rajamundry

Pawan Gifted Property To Children: విడాకుల వేళ పవన్ కళ్యాణ్ మాజీ భార్య అన్నా, పిల్లల పేరిట ఆస్తులు చిట్టా వైరల్ !

Shankar Dukanam — Wed, 11 Nov 2026 17:30:01 +0530

అమరావతి: ఏపీ డిప్యూటీ సీఎం పవన్ కళ్యాణ్, అన్నా కొణిదెల దంపతులు విడిపోతున్నట్లు ప్రకటించారు. అనంతరం పవన్ నుంచి అన్నా లెజినోవాకు భరణం ఎంత వస్తుందని చర్చ జరుగుతోంది. ఈ క్రమంలో అన్నా లెజినోవాతో పాటు పిల్లలకు పవన్ కళ్యాణ్ ఎంత ఆస్తి ఇచ్చారు? అనే అంశం సోషల్ మీడియాలో హాట్ టాపిక్‌గా మారింది. పవన్ కళ్యాణ్, అన్నా దంపతులు పరస్పర అంగీకారంతో విడిపోవడంతో భరణానికి సంబంధించిన అధికారిక వివరాలు బయటకు రాలేదు. కానీ ఎన్నికల అఫిడవిట్‌లో పవన్ కళ్యాణ్ సమర్పించిన ఆస్తుల వివరాలు ఇప్పుడు వైరల్ అవుతున్నాయి.

2024 ఏపీ అసెంబ్లీ ఎన్నికల్లో పిఠాపురం నుంచి పోటీ చేసిన పవన్ కళ్యాణ్ దాఖలు చేసిన అఫిడవిట్ ప్రకారం.. హైదరాబాద్‌లోని జూబ్లీహిల్స్ రోడ్ నంబర్ 35, షేక్‌పేట్ పరిధిలో ఉన్న స్థిరాస్తిని అన్నా లెజినోవాతో కలిగిన సంతానం అయిన కొణిదెల పోలీనా అంజనీ, కొణిదెల మార్క్ శంకర్‌లకు సమాన వాటాలుగా బదిలీ చేసినట్లు తెలిపారు. ఈ ఆస్తి విలువ అఫిడవిట్‌లో ఒక్కొక్కరికి రూ.11 కోట్లుగా ఇచ్చినట్లు స్పష్టం చేశారు. మరోవైపు, బంజారాహిల్స్‌లోని ఎమ్మెల్యే కాలనీలో 3,336 చదరపు అడుగుల విస్తీర్ణంలో ఉన్న ఫ్లాట్‌ను అన్నా కొణిదెల పేరిట ఉందని తెలిపారు. దీని మార్కెట్ విలువ సుమారు రూ.1.95 కోట్లు అని అఫిడవిట్‌లో పవన్ కళ్యాణ్ వెల్లడించారు.

ఇక బ్యాంకు డిపాజిట్ల విషయానికొస్తే.. అన్నా లెజినోవా పేరిట సుమారు రూ.86 లక్షల డిపాజిట్లు ఉన్నట్లు అఫిడవిట్‌లో ఉంది. పిల్లల పేరిట కూడా లక్షల రూపాయల విలువైన చరాస్తులు ఉన్నట్లు వివరించారు. అయితే ఇవన్నీ ఎన్నికల సమయంలో పవన్ సమర్పించిన అఫిడవిట్‌లోని వివరాలు అని, వాటిని సోషల్ మీడియాలో వైరల్ చేస్తున్నారు. తాజాగా పవన్ కళ్యాణ్ విడాకుల అనంతరం మూడో భార్య అన్నాకు, సంతానం మార్క్ శంకర్, పోలేనా అంజనా పేరిట పేర్కొన్న ఆస్తుల వివరాలు హల్ చల్ చేస్తున్నాయి.

కాగా, పవన్ కళ్యాణ్ మొదటి భార్య నందినికి విడాకుల సమయంలో రూ.5 కోట్లు భరణం ఇచ్చారని ఎప్పటినుంచో ప్రచారంలో ఉంది. నటి రేణూ దేశాయ్ విషయానికి వస్తే కొన్ని ఆస్తులు రిజిస్టర్ చేశారని, ఆమె అంతగా ఆశించలేదని గతంలో వైరల్ అయింది. పిల్లల పోషణ కోసం ఖర్చులు పవన్ భరిస్తున్నారని తెలిసిందే. తాజాగా విడాకులు తీసుకున్న అన్నా లెజినోవాకు దాదాపు 1200 కోట్ల వరకు ప్రాపర్టీ ఇచ్చారని ప్రచారం జరుగుతోంది. దీనిపై ఆ దంపతులు మాత్రం ఎక్కడా స్పందించలేదు కనుక క్లారిటీ రావాల్సి ఉంది.

Araku To Rajahmundry Green Highway: అరకు - రాజమండ్రి మధ్య సరికొత్త గ్రీన్ హైవే.. విశాఖను టచ్ చేయకుండా రయ్ రయ్

Shankar Dukanam — Tue, 10 Nov 2026 15:37:13 +0530

రాజమండ్రి: ఆంధ్రప్రదేశ్‌లోని ప్రముఖ గిరిజన పర్యాటక ప్రాంతాలైన అరకు లోయ, పాడేరు ఏజెన్సీ ప్రాంతాలను గోదావరి తీరంలోని రాజమండ్రితో అనుసంధానించే జాతీయ రహదారి 516ఇ (NH-516E) పనులు 'గ్రీన్ హైవే కారిడార్'లో భాగంగా అత్యంత వేగంగా రూపుదిద్దుకుంటున్నాయి. గతంలో అరకు నుంచి రాజమండ్రి చేరుకోవాలంటే విశాఖపట్నం సిటీ మీదుగా చుట్టూ తిరుగుతూ దాదాపు 300 కిలోమీటర్ల మేర సుదీర్ఘ ప్రయాణం చేయాల్సి వచ్చేది. అయితే నూతనంగా రూపుదిద్దుకున్న అరకు - పాడేరు - జి.మాడుగుల - చింతపల్లి - లంబసింగి - రంపచోడవరం మీదుగా రాజమండ్రి మార్గం అందుబాటులోకి రావడంతో ఈ రవాణా దూరం సుమారు 246 నుంచి 280 కిలోమీటర్ల వరకు తగ్గింది.

