rajamundry

World Tourism Day Arrangements: ఏపీ పర్యాటకానికి సోషల్ మీడియా బూస్ట్.. పర్యాటక ప్రాంతాలకు గ్లోబల్ ప్రచారం.. ఇన్‌ఫ్లూయెన్సర్లతో మంత్రి దుర్గేష్ బంతి భోజనాలు

Satyaprasad Bandaru — Sun, 27 Sep 2026 19:30:00 +0530

World Tourism Day Arrangements: ప్రపంచ పర్యాటక దినోత్సవం సందర్భంగా రాజమహేంద్రవరంలోని మంజీరా హోటల్‌లో రాష్ట్ర పర్యాటక శాఖ ఆధ్వర్యంలో ఘనంగా ఏర్పాట్లు జరిగాయి. ఈ వేడుకల్లో పర్యాటక, సాంస్కృతిక, సినిమాటోగ్రఫీ శాఖా మంత్రి కందుల దుర్గేష్ పాల్గొని ఏర్పాట్లను పరిశీలించారు. రాష్ట్రంలోని అద్భుతమైన పర్యాటక ప్రాంతాలను విశ్వవ్యాప్తం చేయడంలో కీలక పాత్ర పోషిస్తున్న సోషల్ మీడియా ఇన్ఫ్లుయెన్సర్లతో కలిసి మంత్రి దుర్గేష్ బంతి భోజనాలు చేయడం ఈ కార్యక్రమంలో మెయిన్ హైలైట్‌గా నిలిచింది. అంతకుముందు మంత్రి కందుల దుర్గేష్ స్వయంగా అతిథులకు భోజనం వడ్డించి తన ఆప్యాయతను చాటుకున్నారు.

Also Read: స్వర్ణ వార్డుల్లో 4 కేటగిరీల ఉద్యోగుల ప్రమోషన్లకు ఏపీ ప్రభుత్వం గ్రీన్ సిగ్నల్

అరిటాకులో భోజనం

అరిటాకులో వడ్డించిన ఘుమఘుమలాడే సంప్రదాయ ఆంధ్ర వంటకాలను ఇన్ఫ్లుయెన్సర్లకు రుచి చూపించి, ఆంధ్రా వంటకాల గొప్పతనాన్ని వారికి వివరించారు. ఈ సందర్భంగా వారు భోజనాలు అద్భుతంగా ఉన్నాయని కొనియాడారు. ఉమ్మడి గోదావరి జిల్లా ప్రసిద్ధ మిఠాయి పూతరేకులను మంత్రి కందుల దుర్గేష్ స్వయంగా తన చేతులతో తయారు చేసి, వారికి వడ్డించడం అందరినీ ఆకట్టుకుంది. రాష్ట్రంలో ప్రాచుర్యానికి నోచుకోని అనేక సుందరమైన పర్యాటక ప్రాంతాలను సోషల్ మీడియా ద్వారా ప్రజల్లోకి తీసుకువెళ్లాలని ఇన్ఫ్లుయెన్సర్లకు మంత్రి దుర్గేష్ సూచించారు. ఈ వేడుకల్లో ఏర్పాటు చేసిన ప్రత్యేక సెల్ఫీ పాయింట్ వద్ద మంత్రి దుర్గేష్, అధికారులు, ఇన్ఫ్లుయెన్సర్లు ఉత్సాహంగా ఫోటోలు దిగి సందడి చేశారు.

Also Read: సచివాలయ ఉద్యోగుల చలో విజయవాడ ధర్నాలో ఉద్రిక్తత.. డ్యూటీలో ఉన్న సీఐ మృతి

Janasena Politcis: కూటమి బలంగా నిలబడాలి.. జనసేన గౌరవానికి భంగం వాటిల్లకూడదు: పిఠాపురంలో పవన్ కళ్యాణ్

Shankar Dukanam — Tue, 22 Sep 2026 16:45:26 +0530

Pawan Kalyan Camp Office in Pithapuram | పిఠాపురం: కూటమి ప్రభుత్వంలో అంతా కలిసికట్టుగా పనిచేయాలని, అదే సమయంలో ఎవరి గౌవరం తగ్గకూడదని.. జనసేన పార్టీ గౌరవానికి భంగం వాటిల్లకూడదని ఆంధ్రప్రదేశ్ రాష్ట్ర ఉప ముఖ్యమంత్రి పవన్ కళ్యాణ్ అన్నారు. తనకు కృతజ్ఞత చూపించేతత్వం చాలా ఎక్కువని, అది తన స్వభావం అన్నారు. వచ్చే 3, 4 నెలల్లో క్యాంప్ ఆఫీసు పిఠాపురానికి మార్చుతానని, జనసేన నాయ‌కులంద‌రికీ దిశా నిర్దేశం చేయాలన్నారు. ప‌ద‌వులు తీసుకున్న త‌రువాత మన నాయకులంతా మెత్త‌ప‌డ్డారంటూ ఆసక్తికర వ్యాఖ్యలు చేశారు.

పిఠాపురం నియోజకవర్గాన్ని దేశంలోనే ఒక మోడల్ నియోజకవర్గంగా తీర్చిదిద్దడమే ఏపీ ప్రభుత్వ ప్రధాన సంకల్పమని స్పష్టం చేశారు. పిఠాపురం ఆర్‌ఆర్‌బీహెచ్‌ఆర్ కాలేజీ స్టేడియంలో నిర్వహించిన భారీ బహిరంగ సభలో ఆయన పాల్గొని ప్రసంగించారు. కష్టాల్లో ఉన్నవారికి అండగా నిలబడటమే తన నైజమని పేర్కొన్న ఆయన, పిఠాపురం ప్రజల అవసరాలు తీర్చడమే మొదటి ప్రాధాన్యత అని ప్రకటించారు. ఈ ఏడాది చివరికల్లా పిఠాపురంలో తన క్యాంపు కార్యాలయాన్ని ఏర్పాటు చేస్తామన్నారు. ఇప్పటికే నియోజకవర్గంలో అనేక అభివృద్ధి పనులు పూర్తి కాగా, తాజాగా మరో రూ. 1,500 కోట్ల విలువైన అభివృద్ధి ప్రాజెక్టులకు శ్రీకారం చుట్టినట్లు తెలిపారు.

నియోజకవర్గంలో మౌలిక వసతుల కల్పనకు పెద్దపీట వేశారు. ఇప్పటికే రూ. 200 కోట్లతో 600కు పైగా సీసీ, బీటీ రోడ్లను అందుబాటులోకి తీసుకొచ్చామని పవన్ కళ్యాణ్ వివరించారు. మరో 202 రహదారులను తాజాగా ప్రారంభించినట్లు చెప్పారు. ఉప్పాడ కొత్తపల్లి మండలంలో నాగులాపల్లి రక్షిత మంచినీటి పథకం ఆధునీకరణ ద్వారా 97 వేల మందికి తాగునీరు ఇస్తున్నామని, జల్ జీవన్ మిషన్, అమృత్ 2.0, ఏషియన్ ఇన్ఫ్రాస్ట్రక్చర్ ఇన్వెస్ట్‌మెంట్ బ్యాంక్ నిధులతో దాదాపు రూ. 460 కోట్లతో గ్రామాలు, మున్సిపాలిటీల్లో తాగునీటి ప్రాజెక్టులు చేపట్టినట్లు తెలిపారు.

