యే పులివర్తి నాని కుటుంబం క్షేత్రస్థాయిలో గట్టిగా నిలబడటంతో చెవిరెడ్డి మార్క్ రాజకీయం ఏమాత్రం చెల్లలేదని టీడీపీ నేతలంటున్నారు. భౌతిక ఘర్షణలకు తావివ్వకుండా, నేరుగా ప్రత్యర్థి నేత వద్దకే వెళ్లి ఒకే కారులో వెళ్దాం అని సవాలు విసరడం ద్వారా సుధారెడ్డి పొలిటికల్ మైండ్ గేమ్‌లో చెవిరెడ్డిని పూర్తిగా కోలుకోలేని దెబ్బతీశారు. చంద్రగిరి పరిషత్ ఎన్నికల వేళ చోటుచేసుకున్న ఈ హైడ్రామా సోషల్ మీడియాలోనూ, రాజకీయ వర్గాల్లోనూ తీవ్ర వైరల్‌గా మారింది. చెవిరెడ్డి భాస్కర్ రెడ్డికి సుధారెడ్డి ఇచ్చిన ఈ 'రీసౌండింగ్ షాక్'తో చంద్రగిరిలో పోలింగ్ ప్రక్రియ ప్రశాంత వాతావరణంలో సాగేందుకు దారితీసింది. పారదర్శకంగా ఓటు హక్కు వినియోగించుకునే అవకాశం దక్కడంతో స్థానిక ఓటర్లు సంతోషం వ్యక్తం చేస్తున్నారు.

Raptadu Incident Update: రాప్తాడు దాడి ఘటన.. నిందితుడు హేమంత్‌ కాలు తొలగించిన డాక్టర్లు

Shankar Dukanam — Tue, 3 Nov 2026 12:12:18 +0530

రాప్తాడు: అనంతపురం జిల్లా రాప్తాడులో పదో తరగతి విద్యార్థినిపై రంపంతో దాడి చేసిన నిందితుడు హేమంత్ కుడి కాలును డాక్టర్లు తొలగించారు. అనంతపురం ప్రభుత్వ సర్వజన ఆసుపత్రి సూపరింటెండెంట్ డాక్టర్ మల్లీశ్వరి తెలిపిన వివరాల ప్రకారం, సోమవారం అర్ధరాత్రి దాటిన తర్వాత నిందితుడు హేమంత్‌కు అత్యవసర సర్జరీ నిర్వహించి, కుడి కాలును మోకాలి పైవరకు తొలగించినట్లు తెలిపారు.

దాడిచేసి తప్పించుకునేందుకు యత్నించిన క్రమంలో పోలీసులు జరిపిన కాల్పుల్లో గాయపడిన హేమంత్ కుడి కాలికి తీవ్రంగా రక్తస్రావమై, రక్తప్రసరణ పూర్తిగా నిలిచిపోవడంతో ఆ భాగం కుళ్లిపోతోంది. కాలు సెప్టిక్ అవడంతో ప్రాణాపాయం నుంచి తప్పించేందుకే కాలు తొలగించాల్సి వచ్చిందని ఆమె స్పష్టం చేశారు. అలాగే, అతడి ఎడమ కాలిలోని రక్తనాళాలు కూడా తీవ్రంగా దెబ్బతినడంతో ఆ కాలికి కూడా సర్జరీ చేసినట్లు పేర్కొన్నారు. సర్జరీ పూర్తయ్యాక నిందితుడు హేమంత్‌ను ఆపరేషన్ థియేటర్ నుంచి అడ్వాన్స్డ్ మెడికల్ కేర్ (AMC) విభాగానికి తరలించి చికిత్స అందిస్తున్నారు. ప్రస్తుతం అతడి ఆరోగ్యం నిలకడగా ఉందని అనంతపురం జీజీహెచ్ డాక్టర్లు వెల్లడించారు.

అసలేం జరిగిందంటే..

