kurnool

Andhra Pradesh News: సీమ రాత మార్చేలా రాయలసీమ రైజింగ్.. రూ. లక్ష కోట్లతో హార్టికల్చర్ హబ్.. మదనపల్లెలో పనులకు నేడు శ్రీకారం

Shankar Dukanam — Fri, 2 Oct 2026 08:53:49 +0530

మదనపల్లె: ఇదివరకే రాయల్ ఎన్‌ఫీల్డ్ కంపెనీ సీమకు వచ్చేలా చేసిన కూటమి ప్రభుత్వం తాజాగా రాయలసీమ రాతను మార్చేందుకు చర్యలు చేపట్టింది. రాయలసీమతో పాటు ఉమ్మడి ప్రకాశం జిల్లా రాతను మార్చేలా, వాటిని గ్లోబల్‌ హార్టికల్చర్‌ హబ్‌ గా తీర్చిదిద్దేందుకు కేంద్ర, రాష్ట్ర ప్రభుత్వాలు కలిసి రూ.1 లక్ష కోట్లతో ‘రాయలసీమ రైజింగ్‌’ పేరిట భారీ ప్లాన్ రూపొందించాయి. కరువు గడ్డపై ఈ ప్రాజెక్టు ద్వారా ఆయా జిల్లాల్లో మౌలిక వసతుల కల్పనకు రూ.40,352 కోట్లు ఖర్చు చేయనున్నారు. మరోవైపు ప్రైవేట్‌ నుంచి మరో రూ.60,000 కోట్ల పెట్టుబడులు రానున్నాయని కూటమి ప్రభుత్వం తెలిపింది. కరువుతో అల్లాడిన చోట నేడు ఉద్యాన పంటల ఉత్పత్తి, పంటకోత, గ్రేడింగ్, ప్యాకింగ్, కోల్డ్‌ స్టోరేజ్, ప్రాసెసింగ్, ఉత్పత్తులకు బ్రాండింగ్, రవాణా నుంచి దేశీయ, అంతర్జాతీయ మార్కెటింగ్ వరకు అన్నిరకాల సౌకర్యాలను సమకూర్చనున్నారు.

నేడు మదనపల్లెలో హార్టికల్చర్ హబ్ ప్రారంభం

అన్నమయ్య జిల్లాలోని మదనపల్లెలో శుక్రవారం ఈ ఉద్యానహబ్‌ పనులను ప్రారంభించనున్నారు. కేంద్ర ఆర్థిక మంత్రి నిర్మలా సీతారామన్‌, సీఎం చంద్రబాబు, డిప్యూటీ సీఎం పవన్‌ కల్యాణ్‌లు సీమ దశాదిశను మార్చే హార్టికల్చర్ హబ్ ప్రారంభానికి శ్రీకారం చుట్టనున్నారు. అలాగే, రిలయన్స్ సహకారంతో ఏర్పాటు చేయనున్న 'ఇండియన్ స్కూల్ ఆఫ్ అగ్రికల్చర్'కు సైతం శంకుస్థాపన చేయనున్నారు. రిలయెన్స్ ఇండస్ట్రీస్ ఎగ్జిక్యూటీవ్ డైరెక్టర్ అనంత్ అంబానీ ఈ కార్యక్రమానికి హాజరుకానున్నారు.

5,869 గ్రామాల్లో విస్తరణ
ఈ గ్లోబల్ హార్టికల్చర్ హబ్ ఏర్పాటు కోసం ఏపీ సీఎం చంద్రబాబు గత 6 నెలలుగా వ్యవసాయ, ఉద్యాన, ఆర్థిక, జలవనరుల శాఖలతో సమీక్షలు నిర్వహించారు. అదే సమయంలో కేంద్ర ప్రభుత్వంతో సంప్రదింపులు జరిపి అనుమతులు సాధించారు. ఈ హార్టికల్చర్ హబ్ పనులు అనంతపురం, అన్నమయ్య, చిత్తూరు, కర్నూలు, నంద్యాల, శ్రీసత్యసాయి, తిరుపతి, వైఎస్సార్‌ కడప లాంటి సీమ జిల్లాలతో పాటు, ప్రకాశం, మార్కాపురం జిల్లాల్లోని 303 మండలాల పరిధిలోని 5,869 గ్రామాల్లో జరగనున్నాయి.

రాయలసీమను ప్రపంచ ఉద్యాన కేంద్రంగా తీర్చిదిద్దే రాయలసీమ విజయీభవ కారక్రమానికి రేపు శ్రీకారం చుడుతోంది కూటమి ప్రభుత్వం. ఇందులో భాగంగా సీమలో ఉద్యాన సాగు, నీటి పారుదల ప్రాజెక్టులు, మౌలిక సదుపాయాల కల్పనల పై రూ. 1 లక్ష కోట్లతో వివిధ కార్యక్రమాలు చేపట్టనుంది. #RayalaseemaVijayeebhava… pic.twitter.com/E0W7fsdoBP
— Telugu Desam Party (@JaiTDP) October 1, 2026

మూడు దశల్లో అభివృద్ధి పనులు

మొదటి దశ (2026-27): రూ.12,066 కోట్లతో 72 క్లస్టర్లలో పనులు జరగనున్నాయి.

రెండో దశ (2027-28): రూ.15,036 కోట్లతో 67 క్లస్టర్లలో పనులు చేస్తారు.

మూడో దశ (2028-29): రూ.13,250 కోట్లతో 62 క్లస్టర్లలో పనులు.

సాగు విస్తరణ, దిగుబడి లక్ష్యాలు
ప్రస్తుతం ఉన్న 20.77 లక్షల ఎకరాల ఉద్యాన సాగును మరో 9 లక్షల ఎకరాలకు విస్తరించేలా కూటమి ప్రభుత్వం ప్లాన్ చేసింది. ఉద్యాన ఉత్పత్తి సామర్థ్యాన్ని ప్రస్తుతం ఉన్న 222 లక్షల మెట్రిక్‌ టన్నుల నుంచి 435 లక్షల మెట్రిక్‌ టన్నులకు పెంచడం ద్వారా సుమారు 9.60 లక్షల మంది రైతులకు లబ్ధి చేకూరనుంది. మరోవైపు 9 లక్షల ఎకరాల కొత్త ఆయకట్టు సాగులోకి రావడంతో పాటు, 4.30 లక్షల ఎకరాల ఆయకట్టు స్థిరీకరణ జరిగేలా కూటమి సర్కార్ ప్లాన్ చేసింది. ఏపీని 'ఫ్రూట్ బౌల్'గా నిలపడమే లక్ష్యంగా మామిడితో పాటు, అరటి, టమాటా, దానిమ్మ, డ్రాగన్‌ ఫ్రూట్, అవకాడో, బెర్రీలు మొదలైన పంటల సాగులో రైతులను ప్రోత్సహించనున్నారు.

