tirupati

Andhra Pradesh News: సీమ రాత మార్చేలా రాయలసీమ రైజింగ్.. రూ. లక్ష కోట్లతో హార్టికల్చర్ హబ్.. మదనపల్లెలో పనులకు నేడు శ్రీకారం

Shankar Dukanam — Fri, 2 Oct 2026 08:53:49 +0530

మదనపల్లె: ఇదివరకే రాయల్ ఎన్‌ఫీల్డ్ కంపెనీ సీమకు వచ్చేలా చేసిన కూటమి ప్రభుత్వం తాజాగా రాయలసీమ రాతను మార్చేందుకు చర్యలు చేపట్టింది. రాయలసీమతో పాటు ఉమ్మడి ప్రకాశం జిల్లా రాతను మార్చేలా, వాటిని గ్లోబల్‌ హార్టికల్చర్‌ హబ్‌ గా తీర్చిదిద్దేందుకు కేంద్ర, రాష్ట్ర ప్రభుత్వాలు కలిసి రూ.1 లక్ష కోట్లతో ‘రాయలసీమ రైజింగ్‌’ పేరిట భారీ ప్లాన్ రూపొందించాయి. కరువు గడ్డపై ఈ ప్రాజెక్టు ద్వారా ఆయా జిల్లాల్లో మౌలిక వసతుల కల్పనకు రూ.40,352 కోట్లు ఖర్చు చేయనున్నారు. మరోవైపు ప్రైవేట్‌ నుంచి మరో రూ.60,000 కోట్ల పెట్టుబడులు రానున్నాయని కూటమి ప్రభుత్వం తెలిపింది. కరువుతో అల్లాడిన చోట నేడు ఉద్యాన పంటల ఉత్పత్తి, పంటకోత, గ్రేడింగ్, ప్యాకింగ్, కోల్డ్‌ స్టోరేజ్, ప్రాసెసింగ్, ఉత్పత్తులకు బ్రాండింగ్, రవాణా నుంచి దేశీయ, అంతర్జాతీయ మార్కెటింగ్ వరకు అన్నిరకాల సౌకర్యాలను సమకూర్చనున్నారు.

నేడు మదనపల్లెలో హార్టికల్చర్ హబ్ ప్రారంభం

అన్నమయ్య జిల్లాలోని మదనపల్లెలో శుక్రవారం ఈ ఉద్యానహబ్‌ పనులను ప్రారంభించనున్నారు. కేంద్ర ఆర్థిక మంత్రి నిర్మలా సీతారామన్‌, సీఎం చంద్రబాబు, డిప్యూటీ సీఎం పవన్‌ కల్యాణ్‌లు సీమ దశాదిశను మార్చే హార్టికల్చర్ హబ్ ప్రారంభానికి శ్రీకారం చుట్టనున్నారు. అలాగే, రిలయన్స్ సహకారంతో ఏర్పాటు చేయనున్న 'ఇండియన్ స్కూల్ ఆఫ్ అగ్రికల్చర్'కు సైతం శంకుస్థాపన చేయనున్నారు. రిలయెన్స్ ఇండస్ట్రీస్ ఎగ్జిక్యూటీవ్ డైరెక్టర్ అనంత్ అంబానీ ఈ కార్యక్రమానికి హాజరుకానున్నారు.

5,869 గ్రామాల్లో విస్తరణ
ఈ గ్లోబల్ హార్టికల్చర్ హబ్ ఏర్పాటు కోసం ఏపీ సీఎం చంద్రబాబు గత 6 నెలలుగా వ్యవసాయ, ఉద్యాన, ఆర్థిక, జలవనరుల శాఖలతో సమీక్షలు నిర్వహించారు. అదే సమయంలో కేంద్ర ప్రభుత్వంతో సంప్రదింపులు జరిపి అనుమతులు సాధించారు. ఈ హార్టికల్చర్ హబ్ పనులు అనంతపురం, అన్నమయ్య, చిత్తూరు, కర్నూలు, నంద్యాల, శ్రీసత్యసాయి, తిరుపతి, వైఎస్సార్‌ కడప లాంటి సీమ జిల్లాలతో పాటు, ప్రకాశం, మార్కాపురం జిల్లాల్లోని 303 మండలాల పరిధిలోని 5,869 గ్రామాల్లో జరగనున్నాయి.

