nellore

Cyclone Musuru Helpline Numbers: ఏపీకి తుపాను ముప్పు.. మనమిత్ర వాట్సాప్ సహా జిల్లాలవారీగా కంట్రోల్ రూమ్ నెంబర్లు

Shankar Dukanam — Mon, 2 Nov 2026 13:09:02 +0530

అమరావతి: మురసు తుపాను ప్రభావంతో నేడు, రేపు దక్షిణ కోస్తా, రాయలసీమ జిల్లాల్లో విస్తారంగా వర్షాలు కురుస్తాయని, కొన్నిచోట్ల భారీ నుంచి అతి భారీ వర్షాలు పడే అవకాశం ఉందని ఎస్డీఎంఏ ఎండీ ప్రఖర్ జైన్ తెలిపారు. ఈ తీవ్ర తుపాను సోమవారం అర్ధరాత్రి నుంచి మంగళవారం తెల్లవారుజాము మధ్య నెల్లూరు-నరసాపురం మధ్య ఒంగోలు సమీపంలో తీరం దాటే అవకాశం ఉందన్నారు. తుపాను అత్యవసర పరిస్థితుల్లో ప్రజలు మనమిత్ర వాట్సప్ నంబర్ 9552300009 ద్వారా సహాయం పొందవచ్చని అధికారులు సూచించారు. అలాగే విపత్తుల నిర్వహణ సంస్థకు చెందిన ఉచిత అత్యవసర నంబర్లు 112, 1070, 18004250101 లను సంప్రదించి సాయం పొందాలని కోరారు.

విద్యుత్‌ శాఖ కంట్రోల్‌ రూం నంబర్లు..

మురుసు తుపాను ప్రభావం ఎక్కువగా ఉన్న కారనంగా పలు జిల్లాల్లో విద్యుత్‌శాఖ కంట్రోల్‌ రూమ్‌ నంబర్లు అందాబుటులోకి తెచ్చింది. సహాయం కోసం టోల్‌ ఫ్రీ నంబర్‌ 1912ను కూడా అందుబాటులో ఉంచింది. అయితే ప్రజలు ముఖ్యంగా వర్షాలు కురిసే సమయంలో నేలకొరిగిన విద్యుత్ స్తంభాలను, తెగిపడిన విద్యుత్ తీగల్ని తాకకుండా ఉండాలని జాగ్రత్తలు సూచించింది.

కంట్రోల్‌ రూమ్‌ నంబర్లు

గుంటూరు- 9440817526
బాపట్ల- 9281413774
కృష్ణా- 6281709355
ఎన్టీఆర్- 9440817561
ప్రకాశం- 9440817491
పల్నాడు- 7661019447

భోగాపురం నుంచి విమాన సర్వీసులు రద్దు

మురసు తుపాను ప్రభావంతో భోగాపురం అంతర్జాతీయ విమానాశ్రయంలో విమానాల రాకపోకలకు అంతరాయం కలుగుతోంది. మురసు తీవ్ర తుపాను దృష్ట్యా అల్లూరి సీతారామరాజు ఇంటర్నేషనల్ ఎయిర్‌పోర్ట్ నుంచి పలు సర్వీసులను తాత్కాలికంగా నిలిపివేసినట్లు అధికారులు, ఎయిర్ లైన్స్ తెలిపాయి. ముందస్తు చర్యగా నేడు భోగాపురం ఎయిర్‌పోర్టు నుంచి హైదరాబాద్, విజయవాడ, తిరుపతికి వెళ్లాల్సిన పలు విమాన సర్వీసులను రద్దు చేశారు. ప్రతికూల వాతావరణం కారణంగా సర్వీసులు రద్దు చేశామని, ప్రయాణికులు ఎయిర్‌లైన్‌ స్టేటస్‌ చెక్‌ చేసుకున్నాకే విమానాశ్రయానికి బయలుదేరాలని అధికారులు సూచించారు.

2 రోజులపాటు వర్షాలు

మురసు తుపాను ప్రభావంతో ఏపీలో దక్షిణ కోస్తాతో పాటు రాయలసీమ ప్రాంతాల్లో 2 రోజులపాటు వర్షాలు కురవనున్నాయి. కృష్ణా, గుంటూరు, బాపట్ల, ప్రకాశం, మార్కాపురం, నెల్లూరు జిల్లాల్లో భారీ వర్షాలు కురుస్తాయని తెలిపారు. అల్లూరి సీతారామరాజు, ఎన్టీఆర్, పల్నాడు, తూర్పు గోదావరి, పశ్చిమ గోదావరి, పోలవరం, కాకినాడ, కోనసీమ, ఏలూరు, తిరుపతి, చిత్తూరు, నంద్యాల, వైఎస్సార్‌ కడప, అన్నమయ్య జిల్లాల్లో పలుచోట్ల భారీ నుంచి అతిభారీ వర్షాలు కురుస్తాయని.. ప్రజలు అప్రమత్తంగా ఉండాలని హెచ్చరించారు.

Cyclone Murasu: 22 కి.మీ వేగంతో దూసుకొస్తున్న మురసు తుపాను.. ఏపీలో ఈ జిల్లాల్లో భారీ నుంచి అతి భారీ వర్షాలు

Shankar Dukanam — Mon, 2 Nov 2026 11:44:44 +0530

Cyclone Murasu Landfall | అమరావతి: పశ్చిమ మధ్య బంగాళాఖాతంలో ఏర్పడిన మురసు తుపాను మరింత బలపడి తీవ్ర తుపానుగా మారి దూసుకోస్తుంది. మురసు తుపాను గత ఆరు గంటల్లో గంటకు 22 కిలోమీటర్ల వేగంతో ప్రయాణించినట్లు భారత వాతావరణ శాఖ తెలిపింది. తుపాను ప్రస్తుతం చెన్నైకి 180 కిలోమీటర్లు, నెల్లూరుకు 160 కి.మీ, మచిలీపట్నానికి 240 కి.మీ, కావలికి 180 కి.మీ, ఒంగోలుకు 210 కిలోమీటర్ల దూరంలో కేంద్రీకృతమై ఉందని వాతావరణశాఖ అధికారులు తెలిపారు.

తుపాను ఎప్పుడు తీరం దాటనుంది

సోమవారం (నవంబర్ 2న) అర్ధరాత్రి నుంచి మంగళవారం తెల్లవారుజాము మధ్య సమయంలో నెల్లూరు- నరసాపురం ప్రాంతాల మధ్య ఒంగోలు సమీపంలో మురసు తుపాను తీరం దాటే అవకాశం ఉందని అంచనా వేశారు. తుపాను తీరం దాటే సమయంలో గంటకు 100 నుంచి 110 కిలోమీటర్ల వేగంతో, గరిష్ఠంగా 120 కిలోమీటర్ల వేగంతో ఈదురు గాలులు వీచే అవకాశం ఉందని తెలిపారు.