ఫ్రూట్‌ బౌల్‌ ఆఫ్‌ ఇండియాగా రాయలసీమ – మంత్రి అచ్చెన్నాయుడు

తక్కువ నీటితో అధిక ఆదాయం ఇచ్చే ఉద్యాన పంటల వైపు రైతులు అడుగులు వేయాలన్నదే తమ ప్రభుత్వ ప్రధాన లక్ష్యమని ఏపీ వ్యవసాయశాఖ మంత్రి అచ్చెన్నాయుడు తెలిపారు. రాయలసీమలో తరచూ ఏర్పడే కరువు పరిస్థితులు, మార్కెట్ అనుసంధాన సమస్యలకు పరిష్కారంగా తక్కువనీటితో పంటలు పండిస్తూ, అధిక లాభాలు గడించేలా ఈ సమగ్ర ప్రణాళికను తెచ్చినట్లు పేర్కొన్నారు. ఉద్యాన రంగంలో అరటి ఎగుమతుల్లో ఇప్పటికే అనంతపురం నుంచి ఇరాన్‌కు లక్ష టన్నులకు పైగా ఎగుమతి చేసే స్థాయికి చేరామన్నారు. రాయలసీమ త్వరలోనే 'ఫ్రూట్‌ బౌల్‌ ఆఫ్‌ ఇండియా'గా రూపుదిద్దుకుంటోందని ధీమా వ్యక్తం చేశారు.

మదనపల్లెలో ఇండియన్ స్కూల్ ఆఫ్ అగ్రికల్చర్..

రాయలసీమలోని మదనపల్లెలో 100 ఎకరాల విస్తీర్ణంలో దేశంలోనే మొదటి ఇండియన్‌ స్కూల్‌ ఆఫ్‌ అగ్రికల్చర్‌ (ISA) ఏర్పాటవుతోంది. సీఎం చంద్రబాబు సూచనలతో రిలయన్స్‌ సంస్థ దీని నిర్వహణ బాధ్యతలను స్వీకరించేందుకు ముందుకు రావడం విశేషం. డిజిటల్‌ అగ్రికల్చర్, ప్రెసిషన్‌ ఫార్మింగ్, క్రాప్‌ మానిటరింగ్, స్మార్ట్‌ ఇరిగేషన్, మార్కెట్‌ ఇంటెలిజెన్స్‌ వంటి మోడ్రన్ పద్ధతులపై రైతులకు ఈ సంస్థ సలహాలు, సూచనలు ఇచ్చి వారిని ప్రోత్సహించనుంది. ఈ శిక్షణ, అదనపు సమాచారంతో రైతులు మెరుగైన దిగుబడిని పొందవచ్చు.

Palle Panduga 3.0: వైసీపీ ఐదేళ్ల కంటే కూటమి రెండేళ్లలో పదింతల రోడ్లు.. 161 నియోజకవర్గాల్లో డొంక రోడ్లు - పవన్ కల్యాణ్

Satyaprasad Bandaru — Tue, 29 Sep 2026 17:39:04 +0530

Palle Panduga 3.0: "పల్లెల అభివృద్ధే రాష్ట్ర ప్రగతికి పునాది. ప్రతి కుటుంబం ఆర్థికంగా బలపడేలా, ప్రతి గ్రామం స్వయం సమృద్ధి సాధించేలా సమగ్ర అభివృద్ధి దిశగా కూటమి ప్రభుత్వం అడుగులు వేస్తోంది" అని డిప్యూటీ సీఎం పవన్ కల్యాణ్ అన్నారు. రహదారులు, తాగు నీరు, వ్యవసాయం, ఉపాధి, పరిశుభ్రత, మౌలిక వసతులతోపాటు పర్యాటక రంగానికీ ప్రాధాన్యం ఇస్తూ గ్రామీణ ప్రాంతాల రూపురేఖలు మార్చే లక్ష్యంతో ‘పల్లె పండుగ 3.0’కు శ్రీకారం చుట్టామని తెలిపారు. పల్లె బలపడితేనే రాష్ట్ర భవిష్యత్తు బలపడుతుందనే సంకల్పంతో ప్రతి పల్లెను అభివృద్ధికి చిరునామాగా తీర్చిదిద్దుతున్నామని పేర్కొన్నారు. మంగళవారం శ్రీ పొట్టి శ్రీరాములు నెల్లూరు జిల్లా ఉదయగిరిలో పల్లెపండుగ 3.0 కార్యక్రమం ద్వారా 11,085 కోట్లతో చేపట్టిన అభివృద్ధి పనులకు సీఎం చంద్రబాబుతో కలిసి ప్రారంభించారు.

ఈ సందర్భంగా పవన్ కల్యాణ్ మాట్లాడుతూ.. “ఈ రెండున్నరేళ్లలో పల్లెపండుగ, జలజీవన్ మిషన్-అమరజీవి జలధార, 15వ ఆర్థిక సంఘం నిధుల సద్వినియోగం, 10 వేలకుపైగా పదోన్నతులు, డి.డి.ఓ కార్యాలయాల ఏర్పాటు ఇలా ఎన్నో సంస్కరణలు చేపట్టామని చెప్పారు. ఒకప్పుడు పంచాయతీలు బ్లీచింగ్ పౌడర్ కూడా కొనలేని పరిస్థితి నుంచి, ఇప్పుడు తమ గ్రామానికి అవసరమైన పనులను తామే నిర్ణయించుకుని, తమ గ్రామ అభివృద్ధికి తామే ప్రణాళికలు రూపొందించుకునే స్థాయికి పంచాయతీ రాజ్ వ్యవస్థను తీసుకొచ్చామన్నారు.

