tirupati

TDP In Kuppam Elections: కుప్పం మున్సిపల్ ఎన్నికలు: 11 వార్డుల్లో టీడీపీ ఏకగ్రీవం, పార్టీ శ్రేణుల సంబరాలు

Shankar Dukanam — Wed, 21 Oct 2026 16:51:13 +0530

Municipal Elections | కుప్పం: చిత్తూరు జిల్లాలోని కుప్పం మున్సిపల్ ఎన్నికల ప్రక్రియలో తెలుగుదేశం పార్టీ (TDP) విజయం దిశగా అడుగులు వేస్తూ ఆధిక్యాన్ని ప్రదర్శించింది. కుప్పం మున్సిపాలిటీలోని మొత్తం 32 వార్డులకు గాను ఏకంగా 11 వార్డులను టీడీపీ ఏకగ్రీవంగా కైవసం చేసుకుని తన ప్రాబల్యాన్ని మరోసారి చాటుకుంది.

నామినేషన్ల ఉపసంహరణ, పరిశీలన అనంతరం 5, 6, 18, 19, 20, 22, 23, 25, 26, 28, 30వ వార్డుల్లో ప్రతిపక్షాల పోటీ లేకపోవడంతో టీడీపీ అభ్యర్థులు ఏకగ్రీవంగా ఎన్నికైనట్లు అధికారులు ధ్రువీకరించారు. ఏకగ్రీవంగా ఎన్నికైన అభ్యర్థులకు సంబంధిత రిటర్నింగ్ ఆఫీసర్ డిక్లరేషన్ ఫారాలను అందజేశారు. పోటీ లేకుండానే 11 స్థానాలను గెలుచుకోవడంతో కుప్పంలో టీడీపీ శ్రేణులు సంబరాలు జరుపుకుంటున్నాయి.

కుప్పం మున్సిపల్ ఎన్నికల్లో టీడీపీకి భారీ ఆధిక్యం..

కుప్పంలో 32 వార్డులకు గాను 11 వార్డులు టీడీపీ ఏకగ్రీవం..

ఏకగ్రీవంగా ఎన్నికైన టీడీపీ అభ్యర్థుల వివరాలు

1. 5వ వార్డు : అరుణ్ కుమార్
2. 6వ వార్డు : సింగరవేలు
3. 18 వ వార్డు : నందిని మునిస్వామి
4. 19 వ వార్డు : శిరీష ముకేష్ కుమార్
5. 20 వ వార్డు : కృష్ణన్
6. 22 వ వార్డు : అశ్వినీ మంజునాథ్
7. 23 వ వార్డు : సుల్తానా జాకీర్
8. 25 వ వార్డు : దామోదర్
9. 26 వ వార్డు: సోమశేఖర్
10. 28 వ వార్డు : భారతి చంద్రశేఖర్
11. 30 వ వార్డు : లావణ్య సురేష్

12 మున్సిపాలిటీ, నగర పంచాయతీ చైర్ పర్సన్లు ఏకగ్రీవం..

ఆంధ్రప్రదేశ్‌లో పట్టణ స్థానిక సంస్థల ఎన్నికల్లో పోలింగ్‌కు ముందే అధికార కూటమి (టీడీపీ, జనసేన, బీజేపీ) తమ సత్తా చాటాయి. వైసీపీ అభ్యర్థులు పలుచోట్ల నామినేషన్లు దాఖలు చేయకపోవడం, మరికొన్ని చోట్ల నామినేషన్లు తిరస్కరణకు గురవ్వడంతో 14 పట్టణ స్థానిక సంస్థల్లో ప్రభావం కనిపించింది. వీటిలో ఏకంగా 12 మున్సిపాలిటీలు, నగర పంచాయతీల చైర్మన్ స్థానాల్లో కూటమి అభ్యర్థులు మాత్రమే బరిలో నిలవడంతో వారి విజయం దాదాపు ఖాయమైంది. ఈ 12 ఏకగ్రీవ స్థానాల్లో వైఎస్సార్‌సీపీ అధినేత జగన్ మోహన్ రెడ్డి, మాజీ మంత్రి పెద్దిరెడ్డి రామచంద్రారెడ్డిల సొంత కంచుకోటలైన నియోజకవర్గాల పరిధిలోని 6 మున్సిపాలిటీలు ఉండటం రాష్ట్ర రాజకీయాల్లో హాట్ టాపిక్‌గా మారింది.

టీడీపీ: గుత్తి (అనంతపురం జిల్లా), రాజంపేట, బద్వేలు, కమలాపురం (వైఎస్సార్‌ కడప జిల్లా), రాయచోటి, పుంగనూరు (అన్నమయ్య జిల్లా), నగరి (చిత్తూరు), దాచేపల్లి, గురజాల, పిడుగురాళ్ల (పల్నాడు జిల్లా).

జనసేన: దర్శి (ప్రకాశం జిల్లా)

బీజేపీ: ఎర్రగుంట్ల (కడప)

AP MPTC ZPTC Elections: పల్నాడు, కడప, అన్నమయ్య జిల్లాల్లో మళ్లీ ఉద్రిక్తత.. పలుచోట్ల టీడీపీ, వైసీపీ రాళ్ల దాడులు

Shankar Dukanam — Wed, 21 Oct 2026 14:22:29 +0530

అమరావతి: ఏపీలో ఎంపీటీసీ, జెడ్పీటీసీ ఎన్నికల నామినేషన్లు ప్రారంభమైన తొలిరోజే పలు జిల్లాల్లో ఉద్రిక్తతలు చోటుచేసుకున్నాయి. పల్నాడు జిల్లాలోని నరసరావుపేట, మాచర్ల, ముప్పాళ్ల ప్రాంతాల్లో ఎంపీటీసీ, జడ్పీటీసీ నామినేషన్ల దాఖలు సందర్భంగా తీవ్ర ఉద్రిక్త పరిస్థితులు నెలకొన్నాయి. అభ్యర్థులు నామినేషన్లు దాఖలు చేయడానికి వెళ్తున్న సమయంలో టీడీపీ, వైసీపీ శ్రేణుల మధ్య తీవ్ర వాగ్వాదం, తోపులాట చోటుచేసుకుంది. ఇరువర్గాలు ఒకరిపైకొకరు పోటీపడి నినాదాలు చేసుకుని, చివరికి దాడులకు దిగడంతో నామినేషన్ కేంద్రాల వద్ద తీవ్ర ఘర్షణ వాతావరణం ఏర్పడింది. సమాచారం అందుకున్న పోలీసులు తక్షణమే రంగంలోకి దిగి, పరిస్థితిని అదుపులోకి తెచ్చేందుకు ఇరువర్గాల నాయకులను, కార్యకర్తలను చెదరగొట్టారు.

