kurnool

Sugali Parvathi Devi On Pawan Kalyan: సుగాలి ప్రీతి కేసులో బిగ్ ట్విస్ట్! మోసం చేశారని పవన్ కల్యాణ్‌పై ఫిర్యాదు!

Khagesh — Mon, 6 Jul 2026 16:19:46 +0530

Sugali Parvathi Devi On Pawan Kalyan: సుగాలి ప్రీతి కేసులో ఆమె తల్లి పార్వతీదేవి పోరాటం కొనసాగుతోంది. ఆమె మరోసారి ఆంధ్రప్రదేశ్ డిప్యూటీ సీఎం పవన్ కల్యాణ్‌ను మరోసారి టార్గెట్ చేశారు. తన కుమార్తె మరణాన్ని రాజకీయంగా వాడుకున్నారని మండిపడ్డారు. అంతే కాకుండా న్యాయం చేస్తానని చెప్పి మోసం చేశారని పోలీసులకు ఫిర్యాదు చేశారు. అక్కడ పోలీసులతో వాగ్వాదానికి దిగారు.

"మొదటి సంతకమని మోసం చేశారు"

డిప్యూటీ సీఎం పవన్ కళ్యాణ్‌పై కేసు నమోదు చేయాలని సుగాలి ప్రీతి తల్లి పార్వతీదేవి గన్నవరం పోలీసులను ఆశ్రయించారు. చీటింగ్, నమ్మక ద్రోహం సహా పలు ఆరోపణలపై చర్యలు తీసుకోవాలని ఫిర్యాదులో పేర్కొన్నారు. అధికారంలోకి వస్తే మొదటి సంతకం సుగాలి ప్రీతి కేసుపైనే పెడతానని తనకు మాట ఇచ్చారని వెల్లడించారు. డిప్యూటీ సీఎం అయిన తర్వాత మాట మార్చారు అని సుగాలి పార్వతీదేవి ఆరోపించారు.

"డబ్బుల కోసం నిందితులతో కుమ్మక్కయ్యారు"

తన కుమార్తె మరణాన్ని రాజకీయానికి వాడుకుని పవన్ మోసం చేశారని ఫిర్యాదులో వెల్లడించారు. పవన్ కళ్యాణ్ పై చీటింగ్ , నమ్మకద్రోహం , బహిరంగ విమర్శ, ఆదివాసీ బిడ్డ మరణంపై అసత్య ఆరోపణలు చేశారు., డబ్బులు తీసుకొని నిందితులతో కుమ్మక్కైన విధానం, మొదటి సంతకం అంటూ మోసం చేసిన తీరుపై చర్యలు తీసుకోవాలంటూ పోలీసులకు ఇచ్చిన కంప్లైంట్‌లో తెలిపారు.

పవన్ మాట మార్చారంటూ తీవ్ర విమర్శలు

అనంతరం మీడియాతో మాట్లాడుతూ పవన్‌ కల్యాణ్‌, జనసేన నేతలపై తీవ్ర స్థాయిలో విమర్శలు చేశారు. "డిప్యూటీ సీఎం పవన్ కళ్యాణ్ తన రాజకీయాల కోసం నా బిడ్డ మరణాన్ని వాడుకున్నారు. నా బిడ్డ మరణంపై ఒక్కోసారి ఒక్కోలా మాట్లాడుతున్నారు. ఎవరు మాట్లాడినా ఆధారాలతో మాట్లాడమని పవన్ చెబుతున్నారు. అందుకే నేను పవన్ మాట్లాడిన వీడియోల ఆధారంగానే ప్రశ్నిస్తున్నా, సుగాలి ప్రీతిని మానభంగం చేసి చంపేశారని ఓసారి మాట్లాడతారు . సుగాలి ప్రీతి కేసులో ఎలాంటి ఆధారాలు లేవని నిందితులకు క్లీన్ చిట్ ఇస్తున్నారు. అధికారంలోకి వస్తే మొదటి సంతకం సుగాలి ప్రీతి కేసు విచారణ పై చేస్తానన్నారు. అధికారంలోకి వచ్చి డిప్యూటీ సీఎం అవ్వగానే పవన్ కళ్యాణ్‌ మాట మార్చారు. డీఎన్ఏలు లేవు , నిందితులు లేరు , అసలు రేప్ జరగలేదు, సాక్ష్యాలు లేకపోతే ఏం చేస్తానంటున్నారు.

న్యాయం చేసే వరకు వదిలిపెట్టబోమంటూ ప్రకటన

న్యాయం చేయమని అడిగినప్పుడల్లా తనపై ఎదురు దాడి చేస్తున్నారని సుగాలీ పార్వతీ దేవి మండిపడ్డారు. జనసేన నేతలను ఉసిగొలుపుతున్నారని ఆగ్రహం వ్యక్తం చేస్తున్నారు. వారంతా తనపై మాటల దాడులు చేస్తున్నారని గుర్తు చేశారు. "నేను నా న్యాయం చేయమని అడిగినప్పుడల్లా పవన్ కళ్యాణ్ మీడియాతో మాట్లాడతారు. జనసేన వాళ్లను ఉసిగొల్పుతారు. ఆ వెంటనే జనసేన నేతలు నా పై దాడులకు దిగుతారు. ఇప్పటికైనా పవన్ కళ్యాణ్ నాకు న్యాయం చేయాలి" అని అన్నారు.

ఫిర్యాదు తీసుకునే విషయంలో పోలీస్ స్టేషన్‌లో కాసేపు గందరగోళం నెలకొంది. చివరకు సుగాలి పార్వతీ దేవి నుంచి పోలీసులు ఫిర్యాదు తీసుకున్నారు. దీంతో ఆమె అక్కడి నుంచి వెళ్లిపోయారు.

Breaking News: రెండో టీ20లో 4 వికెట్ల తేడాతో భారత్‌పై ఇంగ్లాండ్ ఘన విజయం

Khagesh — Sat, 4 Jul 2026 10:38:03 +0530

Top Stories Today | ఈరోజు వార్తల ముఖ్యాంశాలు..

రెండో టీ20లో 4 వికెట్ల తేడాతో భారత్‌పై ఇంగ్లాండ్ ఘన విజయం

ఇంగ్లాండ్‌తో జరిగిన రెండో టీ20లో భారత్ ఓటమి పాలైంది. ఫస్ట్ బ్యాటింగ్ చేసిన టీమిండియా నిర్ణీత 20 ఓవర్లలో 7 వికెట్లు కోల్పోయి 190 పరుగులు చేసింది. ఇషాన్ కిషన్ (49), అభిషేక్ శర్మ (43), కెప్టెన్ శ్రేయస్ అయ్యర్ (37) పరుగులతో రాణించారు. ఇంగ్లాండ్ ఓపెనర్లు డకౌట్ అయినప్పటికీ జాకబ్ బెథెల్ (76 నాటౌట్) అజేయ హాఫ్ సెంచరీతో జట్టుకు విజయాన్ని అందించాడు. మరో 6 బంతులు మిగిలుండగానే ఇంగ్లాండ్ రెండో టీ20లో 4 వికెట్ల తేడాతో విజయం సాధించింది.

సాయికృష్ణ తరహాలో పోలీస్ స్టేషన్లోనే చంపేయండి: ప్రశ్న రావణ్

వరుస అరెస్టులపై ‘ప్రశ్న రావణ్’ ప్రభుత్వంపై తీవ్రస్థాయిలో నిప్పులు చెరిగారు. వేంపాడు టోల్ గేట్ వద్ద నాలుగో బెయిల్ వచ్చిన వెంటనే, పోలీసులు ఐదోసారి తనను అరెస్టు చేసి నక్కపల్లికి తరలించడంపై ఆయన ఆవేదన వ్యక్తం చేశారు. కేవలం డిప్యూటీ సీఎం పవన్ కళ్యాణ్‌ను ప్రశ్నించినందుకే సుమారు 500 మంది పోలీసులు ప్రజా సమస్యలను వదిలేసి తన చుట్టూ తిరగడం సిగ్గుచేటన్నారు. ఒక మనిషిని చంపగలరేమో కానీ, ప్రశ్నించే గొంతును నొక్కలేరని స్పష్టం చేశారు. గత నాలుగు రోజులుగా ఆమరణ నిరాహార దీక్ష చేస్తున్నానని తెలిపిన ఆయన, ఇలా వేధించే బదులు నేరుగా పోలీస్ స్టేషన్‌లోనే చంపేయాలని సీఎం చంద్రబాబు, లోకేష్, పవన్ కళ్యాణ్‌లకు సవాలు విసిరారు.

సాయికృష్ణ కేసులో కీలక మలుపు.. హైకోర్టుకు సిట్ నివేదిక

విజయవాడలో తీవ్ర సంచలనం సృష్టించిన గాదె సాయికృష్ణ లాకప్ డెత్ కేసులో ప్రత్యేక దర్యాప్తు బృందం (SIT) ఆంధ్రప్రదేశ్ హైకోర్టుకు కీలక నివేదికను సమర్పించింది. ఈ నివేదిక ద్వారా కేసు దర్యాప్తులో వెలుగులోకి వచ్చిన పలు సంచలన విషయాలను సిట్ న్యాయస్థానం దృష్టికి తీసుకెళ్లింది. కృష్ణలంక పోలీస్ స్టేషన్ టెర్రస్ (పైకప్పు)పై లభించిన ఎముకలు, బూడిద, ఒక స్టీల్ బ్రాస్‌లెట్ మరియు ఇతర కీలక వస్తువులను ఉన్నతాధికారుల సమక్షంలో సిట్ సేకరించింది. ఈ వస్తువులన్నింటినీ ఒక న్యాయాధికారి సమక్షంలో పారదర్శకంగా సీల్ వేసి, తదుపరి పరీక్షల నిమిత్తం ఫోరెన్సిక్ సైన్స్ ల్యాబొరేటరీ కి పంపినట్లు సిట్ తన నివేదికలో పేర్కొంది.

