rajamundry

Polavaram Project: పోలవరం ప్రాజెక్టులో మరో కీలక మైలురాయి.. 90.1 శాతం ఫిజికల్ ప్రోగ్రెస్.. వచ్చే ఏడాది నాటికి పూర్తి చేయడమే లక్ష్యం

Satyaprasad Bandaru — Thu, 22 Oct 2026 10:54:58 +0530

Polavaram Project: ఏపీ జీవనాడి పోలవరం ప్రాజెక్టు నిర్మాణం శరవేగంగా సాగుతుంది. తాజాగా పోలవరం ప్రాజెక్టు మరో ప్రధాన మైలురాయిని చేరుకుంది. సెప్టెంబర్ నాటికి ఈ ప్రాజెక్టు మొత్తం నిర్మాణంలో 90.1 శాతం ఫిజికల్ ప్రోగ్రెస్ సాధించగా, మొదటి విడత (Phase I) కింద 78 శాతం పనులు పూర్తైనట్లు అధికారులు తెలిపారు. కేంద్ర జలశక్తి మంత్రిత్వ శాఖ ఆధ్వర్యంలోని నీటి వనరుల శాఖ కార్యదర్శి అధ్యక్షతన అక్టోబర్ 12న జరిగిన ఉన్నత స్థాయి సమావేశంలో సమర్పించిన నివేదిక ప్రకారం ప్రాజెక్టుకు సంబంధించిన హెడ్‌వర్క్స్, ప్రధాన కాలువల పనులు తుది దశకు చేరుకున్నాయి.

పూర్తైన ప్రధాన పనులు, ఆర్‌ అండ్ ఆర్

స్పిల్‌వే, గ్యాప్-3లో మెయిన్ డ్యామ్, గ్యాప్-1, 2లలో డయాఫ్రమ్ వాల్స్, అప్‌స్ట్రీమ్, డౌన్‌స్ట్రీమ్ కాఫర్ డ్యామ్‌లు, అప్‌స్ట్రీమ్ కాఫర్ డ్యామ్ బట్రెస్, కుడి కాలువ పనులు వంద శాతం పూర్తయ్యాయి. సివిల్ పనుల్లో 88 శాతం ఆర్థిక పురోగతి, భూసేకరణలో 95.6 శాతం పూర్తైందని నివేదిక తెలిపింది. అయితే, నిర్వాసితుల పునరావాసం, పునర్నిర్మాణం పనులు ప్రస్తుతం 51.9 శాతం వద్ద ఉండటంతో, ప్రాజెక్టును సకాలంలో పూర్తి చేయడానికి అధికారులు దీనిపై దృష్టి సారించారు.

కేంద్ర ప్రభుత్వం నుంచి నిధులు

ఆగస్టు 28, 2024న కేంద్ర క్యాబినెట్ ఫేజ్-1 వ్యయం రూ. 30,436.95 కోట్లకు సవరించి ఆమోదం తెలిపింది. అనంతరం కేంద్ర ప్రభుత్వం నుండి ప్రాజెక్టుకు నిరంతరంగా ఆర్థిక సహాయం అందుతోంది. ఏప్రిల్ 1, 2014 నుండి ఇప్పటివరకు కేంద్రం రూ. 23,485.31 కోట్లను విడుదల చేసింది. ఇందులో నిర్మాణ పనులను మరింత వేగవంతం చేసేందుకు 2024–25, 2025–26 సంవత్సరాలకు గానూ రూ. 7,862.93 కోట్ల ముందస్తు గ్రాంట్ మంజూరు చేసింది.

Also Read: కుట్రలతో ఎన్నికలను అడ్డుకోవడమే వైసీపీ లక్ష్యం.. ఎస్ఈసీ నిర్ణయానికి కట్టుబడి ఉంటాం- కూటమి పార్టీల ఉమ్మడి ప్రకటన

ప్లానింగ్

పోలవరం ప్రాజెక్టు పూర్తి చేయడానికి రాష్ట్ర, కేంద్ర ప్రభుత్వాలు కార్యాచరణ ప్రణాళికను సిద్ధం చేశాయి. డిసెంబర్ 2026 నాటికి ప్రాజెక్టు ప్రాథమిక కనెక్టివిటీ పనులన్నీ పూర్తి చేయనున్నారు. మార్చి 2027 నాటికి గ్యాప్-1లోని ఎర్త్-కమ్-రాక్-ఫిల్ డ్యామ్ ఎంబ్యాంక్‌మెంట్ పనులు పూర్తి చేయడం లక్ష్యంగా పెట్టుకున్నారు. జూన్ 2027 నాటికి గ్యాప్-2 ఎంబ్యాంక్‌మెంట్ పనులతో పాటు స్కాడా కంట్రోల్ బిల్డింగ్, ఎలక్ట్రికల్ సబ్‌స్టేషన్లు, యాక్సెస్ రోడ్లు, స్లోప్ ప్రొటెక్షన్ పనులు పూర్తి చేసి ప్రాజెక్టును రెడీ చేయనున్నారు.

Also Read: ఏపీలో మున్సిపల్, కార్పొరేషన్ ఎన్నికలకు బ్రేక్.. ఎస్ఈసీ సంచలన ప్రకటన.. అభ్యర్థుల తుది జాబితాపై ఉత్కంఠ!

AP Local Body Elections: పట్టణ స్థానిక పోరులో కూటమి హవా- జగన్, పెద్దిరెడ్డి కంచుకోటల్లో 6 సహా 12 చైర్మన్లు ఏకగ్రీవం!

Shankar Dukanam — Tue, 20 Oct 2026 12:25:47 +0530

అమరావతి: ఆంధ్రప్రదేశ్‌లో జరగనున్న పట్టణ స్థానిక సంస్థల ఎన్నికల్లో పోలింగ్‌కు ముందే అధికార కూటమి పార్టీల హవా కొనసాగుతోంది. వైసీపీ అభ్యర్థులు నామినేషన్లు దాఖలు చేయకపోవడంతో మున్సిపాలిటీలు, నగర పంచాయతీల చైర్మన్లు ఏకగ్రీవాలు అవుతున్నాయి.

ఏపీలో దాదాపు 14 పట్టణ స్థానిక సంస్థల్లో వైసీపీ ఛైర్‌పర్సన్‌ అభ్యర్థులు పోటీలో లేరు. కొన్నిచోట్ల నామినేషన్లు తిరస్కరణకు గురవ్వడం, మరికొన్ని చోట్ల నామినేషన్లే వేయకపోవడంతో ఏకంగా 12 పురపాలక స్థానాల్లో కూటమి (టీడీపీ, జనసేన, బీజేపీ) అభ్యర్థులు మాత్రమే బరిలో ఉన్నారు. దాంతో 12 స్థానాల్లో కూటమి విజయం కన్ఫామ్ అయింది. ఈ 12 స్థానాల్లో మాజీ సీఎం, వైసీపీ అధినేత వైఎస్‌ జగన్‌మోహన్‌రెడ్డి, మాజీ మంత్రి పెద్దిరెడ్డి రామచంద్రారెడ్డిల కంచుకోటలైన నియోజకవర్గాల్లోనే 6 మున్సిపాలిటీలు, నగర పంచాయతీలు ఉన్నాయి.