పుంగనూరులో వైసీపీ, టీడీపీ వర్గీయుల మధ్య రాళ్ల దాడి

స్థానిక సంస్థల (ఎంపీటీసీ, జడ్పీటీసీ) నామినేషన్ల పర్వం అన్నమయ్య జిల్లాల్లోనూ పలుచోట్ల తీవ్ర ఉద్రిక్తతలకు దారితీసింది. అన్నమయ్య జిల్లా పుంగనూరులోని మున్సిపల్ హైస్కూల్ సమీపంలో వైసీపీ, టీడీపీ వర్గీయుల మధ్య చెలరేగిన వివాదం పరస్పరం రాళ్ల దాడికి దారితీసింది. అప్రమత్తమైన పోలీసులు వెంటనే రంగంలోకి దిగి పరిస్థితిని అదుపులోకి తెచ్చారు.

మరోవైపు కడప జిల్లా పరిషత్ కార్యాలయం వద్ద సైతం టీడీపీ, వైసీపీ కార్యకర్తలు పరస్పరం దాడులకు దిగారు. ఈ క్రమంలో గుర్తుతెలియని వ్యక్తులు వారిపై రాళ్లు రువ్వడంతో అక్కడ భయాందోళన వాతావరణం నెలకొంది. పల్నాడు జిల్లా నరసరావుపేట ఆర్డీవో ఆఫీసులోని నామినేషన్ కేంద్రం వద్ద పిడుగురాళ్ల జడ్పీటీసీ వైసీపీ అభ్యర్థి భారతి, ఆమె భర్త లక్ష్మారెడ్డిపై ప్రత్యర్థులు దాడికి పాల్పడ్డారు. గాయాలపాలైన లక్ష్మారెడ్డిని చికిత్స నిమిత్తం ఆస్పత్రికి తరలించారు.

పల్నాడు జిల్లాలో నేతల హౌస్ అరెస్టులు

ఎంపీటీసీ, జడ్పీటీసీ నామినేషన్ల ప్రక్రియ సందర్భంగా పల్నాడు జిల్లాలో ఎలాంటి అవాంఛనీయ ఘటనలు జరగకుండా పోలీసులు ముందస్తు చర్యలు చేపట్టారు. పలువురు కీలక వైసీపీ నేతలను గృహనిర్బంధం చేయడంతో పాటు మరికొందరిని అదుపులోకి తీసుకున్నారు. మాచర్లలో మాజీ ఎమ్మెల్యే పిన్నెల్లి రామకృష్ణారెడ్డిని, పిడుగురాళ్లలో గురజాల మాజీ ఎమ్మెల్యే కాసు మహేశ్‌రెడ్డిని, వినుకొండలో మాజీ ఎమ్మెల్యే బొల్లా బ్రహ్మనాయుడిని బయటకు రాకుండా పోలీసులు వారి నివాసాల్లోనే హౌస్ అరెస్ట్ చేశారు. నరసరావుపేట నియోజకవర్గంలో పల్నాడు జిల్లా రైతు విభాగం అధ్యక్షుడు అన్నెం పున్నారెడ్డి సహా రొంపిచర్ల మండలానికి చెందిన మాజీ సర్పంచ్‌లు, స్థానిక నేతల నివాసాల వద్ద పోలీసు పహారా ఏర్పాటు చేసి, శాంతిభద్రతలను పరిరక్షించేందుకు భద్రతను కట్టుదిట్టం చేశారు.

Also Read: AP Local Body Election: నామినేషన్ దాఖలు పొడిగింపుపై ఏపీ ఎస్ఈసీకి సుప్రీంకోర్టు కీలక ఆదేశాలు

నరసరావుపేటలో వైయస్‌ఆర్‌సీపీ జెడ్పీటీసీ అభ్యర్థిగా నామినేషన్ వేయడానికి వస్తే.. టీడీపీ గూండాలు దాదాపు 10 మంది నా చీర లాగి వివస్త్రను చేయడానికి ప్రయత్నించారని వంగా పద్మావతి ఆరోపించారు. నామినేషన్ పత్రాలతో పాటు హ్యాండ్ బ్యాగ్‌ను కూడా రోడ్డుపైనే చించేశారని ఆవేదన వ్యక్తం చేశారు.

ప్రొద్దుటూరులో ఎమ్మెల్సీ రమేష్ యాదవ్ ని పోలీసులు హౌస్ అరెస్ట్ చేశారు. జెడ్పీటిసి, ఎంపీటీసీ నామినేషన్ వేయకుండా వైసీపీ అభ్యర్థులను అడ్డుకునేందుకు కుట్రలు చేస్తున్నారని ఆరోపించారు. అభ్యర్థులకి మద్దతుగా వెళ్లాలని చూస్తున్న రమేష్ యాదవ్ కి నోటీసులు ఇచ్చి హౌస్ అరెస్ట్ చేశారని పార్టీ నేతలు అంటున్నారు.

YS Jagan In Pulivendula: ఈ 21నుంచి 3 రోజులు పులివెందులలోనే జగన్.. దగ్గరుండి వైసీపీ నామినేషన్లు పర్యవేక్షణ

Shankar Dukanam — Tue, 20 Oct 2026 15:21:51 +0530

YS Jagan to Visit Pulivendula | పులివెందుల: ఏపీలో స్థానిక సంస్థల ఎన్నికల వేళ వైఎస్సార్ సీపీ అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డి కీలక నిర్ణయం తీసుకున్నారు. స్థానిక సంస్థల ఎన్నికల పర్యవేక్షణలో భాగంగా ఆయన ఈ నెల 21వ తేదీన తన సొంత నియోజకవర్గమైన పులివెందులకు రానున్నారు. ఈ నెల 21, 22, 23 తేదీలలో మూడు రోజుల పాటు జగన్ నియోజకవర్గంలోనే అందుబాటులోనే ఉండనున్నారు. వైసీపీ తరఫున బరిలో నిలుస్తున్న జెడ్పీటీసీ (ZPTC), ఎంపీటీసీ (MPTC) అభ్యర్థుల నామినేషన్ల దాఖలు ప్రక్రియను ఆయన స్వయంగా దగ్గరుండి పరిశీలించి పర్యవేక్షించనున్నారు. జగన్ స్వయంగా రంగంలోకి దిగుతుండటంతో పులివెందుల నియోజకవర్గ రాజకీయం ఒక్కసారిగా ఆసక్తికరంగా మారింది.

ఏపీలో పట్టణ స్థానిక సంస్థల ఎన్నికలలో టీడీపీ, వైసీపీ పరస్పర దాడులు, గొడవల కారణంగా కొన్ని ప్రాంతాల్లో నామినేషన్లు దాఖలు కాలేదు. పులివెందుల, పుంగనూరు, కడప, రాయచోటి, దర్శి, కుప్పం తదితర ప్రాంతాల్లో వైఎస్సార్‌సీపీ అభ్యర్థులను నామినేషన్లు వేయనివ్వకుండా అడ్డుకున్నారని వైఎస్సార్‌సీపీ అధినేత వైఎస్ జగన్ తీవ్ర ఆగ్రహం వ్యక్తం చేశారు. ముఖ్యంగా జగన్, పెద్దిరెడ్డి రాంచంద్రారెడ్డి ఇలాకాలోనే 6 చోట్ల చైర్ పర్సన్ స్థానాలకు నామినేషన్లు వైసీపీ నుంచి నామినేషన్లు రాలేదు. నామినేషన్లు అడ్డుకోవడంతో పాటు వాటి పరిశీలన సమయంలో పత్రాలు చించివేయడం వల్ల ప్రజాస్వామ్యం కూనీ అయిందన్నారు. రాష్ట్రంలో అరాచకాలు జరుగుతున్నాయని గవర్నర్ అబ్దుల్ నజీర్, రాష్ట్ర ఎన్నికల కమిషనర్ అనిల్ చంద్ర పునేఠాకు స్వయంగా వెళ్లి వివరించినా ఫలితం దక్కలేదని ఆవేదన వ్యక్తం చేశారు.