తూర్పు కనుమల అద్భుతమైన ఘాట్ రోడ్లు, వనజంగి మేఘాల కొండలు, లంబసింగి శీతల వాతావరణం, అరకు కాఫీ తోటల అందాల మీదుగా సాగే ఈ ప్రకృతి రమణీయ మార్గంలో ప్రయాణ సమయం సొంత వాహనాల్లో దాదాపు 4 నుంచి 5 గంటలకు తగ్గింది. ప్రస్తుతం ఈ టూ-లేన్ రహదారి విస్తరణ పనులు దాదాపు చివరి దశకు చేరుకోవడంతో పర్యాటకుల ప్రయాణం ఎంతో సాఫీగా సాగుతోంది. ప్రయాణికులు, పర్యాటకుల సౌకర్యార్థం ఆంధ్రప్రదేశ్ రాష్ట్ర రోడ్డు రవాణా సంస్థ (APSRTC) ప్రతిరోజూ ఉదయం 5 గంటలకు రాజమండ్రి నుంచి మరియు తిరుగు ప్రయాణంలో మధ్యాహ్నం 2 గంటలకు అరకు నుంచి పాడేరు మీదుగా నేరుగా సూపర్‌ లగ్జరీ బస్సు సర్వీసును కూడా నిర్వహిస్తోంది.

ఈ అందమైన కొండ మార్గంలో ప్రయాణించే వారికి అధికారులు పలు జాగ్రత్తలు సూచించారు. ముఖ్యంగా ఘాట్ రోడ్డు సెక్షన్లలో తెల్లవారుజామున మరియు రాత్రి వేళల్లో దట్టమైన పొగమంచు అలుముకునే అవకాశం ఉన్నందున, వాహనదారులు వేగ పరిమితిని ఖచ్చితంగా పాటిస్తూ అప్రమత్తంగా ప్రయాణించాలని విజ్ఞప్తి చేస్తున్నారు.

Kandula Durgesh: మురసు తుఫాన్ ఉగ్రరూపం.. రంగంలోకి దిగిన కందుల దుర్గేష్, నిడదవోలులో బాధితులకు అండగా మంత్రి

Shankar Dukanam — Fri, 6 Nov 2026 12:57:55 +0530

Cyclone Murasu | నిడదవోలు: మురసు తుఫాన్ ప్రభావంతో నిడదవోలు ప్రాంత ప్రజలు వరదలతో ఇబ్బంది పడుతున్నారు. ఈ విపత్తు సమయంలో ఆంధ్రప్రదేశ్ రాష్ట్ర పర్యాటక, సాంస్కృతిక శాఖ మంత్రి కందుల దుర్గేష్ స్వయంగా రంగంలోకి దిగి సహాయక చర్యలను వేగవంతం చేశారు. ఆయన తొలుత నిడదవోలు పట్టణంలోని ఇందిరానగర్, రాయిపేట, 21వ వార్డులోని దానమ్మతల్లి గుడి ప్రాంతం, 18వ వార్డులోని తీరుగూడెంలతో పాటు నిడదవోలు మండలంలోని ఆంజనేయపురం, తిమ్మరాజుపాలెం, తాళ్లపాలెం గ్రామాలలో క్షేత్రస్థాయిలో పర్యటించారు. ప్రజల కష్టాలను కళ్లారా చూసి చలించిపోయిన మంత్రి కందుల, ట్రాక్టర్లు, బైక్‌లపై ప్రయాణిస్తూ.. మోకాల్లోతు నీటిలో నడుచుకుంటూ స్వయంగా బాధితుల వద్దకు చేరుకుని పరిస్థితి అడిగి తెలుసుకున్నారు.

ముంపునకు గురైన ప్రతి ఇంటికీ వెళ్లి దెబ్బతిన్న వస్తువులను, ఆస్తి నష్టాన్ని పరిశీలిస్తూ బాధితులను మంత్రి కందుల దుర్గేష్ ఓదార్చారు. "మీకు నేనున్నాను, ఎవరూ అధైర్యపడవద్దు" అంటూ ప్రజలకు ధైర్యం చెప్పారు. ఎర్రకాలువ ఉప్పొంగి ప్రవహిస్తుండటంతో ముంపు గ్రామాల ప్రజలు మరో 2 రోజుల పాటు అప్రమత్తంగా ఉండాలని సూచించారు. బాధితులకు ఆకలి బాధలు లేకుండా ఫుడ్ ప్యాకెట్లు, సురక్షితమైన తాగునీరు, అన్ని రకాల వసతులు కూటమి ప్రభుత్వం చూసుకుంటుందని భరోసా ఇచ్చారు. ఎలాంటి ప్రాణనష్టం జరగకుండా ముందస్తు జాగ్రత్తలు తీసుకోవాలని, ఇళ్లలోకి నీరు చేరిన వెంటనే అధికారుల సూచనల మేరకు సురక్షిత ప్రాంతాలకు వెళ్లాలని పిలుపునిచ్చారు.

బాధితుల రక్షణ కోసం మంత్రి కందుల దుర్గేష్ తక్షణమే ఎన్డీఆర్‌ఎఫ్ (NDRF) బృందాలను నిడదవోలుకు రప్పించి, ముంపు ప్రాంతాల్లో సహాయక చర్యలు ముమ్మరం చేయాలని ఆదేశించారు. కూటమి ప్రభుత్వం ప్రజల రక్షణ, సంక్షేమానికి ఎల్లప్పుడూ అండగా ఉంటుందని, ప్రజల ప్రాణాలకు తమదే బాధ్యత అన్నారు. ఇప్పటికే నిడదవోలు పట్టణంలోని డొక్కా సీతమ్మ స్కూల్, ఎన్టీఆర్ మున్సిపల్ స్కూళ్లలో ఏర్పాటు చేసిన పునరావాస కేంద్రాలను సందర్శించి, బాధితులకు స్వయంగా నిత్యావసర వస్తువులను అందజేశారు. ఈ విపత్కర పరిస్థితుల్లో స్వయంగా మోకాల్లోతు నీటిలో దిగి నిరంతరం అందుబాటులో ఉంటూ సహాయం అందిస్తున్న మంత్రి కందుల దుర్గేష్ పై స్థానిక ప్రజలు హర్షం వ్యక్తం చేస్తున్నారు.

