PMFME Scheme Stree Nidhi Loans: డ్వాక్రా మహిళలకు 35 శాతం రాయితీతో రుణాలు.. పీఎంఎఫ్ఎంఈ స్కీమ్ పూర్తి వివరాలు ఇలా!

PMFME Scheme Stree Nidhi Loans: స్త్రీ నిధి రుణాలపై ఏపీ ప్రభుత్వం కీలక నిర్ణయం తీసుకుంది. పీఎంఎఫ్ఎంఈ 35 శాతం రాయితీని స్త్రీనిది రుణాలకు అందించాలని నిర్ణయించింది.

ప్రధానమంత్రి సూక్ష్మ ఆహార శుద్ధి సంస్థల క్రమబద్ధీకరణ

Source : gemini Ai

PMFME Scheme Stree Nidhi Loans: ప్రధానమంత్రి సూక్ష్మ ఆహార శుద్ధి సంస్థల క్రమబద్ధీకరణ (PMFME) పథకం ద్వారా కేంద్ర ప్రభుత్వం దేశంలో ఆహార శుద్ధి రంగాన్ని ప్రోత్సహిస్తుంది. ఈ స్కీమ్ కింద, మైక్రో సంస్థలు తమ వ్యాపారాన్ని వృద్ధి చేసుకోవడానికి ఆర్థిక సహాయం అందిస్తుంది. ఆహార శుద్ధి పరిశ్రమలోని యంత్రాలను ఆధునీకరించుకోవడానికి, ఉత్పత్తిని మెరుగుపరచుకోవడానికి, కొత్త ఉద్యోగ అవకాశాలను సృష్టించడానికి వివిధ రాయితీలు, రుణాలు, గ్రాంట్ల ద్వారా ప్రయోజనం పొందవచ్చు. ఈ పథకం ద్వారా పొందిన రుణాలపై 35 శాతం రాయితీ పొందవచ్చు.

పీఎంఎఫ్ఎంఈ రుణాలు స్త్రీనిధి ద్వారా 

పీఎంఎఫ్ఎంఈ స్కీమ్‌ ద్వారా డ్వాక్రా మహిళల ఆర్థిక స్వావలంబన కల్పించేందుకు ఏపీ ప్రభుత్వం మరో కీలక నిర్ణయాన్ని తీసుకుంది. పీఎంఎఫ్‌ఎంఈ పథకం కింద బ్యాంకు లోన్ అందక ఇబ్బందిపడే వారికి స్త్రీనిధి ద్వారా రుణాలు గ్రాంట్ చేయించాలని నిర్ణయించింది. ఈ స్కీమ్ కింద బ్యాంకుల నుంచి తీసుకునే రుణాలకు వర్తించే 35 శాతం రాయితీని స్త్రీనిధి రుణాలకు వర్తింపజేసేందుకు కేంద్రం అంగీకరించింది. ఈ నిర్ణయంతో ఆహారశుద్ధి రంగంలో చిన్నతరహా పరిశ్రమలు ఏర్పాటు చేసే మహిళలకు ఊరట కలగనుంది. 2026-27 ఆర్థిక సంవత్సరంలో 5 వేల యూనిట్లకు ఈ రాయితీని వర్తింపజేసేందుకు కేంద్రం అంగీకరించింది. దీనికి సంబంధించిన గైడ్లెన్స్ మరో వారంలో అధికారికంగా వెలువడనున్నాయి. 

35 శాతం రాయితీ 

పీఎంఎఫ్‌ఎంఈ స్కీమ్ కింద ఏర్పాటు చేసే ఆహారశుద్ధి యూనిట్లు 35 శాతం రాయితీతో రుణాలు మంజూరు చేయాలని కేంద్రం బ్యాంకులను కోరింది. అయితే ఈ పరిశ్రమలు ఏర్పాటు చేసుకునేందుకు మహిళలు ముందుకు వస్తున్నా.. బ్యాంకులు సకాలంలో రుణాలు అందించని పరిస్థితి. దీన్ని గుర్తించిన రాష్ట్ర ప్రభుత్వం సెర్ప్‌ పరిధిలోని స్త్రీనిధి సంస్థ ద్వారా అందించే రుణాలకు పీఎంఎఫ్‌ఎంఈ పథకం రాయితీని అందించాలని ఇటీవల కేంద్ర ప్రభుత్వాన్ని కోరింది. ఈ ప్రతిపాదనకు కేంద్రం అంగీకరించింది. మహిళలు తమ జీవనోపాధి కోసం ఏర్పాటు చేసుకునే యూనిట్‌లో ప్లాంట్, యంత్రాలకు అయ్యే ఖర్చుపైన 35% రాయితీ అందించనున్నారు. మొత్తం యూనిట్‌కు అయ్యే ఖర్చులో లబ్ధిదారు వాటా 10 శాతంగా ఉంటుంది. రాయితీ, లబ్దిదారుడి వాటా పోనూ గరిష్ఠంగా రూ.2 లక్షల వరకు స్త్రీనిధి ద్వారా రుణం అందించనున్నారు.  