మళ్లీ మన టైం వస్తుందన్న జగన్

ఇప్పుడు వారి టైమ్ నడుస్తోంది, కొడుతున్నారు.. మనం పడదాం.. మళ్లీ మన టైమ్ వస్తుందని జగన్ వైసీపీ శ్రేణులకు భరోసా ఇచ్చారు. అంతేకాకుండా తీవ్రమైన దాడులు, వేధింపులు ఎదురవుతున్నా, గాయపడి రక్తమోడుతున్నా సరే వైఎస్సార్‌సీపీ నాయకులు, కార్యకర్తలు వెనుకాడకుండా నామినేషన్లు వేయడానికి ముందుకు వస్తూ పోరాడుతున్న తీరును ప్రశంసించారు. అయితే గ్రామీణ స్థానిక సంస్థల ఎన్నికల్లో అలాంటి ఘటనలు రిపీట్ కాకుండా ఉండాలని జగన్ బెంగళూరు నుంచి పులివెందుకులకు రావాలని నిర్ణయించుకున్నారు. అక్టోబర్ 21 నుంచి ఎంపీటీసీ, జడ్పీటీసీ స్థానాల ఎన్నికల నామినేషన్లు ప్రారంభమవుతాయి. ఈ 23 వరకు నామినేషన్లు దాఖలకు ఏస్ఈసీ అవకాశం కల్పించింది. అయితే పట్టణ స్థానిక సంస్థల్లో మొత్తం 14 స్థానాల్లో వైసీపీ అభ్యర్థులు నామినేషన్లు వేయలేకపోగా, అందులో 2 చోట్ల వైసీపీ ప్రకటించిన వారు కాకుండా డమ్మీ అభ్యర్థులు నామినేషన్లు వేశారు. మొత్తం 12 మున్సిపాలిటీ, నగర పంచాయతీల్లో 10 చోట్ల టీడీపీ, జనసేన, బీజేపీ చెరో స్థానంలో ఏకగ్రీవం కానున్నాయి.

AP Local Body Elections: పట్టణ స్థానిక పోరులో కూటమి హవా- జగన్, పెద్దిరెడ్డి కంచుకోటల్లో 6 సహా 12 చైర్మన్లు ఏకగ్రీవం!

Shankar Dukanam — Tue, 20 Oct 2026 12:25:47 +0530

అమరావతి: ఆంధ్రప్రదేశ్‌లో జరగనున్న పట్టణ స్థానిక సంస్థల ఎన్నికల్లో పోలింగ్‌కు ముందే అధికార కూటమి పార్టీల హవా కొనసాగుతోంది. వైసీపీ అభ్యర్థులు నామినేషన్లు దాఖలు చేయకపోవడంతో మున్సిపాలిటీలు, నగర పంచాయతీల చైర్మన్లు ఏకగ్రీవాలు అవుతున్నాయి.

ఏపీలో దాదాపు 14 పట్టణ స్థానిక సంస్థల్లో వైసీపీ ఛైర్‌పర్సన్‌ అభ్యర్థులు పోటీలో లేరు. కొన్నిచోట్ల నామినేషన్లు తిరస్కరణకు గురవ్వడం, మరికొన్ని చోట్ల నామినేషన్లే వేయకపోవడంతో ఏకంగా 12 పురపాలక స్థానాల్లో కూటమి (టీడీపీ, జనసేన, బీజేపీ) అభ్యర్థులు మాత్రమే బరిలో ఉన్నారు. దాంతో 12 స్థానాల్లో కూటమి విజయం కన్ఫామ్ అయింది. ఈ 12 స్థానాల్లో మాజీ సీఎం, వైసీపీ అధినేత వైఎస్‌ జగన్‌మోహన్‌రెడ్డి, మాజీ మంత్రి పెద్దిరెడ్డి రామచంద్రారెడ్డిల కంచుకోటలైన నియోజకవర్గాల్లోనే 6 మున్సిపాలిటీలు, నగర పంచాయతీలు ఉన్నాయి.

ప్రస్తుత సమాచారం ప్రకారం ఏకగ్రీవం కానున్న ఛైర్‌పర్సన్‌ స్థానాలు

టీడీపీ: దాచేపల్లి, గురజాల, పిడుగురాళ్ల (పల్నాడు జిల్లా), రాజంపేట, బద్వేలు, కమలాపురం (వైఎస్సార్‌ కడప జిల్లా), రాయచోటి, పుంగనూరు (అన్నమయ్య జిల్లా), నగరి (చిత్తూరు), గుత్తి (అనంతపురం జిల్లా).

జనసేన: దర్శి (ప్రకాశం జిల్లా)

బీజేపీ: ఎర్రగుంట్ల (కడప)

వైఎస్సార్‌ కడప జిల్లాలోని 9 పట్టణ స్థానిక సంస్థల విషయానికి వస్తే.. మైదుకూరులో ఎన్నిక వాయిదా పడింది. కడప కార్పొరేషన్, పులివెందుల, జమ్మలమడుగుల్లో మాత్రమే వైసీపీ అభ్యర్థులు పోటీలో ఉన్నారు. అందులోనూ జమ్మలమడుగులో వైసీపీ ప్రకటించిన ఎమ్మెల్సీ రామసుబ్బారెడ్డి సతీమణి ఇందిర నామినేషన్‌ వేయలేకపోయారు. డమ్మీ అభ్యర్థిగా మాజీ మంత్రి శివారెడ్డి కుమార్తె హైమావతినే పార్టీ తరఫున ఛైర్‌పర్సన్‌గా బరిలో నిలవనున్నారు. రాజంపేట మున్సిపాలిటీలో ఒరిజినల్‌ డాక్యుమెంట్లకు బదులు జిరాక్స్‌ కాపీలు ఇవ్వడం, నో డ్యూ సర్టిఫికెట్లు జతచేయకపోవడంతో వైసీపీ అభ్యర్థుల నామినేషన్లు తిరస్కరణకు గురయ్యాయి. దీంతో అక్కడ టీడీపీ అభ్యర్థి దొంతం గాయత్రి ఏకగ్రీవంగా నెగ్గనున్నారు.

