Pawan Gifted Property To Children: విడాకుల వేళ పవన్ కళ్యాణ్ మాజీ భార్య అన్నా, పిల్లల పేరిట ఆస్తులు చిట్టా వైరల్ !

Visakha CII Summit: విశాఖలో ఘనంగా సీఐఐ భాగస్వామ్య సదస్సు.. ప్రగతి, సంప్రదాయాల సమ్మేళనంగా ఆంధ్రా వేదిక

Satyaprasad Bandaru — Thu, 12 Nov 2026 17:45:02 +0530

Visakha CII Summit: సాగర తీర నగరం విశాఖపట్నంలో గురువారం ఘనంగా ప్రారంభమైన భారత పరిశ్రమల సమాఖ్య భాగస్వామ్య సదస్సు (CII - Partnership Summit) వేదిక సరికొత్త శోభను సంతరించుకుంది. ఆహ్లాదకరమైన వాతావరణం, సరికొత్త ఆలోచనలకు ఊపిరిలూదేలా సదస్సు ప్రాంగణాన్ని అత్యద్భుతంగా తీర్చిదిద్దారు. గురువారం ఉదయం సదస్సును సీఎం చంద్రబాబు నాయుడు ప్రారంభించారు.

ప్లీనరీ హాల్, మూడు సమావేశ మందిరాలు, పెట్టుబడులకు అంకురార్పణ చేసే వ్యవస్థాపక మందిరంతో పాటు ఏపీ ఘన కీర్తిని ప్రపంచానికి చాటిచెప్పేలా ఏర్పాటు చేసిన ప్రదర్శన సందర్శకులను కట్టిపడేస్తోంది. రాష్ట్ర సంస్కృతి, సంప్రదాయాలు, నోరూరించే వంటకాలు, చేనేత-కలంకారీ హస్తకళలు, పర్యాటక సొబగులు, పారిశ్రామిక ప్రగతి, పెట్టుబడి అవకాశాలను ఈ వేదికపై కళ్లకు కట్టినట్లు ఆవిష్కరించారు.

కట్టిపడేస్తున్న చేనేత, కలంకారీ వైభవం

చేనేత, కలంకారీ కళలకు ఆంధ్రప్రదేశ్ పుట్టినిల్లు. రాష్ట్ర చేనేత, జౌళి శాఖ ఆధ్వర్యంలో ఏర్పాటు చేసిన స్టాల్స్ ప్రత్యేక ఆకర్షణగా నిలుస్తున్నాయి. శ్రీకాకుళం నుండి అనంతపురం వరకు రాష్ట్రవ్యాప్తంగా ప్రసిద్ధి చెందిన పట్టు, కలంకారీ వస్త్రాలను ప్రదర్శించారు. వస్త్రాల తయారీ విధానాన్ని ప్రత్యక్షంగా వివరించడం సందర్శకులను ఎంతగానో ఆకట్టుకుంటోంది. వీటితో పాటు విభిన్న రకాల అందమైన తివాచీలు చూపరులను మంత్రముగ్ధులను చేస్తున్నాయి.

‘హాల్ ఆఫ్ ఫేమ్’ – ‘టేస్ట్ ఆఫ్ ఆంధ్రా’

వివిధ రంగాల్లో విశేష సేవలందించి, రాష్ట్రానికి ఖ్యాతి తెచ్చిన మహనీయుల కీర్తిని చాటుతూ 'హాల్ ఆఫ్ ఫేమ్' పేరుతో లబ్ధప్రతిష్ఠుల చిత్రపటాలను ఏర్పాటు చేశారు. మరోవైపు, ఆంధ్రా రుచులను ప్రపంచానికి పరిచయం చేసే 'టేస్ట్ ఆఫ్ ఆంధ్రా' విభాగం సందర్శకులకు సరికొత్త అనుభూతిని పంచుతోంది. ప్రపంచ ప్రఖ్యాత అరకు కాఫీ ఘుమఘుమలతో పాటు, వంటకాలకు మరింత రుచిని జోడించే సుగంధ ద్రవ్యాలు, ప్రత్యేక మసాలా దినుసులు ప్రదర్శనలో ప్రత్యేక ఆకర్షణగా నిలిచాయి.

డిజిటల్ సొబగులతో పర్యాటకం, హస్తకళలు

ఏపీ పర్యాటక అందాలను ఆధునిక డిజిటల్ విధానంలో ఆవిషరించిన తీరు అద్భుతంగా ఉంది. ఎకో టూరిజం, ఆధ్యాత్మిక, వారసత్వ, సాంస్కృతిక పర్యాటక రంగాలతో పాటు రాష్ట్ర సంప్రదాయ జీవనశైలిని కళ్లకు కట్టినట్లు చూపుతున్నారు. అలాగే, 'మేకర్స్ స్టూడియో' విభాగంలో కొలువుదీరిన పెన్ కలంకారీ, కొండపల్లి బొమ్మలు, సవర ఆదివాసీ కళాకృతులు, ప్రఖ్యాత తోలుబొమ్మలు చూడముచ్చట గొలుపుతున్నాయి.