రాప్తాడులో పదో తరగతి చదువుతున్న గోపిక అనే విద్యార్థినిపై శనివారం నాడు హేమంత్ అనే యువకుడు ఎలక్ట్రిక్ రంపంతో అత్యంత దారుణంగా దాడి చేసి తీవ్రంగా గాయపరిచాడు. ఈ ఘటన రాష్ట్రవ్యాప్తంగా తీవ్ర కలకలం రేపింది. దాడి అనంతరం పరారైన నిందితుడి కోసం పోలీసులు తీవ్రంగా గాలించగా.. మొదట ధర్మవరం రైల్వేస్టేషన్ లైన్ వద్ద దొరికాడని ప్రచారం జరిగింది. ఈ క్రమంలో ఆత్మకూరు అటవీ ప్రాంతంలో అతడు దాక్కున్నట్లు సమాచారం అందడంతో అరెస్ట్ చేసేందుకు ప్రత్యేక పోలీసు బృందం అక్కడకు చేరుకుంది. పోలీసులను చూసిన నిందితుడు లొంగిపోకుండా, తన వద్ద ఉన్న ఆయుధంతో సీఐ వెంకటేశ్‌పై దాడికి యత్నించాడు. పోలీసులపై రాళ్లు సైతం రువ్వి పారిపోయేందుకు యత్నించాడు. ఆత్మరక్షణలో భాగంగా పోలీసులు మొదట గాల్లోకి హెచ్చరిక కాల్పులు జరిపినప్పటికీ, నిందితుడు తగ్గకపోవడంతో.. పోలీసులు అతడి కాళ్లపై కాల్పులు జరిపి అదుపులోకి తీసుకున్నారు. కాల్పుల్లో నిందితుడి కుడి కాలులోకి బుల్లెట్లు దిగడంతో తీవ్రంగా గాయపడ్డాడు. అతడిని చికిత్స నిమిత్తం వెంటనే అనంతపురం ప్రభుత్వాసుపత్రికి తరలించారు. అక్కడ చికిత్స చేసిన డాక్టర్లు అందులో భాగంగా సెప్టిక్ అయిన కుడి కాలును సర్జరీ చేసి తొలగించారు.

YS Jagan: మాజీ సీఎం వైఎస్ జగన్‌పై కేసు నమోదు చేసిన పులివెందుల పోలీసులు

Shankar Dukanam — Tue, 3 Nov 2026 09:53:35 +0530

Pulivendula Municipal Elections | పులివెందుల: వైఎస్‌ఆర్‌సీపీ (YSRCP) అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డిపై పులివెందుల పట్టణ పోలీసులు కేసు నమోదు చేశారు. ఏపీలో పట్టణ స్థానిక సంస్థల ఎన్నికల పోలింగ్ రోజున పులివెందులలోని రిటర్నింగ్ అధికారి (RO) కార్యాలయం ముందు వైఎస్ జగన్ ధర్నా నిర్వహించడంపై పోలీసులు ఈ చర్యలు చేపట్టారు. ఎన్నికల కోడ్, పోలింగ్ నిబంధనలను ఉల్లంఘించారనే ఆరోపణలపై పోలింగ్ రోజు రాత్రే పోలీసులు ఈ కేసును నమోదు చేసినట్లు తెలిపారు.

బెంగళూరు నుంచి హెలికాప్టర్ లో వచ్చిన జగన్ ల్యాండింగ్ సమయంలోనూ వివాదం నెలకొంది. పర్మిషన్ ఇచ్చిన సమయానికంటే ముందుగా వచ్చారంటూ అధికారులు హెలికాప్టర్ ల్యాండింగ్ కు ముందుగా పర్మిషన్ ఇవ్వలేదు. అయితే ఫ్యూయల్ కొరత సమస్య చూపడంతో వెంటనే ల్యాండింగ్ కు పర్మిషన్ ఇచ్చినట్లు జిల్లా కలెక్టర్, ఎస్పీ తెలిపారు. ఎన్నికల సమయంలోనూ జగన్ ఇష్టారీతిన వ్యవహరించారని, ఎన్నికల సమయంలో ఉద్రిక్తతలు జరిగేలా వ్యవహరించడం సరికాదని అదేరోజు అధికారులు సూచించారు. చివరికి ఓటు వేయకుండానే జగన్ వెనుదిరుగుతున్నట్లు స్పష్టం చేస్తూ బెంగళూరుకు వెళ్లిపోయారు.