ప్రస్తుత సమాచారం ప్రకారం ఏకగ్రీవం కానున్న ఛైర్‌పర్సన్‌ స్థానాలు

టీడీపీ: దాచేపల్లి, గురజాల, పిడుగురాళ్ల (పల్నాడు జిల్లా), రాజంపేట, బద్వేలు, కమలాపురం (వైఎస్సార్‌ కడప జిల్లా), రాయచోటి, పుంగనూరు (అన్నమయ్య జిల్లా), నగరి (చిత్తూరు), గుత్తి (అనంతపురం జిల్లా).

జనసేన: దర్శి (ప్రకాశం జిల్లా)

బీజేపీ: ఎర్రగుంట్ల (కడప)

వైఎస్సార్‌ కడప జిల్లాలోని 9 పట్టణ స్థానిక సంస్థల విషయానికి వస్తే.. మైదుకూరులో ఎన్నిక వాయిదా పడింది. కడప కార్పొరేషన్, పులివెందుల, జమ్మలమడుగుల్లో మాత్రమే వైసీపీ అభ్యర్థులు పోటీలో ఉన్నారు. అందులోనూ జమ్మలమడుగులో వైసీపీ ప్రకటించిన ఎమ్మెల్సీ రామసుబ్బారెడ్డి సతీమణి ఇందిర నామినేషన్‌ వేయలేకపోయారు. డమ్మీ అభ్యర్థిగా మాజీ మంత్రి శివారెడ్డి కుమార్తె హైమావతినే పార్టీ తరఫున ఛైర్‌పర్సన్‌గా బరిలో నిలవనున్నారు. రాజంపేట మున్సిపాలిటీలో ఒరిజినల్‌ డాక్యుమెంట్లకు బదులు జిరాక్స్‌ కాపీలు ఇవ్వడం, నో డ్యూ సర్టిఫికెట్లు జతచేయకపోవడంతో వైసీపీ అభ్యర్థుల నామినేషన్లు తిరస్కరణకు గురయ్యాయి. దీంతో అక్కడ టీడీపీ అభ్యర్థి దొంతం గాయత్రి ఏకగ్రీవంగా నెగ్గనున్నారు.

ప్రొద్దుటూరు, బద్వేలు మున్సిపాలిటీల్లోనూ నామినేషన్ల లోపాల వల్ల వైసీపీ అభ్యర్థులు అనర్హులయ్యారు. బద్వేలులో టీడీపీ అభ్యర్థి దివ్యతేజ ఏకగీవ్రం కానున్నారు. ఎర్రగుంట్లలో వైసీపీ పోటీచేయకపోవడం, జనసేన అభ్యర్థి విత్ డ్రా చేసుకోవడంతో బీజేపీ అభ్యర్థి గెలుపు ఖాయమైంది. కమలాపురంలోనూ టీడీపీ అభ్యర్థి మాత్రమే నామినేషన్ వేశారు. వైఎస్ జగన్ సొంత నియోజకవర్గమైన పులివెందులలోని 40 వార్డుల్లో వైసీపీ 15 స్థానాల్లో నామినేషన్లు వేయలేకపోయింది. ఇక అన్నమయ్య జిల్లాలోని రాయచోటి, పుంగనూరులలో వైసీపీ నుంచి నామినేషన్ కూడా పడలేదు.

పల్నాడు జిల్లా గురజాల నియోజకవర్గంలోని 3 స్థానాలనూ కూటమి ఏకగ్రీవంగా కైవసం చేసుకోనుంది. దాచేపల్లిలో డిపాజిట్ రసీదు లేకపోవడం, పిడుగురాళ్లలో నిర్దేశిత టైమ్ మించిపోవడం వల్ల వైసీపీ అభ్యర్థుల నామినేషన్లు తిరస్కరణకు గురయ్యాయి. గురజాలలో వైసీపీ అభ్యర్థులు నామినేషన్ వేయకుండానే వెనుతిరిగారు. అనంతపురం జిల్లా గుత్తి మున్సిపాలిటీలో వైసీపీ అభ్యర్థి నామినేషన్ వేయకపోవడంతో టీడీపీ గెలుపు ఏకగ్రీవమైంది.

ప్రకాశం జిల్లా దర్శి మున్సిపాలిటీలో వైసీపీ పోటీ లేకపోవడంతో జనసేన అభ్యర్థి గెలుపొందనున్నారు. కనిగిరిలో వైసీపీ నామినేషన్ రిజెక్ట్ కావడంతో టీడీపీ, కాంగ్రెస్ ల మధ్య పోటీ మిగిలింది. చిత్తూరు జిల్లా నగరిలోనూ స్వీయ ధ్రువీకరణ లోపాల వల్ల వైసీపీ అభ్యర్థుల నామినేషన్లు చెల్లకుండా పోయాయి. దాంతో టీడీపీ చైర్మన్ అభ్యర్థి ఏకగ్రీవం కానున్నారు. తిరుపతిలో 15 డివిజన్లు, పలమనేరులో 6 వార్డుల్లో వైసీపీ నామినేషన్లు వేయకపోవడంతో పోటీకి దూరమైంది.

Andhra Pradesh Rains: ఏపీకి తుపాను గండం.. మరో మూడు రోజులపాటు భారీ వర్షాలు- 60 కి.మీ వేగంలో ఈదురుగాలులు

Shankar Dukanam — Tue, 20 Oct 2026 10:28:47 +0530

Andhra Pradesh Rains | అమరావతి / విశాఖపట్నం: ఆంధ్రప్రదేశ్‌లో 3 రోజుల పాటు వర్షాలు కురుస్తాయని కోస్తాంధ్ర, యానాంతో పాటు రాయలసీమలోనూ పలు ప్రాంతాల్లో వర్షాలు కురిసే అవకాశం ఉందని భారత వాతావరణ శాఖ వెల్లడించింది. నైరుతి బంగాళాఖాతంలో కొనసాగుతున్న ఉపరితల ఆవర్తనం, ద్రోణి ప్రభావంతో కొన్నిచోట్ల ఉరుములు, మెరుపులతో కూడిన జల్లులు కురుస్తాయని అధికారులు తెలిపారు. ముఖ్యంగా కోస్తాంధ్రలో గంటకు గరిష్ఠంగా 60 కిలోమీటర్ల వేగంతో గాలులు వీచే అవకాశం ఉందన్నారు. ఈ వర్షాల సమయంలో ప్రజలు అప్రమత్తంగా ఉండాలని, రైతులు పంటల విషయంలో తగిన జాగ్రత్తలు తీసుకోవాలని విశాఖ వాతావరణ శాఖ డైరెక్టర్ PLN మూర్తితో ABP దేశంతో మాట్లాడారు.

నైరుతి బంగాళాఖాతంలో ఉత్తర తమిళనాడు తీరానికి సమీపంలో సముద్ర మట్టానికి దాదాపు 5.8 కిలోమీటర్ల ఎత్తు వరకు ఒక ఉపరితల ఆవర్తనం కొనసాగుతోందని వాతావరణ శాఖ తెలిపింది. దీని ప్రభావంతో రాబోయే 3 రోజుల పాటు కోస్తాంధ్రలో అక్కడక్కడా భారీ వర్షాలు కురిసే అవకాశం ఉందని అధికారులు తెలిపారు. అలాగే పలు ప్రాంతాల్లో తేలికపాటి నుండి ఒక మోస్తరు వర్షాలతో పాటు ఉరుములతో కూడిన జల్లులు పడే అవకాశముందని అంచనా వేశారు.