వర్షపాత హెచ్చరికలు, సహాయక చర్యలు

మురసు తుపాను తీవ్రత కారణంగా సోమవారం, మంగళవారాల్లో ఏపీతో పాటు తెలంగాణలో భారీ నుండి అత్యంత భారీ వర్షాలు కురుస్తాయని ఏపీ విపత్తుల నిర్వహణ సంస్థ మేనేజింగ్ డైరెక్టర్ ప్రఖర్‌ జైన్‌ తెలిపారు. దక్షిణ కోస్తాతో పాటు రాయలసీమ ప్రాంతాల్లో రెండు రోజులపాటు వర్షాలున్నాయని ప్రజలు అప్రమత్తంగా ఉండాలని సూచించారు. ముఖ్యంగా కృష్ణా, గుంటూరు, బాపట్ల, ప్రకాశం, మార్కాపురం, నెల్లూరు జిల్లాల్లో భారీ వర్షాలు కురిసే అవకాశం ఉందన్నారు.

అల్లూరి సీతారామరాజు, ఎన్టీఆర్, పల్నాడు, తూర్పు గోదావరి, పశ్చిమ గోదావరి, ఏలూరు, తిరుపతి, చిత్తూరు, పోలవరం, కాకినాడ, కోనసీమ, నంద్యాల, వైఎస్సార్‌ కడప, అన్నమయ్య జిల్లాల్లో పలుచోట్ల భారీ నుంచి అతిభారీ వర్షాలు కురవనున్నాయి. ఈ పరిస్థితిని ఎదుర్కొనేందుకు, అత్యవసర సహాయక చర్యల కోసం ముందస్తుగా 6 NDRF, 7 ఎస్డీఆర్‌ఎఫ్‌ (SDRF) బృందాలను సిద్ధంగా ఉంచామని అధికారులు తెలిపారు.

కృష్ణపట్నం పోర్టుకు మూడో ప్రమాద హెచ్చరిక

మురసు తుపాను ప్రభావంతో ఆంధ్రప్రదేశ్‌లోని పలు జిల్లాల్లో ఆదివారం రాత్రి నుంచి వర్షాలు కురుస్తున్నాయని తెలిసిందే. శ్రీకాకుళం, విజయనగరం, పార్వతీపురం మన్యం శ్రీపొట్టి శ్రీరాములు నెల్లూరు, కాకినాడ, డాక్టర్ బీఆర్ అంబేడ్కర్ కోనసీమ, కృష్ణా జిల్లాల్లో విస్తారంగా వర్షాలు కురుస్తున్నాయి. తుపాను తీవ్రతను దృష్టిలో ఉంచుకుని కృష్ణపట్నం పోర్టులో మూడో ప్రమాద హెచ్చరిక జారీ చేశారు.

కాకినాడతో పాటు అమలాపురం, అంబాజీపేట, నరసన్నపేట, తుని, చుట్టుపక్కల ప్రాంతాల్లో సోమవారం ఉదయం నుంచి వర్షాలు కురుస్తున్నాయి. మత్స్యకారులు ఎవరూ సముద్రంలో వేటకు వెళ్లకుండా కఠిన చర్యలు తీసుకోవాలని మంత్రి అచ్చెన్నాయుడు అధికారులను ఆదేశించారు. విద్యుత్, తాగునీరు, ఉచిత వైద్య సేవలకు ఎలాంటి అంతరాయం కలగకుండా ముందుజాగ్రత్త చర్యలు చేపట్టాలని అధికారులను సూచించారు.

Cyclone Arnab Helpline Numbers: అర్నబ్ తుపాను బీభత్సం.. జిల్లాల వారీగా కంట్రోల్ రూమ్ నంబర్లు ఇవే

Shankar Dukanam — Tue, 27 Oct 2026 11:40:48 +0530

Arnab Cyclone Helpline Numbers | అమరావతి: అర్నాబ్ తీవ్ర తుపాను ప్రభావం చూపుతున్న క్రమంలో ఆంధ్రప్రదేశ్ ప్రభుత్వం ముందస్తు భద్రతా చర్యలను ముమ్మరం చేసింది. తుపాను ప్రభావిత ప్రాంతాల్లోని ప్రజలకు అత్యవసర సహాయం, సమాచారం అందించేందుకు హెల్ప్‌లైన్ నంబర్లను, కంట్రోల్ రూములను అందుబాటులోకి తీసుకొచ్చారు. ప్రజలు ఏ విధమైన ఆపదలో ఉన్నా వెంటనే ఈ నంబర్లను సంప్రదించాలని ఏపీ విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ సూచించారు. రాష్ట్ర స్థాయి అత్యవసర సహాయం కోసం పౌరులు 112, 1070 లేదా ఉచిత టోల్ ఫ్రీ నంబర్ 1800 425 0101 నంబర్లను సంప్రదించవచ్చు అని తెలిపారు. 9552300009 అనే వాట్సాప్ నంబర్‌కు సందేశం పంపి మన మిత్ర వాట్సాప్ గవర్నెన్స్ ద్వారా సాయం పొందవచ్చునని సూచించారు.

అర్నబ్ తుపానుపై కంట్రోల్ రూమ్ ఫోన్ నంబర్ల వివరాలు

1. శ్రీకాకుళం : 08942240557

2. విజయనగరం: 8922236947

3. పార్వతీపురం మన్యం : 08963450347

4. అల్లూరి సీతారామరాజు : 8935293448

5. విశాఖపట్నం: 0891-2590102 / 0891-2590100

6. అనకాపల్లి : 08924-222888 / 08924-226599 / 08924-225999

7. కాకినాడ: 0884-2356801 / 9849903879

8. కోనసీమ : 8856293104

9. తూర్పు గోదావరి : 8832944455

10. పశ్చిమ గోదావరి : 08816-299181

11. ఏలూరు: 18002331077 / 9494041419

12. పోలవరం : 18004254225

13. తిరుపతి : 0877 2236007

14. మార్కాపురం : 9248702500

15. కృష్ణా: 08672 252399

16. ఎన్టీఆర్ : 9154970454

17. గుంటూరు : 0863-2234014

18. బాపట్ల: 08643-220226

19. ప్రకాశం : 08592 295600 / 18004250277

20. నెల్లూరు : 7995576699

పశ్చిమమధ్య బంగాళాఖాతంలో అర్నబ్ తుపాన్ గడిచిన 6 గంటల్లో గంటకు 22 కిమీ వేగంతో కదిలిన అతి తీవ్ర తుపాన్ ప్రస్తుతానికి విశాఖపట్నంకు 260కి.మీ., కాకినాడకు 300 కి.మీ., మచిలీపట్నంకు 390 కి.మీ., బాపట్లకు 460 కి.మీ దూరంలో కేంద్రీకృతం https://t.co/fHsUwiv1SC
— Andhra Pradesh State Disaster Management Authority (@APSDMA) October 27, 2026