రాయలసీమను ప్రపంచ ఉద్యాన కేంద్రంగా తీర్చిదిద్దే రాయలసీమ విజయీభవ కారక్రమానికి రేపు శ్రీకారం చుడుతోంది కూటమి ప్రభుత్వం. ఇందులో భాగంగా సీమలో ఉద్యాన సాగు, నీటి పారుదల ప్రాజెక్టులు, మౌలిక సదుపాయాల కల్పనల పై రూ. 1 లక్ష కోట్లతో వివిధ కార్యక్రమాలు చేపట్టనుంది. #RayalaseemaVijayeebhava… pic.twitter.com/E0W7fsdoBP
— Telugu Desam Party (@JaiTDP) October 1, 2026

మూడు దశల్లో అభివృద్ధి పనులు

మొదటి దశ (2026-27): రూ.12,066 కోట్లతో 72 క్లస్టర్లలో పనులు జరగనున్నాయి.

రెండో దశ (2027-28): రూ.15,036 కోట్లతో 67 క్లస్టర్లలో పనులు చేస్తారు.

మూడో దశ (2028-29): రూ.13,250 కోట్లతో 62 క్లస్టర్లలో పనులు.

సాగు విస్తరణ, దిగుబడి లక్ష్యాలు
ప్రస్తుతం ఉన్న 20.77 లక్షల ఎకరాల ఉద్యాన సాగును మరో 9 లక్షల ఎకరాలకు విస్తరించేలా కూటమి ప్రభుత్వం ప్లాన్ చేసింది. ఉద్యాన ఉత్పత్తి సామర్థ్యాన్ని ప్రస్తుతం ఉన్న 222 లక్షల మెట్రిక్‌ టన్నుల నుంచి 435 లక్షల మెట్రిక్‌ టన్నులకు పెంచడం ద్వారా సుమారు 9.60 లక్షల మంది రైతులకు లబ్ధి చేకూరనుంది. మరోవైపు 9 లక్షల ఎకరాల కొత్త ఆయకట్టు సాగులోకి రావడంతో పాటు, 4.30 లక్షల ఎకరాల ఆయకట్టు స్థిరీకరణ జరిగేలా కూటమి సర్కార్ ప్లాన్ చేసింది. ఏపీని 'ఫ్రూట్ బౌల్'గా నిలపడమే లక్ష్యంగా మామిడితో పాటు, అరటి, టమాటా, దానిమ్మ, డ్రాగన్‌ ఫ్రూట్, అవకాడో, బెర్రీలు మొదలైన పంటల సాగులో రైతులను ప్రోత్సహించనున్నారు.

ఫ్రూట్‌ బౌల్‌ ఆఫ్‌ ఇండియాగా రాయలసీమ – మంత్రి అచ్చెన్నాయుడు

తక్కువ నీటితో అధిక ఆదాయం ఇచ్చే ఉద్యాన పంటల వైపు రైతులు అడుగులు వేయాలన్నదే తమ ప్రభుత్వ ప్రధాన లక్ష్యమని ఏపీ వ్యవసాయశాఖ మంత్రి అచ్చెన్నాయుడు తెలిపారు. రాయలసీమలో తరచూ ఏర్పడే కరువు పరిస్థితులు, మార్కెట్ అనుసంధాన సమస్యలకు పరిష్కారంగా తక్కువనీటితో పంటలు పండిస్తూ, అధిక లాభాలు గడించేలా ఈ సమగ్ర ప్రణాళికను తెచ్చినట్లు పేర్కొన్నారు. ఉద్యాన రంగంలో అరటి ఎగుమతుల్లో ఇప్పటికే అనంతపురం నుంచి ఇరాన్‌కు లక్ష టన్నులకు పైగా ఎగుమతి చేసే స్థాయికి చేరామన్నారు. రాయలసీమ త్వరలోనే 'ఫ్రూట్‌ బౌల్‌ ఆఫ్‌ ఇండియా'గా రూపుదిద్దుకుంటోందని ధీమా వ్యక్తం చేశారు.

మదనపల్లెలో ఇండియన్ స్కూల్ ఆఫ్ అగ్రికల్చర్..