Also Read: పెట్టుబడిదారులకు చంద్రబాబు సావరిన్ గ్యారెంటీ .. ప్రభుత్వాలు మారినా రక్షణ - సీఐఐ సమ్మిట్‌లో కీలక ప్రకటన

పెట్టుబడుల స్వర్గధామంగా ఆంధ్రప్రదేశ్

ఆధునిక యుగంలో రాష్ట్రం సాధిస్తున్న శరవేగవంతమైన పారిశ్రామిక అభివృద్ధిని ఈ ప్రదర్శన అద్దం పడుతోంది. ముఖ్యంగా ఫుడ్ ప్రాసెసింగ్, గ్రీన్ ఎనర్జీ, గ్రీన్ అమ్మోనియా, ఉక్కు, ఉపాధి కల్పన రంగాల్లో రాష్ట్ర ప్రగతిని ఘనంగా వివరించారు. పెట్టుబడులకు ఉన్న విస్తృత అవకాశాలు, ప్రభుత్వ ప్రోత్సాహకాలను స్పష్టంగా తెలియజేస్తూ "పెట్టుబడుల స్వర్గసీమ ఆంధ్రప్రదేశ్‌లో పెట్టుబడులు పెట్టండి" అనే స్ఫూర్తిని పారిశ్రామికవేత్తల్లో నింపేలా ఈ ప్రదర్శన విజయవంతంగా కొనసాగుతోంది.

Also Read: ఏపీలో 23 పట్టణ స్థానిక సంస్థల ఎన్నికలకు నోటిఫికేషన్.. ఈ నెల 26న పోలింగ్

AP Investment Protection Act : పెట్టుబడిదారులకు చంద్రబాబు సావరిన్ గ్యారెంటీ .. ప్రభుత్వాలు మారినా రక్షణ - సీఐఐ సమ్మిట్‌లో కీలక ప్రకటన

Raja Sekhar Allu — Thu, 12 Nov 2026 13:47:47 +0530

Sovereign Guarantee For Investors Andhra Pradesh: విశాఖపట్నం వేదికగా జరుగుతున్న ప్రతిష్టాత్మక 31వ సీఐఐ భాగస్వామ్య సదస్సు లో ఆంధ్రప్రదేశ్ ముఖ్యమంత్రి నారా చంద్రబాబు నాయుడు అంతర్జాతీయ పారిశ్రామికవేత్తలకు అత్యంత భరోసానిచ్చే చారిత్రాత్మక ప్రకటన చేశారు. రాష్ట్రంలో పెట్టుబడులు పెట్టే దేశ, విదేశీ సంస్థల ప్రయోజనాలకు పూర్తిస్థాయి చట్టబద్ధమైన రక్షణ కల్పించేందుకు ప్రత్యేకంగా ‘ఇన్వెస్ట్‌మెంట్ ప్రొటెక్షన్ యాక్ట్’ తీసుకురాబోతున్నట్లు ఆయన వెల్లడించారు. విధానపరమైన అనిశ్చితిని శాశ్వతంగా తొలగించి, పెట్టుబడిదారుల విశ్వాసాన్ని చూరగొనడమే లక్ష్యంగా రూపొందిస్తున్న ఈ చట్టాన్ని—రాష్ట్రానికి తరలివచ్చే కార్పొరేట్ మూలధనానికి ప్రభుత్వం ఇస్తున్న ఒక సావరిన్ గ్యారెంటీ గా ముఖ్యమంత్రి అభివర్ణించారు.

ఈ నూతన చట్టం తీసుకురావడం వెనుక ఉన్న ప్రధాన ఉద్దేశం భవిష్యత్తులో ప్రభుత్వాలు మారినా, పారిశ్రామిక ఒప్పందాలకు ఎలాంటి ఆటంకం కలగకుండా శాశ్వత రక్షణ కల్పించడమేనని చంద్రబాబు స్పష్టం చేశారు. ఒకసారి ప్రభుత్వంతో కుదుర్చుకున్న ఒప్పందాలను గానీ, కేటాయించిన భూములు, రాయితీలు, ప్రోత్సాహకాలను గానీ తదుపరి వచ్చే ప్రభుత్వాలు ఏకపక్షంగా రద్దు చేసేందుకు లేదా వాటిలో మార్పులు చేసేందుకు ఎలాంటి చట్టపరమైన అధికారం ఉండదని ఆయన తేల్చి చెప్పారు. పెట్టుబడిదారుల హక్కులకు భంగం కలిగితే తక్షణమే న్యాయపరమైన పరిష్కారం లభించేలా, అంతర్జాతీయ ప్రమాణాలకు అనుగుణంగా ఈ చట్ట నిబంధనలను తీర్చిదిద్దుతున్నట్లు వివరించారు.