అర్నబ్‌తో అల్లకల్లోలం.. కోట్టుకుపోయిన ఉప్పాడ రోడ్డు

తీరానికి చేరువ కాకుముందే ఆర్నబ్ తుపాన్ అల్లాడించేస్తోంది. కోనసీమ జిల్లాలో తుపాను ప్రభావం తీవ్రంగా ఉంది. ఎప్పుడు తుపానులు వచ్చినా దెబ్బతినే ఉప్పాడ ప్రాంతంలో సముద్రం అల్లకల్లోలంగా ఉంటుందని తెలిసిందే. అలల ఉధృతి తీవ్రంగా ఉండటంతో కాకినాడ రూరల్ వాకలపూడి నుంచి ఉప్పాడ వెళ్లే రోడ్డు మొత్తం పగుళ్లు రావడంతో పాటు కెరటాలతో గండి పడింది. తీరంలో ఉన్న మత్స్యకార గ్రామంలోకి సముద్రపు నీరు వచ్చేయడంతో.. తుఫాన్ ప్రభావంతో కోనసీమలో వాతావరణం పూర్తిగా మారిపోయింది. పలు చోట్ల చిరుజల్లులు కురుస్తున్నాయి.

Also Read: జగన్ తీరుతో రాష్ట్రంతో పాటు ఫ్యామిలీలోనూ అన్ని ఇబ్బందులే.. కూటమితో హింస లేదు: సీఎం చంద్రబాబు

అల్లవరం నుంచి అంతర్వేది వరకు కోనసీమ జిల్లాలో తీరంలో కెరటాలు ఎగిసిపడుతున్నాయి. ఇప్పటికే అధికారులు 67 తీర ప్రాంత గ్రామాల ప్రజలను సురక్షిత ప్రాంతాలకు తరలించారు. కోనసీమ జిల్లా సరిహద్దులోని యానాం వద్ద తుఫాన్ తీరం దాటే అవకాశం ఉండటంతో కోనసీమ మొత్తం అప్రమత్తంగా ఉంది.అమలాపురంలో NDRF,కొత్తపేట లో SDRF బృందాలను ప్రభుత్వం సిద్ధంగా ఉంచింది. మరో రెండు వారాల్లో ఖరీఫ్ వరి పంట కోతకు వచ్చే దశలో ఉంది. ఈ పరిస్థితుల్లో తుపాను రావడంతో చేతికి వచ్చిన వరి పంట ఏమవుతుందో అని రైతుల్లో ఆందోళన వ్యక్తమవుతోంది.

Cyclone Arnab Live Updates: కాకినాడ సమీపంలో సముద్రంలో కొట్టుకుపోయిన కార్గో నౌక

Shankar Dukanam — Tue, 27 Oct 2026 10:30:18 +0530

అర్నాబ్ తుపాను ముప్పును ఎదుర్కొనేందుకు ఆంధ్రప్రదేశ్ ప్రభుత్వం చేపడుతున్న సన్నద్ధత, ముందస్తు చర్యలపై అమరావతిలో సీఎం నారా చంద్రబాబు నాయుడికి అధికారులు సమగ్ర వివరణ ఇచ్చారు. తుపాను ప్రభావిత ప్రాంతాల్లో అత్యవసర సహాయక చర్యల కోసం ఇప్పటికే 11 జిల్లాలకు ఎన్డీఆర్‌ఎఫ్ (NDRF), ఎస్డీఆర్‌ఎఫ్ (SDRF) బృందాలను తరలించినట్లు తెలియజేశారు. ప్రమాదకరమైన లోతట్టు ప్రాంతాల్లో ఉన్న ప్రజలను గుర్తించి, వారిని సురక్షిత ప్రాంతాలు మరియు పునరావాస కేంద్రాలకు తరలిస్తున్నట్లు వెల్లడించారు.

తుపాను తీవ్రతను దృష్టిలో ఉంచుకుని ప్రభావిత జిల్లాల్లోని అన్ని విద్యాసంస్థలకు ప్రభుత్వం సెలవులు ప్రకటించింది. క్షేత్రస్థాయిలో పరిస్థితిని నిరంతరం పర్యవేక్షించేందుకు, ప్రజలకు తక్షణ సాయం అందించేందుకు జిల్లా, మండల స్థాయిలలో మొత్తం 2,907 కంట్రోల్ రూములను ఏర్పాటు చేసినట్లు అధికారులు సీఎం చంద్రబాబుకు వివరించారు.

మంగళవారం (27-10-2026) కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు జిల్లాల్లో అక్కడక్కడ అత్యంత భారీ వర్షాలు ; శ్రీకాకుళం,మన్యం, విజయనగరం, విశాఖ, అల్లూరి, పోలవరం, అనకాపల్లి, ఎన్టీఆర్, కృష్ణా, గుంటూరు, బాపట్ల జిల్లాల్లో పలుచోట్ల భారీ నుంచి అతిభారీ వర్షాలు ; పల్నాడు, ప్రకాశం, మార్కాపురం,నెల్లూరు జిల్లాల్లో భారీ వర్షాలు కురిసే అవకాశం ఉందని వెల్లడించారు.

బుధవారం (28-10-2026) :
విశాఖపట్నం, అనకాపల్లి, అల్లూరి, పోలవరం, కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు, ఎన్టీఆర్, కృష్ణా జిల్లాల్లో అక్కడక్కడ అత్యంత భారీ వర్షాలు ; శ్రీకాకుళం, పార్వతీపురం మన్యం, విజయనగరం, బాపట్ల జిల్లాల్లో కొన్నిచోట్ల భారీ నుంచి అతిభారీ వర్షాలు ; పల్నాడు, ప్రకాశం, మార్కాపురం, నెల్లూరు జిల్లాల్లో భారీ వర్షాలు కురిసే అవకాశం ఉందని వివరించారు.

AP Rains Alert: ముంచుకొస్తున్నఅర్ణబ్‌ తుపాను.. ఏపీలో పలు జిల్లాల్లో 2 రోజులపాటు భారీ వర్షాలు

Shankar Dukanam — Sat, 24 Oct 2026 09:22:33 +0530

Andhra Pradesh Weather Updates | అమరావతి: తూర్పు మధ్య, ఆగ్నేయ బంగాళాఖాతంలో అల్పపీడనం ఏర్పడినట్లు ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA) మేనేజింగ్ డైరెక్టర్ ప్రఖర్ జైన్ తెలిపారు. ఈ అల్పపీడనం శనివారం నాటికి అదే ప్రాంతంలో వాయుగుండంగా రూపాంతరం చెంది, ఆదివారం తీవ్ర వాయుగుండంగా మారుతుందని అంచనా వేశారు. మరో రెండు రోజుల్లో మరింత తీవ్రరూపం దాల్చి కోస్తాంధ్ర తీరం వైపు పయనించే సూచనలు ఉన్నాయని ప్రఖర్ జైన్ వివరించారు. సోమవారం ఉదయానికి పశ్చిమమధ్య బంగాళాఖాతంలో ఇది పూర్తిస్థాయి అర్ణబ్‌ తుపానుగా బలపడి, ఆ తర్వాత రెండు రోజుల్లో ఉత్తరాంధ్ర, దక్షిణ ఒడిశా తీరాల వైపు కదిలే అవకాశం ఉందని వాతావరణ శాఖ అధికారులు అంచనా వేశారు.