ప్రొద్దుటూరు, బద్వేలు మున్సిపాలిటీల్లోనూ నామినేషన్ల లోపాల వల్ల వైసీపీ అభ్యర్థులు అనర్హులయ్యారు. బద్వేలులో టీడీపీ అభ్యర్థి దివ్యతేజ ఏకగీవ్రం కానున్నారు. ఎర్రగుంట్లలో వైసీపీ పోటీచేయకపోవడం, జనసేన అభ్యర్థి విత్ డ్రా చేసుకోవడంతో బీజేపీ అభ్యర్థి గెలుపు ఖాయమైంది. కమలాపురంలోనూ టీడీపీ అభ్యర్థి మాత్రమే నామినేషన్ వేశారు. వైఎస్ జగన్ సొంత నియోజకవర్గమైన పులివెందులలోని 40 వార్డుల్లో వైసీపీ 15 స్థానాల్లో నామినేషన్లు వేయలేకపోయింది. ఇక అన్నమయ్య జిల్లాలోని రాయచోటి, పుంగనూరులలో వైసీపీ నుంచి నామినేషన్ కూడా పడలేదు.

పల్నాడు జిల్లా గురజాల నియోజకవర్గంలోని 3 స్థానాలనూ కూటమి ఏకగ్రీవంగా కైవసం చేసుకోనుంది. దాచేపల్లిలో డిపాజిట్ రసీదు లేకపోవడం, పిడుగురాళ్లలో నిర్దేశిత టైమ్ మించిపోవడం వల్ల వైసీపీ అభ్యర్థుల నామినేషన్లు తిరస్కరణకు గురయ్యాయి. గురజాలలో వైసీపీ అభ్యర్థులు నామినేషన్ వేయకుండానే వెనుతిరిగారు. అనంతపురం జిల్లా గుత్తి మున్సిపాలిటీలో వైసీపీ అభ్యర్థి నామినేషన్ వేయకపోవడంతో టీడీపీ గెలుపు ఏకగ్రీవమైంది.

ప్రకాశం జిల్లా దర్శి మున్సిపాలిటీలో వైసీపీ పోటీ లేకపోవడంతో జనసేన అభ్యర్థి గెలుపొందనున్నారు. కనిగిరిలో వైసీపీ నామినేషన్ రిజెక్ట్ కావడంతో టీడీపీ, కాంగ్రెస్ ల మధ్య పోటీ మిగిలింది. చిత్తూరు జిల్లా నగరిలోనూ స్వీయ ధ్రువీకరణ లోపాల వల్ల వైసీపీ అభ్యర్థుల నామినేషన్లు చెల్లకుండా పోయాయి. దాంతో టీడీపీ చైర్మన్ అభ్యర్థి ఏకగ్రీవం కానున్నారు. తిరుపతిలో 15 డివిజన్లు, పలమనేరులో 6 వార్డుల్లో వైసీపీ నామినేషన్లు వేయకపోవడంతో పోటీకి దూరమైంది.

Deputy CM Pawan Kalyan: పల్లె పండుగ రోడ్డు తవ్వేసిన వైసీపీ నేతలపై నాన్ బెయిలబుల్ కేసులకు పవన్ కళ్యాణ్ ఆదేశం

Shankar Dukanam — Mon, 19 Oct 2026 13:47:12 +0530

Palle Panduga Road in Tirupati District | అమరావతి: పల్లెపండుగ కార్యక్రమం ద్వారా నిర్మించిన రోడ్డును ధ్వంసం చేసిన ఘటనను ఏపీ ఉప ముఖ్యమంత్రి, పంచాయతీరాజ్ గ్రామీణాభివృద్ధి శాఖ మంత్రి పవన్ కళ్యాణ్ తీవ్రంగా పరిగణించారు. ప్రభుత్వ ఆస్తులు ధ్వంసం చేసిన వైసీపీ నేత సుబ్బారెడ్డిపై చట్ట ప్రకారం కఠిన చర్యలు తీసుకోవాలని ఇంజనీరింగ్ అధికారులను ఆయన ఆదేశించారు. తిరుపతి జిల్లా పుల్లంపేట మండల పరిధిలోని అనంతసముద్రం, పాపక్కగారిపల్లె గ్రామాల మధ్యరోడ్డు ధ్వంసం, తదుపరి చర్యలపై పంచాయతీరాజ్, గ్రామీణాభివృద్ధి శాఖ ఇంజనీరింగ్ ఉన్నతాధికారులతో నిర్వహించిన సమీక్షలో పవన్ కళ్యాణ్ ఈ ఆదేశాలు జారీ చేశారు.

వారం రోజుల క్రితం పల్లెపండుగ 3.0 ద్వారా రూ. 4.75 కోట్లతో నిర్మించిన రోడ్డును సుబ్బారెడ్డి అనే వ్యక్తి, వెంకటసుబ్బారెడ్డి అనే మరో వ్యక్తి సాయంతో 100 మీటర్ల మేర ట్రాక్టర్‌తో దున్నేశారు. గ్రామస్థులు ఇచ్చిన సమాచారం మేరకు ఇప్పటికే ఎఫ్‌ఐఆర్ నమోదు చేసినట్లు అధికారులు డిప్యూటీ సీఎం పవన్ కళ్యాణ్‌కు వివరించారు. బాధ్యులను అరెస్టు చేసి మెజిస్ట్రేట్ ఎదుట హాజరుపరుస్తామని తెలిపారు.

ఈ సందర్భంగా పవన్ కళ్యాణ్ అధికారులకు స్పష్టమైన దిశానిర్దేశం చేశారు. ప్రజలకు సౌకర్యం కలిగించే ప్రభుత్వ ఆస్తులను ధ్వంసం చేయడం క్షమించరాని నేరమని, పల్లెపండుగ రోడ్డు ధ్వంసం చేసిన బాధ్యులపై నాన్ బెయిలబుల్ సెక్షన్ల కింద కేసులు పెట్టాలని పవన్ కళ్యాణ్ ఆదేశించారు. ప్రజాధనంతో నిర్మించిన రహదారిని ధ్వంసం చేసిన నాయకులు, వారి వెనుక ఉన్నవారిని చట్టం ముందు నిలబెట్టాలని స్పష్టం చేశారు. అదేవిధంగా అనంతసముద్రం- పాపక్కగారిపల్లె రోడ్డు ధ్వంసానికి కారణమైన వ్యక్తులపై రెవెన్యూ రికవరీ యాక్ట్ వర్తింపజేసి, జరిగిన నష్టాన్ని వారి నుంచే వసూలు చేసేలా చర్యలు తీసుకోవాలని అధికారులను ఆదేశించారు.

ఆంధ్రప్రదేశ్ ప్రభుత్వం గ్రామీణ ప్రాంతాల సమగ్ర అభివృద్ధి, మౌలిక సదుపాయాల కల్పన లక్ష్యంగా ‘పల్లె పండుగ’ కార్యక్రమాన్ని ప్రతిష్టాత్మకంగా తీసుకుని చేపట్టింది. పంచాయతీరాజ్, గ్రామీణాభివృద్ధి శాఖల ఆధ్వర్యంలో ఉపాధి హామీ నిధులతో డిప్యూటీ సీఎం పవన్ కళ్యాణ్ చొరవతో కూటమి ప్రభుత్వం ఈ కార్యక్రమాన్ని నిర్వహిస్తోంది.