రెండేళ్లలోనే పదింతల రోడ్లు

వైసీపీ ప్రభుత్వం ఐదేళ్లలో 880 కి.మీ. సీసీ రోడ్లు నిర్మిస్తే, కూటమి ప్రభుత్వం కేవలం రెండేళ్లలోనే దానికి 10 రెట్లు ఎక్కువగా, దాదాపు 9,000 కి.మీ. సీసీ రోడ్లను పూర్తి చేసిందని డిప్యూటీ సీఎం పవన్ కల్యాణ్ అన్నారు. గతంలో 304 మినీ గోకులాలు మాత్రమే నిర్మిస్తే, మనం దాదాపు 100 రెట్లు ఎక్కువగా, 30 వేలకు పైగా మినీ గోకులాలను నిర్మించామన్నారు. అలాగే, పల్లెపండుగ ద్వారా 13,326 గ్రామ పంచాయతీల్లో ప్రజల అవసరాలకు అనుగుణంగా అభివృద్ధి పనులు చేపట్టామన్నారు. ఇందులో భాగంగా 1 లక్ష 15 వేల పంట కుంటలను నిర్మించడంతోపాటు, 2 లక్షల ఎకరాల్లో పండ్ల తోటలను అభివృద్ధి చేశామని చెప్పారు. మరోవైపు, 10 వేల కిలోమీటర్ల బీటీ రోడ్ల పనులు వివిధ దశల్లో పురోగతిలో ఉన్నాయన్నారు. కూటమి ప్రభుత్వం ఎస్సీ, ఎస్టీ, ఇతర కాలనీల్లో 6,500 కిలోమీటర్ల సీసీ రోడ్లను ఇప్పటికే పూర్తి చేసిందని చెప్పారు. గిరిజన గ్రామాలకు అడవి తల్లిబాట కార్యక్రమం కింద రూ.2,180 కోట్ల వ్యయంతో సుమారు 2,437 కిలోమీటర్ల రహదారులను నిర్మించాలనే లక్ష్యాన్ని నిర్దేశించుకున్నామన్నారు. ఇందులో ఇప్పటికే 1500 కిలోమీటర్లకు పైగా అనుసంధాన రహదారులను నిర్మించామని పవన్ చెప్పారు.

Also Read: మాజీ సీఎం జగన్ మోహన్ రెడ్డిని బీజేపీ దగ్గరకు రానీయడం లేదు: ఏపీ మంత్రి సంచలనం

పల్లెపండుగ 3.0తో కొత్త ఊపు

రాష్ట్ర చరిత్రలో గతంలో ఏ ప్రభుత్వం చేయలేని విధంగా, ప్రధాని మోదీ సహకారంతో, సీఎం చంద్రబాబు నాయకత్వంలో, కేంద్ర, రాష్ట్ర ప్రభుత్వాల సమన్వయంతో గ్రామీణ అభివృద్ధిని పెద్ద ఎత్తున ముందుకు తీసుకెళ్లబోతున్నామని పవన్ కల్యాణ్ అన్నారు. రూ.50 వేల కోట్లతో పల్లెపండుగ, జల జీవన్ మిషన్ - అమరజీవి జలధార వంటి కార్యక్రమాల ద్వారా గ్రామీణ ప్రాంతాల్లో అభివృద్ధి పనులను వేగవంతం చేయబోతున్నామన్నారు. ఇందులో రూ.30 వేల కోట్లతో అక్టోబర్ 5న సీఎం చంద్రబాబుతో కలిసి జల జీవన్ మిషన్ - అమరజీవి జలధార కార్యక్రమం ద్వారా మల్టీ విలేజ్ స్కీమ్, సింగిల్ విలేజ్ స్కీమ్ పనులకు శంకుస్థాపనలు చేయబోతున్నామని చెప్పారు. అలాగే రూ.9 వేల కోట్లతో పల్లెపండుగ 1.0, 2.0 కార్యక్రమాలను విజయవంతంగా పూర్తి చేసి, ఈ రోజు రూ.11,085 కోట్లతో ప్రతిష్టాత్మకంగా పల్లెపండుగ 3.0ను ప్రారంభిస్తున్నామన్నారు. ఇందులో భాగంగా 6 వేల కిలోమీటర్ల సీసీ రోడ్లు, 9,500 కిలోమీటర్ల బీటీ రోడ్లు, మరో 22,500 మినీ గోకులాలు, 50 వేల ఎకరాల్లో పండ్ల తోటలను అభివృద్ధి చేయబోతున్నామని చెప్పారు. అలాగే, 1,000 కిలోమీటర్ల మ్యాజిక్ డ్రెయిన్లు, బస్ షెల్టర్లు, గ్రామ పంచాయతీ భవనాలు, రచ్చబండలు తదితర అభివృద్ధి పనులను చేపట్టబోతున్నామని చెప్పారు.

Also Read: దసరా ఉత్సవాల సందర్భంగా విజయవాడ వచ్చే భక్తులు, భవానీలు ఈ ఏర్పాట్ల గురించి తెలుసుకోండి!

పైలెట్ ప్రాజెక్ట్‌గా డొంక రోడ్ల అభివృద్ధి

ఎన్నో ఏళ్లుగా రైతులు తమ పంటలను మార్కెట్‌కు తరలించేందుకు డొంక రోడ్ల వల్ల ఎదుర్కొంటున్న ఇబ్బందులను దృష్టిలో పెట్టుకుని, ఈ సమస్యకు శాశ్వత పరిష్కారం చూపే దిశగా ముందుగా పైలెట్ ప్రాజెక్ట్‌గా ప్రతి నియోజకవర్గంలో ఒక డొంక రోడ్డును అభివృద్ధి చేయబోతున్నామని డిప్యూటీ సీఎం పవన్ కల్యాణ్ తెలిపారు. ఆ తర్వాత 161 గ్రామీణ నియోజకవర్గాల్లో డొంక రోడ్లకు ప్రత్యేక ప్రాధాన్యత ఇచ్చి, రైతులు తమ పంటలను సులభంగా మార్కెట్‌కు తీసుకెళ్లేలా రహదారి సౌకర్యాన్ని మెరుగుపరచబోతున్నామన్నారు.