ఈ అర్ణబ్‌ తుపాను ప్రభావంతో ఆంధ్రప్రదేశ్ వ్యాప్తంగా పలు జిల్లాల్లో విస్తారంగా వర్షాలు కురిసే అవకాశం ఉందని విపత్తుల నిర్వహణ సంస్థ తీవ్ర హెచ్చరికలు జారీ చేసింది. దీని ప్రభావంతో ఉత్తరాంధ్రలో అతి భారీ వర్షాలు, కోస్తా, రాయలసీమ జిల్లాల్లో భారీ వర్షాలు కురుస్తాయని వాతావరణశాఖ తెలిపింది. నేడు, రేపు రాష్ట్రవ్యాప్తంగా అక్కడక్కడ పిడుగులతో కూడిన తేలికపాటి నుండి మోస్తరు వర్షాలు పడతాయని తెలిపారు. సోమవారం నుంచి తుపాను ప్రభావం తీవ్రమై రాష్ట్రవ్యాప్తంగా వర్షాలు మరింత విస్తరిస్తాయని, పలు ప్రాంతాల్లో భారీ నుండి అత్యంత భారీ వర్షాలు నమోదయ్యే అవకాశం ఉందని పేర్కొన్నారు.

బంగాళాఖాతంలోని అల్పపీడనం సోమవారం నాటికి పశ్చిమమధ్య బంగాళాఖాతంలో తుపానుగా మారే అవకాశం ఉందని #APSDMA ఎండీ ప్రఖర్ జైన్ పేర్కొన్నారు. దీని ప్రభావంతో రాష్ట్రంలో రేపు, ఎల్లుండి పలు జిల్లాల్లో తేలికపాటి నుంచి మోస్తరు వర్షాలు ; కోస్తాంధ్రలో సోమవారం అక్కడక్కడ మోస్తరు వర్షాలు, https://t.co/X8GiBiUqQF
— Andhra Pradesh State Disaster Management Authority (@APSDMA) October 23, 2026

ముఖ్యంగా శుక్రవారం నాడు పార్వతీపురం మన్యం, అల్లూరి సీతారామరాజు, కాకినాడ, ఏలూరు, గుంటూరు, మార్కాపురం, ప్రకాశం, నెల్లూరు జిల్లాలతో పాటు రాయలసీమ ప్రాంతాల్లో పిడుగులతో కూడిన మోస్తరు వర్షాలు కురిశాయని తెలిపారు. అలాగే నెల్లూరు, తిరుపతి, ప్రకాశం జిల్లాల్లో అక్కడక్కడ పిడుగులతో కూడిన మోస్తరు వర్షాలు పడతాయని ప్రజలు అప్రమత్తంగా ఉండాలని సూచించారు. ఏలూరు, కృష్ణా, చిత్తూరు, వైఎస్సార్ కడప, అన్నమయ్య, శ్రీసత్యసాయి జిల్లాల్లో కూడా పలుచోట్ల తేలికపాటి నుండి మోస్తరు వర్షాలు కురుస్తాయని, మిగిలిన జిల్లాల్లో చెదురుమదురు వర్షాలు పడే అవకాశం ఉందన్నారు.

వాతావరణంలో సంభవిస్తున్న ఈ మార్పులు, రాబోయే తీవ్ర తుపాను ముప్పు దృష్ట్యా ప్రజలు, ముఖ్యంగా రైతులు తగిన ముందస్తు జాగ్రత్త చర్యలు తీసుకోవాలని విపత్తుల నిర్వహణ సంస్థ సూచించింది. సముద్రంలో అలల తాకిడి, ఈదురు గాలుల ఉధృతి తీవ్రంగా ఉండే ప్రమాదం ఉన్నందున, వేటకు వెళ్లిన మత్స్యకారులు ఏమాత్రం ఆలస్యం చేయకుండా వెంటనే సురక్షితంగా తీరానికి తిరిగి రావాలని ప్రఖర్ జైన్ సూచించారు.

AP Local Body Elections: పట్టణ స్థానిక పోరులో కూటమి హవా- జగన్, పెద్దిరెడ్డి కంచుకోటల్లో 6 సహా 12 చైర్మన్లు ఏకగ్రీవం!

Shankar Dukanam — Tue, 20 Oct 2026 12:25:47 +0530

అమరావతి: ఆంధ్రప్రదేశ్‌లో జరగనున్న పట్టణ స్థానిక సంస్థల ఎన్నికల్లో పోలింగ్‌కు ముందే అధికార కూటమి పార్టీల హవా కొనసాగుతోంది. వైసీపీ అభ్యర్థులు నామినేషన్లు దాఖలు చేయకపోవడంతో మున్సిపాలిటీలు, నగర పంచాయతీల చైర్మన్లు ఏకగ్రీవాలు అవుతున్నాయి.

ఏపీలో దాదాపు 14 పట్టణ స్థానిక సంస్థల్లో వైసీపీ ఛైర్‌పర్సన్‌ అభ్యర్థులు పోటీలో లేరు. కొన్నిచోట్ల నామినేషన్లు తిరస్కరణకు గురవ్వడం, మరికొన్ని చోట్ల నామినేషన్లే వేయకపోవడంతో ఏకంగా 12 పురపాలక స్థానాల్లో కూటమి (టీడీపీ, జనసేన, బీజేపీ) అభ్యర్థులు మాత్రమే బరిలో ఉన్నారు. దాంతో 12 స్థానాల్లో కూటమి విజయం కన్ఫామ్ అయింది. ఈ 12 స్థానాల్లో మాజీ సీఎం, వైసీపీ అధినేత వైఎస్‌ జగన్‌మోహన్‌రెడ్డి, మాజీ మంత్రి పెద్దిరెడ్డి రామచంద్రారెడ్డిల కంచుకోటలైన నియోజకవర్గాల్లోనే 6 మున్సిపాలిటీలు, నగర పంచాయతీలు ఉన్నాయి.

ప్రస్తుత సమాచారం ప్రకారం ఏకగ్రీవం కానున్న ఛైర్‌పర్సన్‌ స్థానాలు

టీడీపీ: దాచేపల్లి, గురజాల, పిడుగురాళ్ల (పల్నాడు జిల్లా), రాజంపేట, బద్వేలు, కమలాపురం (వైఎస్సార్‌ కడప జిల్లా), రాయచోటి, పుంగనూరు (అన్నమయ్య జిల్లా), నగరి (చిత్తూరు), గుత్తి (అనంతపురం జిల్లా).