పోలీస్ స్టేషన్ పైకప్పుపై లభించిన ఎముకలు, బూడిద అసలు సాయికృష్ణవేనా కాదా? అనే అత్యంత కీలకమైన కోణంలో ప్రస్తుతం దర్యాప్తు సాగుతోంది. ఈ విషయాన్ని శాస్త్రీయంగా నిరూపించడం కోసం, సాయికృష్ణ తల్లి విజయలక్ష్మి యొక్క డీఎన్ఏ (DNA) నమూనాలను సేకరించి, వాటిని లభించిన ఎముకల నమూనాలతో సరిపోల్చాలని సిట్ యోచిస్తోంది. ఫోరెన్సిక్ ల్యాబ్ నివేదిక మరియు డీఎన్ఏ పరీక్షల అనంతరం ఈ కేసులో మరిన్ని నిజాలు వెలుగులోకి వచ్చే అవకాశం ఉంది.

ప్రశ్న రావణ్‌కు బెయిల్.. జైలు నుంచి విడుదల

రాష్ట్రవ్యాప్తంగా సంచలనం సృష్టించిన కేసులలో నిందితుడిగా ఉన్న 'ప్రశ్న రావణ్'కు కోర్టు బెయిల్ మంజూరు చేసింది. బెయిల్ లభించిన అనంతరం ఆయన జైలు నుండి విడుదలయ్యాడు. ఈ సందర్భంగా మీడియా ప్రతినిధులతో మాట్లాడిన ప్రశ్న రావణ్.. ఈ కష్టసమయంలో తనకు అండగా నిలిచి, మద్దతు తెలిపిన మీడియా మిత్రులందరికీ ప్రత్యేకంగా ధన్యవాదాలు తెలిపాడు.

ఈ కేసులకు సంబంధించిన పూర్తి వివరాలపై తాను త్వరలోనే కూలంకషంగా ఒక ప్రెస్‌మీట్ ఏర్పాటు చేసి, అన్ని విషయాలను ప్రజల ముందు మాట్లాడుతానని ఆయన స్పష్టం చేశాడు. అలాగే, చట్టపరంగా తనకు ఎంతగానో సపోర్టు చేసి, బెయిల్ రావడంలో కీలక పాత్ర పోషించిన లాయర్ జడ శ్రవణ్ కు కృతజ్ఞతలు తెలిపాడు. అనంతరం ప్రశ్న రావణ్ తన లాయర్ శ్రవణ్‌తో కలిసి నేరుగా ఇంటికి బయలుదేరారు. కాగా, ప్రశ్న రావణ్‌పై ఇప్పటికే రాష్ట్రవ్యాప్తంగా పదుల సంఖ్యలో వివిధ కేసులు నమోదైన సంగతి తెలిసిందే.

కుమ్రం భీం ఆసిఫాబాద్ జిల్లాలో పోడు భూముల కోసం స్థానికుల ఆందోళన

కుమ్రం భీం ఆసిఫాబాద్ జిల్లా కెరమెరి ఫారెస్ట్ రేంజ్ పరిధిలోని దేవుడుపల్లి బీట్‌లో, సూర్ధపూర్ గ్రామ శివారులో ఉన్న సుమారు 150 హెక్టార్ల భూమిని అటవీశాఖ అధికారులు స్వాధీనం చేసుకున్నారు. ఈ భూములు పోడు సాగు చేస్తున్న రైతుల ఆధీనంలో ఉన్నట్లు స్థానికులు చెబుతున్నారు. ఇటీవల అటవీశాఖ అధికారులు ట్రెంచ్ తవ్వకాలకు వెళ్లగా, స్థానిక రైతులు అడ్డుకున్నారు.

ఈ నేపథ్యంలో అటవీశాఖ అధికారులు ముందస్తు చర్యలో భాగంగా వందమందికి పైగా పోలీసులతో భారీ బందోబస్తు ఏర్పాటు చేసి, జేసీబీల సహాయంతో అటవీశాఖ అధికారులు కందకాల తవ్వకాలు చేపట్టారు.రైతులు భూముల వద్దకు చేరకుండా ముందస్తుగానే పోలీసులు గ్రామ పరిసరాల్లో బందోబస్తు ఏర్పాటు చేశారు.

5 వేల పోలీస్ ఉద్యోగాలా.. 19 వేల పోస్టులు వేయాలి.. నిరుద్యోగుల ఆందోళన

తెలంగాణలో కేవలం 5 వేల పోలీస్ ఉద్యోగాల భర్తీ ప్రకటనపై నిరుద్యోగులు ఆగ్రహం వ్యక్తం చేస్తున్నారు. 19 వేల పోస్టులు భర్తీ చేయాలంటూ దిల్‌సుఖ్‌నగర్‌లో ఆందోళన చేపట్టారు. ఇచ్చిన మాట తప్పి మోసం చేశారని సీఎం రేవంత్‌ రెడ్డిపై ఫిర్యాదు చేసేందుకు వెళ్లిన నిరుద్యోగులను పోలీసులు అడ్డుకోవడంతో అక్కడ తీవ్ర ఉద్రిక్తత నెలకొంది.

గచ్చిబౌలిలో ట్రిపుల్‌ ఐటీ విద్యార్థి ఆత్మహత్య

హైదరాబాద్ గచ్చిబౌలిలోని ట్రిపుల్ ఐటీ క్యాంపస్‌లో విషాదం చోటుచేసుకుంది. కంప్యూటర్ సైన్స్ చదువుతున్న ఖమ్మం జిల్లాకు చెందిన అనిరుధ్ అనే విద్యార్థి శనివారం కాలేజీ భవనం 6వ అంతస్తు నుండి కిందకు దూకి ఆత్మహత్యకు పాల్పడ్డాడు. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం ఆసుపత్రికి తరలించారు. విద్యార్థి ఆత్మహత్యకు గల కారణాలు తెలియాల్సి ఉంది. కేసు నమోదు చేసిన పోలీసులు దర్యాప్తు చేస్తున్నారు.

20 ఏళ్ల రాజకీయ ప్రస్థానం.. సీఎం రేవంత్ రెడ్డికి మంత్రుల అభినందనలు

మిడ్జిల్ మండలం జడ్పీటీసీగా రాజకీయ ప్రస్థానాన్ని ప్రారంభించి, రాష్ట్ర ముఖ్యమంత్రి పదవి వరకు విజయవంతంగా 20 ఏళ్ల రాజకీయ ప్రస్థానాన్ని పూర్తి చేసుకున్న శుభసందర్భంగా తెలంగాణ ముఖ్యమంత్రి రేవంత్ రెడ్డికి డిప్యూటీ సీఎం భట్టి విక్రమార్క, మంత్రులు సీతక్క, పొన్నం ప్రభాకర్, పొంగులేటి శ్రీనివాస్ రెడ్డి, వాకిటి శ్రీహరి శుభాకాంక్షలు తెలిపారు.

మిడ్జిల్ మండలం జడ్పీటీసీగా రాజకీయ ప్రస్థానాన్ని ప్రారంభించి, రాష్ట్ర ముఖ్యమంత్రి పదవి వరకు నేటితో విజయవంతంగా 20 ఏళ్ల రాజకీయ ప్రస్థానాన్ని పూర్తి చేసుకున్న శుభసందర్భంగా ముఖ్యమంత్రి శ్రీ ఎ. రేవంత్ రెడ్డి గారికి ఉప ముఖ్యమంత్రి శ్రీ భట్టి విక్రమార్క గారు, మంత్రులు శ్రీమతి సీతక్క,… pic.twitter.com/CWYXWKWxFF
— Telangana Congress (@INCTelangana) July 4, 2026

సాయికృష్ణ లాకప్ డెత్ కేసులో అనేక అనుమానాలు.. సీబీఐ విచారణకు వైసీపీ నేతల వినతి

విజయవాడ గాదె సాయికృష్ణ లాకప్ డెత్ కేసుపై జరుగుతున్న మెజిస్టీరియల్ విచారణకు వైసిపి నేతలు అంబటి రాంబాబు, మల్లాది విష్ణు, సుధాకర్ బాబు, వంగవీటి నరేంద్ర హాజరై, తమకున్న పలు అనుమానాలతో కూడిన వినతి పత్రాన్ని అధికారులకు అందజేశారు. ఈ సందర్భంగా మాజీ ఎమ్మెల్యే మల్లాది విష్ణు మాట్లాడుతూ, సాయికృష్ణ లాకప్ డెత్, అనంతరం మృతదేహం మాయం చేయడం వెనుక అనేక సందేహాలు ఉన్నాయని, దీనిని తాము ప్రభుత్వ హత్యగానే భావిస్తున్నామని ఆరోపించారు. ఈ ఘటనలోని వాస్తవాలు వెలుగుచూసి అసలు దోషులు బయటకు రావాలంటే కేసును తక్షణమే సిబిఐ విచారణకు అప్పగించాలని వారు డిమాండ్ చేశారు.