Murala Jyothi: నిడదవోలు చైర్‌పర్సన్‌గా పారిశుధ్య కార్మికుడి కుమార్తె.. స్ఫూర్తినింపుతున్న దళిత బిడ్డ మురాల జ్యోతి ప్రస్థానం

Shankar Dukanam — Tue, 3 Nov 2026 17:12:38 +0530

Nidadavole Municipal Chairperson | నిడదవోలు మునిసిపాలిటిీలో పారిశుద్య కార్మికుడి కుమార్తె... ఇప్పుడు అదే మునిసిపాల్టీకి ఛైర్‌పర్సన్. ఏపీ మునిసిపల్ ఎన్నికల ఫలితాల్లో చోటు చేసుకున్న అద్భుతం ఇది. సాధారణ దళిత కుటుంబం నుంచి వచ్చిన మురాల జ్యోతి మున్సిపల్ ఛైర్ పర్సన్ అయ్యారు. తల్లిదండ్రులు పారిశుధ్య కార్మికులు కాగా, ఆమె నర్సుగా పనిచేస్తున్నారు. ఆర్థిక బలం లేకపోయినా భర్త ప్రోత్సాహంతో ఎన్నికల బరిలోకి దిగి నిడదవోలు మున్సిపల్ చైర్ పర్సన్‌గా విజయాన్ని సాధించి సత్తా చాటారు. సాధారణ కుటుంబ నేపథ్యం ఉన్నప్పటికీ చైర్ పర్సన్‌గా ఎదిగిన మురాల జ్యోతి ప్రయాణం ప్రతి ఒక్కరికీ స్ఫూర్తిదాయకం.

పారిశుద్ధ్య కార్మికులుగా పనిచేసిన మురాల గణేష్, నాగమణి దంపతులకు చివరి సంతానం మురాల జ్యోతి నేడు తన జీవితంలో కీలక విజయాన్ని సొంతం చేసుకున్నారు. ఆమె జీవితం పూలబాటేమీ కాదు. చదువుకునే రోజుల్లోనే తల్లిదండ్రులను కోల్పోయినా.. అన్న, అక్క ఇచ్చిన ధైర్యంతో ముందుకు సాగారు. గత 10 ఏళ్లుగా భర్త కళ్లెం సురేశ్ ఇచ్చిన ప్రోత్సాహం, నిరంతర తోడ్పాటు ప్రజా జీవితం వైపు అడుగులు వేయాలని భావించారు. పారిశుద్ధ్య కార్మికుల కడుపున పుట్టి... నిడదవోలు పట్టణ భవిష్యత్తును శుభ్రంగా, సుందరంగా తీర్చిదిద్దే బాధ్యతను తీసుకున్న మురాల జ్యోతికి ఆర్థిక బలం లేకపోవచ్చు... కానీ ప్రజలకు మంచి చేయాలనే కొండంత ఆత్మబలమే ఆమెను నడిపించింది.

కష్టాలు, కన్నీళ్లను అధిగమించి, ఆశయాల సాధనకు ఆత్మవిశ్వాసంతో అడుగులు వేసిన ఆమె నర్సుగా కరోనా కష్టకాలంలో సేవలు అందించారు. ఎన్నో జీవితాలు నిలబెట్టారు. ఆమెకు ఆర్థిక బలం లేకపోయినా, ప్రజాసేవ చేయాలని అడుగులు వేస్తూ, సామాన్యులు కూడా రాజకీయాల్లో విజయం సాధించగలరని మురాల జ్యోతి నిరూపించారు.

సాధారణ దళిత బిడ్డ నుండి నాయకురాలిగా...

చర్చిపేటలోని డాక్టర్ బి.ఆర్. అంబేద్కర్ హైస్కూల్‌లో ప్రాథమిక విద్య పూర్తి చేసుకున్నారు. ఆపై ఎన్టీఆర్ హైస్కూల్‌లో పదో తరగతి వరకు చదివారు. తరువాత నిడదవోలు ఉమెన్స్ కాలేజీలో ఇంటర్మీడియట్, స్థానిక SVD డిగ్రీ కళాశాలలో బి.ఏ (హిస్టరీ, ఎకనామిక్స్, పొలిటికల్ సైన్స్) పూర్తి చేశారు. చదువుకునే రోజుల్లోనే తల్లిదండ్రులు ఇద్దరూ కన్నుమూయడం ఆమెను కుంగదీసింది. ఆ సమయంలో అన్న, అక్క ఆమెలో ధైర్యం నింపారు. ప్రజారోగ్యం కోసం నర్సుగా పనిచేస్తూ తనవంతు సేవలు అందించిన జ్యోతి, కోవిడ్ సమయంలో ప్రాణాలకు తెగించి సేవ చేశారు. ఆర్థికంగా ఎలాంటి అండదండలు లేకపోయినా, ప్రజలకు మంచి చేయాలనే తపనే ఆమెను ప్రజాసేవ వైపు అడుగులు వేసేలా చేసింది.

రాజకీయాల్లో వీరమహిళగా ప్రస్థానం

2024లో జనసేన పార్టీ సభ్యత్వం తీసుకున్న మురాల జ్యోతి నిడదవోలులో వీరమహిళగా తన ప్రయాణాన్ని ప్రారంభించారు. 31 ఏళ్లకే రాజకీయం వైపు అడుగులు వేసి పవన్ కళ్యాణ్ ప్రోత్సాహంతో నేడు నిడదవోలు మున్సిపల్ ఛైర్ పర్సన్ స్థాయికి ఎదగడం ఒక చారిత్రాత్మక పరిణామంగా చెప్పవచ్చు. పిల్లలు కౌశిక్, గుణశ్రీల బాధ్యతలు చూసుకుంటూ తల్లిగా, మరోవైపు ప్రజా సేవకు అంకితమయ్యారు.

నిడదవోలు అభివృద్ధి కోసం తాపత్రయం..

మహిళా సాధికారతకు, యువతకు, సామాన్యులకు జనసేన పార్టీ అధినేత పవన్ కళ్యాణ్ అవకాశం కల్పించారు. కూటమి ప్రభుత్వం ఇచ్చిన ఈ అవకాశాన్ని సద్వినియోగం చేసుకున్న మురాల జ్యోతి నిదడవోలు మున్సిపల్ చైర్ పర్సన్‌గా పోటీ చేసి ప్రజల మద్దతుతో విజయం సాధించారు. నిజాయితీతో కూడిన రాజకీయం చేస్తానని, నిడదవోలు పట్టణాన్ని అన్ని రంగాల్లో ముందంజలో ఉంచడమే తన లక్ష్యమన్నారు. పారిశుద్ధ్యం, విద్య, ప్రజారోగ్యం మెరుగుపరచేందుకు అన్ని విధాల కృషి చేస్తానంటున్నారు. తనకు ఈ అవకాశం ఇచ్చిన పవన్ కళ్యాణ్‌కు, ఎమ్మెల్యే, మంత్రి కందుల దుర్గేష్ కి, టిడిపి ఇంచార్జ్ బూరుగుపల్లి శేషారావు కు, నిడదవోలు పట్టణ ప్రజలకు ప్రత్యేక కృతజ్ఞతలు తెలిపారు. స్వయంకృషితో ఎదిగిన సాధారణ మహిళ మురాల జ్యోతి విజయం ఎంతో మంది మహిళలకు స్ఫూర్తిగా నిలుస్తోంది.