గత 2019–2024 మధ్యకాలంలో రివర్స్ టెండరింగ్, విద్యుత్ కొనుగోలు ఒప్పందాల రద్దు, పారిశ్రామిక వేధింపులు వంటి వివాదాస్పద నిర్ణయాల వల్ల రాష్ట్ర బ్రాండ్ ఇమేజ్ దెబ్బతిన్న విషయాన్ని ముఖ్యమంత్రి పరోక్షంగా ప్రస్తావించారు. రాజకీయ కక్ష సాధింపుల వల్ల పారిశ్రామికవేత్తలు భయపడి పొరుగు రాష్ట్రాలకు తరలిపోయిన చేదు అనుభవాలు ఇకపై ఆంధ్రప్రదేశ్‌లో ఎప్పటికీ పునరావృతం కావని ఆయన హామీ ఇచ్చారు. గత పాలకుల అనాలోచిత నిర్ణయాల వల్ల దెబ్బతిన్న పెట్టుబడిదారుల నమ్మకాన్ని పునరుద్ధరించేందుకే ఈ చట్టాన్ని ఒక బలమైన రక్షణ కవచంలా తెస్తున్నామని చంద్రబాబు సదస్సు వేదికగా స్పష్టం చేశారు.

కేవలం చట్టపరమైన రక్షణతోనే సరిపెట్టకుండా, పెట్టుబడిదారులకు ఆర్థికపరమైన భరోసాను కూడా కల్పించేందుకు ప్రత్యేకంగా ఎస్క్రో ఖాతాల వ్యవస్థను అనుసంధానిస్తున్నట్లు ప్రభుత్వం ప్రకటించింది. ప్రభుత్వ ఖజానా పరిస్థితులు, రాజకీయ జోక్యంతో సంబంధం లేకుండా పారిశ్రామికవేత్తలకు ఇస్తామన్న రాయితీలు, ప్రోత్సాహకాలు ఈ ఎస్క్రో ఖాతాల ద్వారా నేరుగా, ఎటువంటి జాప్యం లేకుండా పారదర్శకంగా అందుతాయని తెలిపారు. ఇది దేశ పారిశ్రామిక రంగంలోనే ఒక విప్లవాత్మక సంస్కరణగా నిలవనుంది.

అదే సమయంలో ఈజ్ ఆఫ్ డూయింగ్ బిజినెస్ స్థానంలో స్పీడ్ ఆఫ్ డూయింగ్ బిజినెస్ నినాదంతో తమ ప్రభుత్వం పనిచేస్తోందని చంద్రబాబు స్పష్టం చేశారు. పరిశ్రమల స్థాపనకు కావాల్సిన అనుమతులను రియల్ టైమ్‌లో మంజూరు చేయడంతో పాటు, బ్యూరోక్రాటిక్ ఆలస్యాలను పూర్తిగా తొలగించి పెట్టుబడిదారులకు రెడ్ కార్పెట్ పరుస్తున్నట్లు వివరించారు. విశాఖ, అమరావతి, తిరుపతి కేంద్రంగా గ్రీన్ ఎనర్జీ, స్పేస్ టెక్నాలజీ, ఏఐ, సెమీకండక్టర్ రంగాల్లో ప్రపంచ స్థాయి మౌలిక వసతులు కల్పిస్తున్నామని గ్లోబల్ సీఈఓలకు వివరించారు.

మొత్తానికి, దేశంలో మరే ఇతర రాష్ట్రం తీసుకోని విధంగా ఇన్వెస్ట్‌మెంట్ ప్రొటెక్షన్ యాక్ట్ ను తీసుకురావాలన్న చంద్రబాబు నిర్ణయాన్ని అంతర్జాతీయ పారిశ్రామిక దిగ్గజాలు, ఆర్థిక నిపుణులు ఒక ‘మాస్టర్ స్ట్రోక్’గా ప్రశంసిస్తున్నారు. రాజకీయ మార్పులతో సంబంధం లేకుండా పెట్టుబడులకు 100 శాతం భద్రత ఉంటుందన్న ఈ చట్టబద్ధమైన హామీ.. గ్లోబల్ కంపెనీలను ఆంధ్రప్రదేశ్ వైపు ఆకర్షించడంలో కీలక మలుపుగా నిలవనుంది. ఇది కేవలం ఏపీ పారిశ్రామిక ముఖచిత్రాన్నే కాకుండా, దేశంలోని ఇతర రాష్ట్రాల పెట్టుబడి విధానాలకు కూడా ఒక సరికొత్త మార్గదర్శిగా మారబోతోంది.