మరోవైపు, వివిధ వాతావరణ పరిస్థితుల కారణంగా ఈ ఆవర్తన ప్రభావం వల్ల ఈ నెల 24, 25 తేదీల్లో అండమాన్ పరిసర ప్రాంతాల్లో ఒక అల్పపీడనం ఏర్పడే సూచనలు కనిపిస్తున్నాయి. ఇది మరింత బలపడి 27వ తేదీ నాటికి వాయుగుండంగా మారి మధ్య బంగాళాఖాతంలోకి ప్రవేశించే అవకాశం ఉందని అంచనా వేశారు. ఆ తర్వాత రెండు రోజుల్లో ఇది తుపానుగా రూపాంతరం చెంది, ఈ నెలాఖరు నాటికి ఉత్తర కోస్తాంధ్ర - దక్షిణ ఒడిశా తీరాల మధ్య ఎక్కడైనా తీరం దాటే అవకాశం ఉందని భావిస్తున్నారు. అయితే ఈ తుపాను తీవ్రతపై త్వరలోనే స్పష్టత వస్తుందని వాతావరణ శాఖ అధికారులు చెబుతున్నారు.

Also Read: AP Local Body Elections: ఒడిశాలో ఏపీ ఎన్నికలా.. ఆంధ్రా గో బ్యాక్ అన్న బీజేపీ ఏం చెస్తుంది? నవీన్ పట్నాయక్ ఆగ్రహం

AP Local Body Elections: పట్టణ స్థానిక ఎన్నికల్లో వైసీపీకి ఎదురుదెబ్బ.. 8 స్థానాల్లో ఛైర్‌పర్సన్లు ఏకగ్రీవం

Shankar Dukanam — Mon, 19 Oct 2026 08:14:40 +0530

AP Municipal Elections 2026 | అమరావతి: ఆంధ్రప్రదేశ్‌లో పురపాలక ఎన్నికల ప్రక్రియలో భాగంగా నామినేషన్ల దాఖలు గడువు ముగియగా నేడు (అక్టోబర్ 19) నామినేషన్ల పరిశీలన జరుగుతుంది. 6 మున్సిపాలిటీలు, 2 నగర పంచాయతీలలో అధికార కూటమి (టీడీపీ- జనసేన- బీజేపీ) అభ్యర్థులు ఏకగ్రీవమయ్యే అవకాశాలు కనిపిస్తున్నాయి. ఆ 8 స్థానాల్లో ముఖ్యంగా 6 మున్సిపాలిటీల్లో వైసీపీ నుంచి నామినేషన్లు రాలేదు. మరో 2 చోట్ల వైసీపీ డమ్మీ అభ్యర్థుల నామినేషన్లు వచ్చాయని తెలుస్తోంది. ఈ ఎన్నికల్లో నామినేషన్ల ఉపసంహరణకు ఈ నెల 21వ తేదీ వరకు గడువు ఇచ్చారు. అనంతరం ఈ నెల 28న మున్సిపల్ ఎన్నికల పోలింగ్, అక్టోబర్ 30న ఓట్ల లెక్కింపు, ఫలితాల వెల్లడి జరగనున్నాయి.

పోటీ లేకుండానే కూటమికి ఛైర్ పర్సన్ పదవులు

ఈ మున్సిపల్ ఎన్నికల్లో వైసీపీ అభ్యర్థులు నామినేషన్లు దాఖలుచేయని దర్శి, పిడుగురాళ్ల, మైదుకూరు, ఎర్రగుంట్ల, రాయచోటి, పుంగనూరు పురపాలక సంఘాలతో పాటు గురజాల, కమలాపురం నగర పంచాయతీల్లో ఛైర్‌పర్సన్‌ స్థానాలు కూటమికి ఏకగ్రీవం కానున్నాయి. మరోవైపు కడప జిల్లా జమ్మలమడుగు, అనంతపురం జిల్లా గుత్తిలో వైసీపీ ప్రకటించిన అభ్యర్థులు కాకుండా డమ్మీ అభ్యర్థులు నామినేషన్లు వేశారు. అక్కడ సైతం వారు నామినేషన్ ఉపసంహరించుకుంటే ఏకగ్రీవం అయ్యే ఛాన్స్ ఉంది.

మూడు రోజులపాటు జరిగిన నామినేషన్ ప్రక్రియలో భాగంగా మున్సిపాలిటీలు, కార్పొరేషన్లకు కలిపి మేయర్, ఛైర్‌పర్సన్ పదవులకు 1,338 నామినేషన్లు దాఖలయ్యాయి. అలాగే రాష్ట్రవ్యాప్తంగా కార్పొరేషన్లు, మున్సిపాలిటీలు, నగర పంచాయతీల వార్డు/ డివిజన్ స్థానాలకు మొత్తం 24,451 నామినేషన్లు సమర్పించారు. ఈ మున్సిపాలిటీ ఎన్నికల్లో వైసీపీకి ఎదురుదెబ్బ తగిలింది. పలు మున్సిపాలిటీల్లో అభ్యర్థులు లభించక లేదా నామినేషన్లు వేయలేక పోటీకి దూరంగా కావాల్సిన పరిస్థితి ఏర్పడింది.

ముఖ్యంగా ప్రకాశం జిల్లా దర్శి, పల్నాడు జిల్లా పిడుగురాళ్ల మున్సిపాలిటీలు, గురజాల నగర పంచాయతీలో వైసీపీ తరఫున ఒక్క నామినేషన్ కూడా దాఖలు కాలేదు. కడప జిల్లాలోని ఎర్రగుంట్ల, మైదుకూరు మున్సిపాలిటీలు, కమలాపురం నగర పంచాయతీతో పాటు అన్నమయ్య జిల్లా రాయచోటి, పుంగనూరు మున్సిపాలిటీల్లోనూ వైసీపీ నుంచి నామినేషన్లు రాలేదు.

కొన్ని చోట్ల వైసీపీ డమ్మీ అభ్యర్థులు

మరోవైపు జమ్మలమడుగు, గుత్తి వంటి ప్రాంతాల్లో వైసీపీ ప్రటించిన అభ్యర్థుల స్థానంలో డమ్మీ అభ్యర్థులు నామినేషన్లు వేశారు. ఒకవేళ ఆ డమ్మీ అభ్యర్థులు నామినేషన్లను ఉపసంహరించుకుంటే, అక్కడ కూడా చైర్ పర్సన్ స్థానాలు ఏకగ్రీవం అయ్యే అవకాశం ఉంది. సుమారు 388కి పైగా వార్డుల్లో వైసీపీ అభ్యర్థుల నామినేషన్లే పడలేదు. ఎన్నికల కమిషన్ నామినేషన్ల పరిశీలన, ఉపసంహరణ గడువు ముగిస్తే అభ్యర్థుల జాబితా, నామినేషన్లు లేని వార్డుల సంఖ్యపై క్లారిటీ వస్తుంది. కూటమి పార్టీలు మాత్రం ఘన విజయం సాధిస్తామని ధీమాగా ఉన్నాయి. అయితే తమకు అభ్యర్థులను ఖరారు చేసే టైం ఇవ్వకుండా కూటమి ప్లాన్ ప్రకారం రిజర్వేషన్లు ప్రకటించి, ఎన్నికల నామినేషన్ల ప్రక్రియ పూర్తి చేసిందని వైసీపీ అధినేత, మాజీ సీఎం జగన్ మోహన్ రెడ్డి ఆరోపించారు. ఏపీ ఎస్ఈసీ అనిల్ చంద్ర పునేఠా సీఎం చంద్రబాబు వీరవిధేయుడని, కూటమి పార్టీలకు అనూకూలంగా ఎన్నికల ప్రక్రియ మొదలుపెట్టారని వ్యాఖ్యానించారు.