పీఎంఎఫ్ఎంఈ స్కీమ్ 

మైక్రో, స్మాల్ ఫుడ్ ప్రాసెసింగ్ యూనిట్ల ఏర్పాటుకు ఆర్థిక సహాయం అందించేందుకు కేంద్రం PMFME పథకం అమలు చేస్తుంది. పారిశ్రామికవేత్తలు తమ ఉత్పత్తులను మెరుగుపరచుకోవడానికి, లెటెస్ట్ టెక్నాలజీ అవలంబించడానికి, మార్కెట్ పరిధిని పెంచుకోవడానికి ఆర్థిక సహాయాన్ని అందిస్తుంది.  

PMFME పథకం అర్హతలు  

• దరఖాస్తుదారుడు భారతదేశ శాశ్వత నివాసి అయి ఉండాలి.
• చిన్న తరహా ఫుడ్ ప్రాసెసింగ్ యూనిట్ కలిగి ఉండాలి. ఇందులో వ్యక్తిగత వ్యాపారాలు, సహకార సంఘాలు, పార్టనర్ షిప్ వ్యాపారాలు ఉండవచ్చు. 

అవసరమైన డాక్యుమెంట్స్ 

• ఆధార్ కార్డు
• ఇ-మెయిల్ ఐడీ
• మొబైల్ నంబర్
• కరెంట్ బిల్లు
• అడ్రస్ రుజువు
• పాన్ కార్డ్ 

ఈ పథకం ప్రతి జిల్లాకు ఒక కీలక ఉత్పత్తిని ప్రోత్సహించడానికి వన్ డిస్ట్రిక్ వన్ ప్రొడెక్ట్ విధానాన్ని అవలంబిస్తుంది. మైక్రో ఫుడ్ ప్రాసెసింగ్ యూనిట్ల సేవలు, మార్కెటింగ్‌ను పెంచుకోవడానికి కేంద్ర ఊతం ఇస్తుంది. పరిశ్రమలలో ఆధునిక యంత్రాలు ఏర్పాటు చేసుకునేందుకు యూనిట్‌కు రూ. 10 లక్షల గరిష్ట పరిమితితో 35% రాయితీతో రుణాలు అందిస్తారు. 

PMFME స్కీమ్ కోసం ఆన్ లైన్ లో ఎలా దరఖాస్తు చేయాలి? 

Step 1: PMFME అధికారిక https://pmfme.mofpi.gov.in/pmfme వెబ్‌సైట్‌పై క్లిక్ చేయండి.  

Step 2: హోమ్ పేజీలోని అప్లికెంట్ లాగిన్‌లో రిజిస్ట్రర్ చేసుకుని లాగిన్ అవ్వండి. 

Step 3: దరఖాస్తు ఫారమ్‌ను నింపండి. దరఖాస్తు ఫారమ్‌లో మీ పేరు , ఇ-మెయిల్ ఐడీ, మొబైల్ నెంబర్, ఇతర వివరాలు నమోదు చేయండి.

Step 4: మీ ఆధార్ కార్డు, పాన్ కార్డు, అడ్రస్ ఫ్రూఫ్ సహా అవసరమైన అన్ని పత్రాలను అప్లోడ్ చేయండి.  

Step 5: అప్లికేషన్ ను సమీక్షించి, సబ్మిట్ చేయండి.  

మరిన్ని చదవండి

డ్వాక్రా మహిళల కుమార్తెల పెళ్లికి రూ.1 లక్ష లోన్! కల్యాణ లక్ష్మి స్కీమ్ దరఖాస్తు విధానం ఇదే!