Srikalahasti Temple Fire Accident: శ్రీకాళహస్తి ఆలయంలో అగ్నిప్రమాదం.. ప్రసాదాల తయారీ కేంద్రంలో చెలరేగిన మంటలు

Satyaprasad Bandaru — Thu, 12 Nov 2026 13:35:59 +0530

Srikalahasti Temple Fire Accident: ప్రముఖ పుణ్యక్షేత్రం శ్రీకాళహస్తీశ్వర ఆలయంలో చోటుచేసుకున్న అగ్నిప్రమాదం భక్తుల్లో తీవ్ర కలకలం రేపింది. ఆలయ నాలుగో గోపురం సమీపంలో ఉన్న ప్రసాదాల తయారీ కేంద్రంలో ఒక్కసారిగా మంటలు చెలరేగడంతో పరిసర ప్రాంతాల్లో భయాందోళనలు నెలకొన్నాయి. వంటగదిలో గ్యాస్ లీక్ కావడం, అక్కడే ఉన్న వంటనూనె డబ్బాలకు నిప్పు అంటుకోవడంతో అగ్నికీలలు వేగంగా ఎగసిపడ్డాయి. క్షణాల్లోనే దట్టమైన పొగ ఆలయ పరిసరాలను కమ్మేయడంతో దర్శనానికి వచ్చిన భక్తులు తీవ్ర గందరగోళానికి గురయ్యారు.

Also Read: వెబ్‌ల్యాండ్‌ రికార్డుల తారుమారు.. ఎన్‌ఐసీ లాగిన్ కొట్టేసి రూ.కోట్ల భూముల అక్రమార్జన.. నలుగురి అరెస్ట్!

అధికారుల అప్రమత్తతో తప్పిన ప్రాణ నష్టం

అగ్ని ప్రమాదం సమాచారం అందుకున్న వెంటనే ఆలయ అధికారులు, అగ్నిమాపక సిబ్బంది హుటాహుటిన ఘటనా స్థలానికి చేరుకున్నారు. ముందుజాగ్రత్త చర్యగా ఆలయ సిబ్బంది వెంటనే అప్రమత్తమై, ప్రసాద తయారీ కేంద్రానికి సమీపంలో ఉన్న భక్తులను సురక్షిత ప్రాంతాలకు తరలించారు. అనంతరం అగ్నిమాపక సిబ్బంది శ్రమించి మంటలను పూర్తిగా అదుపులోకి తీసుకువచ్చారు. అయితే, ఈ ప్రమాదం జరిగిన సమయంలో ప్రసాదాల వంటగదిలో సిబ్బంది ఎవరూ లేకపోవడంతో ప్రాణనష్టం తప్పింది. మంటలు అదుపులోకి రావడంతో ఆలయ అధికారులు, భక్తులు ఊపిరి పీల్చుకున్నారు. ఈ ప్రమాదానికి గల కచ్చితమైన కారణాలపై ఆలయ అధికారులు సమగ్ర విచారణ చేపట్టారు.

Also Read: ఏపీలో 23 పట్టణ స్థానిక సంస్థల ఎన్నికలకు నోటిఫికేషన్.. ఈ నెల 26న పోలింగ్

AP Local Body Elections: ఏపీలో 23 పట్టణ స్థానిక సంస్థల ఎన్నికలకు నోటిఫికేషన్.. ఈ నెల 26న పోలింగ్

Satyaprasad Bandaru — Thu, 12 Nov 2026 13:11:10 +0530

AP Local Body Elections: రాష్ట్రంలో పెండింగ్ లో ఉన్న 23 పట్టణ స్థానిక సంస్థలకు నోటిఫికేషన్ విడుదలైంది. 4 కార్పొరేషన్, 19 మున్సిపాలిటీలకు ఈ నెల 14 నుంచి నామినేషన్లు స్వీకరించున్నట్లు ఎస్ఈసీ పునేఠా తెలిపారు. నవంబర్ 14 నుంచి నామినేషన్లు స్వీకరించనున్నారు. నవంబర్ 16 వరకు నామినేషన్లు స్వీకరిస్తారు. 17వ తేదీన నామినేషన్లు స్క్రూటినీ చేయనున్నారు. 19వ తేదీ వరకు నామినేషన్ల విత్ డ్రా ఉంటుంది. నవంబర్ 26న పోలింగ్, 30న కౌంటింగ్ ఉంటుందని ఎస్ఈసీ తెలిపారు. ఇటీవల 100 పట్టణ స్థానిక సంస్థల్లో ఎన్నికలు పూర్తయ్యాయి.

పంచాయతీ ఎన్నికలు

ఏపీలో పంచాయతీ ఎన్నికలను మూడు దశల్లో నిర్వహించనున్నట్లు ఎస్ఈసీ పునేఠా తెలిపారు. పంచాయతీ ఎన్నికల మొదటి విడత ఎన్నికలకు నవంబర్ 13న నోటిఫికేషన్ విడుదల చేయనున్నట్లు తెలిపారు. నవంబర్ 26న పోలింగ్, కౌంటింగ్ ఉంటుంది. రెండో విడత పంచాయతీ ఎన్నికలు నవంబర్ 29న , మూడో విడత ఎన్నికలు డిసెంబర్ 2న జరగనున్నాయి.