జనసేన: దర్శి (ప్రకాశం జిల్లా)

బీజేపీ: ఎర్రగుంట్ల (కడప)

వైఎస్సార్‌ కడప జిల్లాలోని 9 పట్టణ స్థానిక సంస్థల విషయానికి వస్తే.. మైదుకూరులో ఎన్నిక వాయిదా పడింది. కడప కార్పొరేషన్, పులివెందుల, జమ్మలమడుగుల్లో మాత్రమే వైసీపీ అభ్యర్థులు పోటీలో ఉన్నారు. అందులోనూ జమ్మలమడుగులో వైసీపీ ప్రకటించిన ఎమ్మెల్సీ రామసుబ్బారెడ్డి సతీమణి ఇందిర నామినేషన్‌ వేయలేకపోయారు. డమ్మీ అభ్యర్థిగా మాజీ మంత్రి శివారెడ్డి కుమార్తె హైమావతినే పార్టీ తరఫున ఛైర్‌పర్సన్‌గా బరిలో నిలవనున్నారు. రాజంపేట మున్సిపాలిటీలో ఒరిజినల్‌ డాక్యుమెంట్లకు బదులు జిరాక్స్‌ కాపీలు ఇవ్వడం, నో డ్యూ సర్టిఫికెట్లు జతచేయకపోవడంతో వైసీపీ అభ్యర్థుల నామినేషన్లు తిరస్కరణకు గురయ్యాయి. దీంతో అక్కడ టీడీపీ అభ్యర్థి దొంతం గాయత్రి ఏకగ్రీవంగా నెగ్గనున్నారు.

ప్రొద్దుటూరు, బద్వేలు మున్సిపాలిటీల్లోనూ నామినేషన్ల లోపాల వల్ల వైసీపీ అభ్యర్థులు అనర్హులయ్యారు. బద్వేలులో టీడీపీ అభ్యర్థి దివ్యతేజ ఏకగీవ్రం కానున్నారు. ఎర్రగుంట్లలో వైసీపీ పోటీచేయకపోవడం, జనసేన అభ్యర్థి విత్ డ్రా చేసుకోవడంతో బీజేపీ అభ్యర్థి గెలుపు ఖాయమైంది. కమలాపురంలోనూ టీడీపీ అభ్యర్థి మాత్రమే నామినేషన్ వేశారు. వైఎస్ జగన్ సొంత నియోజకవర్గమైన పులివెందులలోని 40 వార్డుల్లో వైసీపీ 15 స్థానాల్లో నామినేషన్లు వేయలేకపోయింది. ఇక అన్నమయ్య జిల్లాలోని రాయచోటి, పుంగనూరులలో వైసీపీ నుంచి నామినేషన్ కూడా పడలేదు.

పల్నాడు జిల్లా గురజాల నియోజకవర్గంలోని 3 స్థానాలనూ కూటమి ఏకగ్రీవంగా కైవసం చేసుకోనుంది. దాచేపల్లిలో డిపాజిట్ రసీదు లేకపోవడం, పిడుగురాళ్లలో నిర్దేశిత టైమ్ మించిపోవడం వల్ల వైసీపీ అభ్యర్థుల నామినేషన్లు తిరస్కరణకు గురయ్యాయి. గురజాలలో వైసీపీ అభ్యర్థులు నామినేషన్ వేయకుండానే వెనుతిరిగారు. అనంతపురం జిల్లా గుత్తి మున్సిపాలిటీలో వైసీపీ అభ్యర్థి నామినేషన్ వేయకపోవడంతో టీడీపీ గెలుపు ఏకగ్రీవమైంది.

ప్రకాశం జిల్లా దర్శి మున్సిపాలిటీలో వైసీపీ పోటీ లేకపోవడంతో జనసేన అభ్యర్థి గెలుపొందనున్నారు. కనిగిరిలో వైసీపీ నామినేషన్ రిజెక్ట్ కావడంతో టీడీపీ, కాంగ్రెస్ ల మధ్య పోటీ మిగిలింది. చిత్తూరు జిల్లా నగరిలోనూ స్వీయ ధ్రువీకరణ లోపాల వల్ల వైసీపీ అభ్యర్థుల నామినేషన్లు చెల్లకుండా పోయాయి. దాంతో టీడీపీ చైర్మన్ అభ్యర్థి ఏకగ్రీవం కానున్నారు. తిరుపతిలో 15 డివిజన్లు, పలమనేరులో 6 వార్డుల్లో వైసీపీ నామినేషన్లు వేయకపోవడంతో పోటీకి దూరమైంది.

AP Local Body Elections: పట్టణ స్థానిక ఎన్నికల్లో వైసీపీకి ఎదురుదెబ్బ.. 8 స్థానాల్లో ఛైర్‌పర్సన్లు ఏకగ్రీవం

Shankar Dukanam — Mon, 19 Oct 2026 08:14:40 +0530

AP Municipal Elections 2026 | అమరావతి: ఆంధ్రప్రదేశ్‌లో పురపాలక ఎన్నికల ప్రక్రియలో భాగంగా నామినేషన్ల దాఖలు గడువు ముగియగా నేడు (అక్టోబర్ 19) నామినేషన్ల పరిశీలన జరుగుతుంది. 6 మున్సిపాలిటీలు, 2 నగర పంచాయతీలలో అధికార కూటమి (టీడీపీ- జనసేన- బీజేపీ) అభ్యర్థులు ఏకగ్రీవమయ్యే అవకాశాలు కనిపిస్తున్నాయి. ఆ 8 స్థానాల్లో ముఖ్యంగా 6 మున్సిపాలిటీల్లో వైసీపీ నుంచి నామినేషన్లు రాలేదు. మరో 2 చోట్ల వైసీపీ డమ్మీ అభ్యర్థుల నామినేషన్లు వచ్చాయని తెలుస్తోంది. ఈ ఎన్నికల్లో నామినేషన్ల ఉపసంహరణకు ఈ నెల 21వ తేదీ వరకు గడువు ఇచ్చారు. అనంతరం ఈ నెల 28న మున్సిపల్ ఎన్నికల పోలింగ్, అక్టోబర్ 30న ఓట్ల లెక్కింపు, ఫలితాల వెల్లడి జరగనున్నాయి.

పోటీ లేకుండానే కూటమికి ఛైర్ పర్సన్ పదవులు

ఈ మున్సిపల్ ఎన్నికల్లో వైసీపీ అభ్యర్థులు నామినేషన్లు దాఖలుచేయని దర్శి, పిడుగురాళ్ల, మైదుకూరు, ఎర్రగుంట్ల, రాయచోటి, పుంగనూరు పురపాలక సంఘాలతో పాటు గురజాల, కమలాపురం నగర పంచాయతీల్లో ఛైర్‌పర్సన్‌ స్థానాలు కూటమికి ఏకగ్రీవం కానున్నాయి. మరోవైపు కడప జిల్లా జమ్మలమడుగు, అనంతపురం జిల్లా గుత్తిలో వైసీపీ ప్రకటించిన అభ్యర్థులు కాకుండా డమ్మీ అభ్యర్థులు నామినేషన్లు వేశారు. అక్కడ సైతం వారు నామినేషన్ ఉపసంహరించుకుంటే ఏకగ్రీవం అయ్యే ఛాన్స్ ఉంది.