ఎంపీ అవినాష్ రెడ్డిపై కూడా కేసు
ఎన్నికల నియమావళిని ఉల్లంఘించినందుకు గాను వైఎస్ జగన్‌తో పాటు వైఎస్‌ఆర్‌సీపీ కడప ఎంపీ వైఎస్ అవినాష్ రెడ్డిపై కూడా పోలీసులు కేసు నమోదు చేశారు. ఎన్నికల నిర్వహణకు ఆటంకం కలిగించడం, ముందస్తు అనుమతి లేకుండా నిరసన చేపట్టడంపై అధికారులు విచారణ జరుపుతున్నారు.

8 చోట్ల పూర్తిగా ఏకగ్రీవాలు.. 92 చోట్ల ఎన్నికలు, కౌంటింగ్

రాష్ట్రవ్యాప్తంగా 92 పట్టణ స్థానిక సంస్థల ఓట్ల లెక్కింపు మంగళవారం ఉదయం 8 గంటలకు ప్రారంభమైంది. ఆదివారం ఉదయం 7 నుంచి సాయంత్రం 5 గంటల వరకు నిర్వహించిన పోలింగ్ ప్రక్రియ, కొన్ని చెదురుమదురు ఘటనలు మినహా ప్రశాంతంగా ముగిసినట్లు ఏపీ ఎస్ఈసీ అనిల్ చంద్ర పునేఠా తెలిపారు. పోలింగ్ సమయం ముగిసేసరికి క్యూలైన్లలో ఉన్న ఓటర్లందరికీ ఓటు వేసే అవకాశం కల్పించారు. విజయవాడ కార్పొరేషన్ 55వ డివిజన్‌లో బ్యాలెట్ పేపర్‌పై గుర్తులు తారుమారు కావడంతో ఓటింగ్ ఆలస్యమైంది. దీంతో ఎన్నికల సంఘం రెండున్నర గంటల అదనపు సమయం పొడిగించి, రాత్రి 7:30 గంటల వరకు ఓటు వేసే వెసులుబాటు కల్పించింది. 5 మున్సిపాలిటీల పరిధిలోని 13 పోలింగ్ కేంద్రాల్లో సోమవారం రీపోలింగ్ నిర్వహించారు. మంగళవారం ఉదయం నుంచే లెక్కింపు ప్రక్రియ మొదలవడంతో కౌంటింగ్ కేంద్రాల వద్ద పోలీసులు భారీ భద్రత ఏర్పాటు చేశారు. మధ్యాహ్నానికల్లా గెలుపెవరిదో తేలిపోనుండటంతో అందరి దృష్టి ఈ ఫలితాలపైనే నిలిచింది.

Nara Lokesh Good News: రాప్తాడు దాడి బాలిక ఆరోగ్యంపై మంత్రి నారా లోకేష్ గుడ్ న్యూస్

Shankar Dukanam — Mon, 2 Nov 2026 12:14:33 +0530

అమరావతి: అనంతపురం జిల్లా రాప్తాడు జెడ్పీ స్కూల్లో రంపం దాడిలో గాయపడిన బాలిక ఆరోగ్యంపై కీలక అప్డేట్ వచ్చింది. టెన్త్ విద్యార్థిని గోపిక ఆరోగ్యం క్రమంగా మెరుగుపడుతోంది. బాలిక త్వరగా కోలుకుంటోందని, నేటి సాయంత్రం ఆమెకు వెంటిలేటర్ సపోర్ట్ తొలగించాలని బెంగళూరులోని మణిపాల్ హాస్పిటల్ డాక్టర్లు భావిస్తున్నారు. ఈ విషయాన్ని ఏపీ మంత్రి నారా లోకేష్ తెలిపారు.