రాయలసీమలోని మదనపల్లెలో 100 ఎకరాల విస్తీర్ణంలో దేశంలోనే మొదటి ఇండియన్‌ స్కూల్‌ ఆఫ్‌ అగ్రికల్చర్‌ (ISA) ఏర్పాటవుతోంది. సీఎం చంద్రబాబు సూచనలతో రిలయన్స్‌ సంస్థ దీని నిర్వహణ బాధ్యతలను స్వీకరించేందుకు ముందుకు రావడం విశేషం. డిజిటల్‌ అగ్రికల్చర్, ప్రెసిషన్‌ ఫార్మింగ్, క్రాప్‌ మానిటరింగ్, స్మార్ట్‌ ఇరిగేషన్, మార్కెట్‌ ఇంటెలిజెన్స్‌ వంటి మోడ్రన్ పద్ధతులపై రైతులకు ఈ సంస్థ సలహాలు, సూచనలు ఇచ్చి వారిని ప్రోత్సహించనుంది. ఈ శిక్షణ, అదనపు సమాచారంతో రైతులు మెరుగైన దిగుబడిని పొందవచ్చు.

శ్రీవారిని దర్శించుకున్న బైరెడ్డి శబరి

ABP Desam — Thu, 1 Oct 2026 12:29:53 +0530

మైదానంలో నమన్ ధీర్ పట్టిన అద్భుతమైన క్యాచ్ క్రికెట్ వర్గాల్లో తీవ్ర చర్చకు దారితీసింది. ఆ క్యాచ్ రూల్స్ ప్రకారం క్లీన్ క్యాచ్ కిందకు వస్తుందా లేదా అనే దానిపై స్పష్టత లేకపోవడంతో, ఆ నిర్ణయం అవుటా లేక నాటౌటా అనేది ప్రస్తుతం సోషల్ మీడియాలో హాట్ టాపిక్‌గా మారింది.

శ్రీవారి సేవలో మాజీ ప్రధాన న్యాయమూర్తి ఎన్ వి రమణ

ABP Desam — Thu, 1 Oct 2026 12:26:56 +0530

తిరుమల తిరుపతి శ్రీ వెంకటేశ్వర స్వామిని సుప్రీంకోర్టు మాజీ ప్రధాన న్యాయమూర్తి జస్టిస్ ఎన్.వి. రమణ కుటుంబ సమేతంగా దర్శించుకున్నారు. వీఐపీ విరామ దర్శన సమయంలో స్వామివారిని పూజించి మొక్కులు చెల్లించుకున్నారు. ఆలయ అధికారులు వారికి ఘన స్వాగతం పలికి తీర్థప్రసాదాలు అందజేశారు.

Kuppam Greenfield Airport: కుప్పం గ్రీన్‌ఫీల్డ్‌ ఎయిర్‌పోర్టుకు భూమి ఇచ్చేందుకు టీటీడీ బోర్డు అంగీకారం

Shankar Dukanam — Wed, 30 Sep 2026 12:04:42 +0530

TTD Board Key Decisions | తిరుపతి: తిరుమల తిరుపతి దేవస్థానం (తితిదే) పాలకమండలి నిర్వహించిన సమావేశంలో కుప్పం ఎయిర్ పోర్టుకు భూములు ఇచ్చేందుకు అంగీకరించడంతో పాటు పలు కీలక నిర్ణయాలు తీసుకుంది. భక్తుల సంక్షేమం, ఆధ్యాత్మిక- ధార్మిక కార్యకలాపాల విస్తరణ, ఆలయాల అభివృద్ధి లక్ష్యంగా పలు కీలక నిర్ణయాలకు ఆమోదం తెలిపింది. ఇటీవల టీటీడీ పాలకమండలి సమావేశంలో తీసుకున్న నిర్ణయాలు, అనుమతులపై మంగళవారం కీలక ప్రకటన చేసింది.

కుప్పం గ్రీన్ ఫీల్డ్ విమానాశ్రయానికి టీటీడీ భూములు

చిత్తూరు జిల్లా రామకుప్పం మండలం కిలకిపోడు వద్ద ఉన్న టీటీడీకి చెందిన 4.94 ఎకరాల వ్యవసాయ భూమిని కుప్పంలో నిర్మించనున్న గ్రీన్‌ఫీల్డ్‌ ఎయిర్‌పోర్టుకు ఇవ్వడానికి అంగీకరించింది. సర్వే నంబర్లు 15/2, 8/2 భూమిలోని 9,000 యూకలిప్టస్, 60 మామిడి చెట్లతో పాటు ఇతర నిర్మాణాల కోసం తీసుకుని ఎకరాకు రూ. 16 లక్షల విలువ చొప్పున మొత్తం రూ. 87,37,260 పరిహారాన్ని తీసుకునేందుకు దేవాదాయ చట్టం సెక్షన్‌ 80 ప్రకారం ప్రభుత్వ అనుమతి పొందే షరతుతో ఆమోదం తెలిపింది.