BJP Candidates List: ఏపీలో పట్టణ స్థానిక సంస్థల ఎన్నికలు.. బీజేపీ అభ్యర్థుల తొలి జాబితా విడుదల

Shankar Dukanam — Sun, 18 Oct 2026 05:45:41 +0530

BJP Candidates List | అమరావతి: ఆంధ్రప్రదేశ్ పట్టణ స్థానిక సంస్థల ఎన్నికలకు సంబంధించి కూటమి పార్టీలు వరుసగా అభ్యర్థుల జాబితాలు విడుదల చేస్తున్నాయి. ఇదివరకే టీడీపీ అభ్యర్థుల రెండు జాబితాలు విడుదల చేయగా, జనసేన పార్టీ సైతం కొందరు అభ్యర్థుల జాబితా ప్రకటించింది. తాజాగా శనివారం రాత్రి భారతీయ జనతా పార్టీ (BJP) తమ అభ్యర్థుల తొలి జాబితాను విడుదల చేసింది. కొన్ని రోజులపాటు కూటమి భాగస్వామ్య పక్షాల నేతల మధ్య జరిగిన సుదీర్ఘ చర్చలతో పోటీ చేసే స్థానాలపై స్పష్టత వచ్చింది. కూటమి పొత్తులో భాగంగా బీజేపీ రాష్ట్రంలో 2 మున్సిపల్ కార్పొరేషన్లు, 7 మున్సిపాలిటీలలో బరిలోకి దిగుతోంది. ఈ మేరకు పార్టీ రాష్ట్ర అధ్యక్షుడు పీవీఎన్‌ మాధవ్‌ ఒక ప్రకటన ద్వారా అభ్యర్థుల వివరాలు వెల్లడించారు.

తాజాగా విడుదల చేసిన జాబితాలో అనంతపురం మేయర్ స్థానంతో పాటు 5 మున్సిపాలిటీల ఛైర్‌పర్సన్ స్థానాలకు అభ్యర్థులను ప్రకటించారు. అనంతపురం మున్సిపల్ కార్పొరేషన్‌ మేయర్ అభ్యర్థిగా కోట్ల అజేశ్‌ బాబు పేరును ప్రకటించారు. భారతీయ జనతా యువ మోర్చా (BJYM) ఆంధ్రప్రదేశ్ రాష్ట్ర ప్రధాన కార్యదర్శిగా కోట్ల అజేశ్ బాబు బాధ్యతలు నిర్వహిస్తున్నారు ఇక మున్సిపాలిటీలు, నగరపాలక సంస్థల చైర్మన్ స్థానాల విషయానికొస్తే.. యలమంచిలి ఛైర్‌పర్సన్‌గా పిల్ల రామా కుమారి, గూడూరు (కే) స్థానానికి దమమ్‌ సునీతా బాయి, గిద్దలూరుకు డాక్టర్ జాడి వెంకట నారాయణ, నెల్లిమర్లకు మైపాడ ప్రసాద్‌, ఎర్రగుంట్ల మున్సిపాలిటీ నుంచి బీజేపీ తరఫున గోర్ల మధులత పోటీ చేయనున్నారు.

మున్సిపల్ కార్పొరేషన్‌

అనంతపురం (మేయర్‌) - కోట్ల అజేశ్‌ బాబు

మున్సిపాలిటీలు, నగర పాలక సంస్థలు

- యలమంచిలి - పిల్ల రామా కుమారి
- గూడూరు (కే) - దమమ్‌ సునీతా బాయి
- నెల్లిమర్ల - మైపాడ ప్రసాద్‌
- గిద్దలూరు - డా.జాడి వెంకట నారాయణ
- ఎర్రగుంట్ల - గోర్ల మధులత

మిగిలిన బీజేపీ స్థానాలైన రాజమహేంద్రవరం మున్సిపల్ కార్పొరేషన్ (మేయర్)తో పాటు బాపట్ల, కావలి మున్సిపాలిటీలకు సంబంధించిన అభ్యర్థుల ఎంపికపై ఇంకా నిర్ణయం తీసుకోలేదు. మిగతా మేయర్, చైర్మన్ అభ్యర్థుల ఎంపిక ప్రక్రియ కొనసాగుతోంది. సాధ్యమైనంత త్వరగా ఆ స్థానాలకు సంబంధించిన జాబితాను కూడా విడుదల చేస్తామని బీజేపీ నేతలు తెలిపారు. మరోవైపు నామినేషన్ల ప్రక్రియ అక్టోబర్ 16న ప్రారంభం కాగా, ఆదివారం (అక్టోబర్ 18) నాడు అభ్యర్థుల దరఖాస్తుకు తుది గడువు ముగియనుందని తెలిసిందే.

అక్టోబర్ 19న నామపత్రాల పరిశీలన చేస్తారు. ఈ 21న అభ్యర్థిత్వాల ఉపసంహరణకు అవకాశం కల్పించారు. అదేరోజు పోటీలో నిలిచిన అభ్యర్థుల తుది జాబితాను అధికారులు ప్రకటిస్తారు. అక్టోబర్ 28న పోలింగ్ నిర్వహిస్తారు. ఎక్కడైనా రీపోలింగ్, లేక అవసరమైన చోట ఈ 29న పోలింగ్‌ జరుగుతుంది. అక్టోబర్ 30న ఓట్ల లెక్కింపు చేపట్టి, అదేరోజు విజేతల వివరాలు ప్రకటించారు.

AP Local Body Elections: ఎంపీ అవినాష్ రెడ్డికి నోటీసులు.. పలువురు వైసీపీ నేతలపై కేసులు.. కఠిన చర్యలు తప్పవన్న ఎస్ఈసీ

Shankar Dukanam — Sat, 17 Oct 2026 13:01:16 +0530

AP Local Body Elections | అమరావతి: ఆంధ్రప్రదేశ్‌లో స్థానిక సంస్థల ఎన్నికల నామినేషన్ల ప్రక్రియ తొలిరోజు సందర్భంగా పలుచోట్ల ఉద్రిక్తతలు చోటుచేసుకున్నాయి. దాంతో పోలీసులు అప్రమత్తమై పలు ప్రాంతాల్లో 144 సెక్షన్ విధించారు. ముఖ్యంగా అన్నమయ్య జిల్లా పుంగనూరు నామినేషన్ సెంటర్ వద్ద చోటుచేసుకున్న ఘర్షణలకు సంబంధించి వైఎస్సార్సీపీ ఎంపీ మిథున్ రెడ్డితో పాటు పలువురిపై కేసులు నమోదయ్యాయి. ఈ గొడవలకు సంబంధించిన వీడియో దృశ్యాలను విశ్లేషించిన పోలీసులు దాదాపు 70 మందిని గుర్తించారు. ఈ ఘటనలపై మొత్తం మూడు కేసులు నమోదు చేసి, గొడవల్లో పాల్గొన్న వారి ఆచూకీ కోసం ప్రత్యేక పోలీసు బృందాలను రంగంలోకి దించారు. ఈ పరిస్థితుల్లో ఎలాంటి అవాంఛనీయ సంఘటనలు జరగకుండా పుంగనూరులో భారీగా పోలీసు బలగాలను మోహరించారు.