పల్లె పండుగ 3.0

ఇటీవల పల్లె పండుగ 3.0 కింద నెల్లూరు జిల్లా ఉదయగిరి నియోజకవర్గం, వరికుంటపాడు మండలం రామాపురం గ్రామంలో రోడ్ల నిర్మాణం కార్యక్రమానికి శ్రీకారం చుట్టింది. 11,085 కోట్ల వ్యయంతో గ్రామీణాభివృద్ధి పనులను రాష్ట్ర ప్రభుత్వం సెప్టెంబర్ 29న ప్రారంభించింది. దీని ద్వారా గ్రామాల్లో సిమెంట్ రోడ్ల నిర్మాణం, గోకులాల (పాడి పశువుల పాకలు) నిర్మాణం, గ్రామ పంచాయతీ భవనాలు, మరియు పారిశుధ్య పనులను చేపడుతున్నారు. పల్లె పండుగ ద్వారా గ్రామీణ ప్రజల జీవన ప్రమాణాలు పెంచడం, మౌలిక వసతులు మెరుగుపరచడం, స్థానికంగా ఉపాధిని కల్పించడమే ఈ పథకం ముఖ్య ఉద్దేశం.

AP Local Body Elections: పట్టణ స్థానిక ఎన్నికల్లో వైసీపీకి ఎదురుదెబ్బ.. 8 స్థానాల్లో ఛైర్‌పర్సన్లు ఏకగ్రీవం

Shankar Dukanam — Mon, 19 Oct 2026 08:14:40 +0530

AP Municipal Elections 2026 | అమరావతి: ఆంధ్రప్రదేశ్‌లో పురపాలక ఎన్నికల ప్రక్రియలో భాగంగా నామినేషన్ల దాఖలు గడువు ముగియగా నేడు (అక్టోబర్ 19) నామినేషన్ల పరిశీలన జరుగుతుంది. 6 మున్సిపాలిటీలు, 2 నగర పంచాయతీలలో అధికార కూటమి (టీడీపీ- జనసేన- బీజేపీ) అభ్యర్థులు ఏకగ్రీవమయ్యే అవకాశాలు కనిపిస్తున్నాయి. ఆ 8 స్థానాల్లో ముఖ్యంగా 6 మున్సిపాలిటీల్లో వైసీపీ నుంచి నామినేషన్లు రాలేదు. మరో 2 చోట్ల వైసీపీ డమ్మీ అభ్యర్థుల నామినేషన్లు వచ్చాయని తెలుస్తోంది. ఈ ఎన్నికల్లో నామినేషన్ల ఉపసంహరణకు ఈ నెల 21వ తేదీ వరకు గడువు ఇచ్చారు. అనంతరం ఈ నెల 28న మున్సిపల్ ఎన్నికల పోలింగ్, అక్టోబర్ 30న ఓట్ల లెక్కింపు, ఫలితాల వెల్లడి జరగనున్నాయి.

పోటీ లేకుండానే కూటమికి ఛైర్ పర్సన్ పదవులు

ఈ మున్సిపల్ ఎన్నికల్లో వైసీపీ అభ్యర్థులు నామినేషన్లు దాఖలుచేయని దర్శి, పిడుగురాళ్ల, మైదుకూరు, ఎర్రగుంట్ల, రాయచోటి, పుంగనూరు పురపాలక సంఘాలతో పాటు గురజాల, కమలాపురం నగర పంచాయతీల్లో ఛైర్‌పర్సన్‌ స్థానాలు కూటమికి ఏకగ్రీవం కానున్నాయి. మరోవైపు కడప జిల్లా జమ్మలమడుగు, అనంతపురం జిల్లా గుత్తిలో వైసీపీ ప్రకటించిన అభ్యర్థులు కాకుండా డమ్మీ అభ్యర్థులు నామినేషన్లు వేశారు. అక్కడ సైతం వారు నామినేషన్ ఉపసంహరించుకుంటే ఏకగ్రీవం అయ్యే ఛాన్స్ ఉంది.

మూడు రోజులపాటు జరిగిన నామినేషన్ ప్రక్రియలో భాగంగా మున్సిపాలిటీలు, కార్పొరేషన్లకు కలిపి మేయర్, ఛైర్‌పర్సన్ పదవులకు 1,338 నామినేషన్లు దాఖలయ్యాయి. అలాగే రాష్ట్రవ్యాప్తంగా కార్పొరేషన్లు, మున్సిపాలిటీలు, నగర పంచాయతీల వార్డు/ డివిజన్ స్థానాలకు మొత్తం 24,451 నామినేషన్లు సమర్పించారు. ఈ మున్సిపాలిటీ ఎన్నికల్లో వైసీపీకి ఎదురుదెబ్బ తగిలింది. పలు మున్సిపాలిటీల్లో అభ్యర్థులు లభించక లేదా నామినేషన్లు వేయలేక పోటీకి దూరంగా కావాల్సిన పరిస్థితి ఏర్పడింది.

ముఖ్యంగా ప్రకాశం జిల్లా దర్శి, పల్నాడు జిల్లా పిడుగురాళ్ల మున్సిపాలిటీలు, గురజాల నగర పంచాయతీలో వైసీపీ తరఫున ఒక్క నామినేషన్ కూడా దాఖలు కాలేదు. కడప జిల్లాలోని ఎర్రగుంట్ల, మైదుకూరు మున్సిపాలిటీలు, కమలాపురం నగర పంచాయతీతో పాటు అన్నమయ్య జిల్లా రాయచోటి, పుంగనూరు మున్సిపాలిటీల్లోనూ వైసీపీ నుంచి నామినేషన్లు రాలేదు.

కొన్ని చోట్ల వైసీపీ డమ్మీ అభ్యర్థులు

మరోవైపు జమ్మలమడుగు, గుత్తి వంటి ప్రాంతాల్లో వైసీపీ ప్రటించిన అభ్యర్థుల స్థానంలో డమ్మీ అభ్యర్థులు నామినేషన్లు వేశారు. ఒకవేళ ఆ డమ్మీ అభ్యర్థులు నామినేషన్లను ఉపసంహరించుకుంటే, అక్కడ కూడా చైర్ పర్సన్ స్థానాలు ఏకగ్రీవం అయ్యే అవకాశం ఉంది. సుమారు 388కి పైగా వార్డుల్లో వైసీపీ అభ్యర్థుల నామినేషన్లే పడలేదు. ఎన్నికల కమిషన్ నామినేషన్ల పరిశీలన, ఉపసంహరణ గడువు ముగిస్తే అభ్యర్థుల జాబితా, నామినేషన్లు లేని వార్డుల సంఖ్యపై క్లారిటీ వస్తుంది. కూటమి పార్టీలు మాత్రం ఘన విజయం సాధిస్తామని ధీమాగా ఉన్నాయి. అయితే తమకు అభ్యర్థులను ఖరారు చేసే టైం ఇవ్వకుండా కూటమి ప్లాన్ ప్రకారం రిజర్వేషన్లు ప్రకటించి, ఎన్నికల నామినేషన్ల ప్రక్రియ పూర్తి చేసిందని వైసీపీ అధినేత, మాజీ సీఎం జగన్ మోహన్ రెడ్డి ఆరోపించారు. ఏపీ ఎస్ఈసీ అనిల్ చంద్ర పునేఠా సీఎం చంద్రబాబు వీరవిధేయుడని, కూటమి పార్టీలకు అనూకూలంగా ఎన్నికల ప్రక్రియ మొదలుపెట్టారని వ్యాఖ్యానించారు.