టీటీడీ ట్రస్టులు, పథకాల విరాళాల విధానం-2026 నిబంధనల్లో నామినీ వివరాల మార్పులకు సంబంధించి సవరణ చేసింది. కొత్త రూల్స్ ప్రకారం దాతలు తమ డోనర్ పాస్ వ్యాలిడిటీ ఉన్నంతకాలం నామినీ వివరాలను ఎన్నిసార్లు కావాలంటే అన్నిసార్లు మార్చుకునే వెసులుబాటు కల్పించింది. అంతకుముందు జులై 14న ఆమోదించిన పాలసీ ప్రకారం గరిష్ఠంగా 3 సార్లు మాత్రమే డోనర్ వివరాలు మార్చుకునేందుకు పరిమితి ఉండేది. టీటీడీ తాజాగా తీసుకున్న నిర్ణయంతో పాత, కొత్త దాతలందరికీ నామినీ వివరాలు మార్చుకునేలా ఆ పరిమితిని పూర్తిగా ఎత్తివేశారు. అయితే, దాతలు దర్శనం లేదా ఇతర సేవా సదుపాయాలను బుక్ చేసుకోవడానికి లేదా సర్వీసులు వినియోగించుకోవడానికి కనీసం 30 రోజుల ముందుగానే నామినీ మార్పు ప్రక్రియను పూర్తి చేయాలని టీటీడీ స్పష్టం చేసింది.

మరో కీలక నిర్ణయంలో భాగంగా, తమిళనాడు రాజధాని చెన్నై జి.ఎన్‌.చెట్టి రోడ్డులోని శ్రీ పద్మావతి అమ్మవారి ఆలయంలో ధ్వజస్తంభం, బలిపీఠం రాగి రేకులపై బంగారు తాపడం పనులు చేపట్టేందుకు రూ. 17.05 కోట్ల అంచనా వ్యయానికి టీటీడీ బోర్డు ఆమోదం తెలిపింది. ఈ పనుల కోసం తితిదే ట్రెజరీ నుంచి దాదాపు 10 కిలోల బంగారం, 457 కిలోల రాగి రేకులను కేటాయించనున్నారు.

శ్రీవారి నైవేద్యం, భక్తులకు అందించే అన్నప్రసాదాల తయారీలో వాడే ముడిసరకుల నాణ్యతను మరింత పెంచేందుకు టీటీడీ ప్రత్యేకంగా చర్యలు చేపట్టింది. ఇందులో భాగంగా తిరుపతిలోని అలిపిరి వద్ద 20 ఎకరాల విస్తీర్ణంలో రూ. 3 కోట్ల వ్యయంతో మోడ్రన్ మెషీన్ తో కూడిన ఇంటిగ్రేటెడ్ కోల్డ్ స్టోరేజీ కేంద్రాలను నిర్మించనుంది. దీని ద్వారా సరకుల భద్రత, నాణ్యత పరిశీలన, సరఫరా వ్యవస్థను మరింత బలోపేతం చేయనున్నారు.

Tirupati News: బ్రహ్మోత్సవాల్లో అపశ్రుతి.. సాంబారు మీద పడి 12 మందికి గాయాలు

Shankar Dukanam — Wed, 30 Sep 2026 11:29:22 +0530

Tirupati News: చిట్టమూరు: తిరుపతి జిల్లా చిట్టమూరు మండలం మల్లాంలో జరుగుతున్న శ్రీ సుబ్రహ్మణ్యేశ్వర స్వామి బ్రహ్మోత్సవాల్లో అపశ్రుతి చోటుచేసుకుంది. బ్రహ్మోత్సవాల సందర్భంగా ఏర్పాటు చేసిన అన్నదానం తయారీ కేంద్రం వద్ద ప్రమాదవశాత్తూ వేడి సాంబారు మీద పడటంతో 12 మంది తీవ్రంగా గాయపడ్డారు.