ఈ రోజు ఉదయాన్నే ఎంతో సంతోషాన్ని కలిగించే వార్తను డాక్టర్లు అందించారు. రాప్తాడులో ఉన్మాది దాడిలో తీవ్రంగా గాయపడిన టెన్త్ విద్యార్థిని గోపిక ఆరోగ్యం మెరుగుపడుతోంది. ప్రస్తుతం డాక్టర్ల సూచనలను అర్థం చేసుకుని బాలిక స్పందిస్తోంది. ఆ విద్యార్థిని త్వరగా కోలుకోవాలని ప్రార్థిస్తున్న ప్రతి ఒక్కరికీ ఈ విషయం ఎంతో ఊరటనిస్తుంది. బాధిత విద్యార్థిని త్వరగా పూర్తిగా కోలుకుని, చిరునవ్వులతో మన ముందుకు రావాలని నారా లోకేష్ మనస్ఫూర్తిగా కోరుకున్నారు.

update: Good news on the recovering child in Manipal hospital: The panel of doctors have noted steady progress. She is conscious and has been visited by her mother. As her condition continues to improve, doctors plan to remove ventilator support later this evening. We continue to pray for her steady recovery.
— Lokesh Nara (@naralokesh) November 2, 2026

ధైర్యసాహసాలు ప్రదర్శించిన బాలికపై నారా లోకేష్ ట్వీట్

రాప్తాడులో జరిగిన దాడికి గురైన రెండో విద్యార్థిని త్వరగా కోలుకోవాలని ఆంధ్రప్రదేశ్ మొత్తం ప్రార్థిస్తుందని, గోపికను కాపాడేందుకు ప్రయత్నించిన స్నేహితురాలు లక్ష్మి విషయాన్ని నారా లోకేష్ ప్రస్తావించారు. ‘ఓ వ్యక్తి ఎలక్ట్రిక్ రంపంతో వారి స్కూల్లోకి ప్రవేశించినప్పుడు, లక్ష్మి భయపడి పారిపోలేదు. ఆమె ముందడుగు వేసి తన స్నేహితురాలికి రక్షణగా నిలిచింది, ఆ క్రమంలో తీవ్రంగా గాయపడింది. తన ప్రాణాలను తాను కాపాడుకునే అవకాశం ఉన్నప్పటికీ, తన స్నేహితురాలికి తోడుగా నిలిచేందుకే ఆమె మొగ్గు చూపింది.

ప్రస్తుతం ఆ ఇద్దరు బాలికలు ఆసుపత్రిలో చికిత్స పొందుతున్నారు. గాయపడిన లక్ష్మికి వైద్య సేవలు అందిస్తున్నారు. తోటి విద్యార్థిని చూపిన ధైర్యం, త్యాగం నిజమైన స్నేహానికి, శౌర్యానికి నిదర్శనంగా నిలిచాయి. మా ప్రభుత్వం ఈ ఇద్దరు బాలికల కుటుంబాలకు పూర్తి అండగా ఉంటుంది. వారికి అత్యుత్తమ వైద్యం అందేలా చూస్తాం. ఆంధ్రప్రదేశ్‌లోని ఏ చిన్నారి కూడా తరగతి గదిలో అభద్రతా భావానికి గురికాకూడదనే లక్ష్యంతో తగిన చర్యలు తీసుకుంటామని’ నారా లోకేష్ ఎక్స్ ఖాతాలో పోస్ట్ చేశారు.

నిందితుడికి సర్జరీ.. కాళ్లు తొలగించనున్న డాక్టర్లు

రాప్తాడు రంపం దాడి నిందితుడు హేమంత్ అటవీ ప్రాంతంలో పారిపోతుండగా పోలీసులు చుట్టుముట్టారు. అతడు రాళ్లతో, కత్తితో సీఐపై దాడికి యత్నించడంతో పోలీసులు ఆత్మరక్షణ కోసం 6 రౌండ్ల కాల్పులు జరిపారు. తీవ్రంగా గాయపడిన హేమంత్‌ను అనంతపురం GGH ఆసుపత్రికి తరలించారు. అతడి కాళ్లలోకి 3 బుల్లెట్లు దిగడం, తీవ్ర రక్తస్రావం కావడంతో 4 యూనిట్ల రక్తం ఎక్కించారు. ఇన్ఫెక్షన్ కాకుండా నిందితుడి కాళ్లను తొలగించే అవకాశం ఉందని, సీటీ స్కాన్ నివేదికల అనంతరం తదుపరి చికిత్స అందిస్తామని డాక్టర్లు తెలిపారు.