శాంతిభద్రతలకు విఘాతం కలిగిస్తే తీవ్ర చర్యలు: ఏపీ ఎస్‌ఈసీ

ఏపీలో స్థానిక సంస్థల ఎన్నికల వేళ శాంతిభద్రతలపై వచ్చిన ఫిర్యాదులపై వెంటనే స్పందించి పరిస్థితులను అదుపులోకి తెచ్చామని ఎస్‌ఈసీ అనిల్‌ చంద్ర పునేఠ తెలిపారు. విజయవాడ మీడియా సమావేశంలో మాట్లాడుతూ.. హింసాత్మక ఘటనలకు పాల్పడితే తీవ్ర చర్యలు ఉంటాయని, అవసరమైతే అదనపు బలగాలను రప్పిస్తామని హెచ్చరించారు. నామినేషన్ల సమయంలో అభ్యర్థితో పాటు ముగ్గురికి మాత్రమే అనుమతి ఉంటుందన్నారు. ప్రతి సెంటర్‌లో సీసీ కెమెరాలు ఏర్పాటు చేశామని ఎస్‌ఈసీ తెలిపారు. అధికారుల నిర్లక్ష్యం ఉంటే బదిలీ లేదా సస్పెన్షన్ తప్పదని స్పష్టం చేశారు.

పిన్నెల్లి రామకృష్ణారెడ్డి పోలీసులు గృహనిర్బంధం

మరోవైపు పల్నాడు జిల్లా మాచర్లలో ముందస్తు జాగ్రత్త చర్యగా వైఎస్సార్సీపీ మాజీ ఎమ్మెల్యే పిన్నెల్లి రామకృష్ణారెడ్డిని పోలీసులు గృహనిర్బంధం చేశారు. స్థానిక ఎన్నికల్లో శాంతిభద్రతలకు విఘాతం కలగకుండా ఉండటానికి మాచర్ల పోలీసులు పిన్నెల్లికి ముందస్తు నోటీసులు జారీ చేశారు.

ఎంపీ అవినాష్ రెడ్డికి పోలీసుల నోటీసులు

అలాగే వైఎస్సార్ జిల్లా పులివెందులలో కూడా పోలీసులు భద్రత కట్టుదిట్టం చేశారు. చేశారు. కడప ఎంపీ అవినాష్ రెడ్డికి పులివెందుల సీఐ పురుషోత్తం ముందస్తు నోటీసులు అందజేశారు. ప్రస్తుతం 144 సెక్షన్ అమలులో ఉన్నందున ఎలాంటి ర్యాలీలు, ధర్నాలు లేదా సభలు నిర్వహించకూడదని పోలీసులు ఆ నోటీసుల్లో స్పష్టం చేశారు. ఎంపీ అవినాష్ రెడ్డితో పాటు వైసీపీ కీలక నేతలు రవీంద్రనాథ్ రెడ్డి, అంజాద్ బాషాలకు కూడా పోలీసులు ఈ నోటీసులు ఇచ్చారు. ఎన్నికల వేళ శాంతిభద్రతలకు భంగం కలిగించేలా అల్లర్లు, గొడవలకు పాల్పడవద్దని నేతలకు పోలీసులు విజ్ఞప్తి చేశారు. పుంగనూరులో ఎంపీ పెద్దిరెడ్డి మిథున్ రెడ్డిపై జరిగిన దాడిని, రాయచోటిలో పార్టీ ఆపీసుపై టీడీపీ వర్గీయులు దాడి చేశారని వైఎస్ అవినాష్ రెడ్డి తీవ్రంగా ఖండించారు.

Polavaram Project: పోలవరం పనులపై అంతర్జాతీయ నిపుణులు సంతృప్తి.. ఈసీఆర్‌ఎఫ్‌ డ్యామ్‌ నిర్మాణంపై ఆరా!

Satyaprasad Bandaru — Thu, 15 Oct 2026 09:53:20 +0530

Polavaram Project: పోలవరం ప్రాజెక్టులో కీలకమైన ఎర్త్‌ కమ్‌ రాక్‌ఫిల్‌ (ఈసీఆర్‌ఎఫ్‌) డ్యామ్‌ నిర్మాణ పనులను అంతర్జాతీయ నిపుణుల బృందం బుధవారం పరిశీలించింది. ఈసీఆర్‌ఎఫ్‌ డ్యామ్‌లోని గ్యాప్‌-1, గ్యాప్‌-2 ప్రాంతాల్లో జరుగుతున్న పనులను పరిశీలించిన నిపుణులు.. అనంతరం జీ హిల్‌ వ్యూ పాయింట్‌ నుంచి ప్రాజెక్టు నిర్మాణ పనులను వీక్షించారు. ఆయా ప్రాంతాల్లో చేపడుతున్న నిర్మాణాలను రాష్ట్ర జలవనరుల శాఖ, మేఘా ఇంజినీరింగ్‌ అండ్‌ ఇన్‌ఫ్రాస్ట్రక్చర్స్‌ లిమిటెడ్‌ (ఎంఈఐఎల్‌) ప్రతినిధులను అడిగి తెలుసుకుంది. ఛాయాచిత్రాల ద్వారా ఇప్పటివరకు చేపట్టిన పనులు, నిర్మాణాల ప్రస్తుత స్థితిగతులను సిబ్బంది వారికి తెలియజేశారు. తొలిరోజు పర్యటన అనంతరం నిర్వహించిన సమీక్షలో ఇప్పటివరకు జరిగిన పనుల పట్ల నిపుణులు సంతృప్తి వ్యక్తం చేసినట్లు సమాచారం.

ముందు సమీక్ష.. ఆపై క్షేత్రస్థాయి పరిశీలన

దిల్లీ నుంచి రాజమహేంద్రవరం చేరుకున్న అంతర్జాతీయ నిపుణులు, కేంద్ర జలశక్తి శాఖకు చెందిన వివిధ విభాగాల అధికారులు అక్కడి నుంచి పోలవరం ప్రాజెక్టు ఆఫీసుకు చేరుకున్నారు. వారికి పోలవరం ప్రాజెక్టు అథారిటీ, రాష్ట్ర జలవనరుల శాఖ అధికారులు, ఎంఈఐఎల్‌ ప్రతినిధులు స్వాగతం పలికారు. అనంతరం పీపీఏ సీఈఓ సంజీవ్‌ వోహ్రా అధ్యక్షతన సమీక్ష సమావేశం నిర్వహించారు. గత పర్యటనల్లో నిపుణులు చేసిన సూచనలు, సలహాల మేరకు చేపట్టిన చర్యలు, ఇప్పటివరకు జరిగిన పనుల పురోగతిని అధికారులు వారికి వివరించారు.

ఎనిమిదో విడత పర్యటన

పోలవరం ప్రాజెక్టును ఇప్పటికే ఏడు విడతల్లో సందర్శించిన అంతర్జాతీయ నిపుణులు ప్రస్తుతం ఎనిమిదో విడత పర్యటనలో భాగంగా ప్రాజెక్టు పనులను పరిశీలిస్తోంది. ఈ ఏడాది మే నెలలో నిపుణుల బృందం పోలవరాన్ని సందర్శించింది. గతంలో ఇచ్చిన సూచనలు, సలహాలను అమలు చేసిన తీరు, వాటి ఆధారంగా చేపట్టిన పనుల పురోగతిని ప్రస్తుత పర్యటనలో పరిశీలిస్తోంది. అంతర్జాతీయ నిపుణులు, కేంద్ర ప్రభుత్వ అధికారుల బృందం పర్యటన ఈ నెల 17వ తేదీ వరకు కొనసాగనుంది.