విజయవాడ సాయికృష్ణ లాకప్ డెత్.. ప్రారంభమైన మెజిస్టీరియల్ విచారణ

గాదె సాయికృష్ణ లాకప్ డెత్ ఘటనపై సబ్ కలెక్టర్ ఆఫీసులో మెజిస్టీరియల్ విచారణ ప్రారంభమైంది. నూతన భారతీయ న్యాయ సంహిత చట్ట నిబంధనలకు లోబడి, జాతీయ మానవ హక్కుల కమిషన్ మార్గదర్శకాలను ఖచ్చితంగా అనుసరిస్తూ ఈ విచారణను నిష్పక్షపాతంగా జరపాలని ఎన్టీఆర్ జిల్లా కలెక్టర్ ఆదేశించగా, ఇందులో భాగంగా బాధితుడి తల్లి విజయలక్ష్మి మరియు ఇతర కుటుంబ సభ్యులు తమ వాంగ్మూలాన్ని, సాక్ష్యాలను అధికారులకు సమర్పించేందుకు కార్యాలయానికి చేరుకున్నారు. అలాగే ఈ ఘటనకు సంబంధించి ప్రజల వద్ద ఎలాంటి సమాచారం లేదా ఆధారాలు ఉన్నా వాటిని వెంటనే విచారణాధికారికి సమర్పించి సహకరించాలని అధికారులు ఒక ప్రకటనలో కోరారు.

Krishna District Latest News: కృష్ణా జిల్లా గూడూరులో విషాదం- ఒకే కుటుంబానికి చెందిన ముగ్గురు మహిళల ఆత్మహత్య

Krishna District Latest News: కుటుంబ కలహాలు ముగ్గురు మహిళల బలవన్మరణానికి కారణమయ్యాయి. కృష్ణాజిల్లా గూడూరు మండల అనంతాయిపేటలో ఈ విషాదం చోటుచేసుకుంది. ఒకేసారి ముగ్గురు మహిళలు మరణించడం స్థానికంగా కూడా కలకలం రేపింది.

Warangal Latest News: వరంగల్‌ భద్రకాళి టెంపుల్ వద్ద ఉద్రిక్తత- బీజేపీ శుద్ధి కార్యక్రమాన్ని అడ్డకున్న పోలీసులు

Warangal Latest News: వరంగల్‌లో కాంగ్రెస్, బీఆర్‌ఎస్‌ సవాళ్లు, ప్రమాణాలకు వ్యతిరేకంగా బీజేపీ నిరసన చేపట్టింది. భద్రకాళీ అమ్మవారి టెంపుల్ వద్ద శుద్ధి కార్యక్రమాన్ని చేపట్టింది. దీన్ని పోలీసులు అడ్డుకున్నారు. ఈ కార్యక్రమానికి స్థానికంగా ఉన్న బీజేపీ కార్యకర్తలు భారీగా తరలి వచ్చారు. పోలీసులు వారిని అడ్డుకోవడం కాసేపు ఉద్రిక్తత నెలకొంది.

JSW Rayalaseema Steel Plant: కడప స్టీలు ప్లాంటు నిర్మాణానికి సీఎం చంద్రబాబు శంకుస్థాపన.. దేశంలోనే తొలి గ్రీన్‌ స్టీల్‌ ప్లాంట్

Shankar Dukanam — Fri, 3 Jul 2026 12:13:23 +0530

జమ్మలమడుగు: రాయలసీమ ప్రజలు దశాబ్దాలుగా ఎదురుచూస్తున్న ఉక్కు పరిశ్రమ కల ఎట్టకేలకు సాకారం అవుతోంది. ఈ ప్రాంత పారిశ్రామిక రూపురేఖలను పూర్తిగా మార్చేసే సరికొత్త అధ్యాయానికి జమ్మలమడుగు మండలం సున్నపురాళ్లపల్లె కొండ ప్రాంతం వేదికగా మారింది. ప్రతిష్ఠాత్మక జేఎస్‌డబ్ల్యూ (JSW) రాయలసీమ ఉక్కు కర్మాగార (Steel Plant) శంకుస్థాపన పనులను ఆంధ్రప్రదేశ్ ముఖ్యమంత్రి నారా చంద్రబాబు నాయుడు శుక్రవారం ప్రారంభించారు. దాదాపు రూ.16,350 కోట్ల భారీ బడ్జెట్‌తో కడప స్టీల్ ప్లాంట్‌ను నిర్మిస్తున్నారు.

దేశంలోనే తొలి గ్రీన్‌ స్టీల్‌ ప్లాంట్
పర్యావరణ పరిరక్షణకు ఏపీ ప్రభుత్వం పెద్దపీట వేస్తూ ఈ స్టీల్ ప్లాంటులో అత్యాధునిక ఎలక్ట్రిక్‌ ఆర్క్‌ ఫర్నేస్‌ (EAF) టెక్నాలజీని వినియోగిస్తున్నారు. దీనివల్ల పర్యావరణానికి హాని కలిగించే కార్బన్ ఉద్గారాలు భారీ స్థాయిలో తగ్గి, పర్యావరణహితమైన గ్రీన్‌ స్టీల్ ఉత్పత్తి అవుతుందని అధికారులు తెలిపారు. ఈ తరహా అత్యాధునిక ప్లాంట్‌ భారత్‌లోనే మొట్టమొదటిదని జేఎస్‌డబ్ల్యూ పరిశ్రమ వర్గాలు తెలిపాయి. దీనికి తోడుగా, పరిశ్రమ అవసరాల కోసం 2,400 ఎకరాల్లో 400 మెగావాట్ల సౌర, పవన విద్యుత్ ప్రాజెక్టులను జేఎస్‌డబ్ల్యూ నియో ఎనర్జీ సంస్థ నిర్మిస్తోంది. ఉక్కు పరిశ్రమతో పాటు ఈ గ్రీన్ ఎనర్జీ ప్లాంట్లకు కూడా సీఎం చంద్రబాబు శుక్రవారం శంకుస్థాపన చేశారు.

కడప స్టీల్ ప్లాంట్ ఏర్పాటు ప్రస్థానంలో ఎన్నో మలుపులు చోటుచేసుకున్నాయి. 2019లో తొలి ప్రతిపాదనలు రాగా.. 2025లో జేఎస్‌డబ్ల్యూ సంస్థ నివేదికలకు రాష్ట్ర మంత్రివర్గం, ఎస్‌ఐపీబీ (SIPB) గ్రీన్‌ సిగ్నల్‌ ఇచ్చాయి. అనంతరం గత మార్చి 25న 1,100 ఎకరాల భూమిని సంస్థకు అధికారికంగా అప్పగించడంతో పనులు ఊపందుకున్నాయి. ఈ భారీ పరిశ్రమ ఏర్పాటుతో రాయలసీమలోని స్థానిక ఎంఎస్‌ఎంఈలకు, రవాణా రంగానికి కొత్త ఉపాధి అవకాశాలు లభించి భారీ ఊపు రానుంది.

Also Read: Kadapa Steel Plant: మళ్లీ మళ్లీ జరగాలి పెళ్లి.. చంద్రబాబు కడప స్టీల్ ప్లాంట్ శంకుస్థాపనపై గుడివాడ అమర్నాథ్ సెటైర్లు

జేఎస్‌డబ్ల్యూ రాయలసీమ స్టీల్ ప్లాంట్ ద్వారా 2,500 మందికి ప్రత్యక్షంగా, మరో 5,000 మందికి పరోక్షంగా ఉపాధి అవకాశాలు లభిస్తాయి. మొత్తం 1,100 ఎకరాల విస్తీర్ణంలో రెండు దశల్లో ఈ ప్లాంటు నిర్మాణం పూర్తి చేయనున్నారు. మొదటి దశలో రూ. 4,800 కోట్ల పెట్టుబడితో పనులను చేపట్టి, 2028 ఏప్రిల్ నాటికి పూర్తి చేయాలని లక్ష్యంగా పెట్టుకున్నామని ఏపీ ప్రభుత్వం తెలిపింది. ఆ తర్వాత రెండో దశలో రూ. 11,850 కోట్ల భారీ వ్యయంతో ఈ ప్రాజెక్టును పూర్తి చేయనున్నారు.