IIT Tirupati Canadian GeoAI Agreement : IIT తిరుపతి , వన్‌ ఇండియాతో కెనడా జియో ఏఐ సంస్థ ఒప్పందాలు.. విద్యార్థులకు ఏం లాభం?

Nagesh GV — Sun, 18 Oct 2026 21:06:42 +0530

Canadian GeoAI Agreements With IIT Tirupati One India : ఆర్టిఫిషియల్ ఇంటెలెజెన్స్(AI), భౌగోళిక సమాచార సాంకేతికత (GeoAI) రంగాల్లో పని చేస్తున్న కెనడాకు చెందిన డీప్‌స్పేషియల్ Deepspacial సంస్థ భారత్‌లో తన కార్యకలాపాలను విస్తరించేందుకు కీలక ఒప్పందాలు చేసుకుంది. టీమ్ కెనడా వాణిజ్య ప్రతినిధి బృందం భారత్ పర్యటనలో భాగంగా అక్టోబర్ 16న బెంగళూరులో ఐఐటీ తిరుపతికి చెందిన టెక్నాలజీ ఇన్నోవేషన్ హబ్‌తో పాటు డిజిటల్ న్యూస్ ప్లాట్‌ ఫామ్ వన్‌ ఇండియాతో ఒప్పందాలు కుదుర్చుకుంది. కెనడా ఇంటర్నేషనల్ ట్రేడ్ మంత్రి మణిందర్ సిద్దు సమక్షంలో ఈ ఒప్పందాలు జరిగాయి. ఇండియాలో పర్యటిస్తున్న 300మంది కెనడా వాణిజ్య బృందానికి ఆయన నేతృత్వం వహిస్తున్నారు.

టొరంటో కేంద్రంగా పనిచేస్తున్న డీప్‌ స్పేషియల్ సంస్థ.. ఈ ఒప్పందాల ద్వారా ఒకవైపు జియో ఏఐ పరిశోధన, సాంకేతిక అభివృద్ధిపై దృష్టి పెట్టనుండగా మరోవైపు విద్యార్థుల్లో వార్తలపై అవగాహన, డిజిటల్ మీడియా లిటరసీని పెంపొందించేందుకు ప్రయత్నించనుంది.

ఐఐటీ తిరుపతితో స్పేషియల్ ఏఐ పరిశోధన

ఐఐటీ తిరుపతికి చెందిన నవవిష్కార్ ఐ-హబ్ ఫౌండేషన్ (IITTNiF)తో డీప్‌ స్పేషియల్ ఒప్పందం కుదుర్చుకుంది. ఇందులో భాగంగా జియో స్పేషియల్ టెక్నాలజీస్, జియోగ్రాఫిక్ ఇన్ఫర్మేషన్ సిస్టమ్స్ (GIS), పొజిషనింగ్ సిస్టమ్స్, స్పేషియల్ ఏఐ రంగాల్లో సంయుక్తంగా పరిశోధనలు చేపట్టనున్నాయి. పరిశోధన, అభివృద్ధితో పాటు సాంకేతిక పరిజ్ఞానాన్ని వాణిజ్యపరంగా వినియోగించడం, స్టార్టప్‌లకు ప్రోత్సాహం, స్కిల్ డవలప్‌మెంట్, పరిశ్రమలు - విద్యాసంస్థల మధ్య సహకారాన్ని పెంపొందించడం ఈ భాగస్వామ్యంలో భాగంగా ఉన్నాయి.

డీప్‌స్పేషియల్‌కు చెందిన ప్రపంచస్థాయి జియో ఏఐ మెంటార్‌షిప్ కార్యక్రమం ‘ఎక్స్‌ప్లూర్‌’ Xplore ను స్పిన్ ల్యాబ్స్ నెట్‌వర్క్ ద్వారా ప్రారంభించనున్నారు. దీని ద్వారా విద్యార్థులు, కొత్తగా ప్రోఫెషనల్ కెరీర్ ప్రారంభిస్తున్న వారికి జియో ఏఐ, ఆర్టిఫిషియల్ ఇంటెలిజెన్స్, డేటా సైన్స్ రంగాల్లో ప్రాక్టికల్ అనుభవం కల్పించనున్నారు. ఈ ఒప్పందంపై ఐఐటీ తిరుపతి టెక్నాలజీ ఇన్నోవేషన్ హబ్ ప్రాజెక్ట్ డైరెక్టర్ డాక్టర్ రోషన్ కె. శ్రీవాస్తవ, డీప్‌స్పేషియల్ వ్యవస్థాపకుడు, సీఈఓ డాక్టర్ రాహుల్ కుష్వాహా సంతకాలు చేశారు.

ఈ ఒప్పందం రియల్‌ వరల్డ్‌లో GeoAI టెక్నాలజీ సొల్యూషన్స్ అందించాలన్న మా లక్ష్యాలను మరింత దగ్గర చేస్తుంది Navaviskar ఒప్పందం మా పరిశోధన, ఆవిష్కరణ, టాలెంట్ డవలప్‌మెంట్ ఎకోసిస్టమ్‌ను బలోపేతం చేస్తందన్నారు. వన్ ఇండియాతో ఒప్పందం నమ్మకమైన సమాచారాన్ని అందించడంతో పాటు.. విద్యార్థులో డిజిటల్ లిటరసీని పెంపొందిస్తుందని చెప్పారు.

One Indiaతో ఒప్పందం

ఇండియాలో వన్ ఇండియాకు మాతృసంస్థగా ఉన్న గ్రేనియం ఇన్ఫర్మేషన్ టెక్నాలజీస్ ప్రైవేట్ లిమిటెడ్‌ (Greynium Information Technologies Private Limited)తో డీప్‌ స్పేషియల్ మరో ఒప్పందం చేసుకుంది. దీని ప్రకారం డీప్‌స్పేషియల్‌కు చెందిన ‘ఎడ్స్‌క్‌ఎక్స్‌ప్రెస్‌’ (edskExpress) ఎడ్యుకేషనల్ ప్లాట్‌ఫామ్‌కు వన్‌ ఇండియా రోజువారీ వార్తలు, సమకాలీన అంశాలకు సంబంధించిన కంటెంట్‌ను అందించనుంది.

అంతే కాకుండా విద్యార్థులు తమ చుట్టూ జరిగే సంఘటనలను గుర్తించి, వాటిపై కథనాలను రూపొందించే అవకాశాలను కూడా ఈ వేదిక కల్పించనుంది. తద్వారా తరగతి గదుల్లోనే వార్తల పట్ల అవగాహన, విమర్శనాత్మక ఆలోచన, బాధ్యతాయుతమైన సమాచార వినియోగాన్ని ప్రోత్సహించనున్నారు.