Also Read: రైలు ప్రయాణికులకు గుడ్‌న్యూస్.. మచిలీపట్నం - కర్నూలు మధ్య కొత్త రైలు, వారానికి 3 రోజులు సేవలు

Machilipatnam To Kurnool Trains: రైలు ప్రయాణికులకు గుడ్‌న్యూస్.. మచిలీపట్నం - కర్నూలు మధ్య కొత్త రైలు, వారానికి 3 రోజులు సేవలు

Shankar Dukanam — Tue, 29 Sep 2026 11:27:01 +0530

Trains Between Machilipatnam and Kurnool | న్యూఢిల్లీ: ఏపీలో రైలు ప్రయాణికులకు మరో శుభవార్త వచ్చింది. మచిలీపట్నం - కర్నూలు మధ్య కొత్త ఎక్స్‌ప్రెస్ రైలు సర్వీసుకు రైల్వే శాఖ (Indian Railways) ఆమోదం తెలిపింది. ప్రయాణికుల రద్దీ, అవసరాలను దృష్టిలో ఉంచుకుని ఈ రూట్‌లో వారానికి 3 రోజుల పాటు ఈ కొత్త రైలును నడపాలని రైల్వే అధికారులు నిర్ణయించారు. మచిలీపట్నం నుంచి కర్నూలు సిటీ వరకు సుమారు 500 కిలోమీటర్ల దూరం ఈ కొత్త ఎక్స్‌ప్రెస్ రైలు ప్రయాణించి సేవలు అందించనుంది.

ఈ రైలు సర్వీసు షెడ్యూల్‌కు సంబంధించి కూడా క్లారిటీ ఇచ్చారు. మచిలీపట్నం నుంచి ప్రతి సోమవారం, బుధవారం, శనివారాల్లో ఈ రైలు బయలుదేరుతుంది. అలాగే తిరుగు ప్రయాణంలో కర్నూలు సిటీ నుంచి ప్రతి మంగళవారం, గురువారం, ఆదివారాల్లో రైలు సేవలు అందించనుందని అధికారులు తెలిపారు. ఈ కొత్త రైలు అందుబాటులోకి రావడం వల్ల కృష్ణా, గుంటూరు, ప్రకాశం, రాయలసీమ ప్రాంతాల మధ్య ప్రయాణికులకు రైలు ప్రయాణం మరింత సులభతరం కానుంది.

రైలు ఆగే స్టేషన్లు ఇవే
గుడివాడ
విజయవాడ
నరసరావుపేట
వినుకొండ
దొనకొండ
మార్కాపురం రోడ్డు
కంభం
గిద్దలూరు
దిగువమెట్ట
నంద్యాల
బేతంచెర్ల
డోన్ రైల్వే స్టేషన్లలో కొత్త ఎక్స్‌ప్రెస్ రైలు ఆగుతుందని రైల్వే శాఖ స్పష్టం చేసింది.

మరింత సులభతరం కానున్నాయి.

కర్నూల్ లో భారీ వర్షాలు కనిపించని రోడ్డు

ABP Desam — Thu, 24 Sep 2026 12:16:55 +0530

ఉమ్మడి కర్నూలు జిల్లాలో కురుస్తున్న భారీ వర్షాలకు జనజీవనం అస్తవ్యస్తమైంది. కుండపోత వర్షం కారణంగా ప్రధాన రోడ్లు అన్నీ నీట మునిగిపోయి, అసలు రోడ్లు ఎక్కడ ఉన్నాయో కూడా కనిపించని దయనీయ పరిస్థితి ఏర్పడింది. లోతట్టు ప్రాంతాలు జలమయం కావడంతో ప్రయాణికులు, స్థానికులు తీవ్ర ఇబ్బందులు పడుతున్నారు.

కర్నూలు జిల్లా లో భారీ వర్షాలు తుంగభద్ర నదికి వరద

ABP Desam — Thu, 24 Sep 2026 12:11:48 +0530

ఉమ్మడి కర్నూలు జిల్లాలో కురుస్తున్న భారీ వర్షాలకు తోడు, తుంగభద్ర నదికి వరద నీరు భారీగా వచ్చి చేరుతోంది. ఉప్పొంగుతున్న వరద ప్రవాహంతో నది ప్రాంతాలు జలమయమయ్యే అవకాశం ఉండటంతో అధికారులు, తీర ప్రాంత ప్రజలు తీవ్ర అప్రమత్తమయ్యారు. వరద ఉద్ధృతి క్రమంగా పెరుగుతుండటంతో స్థానికుల్లో ఆందోళన నెలకొంది.

Rayalaseema Horticulture Hub: రూ.లక్ష కోట్లతో రాయలసీమలో హార్టికల్చర్ హబ్.. అక్టోబర్ 2న సీఎం చంద్రబాబు శంకుస్థాపన

Satyaprasad Bandaru — Wed, 23 Sep 2026 14:58:47 +0530

Rayalaseema Horticulture Hub: రాయలసీమ దశ దిశ మార్చే హార్టికల్చర్ హబ్ ప్రాజెక్టును రాష్ట్ర ప్రభుత్వం త్వరలో ప్రారంభించనుంది. మదనపల్లెలో అక్టోబర్ 2న కేంద్రమంత్రి నిర్మాలా సీతారామన్, సీఎం చంద్రబాబు కలిసి ఈ ప్రాజెక్టును ప్రారంభిచనున్నారు. కేంద్ర ప్రభుత్వం పూర్వోదయ పథకం కింద రాయలసీమ హార్టికల్చర్ హబ్ ప్రాజెక్టుకు రూ.40 వేల కోట్లు పలు రూపాల్లో విడుదల చేయనుంది. వీటికి తోడు మరో రూ.60 వేల కోట్లు ప్రైవేటు పెట్టుబడుల ద్వారా రానున్నాయి. రాయలసీమ నాలుగు ఉమ్మడి జిల్లాలతో పాటు ప్రకాశం, నెల్లూరు జిల్లాల్లో ఈ ప్రాజెక్టును అమలుచేయనున్నారు. రాష్ట్ర ప్రభుత్వం కేంద్రంతో సమన్వయం చేసుకుని ఈ ప్రాజెక్టును సాధించింది. దీని ద్వారా కరువు పీడిత ప్రాంతాల్లో హార్టికల్చర్ రంగానికి ఊతం ఇచ్చే కార్యక్రమాలు చేపట్టనున్నారు.