ఈ తాజా షెడ్యూల్‌లో రాష్ట్ర రాజకీయాలను శాసించే అత్యంత కీలకమైన కార్పొరేషన్లు, పట్టణాలు ఉండటం ఎన్నికల ప్రాధాన్యతను అమాంతం పెంచేసింది. శ్రీకాకుళం, కాకినాడ, రాజమహేంద్రవరం, మంగళగిరి–తాడేపల్లి వంటి నాలుగు ప్రతిష్టాత్మక కార్పొరేషన్లతో పాటు భీమవరం, తాడేపల్లిగూడెం, గుడివాడ, నరసరావుపేట, శ్రీకాళహస్తి సహా 15 మున్సిపాలిటీలు, 4 నగర పంచాయతీలలో అభ్యర్థుల భవితవ్యం తేలనుంది. నాలుగు కార్పొరేషన్లలోని 260 డివిజన్లు, 19 పురపాలక సంస్థలలోని 749 వార్డులకు రిజర్వేషన్ల ప్రక్రియ ఇప్పటికే కొలిక్కి రాగా.. మేయర్ పీఠాల కేటాయింపు ఆసక్తికరంగా మారింది. శ్రీకాకుళం, కాకినాడ మేయర్ స్థానాలను బీసీ మహిళలకు, రాజమహేంద్రవరాన్ని ఎస్సీ జనరల్‌కు, మంగళగిరి–తాడేపల్లి కార్పొరేషన్‌ను ఎస్టీ వర్గానికి రిజర్వ్ చేయడంతో ఆయా సామాజిక వర్గాల నేతలు టికెట్ల వేటలో నిమగ్నమయ్యారు.

ఎన్నికల సంఘం ఖరారు చేసిన క్యాలెండర్ ప్రకారం రేపు అంటే నవంబర్ 13 అధికారిక నోటిఫికేషన్ విడుదలై, నామినేషన్ల పర్వానికి తెరలేవనుంది. నవంబర్ 17 వరకు నామినేషన్లు స్వీకరించి, పరిశీలన, ఉపసంహరణ గడువు ముగిసిన అనంతరం నవంబర్ 26న పోలింగ్ నిర్వహించి, 30వ తేదీన ఫలితాలను ప్రకటిస్తారు. విశేషమేమిటంటే.. ఇదే నవంబర్ 26న రాష్ట్రంలో మూడు విడతల్లో జరగనున్న గ్రామ పంచాయతీ ఎన్నికల తొలి విడత పోలింగ్ కూడా జరగనుండటంతో, రేపటి నుంచే గ్రామీణ, పట్టణ ప్రాంతాల్లో ఒకేసారి ఎన్నికల జాతర మొదలుకాబోతోంది.

ఇప్పటికే 100 పురపాలక సంస్థల్లో తిరుగులేని ఆధిపత్యం ప్రదర్శించిన ఎన్డీయే కూటమి.. ఈ 23 స్థానాల్లోనూ క్లీన్ స్వీప్ చేసి తన పట్టును నిరూపించుకోవాలని పక్కా ప్రణాళికతో బరిలోకి దిగుతోంది. మరోవైపు, గత ఓటముల నుంచి తేరుకుని ఈ పెండింగ్ స్థానాల్లోనైనా గట్టి పోటీ ఇచ్చి ఉనికిని చాటుకోవాలని ప్రతిపక్ష వైఎస్సార్‌సీపీ వ్యూహాలు రచిస్తోంది. అటు పట్టణ డివిజన్లు, ఇటు పల్లె పంచాయతీలు ఒకేసారి సమరానికి సిద్ధమవుతుండటంతో నవంబర్ నెలాఖరు వరకు ఆంధ్రప్రదేశ్ రాజకీయం అత్యంత ఉత్కంఠభరితంగా సాగనుంది.

ReNew Power Investments: ఏపీలో రూ.29,500 కోట్ల భారీ పెట్టుబడులు.. మంత్రి లోకేష్ సమక్షంలో రెన్యూ రెండు కీలక ఒప్పందాలు

Satyaprasad Bandaru — Thu, 12 Nov 2026 12:24:57 +0530

ReNew Power Investments: ఆంధ్రప్రదేశ్ రెన్యువబుల్ ఎనర్జీ రంగంలో మరో భారీ ముందడుగు పడింది. రాష్ట్రంలో రూ.29,500 కోట్ల పెట్టుబడితో మరో రెండు కీలక ప్రాజెక్టులను ఏర్పాటు చేసేందుకు ప్రముఖ గ్రీన్ ఎనర్జీ సంస్థ 'రెన్యూ' (ReNew) ముందుకొచ్చింది. విశాఖపట్నంలో మంత్రి నారా లోకేష్‌తో రెన్యూ ఛైర్మన్, సీఈవో సుమంత్ సిన్హా భేటీ అయ్యారు. చర్చల అనంతరం మంత్రి లోకేష్ సమక్షంలో ప్రభుత్వ అధికారులు, రెన్యూ ప్రతినిధుల మధ్య అవగాహన ఒప్పందం కుదిరింది.