వైఎస్సార్ హయాం నుండి జగన్ పాలన వరకు.. ప్లాంట్ ప్రస్థానం
కడపలో స్టీలు ప్లాంటు ఏర్పాటుకు దివంగత సీఎం వైఎస్ రాజశేఖర రెడ్డి హయాంలోనే మొదలైంది. 2007లో బ్రహ్మణి స్టీల్స్ కు వైఎస్సార్ శంకుస్థాపన చేశారు. అయితే వైఎస్సార్ అకాల మరణం, ఓబులాపురం మైనింగ్ కేసులో గాలి జనార్దనరెడ్డి జైలుకు వెళ్లడంతో నాటి కాంగ్రెస్ సర్కార్ బ్రహ్మణి స్టీల్స్ ఒప్పందాన్ని రద్దు చేసింది. రాష్ట్ర విభజన అనంతరం నవ్యాంధ్ర తొలి ముఖ్యమంత్రిగా చంద్రబాబు 2018 డిసెంబరు 28న జమ్మలమడుగు నియోజకవర్గం మైలవరం మండలం కంబాలదిన్నెలో 'రాయలసీమ స్టీలు కార్పొరేషన్' పనులకు శంకుస్థాపన చేశారు. కానీ, ఆ తర్వాత అధికారంలోకి వచ్చిన వైఎస్ జగన్ పాత ప్రాజెక్టును పక్కనపెట్టారు. 2019 డిసెంబరులో సున్నపురాళ్లపల్లె వద్ద వైఎస్ఆర్ స్టీలు ప్లాంటు కార్పొరేషన్ పేరిట జేఎస్‌డబ్ల్యూ సంస్థతో కలిసి శంకుస్థాపన చేశారు.

గత ఏడాది కడపలో నిర్వహించిన మహానాడు వేదికగా టీడీపీ అధినేత చంద్రబాబు జిల్లా ప్రజలకు ఒక కీలక హామీ ఇచ్చారు. కడప జిల్లాలో ఉక్కు పరిశ్రమ నిర్మాణాన్ని ఖచ్చితంగా పూర్తి చేస్తామన్నారు. ఇచ్చిన మాట ప్రకారమే ఇప్పుడు కూటమి ప్రభుత్వం ఆధ్వర్యంలో రాయలసీమ స్టీల్ ప్లాంట్ పనులకు శుక్రవారం నాడు సీఎం చంద్రబాబు శంకుస్థాపన చేశారు. నిర్ణీత షెడ్యూల్ ప్రకారం పనులు పూర్తి చేస్తామని.. దీని ద్వారా 3000 మందికి ప్రత్యక్షంగా, పరోక్షంగా ఉపాధి అవకాశాలు లభిస్తాయని అన్నారు.

బహిరంగ సభకు అధికార యంత్రాంగం భారీ ఏర్పాట్లు
ఈ ప్రారంభోత్సవ కార్యక్రమానికి అధికారులు ఘనంగా ఏర్పాట్లు పూర్తి చేశారు. కలెక్టర్‌ శ్రీధర్, ఎస్పీ నచికేత్‌ విశ్వనాథ్, ఎమ్మెల్యే ఆదినారాయణరెడ్డి ఏర్పాట్లను పర్యవేక్షించారు. కేంద్ర, రాష్ట్ర మంత్రులు, జేఎస్‌డబ్ల్యూ ప్రతినిధుల రాక కోసం 4 హెలిప్యాడ్లను సిద్ధం చేశారు. సుమారు 25 వేల మందితో భారీ బహిరంగ సభను నిర్వహించనున్నారు. సభకు వచ్చే వాహనాల కోసం వందల బస్సులు, కార్ల పార్కింగ్ సౌకర్యాలను ప్రత్యేకంగా ఏర్పాటు చేశారు.

VB GRAM G Andhra Pradesh: ఆంధ్రప్రదేశ్‌లో వీబీ గ్రామ్‌జీ పథకం ప్రారంభం! గ్రామాల్లో విప్లవం మొదలైందన్న సీఎం, డిప్యూటీ సీఎం!

Khagesh — Thu, 2 Jul 2026 15:32:37 +0530

VB GRAM G Andhra Pradesh: ఆంధ్రప్రదేశ్‌ రాష్ట్ర గ్రామీణ ముఖచిత్రాన్ని సమూలంగా మార్చే దిశగా కూటమి ప్రభుత్వం మరో కీలక అడుగు వేసింది. తిరుతి జిల్లాలోని ముక్కాల వారి పల్లె వేదికగా వికసిత భారత్‌ జి రామ్‌ జి పథకానిి ముఖ్యమంత్రి నారా చంద్రబాబు నాయుడు శ్రీకారం చుట్టారు. ఈ కార్యక్రమంలో కేంద్ర గ్రామీణాభివృద్ధి శాఖ మంత్రి శివారాజ్ సింగ్ చౌహాన్, రాష్ట్ర ఉపముఖ్యమంత్రి పవన్ కల్యాణ్‌ పాల్గొన్నారు. గ్రామ స్వరాజ్యమే లక్ష్యంగా, పారదర్శకమైన పాలనతో పేదరిక నిర్మూలన దిశగా ఈ పథకాన్ని రూపొందించినట్టు ప్రభుత్వం ప్రకటించింది.

ఏంటీ ఈ వీబీ గ్రామ్‌జీ ?

వీబీ గ్రామ్‌జీ అనేది గతంలో ఉన్న ఉపాధి హామీ పథకానికి మెరుగై సవరణలు చేస్తూ, గ్రామాల అభివృద్ధికి అధిక ప్రాధాన్యతనిచ్చేలా రూపొందించిన కొత్త విధానం. ఈ పథకం కింద కేవలం శ్రమ శక్తిని వినియోగించడమే కాకుండా, శాశ్వత గ్రామీణ ఆస్తుల నిర్మాణానికి పెద్ద పీట వేస్తారు. దీని ద్వారా గ్రామాల్లో సిమెంట్‌ రహదారులు, మురుగు నీటి కాలువలు, భూసార పరిరక్షణ పనులు, పశువుల కోసం నీటి తొట్టెలు వంటి మౌలిక సదుపాయాలను నిర్మిస్తారు.

ఈ పథకం ప్రధాన ఉద్దేశం గ్రామాలకు ఆర్థికంగా సామాజికంగా బలాన్ని ఇవ్వడం. కేంద్ర ప్రభుత్వం ఈ పథకం కోసం దేశవ్యాప్తంగా రూ. 7.5 లక్షల కోట్లు కేటాయించగా, ప్రతి గ్రామానికి ఉపాధి కార్యక్రమాల నిమిత్తం సుమారు రెండు కోట్లు అందజేయాలని నిర్ణయించింది.

దేశవ్యాప్తంగా జులై 1 నుంచే పథకం ప్రారంభమైంది. అయితే ఆంధ్రప్రదేశ్‌లో మాత్రం రెండో తేదిన స్టార్ట్ చేశారు. తిరుపతి జిల్లా ముక్కాలవారి పల్లెలో గురువారం నాడు ప్రారంభమైంది. ముఖ్యమంత్రి చంద్రబాబు తన పర్యటనలో ఈ పథకాన్ని డిప్యూటీ సీఎం పవన్ కల్యాణ‌ , కేంద్రమంత్రి శివరాజ్ సింగ్ చౌహాన్‌తో కలిసి ప్రారంభించారు. అనంతరం అక్కడ ఏ్పాటు చేసిన సభను ఉద్దేశించి ప్రసంగించారు.

పథకం అమలులో గతంలో అమలులో ఉన్న లోపాలను సరిదిద్దుతూ అనేక సంస్కరణలు ప్రవేశపెట్టారని చంద్రబాబు తెలిపారు. గతంలో ఉన్నవ వంద రోజుల పని కాలన్ని 125రోజులకు పెంచారని వివరించారు. మరికొన్ని సందర్భాల్లో ఏడాదికి 185 రోజుల వరకు పని కల్పించే అవకాశం ఉందని సీఎం తెలిపారు. గతంలో ఎంజీనరేగాలో కేంద్ర, రాష్ట్రాల వాటా 90:10గా ఉండేదని, ఇప్పుడు రాష్ట్రాల వాటాను 40 శాతానికి పెంచడం ద్వారా అభివృద్ధి పనుల్లో రాష్ట్ర ప్రభుత్వ భాగస్వామ్యాన్ని మరింత పెంచారని అభిప్రాయపడ్డారు.

నిధుల దుర్వినియోగాన్ని అరికట్టేందుకు రియల్‌ టైమ్‌ మానిటరింగ్, డిజిటల్‌ విధానాన్ని తీసుకుచ్చారని వివరించారు. దీని వల్ల దొంగ లెక్కలు రాసే అవకాశం ఉండదని తెలిపారు. కార్మికులు చేసిన పనికి వేతనం ఆలస్యం కాకుండా, నేరుగా వారి బ్యాంకు ఖాతాల్లోనే డబ్బులు జమ అవుతాయన్నారు. ఏ గ్రామంలో ఏ పని చేపట్టాలనేది స్థానికంగా గ్రామ సభలే నిర్ణయించుకుంటాయని అన్నారు.

ఆంధ్రప్రదేశ్‌ రాష్ట్రంలో ఈ పథకం అమలు కోసం మొత్తం రూ. 12, 845 కోట్లు ఖ్చు చేయనున్నట్టు డిప్యూటీ సీఎం పవన్ కల్యాణ్ తెలిపారు. ఇందులో కేంద్రం నుంచి 7700 కోట్లు, రాష్ట్ర వాటాగా 4000 కోట్లు కలిపి ప్రారంభంలో 11000 కోట్లుపైనే నిధులు సిద్ధం చేసినట్టు తెలిపారు. గత రెండేళ్లలో పల్లె పండుగ వంటి కార్యక్రమాల ద్వారా 16, 695 కోట్ల ఉపాధి నిధులను ప్రభుత్వం సమర్థవంతంగా వినియోగించిందని పవన్ గుర్తు చేశారు.