Also Read: జనసేనలో చేరిన వంగవీటి రాధాకృష్ణ.. విజయవాడ మేయర్ స్థానంపై ఉత్కంఠ

సమావేశంలో

ఈ సమావేశంలో అంతర్జాతీయ నిపుణులు రిచర్డ్‌ డొనెల్లీ, గ్లాన్‌ఫ్రాంకో డి సిక్కో, సీన్‌ హించ్‌బెర్గర్‌, డేవిడ్‌ పాల్‌ పాల్గొన్నారు. కేంద్ర జలసంఘం డిజైన్స్‌ విభాగం చీఫ్‌ ఇంజినీర్‌ సరబ్జిత్‌ సింగ్‌ బక్షి, పీపీఏ సభ్య కార్యదర్శి ఎం. రఘురాం, ఉప సంచాలకుడు ఎ. ప్రవీణ్‌, చీఫ్‌ ఇంజినీర్‌ ఎం. రమేష్‌కుమార్‌, సహాయ సంచాలకుడు సీహెచ్‌ సంజీవ్‌, నేషనల్‌ వాటర్‌ సిస్టం డైరెక్టర్‌ పన్నీర్‌ సెల్వం, ఉప సంచాలకులు అశ్వనీకుమార్‌ వర్మ, గౌరవ్‌ తివారీ, సహాయ సంచాలకుడు హేమంత్‌ గౌతమ్‌ పాల్గొన్నారు.

Also Read: స్థానిక పోరులో బలమైన వ్యూహం - సీట్ల కేటాయింపుతో ఆగని టీడీపీ-జనసేన రగడ.. ఓటు బదిలీ సాధ్యమేనా?

Papikondalu Tour: పాపికొండలు అందాలు చూసే వేళాయె.. నేటి నుంచి బోట్ల విహారయాత్ర తిరిగి ప్రారంభం

Satyaprasad Bandaru — Tue, 13 Oct 2026 10:18:58 +0530

Papikondalu Tour: ఈ ఏడాది గోదావరికి వరద పోటెత్తడంతో సుమారు 70 రోజులకు పైగా పాపికొండల విహారయాత్ర నిలిపివేసిన సంగతి తెలిసిందే. తాజాగా విహారయాత్రను మళ్లీ ప్రారంభించనున్నారు. ప్రస్తుతం గోదావరి వరద ఉద్ధృతి తగ్గడంతో, రంపచోడవరం సబ్‌కలెక్టర్ పృథ్వీరాజ్ కుమార్ గోదావరి విహారయాత్రకు మళ్లీ అనుమతులు మంజూరు చేశారు. దీంతో మంగళవారం నుంచి పర్యాటకులు పాపికొండల అందాలను ఆస్వాదించే అవకాశం లభించింది. ప్రస్తుతం పాఠశాలలకు దసరా సెలవులు కావడం, బోట్ టూర్లు తిరిగి ప్రారంభం కావడంతో పర్యాటకులు పెద్దఎత్తున తరలివస్తారని బోట్ల నిర్వాహకులు అంచనా వేస్తున్నారు. ఈ నేపథ్యంలో పర్యాటకుల కోసం ఏపీటీడీసీకి చెందిన ఒక బోట్‌తో పాటు 15 ప్రైవేట్ బోట్లు మొత్తం 16 బోట్లను సిద్ధం చేశారు.

అధికారుల తనిఖీలు

చింతూరు ఐటీడీఏ పీవో నరేంద్ర పడాల్ సోమవారం పోలవరం పాపికొండల పర్యాటక రేవులో బూట్ల భద్రతను చెక్ చేశారు. ఈ సందర్భంగా ఆయన మాట్లాడుతూ.. ప్రతి బోట్‌కు సంబంధించిన అన్ని ధ్రువపత్రాలు, పర్యాటకుల సెఫ్టీ పరికరాలు తప్పనిసరిగా ఉండాలని స్పష్టం చేశారు. కొన్ని బోట్ల ధ్రువపత్రాలపై అక్షరాలు సరిగా కనిపించడం లేదని, లైఫ్‌ జాకెట్ల నాణ్యత బాగాలేదని గుర్తించి వాటిని వెంటనే మార్చాలని ఆదేశించారు. రేవులో పర్యాటకులకు అన్ని వసతులు కల్పించాలని, బోట్ల ధ్రువపత్రాల నకళ్లను తహసీల్దార్‌కు అందజేయాలన్నారు. ఈ తనిఖీల్లో చింతూరు డీఎస్పీ ఉదయ పావని, తహసీల్దార్ సరస్వతి, ఎస్సై సాధిక్, పోచవరం కంట్రోల్‌ రూమ్‌ మేనేజర్ రాజేష్ తదితరులు పాల్గొన్నారు.

రాజమహేంద్రవరం నుంచి పాపికొండల టూర్

తెలుగు రాష్ట్రాల నుంచి వచ్చే పర్యాటకులు ముందుగా రాజమహేంద్రవరం చేరుకుంటారు. అక్కడి గోదావరి గట్టు నుంచి బోటు నిర్వాహకులు ఏర్పాటు చేసిన వాహనాల్లో రోడ్డు మార్గంలో సీతానగరం మీదుగా గండి పోచమ్మ ఆలయం వద్దకు చేరుకుంటారు. అమ్మవారి దర్శనం చేసుకున్న తర్వాత విహారయాత్ర ప్రారంభమవుతుంది. ఈ ఆలయం నుంచి గోదావరి సహజ అందాలు, ఎత్తైన కొండల మధ్య సాగే ఈ యాత్రను ముగించుకుని తిరిగి రావడానికి దాదాపు ఏడు గంటల సమయం పడుతుంది.

Also Read: జగన్, వివేకా కేసుల్లో ఈడీ దూకుడుకు రాజకీయ మార్పులు కారణమా? వైఎస్ఆర్‌సీపీ వ్యూహం ఏమిటి?

టూరిస్టులకు సెఫ్టీ ప్రమాణాలు తప్పనిసరి

బోట్ ఎక్కిన ప్రతి టూరిస్టు నిర్వాహకులను అడిగి విధిగా లైఫ్‌ జాకెట్ ధరించాలి. యాత్ర ముగిసే వరకు దానిని తీయకూడదు.
బోట్‌లో ప్రయాణిస్తున్న సమయంలో అంచులపై నిలబడి ఫొటోలు, సెల్ఫీలు తీసుకోవడం అత్యంత ప్రమాదకరం.
విహారయాత్ర ముగిసే వరకు చిన్న పిల్లలను గమనిస్తూ ఉండాలి, వారు బోట్ అంచుల వైపు వెళ్లకుండా జాగ్రత్తలు తీసుకోవాలి.
యాత్రికులంతా ఎట్టి పరిస్థితుల్లోనూ బోట్‌లో ఒకవైపునకు వెళ్లకూడదు. అలా వెళితే బోట్ అడుపుతప్పే ప్రమాదం ఉంటుంది.
యాత్ర ప్రారంభ సమయంలో వాతావరణం అనుకూలించకపోతే విహారయాత్రను వాయిదా వేసుకోవడం చాలా మంచిది.