ప్రజల ఆరోగ్యానికి ప్రాధాన్యమిస్తూ రూ. 34 కోట్లతో 100 పడకల ప్రాంతీయ ఆసుపత్రి నిర్మాణం, రూ. 45 కోట్లతో కాకినాడ జీజీహెచ్‌లో ఆంకాలజీ బ్లాక్, పిఠాపురంలో రూ. 100 కోట్లతో ఆయుష్ మెడికల్ కాలేజ్ ఏర్పాటు చేస్తున్నట్లు పేర్కొన్నారు. అలాగే పిఠాపురం పట్టణంలో పారిశుధ్యాన్ని మెరుగుపరిచేందుకు రూ. 225 కోట్లతో అండర్ గ్రౌండ్ డ్రైనేజీ, మురుగునీటి శుద్ధి ప్లాంట్లను నిర్మిస్తున్నట్లు తెలిపారు.

ఉప్పాడ తీరప్రాంత ప్రజలను ఎన్నో ఏళ్లుగా వేధిస్తున్న సముద్రపు కోత సమస్యకు శాశ్వత పరిష్కారంగా రూ. 323 కోట్లతో రక్షణ గోడ నిర్మాణానికి కేంద్ర ప్రభుత్వం ఆమోదం తెలపడంపై హర్షం వ్యక్తం చేశారు. కేంద్ర హోంమంత్రి అమిత్ షాతో జరిపిన చర్చలు, ఐఐటీ మద్రాస్ సర్వేల ఆధారంగా ఈ ప్రాజెక్టు త్వరలోనే ప్రారంభం కానుందని తెలిపారు. పీఎం గతిశక్తి కింద రూ. 118 కోట్లతో రోడ్ ఓవర్ బ్రిడ్జ్ (ROB), అమృత్ భారత్ పథకంలో రూ. 37 కోట్లతో రైల్వే స్టేషన్ ఆధునీకరణ, పాడా (PADA) నిధులతో రూ. 20 కోట్లతో బస్ స్టాండ్ పనులు శరవేగంగా జరుగుతున్నాయన్నారు. విద్యార్థుల కోరిక మేరకు రూ. 4 కోట్లతో ఆర్‌ఆర్‌బీహెచ్‌ఆర్ కాలేజీ కొత్త భవనాలను నిర్మిస్తున్నట్లు పవన్ కళ్యాణ్ చెప్పారు. పిఠాపురం అభివృద్ధికి నిరంతరం సహకరిస్తున్న ప్రధాని నరేంద్ర మోదీ, కేంద్ర మంత్రులు, సీఎం చంద్రబాబుకి ఆయన ఈ సందర్భంగా ధన్యవాదాలు తెలిపారు.

అడ్డుపడి పవన్ కళ్యాణ్ కాన్వాయ్ ఆపేశారు..

సహారా ఫీల్డ్ వర్కర్స్ అండ్ డిపాజిటర్స్ వెల్ఫేర్ అసోసియేషన్ ప్రతినిధులు పిఠాపురంలో డిప్యూటీ సీఎం పవన్ కళ్యాణ్ కాన్వాయ్ ఆపి సమస్యలు విన్నవించారు. ప్రభుత్వాసుపత్రి సెంటర్లో కాన్వాయికి అడ్డంగా సభ్యులు వెళ్లడంతో కాన్వాయ్ ఆపి వారి సమస్యలు విన్నారు పవన్ కళ్యాణ్. సహారా నుంచి కోటి మంది డిపాజిట్ వర్క్స్ కు సంబంధించిన 25 వేల కోట్లు రావాల్సి ఉందని వినతి పత్రం ఇచ్చారు. డబ్బులు అందక డిపాజిటర్ల కుటుంబాలు ఇబ్బందులు పడుతున్నాయని పవన్ కు విన్నవించారు.

Deputy CM Pawan Kalyan: పిఠాపురంలో రూ. 6 కోట్లతో 11 చెరువుల సుందరీకరణ.. పీఠికాపుర వనం ప్రారంభించిన డిప్యూటీ సీఎం పవన్ కళ్యాణ్

Shankar Dukanam — Mon, 21 Sep 2026 14:39:21 +0530

పిఠాపురం: కాకినాడ జిల్లా పిఠాపురంలో ఏపీ ఉప ముఖ్యమంత్రి కొణిదెల పవన్ కళ్యాణ్ రూ.1.83 కోట్ల వ్యయంతో అభివృద్ధి చేసిన ‘పీఠికాపుర వనం’ (నగర వనం) ను లాంఛనంగా ప్రారంభించారు. రోజుల పర్యటనలో భాగంగా సోమవారం ఉదయం పలు అభివృద్ధి కార్యక్రమాలను పవన్ ప్రారంభించారు. గతంలో చెత్త వేసే డంపింగ్ యార్డుగా ఉండి, నిరుపయోగంగా ఉన్న ఐదున్నర ఎకరాల ప్రాంతాన్ని ప్రజలకు ఉపయోగపడే ఆకర్షణీయమైన పట్టణ హరిత ప్రదేశంగా అటవీ శాఖ తీర్చిదిద్దింది. ఈ కార్యక్రమంలో భాగంగా పవన్ కళ్యాణ్ మొక్క నాటారు. కాకినాడ ఎంపీ తంగెళ్ల ఉదయ్ శ్రీనివాస్, జిల్లా కలెక్టర్ ఎం.ఎన్. హరేంధిర ప్రసాద్, ప్రధాన ముఖ్య అటవీ సంరక్షణాధికారి డాక్టర్ పీవీ చలపతిరావు, ఎమ్మెల్యే పంతం నానాజీ, ఇతర ప్రజాప్రతినిధులు, అధికారులతో కలిసి పవన్ కళ్యాణ్ ప్రారంభ శిలాఫలకాన్ని ఆవిష్కరించారు.

అనంతరం వనంలో కొత్తగా ఏర్పాటు చేసిన సదుపాయాలను, ఉద్యానవనాలను పరిశీలించిన డిప్యూటీ సీఎం పవన్ కళ్యాణ్, అటవీకరణ, జీవ వైవిధ్య పరిరక్షణపై ఏర్పాటు చేసిన ఫోటో ఎగ్జిబిషన్‌ను సందర్శించారు. పిఠాపురం పట్టణ ప్రజలకు ఆహ్లాదాన్ని అందించేలా బటర్ ఫ్లై గార్డెన్, నమో వన్ ప్లాంటేషన్, చెరువు చుట్టూ మొక్కల పెంపకం, ఓపెన్ ఎయిర్ యాంఫీథియేటర్, గెజిబో, ఓపెన్ జిమ్, కెఫెటీరియా, వాకింగ్ ట్రాక్స్, ఎంట్రన్స్ ప్లాజాలను సుందరంగా సిద్ధం చేశారు. ఇది పిఠాపురం ప్రజలకు వ్యాయామం, విశ్రాంతితో పాటు పవిత్ర పాదగయ క్షేత్రానికి వచ్చే భక్తులకు హరిత ఆకర్షణగా నిలవనుంది.