AP Municipal Election Results: మున్సిపల్ ఎన్నికల ఫలితాల్లో ఆసక్తికర పరిణామాలు.. వారి వార్డుల్లో ప్రత్యర్థుల విజయాలు

Shankar Dukanam — Tue, 3 Nov 2026 16:15:23 +0530

రామచంద్రాపురం: ఆంధ్రప్రదేశ్ మున్సిపల్‌ ఎన్నికల ఓట్ల లెక్కింపులో పలుచోట్ల ఆసక్తికర పరిణామాలు చోటుచేసుకున్నాయి. డాక్టర్‌ బీఆర్‌ అంబేడ్కర్‌ కోనసీమ జిల్లా రామచంద్రపురంలో వైసీపీ ఛైర్మన్‌ అభ్యర్థి వార్డులో టీడీపీ అభ్యర్థి విజయం సాధించారు. టీడీపీ నుంచి ఛైర్మన్‌ అభ్యర్థిగా ఉన్న వార్డులో వైసీపీ గెలిచింది. టీడీపీకి చెందిన కూటమి ఛైర్మన్‌ అభ్యర్థి మేడిశెట్టి శేషారావు సొంతవార్డు అయిన 6వ వార్డులో వైసీపీ గెలుపొందింది. వైసీపీ ఛైర్మన్‌ అభ్యర్థి చింతపల్లి నాగేశ్వరరావు సొంతవార్డు అయిన 10వ వార్డులో టీడీపీ విజయాన్ని దక్కించుకుంది. దాంతో రామచంద్రాపురం మున్సిపల్ ఎన్నికల ఫలితాలపై స్థానికంగా చర్చ జరుగుతోంది.

నెల్లూరులో వైసీపీ మేయర్‌ అభ్యర్థి సొంత డివిజన్‌లోనూ ఆ పార్టీకి ఓటమి తప్పలేదు. చింతారెడ్డిపాలెం ఐదో డివిజన్‌లో 398 ఓట్లతో టీడీపీ అభ్యర్థి అబ్రహం వైసీపీ అభ్యర్థి జాషువాపై విజయం సాధించారు. దాంతో సొంత డివిజన్‌లో ఆనం విజయ్‌ కుమార్‌ రెడ్డికి చేదు అనుభవం ఎదురైంది. కాగా, పులివెందులలో 40 వార్డులకుగానూ 30 చోట్ల లెక్కింపు పూర్తికాగా, కూటమి అభ్యర్థులు 28 చోట్ల నెగ్గారు. వైసీపీ కేవలం 2 వార్డుల్లో నెగ్గగా, టీడీపీ 25 వార్డుల్లో, జనసేన 1, బీజేపీ 2 వార్డుల్లో గెలుపొంది జగన్ నియోజకవర్గంలో వైసీపీకి కూటమి పార్టీలు షాకిచ్చాయి. టీడీపీ చైర్ పర్సన్ అభ్యర్థి గీతా కుమారి ఆధిక్యంలో కొనసాగుతూ విజయం దిశగా దూసుకెళ్తున్నారు.

లాటరిలో వార్డు గెలిచిన వైసీపీ

శ్రీకాకుళం జిల్లా పలాస- కాశిబుగ్గ 35వ వార్డులో ఆసక్తికర సంఘటన చోటుచేసుకుంంది. టీడీపీ నుంచి జోగ త్రివేణి, వైసీపీ నుంచి అరుణ ఓట్లు టై కావడంతో.. లాటరీ డ్రా తీశారు. ఆ స్లిప్పులో వైసీపీ అభ్యర్థి గెలుపొందారు.

శ్రీ పొట్టి శ్రీరాములు నెల్లూరు జిల్లా ఆత్మకూరులో జనసేన రెబల్‌ అభ్యర్థులు గెలుపొంది పార్టీకి షాకిచ్చారు. జనసేన టికెట్‌ నిరాకరించడంతో స్వతంత్ర అభ్యర్థులుగా గడ్డం సంధ్య, కొలగాని శిరీష పోటీ చేశారు. 11వ వార్డు నుంచి శిరీష, 12వ వార్డు నుంచి సంధ్య బరిలోకి దిగి విజయం సాధించారు.

Cyclone Murasu: 22 కి.మీ వేగంతో దూసుకొస్తున్న మురసు తుపాను.. ఏపీలో ఈ జిల్లాల్లో భారీ నుంచి అతి భారీ వర్షాలు

Shankar Dukanam — Mon, 2 Nov 2026 11:44:44 +0530

Cyclone Murasu Landfall | అమరావతి: పశ్చిమ మధ్య బంగాళాఖాతంలో ఏర్పడిన మురసు తుపాను మరింత బలపడి తీవ్ర తుపానుగా మారి దూసుకోస్తుంది. మురసు తుపాను గత ఆరు గంటల్లో గంటకు 22 కిలోమీటర్ల వేగంతో ప్రయాణించినట్లు భారత వాతావరణ శాఖ తెలిపింది. తుపాను ప్రస్తుతం చెన్నైకి 180 కిలోమీటర్లు, నెల్లూరుకు 160 కి.మీ, మచిలీపట్నానికి 240 కి.మీ, కావలికి 180 కి.మీ, ఒంగోలుకు 210 కిలోమీటర్ల దూరంలో కేంద్రీకృతమై ఉందని వాతావరణశాఖ అధికారులు తెలిపారు.

తుపాను ఎప్పుడు తీరం దాటనుంది

సోమవారం (నవంబర్ 2న) అర్ధరాత్రి నుంచి మంగళవారం తెల్లవారుజాము మధ్య సమయంలో నెల్లూరు- నరసాపురం ప్రాంతాల మధ్య ఒంగోలు సమీపంలో మురసు తుపాను తీరం దాటే అవకాశం ఉందని అంచనా వేశారు. తుపాను తీరం దాటే సమయంలో గంటకు 100 నుంచి 110 కిలోమీటర్ల వేగంతో, గరిష్ఠంగా 120 కిలోమీటర్ల వేగంతో ఈదురు గాలులు వీచే అవకాశం ఉందని తెలిపారు.