Also Read: కొలిక్కిరాని చర్చలు.. నేడు పవన్ కళ్యాణ్‌తో టీడీపీ నేతల భేటీ- చంద్రబాబుతో మాధవ్‌ సమావేశం

Tiger Rescue Operation: దేచర్ల క్వారీలో పెద్దపులి ప్రత్యక్షం.. డ్రోన్ల సాయంతో బంధించేందుకు అటవీ శాఖ రెస్క్యూ ఆపరేషన్

Shankar Dukanam — Sun, 11 Oct 2026 17:52:05 +0530

కొవ్వూరు: తూర్పు గోదావరి జిల్లా కొవ్వూరు మండలంలో పెద్దపులి సంచారం స్థానికంగా కలకలం సృష్టించింది. దేచర్ల సమీపంలోని క్వారీ వద్ద పెద్దపులి తిష్ట వేయడంతో ప్రజలు, రైతులు తీవ్ర భయాందోళనలకు గురవుతున్నారు. ప్రస్తుతం ఆ క్వారీ వద్దే సేదతీరుతున్న పులిని ఎలాగైనా బంధించేందుకు అటవీ శాఖ అధికారులు రంగంలోకి దిగారు. పులిని బంధించేందుకు రెస్క్యూ ఆపరేషన్‌ను కొనసాగిస్తున్నారు.

అటవీ శాఖ ఉన్నతాధికారులు సీసీఎఫ్ (CCF) జ్యోతి, డీఎఫ్ఓ (DFO) ప్రభాకర్ ఆధ్వర్యంలో ప్రత్యేక రెస్క్యూ బృందాలు పులిని బోనులో బంధించేందుకు తీవ్రంగా శ్రమిస్తున్నాయి. పులి ఉన్న ప్రాంతం ఇబ్బందిగా ఉండటంతో రెస్క్యూ టీమ్‌కు పలు సవాళ్లు ఎదురవుతున్నాయి. ఈ క్రమంలో పులి కదలికలను నిశితంగా పరిశీలిస్తూ, దాని వద్దకు చేరుకునే సురక్షిత మార్గాలను గుర్తించేందుకు అధికారులు డ్రోన్ కెమెరాలు వినియోగిస్తున్నారు.

పులికి ఎలాంటి హాని కలగకుండా, అలాగే సిబ్బందికి ప్రమాదం జరగకుండా దాన్ని బంధించేందుకు అటవీ శాఖ అన్ని జాగ్రత్తలు తీసుకుంటోంది. కొవ్వూరు ప్రాంతంలో పులి సంచారం దృష్ట్యా స్థానిక ప్రజలు, సమీప గ్రామాల రైతులు అత్యంత అప్రమత్తంగా ఉండాలని, అధికారుల సూచనలను ఖచ్చితంగా పాటించాలని అటవీ శాఖ విజ్ఞప్తి చేసింది.

పెద్దపులిని పట్టుకునేందుకు పూణే నుంచి టీమ్స్

గోదావరి జిల్లాలో పెద్దపులి దోబూతులాడుతోంది. చాలా రోజులుగా అటవీ శాఖను ముప్పుతిప్పలు పెడుతున్న పులి.. ఇప్పుడు చాగల్లు అరటితోటల్లో సంచరిస్తోంది. కొన్నాళ్లుగా పాపికొండల అభయారణ్యంలో తిరిగిన పులి కొన్ని రోజుల కిందట సీతానగరం వద్ద గోదావరి నదిని దాటింది. దేవరపల్లి మీదుగా ఇప్పుడు డెల్టా ప్రాంతానికి వచ్చేయడంతో అటవీ అధికారుల్లో ఆందోళన పెరిగింది. పులిని సాధ్యమైనంత త్వరగా బంధించేందుకు పూణె నుంచి ప్రత్యేక టీమ్‌ను రప్పించారు.

ఢిల్లీ నుంచి దిగిన మరో టీమ్
ఈ క్రమంలో శనివారం ఉదయం పులి చాగల్లు సమీపంలోని ఓ అరటితోటలో రైతులకు కనిపించింది. ఆ తర్వాత ఓ ప్యాక్టరీ సమీపంలో పులి సేదతీరుతున్నట్లు కెమెరాలకు చిక్కింద. పులి అనుసరిస్తున్న వ్యూహం అటవీశాఖ అధికారులను ఆశ్చర్యపరుస్తోంది. పగటిపూట కోకో తోటలు, వరి పొలాల్లో నక్కుతూ, చీకటి పడగానే ఊర్లు మారుతూ హడలెత్తిస్తోంది. పులి కదలికలను అటవీ శాఖ అధికారులు ఛాలెంజ్‌గా తీసుకుని.. రేడియో కాలర్ సిగ్నల్స్, ప్రత్యేక డ్రోన్ కెమెరాల ద్వారా దాని జాడను ట్రాక్ చేయడానికి ప్రయత్నిస్తున్నారు. ఢిల్లీ నుంచి ప్రత్యేక మత్తు ఇంజెక్షన్ నిపుణుల బృందం కూడా పులిని బంధించే ఆపరేషన్‌లోకి దిగింది. పూణె టీమ్ మాత్రం సాధ్యమైనంత త్వరగా పులిని పట్టుకుంటామని చెప్పి ఒకరోజు పూర్తయిందని స్థానికులు భయాందోళనకు గురవుతున్నారు.

Deputy CM Pawan Kalyan: 2024లో జనసేన చాలా త్యాగం చేసింది, స్థానిక ఎన్నికల్లో మమ్మల్ని గెలిపించండి: పవన్ కళ్యాణ్

Shankar Dukanam — Sun, 11 Oct 2026 13:24:52 +0530

Adavi Thalli Bata 2.0 in Rakota Village | రంపచోడవరం: అడవితల్లి బాట 2.0 కార్యక్రమాన్ని ఏపీ డిప్యూటీ సీఎం పవన్ కళ్యాణ్ ఆదివారం నాడు ప్రారంభించారు. అడవి బిడ్డల కష్టాలు తెలుసుకునేందుకు పోలవరం ఏజెన్సీ గ్రామానికి వెళ్లారు. సుమారు 350 మంది జనాభా కలిగిన రాకోట గ్రామాన్ని సందర్శించి, గిరిజనుల సమస్యలను అడిగి తెలుసుకున్నారు. చింత చెట్టు కింద కూర్చుని వారితో ప్రత్యేకంగా మాట్లాడారు. గిరిజనులు ప్రస్తావించిన సమస్యలపై తక్షణమే స్పందించి, పరిష్కారాలకు అధికారుకు పవన్ కళ్యాణ్ ఆదేశాలు జారీ చేశారు.