మూడు రోజులపాటు జరిగిన నామినేషన్ ప్రక్రియలో భాగంగా మున్సిపాలిటీలు, కార్పొరేషన్లకు కలిపి మేయర్, ఛైర్‌పర్సన్ పదవులకు 1,338 నామినేషన్లు దాఖలయ్యాయి. అలాగే రాష్ట్రవ్యాప్తంగా కార్పొరేషన్లు, మున్సిపాలిటీలు, నగర పంచాయతీల వార్డు/ డివిజన్ స్థానాలకు మొత్తం 24,451 నామినేషన్లు సమర్పించారు. ఈ మున్సిపాలిటీ ఎన్నికల్లో వైసీపీకి ఎదురుదెబ్బ తగిలింది. పలు మున్సిపాలిటీల్లో అభ్యర్థులు లభించక లేదా నామినేషన్లు వేయలేక పోటీకి దూరంగా కావాల్సిన పరిస్థితి ఏర్పడింది.

ముఖ్యంగా ప్రకాశం జిల్లా దర్శి, పల్నాడు జిల్లా పిడుగురాళ్ల మున్సిపాలిటీలు, గురజాల నగర పంచాయతీలో వైసీపీ తరఫున ఒక్క నామినేషన్ కూడా దాఖలు కాలేదు. కడప జిల్లాలోని ఎర్రగుంట్ల, మైదుకూరు మున్సిపాలిటీలు, కమలాపురం నగర పంచాయతీతో పాటు అన్నమయ్య జిల్లా రాయచోటి, పుంగనూరు మున్సిపాలిటీల్లోనూ వైసీపీ నుంచి నామినేషన్లు రాలేదు.

కొన్ని చోట్ల వైసీపీ డమ్మీ అభ్యర్థులు

మరోవైపు జమ్మలమడుగు, గుత్తి వంటి ప్రాంతాల్లో వైసీపీ ప్రటించిన అభ్యర్థుల స్థానంలో డమ్మీ అభ్యర్థులు నామినేషన్లు వేశారు. ఒకవేళ ఆ డమ్మీ అభ్యర్థులు నామినేషన్లను ఉపసంహరించుకుంటే, అక్కడ కూడా చైర్ పర్సన్ స్థానాలు ఏకగ్రీవం అయ్యే అవకాశం ఉంది. సుమారు 388కి పైగా వార్డుల్లో వైసీపీ అభ్యర్థుల నామినేషన్లే పడలేదు. ఎన్నికల కమిషన్ నామినేషన్ల పరిశీలన, ఉపసంహరణ గడువు ముగిస్తే అభ్యర్థుల జాబితా, నామినేషన్లు లేని వార్డుల సంఖ్యపై క్లారిటీ వస్తుంది. కూటమి పార్టీలు మాత్రం ఘన విజయం సాధిస్తామని ధీమాగా ఉన్నాయి. అయితే తమకు అభ్యర్థులను ఖరారు చేసే టైం ఇవ్వకుండా కూటమి ప్లాన్ ప్రకారం రిజర్వేషన్లు ప్రకటించి, ఎన్నికల నామినేషన్ల ప్రక్రియ పూర్తి చేసిందని వైసీపీ అధినేత, మాజీ సీఎం జగన్ మోహన్ రెడ్డి ఆరోపించారు. ఏపీ ఎస్ఈసీ అనిల్ చంద్ర పునేఠా సీఎం చంద్రబాబు వీరవిధేయుడని, కూటమి పార్టీలకు అనూకూలంగా ఎన్నికల ప్రక్రియ మొదలుపెట్టారని వ్యాఖ్యానించారు.

BJP Candidates List: ఏపీలో పట్టణ స్థానిక సంస్థల ఎన్నికలు.. బీజేపీ అభ్యర్థుల తొలి జాబితా విడుదల

Shankar Dukanam — Sun, 18 Oct 2026 05:45:41 +0530

BJP Candidates List | అమరావతి: ఆంధ్రప్రదేశ్ పట్టణ స్థానిక సంస్థల ఎన్నికలకు సంబంధించి కూటమి పార్టీలు వరుసగా అభ్యర్థుల జాబితాలు విడుదల చేస్తున్నాయి. ఇదివరకే టీడీపీ అభ్యర్థుల రెండు జాబితాలు విడుదల చేయగా, జనసేన పార్టీ సైతం కొందరు అభ్యర్థుల జాబితా ప్రకటించింది. తాజాగా శనివారం రాత్రి భారతీయ జనతా పార్టీ (BJP) తమ అభ్యర్థుల తొలి జాబితాను విడుదల చేసింది. కొన్ని రోజులపాటు కూటమి భాగస్వామ్య పక్షాల నేతల మధ్య జరిగిన సుదీర్ఘ చర్చలతో పోటీ చేసే స్థానాలపై స్పష్టత వచ్చింది. కూటమి పొత్తులో భాగంగా బీజేపీ రాష్ట్రంలో 2 మున్సిపల్ కార్పొరేషన్లు, 7 మున్సిపాలిటీలలో బరిలోకి దిగుతోంది. ఈ మేరకు పార్టీ రాష్ట్ర అధ్యక్షుడు పీవీఎన్‌ మాధవ్‌ ఒక ప్రకటన ద్వారా అభ్యర్థుల వివరాలు వెల్లడించారు.

తాజాగా విడుదల చేసిన జాబితాలో అనంతపురం మేయర్ స్థానంతో పాటు 5 మున్సిపాలిటీల ఛైర్‌పర్సన్ స్థానాలకు అభ్యర్థులను ప్రకటించారు. అనంతపురం మున్సిపల్ కార్పొరేషన్‌ మేయర్ అభ్యర్థిగా కోట్ల అజేశ్‌ బాబు పేరును ప్రకటించారు. భారతీయ జనతా యువ మోర్చా (BJYM) ఆంధ్రప్రదేశ్ రాష్ట్ర ప్రధాన కార్యదర్శిగా కోట్ల అజేశ్ బాబు బాధ్యతలు నిర్వహిస్తున్నారు ఇక మున్సిపాలిటీలు, నగరపాలక సంస్థల చైర్మన్ స్థానాల విషయానికొస్తే.. యలమంచిలి ఛైర్‌పర్సన్‌గా పిల్ల రామా కుమారి, గూడూరు (కే) స్థానానికి దమమ్‌ సునీతా బాయి, గిద్దలూరుకు డాక్టర్ జాడి వెంకట నారాయణ, నెల్లిమర్లకు మైపాడ ప్రసాద్‌, ఎర్రగుంట్ల మున్సిపాలిటీ నుంచి బీజేపీ తరఫున గోర్ల మధులత పోటీ చేయనున్నారు.