ఈ ఘటనలో తీవ్ర గాయాలపాలైన బాధితులకు వెంటనే ప్రాథమిక చికిత్స అందించారు. అయితే వారిలో ఇద్దరి పరిస్థితి విషమంగా ఉండటంతో, మెరుగైన వైద్య సహాయం కోసం వారిని చెన్నైలోని ఒక ప్రైవేటు ఆసుపత్రికి తరలించారు. ఈ ఆకస్మిక పరిణామంతో ఉత్సవాల్లో కొంత ఆందోళన నెలకొంది.

Kalki Bhagavan Passes Away: ఆధ్యాత్మిక గురువు కల్కి భగవాన్ కన్నుమూత.. నేడు తిరుపతి జిల్లాకు పార్థివదేహం తరలింపు

Shankar Dukanam — Wed, 30 Sep 2026 08:07:38 +0530

Kalki Bhagavan Is No More | చెన్నై: ప్రముఖ ఆధ్యాత్మికవేత్త, విజయ్ కూమార్ నాయుడు అలియాస్ కల్కి భగవాన్ (85) కన్నుమూశారు. తీవ్ర అస్వస్థతకు గురై గత పది రోజులుగా చెన్నైలోని ఒక ప్రైవేటు ఆసుపత్రిలో చికిత్స పొందుతున్న ఆయన, మంగళవారం మధ్యాహ్నం 3 గంటలకు తుదిశ్వాస విడిచినట్లు ఏకం ట్రస్టు ప్రతినిధి వెల్లడించారు. ఆ సమయంలో ఆయన కుమారుడు కృష్ణాజీతో పాటు ఆశ్రమానికి చెందిన దాసాజీలు, ముఖ్య ప్రతినిధులు ఆసుపత్రికి ఉన్నారని తెలిపారు.

నేడు తిరుపతి జిల్లాకు కల్కి భగవాన్ పార్థివదేహం తరలింపు

బుధవారం ఉదయం 11 గంటలకు కల్కి భగవాన్ పార్థివదేహాన్ని తిరుపతి జిల్లా వరదయ్యపాళెం మండలంలోని బత్తులవల్లం పరిధిలో ఉన్న ఏకం ఆలయానికి (గోల్డెన్ సిటీ) తరలించనున్నారు. తెల్లటి పాలరాతితో అత్యంత వైభవంగా నిర్మించిన ఈ ఆలయంలో భక్తుల సందర్శనార్థం కల్కి భగవాన్ భౌతికకాయాన్ని ఉంచుతారు. శనివారం ఏకం ఆలయ ప్రాంగణంలోనే కల్కి భగవాన్ అంత్యక్రియలు నిర్వహించనున్నారు. తన సతీమణి అమ్మ భగవాన్‌తో కలిసి ఆధ్యాత్మిక కార్యక్రమాలు నిర్వహించి ప్రపంచవ్యాప్తంగా గుర్తింపు పొందారు. లక్షలాది మంది భక్తులు ఆయనను విశ్వసించేవారు. కల్కి భగవాన్, అమ్మ భగవాన్‌ల కుమారుడు శ్రీకృష్ణాజీ సైతం స్పిరిచ్యువల్ ప్రోగ్రామ్స్ నిర్వహించేవారు.

ఎల్‌ఐసీ ఏజెంటుగా కెరీర్ మొదలు..

1949 మార్చి 7న తమిళనాడులోని గుడియత్తంలో జన్మించిన కల్కి భగవాన్, చెన్నై డీజీ వైష్ణవ్ కాలేజీలో డిగ్రీ పూర్తి చేశారు. తొలిరోజుల్లో లైఫ్ ఇన్సూరెన్స్ కార్పొరేషన్ (LIC) లో ఏజెంట్‌గా పనిచేశారు. ఆపై టీచర్‌గా సేవలు అందించారు. అనంతరం 1992లో తాను విష్ణుమూర్తి అవతారమైన కల్కి అవతారంగా ప్రకటించుకొని ఆధ్యాత్మిక మార్గంలోకి అడుగుపెట్టారు. దాంతో విజయ్ కుమార్ నాయుడు కల్కి భగవన్‌గా మారిపోయారు. మొదట్లో కుప్పం నియోజకవర్గంలోని శాంతిపురంలో ఆశ్రమాన్ని ఏర్పాటు చేసిన ఆయన, ఆ తర్వాత తమిళనాడులోని తిరువళ్లూరు సమీపంలో నేమంలో ఆధ్యాత్మిక బోధనలు చేశారు. ఆపై వరదయ్యపాళెం వద్ద కల్కి గ్రామీణాభివృద్ధి ట్రస్టును సైతం స్థాపించారు.