కొత్త ప్రాజెక్టుల వివరాలు

తాజా ఒప్పందంలో భాగంగా రాష్ట్రంలో కొత్తగా 2 గిగావాట్ల పంప్డ్ స్టోరేజీ ప్రాజెక్టులో రూ.12,500 కోట్లు, గ్రీన్ అమ్మోనియా, ఈ-ఫ్యూయల్ ప్రాజెక్టులో రూ.17,000 కోట్లు పెట్టుబడి పెట్టనున్నట్లు సుమంత్ సిన్హా ప్రకటించారు. ఈ సందర్భంగా రాష్ట్రంలో రెన్యూ సంస్థ చేపడుతున్న భారీ పెట్టుబడులను మంత్రి లోకేష్ అభినందించారు. అదనంగా రూ.11,000 కోట్ల విలువైన పాలి సిలికాన్, మెటలర్జికల్ గ్రేడ్ సిలికాన్ ప్రాజెక్టు ఏర్పాటుకు సూత్రప్రాయ అంగీకారం తెలిపినందుకు కృతజ్ఞతలు తెలుపుతూ, ఆయా ప్రాజెక్టుల పనులను వేగవంతం చేయాలని కోరారు. ప్రాజెక్టుల గ్రౌండింగ్‌కు ప్రభుత్వం తరపున పూర్తి సహాయ సహకారాలు అందిస్తామని హామీ ఇచ్చారు. అలాగే, యూనివర్సిటీ ఆఫ్ న్యూ సౌత్ వేల్స్ సహకారంతో తిరుపతి ఐఐటీలో ఏర్పాటు చేయనున్న సోలార్ సెల్ ప్రోటోటైపింగ్ కేంద్రంలో భాగస్వామ్యం వహించాలని సిన్హాను మంత్రి లోకేష్ కోరారు.

Also Read: విశాఖలో ప్రారంభమైన సీఐఐ సదస్సు.. రూ. లక్షల కోట్ల పెట్టుబడులే లక్ష్యంగా సమ్మిట్

రెన్యూ భవిష్యత్ ప్రణాళికలు

2015లో కళ్యాణదుర్గంలో 24 మెగావాట్ల విండ్ ప్రాజెక్టుతో ఏపీలో తమ ప్రస్థానాన్ని ప్రారంభించామని సుమంత్ సిన్హా గుర్తుచేశారు. ప్రస్తుతం రాష్ట్రంలోని 10 ప్రాంతాల్లో 717 మెగావాట్ల విండ్, 60 మెగావాట్ల సోలార్ ప్రాజెక్టులను నిర్వహిస్తున్నట్లు తెలిపారు. సంస్థ చేపడుతున్న ఇతర భారీ ప్రాజెక్టుల వివరాలను ఆయన వెల్లడించారు.

గుంతకల్లు: రూ.22,000 కోట్లతో దేశంలోనే అతిపెద్ద హైబ్రిడ్ పునరుత్పాదక ప్రాజెక్ట్ (1.8 GW సోలార్, 1 GW విండ్, 2 GWh బ్యాటరీ స్టోరేజీ) నిర్మాణంలో ఉంది.
మాకవారిపాలెం (అనకాపల్లి జిల్లా): రూ.85,200 కోట్ల విలువైన 1,000 మెగావాట్ల గ్రీన్ డేటా సెంటర్ ఏర్పాటుకు గత ఆగస్టులో ఎస్ఐపీబీ ఆమోదం లభించింది.
రాంబిల్లి: రూ.4,200 కోట్ల వ్యయంతో 6.5 GW ఇంగాట్-వేఫర్ ప్లాంట్‌కు ఆగస్టులో శంకుస్థాపన జరిగింది.

వీటితో పాటు మరో 2 GW పంప్డ్ స్టోరేజ్, 300 KTPA గ్రీన్-అమ్మోనియా ప్లాంట్, 5 GW హైబ్రిడ్ ప్రాజెక్టులు పైప్‌లైన్‌లో ఉన్నాయని ఆయన వివరించారు.

Also Read: పారిశ్రామిక సమరంలో ఏపీ vs తెలంగాణ - విశాఖ సీఐఐ, హైదరాబాద్ భారత్ సమ్మిట్ల పోరు.. గ్లోబల్ పెట్టుబడులు ఎవరికి?