Prasna Ravan Bail and Arrest: అనుచిత వ్యాఖ్యలు చేసిన యూట్యూబర్‌ ప్రశ్న రావణ్‌ మళ్లీ అరెస్టు! 2025 నాటి కేసులో చర్యలు!

Khagesh — Thu, 2 Jul 2026 10:50:39 +0530

Prasna Ravan Bail and Arrest: ఈ మధ్య కాలంలో జరిగిన దళిత క్రైస్తవ సభలో అనుచిత వ్యాఖ్యలు చేసిన యూట్యూబర్‌ ప్రశ్న రావణ్‌ను పోలీసులు బుధవారం అరెస్టు చేశారు. ఆయనకు అర్థరాత్రి బెయిల్ మంజూరు అయ్యింది. అయితే ఆయన్ని అరెస్టు చేసినప్పటి నుంచి మెజిస్ట్రేట్‌ వద్దకు తీసుకెళ్లే వరకు పిఠాపురంలో హైడ్రామా సాగింది. చివరకు అర్థరాత్రి బెయిల్ వచ్చింది. అయితే వెంటనే మరో కేసులో అరెస్టు చేస్తున్నట్టు పోలీసులు ఆయనకు, ఆయన తరఫున లాయర్‌కు తెలియజేశారు.

రావణ్‌ను అరెస్ట్ చేసిన పోలీసులు పిఠాపురం జగ్గయ్య చెరువు వద్ద ఉన్న న్యాయమూర్తుల బంగ్లాకు తీసుకువెళ్లి మెజిస్ట్రేట్ ముందు హాజరు పరిచారు. సుమారు రెండు గంటల పాటు బెయిల్‌పై వాదనలు జరిగాయి. నిందితుడు తరపున జడ శ్రవణ్ వాదనలు వినిపించారు. ఇరువురి వాదనలు విన్న న్యాయమూర్తి నిందితుడికి వ్యక్తిగత పూచిపై బెయిల్ గ్రాంట్ చేశారు.

అంతకు ముందు పిఠాపురం పోలీస్ స్టేషన్‌లో హైడ్రామా నడిచింది. ముఖ్యమంత్రి చంద్రబాబు, డిప్యూటీ సీఎం పవన్ కల్యాణ్‌పై తీవ్ర వ్యాఖ్యలు చేసిన జోసఫ్‌ ఎలియాస్‌ ప్రశ్న రావణ్‌ను అప్పగించాలని పెద్ద ఎత్తున జనసైనికులు స్టేషన్‌ను చుట్టుముట్టారు. అప్పటికే ఆయన అరెస్టు సమాచారం అందుకున్న దళిత కైస్తవ సంఘాలు అక్కడకు చేరుకున్నారు. వారు ఆయనకు రక్షణగా నిలిచారు. దీంతో పిఠాపురంలో పోలీస్‌ స్టేషన్ వద్ద ఉద్రిక్తత చోటు చేసుకుంది. ఇరు వర్గాల మధ్య తోపులాట జరిగింది. అయితే పరిస్థితి చేయిదాటిపోకుండా ఉండేందుకు పోలీసులు భారీగా బలగాలను మోహరించారు.

పరిస్థితి మరింత హీటెక్కకుండానే నిరసనకారులను అక్కడి నుంచి పోలీసులు తీసుకెళ్లిపోయారు. అయినా కొందరు అక్కడే నినాదాలు చేస్తూ ఉండిపోయారు. ఈ పరిస్థితుల్లో నాటకీయపరిణామాల మధ్య రావణ్‌ను పోలీసులు సైలెంట్‌గా మెజిస్ట్రేట్‌ ముందు హాజరుపరిచారు. అర్థరాత్రి వరకు సాగిన వాదనల తర్వాత ఆయనకు న్యాయమూర్తి బెయిల్ మంజూరు చేశారు.

అయితే ఇలా బెయిల్ వచ్చిందో లేదో మరో కేసులో రావణ్‌ను పోలీసులు అరెస్టు చేస్తున్నట్టు తెలిపారు. గత ఏడాది సర్పవరం పోలీస్‌ స్టేషన్‌లో నమోదు అయిన కేసులో పోలీసులు అదుపులోకి తీసుకుని సర్పవరం తరలించారు. దీన్ని ఆయన తరపున వాదిస్తున్న శ్రవణ్‌ ఖండించారు. ముందస్తు నోటీసులు ఇవ్వకుండా అరెస్టు చేయడం ఏంటని ప్రశ్నించారు. ఉప ముఖ్యమంత్రిపై ఎలాంటి తప్పుడు కామెంట్స్ చేయలేదని, గతంలో పవన్ కల్యాణ్ చేసిన వ్యాఖ్యలను మాత్రమే గుర్తు చేశారని అన్నారు. ఈ మధ్య కాలంలో నేతలు చేస్తున్న కామెంట్స్‌పై చర్యలు తీసుకోకుండా ప్రశ్నిస్తున్న గొంతుకలను నొక్కేందుకు మాత్రమే అరెస్టు చేస్తున్నారని మండిపడ్డారు.

జూన్ 28న జరిగిన దళిత క్రైస్తవ సమర శంఖారావంలో రావణ్‌ శృతిమించి మాట్లాడారు. సీఎం చంద్రబాబు, ఉప ముఖ్యమంత్రి పవన్‌ కల్యాణ్, రాధా మనోహర్‌దాస్‌పై అనుచిత వ్యాఖ్యలు చేశారు. ఈ వ్యాఖ్యలు ఎందుకు చేయాల్సి వచ్చింది, ఎవరైనా చేయిస్తున్నారా అనే కోణంలో పోలీసులు ప్రశ్నించారు. దీనికి సంబంధించిన వివరాలు రాబడుతున్నారు. ఆయనకు వచ్చే ఆదాయ వనరులను పరిశీలిస్తున్నారు.

AP TET 2026: ఆంధ్రప్రదేశ్‌ టెట్ అభ్యర్థులకు అలర్ట్! దరఖాస్తుల సవరణకు వన్ టైమ్ డిలీట్ ఆప్షన్! పూర్తి వివరాలు ఇవే!

Khagesh — Thu, 2 Jul 2026 09:57:57 +0530

AP TET 2026: ఆంధ్రప్రదేశ్‌లో ఉపాధ్యాయ కొలువుల కోసం ఎదురు చూస్తున్న అభ్యర్థులకు రాష్ట్ర విద్యాశాఖ కీలక ఊరటనిచ్చింది. ఉపాధ్యాయ అర్హత పరీక్ష టెట్‌ ఆన్‌లైన్ దరఖాస్తు ప్రక్రియలో అభ్యర్థులు పొరపాటున నమోదు చేసిన తప్పులను సరిదిద్దుకునేందుకు ప్రభుత్వం ఒక అవకాశాన్ని కల్పించింది. దరఖాస్తు సమర్పించిన తర్వాత ఏవైనా పొరపాటులు గుర్తిస్తే వాటిని సవరించుకోడానికి గతంలో ఉన్న ఇబ్బందులను తొలగిస్తూ వన్‌టైమ్ డిలీట్ అనే సరికొత్త ఫీచ్‌ను అందుబాటులోకి తెచ్చింది.

టెట్ పరీక్షకు హాజరయ్యే అభ్యర్థులు తమ దరఖాస్తు ఫామ‌లో పేరు, విద్యార్హతలు, లేదా ఇతర వ్యక్తిగత వివరాలను నమోదు చేసేటప్పుడు కొన్నిసార్లు తప్పులు చేస్తుంటారు. ఇటువంటి తప్పులు వల్ల భవిష్యత్‌లో సర్టిఫికెట్ వెరిఫికేషన్ సమయంలో ఇబ్బందులు ఎదురవుతాయి. దీనిని దృష్టిలో ఉంచుకొని అభ్యర్థులు ఇప్పటికే సమర్పించిన దరఖాస్తును పూర్తిగా డిలీట్ చేసి, సరైన వివరాలతో మళ్లీ దరఖాస్తు చేసుకునేందుకు ప్రభుత్వం అనుమతి ఇచ్చింది. ఈ మేరకు టెట్ కన్వీనర్‌ వెంకట్‌ కృష్ణారెడ్డి అధికారిక ప్రకటన విడుదల చేశారు.

ఈ సవరణ ప్రక్రియ నిరంతరం అందుబాటులో ఉండదు. కేవలం పరిమిత కాలం మాత్రమే ఈ అవకాశం ఉంటుంది. ఇవాళ్టి (జులై 2) నుంచి ఐదో తేదీ వరకు మాత్రమే అభ్యర్థులు ఈ వన్‌ టైమ్‌ డిలీట్‌ ఆప్షన్‌ు వినియోగించుకోవచ్చు. నిర్ణీత గడువు ముగిసిన తర్వాత ఎట్టి పరిస్థితుల్లో దరఖాస్తుల సవరణకు అవకాశం ఉండదని అధికారులు స్పష్టం చేశారు.

అభ్యర్థుల అధికారిక టెట్‌ వెబ్‌సైట్‌లోకి వెళ్లి తమ లాగిన్ వివరాలతో ప్రవేశించాలి. అక్కడ వన్‌టైమ్ డిలీట్‌ అనే ఐచ్చికాన్ని ఎంచుకోవాలి. దీని వల్ల పాత దరఖాస్తు వ్యవస్థ నుంచి డిలీట్ అవుతుంది. ఆ తర్వాత అభ్యర్థులు తాజా వివరాలతో ఎటువంటి తప్పులు లేకుండా దరఖాస్తు తిరిగి సబ్‌మిట్ చేయాలి.

