Lokesh on Talliki Vandanam: తల్లికి వందనంపై త్వరలోనే గైడ్ లైన్స్, శాసన మండలిలో మంత్రి లోకేష్ వెల్లడి

AP Budget Sessions | ఏపీ ప్రభుత్వం తల్లికి వందనం పథకం అమలు చేసి తీరతుందని స్పష్టం చేసిన మంత్రి నారా లోకేష.. త్వరలోనే దీనిపై మార్గదర్శకాలు విడుదల చేస్తామని శాసన మండలిలో తెలిపారు.

AP Assembly Budget Sessions | అమరావతి: కూటమి ప్రభుత్వం తల్లికి వందనం పథకాన్ని త్వరలోనే అమలుచేయనుందని ఏపీ విద్య, ఐటీ శాఖల మంత్రి నారా లోకేష్ తెలిపారు. తల్లికి వందనం అమలుకు సంబంధించిన గైడ్ లైన్స్ ను త్వరలోనే ప్రకటిస్తామని శాసన మండలిలో లోకేష్ వెల్లడించారు. తల్లికి వందనం పథకం (Talliki Vandanam)పై శాసన మండలిలో సభ్యులు అడిగిన ప్రశ్నకు మంత్రి  నారా లోకేష్ సమాధానం ఇచ్చారు.  తల్లికి వందనం పథకానికి ఆంధ్రప్రదేశ్ బడ్జెట్ 2025-26లో రూ.9,407 కోట్లు కేటాయించినట్లు మంత్రి తెలిపారు. 

వైసీపీ హయాంలో ఒక్క డీఎస్సీ నోటిఫికేషన్ రాలేదన్న నారా లోకేష్

ఏపీలో బడ్జెట్ సమావేశాలు వాడివేడిగా సాగుతున్నాయి. మండలిలో ప్రశ్నోత్తరాల సమయంలో వైసీపీ సభ్యులు లేవనెత్తిన ప్రశ్నలకు మంత్రి నారా లోకేష్ బదులిచ్చారు. తల్లికి వందనం సహా అన్ని సూపర్ సిక్స్ పథకాలు అమలు చేస్తామన్న నారా లోకేష్.. నిరుద్యోగ భృతిపై సభ్యుల ప్రశ్నలకు సమాధానాలు చెప్పారు. నిరుద్యోగులకు జాబ్స్ ఇవ్వడంపై గత వైసీపీ ప్రభుత్వానికి చిత్తశుద్ధి లేదన్నారు. గత వైసీపీ ప్రభుత్వ హయాంలో ఒక్కసారి కూడా డీఎస్సీ నోటిఫికేషన్ విడుదల చేయలేదని నారా లోకేష్ పేర్కొన్నారు. చంద్రబాబు నేతృత్వంలోని గత టీడీపీ హయాంలో  1.82 లక్షల పోస్టులు భర్తీ చేశామన్నారు. ఎట్టి పరిస్థితుల్లోను మార్చి నెలలో డీఎస్సీ నోటిఫికేషన్ విడుదల చేసి తీరుతామని విద్యాశాఖ మంత్రి నారా లోకేష్ స్పష్టం చేశారు. వైసీపీ సభ్యులు కూటమి ప్రభుత్వంపై, చంద్రబాబు పాలనపై ఆరోపణలు, విమర్శలు చేసేముందు ఇకనైనా వాస్తవాలు తెలుసుకుని మాట్లాడాలని హితవు పలికారు.

త్వరలో మెగా డీఎస్సీ నోటిఫికేషన్

సామాజిక పింఛన్లు వెయ్యి రూపాయలు పెంచిన కూటమి ప్రభుత్వం త్వరలోనే మెగా డీఎస్సీ నోటిఫికేషన్ రిలీజ్ చేయనుంది. ఏపీలో ఖాళీగా ఉన్న 16,347 టీచర్ పోస్టులు భర్తీ చేస్తామని ఏపీ అసెంబ్లీ సమావేశాలలో మంత్రి లోకేష్ స్పష్టం చేశారు. తాజాగా తల్లికి వందనంపై సైతం మార్గదర్శకాలు రూపొందిస్తోంది. సూపర్ సిక్స్‌ పథకాలు ప్రకటించి ఏపీ ఎన్నికల్లో నెగ్గి కూటమి ప్రభుత్వం ఏర్పడింది. వైసీపీ హయాంలో అమ్మ ఒడి పేరుతో మొదలుపెట్టిన పథకానికి కూటమి మార్పులు చేర్పులు చేపట్టింది. ఎన్నికల మేనిఫెస్టోలనే తల్లికి వందనం పేరుతో అమలు చేస్తామని.. చదువుకునే ప్రతి విద్యార్థి తల్లి ఖాతాలో ఒక్కో విద్యార్థికి ఏడాదికి 15 వేలు జమ చేస్తామని చెప్పారు. ఏపీలో ఆర్థిక పరిస్థితి బాగోలేకపోవడం, రాజధాని అమరావతి నిర్మాణం, ప్రతిష్టాత్మకమైన పోలవరం ప్రాజెక్టు నిర్మాణం, విశాఖ స్టీల్ ప్లాంట్ లాంటి అంశాలపై చంద్రబాబు ప్రభుత్వం ఫోకస్ చేసింది. మరోవైపు సంక్షేమానికి సైతం కూటమి ప్రభుత్వం పెద్ద పీట వేస్తోంది.