ఈ ఒప్పందంపై వన్‌ఇండియా సీఈఓ రావణన్ ఎన్., డీప్‌స్పేషియల్ సీఈఓ డాక్టర్ రాహుల్ కుష్వాహా సంతకాలు చేశారు. వన్ ఇండియా సీనియర్ డైరక్టర్ జేమ్స్ పీజే, సౌరభ్ త్యాగి హాజరయ్యారు. "విశ్వసనీయ వార్తా సమాచారం న్యూస్‌ రూమ్‌లోనే ఆగిపోకూడదు. అది తరగతి గదికి కూడా చేరాలి" అని రావణన్ అన్నారు. ఇంకా ఆయన మాట్లాడుతూ.. పాజిటివ్ న్యూస్ అంటే న్యూస్ ప్లస్ కంటెంట్ మాత్రమే కాదు. యువ రీడర్లు.. ప్రపంచంలో జరుగుతున్న ప్రతీదీ తెలుసుకోవాలి. ఏది వర్క్ అవుతోంది. ఏది మార్పునకు కారణమవుతోందన్నది వాళ్లకి తెలియాలి. edskExpress ద్వారా విద్యార్థులకు విశ్వసనీయ వార్తా సమాచారం చేరవేస్తాం. దానిని వాళ్లు ప్రశ్నించొచ్చు. సొంత కథనాలు రూపొందించొచ్చు." అని చెప్పారు.

భారత్‌-కెనడా వాణిజ్య సంబంధాల్లో కీలక అడుగు
కెనడా అంతర్జాతీయ వాణిజ్య శాఖ మంత్రి మానిందర్ సిధు నేతృత్వంలో భారత్‌కు వచ్చిన దాదాపు 300 మంది ప్రతినిధుల బృందంలో భాగంగా ఈ ఒప్పందాలు కుదిరాయి. కెనడా ప్రభుత్వ గ్లోబల్ అఫైర్స్ కెనడా విడుదల చేసిన వివరాల ప్రకారం, ఈ పర్యటనలో భారత, కెనడా సంస్థల మధ్య మొత్తం 34 వాణిజ్య ఒప్పందాలు, భాగస్వామ్యాలు, పెట్టుబడి ప్రకటనలు వెలువడ్డాయి. వీటి అంచనా విలువ దాదాపు 300 మిలియన్ కెనడియన్ డాలర్లు. కెనడా గత మూడు దశాబ్దాల్లో భారత్‌లో నిర్వహించిన అతిపెద్ద టీమ్ కెనడా వాణిజ్య ప్రతినిధి బృంద పర్యటన ఇదేనని ఆ దేశ ప్రభుత్వం పేర్కొంది.

Also Read : Jio Platforms IPO: జియో ప్లాట్‌ఫామ్స్ ఐపీఓకు లిస్టింగ్‌కు ముందే రూ. 2.5 లక్షల కోట్ల ఇన్వెస్టర్ల డిమాండ్

Tirupati Municipal Elections: తిరుపతి మేయర్ ఎన్నికల్లో చిల్లర నామినేషన్లు.. సంచులతో వచ్చిన అభ్యర్థులు

Shankar Dukanam — Sun, 18 Oct 2026 12:13:45 +0530

Tirupati Municipal Elections | తిరుపతి నగరపాలక సంస్థ ఎన్నికల నామినేషన్ల ప్రక్రియలో ఒక ఆసక్తికరమైన, వినూత్నమైన ఘటన చోటుచేసుకుంది. తిరుపతి మేయర్ పదవికి పోటీ చేయడంలో భాగంగా శనివారం నామినేషన్లు సమర్పించడానికి పలు పార్టీల అభ్యర్థులు వచ్చారు. ఈ క్రమంలో సుమారు 10 మంది ఇండిపెండెంట్ అభ్యర్థులు రూ.1, రూ.2 నాణేలతో ఉన్న గోనె సంచులతో నామినేషన్ కేంద్రం వద్ద ప్రత్యక్షమయ్యారు.

ఎన్నికల నిబంధనల ప్రకారం నామినేషన్ పత్రాలతో పాటు డిపాజిట్ అమౌంట్ చెల్లించాల్సి ఉంటుంది. నామినేషన్ పత్రాలతో పాటు డిపాజిట్ చేయాల్సిన ఆ నగదు మొత్తాన్ని ఒక రూపాయి, 2 రూపాయల చిల్లర నాణేల రూపంలో చెల్లించేందుకు గోనె సంచులలో తీసుకొచ్చి అధికారులకు షాకిచ్చారు. అయితే వేలాది నాణేలను చేతులతో లెక్కించడం తీవ్ర శ్రమతో పాటు సిబ్బందికి ఎంతో సమయం పడుతుంది. కనుక అధికారులు ఆ కాయిన్స్ తెచ్చిన అభ్యర్థులను కేంద్రం ఆవరణలోనే ఒక వరుస క్రమంలో కూర్చోబెట్టారు.

చిల్లరతో వచ్చి నామినేషన్ వేయడానికి పలువురు ఇండిపెండెంట్ అభ్యర్థులు రావడంతో అధికారులు, అక్కడ ఉన్న ఇతర రాజకీయ నాయకులు, స్థానిక ప్రజలు సైతం ఆశ్చర్యపోయారు. ఈ ఘటన తిరుపతి స్థానిక ఎన్నికల ప్రక్రియలో హాట్ టాపిక్‌గా మారింది. వారు కాయిన్లతో వచ్చి నిరసన తెలపాలనుకున్నారా, ఎందుకిలా చేశారు అని స్థానికంగా చర్చనీయాంశంగా మారింది.

వార్డు మెంబర్ మేయర్, ఛైర్ పర్సన్ పదవికి పోటీ చేసేందుకు జనరల్ అయితే రూ.3000, రిజర్వుడ్ స్థానం అయితే రూ.1500 డిపాజిట్ చేయాలి. కార్పొరేటర్, కౌన్సిలర్ స్థానాలకు, ఎంపీటీసీలకు రూ.3000, జడ్పీటీసీ అభ్యర్థులు 6000 చెల్లించాలి. అదే రిజర్వుడ్ స్థానం అయితే రూ.1500, జడ్పీటీసీ రిజర్వ్ అయితే రూ. 3000 చెల్లించాలని ఎన్నికల కమిషన్ ఇదివరకే ప్రకటించింది.

Punganur Elections: ఎంపీ మిథున్ రెడ్డి, పెద్దిరెడ్డి రామచంద్రారెడ్డికి పోలీసుల నోటీసులు.. హైకోర్టులో హౌస్ మోషన్ పిటిషన్!