ప్రభుత్వ సహకారంతో పాటు వివిధ సంస్థల సామాజిక బాధ్యత (CSR) నిధులు, ఏపీజీఈఎన్సీఓ (APGENCO) భాగస్వామ్యంతో కాకినాడ జిల్లా అటవీ శాఖ ఈ ప్రాజెక్టును విజయవంతంగా పూర్తి చేసింది. కేవలం మొక్కలు నాటడమే కాకుండా పర్యావరణహిత హరిత మౌలిక వసతులను సృష్టించి, విద్యార్థులకు జీవ వైవిధ్యంపై అవగాహన కల్పించే బహిరంగ అభ్యాస కేంద్రంగా దీనిని అభివృద్ధి చేయడం పట్ల స్థానికులు హర్షం వ్యక్తం చేశారు. పిఠాపురాన్ని మరింత పచ్చగా, ఆరోగ్యకరంగా మార్చడంలో ఈ పీఠికాపుర వనం కీలక పాత్ర పోషిస్తుందని అధికారులు వెల్లడించారు. ఈ కార్యక్రమంలో కాకినాడ జాయింట్ కలెక్టర్ అపూర్వ భరత్, పాడా పీడీ శివరామ్ ప్రసాద్ తదితరులు పాల్గొన్నారు.

పిఠాపురానికి ఉన్న ఆధ్యాత్మిక ప్రాధాన్యతను దృష్టిలో ఉంచుకుని నగరవనంలో ఆహ్లాదం, ఆధ్యాత్మికతల సమ్మేళనంగా తీర్చిదిద్దారు. అందులో ముఖ్యంగా నక్షత్రవనం, శివపంచాయతన వనం సందర్శకులకు ప్రత్యేక ఆకర్షణగా నిలవనున్నాయి. అటవీ శాఖ అధికారులు ఈ రెండింటి ప్రాధాన్యతను పవన్ కళ్యాణ్ కి వివరించారు. 27 నక్షత్రాలకు ప్రతీకగా నిలిచే ఉసిరి, మేడి, మోదుగ, కొండమామిడి, పిప్పలి, వెదురు, దేవదారు, పసన, జిల్లేడు, జమ్మి, రావి, మర్రి, జాతి జువ్వి, విప్ప, వేప తదితర రకాల మొక్కలను ఒక వరుస క్రమంలో నాటగా, ప్రతి మొక్కను ఆయన ఆసక్తిగా తిలకించారు. శివ స్వరూపమైన మారేడుతో పాటు వినాయకుడు, విష్ణువు, అమ్మవారు, సూర్యభగవానుడి స్వరూపాలైన మొక్కలను శివ పంచాయతనంగా నాటారు. కార్తీక మాసంతోపాటు ప్రత్యేక దినాల్లో ఈ మొక్కలకు ప్రదక్షిణ చేయడం ద్వారా ఆయా దేవతల ప్రదక్షిణ పుణ్యం ప్రాప్తిస్తుందని, ప్రతి మొక్కకు శాస్త్రీయ నామం, వాడుకలో ఉన్న పేరుతో బోర్డులు ఏర్పాటు చేశారు.

అనంతరం 70 సెంట్ల విస్తీర్ణంలో ఏర్పాటు చేసిన మియావకీ ఫారెస్ట్ ప్లాంటేషన్‌ను, బటర్‌ఫ్లై పార్కును, నగరవనం మధ్యన ఉన్న భారీ కొలనును పవన్ కళ్యాణ్ తిలకించారు. తక్కువ విస్తీర్ణంలో ఎక్కువ మొక్కలను పెంచుతూ వేగంగా పచ్చదనాన్ని అభివృద్ధి చేసే విధంగా మియావకీ పద్ధతిలో చిట్టడవిని చేశారు. బాక్స్ క్రికెట్, ప్లే కోర్ట్స్ లాంటి మరిన్ని ఆకర్షణలు నగరవనానికి జోడిస్తారు. పిఠాపురం ప్రజలతోపాటు ఆధ్యాత్మిక సందర్శనార్థం ఇతర ప్రాంతాలు, రాష్ట్రాల నుంచి వచ్చే భక్తులకు ఆహ్లాదాన్ని పంచే విధంగా నగర వనాన్ని తీర్చిదిద్దాలని అధికారులకు సూచనలు చేశారు.

అనంతరం గతంలో డంపింగ్ యార్డు ప్రదేశం ఎలా ఉండేది? దాన్ని ఎంత కష్టపడి నగరవనంగా తీర్చిదిద్దారో వివరిస్తూ ఏర్పాటు చేసిన ఫొటో గ్యాలరీని పవన్ కళ్యాణ్ వీక్షించారు. ఈ సందర్భంగా పీఠికాపుర వనాన్ని తీర్చిదిద్దేందుకు కృషి చేసిన అధికారులను అభినందించారు. కేంద్ర ప్రభుత్వ నగర వన్ యోజన పథకం సహకారంతో రాష్ట్రవ్యాప్తంగా పలు నగర వనాలు అభివృద్ధి చేస్తున్నారు. రూ. 36 కోట్లతో ఏర్పాటు చేసిన 18 నగర వనాలను పవన్ కళ్యాణ్ ప్రారంభించి ప్రజలకు అందుబాటులోకి తీసుకువచ్చారు.

South Coast Railway: కాకినాడ నుంచి రైలు మార్గంలో వుడ్ పల్ప్ రవాణా.. భారత రైల్వే చరిత్రలో కొత్త అధ్యాయం

Shankar Dukanam — Sun, 20 Sep 2026 11:44:16 +0530

దక్షిణ కోస్తా రైల్వే చొరవతో రోడ్డు మార్గం నుంచి రైలు మార్గానికి మారిన వుడ్ పల్ప్ రవాణా

కాకినాడ: సరుకు రవాణా వ్యాపారాన్ని అభివృద్ధి చేయడంలో భాగంగా దక్షిణ కోస్తా రైల్వే దిగుమతి చేసుకున్న వుడ్ పల్ప్ (కలప గుజ్జు)ను రైలు ద్వారా తరలించి చరిత్ర లిఖించింది. సుదూర ప్రాంతాలకు రవాణాను రోడ్డు మార్గం నుంచి రైలు మార్గానికి మార్చి తరలించడం భారతీయ రైల్వే చరిత్రలో తొలిసారి. కాకినాడ పోర్టు నుంచి మహారాష్ట్రలోని భిగ్వాన్‌కు వుడ్ పల్ప్‌ను ఒక సరుకుగా లోడ్ చేయడంతో ఈ అద్భుతం ఆవిష్కృతమైంది. సరుకు రవాణా, ఆదాయానికి రైలు రూపంలో కొత్త వనరును అందుబాటులోకి వచ్చింది.

గత 15 ఏళ్లుగా కాకినాడ నుంచి మహారాష్ట్రలోని కాగితపు పరిశ్రమలకు దిగుమతి చేసుకున్న వుడ్ పల్ప్‌ను రోడ్డు మార్గం ద్వారా తరలించేవారు. ఈ రవాణాను రైలు మార్గానికి మళ్లించే అవకాశాలను గుర్తించిన దక్షిణ కోస్తా రైల్వే, పరిశ్రమ ప్రతినిధులతో చర్చలు జరిపి, లోడింగ్ అవసరాలు, సుంకాల విధానాన్ని పరిశీలించింది. వాస్తవానికి ఒక్కో వాగన్‌కు 45 నుంచి 50 టన్నుల వుడ్ పల్ప్‌ను మాత్రమే లోడ్ చేయగల సామర్థ్యం ఉంటుంది. అయితే రైల్వే వసూలు చేసే ఛార్జీల విధానం మాత్రం 65.1 టన్నుల సామర్థ్యం ఆధారంగా ఉండటం వల్ల రోడ్డు మార్గంతో పోలిస్తే రైలు రవాణా ఖరీదుగా మారిందని గమనించారు.