వర్షపాత హెచ్చరికలు, సహాయక చర్యలు

మురసు తుపాను తీవ్రత కారణంగా సోమవారం, మంగళవారాల్లో ఏపీతో పాటు తెలంగాణలో భారీ నుండి అత్యంత భారీ వర్షాలు కురుస్తాయని ఏపీ విపత్తుల నిర్వహణ సంస్థ మేనేజింగ్ డైరెక్టర్ ప్రఖర్‌ జైన్‌ తెలిపారు. దక్షిణ కోస్తాతో పాటు రాయలసీమ ప్రాంతాల్లో రెండు రోజులపాటు వర్షాలున్నాయని ప్రజలు అప్రమత్తంగా ఉండాలని సూచించారు. ముఖ్యంగా కృష్ణా, గుంటూరు, బాపట్ల, ప్రకాశం, మార్కాపురం, నెల్లూరు జిల్లాల్లో భారీ వర్షాలు కురిసే అవకాశం ఉందన్నారు.

అల్లూరి సీతారామరాజు, ఎన్టీఆర్, పల్నాడు, తూర్పు గోదావరి, పశ్చిమ గోదావరి, ఏలూరు, తిరుపతి, చిత్తూరు, పోలవరం, కాకినాడ, కోనసీమ, నంద్యాల, వైఎస్సార్‌ కడప, అన్నమయ్య జిల్లాల్లో పలుచోట్ల భారీ నుంచి అతిభారీ వర్షాలు కురవనున్నాయి. ఈ పరిస్థితిని ఎదుర్కొనేందుకు, అత్యవసర సహాయక చర్యల కోసం ముందస్తుగా 6 NDRF, 7 ఎస్డీఆర్‌ఎఫ్‌ (SDRF) బృందాలను సిద్ధంగా ఉంచామని అధికారులు తెలిపారు.

కృష్ణపట్నం పోర్టుకు మూడో ప్రమాద హెచ్చరిక

మురసు తుపాను ప్రభావంతో ఆంధ్రప్రదేశ్‌లోని పలు జిల్లాల్లో ఆదివారం రాత్రి నుంచి వర్షాలు కురుస్తున్నాయని తెలిసిందే. శ్రీకాకుళం, విజయనగరం, పార్వతీపురం మన్యం శ్రీపొట్టి శ్రీరాములు నెల్లూరు, కాకినాడ, డాక్టర్ బీఆర్ అంబేడ్కర్ కోనసీమ, కృష్ణా జిల్లాల్లో విస్తారంగా వర్షాలు కురుస్తున్నాయి. తుపాను తీవ్రతను దృష్టిలో ఉంచుకుని కృష్ణపట్నం పోర్టులో మూడో ప్రమాద హెచ్చరిక జారీ చేశారు.

కాకినాడతో పాటు అమలాపురం, అంబాజీపేట, నరసన్నపేట, తుని, చుట్టుపక్కల ప్రాంతాల్లో సోమవారం ఉదయం నుంచి వర్షాలు కురుస్తున్నాయి. మత్స్యకారులు ఎవరూ సముద్రంలో వేటకు వెళ్లకుండా కఠిన చర్యలు తీసుకోవాలని మంత్రి అచ్చెన్నాయుడు అధికారులను ఆదేశించారు. విద్యుత్, తాగునీరు, ఉచిత వైద్య సేవలకు ఎలాంటి అంతరాయం కలగకుండా ముందుజాగ్రత్త చర్యలు చేపట్టాలని అధికారులను సూచించారు.

CM Chandrababu Aerial Survey: ‘అర్నబ్’ తుపాన్ ముంపు ప్రాంతాల్లో సీఎం చంద్రబాబు ఏరియల్ సర్వే.. నష్టపోయిన వరిచేలు, అరటి, కొబ్బరి తోటలు పరిశీలిన

Satyaprasad Bandaru — Thu, 29 Oct 2026 16:38:04 +0530

CM Chandrababu Aerial Survey: 'అర్నబ్' తుపాను ప్రభావంతో కోస్తాంధ్ర జిల్లాల్లో భారీ నష్టం జరిగింది. సీఎం చంద్రబాబు తుపాను ప్రభావిత ప్రాంతాల్లో ఇవాళ ఏరియల్ సర్వే చేశారు. క్షేత్రస్థాయిలో పరిస్థితిని సమీక్షించేందుకు అమరావతి నుంచి హెలికాప్టర్‌లో బయలుదేరి కోనసీమ జిల్లా కాట్రేనికోన మండలం చెయ్యేరు చేరుకున్నారు.

ఏరియల్ సర్వే ద్వారా పంట నష్టం పరిశీలన

సీఎం చంద్రబాబు ప్రయాణ మార్గంలో కృష్ణా, పశ్చిమ గోదావరి, కోనసీమ జిల్లాల వ్యాప్తంగా తుపాను విధ్వంసాన్ని పరిశీలించారు. నిమ్మకూరు, పామర్రు, బంటుమిల్లి, నరసాపురం, పాలకొల్లు, అమలాపురం, కాట్రేనికోన పరిసరాల్లో ఏరియల్ వ్యూ నిర్వహించారు. వర్షాలకు నీటమునిగిన వరిచేలు, నేలకొరిగిన అరటి, కొబ్బరి తోటలు, తీవ్రంగా దెబ్బతిన్న ఆక్వా చెరువులను సీఎం పరిశీలించారు. దారిపొడవునా సీఎం సెక్రటరీ ప్రద్యుమ్న ఏయే ప్రాంతాల్లో ఎంత మేరకు నష్టం వాటిల్లిందనే వివరాలను సీఎంకు మ్యాప్‌లు, ప్రాథమిక గణాంకాల ద్వారా వివరించారు.

MSMEలకు భారీ ఊరట

తుపాను దెబ్బకు ఆర్థికంగా నష్టపోయిన చిన్న, సూక్ష్మ, మధ్య తరహా పరిశ్రమలను ఆదుకునేందుకు ప్రభుత్వం ప్యాకేజీ ప్రకటించింది. రూ.40 లక్షల లోపు టర్నోవర్ ఉన్న చిన్న తరహా సంస్థలకు రూ.50,000 ఆర్థిక సాయం ప్రకటించింది. రూ.40 లక్షల నుంచి రూ.1.5 కోట్ల టర్నోవర్ ఉన్న MSMEలకు రూ.1,00,000 సాయం, రూ.1.5 కోట్లకు పైగా టర్నోవర్ కలిగిన పరిశ్రమలకు రూ.1,50,000 సాయం అందజేయనున్నట్లు తెలిపింది.

Also Read: ఏపీ కేబినెట్ కీలక నిర్ణయాలు - 48 ప్రతిపాదనలకు ఆమోదం.. తుపాను బాధితులకు భరోసా!