CII Partnership Summit 2026 Live Updates: ఏపీలో కియా మోటార్స్ భారీ విస్తరణ - రూ.17 వేల కోట్ల పెట్టుబడితో మరో కొత్త ప్లాంట్

Raja Sekhar Allu — Thu, 12 Nov 2026 10:38:39 +0530

ఆంధ్రప్రదేశ్ ఆర్థిక ముఖచిత్రాన్ని మార్చే దిశగా రాష్ట్ర ప్రభుత్వం అత్యంత ప్రతిష్టాత్మకంగా నిర్వహిస్తున్న 31వ సీఐఐ భాగస్వామ్య సదస్సు నేడు (నవంబర్ 12) విశాఖపట్నంలో ఘనంగా ప్రారంభమైంది. నయా ప్రపంచ క్రమంలో దిశానిర్దేశం: వాణిజ్యం, సాంకేతికత, విశ్వాసం అనే థీమ్‌తో జరుగుతున్న ఈ రెండు రోజుల అంతర్జాతీయ సదస్సుకు సుమారు 59 దేశాల నుంచి 1,250 మందికి పైగా ప్రతినిధులు, 15 మంది విదేశీ మంత్రులు, 350 మంది విదేశీ డెలిగేట్లు, పారిశ్రామిక దిగ్గజాలు హాజరయ్యారు. ముఖ్యమంత్రి నారా చంద్రబాబు నాయుడు స్వయంగా ఈ సదస్సును పర్యవేక్షిస్తూ, ఈజ్ ఆఫ్ డూయింగ్ బిజినెస్స్థా నంలో స్పీడ్ ఆఫ్ డూయింగ్ బిజినెస్ని నాదంతో రాష్ట్రానికి వేల కోట్ల పెట్టుబడులను ఆకర్షించేందుకు కీలక భేటీలు నిర్వహిస్తున్నారు

Parivarthana Rajaneethi Party Launch: పరివర్తన పోరుతో మూడో శక్తిగా విజయసాయిరెడ్డి - వైసీపీ ఓటు బ్యాంకుకే పెద్ద దెబ్బ కానుందా?

Raja Sekhar Allu — Thu, 12 Nov 2026 08:33:48 +0530

Impact Of Vijayasai Reddy Party On YSRCP Vote Bank: ఆంధ్రప్రదేశ్ రాజకీయాల్లో కొత్త పార్టీ ఆవిర్భవించింది. వైఎస్సార్ కాంగ్రెస్ పార్టీలో సుదీర్ఘకాలం నంబర్-2గా, అధినేత వైఎస్ జగన్ మోహన్ రెడ్డికి అత్యంత నమ్మకస్తుడిగా వ్యవహరించిన మాజీ రాజ్యసభ ఎంపీ వి. విజయసాయిరెడ్డి.. విజయవాడ వేదికగా పరివర్తన రాజనీతి పార్టీ ని అధికారికంగా ప్రారంభించారు. రాష్ట్రంలో ఎన్డీయే కూటమి, విపక్ష వైఎస్సార్‌సీపీలు నడిపిస్తున్న కుటుంబ, ఆధిపత్య రాజకీయాలకు ముగింపు పలికి, అట్టడుగు వర్గాలు , యువతే ప్రధాన శక్తిగా మూడో ప్రత్యామ్నాయాన్ని అందిస్తామని ఆయన స్పష్టం చేశారు.

రెడ్డి సామాజికవర్గాన్ని ఓటు బ్యాంకుగా మార్చుకునే ప్రయత్నం

విజయసాయిరెడ్డి ప్రకటనలు కేవలం రాజకీయ ఆర్భాటానికి పరిమితమైనవి కావు. ఒకప్పుడు వైఎస్సార్‌సీపీ ఆర్థిక, రాజకీయ వ్యవస్థలకు కీలక మార్గదర్శిగా పనిచేసిన సాయిరెడ్డికి.. రాష్ట్రంలోని ప్రతి నియోజకవర్గంలోనూ ద్వితీయ శ్రేణి నాయకులు, ఆర్థిక మూలాలు , రెడ్డి సామాజిక వర్గపు సమీకరణాలపై సంపూర్ణ అవగాహన ఉంది. ఆయన నేరుగా జగన్ మోహన్ రెడ్డి నిరంకుశ వైఖరిని, తాడేపల్లి కోటరీని లక్ష్యంగా చేసుకుని బరిలోకి దిగుతుండటం వల్ల, వైఎస్సార్‌సీపీ బలమైన పునాదులను కదిలించే దిశగానే ఆయన అడుగులు పడుతున్నాయి.