ఈ సమస్యను పరిష్కరించేందుకు, దక్షిణ కోస్తా రైల్వే పరిశ్రమకు సంబంధించిన వ్యక్తులతో చర్చలు జరిపింది. వుడ్ పల్ప్ రవాణాకు తగిన రేట్లను నిర్ణయించాలని జూలై 2026లో రైల్వే బోర్డుకు ఒక ప్రతిపాదన పంపింది. ఈ ప్రతిపాదన మేరకు, సరుకు రవాణా టారిఫ్‌లోని క్లాస్-110 కింద వుడ్ పల్ప్‌ను ఒక వస్తువుగా చేర్చడం కలిసొచ్చింది. దీనివల్ల ఈ సరుకు రవాణా ఛార్జీలు భారీగా తగ్గాయి. ఫలితంగా రోడ్డు మార్గం కంటే రైలు మార్గం ద్వారా రవాణా చేయడం చాలా చౌకగా మారింది.

ఈ టారిఫ్ తగ్గింపు, ఛార్జీల క్రమబద్ధీకరణ ఫలితంగా, 1,061 కిలోమీటర్ల మేర సుదూర రవాణా రోడ్డు మార్గం నుంచి రైలు మార్గానికి మళ్లించారు. దిగుమతి చేసుకున్న వుడ్ పల్ప్‌ను తీసుకెళ్తున్న మొట్టమొదటి బోస్ట్ (BOST) రేక్ శనివారం నాడు కాకినాడలో లోడ్ కాగా, మహారాష్ట్రలోని భిగ్వాన్‌కు వెళ్లింది. ఒక్కో రేక్ (గూడ్స్ రైలు) రవాణా ద్వారా దాదాపు రూ. 40 లక్షల ఆదాయం సమకూరుతుంది. ఈ వుడ్ పల్ప్ రవాణా ద్వారా దక్షిణ కోస్తా రైల్వేకు ఒక్క ఏడాదికి సుమారు 1.5 లక్షల టన్నుల అదనపు లోడింగ్‌తో పాటు, దాదాపు రూ.20 కోట్ల వార్షిక సరుకు రవాణా ఆదాయం సమకూరుతుందని అంచనా వేశారు.

ఈ లాంగ్ జర్నీని రోడ్డు మార్గం నుంచి రైలు మార్గానికి విజయవంతంగా మళ్లించడం ద్వారా కస్టమర్-ఆధారిత సరుకు రవాణా వ్యాపారాభివృద్ధి, టారిఫ్ హేతుబద్ధీకరణ జరిగింది. దాంతోపాటు రైల్వే వ్యవస్థకు కొత్త రవాణా మార్గాలను ఆకర్షించే దిశగా దక్షిణ కోస్తా రైల్వే చేస్తున్న నిరంతర కృషిని ప్రతిబింబిస్తుంది.

ఈ రవాణా మార్గాన్ని గుర్తించి, రోడ్డు మార్గం నుంచి రైలు మార్గానికి విజయవంతంగా మళ్లించడంలో సమష్టిగా కృషి చేసిన విజయవాడ డీఆర్‌ఎం మోహిత్ సోనకియాతో పాటు ప్రిన్సిపల్ చీఫ్ ఆపరేషన్స్ మేనేజర్ వినీత్ కుమార్, ప్రిన్సిపల్ చీఫ్ కమర్షియల్ మేనేజర్ కె. సాంబశివరావు, మొత్తం బృందాన్ని దక్షిణ కోస్తా రైల్వే జనరల్ మేనేజర్ సందీప్ మాథుర్ అభినందించారు.

Polavaram MLA Chirri Balaraju: సామాన్యుడి అవతారంలో ఎమ్మార్వో ఆఫీసుకు జనసేన ఎమ్మెల్యే.. విషయం తెలిసి అధికారులు షాక్

Shankar Dukanam — Tue, 15 Sep 2026 16:39:55 +0530

Polavaram MLA Chirri Balaraju | పోలవరం: ఏలూరు జిల్లాలో పోలవరం జనసేన ఎమ్మెల్యే చిర్రి బాలరాజు వినూత్న రీతిలో రంగంలోకి దిగారు. ఎవరికీ ముందస్తు సమాచారం ఇవ్వకుండా బుట్టాయగూడెం తహసీల్దార్ కార్యాలయానికి ఒక సామాన్య పౌరుడిలా మారువేషంలో వెళ్లి అధికారులతో పాటు ప్రజలును ఆశ్చర్యపరిచారు. స్థానిక రిటైర్డ్ టీచర్ ఒకరు తన భూమికి సంబంధించిన పని కోసం ఎమ్మార్వో ఆఫీస్ చుట్టూ కాళ్లు అరిగేలా తిరిగినా అధికారులు పట్టించుకోకపోలేదు. దాంతో విసుగు చెందిన ఆయన చివరికి కూటమి ఎమ్మెల్యేను ఆశ్రయించి తన గోడు వెళ్లబోసుకున్నారు.

అధికారుల తీరుపై నిశిత పరిశీలన

ప్రభుత్వ కార్యాలయాల్లో ప్రజలు ఎలాంటి ఇబ్బందులు ఎదుర్కొంటున్నారో స్వయంగా తెలుసుకోవాలని నిర్ణయించుకున్న జనసేన ఎమ్మెల్యే బాలరాజు నేరుగా ఆయనే క్షేత్రస్థాయిలో సామాన్యుడిలా రంగంలోకి దిగారు. బుట్టాయగూడెం ఎమ్మార్వో ఆఫీసులో సుమారు గంటపాటు ప్రజల మధ్య ఉండి, అధికారుల పనితీరును క్షుణ్ణంగా పరిశీలించారు. ప్రజలకు రెవెన్యూ సేవలు సకాలంలో అందుతున్నాయా లేదా, సిబ్బందికి టైంకు అందుబాటులో ఉంటున్నారా అని స్వయంగా పరిశీలించారు. పంచె, టీషర్టు ధరించి.. తలపై క్యాప్, ముఖానికి మాస్క్ ధరించి ఎమ్మార్వో అక్కడికి వచ్చిన ప్రజలను సైతం అక్కడ పనులు ఎలా జరుగుతున్నాయని ఆరా తీశారు.

విషయం తెలిసి అధికారులు షాక్

తాను ఎవరో చెప్పి ఎమ్మెల్యే చిర్రి బాలరాజు అధికారులకు షాకిచ్చారు. అనంతరం తన రాకను వెల్లడించి అధికారులతో సమీక్ష నిర్వహించారు. నిరంతరం ఆఫీసుల చుట్టూ తిప్పించుకోకుండా ప్రజల సమస్యలను తక్షణమే పరిష్కరించాలని, నిర్లక్ష్యం వహిస్తే సహించేది లేదని అధికారులను హెచ్చరించారు. బాధితుడైన రిటైర్డ్ టీచర్ సమస్యను తక్షణమే పరిష్కరించాలని అధికారులను ఆదేశించారు. ఎమ్మెల్యే చిర్రి బాలరాజు తీసుకున్న ఆకస్మిక తనిఖీ, అది కూడా మారువేషంలో రావడంతో స్థానిక ప్రజలు హర్షం వ్యక్తం చేస్తున్నారు.