ముఖ్యంగా తిరుపతి జిల్లా వరదయ్యపాళెం కేంద్రంగా దేశ, విదేశాల్లో ఆయన ట్రస్టులు, ఆధ్యాత్మిక కేంద్రాలు నడిపించారు. ఆధ్యాత్మిక సేవలు, బోధనలతో ఎంతగా ప్రాచుర్యం పొందారో అనంతర కాలంలో ఐటీ దాడులతో అక్రమాస్తులు, వివాదాలతో కేంద్ర బిందువుగా నిలిచారు. ఆశ్రమాల్లో భక్తుల కోసం ధ్యానం, ముక్తి దీక్షలతో పాటు వివిధ రకాల ఆధ్యాత్మిక తరగతులు నిర్వహించారు. సమాజ సేవతో పాటు ఆధ్యాత్మిక వ్యాప్తి కోసం కల్కి గ్రామీణాభివృద్ధి ట్రస్ట్, లోకా ఫౌండేషన్, వన్నెస్ హ్యూమన్, ముక్తి వంటి అనేక ట్రస్టులను ఏర్పాటు చేసి కార్యకలాపాలు సాగించారు.

సింగపూర్ మంత్రితో కలిసి శ్రీవారి సేవలో లోకేష్.

ABP Desam — Tue, 29 Sep 2026 13:47:17 +0530

తిరుమల తిరుపతి వేంకటేశ్వర స్వామిని సింగపూర్ మంత్రితో కలిసి మంత్రి నారా లోకేష్ దర్శించుకున్నారు. ఇద్దరూ కలిసి శ్రీవారికి ప్రత్యేక పూజలు నిర్వహించి, స్వామివారి ఆశీస్సులు తీసుకున్నారు. ఈ సందర్భంగా ఇరువర్గాల మధ్య ఆధ్యాత్మిక, సాంస్కృతిక విషయాలపై చర్చ జరిగింది.

అరేయ్ జుట్టు ఏమైమది రా .. తిరుమలలో పిల్లలతో లోకేష్ ఫన్.

ABP Desam — Tue, 29 Sep 2026 13:42:37 +0530

తిరుమల శ్రీవారి దర్శనానంతరం నారా లోకేష్ తన పిల్లలతో సరదాగా గడిపారు. "అరేయ్ జుట్టు ఏమైమది రా.." అంటూ పిల్లలతో ఆయన చేసిన సరదా సంభాషణ సోషల్ మీడియాలో వైరల్ అవుతూ అందరినీ నవ్విస్తోంది.

Nara Lokesh Visits Tirumala: సింగపూర్ హోంమంత్రితో కలిసి తిరుమల శ్రీవారిని దర్శించుకున్న మంత్రి నారా లోకేష్

Shankar Dukanam — Tue, 29 Sep 2026 12:02:24 +0530

TTD Online Tickets Booking: రూ.300 ప్రత్యేక ప్రవేశ దర్శన టికెట్ల గోల్‌మాల్ ఆరోపణలు.. భక్తులకు టీటీడీ క్లారిటీ