ఈ సవరణ ప్రక్రియలో కొన్ని పరిమితులు ఉన్నాయి. దరఖాస్తులో ఆధార్‌ నంబర్‌, మొబై్‌ నంబర్ మినహా మిగిలిన అన్ని అంశాలను(పేరు, తండ్రి పేరు, పుట్టిన తేదీ, విద్యార్హతలు, జిల్లా) మార్చుకోవడానికి వీలు ఉంటుంది. ఈ వన్ టైమ్ డిలీట్, తిరిగి దరఖాస్తు చేసుకునే ప్రక్రియకు ప్రభుత్వం ఎలాంటి ఫీజు వసూలు చేయడం లేదు.అభ్యర్థులు ఉచితంగానే ఈ సదుపాయాన్ని వాడుకోవచ్చు.

Breaking News: అమరావతి ఆపడం ఎవరితరం కాదు, గొడ్డలి పార్టీ రోజుకో డ్రామా ఆడుతోంది: ముఖ్యమంత్రి చంద్రబాబు

Khagesh — Thu, 2 Jul 2026 08:49:09 +0530

Top Stories Today | ఈరోజు వార్తల ముఖ్యాంశాలు..

Telangana ACB : డిఎస్పి భీమ్ రెడ్డి నివాసాలపై ఏసీబీ సోదాలు- భారీ సంఖ్యలో ఆస్తులు గుర్తింపు!

Telangana ACB : డిఎస్పి భీమ్ రెడ్డి నివాసాలపై ఏసీబీ సోదాలు నిర్వహించారు. మహబూబ్‌నగర్, నలగొండ, హైదరాబాద్ ప్రాంతాల్లో అధికారులు తనిఖీలు చేస్తున్నారు. ఇప్పటికే భారీగా ఆస్తులను గుర్తించినట్టు సమాచారం. బెంగళూరు నగరంలో ఒక ఎకరా భూమి, కర్ణాటక 3 ఎకరాల భూమి, జహీరాబాద్‌లో 6 ఎకరాలు భూములకు సంబంధించిన పత్రాలను స్వాధీనం చేస్కున్నారు. భీమ్ రెడ్డి నివాసంలో భారీగా విదేశీ మద్యం సీసాలు గుర్తించారు. భారీగా బంగారు ఆభరణాలను సీజ్ చేశారు.

Chandra Babu Latest News: అమరావతి ఆపడం ఎవరితరం కాదు, గొడ్డలి పార్టీ రోజుకో డ్రామా ఆడుతోంది: ముఖ్యమంత్రి చంద్రబాబు

Chandra Babu Latest News: మావిగన్ నినాదంతోనే వచ్చే ఎన్నికల్లో ప్రజల ముందుకు వెళ్తామని చెప్పిన వైఎస్‌ జగన్‌కు ముఖ్యమంత్రి చంద్రబాబు కౌంటర్ ఇచ్చారు. ఎవరు వచ్చిన అమరావతిని కదల్చలేరని అన్నారు. గొడ్డలి పార్టీ రోజుకో డ్రామా ఆడుతోందని అన్నారు.

Kavitha Arrest: నాచారం ఇండస్ట్రియల్ ఏరియాలో తెలంగాణ రక్షణ సేన చీఫ్ కల్వకుంట్ల కవిత అరెస్ట్!

Kavitha Arrest: ఉప్పల్ నియోజకవర్గంలోని నాచారం ఇండస్ట్రియల్ ఏరియాలో తెలంగాణ రక్షణ సేన తలపెట్టిన భూ పోరాటాన్ని పోలీసులు భగ్నం చేశారు. భూపోరాటం చేసే స్థలంలో వేసిన టెంట్లు తొలగించారు. ఈ క్రమంలో పోలీసులు, తెలంగాణ రక్షణ సేన కార్యకర్తల మధ్య తోపులాట జరిగింది. పరిస్థితి అదుపులోకి తీసుకొచ్చేందుకు కల్వకుంట్ల కవితను అదుపులోకి తీసుకున్నారు.

Telangana Latest News: పోలీసులతో బీఆర్‌ఎస్‌నేతల వాగ్వాదం- మంత్రులు పిలిస్తే అడ్డుకోవడం ఏంటని ఆగ్రహం

గురుకులాల టెండర్లలో అవినీతి జరిగిందని ఆరోపణలపై మంత్రులతో చర్చిచేందుకు సిద్ధమని గన్‌పార్క్ వద్దకు బయల్దేరిన హరీష్‌రావు, ప్రవీణ్‌ కుమార్‌ను పోలీసులు అడ్డుకున్నారు. దీంతో పోలీసులకు, బీఆర్‌ఎస్ నేతలకు మధ్య వాగ్వాదం నడిచింది. మంత్రులు పిలిస్తే పోలీసులు అడ్డుకోవడం ఏంటని నేతలు ప్రశ్నించారు. కార్లు వెళ్లనీయకపోవడంతో కాలినడకన వెళ్లేందుకు నేతలు సిద్ధమయ్యారు.

Telangana Latest News: గన్ పార్క్ వద్దే చర్చిద్దాం! తెలంగాణ భవన్‌ నుంచి బయల్దేరిన హరీష్‌! మధ్యలో అడ్డుకున్న పోలీసులు !

తెలంగాణలో రాజకీయాలు ఆసక్తిగా మారాయి. తెలంగాణలో అప్పులు, అభివృద్ధి, కుంభకోణాలపై చర్చించేందుకు కాంగ్రెస్, బీఆర్‌ఎస్‌ నాయకులు సిద్ధమయ్యారు. గురుకులాల టెండర్ల విషయంలో భారీ అవినీతి జరిగిందని బీఆర్‌ఎస్ ఆరోపిస్తూ వస్తోంది. దీనిపై గన్‌పార్క్ వద్ద చర్చిద్దామని కాంగ్రెస్ సవాల్ చేసింది. దీన్ని స్వీకరించిన బీఆర్‌ఎస్ నేతలు హరీష్‌, ప్రవీణ్‌కమార్‌ తెలంగాణ భవన్‌ను బయల్దేరారు. మార్గ మధ్యలో జోక్యం చేసుకున్న పోలీసులు వారిని అడ్డుకున్నారు.

Telangana Latest News: తెలంగాణ అప్పులపై పొలిటికల్‌ హైడ్రామా! కేటీఆర్, హరీష్ చర్చకు రావాలని మంత్రులు, కాంగ్రెస్ ప్రజాప్రతినిధులు బైఠాయింపు!

Telangana Latest News: తెలంగాణ అప్పులపై రాజకీయ కాకా రేగుతోంది. రేవంత్ రెడ్డి చేసిన కామెంట్స్‌ ఆధారంగా కాంగ్రెస్, బీఆర్‌ఎస్ మధ్య సవాళ్ల పర్వం కొనసాగుతోంది. ముఖ్యమంత్రి రేవంత్ రెడ్డి చర్చకు రావాలని బీఆర్‌ఎస్ వర్కింగ్ ప్రెసిడెంట్‌ కేటీఆర్, మాజీ మంత్రి హరీష్‌ సవాల్ చేశారు. దీనికి స్పందించిన మంత్రులు తాము చర్చకు రడీ అంటూ సిద్ధమయ్యారు. ఉదయం 11 గంటలకు తెలంగాణ భవన్‌కు వస్తానని మంత్రి జూపల్లి ఇప్పటికే ప్రకటించారు. మరోవైపు తాము కూడా చర్చకు సిద్ధమని మరికొందరు మంత్రులు రెడీ అయ్యారు. వారంతా గన్‌పార్క్ వద్ద అమరవీరులకు నివాళులు అర్పించి చర్చకు వెళ్లాలని నిర్ణయించారు. అయితే చర్చించేందుకు కేసిఆర్, కేటీర్‌, హరీష్‌ రావు రావాలని డిమాండ్ చేశారు.

Hyderabad Latest News: శంషాబాద్‌ ఎయిర్‌పోర్ట్‌లో 20 మంది మహిళలు అరెస్టు- నకిలీ వీసాలతో మస్కట్ వెళ్లేందుకు యత్నం

Hyderabad Latest News: నకిలీ వీసాలతో మస్కట్ వెళ్లేందుకు యత్నించిన 20 మంది మహిళలను ఎయిర్‌పోర్ట్‌ అధికారులు అరెస్టు చేశారు. ఇమ్మిగ్రేషన్ తనిఖీలు సందర్భంగా నకిలీ వీసాల బాగోతం బయటపడింది. వారిని అదుపులోకి తీసుకున్న అధికారులు ఎయిర్‌పోర్ట పోలీసులకు అప్పగించారు.

AP TET 2026: టెట్ అభ్యర్థులకు గుడ్ న్యూస్- తప్పుల సవరణలో కీలక అప్‌డేట్‌!