Raptadu Girl Attack Case: రాప్తాడు దాడి నిందితుడి కాళ్లు తొలగించే అవకాశం? బుల్లెట్లు దిగడంతో పరిస్థితి విషమం

Shankar Dukanam — Mon, 2 Nov 2026 08:50:45 +0530

రాప్తాడు: రాప్తాడు నిందితుడు హేమంత్ ను పట్టుకునేందుకు పోలీసులు అటవీప్రాంతంలోకి వెళ్లగా వారిపై ఎదురుదాడికి దిగాడు. రాళ్లు రువ్వడంతో పాటు, కత్తితో దాడికి యత్నించడంతో అప్పమత్తం అయిన పోలీసులు 6 రౌండ్ల కాల్పులు జరిపినట్లు తెలిపారు. అయితే పోలీసుల కాల్పుల్లో తీవ్రంగా గాయపడిన నిందితుడు హేమంత్‌ను చికిత్స నిమిత్తం అనంతపురం ప్రభుత్వ సర్వజన ఆసుపత్రికి (GGH) తరలించారు. నిందితుడి కాళ్లలో 3 బుల్లెట్లు దిగాయని, ముఖానికి తీవ్ర గాయాలయ్యాయని తెలుస్తోంది. అధికంగా రక్తస్రావం కావడంతో ఇప్పటికే 4 యూనిట్ల రక్తం ఎక్కించామని, ప్రస్తుతం ఆక్సిజన్ అందిస్తున్నామని తెలిపారు. కాళ్లను తొలగించే అవకాశం ఉందని, సిటి స్కానింగ్ నివేదికల అనంతరం తదుపరి వైద్యం అందిస్తామని డాక్టర్లు పేర్కొన్నారు.

నిందితుడి పరిస్థితి విషమం

శనివారం రాప్తాడు జెడ్పీ స్కూల్లో బాలికపై రంపంతో దాడి చేసిన నిందితుడు అనంతరం పరారయ్యాడు. ధర్మవరం రైల్వే స్టేషన్ సమీపంలో పోలీసులకు చిక్కాడని సైతం ప్రచారం జరిగింది. ఈ క్రమంలో నిందితుడు ఆత్మకూరు అటవీ ప్రాంతంలోకి పారిపోయాడని సమాచారం అందుకున్న పోలీసులు హేమంత్ ను అరెస్ట్ చేసేందుకు ఆ ప్రాంతాన్ని చుట్టుముట్టారు. నిందితుడు తప్పించుకునే క్రమంలో పోలీసులపై రాళ్లు రువ్వడమే కాకుండా రాప్తాడు సీఐపై కత్తితో దాడికి యత్నించాడు. వెంటనే పోలీసులు ఆత్మరక్షణ కోసం నిందితుడిపై 6 రౌండ్ల కాల్పులు జరిపినట్లు తెలుస్తోంది.

బాలికపై దాడి చేసింది బాబాయ్..

అనంతపురం జిల్లా రాప్తాడు మండలంలో శనివారం ఘోరం చోటుచేసుకుంది. రాప్తాడు జెడ్పీ హైస్కూల్‌లో పదో తరగతి చదువుతున్న గోపిక అనే విద్యార్థినిపై తరగతి గదిలోనే హేమంత్ అనే వ్యక్తి ఎలక్ట్రిక్ రంపంతో దాడికి పాల్పడ్డాడు. ఈ ఘటనలో మరో బాలిక లక్ష్మికి కూడా గాయాలయ్యాయి. కాగా నిందితుడు హేమంత్ బాధిత బాలిక గోపికకు వరుసకు బాబాయి అవుతాడని పోలీసుల ప్రాథమిక విచారణలో తెలిసింది. తల్లిదండ్రులు చనిపోవడంతో అక్క వద్ద ఉన్న అతడి ప్రవర్తన సరిగ్గా లేకపోవడంతో బయటకు పంపేశారు. అనంతరం అనంతపురంలో మార్కెట్లో కూలీగా పనిచేస్తూ గంజాయి అలవాటు చేసుకున్నట్లు ప్రాథమిక విచారణలో తేలింది. విద్యార్థినులపై దారుణంగా దాడి చేసిన హేమంత్‌ను ఎన్‌కౌంటర్ చేయాలని లేదా ఉరితీయాలని బాధిత కుటుంబ సభ్యులు, బంధువులు డిమాండ్ చేస్తున్నారు.