Shankar Dukanam — Sun, 27 Sep 2026 06:31:35 +0530

TTD Special Entry Darshan Online Booking | తిరుపతి: తిరుమల శ్రీవారి రూ.300 ప్రత్యేక ప్రవేశ దర్శనం ఆన్‌లైన్ టికెట్ల బుకింగ్‌పై భక్తుల్లో పలు అనుమానాలు వ్యక్తమవుతున్నాయి. అయితే మీకు వస్తున్న సందేహాలు, సోషల్ మీడియాలో జరుగుతున్న ప్రచారాలపై తిరుమల తిరుపతి దేవస్థానం (TTD) శనివారం నాడు క్లారిటీ ఇచ్చింది. భారీ డిమాండ్ కారణంగానే టికెట్ల బుకింగ్‌లో తీవ్ర పోటీ నెలకొంటోందని, అంతేకానీ ఆన్‌లైన్, వెబ్‌సైట్ బుకింత్ వ్యవస్థలో ఎలాంటి లోపాలు లేవని స్పష్టం చేసింది. బుకింగ్ సమయంలో వచ్చే విపరీతమైన రద్దీని తట్టుకునేలా Google Cloud Platform (GCP), లాస్ట్ బ్యాలెన్సింగ్, డిస్ట్రిబ్యూటెడ్ అప్లికేషన్ ఆర్కిటెక్చర్, హారిజంటల్ స్కేలింగ్ వంటి మోడ్రన్ సాంకేతిక పరిజ్ఞానంతో ఆన్‌లైన్ పోర్టల్‌ను నిర్వహిస్తున్నట్లు వెల్లడించింది. టికెట్ల విడుదలకు ముందు ప్రత్యేకంగా టెక్నికల్ వార్ రూమ్ ఏర్పాటు చేసి అప్లికేషన్ పనితీరు, సెక్యూరిటీ, ట్రాన్సాక్షన్లను సాంకేతిక బృందాలు నిరంతరం పర్యవేక్షిస్తున్నాయని టీటీడీ ఓ ప్రకటనలో తెలిపింది.

అందుబాటులో ఉండే టికెట్లకు, భక్తుల నుంచి వచ్చే డిమాండ్‌కు మధ్య భారీ వ్యత్యాసం ఉండటమే ఈ పోటీకి ప్రధాన కారణమని టీటీడీ అధికారులు తెలిపారు. ఉదాహరణకు ఒకేసారి సుమారు 6 లక్షల మంది యూజర్లు పోర్టల్‌లోకి ప్రవేశించి, కుటుంబంలో ఒక్కొక్కరు నలుగురి చొప్పున ప్రయత్నిస్తే దాదాపు 24 లక్షల టికెట్లకు డిమాండ్ వస్తుంది. కానీ అందుబాటులో ఉండేది కేవలం 2.69 లక్షల కోటా మాత్రమేనని గుర్తుంచుకోండి. అంటే డిమాండ్ దాదాపు 9 రెట్లు ఎక్కువగా ఉండటంతో, కొన్ని సెకన్లలోనే ఒకే స్లాట్ టికెట్ల బుకింగ్ పూర్తవుతాయని పేర్కొంది. సర్వర్లు క్రాష్ కాకుండా, పేమెంట్ ప్రక్రియ సజావుగా సాగేందుకు వర్చువల్ క్యూ విధానాన్ని ఉపయోగిస్తున్నామని, దీనిని సాంకేతిక లోపంగా భావించకూడదని భక్తులకు టీటీడీ విజ్ఞప్తి చేసింది.

పేమెంట్ ఫెయిల్ అవ్వడం అనేది కేవలం టీటీడీ అప్లికేషన్‌పైనే కాకుండా బ్యాంకింగ్ నెట్‌వర్క్‌లు, యూపీఐ (UPI) గెట్‌వేల పనితీరుపై సైతం ఆధారపడి ఉంటుందని గుర్తుచేసింది. శ్రీ పద్మావతి అమ్మవారు, శ్రీ కల్యాణ వెంకటేశ్వర స్వామి, శ్రీ గోవిందరాజ స్వామి ఆలయాల దర్శన కోటాలను కూడా ఇదే విధానంలో విడుదల చేస్తున్నామని తెలిపింది. అక్కడ రద్దీ తక్కువగా ఉండటం వల్ల ప్రక్రియ సజావుగా సాగుతోందని స్పష్టం చేసింది. భక్తుల ఫీడ్‌బ్యాక్ ఆధారంగా ఆంటి-బోట్ మెకానిజమ్స్, డేటాబేస్ పెర్ఫార్మెన్స్‌ను నిరంతరం నవీకరిస్తున్నామని తెలిపింది. కాబట్టి తిరుమల దర్శనాలకు టికెట్ దొరకనంత మాత్రాన ఆన్‌లైన్ వ్యవస్థ విఫలమైందని భావించవద్దని, సోషల్ మీడియాలో వచ్చే వదంతులను నమ్మవద్దని టీటీడీ భక్తులను కోరింది.