మున్సిపల్ కార్పొరేషన్‌

అనంతపురం (మేయర్‌) - కోట్ల అజేశ్‌ బాబు

మున్సిపాలిటీలు, నగర పాలక సంస్థలు

- యలమంచిలి - పిల్ల రామా కుమారి
- గూడూరు (కే) - దమమ్‌ సునీతా బాయి
- నెల్లిమర్ల - మైపాడ ప్రసాద్‌
- గిద్దలూరు - డా.జాడి వెంకట నారాయణ
- ఎర్రగుంట్ల - గోర్ల మధులత

మిగిలిన బీజేపీ స్థానాలైన రాజమహేంద్రవరం మున్సిపల్ కార్పొరేషన్ (మేయర్)తో పాటు బాపట్ల, కావలి మున్సిపాలిటీలకు సంబంధించిన అభ్యర్థుల ఎంపికపై ఇంకా నిర్ణయం తీసుకోలేదు. మిగతా మేయర్, చైర్మన్ అభ్యర్థుల ఎంపిక ప్రక్రియ కొనసాగుతోంది. సాధ్యమైనంత త్వరగా ఆ స్థానాలకు సంబంధించిన జాబితాను కూడా విడుదల చేస్తామని బీజేపీ నేతలు తెలిపారు. మరోవైపు నామినేషన్ల ప్రక్రియ అక్టోబర్ 16న ప్రారంభం కాగా, ఆదివారం (అక్టోబర్ 18) నాడు అభ్యర్థుల దరఖాస్తుకు తుది గడువు ముగియనుందని తెలిసిందే.

అక్టోబర్ 19న నామపత్రాల పరిశీలన చేస్తారు. ఈ 21న అభ్యర్థిత్వాల ఉపసంహరణకు అవకాశం కల్పించారు. అదేరోజు పోటీలో నిలిచిన అభ్యర్థుల తుది జాబితాను అధికారులు ప్రకటిస్తారు. అక్టోబర్ 28న పోలింగ్ నిర్వహిస్తారు. ఎక్కడైనా రీపోలింగ్, లేక అవసరమైన చోట ఈ 29న పోలింగ్‌ జరుగుతుంది. అక్టోబర్ 30న ఓట్ల లెక్కింపు చేపట్టి, అదేరోజు విజేతల వివరాలు ప్రకటించారు.

AP Local Body Elections: ఎంపీ అవినాష్ రెడ్డికి నోటీసులు.. పలువురు వైసీపీ నేతలపై కేసులు.. కఠిన చర్యలు తప్పవన్న ఎస్ఈసీ

Shankar Dukanam — Sat, 17 Oct 2026 13:01:16 +0530

AP Local Body Elections | అమరావతి: ఆంధ్రప్రదేశ్‌లో స్థానిక సంస్థల ఎన్నికల నామినేషన్ల ప్రక్రియ తొలిరోజు సందర్భంగా పలుచోట్ల ఉద్రిక్తతలు చోటుచేసుకున్నాయి. దాంతో పోలీసులు అప్రమత్తమై పలు ప్రాంతాల్లో 144 సెక్షన్ విధించారు. ముఖ్యంగా అన్నమయ్య జిల్లా పుంగనూరు నామినేషన్ సెంటర్ వద్ద చోటుచేసుకున్న ఘర్షణలకు సంబంధించి వైఎస్సార్సీపీ ఎంపీ మిథున్ రెడ్డితో పాటు పలువురిపై కేసులు నమోదయ్యాయి. ఈ గొడవలకు సంబంధించిన వీడియో దృశ్యాలను విశ్లేషించిన పోలీసులు దాదాపు 70 మందిని గుర్తించారు. ఈ ఘటనలపై మొత్తం మూడు కేసులు నమోదు చేసి, గొడవల్లో పాల్గొన్న వారి ఆచూకీ కోసం ప్రత్యేక పోలీసు బృందాలను రంగంలోకి దించారు. ఈ పరిస్థితుల్లో ఎలాంటి అవాంఛనీయ సంఘటనలు జరగకుండా పుంగనూరులో భారీగా పోలీసు బలగాలను మోహరించారు.

శాంతిభద్రతలకు విఘాతం కలిగిస్తే తీవ్ర చర్యలు: ఏపీ ఎస్‌ఈసీ

ఏపీలో స్థానిక సంస్థల ఎన్నికల వేళ శాంతిభద్రతలపై వచ్చిన ఫిర్యాదులపై వెంటనే స్పందించి పరిస్థితులను అదుపులోకి తెచ్చామని ఎస్‌ఈసీ అనిల్‌ చంద్ర పునేఠ తెలిపారు. విజయవాడ మీడియా సమావేశంలో మాట్లాడుతూ.. హింసాత్మక ఘటనలకు పాల్పడితే తీవ్ర చర్యలు ఉంటాయని, అవసరమైతే అదనపు బలగాలను రప్పిస్తామని హెచ్చరించారు. నామినేషన్ల సమయంలో అభ్యర్థితో పాటు ముగ్గురికి మాత్రమే అనుమతి ఉంటుందన్నారు. ప్రతి సెంటర్‌లో సీసీ కెమెరాలు ఏర్పాటు చేశామని ఎస్‌ఈసీ తెలిపారు. అధికారుల నిర్లక్ష్యం ఉంటే బదిలీ లేదా సస్పెన్షన్ తప్పదని స్పష్టం చేశారు.

పిన్నెల్లి రామకృష్ణారెడ్డి పోలీసులు గృహనిర్బంధం

మరోవైపు పల్నాడు జిల్లా మాచర్లలో ముందస్తు జాగ్రత్త చర్యగా వైఎస్సార్సీపీ మాజీ ఎమ్మెల్యే పిన్నెల్లి రామకృష్ణారెడ్డిని పోలీసులు గృహనిర్బంధం చేశారు. స్థానిక ఎన్నికల్లో శాంతిభద్రతలకు విఘాతం కలగకుండా ఉండటానికి మాచర్ల పోలీసులు పిన్నెల్లికి ముందస్తు నోటీసులు జారీ చేశారు.

ఎంపీ అవినాష్ రెడ్డికి పోలీసుల నోటీసులు

అలాగే వైఎస్సార్ జిల్లా పులివెందులలో కూడా పోలీసులు భద్రత కట్టుదిట్టం చేశారు. చేశారు. కడప ఎంపీ అవినాష్ రెడ్డికి పులివెందుల సీఐ పురుషోత్తం ముందస్తు నోటీసులు అందజేశారు. ప్రస్తుతం 144 సెక్షన్ అమలులో ఉన్నందున ఎలాంటి ర్యాలీలు, ధర్నాలు లేదా సభలు నిర్వహించకూడదని పోలీసులు ఆ నోటీసుల్లో స్పష్టం చేశారు. ఎంపీ అవినాష్ రెడ్డితో పాటు వైసీపీ కీలక నేతలు రవీంద్రనాథ్ రెడ్డి, అంజాద్ బాషాలకు కూడా పోలీసులు ఈ నోటీసులు ఇచ్చారు. ఎన్నికల వేళ శాంతిభద్రతలకు భంగం కలిగించేలా అల్లర్లు, గొడవలకు పాల్పడవద్దని నేతలకు పోలీసులు విజ్ఞప్తి చేశారు. పుంగనూరులో ఎంపీ పెద్దిరెడ్డి మిథున్ రెడ్డిపై జరిగిన దాడిని, రాయచోటిలో పార్టీ ఆపీసుపై టీడీపీ వర్గీయులు దాడి చేశారని వైఎస్ అవినాష్ రెడ్డి తీవ్రంగా ఖండించారు.