Alla Nanis Demise: మాజీ మంత్రి ఆళ్ల నాని మృతిపై సీఎం చంద్రబాబు, మాజీ సీఎం జగన్ తీవ్ర దిగ్భ్రాంతి.. ప్రముఖులు నివాళి

Shankar Dukanam — Tue, 15 Sep 2026 15:20:49 +0530

Eluru News Today | అమరావతి: ఆంధ్రప్రదేశ్ రాష్ట్ర మాజీ ఉప ముఖ్యమంత్రి ఆళ్ల నాని మృతిపై ఏపీ సీఎం చంద్రబాబు తీవ్ర దిగ్భ్రాంతి వ్యక్తం చేశారు. ఆయన 56 సంవత్సరాల వయసులోనే గుండెపోటుతో దూరమవ్వడం బాధాకరం అన్నారు. ఆళ్ల నాని కుటుంబానికి ప్రగాఢ సానుభూతి వ్యక్తం చేశారు. ఆళ్ల నాని గారి ఆత్మకు శాంతిని చేకూర్చాలని ఆ భగవంతుడిని ప్రార్థించారు.

ఆంధ్రప్రదేశ్ రాష్ట్ర మాజీ ఉప ముఖ్యమంత్రి ఆళ్ల నాని గారి (కాళీ కృష్ణ శ్రీనివాస్) హఠాన్మరణం నాకు తీవ్ర దిగ్భ్రాంతి కలిగించింది. 56 సంవత్సరాల వయసులోనే గుండెపోటుతో ఆయన దూరమవ్వడం బాధాకరం. ఆయన కుటుంబానికి నా ప్రగాఢ సానుభూతి వ్యక్తం చేస్తున్నాను. ఆళ్ల నాని గారి ఆత్మకు శాంతిని… pic.twitter.com/IlA7QrLDXP
— N Chandrababu Naidu (@ncbn) September 15, 2026

ఆళ్లనాని ఆకస్మిక మృతిపై వైఎస్ జగన్‌ దిగ్భ్రాంతి

ఏపీ మాజీ డిప్యూటీ సీఎం, ఏలూరు మాజీ ఎమ్మెల్యే, టీడీపీ నేత ఆళ్ల కాళీకృష్ణ శ్రీనివాస్‌ (నాని) మృతిపట్ల మాజీ ముఖ్యమంత్రి వైఎస్ జగన్ తీవ్ర దిగ్భ్రాంతి వ్యక్తంచేశారు. ఆయన మృతి తనను కలచివేసిందన్నారు. మాజీ మంత్రి కుటుంబ సభ్యులకు తన ప్రగాఢ సంతాపాన్ని తెలిపారు. ఈ కష్టకాలంలో వారి కుటుంబ సభ్యులకు ధైర్యాన్ని ప్రసాదించాల్సిందిగా దేవుడ్ని ప్రార్థించారు. వైసీపీ హయాంలో ఉప ముఖ్యమంత్రిగా, వైద్య ఆరోగ్యశాఖ మంత్రిగా ఆళ్లనాని చేసిన సేవల్ని గుర్తుచేసుకున్నారు.

ఆళ్లనాని గారి ఆకస్మిక మృతిపై వైయస్‌.జగన్‌ గారు దిగ్భ్రాంతి, ప్రగాఢ సానుభూతి

మాజీ డిప్యూటీ సీఎం, ఏలూరు మాజీ శాసనసభ్యుడు, టీడీపీ నాయకుడు ఆళ్ల కాళీకృష్ణ శ్రీనివాస్‌ (నాని) గారి మృతిపట్ల మాజీ ముఖ్యమంత్రి శ్రీ వైయస్‌.జగన్ గారు తీవ్ర దిగ్భ్రాంతి వ్యక్తంచేశారు. ఆయన మృతి తనను… pic.twitter.com/rExFHOND2i
— YSR Congress Party (@YSRCParty) September 15, 2026

వివాదాలకు దూరంగా ఉండే మంచి నేత: నారా లోకేష్

టీడీపీ నేత, మాజీ మంత్రి ఆళ్ల నాని గుండెపోటుతో మృతి చెందారని తెలియడంతో మంత్రి నారా లోకేష్ తీవ్ర దిగ్భ్రాంతికి లోనయ్యారు. ఎప్పుడూ వివాదాలకు దూరంగా, అందరితోనూ స్నేహపూర్వకంగా మెలిగే ఆళ్ల నానికి నివాళులర్పించారు. వారి కుటుంబ సభ్యులకు ప్రగాఢ సానుభూతి తెలుపుతూ ఎక్స్ ఖాతాలో పోస్ట్ చేశారు.

ఆళ్ల నాని ఆత్మకు శాంతి చేకూరాలి: డిప్యూటీ సీఎం పవన్ కళ్యాణ్

మాజీ డిప్యూటీ సీఎం, ఏలూరుకు చెందిన సీనియర్ రాజకీయ నాయకులు ఆళ్ల కాళీ కృష్ణ శ్రీనివాస్ (ఆళ్ల నాని) హఠాన్మరణం తనను ఎంతో బాధించిందని డిప్యూటీ సీఎం పవన్ కళ్యాణ్ అన్నారు. 3 సార్లు ఏలూరు శాసనసభ్యునిగా, ఒకసారి ఎమ్మెల్సీగా ప్రజలకు సేవలు అందించిన వ్యక్తి ఆళ్ల నాని. ఆయన ఆత్మకు శాంతి చేకూరాలని భగవంతుడిని ప్రార్థించిన పవన్ కళ్యాణ్.. ఆళ్ల నాని కుటుంబ సభ్యులకు ప్రగాఢ సానుభూతి తెలియజేశారు.

Alla Nani Passes Away: ఏపీ మాజీ డిప్యూటీ సీఎం ఆళ్ల నాని కన్నుమూత

Shankar Dukanam — Tue, 15 Sep 2026 14:29:13 +0530

విశాఖపట్నం: ఏలూరు జిల్లా రాజకీయాల్లో తీవ్ర విషాదం చోటుచేసుకుంది. ఆంధ్రప్రదేశ్ మాజీ డిప్యూటీ సీఎం ఆళ్ల నాని (57) కన్నుమూశారు. విశాఖలోని ఆయన నివాసంలో గుండెపోటుతో మృతిచెందారు. గుండెపోటుకు గురైన ఆయనను ఆసుపత్రికి తరలించినప్పటికీ, అప్పటికే మృతిచెందారని డాక్టర్లు ధృవీకరించారు. వైఎస్సార్ కాంగ్రెస్ పార్టీ హయాంలో ఉప ముఖ్యమంత్రిగా, ఆరోగ్య శాఖ మంత్రిగా సేవలు అందించారు. ఆయన మరణవార్తతో ఏలూరు జిల్లాతో పాటు ఏపీ రాజకీయ వర్గాల్లో విషాదం నెలకొంది. 2024 ఎన్నికల తరువాత కొంతకాలానికి ఆళ్ల నాని వైఎస్సార్‌సీపీకి రాజీనామా చేసి, తెలుగుదేశం పార్టీలో చేరారు. ఆళ్ల నానికి భార్య, ఇద్దరు కుమారులు ఉన్నారు. ఇద్దరూ అమెరికాలో ఉంటున్నారు.