AP TET 2026:ఉపాధ్యాయ అర్హత పరీక్ష(టెట్) ఆన్లైన్ దరఖాస్తు చేసిన అభ్యర్థులకు ప్రభుత్వం మరో గుడ్ న్యూస్ చెప్పింది. ఇప్పటికే అప్లై చేసిన వారు తప్పులు చేసి ఉంటే సరి చేసే మళ్లీ దరఖాస్తు చేసుకునేందుకు ప్రభుత్వం ఛాన్స్ ఇస్తోంది. దీని కోసం వన్‌టైం డిలీట్ ఆప్షన్‌ను కల్పించింది. అభ్యర్థులు ఇవాళ్టి నుంచి ఐదో తేదీ వరకు ఈ సౌకర్యాన్ని వినియోగించుకోవచ్చు.

Telangana Police vs AP Police:హైదరాబాద్‌లో ఏపీ పోలీసులపై క్రిమినల్‌ కేసు! కేవీ రెడ్డి అరెస్టుతో రేగిన వివాదం!

Khagesh — Thu, 2 Jul 2026 08:22:12 +0530

Telangana Police vs AP Police:హైదరాబాద్‌లో మంగళవారం రాత్రి చోటు చేసుకున్న పరిణామాలు సంచలనం సృష్టించాయి. ఏపీ పోలీసులు నిబంధనలు ఉల్లంఘించి హైదరాబాద్‌కు చెందిన ఓ వ్యక్తిని అరెస్టు చేయడమే కాకుండా మహిళల పట్ల అసభ్యంగా ప్రవర్తించారనే ఆరోపణలు ఇప్పుడు న్యాయపరమైన మలుపు తిరిగాయి. పోలీసులపై కేసు నమోదు చేసే వరకు సిచ్యుయేషన్ వెళ్లింది.

మంగళవారం రాత్రి సుమారు 7.30 గంటల సమయంలో హైదరాబాద్‌లోని బైరామల్‌గూడ, మధురానగర్‌లో నివసిస్తున్న కేవీ రెడ్డి ఇంటికి ఏపీ పోలీసులు వెళ్లారు. ఆంధ్రప్రదేశ్‌లోని విజయనగరం జిల్లా బొబ్బిలి నుంచి ఓ టీం వచ్చి ఆయన్ని విచారించింది. సాధారణ దుస్తుల్లో, ప్రైవేటు వాహనంలో వచ్చి పోలీసులు కేవీ రెడ్డిని తీసుకెళ్లారు. ఆయన్ని బలవంతంగా లాక్కెళ్లారని కుటుంబ సభ్యులు చెబుతున్నారు. కనీసం దుస్తులు మార్చుకునేంత టైం కా ఇవ్వలేదని ఆరోపించారు. అడ్డుగా వచ్చిన తనపై అనుచితంగా ప్రవర్తించారని ఆయన భార్య ఫిర్యాదులో పేర్కొన్నారు.

స్థానికులు వెంటనే స్పందించి ఏపీ పోలీసుల వాహనాన్ని అడ్డుకోవడంతో ఉద్రిక్తత నెలకొంది. సమాచారం అందుకున్న సరూర్‌ నగర్ పోలీసులు అక్కకడికి చేరుకొని ఏపీ పోలీసులను, విజయలక్ష్మిని పోలీస్ స్టేషన్‌కు తరలించారు. అక్క బాధితురాలి ఫిర్యాదు మేరకు బొబ్బిలి సీఐ శ్రీనివాస్‌, ఇతర సిబ్బందిపై మహిళల ఆత్మగౌరవానికి భంగం కలిగించారనే ఆరోపణలతో సరూర్‌ నగర్‌ పోలీసులు కేసు నమోదు చేశారు.

ఏపీలో జరుగుతున్న రాజకీయాలపై కేవీ రెడ్డి అనుచిత వ్యాఖ్యలు చేశారు. రెడ్ బుక్ రాజ్యాంగం అంటూ కామెంట్స్ చేశారు. విజయనగరం జిల్లా బాడంగికి చెందిన మాజీ సర్పంచ్‌ కండి రమేష్‌ దీనిపై ఫిర్యాదు చేశారు. ఏప్రిల్‌ 10న కేవీ రెడ్డిపై కేసు నమోదు అయ్యింది. ఈ కేసులో బీఎన్‌ఎస్‌ సెక్షన్లు 152, 197, 296, 353, 352తోపాటు ఐటీ యాక్ట్‌67, 67(ఏ) కింద కేసులు ఉన్నాయి. ఈ ఏడాది మే 5న కోర్టు కేవీ రెడ్డి నాన్‌ బెయిలబుల్‌ వారెంట్‌ జారీ చేసింది. దీని ఆధారంగానే ఏపీ పోలీసులు అరెస్టుకు వచ్చామని పేర్కొన్నారు.

రాష్ట్రాల మధ్య సరిహద్దులు దాటి పోలీసులు అరెస్టు చేసేటప్పుడు పాటించాల్సిన రూల్స్ పాటించలేదని ఆరోపణలు వినిపిస్తున్నాయి. సుప్రీంకోర్టు తీర్పుల ప్రకారం వేరే రాష్ట్రానికి చెందిన వ్యక్తిని అరెస్టు చేసేటప్పుడు స్థానిక పోలీసులకు ముందస్తు సమాచార ఇవ్వాలి, కానీ ఈ కేసులో ఏపీ పోలీసులు, ప్రైవేట్‌ వాహనాల్లో సివిల్ డ్రస్‌లో వచ్చి కేవీ రెడ్డిని బలవంతంగా తీసుకెళ్లడం చట్టపరమైన నిబంధనల ఉల్లంఘన అని విమర్శలు వస్తున్నాయి.

కేవీ రెడ్డిపై నమోదు చేసిన ఐటీ యాక్ట్‌ సెక్షన్లు, బీఎన్‌ఎస్‌ సెక్షన్ల తీవ్రతను బట్టి చూస్తే ఇది రాజకీయ ప్రేరేపిత చర్య అని బాధితుడి కుటుంబం వాదిస్తోంది.

Pawan Kalyan On Social Media: సోషల్ మీడియాలో విమర్శలపై పవన్ సీరియస్‌! ప్రత్యేక వ్యవస్థ ఏర్పాటుకు ఆదేశం!

Khagesh — Wed, 1 Jul 2026 19:47:20 +0530

Andhra Pradesh Pawan Kalyan On Social Media: ఫ్రీడమ్ ఆఫ్ స్పీచ్ పేరుతో సోషల్ మీడియా చేస్తున్న విమర్శలపై ఆంధ్రప్రదేశ్ డిప్యూటీ సీఎం పవన్ కల్యాణ్ సీరియస్ అయ్యారు. ఎలాంటి ఆధారాలు లేకుండా ఇష్టం వచ్చినట్టు మాట్లాడుతున్నారని మండిపడ్డారు. ఇలాంటి వారిని వదిలేస్తుంటే చేతకానివారిలా చూస్తున్నారని ఆగ్రహం వ్యక్తం చేశారు. ఇకపై ఎలాంటి ఆధారాలు లేకుండా చేసే విమర్శలకు ప్రతిఫలం చెల్లించుకోవాల్సి ఉంటుందని పవన్ హెచ్చరించారు. ఇలాంటి వాటి కోసం తన ఆఫీస్‌లో ప్రత్యేక వ్యవస్థ ఏర్పాటు చేసినట్టు వెల్లడించారు.

కులాలు, మతాలను రెచ్చగొట్టేలా శృతిమించి మాట్లాడుతున్నారని పవన్ ఫైర్ అయ్యారు. ఇలాంటి వారిపై కచ్చితంగా ఆధారాలతో ఫిర్యాదులు వస్తే చర్యలు తీసుకుంటామని వెల్లడించారు. ఫ్రీడమ్ ఆఫ్‌ స్పీచ్‌ అంటే వ్యక్తిత్వహననానికి పాల్పడటం కాదని చెప్పారు. ప్రజాస్వామ్యంలో ప్రశ్నించడం, విమర్శలు చేయడం స్వాగతించదగ్గ పరిణామమేనని అన్నారు. అయితే రాజ్యాంగ కల్పించిన హక్కును ఇష్టం వచ్చినట్టు అన్వయించుకొని బూతులతో రెచ్చిపోతున్నారని మండిపడ్డారు. ఎలాంటి ఆధారాలు లేకుండా చేసే విమర్శలకు కచ్చితంగా మూల్యం చెల్లించుకోవాల్సి ఉంటుందని చెప్పుకొచ్చారు.

"రాజ్యాంగం కల్పించిన భావప్రకటన స్వేచ్ఛను ఎన్డీఏ ప్రభుత్వం పూర్తిగా గౌరవిస్తుంది. వాక్ స్వాతంత్ర్యం అనేది బేషరతు అయినది కాదు.. ఆర్టికల్ 19(2) ప్రకారం కొన్ని పరిమితులు ఉన్నాయి. ప్రభుత్వాలను ప్రశ్నించే, విమర్శించే హక్కు ప్రజాస్వామ్యంలో అందరికీ ఉంది. నకిలీ ఖాతాల వెనుక దాక్కుని బూతు పదజాలం ఉపయోగించడం, క్యారెక్టర్ అస్సాసినేషన్ చేయడం క్రిమినల్ నేరం. మహిళలను లక్ష్యంగా చేసుకుని అసభ్యకరంగా మాట్లాడితే చట్టపరంగా కఠిన చర్యలు తప్పవు. మతపరమైన నమ్మకాలను, దేవుళ్లను అవమానించడం రాజ్యాంగ పరిధిలోకి రాదు. నేరానికి, నేరస్థులకు ఎటువంటి కులం, మతం, రాజకీయ అనుబంధం ఉండదు. తప్పు చేసి తప్పించుకోవడానికి కులం, మతం, రాజకీయం వెనుక దాక్కోవాలని చూడొద్దు. సోషల్ మీడియా వేధింపుల అదుపునకు ఉప ముఖ్యమంత్రి కార్యాలయంలో ప్రత్యేక యంత్రాంగం ఏర్పాటు. బాధితులు తమ వద్ద ఉన్న స్క్రీన్‌షాట్లు, లింకులు, వీడియో ఆధారాలను డిప్యూటీ సీఎం ఆఫీస్‌కు సమర్పించవచ్చు."