మరో అల్పపీడన ప్రమాదం

అర్నబ్ తుపాను నష్టం నుంచి ఇంకా తేరుకోకముందే బంగాళాఖాతంలో మరొక అల్పపీడనం ముప్పు పొంచి ఉందని విపత్తుల నిర్వహణ సంస్థ తెలిపింది. దక్షిణ అండమాన్ సముద్రం పరిసర ప్రాంతాల్లో అల్పపీడనం ఏర్పడిందని పేర్కొంది. ఇది రాబోయే 24 గంటల్లో పశ్చిమ వాయువ్య దిశగా కదులుతూ అల్పపీడనంగా మారుతుందని స్పష్టం చేసింది. తదుపరి 24 గంటల్లో ఇది ఆగ్నేయ బంగాళాఖాతం పరిధిలో వాయుగుండంగా బలపడే అవకాశం ఉంది. దీని ప్రభావంతో నవంబర్ 1, 2 తేదీల్లో కోస్తాంధ్ర వ్యాప్తంగా అక్కడక్కడ మోస్తరు నుండి భారీ వర్షాలు కురిసే అవకాశం ఉందని ఏపీఎస్డీఎంఏ తెలిపింది. రైతులు, తీరప్రాంత ప్రజలు తగిన జాగ్రత్తలు తీసుకోవాలని సూచించింది.

Also Read: బంగాళాఖాతంలో మరో అల్పపీడనం - నవంబర్ 1, 2న భారీ వర్షాలు - తుఫాన్ ముప్పు?

Cyclone Arnab Damage: అర్నబ్ తుపాను బీభత్సం.. ఏపీలో ముగ్గురు మృతి.. గోదావరి జిల్లాల్లో తీవ్ర నష్టం!

Satyaprasad Bandaru — Wed, 28 Oct 2026 14:58:39 +0530

Cyclone Arnab Damage: 'అర్నబ్' తుపాను దెబ్బకు ఏపీ వణికిపోయింది. ఈదురుగాలులు, ఎడతెరిపి లేని భారీ వర్షాల ధాటికి తీరప్రాంత జిల్లాలు అతలాకుతలమయ్యాయి. ఈ విపత్తు కారణంగా వేర్వేరు ప్రాంతాల్లో జరిగిన ప్రమాదాల్లో ముగ్గురు ప్రాణాలు కోల్పోయారు. ముఖ్యంగా ఉభయ గోదావరి, కోనసీమ, కృష్ణా, విశాఖపట్నం జిల్లాల్లో తుపాను తీవ్ర వినాశనాన్ని సృష్టించింది.

వేర్వేరు ఘటనల్లో ముగ్గురి మృతి

తుపాను బీభత్సానికి ఈదురుగాలులు తోడవడంతో విషాదకర సంఘటనలు చోటుచేసుకున్నాయి. పశ్చిమగోదావరి జిల్లా భీమవరంలో ఓ చర్చి వద్ద భారీ చెట్టు విరిగిపడి కిషోర్ (45) అనే వ్యక్తి అక్కడికక్కడే మృతి చెందగా, బొండాడ వారి వీధిలో విద్యుత్ స్తంభం పడి రాంబాబు (34) ప్రాణాలు కోల్పోయారు. గాలి ధాటికి పలు ఇళ్లు, దుకాణాలు ధ్వంసమయ్యాయి. కోనసీమ జిల్లా సఖినేటిపల్లి మండలం ప్రకాష్‌పురంలో బలమైన గాలులకు గుడిసె కూలిపోవడంతో కొల్లు వెంకాయమ్మ అనే వృద్ధురాలు మృతి చెందింది.

గోదావరి జిల్లాల్లో పంటలు నేలమట్టం

ఉభయ గోదావరి జిల్లాలు అర్నబ్ తుపాను దెబ్బకు చిగురుటాకులా వణికిపోయాయి. భారీగా వర్షానికి ఈదురుగాలులు తోడవ్వడంతో వరి చేలు పూర్తిగా నేలమట్టం అయ్యాయి. కొబ్బరి చెట్లు, ఉద్యాన తోటలు తీవ్ర నష్టాన్ని మిగిల్చాయి. రహదారులపై చెట్లు, విద్యుత్ స్తంభాలు కూలిపోయాయి. దీంతో విద్యుత్ సరఫరా, రవాణాకు అంతరాయం ఏర్పడింది.

కృష్ణా జిల్లాలో తీవ్రత

కృష్ణా జిల్లా వ్యాప్తంగా ఎడతెరిపి లేకుండా కురుస్తున్న వర్షాలకు రోడ్లు జలమయమయ్యాయి. అవనిగడ్డ నియోజకవర్గం, కోడూరు మండలం వేణుగోపాలపురంలో భారీ చెట్లు, హోర్డింగులు కూలిపోయాయి. సముద్రం భయంకరంగా మారడంతో కోస్తా గ్రామాల ప్రజలు భయాందోళనకు గురవుతున్నారు. విద్యుత్ సరఫరా, ఇంటర్నెట్ సేవలు పూర్తిగా నిలిచిపోవడంతో వేణుగోపాలపురం అంధకారంలో మునిగిపోయింది. దీంతో స్థానిక ఆక్వా రంగం తీవ్రంగా దెబ్బతింది. ఉల్లిపాలెం వైపు లింగన్నకోడు వంతెన విరిగిపోవడమే కాకుండా, సాలెంపాలెం మార్గంలో రోడ్డు సౌకర్యం లేకపోవడంతో గ్రామం బాహ్య ప్రపంచంతో సంబంధాలు తెగిపోయి ప్రాణభయంతో అల్లాడుతోంది. 1977 నాటి దివిసీమ ఉప్పెన రోజులను ప్రజలు గుర్తుచేసుకుంటున్నారు.

విశాఖను కమ్మేసిన అంధకారం

విశాఖపట్నం నగరంలో అర్నబ్ ప్రభావం అత్యధికంగా విద్యుత్ వ్యవస్థపై పడింది. భారీ గాలులకు విద్యుత్ తీగలపై వృక్షాలు, కొమ్మలు విరిగిపడటంతో పాటు పలుచోట్ల స్తంభాలు నేలకొరిగాయి. దీంతో నగరంలో మెజారిటీ ప్రాంతాలకు విద్యుత్ నిలిచిపోయింది.