ఒకవైపు సాగునీటి ప్రాజెక్టులు పూర్తి చేసి సాగునీరు అందిస్తున్న ప్రభుత్వం.. మరోవైపు హార్టికల్చర్‌ను ప్రోత్సహించడం ద్వారా ఆ ప్రాంతాల్లో సంపద పెరిగేందుకు, రైతులు లబ్ది పొందేందుకు ఈ కార్యక్రమాన్ని చేపడుతుందని అధికారులు తెలిపారు. మదనపల్లెలో జరిగే ఈ కార్యక్రమంతో పాటు ‘ఇండియన్ స్కూల్ ఆఫ్ అగ్రికల్చర్’కు కూడా శంకుస్థాపన చేయనున్నారు. వ్యవసాయం రంగంలో అత్యున్నత ప్రమాణాలతో ఏర్పాటు అయ్యే ఈ అగ్రికల్చర్ స్కూల్‌ను రిలయన్స్ సంస్థ ఏర్పాటు చేస్తోంది.

5 రోజుల పాటు సీఎం కార్యకలాపాలు

ఈ నెల 29 నుంచి వరుసగా 5 రోజుల పాటు సీఎం చంద్రబాబు వివిధ కార్యక్రమాలు, పర్యటనల్లో పాల్గొననున్నారు. సెప్టెంబర్ 29న విజయవాడలో ఉదయం DOPT కర్మయోగి మిషన్ కార్యక్రమంలో పాల్గొంటారు. మధ్యాహ్నం నెల్లూరు జిల్లా ఉదయగిరిలో జరిగే పల్లె పండుగ కార్యక్రమానికి హాజరవుతారు. 30న విజయవాడలో ఇళ్ల పట్టాల పంపిణీ కార్యక్రమంలో సీఎం పాల్గొంటారు. 24 వేల మందికి ఇళ్ల పట్టాలు అందజేయనున్నారు. అక్టోబర్ 1న ‘పేదల సేవలో’ పెన్షన్ కార్యక్రమంలో పాల్గొని పింఛన్లు పంపిణీ చేస్తారు. అక్టోబర్ 2న మదనపల్లెలో హార్టికల్చర్ హబ్‌కు శంకుస్థాపన చేసి స్వర్ణాంధ్ర-స్వచ్చాంధ్ర కార్యక్రమంలో పాల్గొంటారు. 2న గాంధీ జయంతి సందర్భంగా నిర్వహించే వార్షిక స్వచ్ఛాంధ్ర కార్యక్రమంలో సీఎం చంద్రబాబు విజయవాడలో పాల్గొంటారు. 3న విజయవాడలో పాన్ ఐఐటీ సదస్సులో సీఎం పాల్గొంటారు.

Nandyal News: ఆకతాయి పనికి మునిగిన గ్రామం, ప్రాణభయంతో కొండమీదకు ప్రజలు పరుగులు.. నంద్యాల జిల్లాలో ఘటన

Shankar Dukanam — Wed, 23 Sep 2026 10:44:50 +0530

పాణ్యం: నంద్యాల జిల్లా పాణ్యం మండలంలో ఓ ఆకతాయి చేసిన పనికి గ్రామం మొత్తం వరదల్లో కొట్టుకుపోతామేమోనని వణికిపోయింది. మంగళవారం తెల్లవారుజామున సుమారు 4.40 గంటల ప్రాంతంలో గుర్తుతెలియని వ్యక్తి గోరుకల్లు రిజర్వాయర్ ఔట్‌ఫాల్ రెగ్యులేటర్‌కు ఉన్న ఏకైక గేటును ఉద్దేశపూర్వకంగానే ఎత్తివేశాడు. ఆ సమయంలో రిజర్వాయర్‌లో 9.5 టీఎంసీల నీరు నిల్వ ఉండగా, ఆ గేటు ద్వారా ఏకంగా 3,000 క్యూసెక్కులకు పైగా నీరు ఉద్ధృతంగా ప్రవహించింది. ఎస్సార్బీసీ కాలువ సామర్థ్యానికి మించి నీరు రావడంతో కాలువ కాంక్రీటు కట్టకు ఆనుకుని ఉన్న మట్టికట్ట 5, 6 చోట్ల కొట్టుకుపోయింది. ఈ నీటి ప్రవాహానికి బండరాళ్లు కొట్టుకువచ్చాయి. మరోవైపు రిజర్వాయర్ నీళ్లు గోరుకల్లు గ్రామంలోని ఇళ్లు, రోడ్లు, పొలాలను ముంచెత్తాయి.

నీటి అనూహ్య వేగాన్ని, ఉద్ధృతిని చూసిన కొందరు గ్రామస్థులు రిజర్వాయర్ కట్ట తెగిపోయిందని భావించి భయాందోళనలకు గురయ్యారు. ప్రాణాలు కాపాడుకునేందుకు వెంటనే కొండపైకి పరుగులు తీయాలని తోటి వారికి చెబుతూ కేకలు వేశారు. ఆ సమయంలో విద్యుత్ సరఫరా నిలిచిపోవడంతో పాటు వర్షం పడుతోంది. నిద్రలేచిన గ్రామస్థులు (పిల్లల నుండి వృద్ధుల వరకు) సెల్‌ఫోన్ల వెలుగులోనే ప్రాణాలను అరచేతిలో పెట్టుకుని సమీపంలోని కొండపైకి పరుగులు తీశారు. కట్ట తెగలేదని అధికారులు స్పష్టం చేసేవరకు సుమారు గంటపాటు వారంతా కొండపైనే బిక్కుబిక్కుమంటూ భయంతో గడిపారు.

ఆ సమయంలో రెగ్యులేటర్ వద్ద లేని సిబ్బంది

వరదలా నీరు వచ్చిన సమయంలో గోరుకల్లు రెగ్యులేటర్ వద్ద సిబ్బంది ఎవరూ లేకపోవడంతో పెను ప్రమాదం పొంచి ఉందని అంతా ఆందోళనకు గురయ్యారు. అయితే, సమీపంలోని జయజ్యోతి సిమెంట్స్ పంప్‌హౌస్‌లో పనిచేసే కోటయ్య అనే ఎలక్ట్రీషియన్ అప్రమత్తమై వారికి ఊరట కలిగించాడు. అధికారులు ఉదయం 5.50 గంటల ప్రాంతంలో అతనికి ఫోన్ చేసి పరిస్థితిని పరిశీలించాలని కోరగా, అతను ఔట్‌ఫాల్ రెగ్యులేటర్ వద్దకు వెళ్లి పరిశీలించగా గేటు తెరిచి ఉన్నట్లు గుర్తించాడు. విద్యుత్ లేకపోయినా, మాన్యువల్‌గా గేటును ఎలా దించాలో తెలిసిన కోటయ్య వెంటనే గేటును మూసివేయడంతో నీటి ప్రవాహం ఆగిపోయింది. తరువాత ఈ విషయం అధికారులకు, గ్రామస్తులకు తెలపడంతో అంతా ఊపిరి పీల్చుకున్నారు.