Shankar Dukanam — Sun, 18 Oct 2026 12:09:14 +0530

పుంగనూరు: ఆంధ్రప్రదేశ్ స్థానిక సంస్థల ఎన్నికల నామినేషన్ల పర్వంలో రాయలసీమలో పలుచోట్ల ఉద్రికత్తలు చోటుచేసుకున్నాయి. పుంగనూరులో చోటుచేసుకున్న ఘటనల నేపథ్యంతో శాంతిభద్రతల సమస్యలు తలెత్తకుండా పోలీసులు ముందస్తు చర్యలు చేపట్టారు. ఇందులో భాగంగా ఎంపీ పెద్దిరెడ్డి మిథున్ రెడ్డితో పాటు మాజీ మంత్రి పెద్దిరెడ్డి రామచంద్రారెడ్డికి కూడా పోలీసులు ఇప్పటికే నోటీసులు జారీ చేశారు. ఎలాంటి గొడవలకు తావులేకుండా ఉండేందుకు శాంతిభద్రతల దృష్ట్యా పుంగనూరు ప్రాంతానికి రావద్దని, పోలీసులు నోటీసులలో స్పష్టంగా పేర్కొన్నారు.

పుంగనూరు మున్సిపాలిటీల్లో ఉద్రిక్తతల పరిణామాలపై వైఎస్సార్ కాంగ్రెస్ పార్టీ ఎంపీ మిథున్ రెడ్డి తీవ్రస్థాయిలో స్పందించారు. ఈ ఘటనలపై న్యాయపోరాటం చేసేందుకు ఆయన హైకోర్టును ఆశ్రయించి అత్యవసరంగా హౌస్ మోషన్ పిటిషన్‌ను దాఖలు చేశారు. నామినేషన్ల ప్రక్రియలో తమ పార్టీ అభ్యర్థులకు అడ్డంకులు సృష్టించారని, నామినేషన్‌ దాఖలు చేసేందుకు అవకాశం కల్పించేలా తగిన ఉత్తర్వులు జారీ చేయాలని కోరుతూ ఈ పిటిషన్‌లో పేర్కొన్నారు.

మరోవైపు, పోలీసు నోటీసులు, కూటమి ఒత్తిళ్లకు వెనకడిగేది లేదని, రాజ్యాంగబద్ధంగా నామినేషన్ హక్కుల పరిరక్షణ కోసం ఉన్నత న్యాయస్థానంలో గట్టిగా పోరాటం చేస్తామని మిథున్ రెడ్డి స్పష్టం చేశారు. స్థానిక సంస్థల ఎన్నికల్లో పుంగనూరు వేదికగా చోటుచేసుకుంటున్న ఈ వరుస పరిణామాలు ఇప్పుడు రాష్ట్ర రాజకీయాల్లో తీవ్ర కలకలం రేపుతున్నాయి.

Rayachoti Murder Plot: రాయచోటిలో తీవ్ర కలకలం.. మంత్రి రాంప్రసాద్‌రెడ్డి హత్యకు కుట్ర.. అంతర్రాష్ట్ర ముఠా అరెస్ట్!

Satyaprasad Bandaru — Sun, 18 Oct 2026 11:27:43 +0530

Rayachoti Murder Plot: మంత్రి మండిపల్లి రాంప్రసాద్‌రెడ్డిని హత్య చేసేందుకు చేసిన కుట్ర వెలుగులోకి రావడం శనివారం రాయచోటిలో తీవ్ర కలకలం సృష్టించింది. మదనపల్లె రోడ్డులోని ఓ హోటల్‌లో ఈ కుట్రను పోలీసులు ఛేదించారు. మారణాయుధాలు ఉన్న అంతర్రాష్ట్ర రౌడీముఠాను అదుపులోకి తీసుకున్నారు.

హోటల్ వద్ద ఘర్షణ – రంగంలోకి పోలీసులు

స్థానిక సంస్థల నామినేషన్ల నేపథ్యంలో వైసీపీ నాయకులతో పాటు పంజాబ్‌కు చెందిన బౌన్సర్లు, రౌడీలు హోటల్‌లో మకాం వేసి అక్రమ కార్యకలాపాలకు పాల్పడుతున్నారనే సమాచారంతో టీడీపీ శ్రేణులు అక్కడికి చేరుకున్నాయి. ఈ క్రమంలో ఇరువర్గాల మధ్య తీవ్ర వాగ్వాదం, ఘర్షణ చోటుచేసుకోగా, పరస్పర దాడుల్లో ఓ కారు ధ్వంసమైంది. పోలీసులు వెంటనే స్పందించి ఇరువర్గాలను చెదరగొట్టారు.

స్థానిక ఎన్నికల నేపథ్యంలో మంత్రి రాంప్రసాద్‌రెడ్డి కదలికలపై గత మూడు రోజులుగా ఈ ముఠా నిఘా ఉంచినట్లు తెలుస్తోంది. వైసీపీ ఛైర్మన్ అభ్యర్థి జిన్నా షరీఫ్.. పంజాబ్‌లోని పఠాన్‌కోట్ రౌడీలతో పాటు కర్నూలు ప్రాంతానికి చెందిన కొందరిని రాయచోటికి తీసుకువచ్చినట్లు పోలీసుల ప్రాథమిక విచారణలో తేలింది.

భారీగా ఆయుధాలు స్వాధీనం

రాయచోటి డీఎస్పీ కృష్ణమోహన్ ఆధ్వర్యంలో పోలీసులు హోటల్‌పై దాడి చేసి లైసెన్స్ లేని రెండు పిస్టళ్లు, 30కి పైగా బుల్లెట్లు, గొడ్డళ్లు, ఇతర మారణాయుధాలను సీజ్ చేశారు. ఈ ఘటనలో రాయచోటికి చెందిన షేక్ మహమ్మద్ షరీఫ్ జిన్నా, పంజాబ్‌కు చెందిన టార్టెమ్ సింగ్, సరబ్‌జీత్ సింగ్, ప్రభుజీత్ సింగ్, అమితాజ్, కర్నూలు జిల్లాకు చెందిన రవికుమార్ సహా మొత్తం 15 మందిపై కేసు నమోదు చేసి విచారణ చేపడుతున్నట్లు పోలీసులు తెలిపారు.

Also Read: దాచేపల్లి వైసీపీ ఛైర్మన్‌ అభ్యర్థి కొప్పుల రవి అరెస్ట్‌.. ఇంట్లో 429 సీసాల తెలంగాణ లిక్కర్ సీజ్!

కిరాయి మూకలతో అలజడులకు కుట్ర-మంత్రి రాంప్రసాద్‌రెడ్డి

"దిల్లీ, హైదరాబాద్, పంజాబ్ ప్రాంతాల నుంచి కిరాయి మూకలను రాయచోటికి రప్పించి అలజడులు సృష్టించేందుకు కుట్ర పన్నారు. వైసీపీ అధినేత జగన్, మాజీ ఎమ్మెల్యే గడికోట శ్రీకాంత్‌రెడ్డితో పాటు ఈ వ్యవహారంలో ఉన్న అసలు సూత్రధారుల పాత్రపై నిష్పక్షపాతంగా విచారణ జరిపించాలి." - మంత్రి రాంప్రసాద్ రెడ్డి

Also Read: ఇంజినీరింగ్ కాలేజీ దాండియాలో విషాదం.. ఫ్లడ్ లైట్ స్టాండ్ కూలి బీటెక్ విద్యార్థిని మృతి, మరో 20 మందికి గాయాలు