Somireddy Chandramohan Reddy: ప్రధానుల కేసులే మూడేళ్లలో తేల్చారు- జగన్ కేసుల్లో రోజువారీ కాదు.. రోజంతా విచారణ జరగాలి

Shankar Dukanam — Sun, 11 Oct 2026 14:55:07 +0530

Andhra Pradesh Top News | అమరావతి: ఏపీ మాజీ సీఎం, వైఎస్సార్‌సీపీ అధినేత వైఎస్ జగన్ మోహన్ రెడ్డి అక్రమాస్తుల కేసుల్లో కేవలం రోజువారీ విచారణే కాకుండా, ఉదయం నుంచి సాయంత్రం వరకు రోజంతా విచారణ జరపాలని సర్వేపల్లి ఎమ్మెల్యే సోమిరెడ్డి చంద్రమోహన్ రెడ్డి డిమాండ్ సూచించారు. వైఎస్ జగన్ కేసుల్లో రోజువారీ విచారణ చేపట్టేలా సీబీఐ ప్రత్యేక కోర్టును ఆదేశించాలంటూ తెలంగాణ హైకోర్టులో ఎన్‌ఫోర్స్‌మెంట్ డైరెక్టరేట్ (ED) పిటిషన్ దాఖలు చేయడాన్ని ఆయన సమర్థించారు. ఈ పిటిషన్ ఎప్పుడో దాఖలు చేయాల్సిందని ఆయన అభిప్రాయపడ్డారు. ప్రధానులపై నమోదైన కేసులే మూడేళ్లలో తేల్చారు, కానీ జగన్ పై ఉన్న కేసుల్లో నిజాలు తేల్చేందుకు ఇన్నేళ్లా అని ఆశ్చర్యం వ్యక్తం చేశారు. మీడియాతో మాట్లాడిన టీడీపీ ఎమ్మెల్యే సోమిరెడ్డి ఈ కేసులపై తన అభిప్రాయాలను వెల్లడించారు.

ఎమ్మెల్యే సోమిరెడ్డి చంద్రమోహన్ రెడ్డి మాట్లాడుతూ.. ‘తండ్రి వైఎస్సార్ అధికారాన్ని అడ్డుపెట్టుకుని రూ. 43 వేల కోట్లకు పైగా అక్రమాస్తులు కూడబెట్టారనే ఆరోపణలపై సీబీఐ 2011లో కేసులు నమోదు చేసింది. దాదాపు 15 ఏళ్లు గడుస్తున్నా కొన్ని కేసుల్లో విచారణ సైతం ప్రారంభం కాలేదు. డిశ్చార్జ్ పిటిషన్ల పేరుతో విచారణను అడ్డుకుంటూ, కోర్టు వాయిదాలకు కూడా హాజరుకాకుండా ప్యాలెస్‌లకే పరిమితమవుతూ తప్పించుకుంటున్నారు. దేశంలోనే అతిపెద్ద అవినీతి కేసులో ముద్దాయిగా ఉన్న జగన్ రెడ్డి చట్టానికి, న్యాయవ్యవస్థకు, రాజ్యాంగానికి ఏమైనా అతీతుడా. భారీ అవినీతి కేసులో నిందితుడిగా ఉన్నప్పటికీ సీఎం హోదాలో కొనసాగారు.

ప్రధాని, ఉప ప్రధానులపై కేసుల తీర్పులు ఇలా

గతంలో దేశానికి ప్రధానమంత్రి, ఉప ప్రధానమంత్రిగా పనిచేసిన అత్యున్నత నేతలపై నమోదైన కేసుల్లోనే తీర్పులు త్వరగా వచ్చాయి. మాజీ ప్రధాని పీవీ నరసింహారావుపై 1996లో జార్ఖండ్ ముక్తి మోర్చా (JMM) ఎంపీల కొనుగోలు ఆరోపణల కేసు నమోదు, ఛార్జిషీటు, హైకోర్టు విచారణ, సుప్రీంకోర్టు అప్పీలుతో సహా తుది తీర్పు మూడేళ్లలో అంటే 1998లోనే వచ్చేసింది. వి.పి. సింగ్ విదేశీ బ్యాంకుల్లో అక్రమ లావాదేవీల నకిలీ పత్రాల కేసులో రెండేళ్లలోనే తీర్పు వచ్చింది. మాజీ ఉప ప్రధాని ఎల్.కే. అద్వానీ తనపై కేసు నమోదు కాగానే, కోర్టులో నిర్దోషిగా తేలే వరకు పార్లమెంట్‌లో అడుగుపెట్టనని ఎంపీ పదవికి రాజీనామా చేశారు. ఆపై రెండేళ్లలోనే విచారణ పూర్తి చేసుకుని నిర్దోషిగా తేలిన తరువాత తిరిగి ఎన్నికల్లో గెలిచి లోక్‌సభలో అడుగుపెట్టారు. ప్రధాని, ఉప ప్రధానుల కంటే జగన్ ఏమైనా గొప్పవాడా’ అని సోమిరెడ్డి ప్రశ్నించారు.

జగన్ పై నమోదైన కేసుల్లో వందలాది మంది సాక్షులు ఉన్నారని, వారందరినీ విచారించాలంటే రోజువారీ విచారణతో పాటు రోజంతా విచారణ జరగాల్సిన అవసరం ఉందన్నారు. చట్టం ముందు ప్రతి ఒక్కరూ సమానమేననే సందేశం ప్రజల్లోకి వెళ్లాలని, లేకపోతే డబ్బున్న వాళ్లు కోర్టుల్లో కేసులను ఎంతకాలమైనా సాగదీయవచ్చని ప్రజలు భావిస్తారని పేర్కొన్నారు. తెలంగాణ హైకోర్టులో ఈడీ పిటిషన్ దాఖలు చేయడంపై జగన్ కు చెందిన మీడియా గొంతు చించుకోవడం హాస్యాస్పదంగా ఉందన్నారు. 15 ఏళ్లుగా పెండింగ్‌లో ఉన్న కేసుల్లో రోజువారీ విచారణ కోరడం వారికి ఇష్టం లేనట్లు ఉందన్నారు. ఈడీ కోరినట్లుగా రోజువారీ, రోజంతా విచారణ జరిగి త్వరగా తీర్పులు రావాలని ప్రజలు కోరుకుంటున్నారని స్పష్టం చేశారు.