కేవలం గంట వ్యవధిలోనే జరిగిన గోరుకల్లు రిజర్వాయర్ నీటి ఉద్ధృతికి గ్రామంలో తీవ్ర విధ్వంసం జరిగింది. గోరుకల్లు - పాణ్యం రహదారిపై సుమారు 200 మీటర్ల మేర బండరాళ్లు పేరుకుపోవడంతో రాకపోకలు పూర్తిగా స్తంభించిపోయాయి. పొలాల్లోకి మట్టి, రాళ్లు చేరి పంటలు సైతం తీవ్రంగా దెబ్బతిన్నాయి. రిజర్వాయర్ గ్యాలరీలోకి మట్టి చేరడంతో అందులోని విద్యుత్ వ్యవస్థలు, స్టార్టర్ బాక్స్‌లు, మోటార్లు పాడయ్యాయని స్థానికులు తెలిపారు.

ఉద్దేశపూర్వకంగానే ఈ పని చేశారని అనుమానం

గేటు స్విచ్‌లు రెగ్యులేటర్ పైభాగంలో ఉండటంతో, దీనిపై అవగాహన ఉన్నవారే కావాలని ఈ దుశ్చర్యకు పాల్పడ్డారని అధికారులు నిర్ధారించారు. స్థానికులు సైతం ఎవరో కావాలని చేసి ఉంటారని అనుమానం వ్యక్తం చేశారు. ఈ ఘటనపై పాణ్యం పోలీసులకు ఫిర్యాదు చేయగా కేసు నమోదు చేసి దర్యాప్తు చేస్తున్నారు. నంద్యాల కలెక్టర్ రాజకుమారి, పాణ్యం ఎమ్మెల్యే గౌరు చరితారెడ్డి, ఎస్‌ఈ ప్రతాప్ తదితరులు ఘటనా స్థలాన్ని పరిశీలించి పరిస్థితిని సమీక్షించారు.

Sharmila Daughter Wedding: కుమార్తె పెళ్లి డేట్, వివరాలు ప్రకటించిన వైఎస్ షర్మిల.. YSRకు ఫస్ట్ కార్డ్

Shankar Dukanam — Fri, 18 Sep 2026 16:09:54 +0530

YS Sharmila Daughter Wedding | కడప: వైఎస్ షర్మిల ఇంట్లో మరో వివాహ వేడుక జరగనుంది. కుమార్తె వివాహ వేడుకకు సంబంధించి ఏపీ కాంగ్రెస్ చీఫ్ వైఎస్ షర్మిల తన అభిమానులకు శుభవార్త అందించారు. నాన్న స్వర్గీయ వైఎస్ రాజశేఖరరెడ్డి ఆశీస్సులతో నా కుమార్తె వైఎస్ అంజిలి రెడ్డి, సోమల రఘురామ్ రెడ్డిల వివాహ మహోత్సవం జరగనుంది. YSR కుటుంబంలో ఇది మరో సంతోషకరమైన క్షణమన్నారు. ఇరువురి కలయిక దైవ సంకల్పంగా, నూరేళ్ల జీవితానికి శుభారంభంగా నిలవనుంది. దేవుడి ఆశీర్వాదంతో నాన్న వైఎస్సార్ ఘాట్ వేదికగా ఈ శుభవార్తను మీతో పంచుకోవడం నాకు అత్యంత ఆనందదాయకంగా ఉందన్నారు.

ఈ పెళ్లి వేడుకకు సంబంధించి ఈ నెల 24న నిశ్చితార్థం, నవంబర్ 25న వివాహం జరిపించాలని పెద్దలు నిశ్చయించారు. అలాగే డిసెంబర్ 5న రిసెప్షన్ వేడుకలు జరగనున్నాయి. కాబోయే నూతన వధూవరుల దాంపత్య జీవితం కన్నుల పండుగగా, నిరంతరం సుఖసంతోషాలతో సాగాలని ఆకాంక్షించారు.

అంజిలి రెడ్డి, రఘురామ్ రెడ్డిల తొలి వివాహ ఆహ్వాన పత్రికను నా కుటుంబ సభ్యులతో, రఘురామ్ తల్లిదండ్రులతో కలిసి ఇడుపులపాయలోని నాన్న YSR ఘాట్ వద్ద ఉంచి ఆశీస్సులు తీసుకున్నట్లు షర్మిల తెలిపారు. నాన్న వైఎస్సార్ దీవెనలు బిడ్డల జీవితాలకు కొండంత అండగా నిలుస్తాయని, ఆయన చూపిన సన్మార్గం వారికి ఎల్లప్పుడూ ఆదర్శప్రాయంగా ఉంటుందన్నారు.

Vijayasai Reddy: ఆ 2 కుటుంబాలతో సీమకు ప్రయోజనం లేదు.. రాయలసీమ ఒరిజనల్ రెడ్ల పౌరుషం చూపిస్తాం: విజయసాయిరెడ్డి

Shankar Dukanam — Fri, 18 Sep 2026 13:25:18 +0530

అనంతపురం: రాయలసీమ ప్రాంతానికి చెందిన ఇద్దరు నేతలు విభజిత ఆంధ్రప్రదేశ్ రాష్ట్రానికి సీఎంలు అయ్యారు, కానీ ఆ 2 కుటుంబాల పాలనతో ఈ ప్రాంతానికి ఏం ప్రయోజనం ఉందని మాజీ ఎంపీ విజయసాయిరెడ్డి ప్రశ్నించారు. నీటి కొరత తీవ్రంగా వేధిస్తోన్న అనంతపురం లాంటి జిల్లాల్లో ఎలాంటి అభిృద్ధి చేశారని, ఈ రెండు కుటుంబాలతో ఎలాంటి అభివృద్ధి జరగలేదని అన్నారు. అసలైన రాయలసీమ రెడ్లకు తమ పార్టీ సాదర స్వాగతం పలుకుతుందన్నారు. దక్షిణాదిన కేరళ, కర్ణాటక, తమిళనాడు, తెలంగాణతో పోల్చితే వెనుకబడింది ఆంధ్రప్రదేశ్ అని ఆవేదన వ్యక్తం చేశారు.