వాక్ స్వాతంత్ర్యం… సోషల్ మీడియా దుర్వినియోగంపై ఉప ముఖ్యమంత్రి శ్రీ @PawanKalyan గారు సందేశం

Live Link: https://t.co/PZ5dnmmd9C
— JanaSena Party (@JanaSenaParty) July 1, 2026

నేరస్తులకు కులాలు, మతాలు ఉండవని, వారి ఆలోచనే వేరుగా ఉంటుందని పవన్ అభిప్రాయపడ్డారు. ఇకపై సోషల్ మీడియా ద్వారా వేధింపులకు గురయ్యే వారికి అండగా ఉంటామని భరోసా ఇచ్చారు. సైబర్ నేరగాళ్లు, ఇలాంటి రెచ్చగొట్టే వారి పట్ల అప్రమత్తంగా ఉండాలని ప్రజలకు పిలుపునిచ్చారు. చట్టాలను మీరి ఏం చేసినా శిక్ష అనుభవించాల్సి ఉంటుందన్నారు. సోషల్ మీడియాలో వ్యక్తిగత వివరాలు షేర్ చేయవద్దని, ఇతరులను దూషించే కంటెంట్‌ను కూడా షేర్ చేయొద్దని పిలుపునిచ్చారు.

"సోషల్ మీడియా నేరస్థులపై కొత్త చట్టాలు BNS, BNSS, ఐటీ చట్టం 2000 కింద కఠిన కేసులు. తప్పుడు ప్రచారాలు, పుకార్లు వ్యాప్తి చేస్తే BNS సెక్షన్ 353 కింద చర్యలు.ఐడెంటిటీ థెఫ్ట్, నకిలీ ఖాతాల క్రియేషన్ పై ఐటీ యాక్ట్ సెక్షన్ 66C, 66D కింద కఠిన చర్యలు. వ్యవస్థీకృత నేరస్థులను ఏరిపారేయడానికి సైబర్ క్రైమ్ పోలీసులతో కలిసి 'ప్రత్యేక టాస్క్ ఫోర్స్' ఏర్పాటు. ప్రస్తుతం ఉన్న చట్టాలు సరిపోకపోతే, సోషల్ మీడియా దుర్వినియోగాన్ని అరికట్టడానికి మరిన్ని కఠిన చట్టాలు తెస్తాం. సోషల్ మీడియాలో వచ్చే తప్పుడు ప్రచారాలను, బెదిరింపులను ఫార్వార్డ్ చేసి ప్రోత్సహించవద్దు. మన మాటల్లో బాధ్యత, భాషలో గౌరవం ఉండాలి.. పరిధులు దాటితే చట్టపరమైన పరిణామాలు తప్పవు."

Chandrababu Naidu Reaction Cattle Death: కన్నీటి ఏరువాక.. తుంగభద్రలో కాడెద్దుల మృతి! చలించిపోయిన సీఎం చంద్రబాబు.. రైతు కుటుంబానికి తక్షణ సాయం!

Raja Sekhar Allu — Wed, 1 Jul 2026 16:27:31 +0530

Tungabhadra River Cattle Death: ఆంధ్రప్రదేశ్‌లో అత్యంత పవిత్రమైన, వ్యవసాయ పండుగ రోజైన ఏరువాక పౌర్ణమి నాడే ఒక అన్నదాత కుటుంబంలో తీరని విషాదం నిండింది. కర్నూలు జిల్లా మంత్రాలయం మండలం మంచాల గ్రామానికి చెందిన కురవ సురేష్ అనే నిరుపేద రైతు.. తన ప్రాణం కంటే ఎక్కువగా చూసుకునే రెండు కాడెద్దులు తుంగభద్ర నదిలో ప్రమాదవశాత్తూ మునిగి చనిపోయాయి. వ్యవసాయ సీజన్ ప్రారంభమయ్యే రోజే, చేతికొచ్చిన జంట ఎద్దులను కోల్పోవడంతో ఆ రైతు కుటుంబం నది ఒడ్డునే పశువుల మృతదేహాలపై పడి కన్నీరుమున్నీరుగా విలపించిన దృశ్యాలు సోషల్ మీడియాలో వైరల్‌గా మారి ప్రతి ఒక్కరినీ కంటతడి పెట్టించాయి.

నదిలో నీరు తాగించబోయి ప్రమాదం

ఏరువాక పౌర్ణమి పర్వదినాన్ని పురస్కరించుకుని రైతు కురవ సురేష్ తన రెండు ఎద్దులను శుభ్రం చేసి, పూజించడానికి తుంగభద్ర నది తీరానికి తీసుకెళ్లారు. అయితే నదిలో నీరు తాగుతున్న సమయంలో, బురద గుంతల్లోకి కాలు జారడంతో ఆ రెండు ఎడ్లు నీటిలో మునిగిపోయాయి. వాటిని కాపాడుకునేందుకు సురేష్ ఎంత ప్రయత్నించినప్పటికీ ఫలితం లేకుండా పోయింది. పశువులను కేవలం జంతువులుగా కాకుండా, తమ సంపదగా, కుటుంబ సభ్యుల్లా భావించే భారతీయ రైతు సంస్కృతికి అద్దం పడుతూ.. ఆ మూగజీవాల మరణాన్ని తట్టుకోలేక ఆ కుటుంబం రోదించిన తీరు ఊరంతటా శోకసంద్రాన్ని నింపింది.

అన్నదాత ఆవేదనకు చలించిన సీఎం చంద్రబాబు

ఈ హృదయవిదారక ఉదంతం సామాజిక మాధ్యమాల ద్వారా ఆంధ్రప్రదేశ్ ముఖ్యమంత్రి నారా చంద్రబాబు నాయుడు దృష్టికి వెళ్ళింది. రైతు సురేష్ కుటుంబం పడుతున్న ఆవేదనను చూసి ఆయన తీవ్రంగా చలించిపోయారు. ఈ ఘటనపై సీఎం స్పందిస్తూ.. మన సంస్కృతిలో పశువులను సంపదగా భావిస్తాం. రైతన్నకు వెన్నుదన్నుగా ఉండేవి ఆ కాడెద్దులే. అన్నదాతకు పవిత్రమైన రోజైన ఏరువాక పౌర్ణమి నాడు ఇవి మృతి చెందడం, ఆ యజమాని కుటుంబం ఆవేదనతో విలపించడం నన్నెంతో కలచి వేసింది. ఎడ్లు లేని లోటు పూడ్చలేనిదైనప్పటికీ.. ఆ కుటుంబానికి ప్రభుత్వం తరపున తక్షణమే పరిహారం అందించేలా చర్యలు తీసుకోవాలని కర్నూలు జిల్లా కలెక్టర్‌ను ఆదేశించాను అని ప్రకటించారు.

పశువులను సంపదగా భావిస్తాం. రైతన్నకు వెన్నుదన్నుగా ఉండేవి కాడెద్దులు. కుటుంబ సభ్యుల్లా భావించే రెండు ఎద్దులు తుంగభద్ర నదిలో ప్రమాదవశాత్తూ చనిపోవడం ఎంతో బాధ కలిగించింది. అన్నదాతకు పవిత్రమైన రోజైన ఏరువాక పౌర్ణమి నాడు ఇవి మృతి చెందడం, ఆ యజమాని కుటుంబం ఆవేదనతో విలపించడం నన్నెంతో… pic.twitter.com/ivz4SXAfrU
— N Chandrababu Naidu (@ncbn) June 30, 2026

ఆసరాగా నిలిచిన ప్రభుత్వం.. మానవీయతకు అద్దం పట్టిన ఘటన!

ప్రాణంలా చూసుకునే ఎడ్లను కోల్పోయి, వ్యవసాయం ఎలా చేయాలో తెలియక దిక్కుతోచని స్థితిలో ఉన్న ఆ నిరుపేద రైతు కుటుంబానికి ప్రభుత్వం తరపున సాయం అందించాలని ముఖ్యమంత్రి సూచించడంపై సర్వత్రా హర్షం వ్యక్తమవుతోంది. ఆర్థిక సహాయం ఎడ్ల ప్రాణాలను తిరిగి తీసుకురాలేకపోయినా.. కొత్త సీజన్‌లో ఆ రైతు మళ్లీ నిలదొక్కుకోవడానికి, మరో కాడిని కొనుగోలు చేయడానికి ఈ ప్రభుత్వ సాయం ఎంతో ఆసరాగా నిలవనుంది. పాలకుల గుండెల్లో సామాన్య రైతుల పట్ల ఉండే మానవీయతకు, తక్షణ స్పందనకు ఈ ఘటన ఒక ప్రతీకగా నిలిచింది.