కాంగ్రెస్ నుంచి టీడీపీ దాకా రాజకీయ ప్రస్థానం

30 డిసెంబర్ 1969 లో పశ్చిమ గోదావరి జిల్లా ఏలూరులో జన్మించిన ఆయన చదువు మధ్యలోనే ఆపివేసి రాజకీయాల్లోకి వచ్చారు. ఆళ్ల నాని రాజకీయ ప్రస్థానం కాంగ్రెస్ పార్టీతో ప్రారంభమైంది. 1994, 1999 ఎన్నికల్లో ఏలూరు నుంచి కాంగ్రెస్ తరఫున పోటీ చేసి ఓడిపోయారు. తొలుత కాంగ్రెస్ పార్టీ తరఫున ఏలూరు ఎమ్మెల్యేగా గెలుపొందిన ఆయన, ఆ తర్వాత వైఎస్ జగన్ మోహన్ రెడ్డికి మద్దతుగా వైఎస్సార్‌సీపీలో చేరారు. వైసీపీ ప్రభుత్వంలో అత్యంత కీలక బాధ్యతలు నిర్వర్తించారు. డిప్యూటీ సీఎంగా, వైద్య ఆరోగ్య శాఖ మంత్రిగా సేవలు అందించారు. కరోనా సమయంలో చాలా యాక్టివ్ గా పనిచేశారు. ఏలూరు నియోజకవర్గంపై బలమైన పట్టున్న నేతగా ఆయన గుర్తింపు పొందారు.

ఏలూరు నుంచి 3 సార్లు విజయం

ఆళ్ల నాని (ఆళ్ల కాళీ కృష్ణ శ్రీనివాస్‌) ఏలూరు నుంచి 3 సార్లు ఎమ్మెల్యేగా గెలిచారు. 2004, 2009 అసెంబ్లీ ఎన్నికల్లో కాంగ్రెస్‌ అభ్యర్థిగా పోటీ చేసి విజయం సాధించారు. అనంతరం 2017లో ఎమ్మెల్సీగా బాధ్యతలు చేపట్టారు. మారిన రాజకీయ పరిణామాలతో వైసీపీలో చేరిన ఆళ్ల నాని 2019 అసెంబ్లీ ఎన్నికల్లో ఏలూరు నుంచి మరోసారి గెలుపొందారు. అప్పటి సీఎం వైఎస్ జగన్‌ ఆయనకు వైద్య ఆరోగ్యశాఖ శాఖతో పాటు డిప్యూటీ సీఎంగా బాధ్యతలు అప్పగించారు. కరోనా సమయంలో అందుబాటులో ఉంటూ అధికారులను పరుగులు పెట్టించారు.

2024 అసెంబ్లీ ఎన్నికల్లో ఏలూరు నుంచి వైసీపీ అభ్యర్థిగా పోటీ చేసి ఓటమి చెందారు.ఆళ్ల నాని మీద టీడీపీకి చెందిన బడేటి రాధాకృష్ణయ్య (చంటి) విజయం సాధించారు. ఆ ఎన్నికల తరువాత రాజకీయాలకు కాస్త దూరంగా ఉన్న ఆళ్ల నాని వైసీపీకి రాజీనామా చేశారు. ఫిబ్రవరి 2025లో టీడీపీలో చేరారని తెలిసిందే.

Andhra Pradesh Rains: ఏపీలో 12 జిల్లాల్లో విస్తారంగా వర్షాలు.. పిడుగులు పడతాయని, అప్రమత్తంగా ఉండాలని వార్నింగ్!

Shankar Dukanam — Mon, 14 Sep 2026 10:57:57 +0530

Andhra Pradesh Weather Updates | అమరావతి: వాయువ్య బంగాళాఖాతంలో ఏర్పడిన అల్పపీడనం నేడు రాజస్థాన్, గుజరాత్ వైపు పశ్చిమ-వాయువ్య దిశగా కదిలే అవకాశం ఉందని రాష్ట్ర విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. దీని ప్రభావంతో సోమవారం (సెప్టెంబర్ 14న) రాష్ట్రవ్యాప్తంగా పలు ప్రాంతాల్లో వర్షాలు కురిసే అవకాశం ఉందని వెల్లడించారు. రాష్ట్రంలోని 12 జిల్లాల్లో వర్షాలు కురుస్తాయని, కొన్ని జిల్లాల్లో పిడుగులు పడే అవకాశం ఉందని హెచ్చరించారు.

నేడు ఈ జిల్లాల్లో పిడుగులతో కూడిన వర్షాలు

ముఖ్యంగా పార్వతీపురం మన్యం, అల్లూరి సీతారామరాజు, ఏలూరు (పోలవరం), కాకినాడ, ఎన్టీఆర్, గుంటూరు, పల్నాడు, మార్కాపురం, నంద్యాల, వైఎస్సార్ కడప, అన్నమయ్య, చిత్తూరు, తిరుపతి జిల్లాల్లో అక్కడక్కడా పిడుగులతో కూడిన తేలికపాటి నుంచి మోస్తరు వర్షాలు పడే అవకాశం ఉందని పేర్కొన్నారు. అలాగే మిగతా జిల్లాల్లో తేలికపాటి వర్షాలు కురిసే అవకాశం ఉందన్నారు.

వర్షం కురిసే సమయంలో జాగ్రత్త

ఉరుములు, పిడుగులతో వర్షం పడే సమయంలో ప్రజలు అప్రమత్తంగా ఉండాలని ఏపీ విపత్తుల నిర్వహణ సంస్థ సూచించింది. వర్షం కురుస్తున్నప్పుడు బహిరంగ ప్రదేశాల్లో ఉన్నవారు, ముఖ్యంగా పొలాల్లో పనిచేసే రైతులు, బాటసారులు చెట్ల కింద గానీ, ఫ్లెక్సీలు, హోర్డింగ్స్ వద్ద నిల్చోవద్దని హెచ్చరించింది. సురక్షిత ప్రాంతాల్లో ఆశ్రయం పొందుతూ తగిన జాగ్రత్తలు తీసుకోవాలని సూచించారు.

అల్పపీడనం రాబోయే 24 గంటల్లో రాజస్థాన్ , గుజరాత్ మీదుగా పశ్చిమ-వాయువ్య దిశగా కదిలే అవకాశం ఉందని రాష్ట్ర విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు.