రాయలసీమ గురించి, అనంతపురం నుంచి చెబుతున్నాను. రాయలసీమ ఒరిజినల్ రెడ్ల పౌరషాన్ని కాపాడే పార్టీ. రెడ్ల ఆత్మగౌరవాన్ని కాపాడే పార్టీ. రండి, అందరం కలిసి రాష్ట్ర అభివృద్ధి కోసం కలిసి పనిచేద్దామని సాధారంగా ఆహ్వానిస్తున్నాను. అన్ని కులాలు, మతాలను గౌరవించే పార్టీ మాది. గత ప్రభుత్వంలో అన్ని కులాల కార్పొరేషన్ల నిమాయకం జరిగినప్పుడు, ఈ ప్రభుత్వంలో రెడ్ల కార్పొరేషన్ ఖాళీలను భర్తీ చేయాలని కోరుతున్నాను. నవ్యాంధ్ర 12 ఏళ్లలో రాయలసీమకు ఎన్ని నీటి ప్రాజెక్టులు వచ్చాయి. చంద్రబాబు, జగన్ కుటుంబాలు రాయలసీమను ఏం అభివృద్ధి చేశాయి. సీమ పట్ల నిజంగా ప్రేమ ఉందా. కేవలం ఓట్ల కోసం రాయలసీమ కావాలి. రెడ్లు కావాలి. వీరికి సీమ పట్ల చిత్తశుద్ధి లేదు. ఈ ప్రాంతానికి చెందిన సీఎంలు అయినప్పటికీ వేరే ప్రాంతాల్లో ఆస్తులు సంపాదించుకున్నారు. నివాసాలు ఏర్పరచుకున్నారు. వీరి కోసం రక్తం చిందిస్తాం, ప్రాణాలర్పిస్తామని రాయలసీమ వాసులు చెబుతున్నారు. అయితే యువత వ్యక్తి ఆరాధన చేయవద్దు. ఈ రెండు కుటుంబాల్లోని వారి కోసం రక్తం చిందించడం కాదు మీ ప్రాంత అభివృద్ధి కోసం త్యాగాలు చేయండి. శ్రీభాగ్ ఒప్పందం ఏమైంది.. రాష్ట్ర విభజన తరువాత కృష్ణా, తుంగభద్ర, పెన్నా జలాలు ఈ ప్రాంతానికి వినియోగించాలన్న దానిపై ఏం చేశారు. మీ పాలనతో మీకే మేలు జరిగింది కానీ ప్రజలకు కాదు. పంటలు లేక, ఉపాధి లేక పొట్ట చేత పట్టుకుని ఇతర ప్రాంతాలకు వలస వెళ్తున్నారు. ఈ వలసలకు ఎవరూ అడ్డుకట్ట వేయలేకపోయారు. ఎంత మంది రైతులు చనిపోతున్నా, ఈ రెండు కుటుంబాల పాలన ఉన్నంతకాలం ఎలాంటి మార్పు రాదు. అనంతపురం పేరు వింటే వర్షాభావం గుర్తొస్తుంది.

మేం అధికారంలోకి వస్తే రాయలసీమను రతనాల సీమగా మార్చుతాం. ఈ రెండు కుటుంబాలు 100 టీఎంసీల సామర్థ్యం కూడా లేకుండా చేశారు. గండికోట పూర్తి సామర్థ్యం 26 టీఎంసీలు. చిత్రావతి 10 టీఎంసీల కన్నా తక్కువ. హంద్రీనీవా 40 టీఎంసీల కంటే తక్కువ. పెన్నా అహోబిలం బ్యారేజీలు పూర్తికాలేదు. వేలూరు లిఫ్ట్ పూర్తికాలేదు. గాలేరు నగరి, హంద్రీనీవా పూర్తి కాలేదు. 3 టీఎంసీల సామర్థ్యం లేని రాజోలిబండ రిజర్వాయర్ పూర్తికాలేదు. విభజన చట్టంలో ఉత్తరాంధ్ర, రాయలసీమకు చెప్పిన ప్యాకేజీ మంజూరు చేయాలి.

ఐక్యరాజ్యసమితి 28 రాష్ట్రాలు, 8 కేంద్ర పాలిత ప్రాంతాల్లో యూఎన్‌డీపీ ప్రోగ్రాంలో ఏపీ 26వ స్థానంలో ఉంది. మానవ అభివృద్ధి సూచికలో నీతి ఆయోగ్ నివేదిక ప్రకారం దేశంలో అతి తక్కువ అక్షరాస్యత కలిగిన రాష్ట్రంగా ఏపీ నిలిచింది. సగటున ఏడాదికి 5.4 వయసులో స్కూలుకు వెళ్తున్న రాష్ట్రం. మహిళ అక్షరాస్యతలో అట్టడుగున ఉన్నాం. ఇంటర్ పూర్తయ్యాక పైచదువుకు వెళ్తున్న వారు 36 శాతమే ఉన్నారు. 94 శాతం మంతి రైతులు అప్పుల్లో ఇరుక్కుని ఇబ్బంది పడుతున్నారు. ఒక్క రైతు పేరిట సగటున 2.46 లక్షల అప్పు ఉంది. రాష్ట్ర ప్రభుత్వాలు ఈ 12 ఏళ్లలో 12 లక్షల కోట్లు అప్పులు చేసింది. 6 కోట్ల మందితో పాటు పుట్టబోయే వారిపై సైతం అప్పులు చేశారు.

AP Fake Liquor Case: ములకలచెరువు నకిలీ మద్యం కేసు.. కోర్టులో లొంగిపోయిన జయచంద్రారెడ్డి, గిరిధర్‌ రెడ్డి

Shankar Dukanam — Wed, 16 Sep 2026 11:01:10 +0530

మదనపల్లె: అన్నమయ్య జిల్లా ములకలచెరువు నకిలీ మద్యం కేసు విచారణ తుది దశకు చేరుకుంది. ఈ క్రమంలో నకిలీ మద్యం కేసు విచారణలో కీలక పరిణామం చోటుచేసుకుంది. ప్రధాన నిందితులుగా ఉన్న తంబళ్లపల్లె టీడీపీ మాజీ ఇన్‌చార్జి జయచంద్రరెడ్డి, ఆయన బావమరిది గిరిధర్‌రెడ్డి మంగళవారం రోజున మదనపల్లె కోర్టులో లొంగిపోయారు.