గతంలో చాలా త్యాగాలు చేశాం, ఈసారి జన సైనికులకు మద్దతు తెలపండి
పవన్ కళ్యాణ్ మాట్లాడుతూ.. ‘ఈసారి జనసేన పొత్తు ప్రకారం పోటీ చేస్తుంది. స్థానిక ఎన్నికల్లో జనసైనికులను గెలిపించండి. కూటమిలోని టీడీపీ, బీజేపీని ఎలా ఆదరిస్తారో, గౌరవిస్తారో అదే తీరుగా జనసేనకు మద్దతు తెలపండి. 2023లో చంద్రబాబును అరెస్ట్ చేసి రాజమండ్రి జైల్లో పెట్టినప్పుడు ఎవరూ బయటకు రానప్పుడు.. జనసైనికులు, జనసేన వీర మహిళలు ధైర్యంగా రోడ్ల మీదకు వచ్చి భరోసా ఇచ్చారు. అసెంబ్లీ ఎన్నికల్లో రాష్ట్ర భవిష్యత్ కోసం కలిసి పోరాటం చేశాం. ఇప్పుడు స్థానిక ఎన్నికలు మీ భవిష్యత్ కోసం, మీ స్థానిక అవసరాల కోసం జరుగుతున్నాయి. మూడు పార్టీలు బాగుండాలి. గత ఎన్నికల్లో జనసేన చాలా త్యాగాలు చేసింది. ఈసారి స్థానిక ఎన్నికల్లో జనసైనికులు, వీరమహిళలకు మద్దతు తెలపాలని’ ప్రజలను కోరారు.

చింతచెట్టు కింద గిరిపుత్రులతో మాటా మంతి

‘అడవితల్లిబాట 2.0’ కార్యక్రమాన్ని ప్రారంభించేందుకు పోలవరం జిల్లా పరిధిలోని రంపచోడవరం నియోజకవర్గం, వేములకొండ గ్రామ పంచాయతీ పరిధిలోని రాకోట గిరిశిఖర గ్రామానికి పవన్ కళ్యాణ్ వెళ్లారు. అదే పంచాయతీ పరిధిలోని కాకవాడ, రాకోట, సువర్లవాడ, వేములకొండ గ్రామాలను కలిపేలా రూ. 2.29 కోట్ల వ్యయంతో 3.4 కిలోమీటర్ల మేర రోడ్లకు శంకుస్థాపన చేశారు. రాకోట గ్రామంలో చింతచెట్టు కింద ఉన్న రచ్చబండ వద్ద గిరిపుత్రులతో ‘మాటా మంతి’ కార్యక్రమంలో పవన్ కళ్యాణ్ పాల్గొన్నారు.

స్కూల్, ఆరోగ్య కేంద్రం, ఆలయ అభివృద్ధికి నిధులు
రాకోట గ్రామంలో ఎంపీపీ పాఠశాల శిథిలావస్థలో ఉన్న విషయాన్ని తెలుసుకున్న ఉప ముఖ్యమంత్రి దాని పునరుద్ధరణకు రూ. 20 లక్షలు మంజూరు చేశారు. గ్రామస్థుల కోరిక మేరకు విలేజ్ హెల్త్ క్లినిక్ నిర్మాణానికి రూ. 15 లక్షలు మంజూరు చేశారు. రాకోట గ్రామస్థులతో పూజలందుకుంటున్న హనుమాన్ ఆలయాన్ని సందర్శించి, ప్రత్యేక పూజలు నిర్వహించారు. రేకుల షెడ్డులో కొనసాగుతున్న ఆలయ పరిస్థితిని గమనించిన పవన్ కళ్యాణ్ దేవాదాయ శాఖ సహకారంతో భజన మందిరంగా అభివృద్ధికి మరో 20 లక్షలు కేటాయించారు.

గిరిజన గ్రామాల సమస్యలకు తక్షణ పరిష్కారాలు
రాకోట పరిసర ప్రాంతాలైన వేములకొండ, సువర్లవాడ, డబ్బావలస, తిరుగటిరాళ్లు, కాకవాడ, చిలకవీధి, వెట్టిచెలకలు, సోకులగూడెం గ్రామాల ప్రజలు తమ సమస్యలను పవన్ కళ్యాణ్ దృష్టికి తీసుకొచ్చారు. వాటిపై ఆయన తక్షణమే స్పందించారు. ప్రతి గ్రామానికి అంగన్‌వాడీ కేంద్రంతో కూడిన మండల పరిషత్ పాఠశాల, విలేజ్ హెల్త్ క్లినిక్ మంజూరు చేస్తూ ఆదేశాలు జారీ చేశారు. ఈ అభివృద్ధి పనుల కోసం వివిధ పథకాల ద్వారా దాదాపు 5 కోట్లు కేటాయించారు. గిరిజనులు తమ సమస్యలను స్వయంగా ఉప ముఖ్యమంత్రివర్యుల దృష్టికి తీసుకురాగా, వాటి పరిష్కారానికి ఆదేశాలు జారీ చేయడంతో గిరిపుత్రుల్లో భరోసా నింపారు.

డిప్యూటీ సీఎంకు ఘన స్వాగతం పలికిన గిరిజనులు
తమ గ్రామానికి వచ్చిన పవన్ కళ్యాణ్ కు రాకోట గ్రామ గిరిజన మహిళలు ఘనస్వాగతం పలికారు. గిరిజన సంప్రదాయాలు పాటిస్తూ స్థానికంగా లభించే పూలతో తయారు చేసిన బొకేలను అందజేసి.. పూల వర్షం కురిపిస్తూ గ్రామంలోకి ఆహ్వానించారు.

మండల పరిషత్ పాఠశాల భవనం పరిశీలన
రాకోట గ్రామానికి చేరుకున్న వెంటనే పక్కనే ఉన్న ఎంపీపీ పాఠశాలను పవన్ కళ్యాణ్ పరిశీలించారు. చిన్నారులను పలకరించి, పాఠశాల భవనాలతో పాటు ప్రాంగణంలో ఏర్పాటు చేసిన ఉద్యానవనాన్ని సందర్శించారు. పాఠశాల భవనం మరమ్మతుల కోసం రూ. 20 లక్షలు కేటాయించారు. విద్యార్థులకు తినుబండారాలు అందించారు.

వెదురు ఉత్పత్తుల విలువ పెంపునకు సహకారం
అనంతరం రాకోట గ్రామంలో వెదురు బొంగులతో గృహోపకరణాలు తయారు చేస్తున్న కొమ్మిరెడ్డి కుటుంబాన్ని పలకరించి, వారి సమస్యలను అడిగి తెలుసుకున్నారు. అనంతరం సెర్ప్ ఆధ్వర్యంలో వెదురు ఉత్పత్తుల ప్రోత్సాహానికి తీసుకుంటున్న చర్యలను అధికారులు వివరించారు. వెదురు ఉత్పత్తులకు మరింత విలువ జోడించి, గిరిజన కుటుంబాలకు మెరుగైన ఆదాయం లభించేలా ప్రభుత్వం తరఫున సహకారం అందిస్తామని ఈ సందర్భంగా పవన్ కళ్యాణ్ హామీ ఇచ్చారు.

వ్యవసాయదారులకు పనిముట్ల పంపిణీ ప్రారంభం
కాకవాడ గ్రామంలో ఏర్పాటు చేసిన బహిరంగ సభకు ముందు ప్రధానమంత్రి కృషి సించాయి యోజన 2.0 పథకం కింద వాటర్‌షెడ్ అభివృద్ధి పరికరాల పంపిణీ కార్యక్రమాన్ని పవన్ కళ్యాణ్ ప్రారంభించారు. వ్యవసాయ ఉత్పాదకతను పెంపొందించే లక్ష్యంతో రాష్ట్రవ్యాప్తంగా సుమారు రూ. 68 కోట్ల వ్యయంతో 34 వేల మంది అర్హులైన రైతులకు వ్యవసాయ పనిముట్లు అందించే కార్యక్రమంలో భాగంగా స్థానిక గిరిజన రైతులకు పరికరాలను పంపిణీ చేశారు.