Also Read: తుపాను ప్రభావిత ప్రాంతాల్లో సహాయ చర్యల్లో పాల్గొనండి: పవన్ కళ్యాణ్

అధికారుల తీవ్ర హెచ్చరికలు

ప్రస్తుత విపత్కర పరిస్థితుల్లో ప్రజలెవరూ అనవసరంగా ఇళ్ల నుండి బయటకు రావద్దని, ముఖ్యంగా చిన్నపిల్లలను బయటకు పంపకూడదని అధికారులు కఠిన హెచ్చరికలు జారీ చేశారు. రోడ్లపై తెగిపడిన విద్యుత్ వైర్ల దరిదాపుల్లోకి వెళ్లవద్దని సూచించారు. మరోవైపు, నగరాల్లో విద్యుత్ సరఫరాను పునరుద్ధరించేందుకు ఏపీఈపీడీసీఎల్ సిబ్బంది యుద్ధప్రాతిపదికన శ్రమిస్తున్నారు. విరిగిపడిన చెట్లు, స్తంభాలను తొలగించి, మార్గాలను సుగమం చేసేందుకు ప్రత్యేక బృందాలు రంగంలోకి దిగాయి. వీలైనంత త్వరగా పరిస్థితులను సాధారణ స్థితికి తీసుకువస్తామని అధికారులు తెలిపారు.

Also Read: ఏపీపై విరుచుకుపడిన 'అర్నబ్‌' తుపాను... భారీగా చెట్లు, విద్యుత్ స్తంభాలు నేలమట్టం.. నిలిచిన రవాణా సేవలు

Arnab Effect On AP: ఏపీపై విరుచుకుపడిన 'అర్నబ్‌' తుపాను... భారీగా చెట్లు, విద్యుత్ స్తంభాలు నేలమట్టం.. నిలిచిన రవాణా సేవలు

Satyaprasad Bandaru — Wed, 28 Oct 2026 12:34:05 +0530

Arnab Effect On AP: అతి తీవ్ర తుపాను 'అర్నబ్‌' తీరం దాటింది. యానాం-నర్సాపురం మధ్య తీరం దాటి బలహీనపడుతుంది. తుపాను ప్రభావంతో కోస్తాంధ్రతో పాటు పలు జిల్లాల్లో భారీ ఈదురుగాలులు అల్లకల్లోలం సృష్టించాయి. ముఖ్యంగా అర్నబ్ తుపాను డాక్టర్ బీఆర్‌ అంబేడ్కర్‌ కోనసీమ జిల్లాపై విరుచుకుపడింది. ఈ తుపాను తీరం దాటే సమయంలో గంటకు 100 కిలోమీటర్లకు పైగా వేగంతో వీచిన తీవ్ర ఈదురుగాలులు, భారీ వర్షాల ధాటికి జిల్లా వ్యాప్తంగా జనజీవనం స్తంభించిపోయింది. తుపాను ఉద్ధృతికి వందలాది కొబ్బరి చెట్లు, విద్యుత్ స్తంభాలు నేలకూలి తీవ్ర నష్టం వాటిల్లింది.

తీరం దాటిన తుపాను – తీరప్రాంతాల్లో బీభత్సం

అర్నబ్‌ తుపాను తీరం దాటడంతో తీరప్రాంత మండలాలైన రాజోలు, ఉప్పలగుప్తం, సఖినేటిపల్లి, మల్కిపురంలలో అత్యంత భారీ వర్షం కురిసింది. గాలుల హోరుకు అనేక చోట్ల విద్యుత్‌ తీగలు తెగిపడి సరఫరా పూర్తిగా నిలిచిపోయింది. దీంతో ప్రజలు అంధకారంలో అల్లలాడారు. సమాచారం అందుకున్న విద్యుత్ శాఖ సిబ్బంది వెంటనే రంగంలోకి దిగి మరమ్మతు పనులను చేపట్టారు.

పలు మండలాల్లో వినాశనం

ముఖ్యంగా అమలాపురం, ముమ్మడివరం, కాట్రేనికోన, ఐ.పోలవరం, అంబాజీపేట, పి.గన్నవరం, రావులపాలెం, అయినవిల్లి, మామిడికుదురు తదితర ప్రాంతాల్లో తుపాను భీకర వాతావరణాన్ని సృష్టించింది. అయినవిల్లి మండలం ఎస్‌.మూలపొలంలో వందల ఏళ్లనాటి భారీ రావి చెట్టు గాలుల ధాటికి వేళ్లతో సహా నేలకొరిగింది. కోనసీమ జిల్లాలో వేల ఎకరాల్లో సాగు చేసిన కొబ్బరి, అరటి, బొప్పాయి తోటలు నేలమట్టమయ్యాయి. కోతకొచ్చిన పంటలు నాశనం కావడంతో రైతాంగం తీవ్రంగా నష్టపోయింది.

స్తంభించిన రవాణా వ్యవస్థ

రావులపాలెం సమీపంలో ప్రధాన రహదారులపై భారీ వృక్షాలు కూలిపోవడంతో వాహనాల రాకపోకలకు తీవ్ర విఘాతం కలిగింది. ముఖ్యంగా రావులపాలెం-అమలాపురం ప్రధాన మార్గంలో సుమారు రెండు కిలోమీటర్ల మేర వాహనాలు నిలిచిపోయి ట్రాఫిక్‌ జామ్‌ అయింది. అధికారులు, సహాయక బృందాలు రోడ్లపై పడిన చెట్లను తొలగించి రవాణాను పునరుద్ధరించే చర్యలు చేపట్టారు.

Also read: నరసాపురం సమీపంలో తీరం దాటిన అర్నబ్ తుపాను.. గోదావరి జిల్లాల్లో భారీ వర్షాలు

రైళ్లు, విమానాలు రద్దు

తుపాను ప్రభావంతో పలు విమానాలు, రైళ్ల రాకపోకలకు అంతరాయం ఏర్పడింది. భోగాపురం విమానాశ్రయంలో విమాన రాకపోకలు నిలిచిపోయాయి. గన్నవరం, రాజమండ్రి విమానాశ్రయాల నుంచి పలు సర్వీసులు రద్దు చేశారు. విజయవాడ నుంచి రాకపోకలు సాగించే ఆరు విమాన సర్వీసులు రద్దు అయ్యాయి. గన్నవరం నుంచి ఇండిగో, ఫ్లై 91, ఎయిర్ ఇండియా సర్వీసులపై ప్రభావం పడింది. విశాఖపట్నం ఎయిర్ ఇండియా ఎక్స్‌ప్రెస్ సర్వీస్ రద్దైంది. తుపాను నేపథ్యంలో దక్షిణ మధ్య రైల్వే పలు రైళ్లను రద్దు చేసింది. మరికొన్ని రైళ్లను దారి మళ్లించింది. కొన్ని సర్వీసుల ప్రయాణ పరిమితి కుదించింది. ప్రజలు తమ ప్రయాణాలను తాత్కాలికంగా వాయిదా వేసుకోవాలని అధికారులు కోరుతున్నారు.