సెప్టెంబర్ 28 వరకు రిమాండ్ విధించిన కోర్టు

నకిలీ మద్యం కేసులో వీరికి ముందస్తు బెయిల్ లభించకపోవడంతో తప్పనిసరి పరిస్థితుల్లో మదనపల్లె కోర్టులో లొంగిపోయారు. కోర్టు వీరిద్దరికీ సెప్టెంబర్ 28 వరకు రిమాండ్ విధిస్తూ ఆదేశాలు జారీ చేసింది. అనంతరం వారికి మెడికల్ టెస్టులు పూర్తయ్యాక పోలీసులు ఇద్దరినీ కడప సెంట్రల్ జైలుకు తరలించారు.

అన్నమయ్య జిల్లా ములకలచెరువు నకిలీ మద్యం వ్యవహారం రాష్ట్ర వ్యాప్తంగా కలకలం రేపడం తెలిసిందే. ఈ ప్రాంతంలో అక్రమంగా నకిలీ మద్యాన్ని తయారు చేస్తూ ప్రజల ప్రాణాలతో చెలగాటమాడుతున్నారనే పక్కా సమాచారంతో పోలీసులు, ఎక్సైజ్ అధికారులు కేసు నమోదు చేశారు. ప్రాథమిక విచారణలో ఈ నకిలీ మద్యం సరఫరా వెనుక పెద్ద ఎత్తున నెట్‌వర్క్ ఉందనే విషయాలు బయటపడ్డాయి. దీనిపై అధికారులు లోతుగా దర్యాప్తు ప్రారంభించారు. ఈ క్రమంలోనే విచారణ జరిపిన పోలీసులు, కేసులో రాజకీయ ప్రమేయం, అక్రమ మద్యం తయారీకి సహకరించిన పలువురు కీలక సూత్రధారులను గుర్తించి వారిని పట్టుకునేందుకు ప్రత్యేక బృందాలను రంగంలోకి దించారు.

కేసులో అరెస్ట్ తప్పదని భావించిన ఇందులో నిందితులుగా ఉన్న తంబళ్లపల్లె టీడీపీ మాజీ ఇన్‌చార్జి జయచంద్రరెడ్డి, ఆయన బావమరిది గిరిధర్‌రెడ్డి ముందస్తు బెయిల్ కోసం కోర్టును ఆశ్రయించారు. అయితే, కోర్టులో వారికి ముందస్తు బెయిల్ నిరాకరించింది. అధికారుల విచారణ ముమ్మరం కావడంతో వేరే మార్గం లేక ఇద్దరు నిందితులు మంగళవారం నాడు మదనపల్లె కోర్టులో లొంగిపోయారు. న్యాయస్థానం వారికి సెప్టెంబర్ 28 వరకు రిమాండ్ విధిస్తూ ఆదేశాలు జారీ చేయడంతో, వారిని కడప సెంట్రల్ జైలుకు తరలించారు. ప్రధాన నిందితుల లొంగుబాటుతో నకిలీ మద్యం కేసు విచారణ ప్రస్తుతం తుది దశకు చేరుకుంది.

ఈ కేసులో పోలీసులు 30 మందికి పైగా అరెస్ట్ చేసి విచారణ చేశారు. ప్రధాన నిందితుడు ఏ-1 అద్దేపల్లి జనార్దన్ రావు, విజయవాడలో ఏఎన్‌ఆర్ నిర్వాహకుడు కాగా... ఆయన సోదరుడు అద్దేపల్లి జగన్ మోహన్ రావు సహా 14 మంది ప్రధాన నిందితులు ఈ రాకెట్‌ను నడిపినట్లు గుర్తించారు. రిమాండ్ రిపోర్టుల ప్రకారం జనార్దన్ రావు దక్షిణాఫ్రికా, రువాండా వంటి దేశాల్లో మద్యం ఫ్యాక్టరీలు నడుపుతూ, ఏపీలో నకిలీ మద్యం యూనిట్లు తయారు చేసి వ్యాపారం చేశాడు.

నిందితుడు జయచంద్రారెడ్డి తంబళ్లపల్లె నుంచి గత ఎన్నికల్లో పోటీ చేసి ఓడిపోగా.. ఈ లిక్కర్ స్కాం బయటపడిన తరవాత పార్టీ నుంచి సస్పెండ్ చేశారు. ఆయన బావమరిది గిరిధర్ రెడ్డి (ఏ-18) కూడా నిందితుల్లో ఒకరు. ఆయన పీఏ రాజేష్, అకౌంటెంట్ అన్బురాజ్, కారు డ్రైవర్ సయ్యద్ కలీం అష్రఫ్, ఇంటి బాబు అన్బురాసులను సైతం పోలీసులు అదే ఏడాది అరెస్ట్ చేసి నిందితుల్ని విచారించారు.

జోగి రమేష్ పాత్రపై విచారణ..

ప్రధాన నిందితుడైన అద్దేపల్లి జనార్దన్ రావు, జోగి రమేష్ మధ్య 2006 నుంచే సన్నిహిత సంబంధాలున్నాయి. స్వర్ణ బార్ ప్రస్తుతం చెర్రీ బార్ నిర్వహణలో భాగస్వాములుగా ఉన్నారని, 2017లో ఇబ్రహీంపట్నం బార్ సిండికేట్‌లోనూ కీలకంగా ఉన్నారని ఛార్జిషీటులో పేర్కొన్నారు. నిందితులు జనార్దన్ రావు, జగన్మోహన్ రావు ప్రతి 2, 3 నెలలకొకసారి 3 నుంచి రూ. 5 లక్షల వరకు జోగి రమేష్‌కు, ఆయన సోదరుడు జోగి రాముకు అందజేసేవారని అధికారులు తెలిపారు. ఈ కేసులో కోర్టు జోగి రమేష్‌కు బెయిల్ మంజారు చేసింది.