Nara Bhuvaneshwari: మాజీ ఎంపీ హర్ష కుమార్.. నారా భువనేశ్వరిని మర్యాద పూర్వకంగా కలిశారు. టీడీపీ అధినేత చంద్రబాబు నాయుడు అరెస్టు దారుణం అన్నారు. అలాగే ఆయన ఆరోగ్యం గురించి నారా భువనేశ్వరిని అడిగి తెలుసుకున్నారు. అలాగే ధైర్యంగా ఉండమని భువనేశ్వరికి చెప్పారు. అనంతరం బయటకు వచ్చిన హర్ష కుమార్ మీడియాతో మాట్లాడుతూ... చంద్రబాబు కుటుంబ సభ్యులతో పాటు ఆయన స్నేహితులు కూడా చాలా ధైర్యంగా ఉన్నారని తెలిపారు. ఈ ధైర్యానికి కారణం కేవలం చంద్రబాబు నాయుడు ఏ తప్పు చేయరనే నమ్మకమేనని పేర్కొన్నారు.
అతి త్వరలోనే చంద్రబాబు నాయుడు బయటికి వస్తారని వివరించారు. కక్ష సాధింపు చర్యలో భాగంగానే చంద్రబాబును అరెస్టు చేయించారని ఆరోపించారు. చంద్రబాబు నాయుడుని ఇంతకాలం సెంట్రల్ జైల్లో నిర్బంధించగలిగారంటే వైసీపీ వెనుక బీజేపీ కూడా ఉందని అన్నారు. పూచీకత్తుతో బెయిల్ ఇచ్చి విచారణకు సహకరించాలని చెబితే సరిపోయేదానికి జెల్లో ఉంచడం దారుణం అన్నారు.
బీజేపీ కావాలనే పొలిటికల్ గేమ్ ఆడుతూ ఇలాంటి చర్యలకు పాల్పడుతుందని ఆరోపించారు. కేంద్ర సంస్థలను వాళ్ల ఆధీనంలో ఉంచుకొని.. కావాలనే పొలిటికల్ గేమ్ లో భాగంగా ఇటువంటి చర్యలు చేస్తుందని విమర్శించారు. వీటన్నిటికీ పుల్ స్టాప్ పడాలంటే మళ్లీ తిరిగి కేంద్రంలో కాంగ్రెస్ అధికారంలోకి వస్తేనే అన్ని కేంద్ర సంస్థలు గాడిలో పడతాయని పేర్కొన్నారు.
బండారు సత్యనారాయణకు బెయిల్
తెలుగుదేశం పార్టీ నేత, మాజీ మంత్రి బండారు సత్యనారాయణ మూర్తికి ఎట్టకేలకు బెయిల్ మంజూరైంది. రూ.25 వేల పూచీకత్తుతో మొబైల్‌ కోర్టు బెయిల్ మంజూరు చేసింది. ముఖ్యమంత్రి వైఎస్‌ జగన్‌మోహన్‌రెడ్డి, మంత్రి ఆర్‌కే రోజాలపై అనుచిత వ్యాఖ్యలు చేసిన మాజీ మంత్రి బండారు సత్యనారాయణపై గుంటూరు జిల్లా ఆరండల్ పేట్, నగర పాలెం పోలీస్ స్టేషన్ లో కేసు నమోదు చేశారు. సీఎం జగన్‌పై అనుచిత వ్యాఖ్యలు చేసినందుకు ఒక కేసు, మంత్రి ఆర్‌కే రోజాపై వ్యాఖ్యలు చేసినందుకు మరో కేసు నమోదు చేశారు పోలీసులు. 400/2023, 41 (A), 41(B),153, 294, 504, 505 సెక్షన్ల కింద కేసు నమోదైంది.
టీడీపీ సీనియర్ నేత బండారు వ్యాఖ్యలపై ఆయనకు నోటీసులు ఇచ్చి అరెస్టు చేసేందుకు పోలీసులు గుంటూరు నుంచి మంగళవారం తెల్లవారుజామున అనకాపల్లి జిల్లా వెన్నెలపాలం వెళ్లారు. చాలా సేపు నోటీసులు తీసుకోకుండా బండారు తలుపు గడియ పెట్టుకున్నారు. ఎట్టకేలకు తలుపులు బ్రేక్‌ చేసి బండారును ఆయన స్వగృహంలో పోలీసులు అదుపులోకి తీసుకున్నారు. అక్కడి నుంచి బండారును గుంటూరు తీసుకెళ్లారు. ఆసుపత్రి వద్ద లాయర్లను అడ్డుకోవడంతో వాగ్వాదం, తోపులాట జరిగింది. వైద్యులు ఆయనకు వైద్యపరీక్షలు చేశారు. బీపీ ఎక్కువ ఉండటంతో బండారును ఆసుపత్రిలో అడ్మిట్ చేయాలని వైద్యులు సూచించారు. సీఎం జగన్, మంత్రి రోజా మీద అభ్యంతరకర వ్యాఖ్యలు చేశారని గుంటూరులో రెండు కేసులు నమోదు చేశారు.
నందమూరి, నారా కుటుంబాలపై వైసీపీ మంత్రి రోజా చేసిన వ్యాఖ్యలను ఖండిస్తూ రెండు రోజుల కిందట మాజీ మంత్రి బండారు సత్యనారాయణ మూర్తి మీడియా సమావేశం ఏర్పాటు చేసి రోజాపై ఘాటు విమర్శలు చేశారు. ‘ఎన్టీఆర్ కుటుంబంపై, భువనేశ్వరి, బ్రాహ్మణీలపై మాట్లాడే అర్హత నీకు లేదు. రోజా... నువ్వు సినిమాల్లో ఎలా నటించావో నాకు తెలుసు. నీ చరిత్ర ఎవరికి తెలియదు. నీ బాగోతం బయటపెడితే నీ కుటుంబ సభ్యులు ఆత్మహత్య చేసుకుంటారు. ఇవాళ నీతి సూత్రాలు, ప‌తివ్రత కామెంట్స్ చేస్తోంద‌ని మండిప‌డ్డారు. త‌మ వద్ద నీ పూర్తి బండారం ఉంద‌న్నారు.