కిలోమీటర్ మేర ముందుకొచ్చిన సముద్రం

కృష్ణా జిల్లాపై అర్నబ్ తుపాను తీవ్ర ప్రభావం చూపింది. అవనిగడ్డ నియోజకవర్గంలో భారీ ఈదురుగాలులతో కూడిన భారీ వర్షాలు కురుస్తున్నాయి. తుపాను ప్రభావంతో పాలకాయతప్ప వద్ద సముద్రం అల్లకల్లోలంగా మారింది. సముద్రం కిలోమీటర్ ముందుకు వచ్చింది. సుమారు ఆరు నుంచి ఏడు మీటర్ల ఎత్తులో అలలు ఎగసిపడుతున్నాయి. విద్యుత్ సరఫరాకు అంతరాయం ఏర్పడింది.

Also read: కూటమి ప్రభుత్వం ముందస్తు చర్యల వల్లే ప్రాణనష్టం జరగలేదు: సీఎం చంద్రబాబు

Cyclone Arnab Landfall: నరసాపురం సమీపంలో తీరం దాటిన అర్నబ్ తుపాను.. గోదావరి జిల్లాల్లో భారీ వర్షాలు

Shankar Dukanam — Wed, 28 Oct 2026 11:15:54 +0530

అమరావతి: గత రెండు రోజులుగా టెన్షన్ పెట్టిన అర్నాబ్ తుపాను నరసాపురానికి సమీపంలో తీరం దాటింది. ఆంధ్రప్రదేశ్ తీరానికి చేరుకున్నప్పటికీ, దాని తీరం దాటే ప్రక్రియ అంచనా వేసిన దానికంటే నిలకడగా జరిగినట్లు వాతావరణశాఖ తెలిపింది. అర్ధరాత్రి దాటాక సుమారు 1:20 గంటల ప్రాంతంలో యానాంకు దక్షిణంగా, నరసాపురం సమీపంలో ఈ తీరం దాటే ప్రక్రియ ప్రారంభమైంది. ఆ తర్వాత తుపాను దాదాపు ఒకే చోట నిలకడగా కేంద్రీకృతమై ఉండటంతో అర్నబ్ తీరం దాటే ప్రక్రియ సుదీర్ఘంగా కొనసాగింది. బుధవారం ఉదయం నరసాపురానికి సమీపంలో అర్నబ్ తుపాన్ తీరం దాటడంతో అధికారులు ఊపిరి పీల్చుకున్నారు. ఈ సమయంలో గంటకు 115 నుండి 125 కిలోమీటర్ల వేగంతో, గరిష్టంగా 140 కిలోమీటర్ల దాకా తీవ్రమైన ఈదురుగాలులు వీచాయని అధికారులు వెల్లడించారు.

రాబోయే గంటల్లో ఈ తుపాను నెమ్మదిగా వాయవ్య దిశ నుంచి ఉత్తర-వాయవ్య దిశగా పయనించి క్రమంగా బలహీనపడుతుందని వాతావరణ శాఖ అంచనా వేసింది. దీని ప్రభావంతో బుధవారం నాడు అనకాపల్లి, కాకినాడ, బి.ఆర్. అంబేద్కర్ కోనసీమ, విశాఖపట్నం, విజయనగరం జిల్లాల్లో అత్యంత భారీ వర్షాలు కురిసే అవకాశం ఉందని తెలిపారు.పొరుగున ఉన్న దక్షిణ ఒడిశాలోని కోరాపుట్, రాయగడ, గజపతి తదితర సరిహద్దు జిల్లాల్లో సైతం భారీ వర్షాల ముప్పు పొంచి ఉందని అధికారులు హెచ్చరించారు.

తీరప్రాంత ఏపీలో అక్టోబర్ 28న సాయంత్రం నుంచి బలమైన గాలుల తీవ్రత తగ్గే అవకాశం ఉన్నప్పటికీ, వర్షాలు మాత్రం అక్టోబర్ 29 వరకు కొనసాగవచ్చు అని వాతావరణశాఖ తెలిపింది. ఉత్తరాంధ్ర, దక్షిణ ఒడిశా ప్రాంతాలలో అక్టోబర్ 29 నుండి 30 మధ్య వర్షాల తీవ్రత తగ్గుముఖం పట్టనుంది. అయితే ప్రస్తుతం తుపాను ఈదురుగాలుల కంటే నిరంతరం కురుస్తున్న వర్షాలు, దాంతో వచ్చే వరదలపైనే ఆందోళన పెరిగింది. అర్నబ్ బలహీనపడినప్పటికీ, ఇప్పటికే పూర్తిస్థాయిలో నిండి ఉన్న జలాశయాలు, నిరంతరం కురిసే వర్షాల కారణంగా లోతట్టు ప్రాంతాలలో వరద ముప్పు పొంచి ఉంది.

బుధవారం సైతం పలు జిల్లాల్లో ముందు జాగ్రత్త చర్యల్లో భాగంగా స్కూళ్లు, విద్యా సంస్థలకు సెలవులు ప్రకటించారు. ఉమ్మడి శ్రీకాకుళం, విజయనగరం, విశాఖపట్నంతో పాటు ఉమ్మడి తూర్పు గోదావరి, పశ్చిమ గోదావరి జిల్లాల్లోనూ మోస్తరు నుంచి భారీ వర్షాలు కురుస్తున్నాయి. గోదావరి జిల్లాల్లో గంటకు 100 కి.మీ వేగంతో భీకర గాలులు వీస్తాయని, ప్రజలు అప్రమత్తంగా ఉండాలని సూచించారు. సీఎం చంద్రబాబు మంగళవారం రాత్రి ఒంటి గంట వరకు పరిస్థితిపై సమీక్షించారు. బుధవారం ఉదయం సైతం మరోసారి ఉన్నతాధికారులు, జిల్లాల కలెక్టర్లతో అర్నబ్ తుపాను తీవ్రత, చేపట్టిన చర్యలపై వివరాలు అడిగి తెలుసుకున్నారు. అర్ధరాత్రి వరకు సేవలు అందించి తుపాను ముప్పు నుంచి ప్రాణ నష్టం వాటిల్లకుండా చర్యలు చేపట్టిన అధికారులను సీఎం చంద్రబాబు అభినందించారు.