దీని ప్రభావంతో సోమవారం(14-09-2026) మన్యం,అల్లూరి,పోలవరం,కాకినాడ, ఎన్టీఆర్,గుంటూరు,పల్నాడు, మార్కాపురం, pic.twitter.com/OuwUO1Ge7R
— Andhra Pradesh State Disaster Management Authority (@APSDMA) September 13, 2026

అల్పపీడనం, భారీ వర్షాల అలర్ట్
బంగాళాఖాతంలో ఏర్పడిన అల్పపీడనం మరికొన్ని గంటల్లో పశ్చిమ-వాయువ్య దిశగా పయనిస్తూ రాజస్థాన్, గుజరాత్ మీదుగా కదిలే అవకాశం ఉంది. దీని ప్రభావంతో ఆంధ్రప్రదేశ్ లో 8 జిల్లాల్లో భారీ వర్షాలు కురిసే అవకాశం ఉందని విపత్తుల నిర్వహణ సంస్థ తెలిపింది. ముఖ్యంగా పార్వతీపురం మన్యం, అల్లూరి సీతారామరాజు, పోలవరం, కాకినాడ, ఎన్టీఆర్, గుంటూరు, పల్నాడు, ప్రకాశం (మార్కాపురం) జిల్లాల ప్రజలు పిడుగుల వర్షాలు కురుస్తాయని, జాగ్రత్తగా ఉండాలని సూచించింది. వాతావరణ మార్పుల పట్ల ప్రజలు, రైతులు అప్రమత్తంగా ఉండాలని అధికారులు సూచించారు.

Also Read: Kakinada Crime News: యువతులతో రిలేషన్.. ప్రైవేట్ వీడియోల కోసమే చంపేశారు - కాకినాడ హత్య కేసు ఛేదించిన పోలీసులు

ఎల్ నినో ప్రభావంతో తీవ్ర పంట నష్టం
మరోవైపు, రాష్ట్రంలో కురుస్తున్న వర్షపాతంపై వాతావరణ, వ్యవసాయ శాఖ అధికారులు కీలక వివరాలు వెల్లడించారు. తీవ్రమైన ఎల్ నినో (EL Nino) ప్రభావం కారణంగా ఆంధ్రప్రదేశ్‌ వ్యాప్తంగా సాధారణం కంటే 54.2 శాతం లోటు వర్షపాతం నమోదైనట్లు తెలిపారు. వర్షాభావ పరిస్థితుల వల్ల రాష్ట్రవ్యాప్తంగా 2.44 లక్షల హెక్టార్లలో వివిధ పంటలు దెబ్బతిన్నాయని అధికారులు తెలిపారు. ఒకవైపు వర్షాభావంతో ఎండిపోతున్న పంటలు, మరోవైపు అకాల వర్షాల హెచ్చరికలతో రైతాంగం తీవ్ర ఆందోళనకు గురవుతోంది.

AP TET Results: ఏపీ టెట్ ఫలితాలు విడుదల.. స్కోర్ కార్డ్ ఇలా డౌన్ లోడ్ చేసుకోండి

Shankar Dukanam — Sun, 13 Sep 2026 20:11:35 +0530

AP TET Results out | అమరావతి: ఆంధ్ర ప్రదేశ్ ఉపాధ్యాయ అర్హత పరీక్ష (AP TET) తుది ఫలితాలను, ఫైనల్ ఆన్సర్ కీలను ఏపీ పాఠశాల విద్యాశాఖ విడుదల చేసింది. ఇటీవల కంప్యూటర్ ఆధారిత పద్ధతిలో నిర్వహించిన ఈ పరీక్షలకు రాష్ట్ర వ్యాప్తంగా లక్షలాది మంది అభ్యర్థులు హాజరయ్యారు. టెట్ ప్రాథమిక కీ పై అభ్యర్థుల నుంచి స్వీకరించిన అభ్యంతరాలను నిపుణుల కమిటీ సమగ్రంగా పరిశీలించిన అనంతరం టెట్ ఫైనల్ స్కోర్ కార్డులను వెబ్‌సైట్‌లో అందుబాటులో ఉంచారు. రాబోయే ఉపాధ్యాయ భర్తీ (DSC)లో టెట్ మార్కులకు 20 శాతం వెయిటేజీ ఉండటంతో ఈ ఫలితాలు అభ్యర్థులకు ఎంతో కీలకంగా మారాయి.

ఏపీ టెట్ అభ్యర్థులు తమ ఫలితాలను చూసుకోవడానికి ముందుగా అధికారిక వెబ్‌సైట్ ( https://tet2dsc.apcfss.in/ ) ను సందర్శించాలి. హోమ్‌పేజీలో కనిపించే క్యాండిడేట్ లాగిన్ (Candidate Login) ఆప్షన్‌ను ఎంచుకుని, మీ హాల్ టికెట్ నంబర్ లేదా యూజర్ నేమ్‌తో పాటు పాస్‌వర్డ్ (లేదా పుట్టిన తేదీ), క్యాప్చా కోడ్‌ను ఎంటర్ చేసి లాగిన్ అవ్వాలి. ఒకవేళ లాగిన్ వివరాలు మర్చిపోతే, పేజీలోని రికవరీ ఆప్షన్ ద్వారా మీ నమోదు చేసుకున్న మొబైల్ నంబర్ లేదా ఈమెయిల్ ద్వారా వాటిని తిరిగి పొందవచ్చు.

లాగిన్ అయిన తర్వాత డాష్‌బోర్డ్‌లో డౌన్‌లోడ్ మార్క్స్ మెమో లేదా స్కోర్ కార్డు లింక్ కనిపిస్తుంది. దానిపై క్లిక్ చేసి పేపర్-1, పేపర్-2 వివరాలతో కూడిన స్కోర్ కార్డును పీడీఎఫ్ రూపంలో డౌన్‌లోడ్ చేసుకోవాలి. కేటగిరీల వారీగా నిర్ణయించిన కటాఫ్ మార్కులను సాధించిన అభ్యర్థులు అర్హత పొందినట్లు నిర్ధారిస్తారు. ఈ మార్క్స్ మెమో హార్డ్ కాపీని ప్రింట్ తీసుకుని, రాబోయే డీఎస్సీ ఉపాధ్యాయ నియామక ప్రక్రియ పూర్తయ్యే వరకు భద్రపరుచుకోవాలనీ అభ్యర్థులకు సూచించారు.

Kakinada Crime News: యువతులతో రిలేషన్.. ప్రైవేట్ వీడియోల కోసమే చంపేశారు - కాకినాడ హత్య కేసు ఛేదించిన పోలీసులు

Shankar Dukanam — Sun, 13 Sep 2026 12:22:45 +0530

కాకినాడ త్రీ టౌన్ పోలీస్ స్టేషన్ పరిధిలో ఈనెల 2న జరిగిన హత్య కేసును జరిగిన హత్య కేసును పోలీసులు ఛేదించారు. కాకినాడ సాంబమూర్తినగర్‌లో గండి గిరిధర్‌ (30) హత్యకు గురైన కేసులో పాలేపు వివేక్, ఏలూరి రామకృష్ణను పోలీసులు అరెస్టు చేశారు. నిందితుల వదకద నుంచి 4 ఫోన్లు, కత్తి, పెన్‌డ్రైవ్ స్వాధీనం చేసుకున్నారు. అశ్లీల వీడియోలు ఇవ్వని కారణంగా గిరిధర్‌ను హత్య చేసినట్లు విచారణలో నిందితులు అంగీకరించారు.

ఈ నెల 2న దారుణహత్య

హత్య కేసుకు సంబంధించిన వివరాలను కాకినాడ జిల్లా అదనపు ఎస్పీ, ఇన్చార్జి డిఎస్పి డాక్టర్ మహంతి కిషోర్ కుమార్ ఆదివారం నాడు మీడియాకు వెల్లడించారు. కాకినాడ త్రీ టౌన్ లా & ఆర్డర్ పోలీస్ స్టేషన్ పరిధిలోని సాంబమూర్తి నగర్ ఇందిరా కాలనీ, సెవెన్ హిల్స్ రోడ్లో నివాసం ఉంటున్న గండి గిరిధర్ అనే వ్యక్తి ఈ నెల 2వ తేదీన తన నివాసంలోనే గుర్తు తెలియని వ్యక్తుల చేతిలో హత్యకు గురయ్యాడు.

ప్రత్యేక దర్యాప్తు బృందాల ఏర్పాటు

మృతుడి తల్లి గండి జయలక్ష్మి ఇచ్చిన ఫిర్యాదు మేరకు కాకినాడ త్రీ టౌన్ ఇన్స్పెక్టర్ కెవిఎస్ సత్యనారాయణ కేసు నమోదు చేసి దర్యాప్తు చేపట్టారు. ఈ హత్య కేసును కాకినాడ జిల్లా ఎస్పీ జి బిందు మాధవ్ ప్రత్యేకంగా పర్యవేక్షించారు. ఆయన ఆదేశాల మేరకు తన పర్యవేక్షణలో, కాకినాడ త్రీ టౌన్ లా ఆర్డర్ పోలీస్ స్టేషన్ ఇన్స్పెక్టర్ కెవిఎస్ సత్యనారాయణ ప్రత్యేక క్రైమ్ బృందాలను ఏర్పాటు చేసి, సాంకేతిక ఆధారాలతో పాటు పలు కోణాల్లో దర్యాప్తు చేపట్టినట్లు తెలిపారు. ఈ దర్యాప్తులో భాగంగా సీసీ టీవీ ఫుటేజ్, సాంకేతిక ఆధారాలు, సంఘటనకు సంబంధించిన ఇతర ఆధారాలను విశ్లేషించి నిందితులను గుర్తించామని కిషోర్ కుమార్ తెలిపారు.

నిందితులు అరెస్టు
దర్యాప్తులో లభించిన ఆధారాల మేరకు ఈ నెల 12వ తేదీన తేదీన కాకినాడ త్రీ టౌన్ లా & ఆర్డర్ పోలీస్ స్టేషన్ ఇన్ స్పెక్టర్ కెవిఎస్ సత్యనారాయణ నిందితుల్ని గుర్తించారు. పాలేపు వివేక్ @ బన్నీ, ఏలూరి రామకృష్ణ అనే ఇద్దరు యువకులను చేసినట్లు తెలిపారు.

దర్యాప్తులో తేలింది ఏంటంటే..

మృతుడు గండి గిరిధర్ గతంలో వివాహం అయ్యి భార్యతో ఏర్పడిన విభేదాల కారణంగా విడాకులు తీసుకున్నాడు. ప్రస్తుతం తన తల్లితో కలిసి ఉంటున్నాడు. మృతుడు తనకు పరిచయం ఉన్న కొంత మంది యువతులు, మహిళలకు సంబంధించిన అసభ్యకరమైన ఫొటోలు, వీడియోలను తన సెల్‌ఫోన్లో సేవ్ చేసుకున్నాడు. తనతో సన్నిహితంగా తిరిగే అదే ప్రాంతానికి చెందిన నిందితులు బన్నీ, రామకృష్ణలకు మద్యం మత్తులో ఆ ఫొటోలు, వీడియోలను చూపించాడు. ఆర్థిక ఇబ్బందుల్లో ఉన్న ఆ నిందితులు, ఆ ఫొటోలు, వీడియోలను మృతుడి వద్ద నుంచి తీసుకుని, వాటిలో ఉన్న మహిళల కుటుంబ సభ్యులను బెదిరించి డబ్బులు సంపాదించవచ్చని భావించారు. ఈ ఉద్దేశంతో మృతుడి వద్ద ఉన్న ఫొటోలు, వీడియోలను ఎలాగైనా తీసుకోవాలని నిందితులు ప్లాన్ వేసుకున్నారు.

ఈ నెల 1వ తేదీ రాత్రి సమయంలో మృతుడి తల్లి, పక్క పోర్షన్లో నివసించే మృతుడి అన్నయ్య, వారి కుటుంబ సభ్యులు ఇంట్లో లేరని తెలుసుకున్నారు నిందితులు. అదే రోజు రాత్రి సుమారు 12.15 గంటలకు మృతుడి ఇంటికి వెళ్లారు. అక్కడ మృతుడితో యువతుల ఫొటోలు, వీడియోలు కావాలని అడగగా ఇచ్చేందుకు గిరిధర్ నిరాకరించాడు. ముందుగానే తీసుకువెళ్లిన కత్తితో మృతుడి గొంతుపై విచక్షణారహితంగా దాడి చేయడంతో తీవ్ర రక్తస్రావమై గిరిధర్ అక్కడికక్కడే మృతి చెందాడు. హత్య అనంతరం నిందితులు సంఘటనా స్థలం నుండి పరారయ్యారు. కేసు దర్యాప్తులో భాగంగా సేకరించిన సాక్ష్యాధారాలు, సాంకేతిక ఆధారాలు, సీసీ కెమెరాల ఫుటేజ్, ఇతర అందుబాటులో ఉన్న ఆధారాలను సమగ్రంగా విశ్లేషించారు. నిందితులను విచారించగా, ఈ హత్య చేసినట్లు వారు అంగీకరించారు. మరిన్ని సాక్ష్యాధారాల సేకరణ, సాంకేతిక ఆధారాల విశ్లేషణ, ఇతర అంశాలపై దర్యాప్తు కొనసాగుతున్నట్లు చెప్పారు.

నిందితుల వద్ద నుండి ఆధారాలు స్వాధీనం

నిందితుల వద్ద నుండి మృతుడిని హత్య చేయడానికి ఉపయోగించిన కత్తి, హత్య జరిగిన సమయంలో నిందితులు ధరించిన దుస్తులు స్వాధీనం చేసుకున్నారు. నిందితులకు సంబంధించిన 4 సెల్ ఫోన్లు, ఒక పెన్ డ్రైవ్, మృతుడి సెల్ ఫోన్ స్వాధీనం చేసుకున్నట్లు పోలీసులు తెలిపారు. స్వాధీనం చేసుకున్న వస్తువులు ఇతర సాక్ష్యాధారాలను కేసు దర్యాప్తులో భాగంగా తదుపరి శాస్త్రీయ పరీక్షలు, చట్టపరమైన ప్రక్రియ నిమిత్తం భద్రపరిచామన్నారు.

పోలీసు బృందానికి అభినందనలు
హత్య జరిగిన అనంతరం కేసును సవాలుగా తీసుకుని, దర్యాప్తు పూర్తి చేసి నిందితులను గుర్తించి అరెస్టు చేసిన ఇన్స్పెక్టర్ కెవిఎస్ సత్యనారాయణ, సబ్ ఇన్స్పెక్టర్లు జివివిఎస్ చౌదరి, వి ఆంజనేయరాజు హెడ్ కానిస్టేబుల్ సతీష్, కానిస్టేబుల్స్ మురళిరాజు, బి శ్రీనివాసరావు, ప్రేమ్ కుమార్, క్రైమ్ టీం సిబ్బందిని కాకినాడ జిల్లా ఎస్పీ జి బిందుమాధవ్ అభినందించారు.