రెండు, మూడు శాతం ఓట్లు చీల్చినా సమస్యే

రాజకీయ నిపుణుల అంచనాల ప్రకారం.. కొత్త పార్టీ ప్రభావం వల్ల విజయసాయిరెడ్డి సగటున 2 నుంచి 3 శాతం ఓటు బ్యాంకును ఆకర్షించగలిగినా, అది రాష్ట్ర రాజకీయ సమీకరణాలను తీవ్రంగా ప్రభావితం చేస్తుంది. ముఖ్యంగా రాయలసీమ, నెల్లూరు , ఉమ్మడి ప్రకాశం జిల్లాల్లో జగన్‌కు సాంప్రదాయక మద్దతుదారులుగా ఉన్న రెడ్డి సామాజిక వర్గం, అసంతృప్తితో ఉన్న వైసీపీ పాత కేడర్ విజయసాయిరెడ్డి వైపు చూసే అవకాశాలు మెండుగా ఉన్నాయి. విజయసాయిరెడ్డికి ఆ వర్గంలో ఉన్న వ్యక్తిగత సంబంధాలు వైఎస్సార్‌సీపీ ఓటు బ్యాంకుకు కచ్చితమైన గండికొట్టనున్నాయి. ఈ 2-3 శాతం ఓట్ల కోత ఎవరికి అత్యంత నష్టం కలిగిస్తుందనేది ఇక్కడ అసలైన ప్రశ్న. క్షేత్రస్థాయి విశ్లేషణల ప్రకారం, ఈ ఓట్ల చీలిక వల్ల 90 శాతం నష్టం వైఎస్సార్‌సీపీకే వాటిల్లుతుంది. 2024 ఎన్నికల ఓటమి తర్వాత ఆత్మరక్షణలో ఉన్న వైఎస్సార్‌సీపీ ఓటు బ్యాంకు నుంచి కొంత భాగాన్ని విజయసాయిరెడ్డి లాక్కోగలిగితే, అది జగన్ మోహన్ రెడ్డి కోలుకునే అవకాశాలను మరింత సంక్లిష్టం చేస్తుంది. కూటమికి ఉన్న పటిష్టమైన ఓటు బ్యాంకింగ్‌కు ఈ ఓట్ల చీలిక మరింత పరోక్ష లబ్ధి చేకూర్చే అవకాశం ఉందే తప్ప ఎలాంటి నష్టం ఉండదు.

జగన్ అవమానించారనే పార్టీ పెట్టారా?

ముఖ్యంగా రెడ్డి సామాజిక వర్గంలో జగన్ ఏకచ్ఛత్రాధిపత్యానికి విజయసాయిరెడ్డి రూపంలో మొదటిసారి ఒక సొంత వర్గం నుంచే గట్టి సవాలు ఎదురవుతోంది. ఇప్పటివరకు ప్రత్యామ్నాయం లేక జగన్ వెంటే నిలిచిన అసంతృప్త రెడ్డి నేతలకు, అలాగే వైసీపీ తీరుపై విసుగు చెందిన సంప్రదాయ కాంగ్రెస్ మూలాలు ఉన్న ఓటర్లకు విజయసాయిరెడ్డి కొత్త వేదికగా కనిపిస్తున్నారు. విధేయత అంటే బానిసత్వం కాదు అని సాయిరెడ్డి చేసిన వ్యాఖ్యలు వైసీపీలోని అసంతృప్త నేతలను ఆకర్షించే పవర్ ఫుల్ పిచ్‌గా పనిచేస్తున్నాయి. విజయసాయిరెడ్డి స్థాపించిన పరివర్తన రాజనీతి పార్టీ అధికారంలోకి రావడం లేదా పెద్ద సంఖ్యలో సీట్లు గెలవడం తక్షణ లక్ష్యం కాకపోవచ్చు. కానీ, వైఎస్సార్‌సీపీ క్వేడర్‌ను, రెడ్డి ఓటు బ్యాంకును ఛిద్రం చేస్తూ జగన్ మోహన్ రెడ్డిని రాజకీయంగా దెబ్బతీయడమే ఆయన ప్రాథమిక వ్యూహంగా కనిపిస్తోంది. ఏపీ రాజకీయంలో ఇన్‌సైడర్ అయిన విజయసాయిరెడ్డి వేస్తున్న ఈ పాచికలు రాబోయే రోజుల్లో వైఎస్సార్‌సీపీ భవిష్యత్తును తీవ్రమైన ప్రతికూలతల్లోకి నెట్టడం ఖాయంగా కనిపిస్తోంది.

Telangana AP CII Summit: పారిశ్రామిక సమరంలో ఏపీ vs తెలంగాణ - విశాఖ సీఐఐ, హైదరాబాద్ భారత్ సమ్మిట్ల పోరు.. గ్లోబల్ పెట్టుబడులు ఎవరికి?

Raja Sekhar Allu — Thu, 12 Nov 2026 08:14:13 +0530

AP vs Telangana Investments Competition 2026: తెలుగు రాష్ట్రాలైన ఆంధ్రప్రదేశ్, తెలంగాణల మధ్య పారిశ్రామిక పురోగతి, గ్లోబల్ పెట్టుబడుల సాధనలో సరికొత్త ఆరోగ్యకరమైన పోటీ వాతావరణం నెలకొంది. రెండు రాష్ట్రాల ప్రభుత్వాలు దాదాపు ఒకే సమయంలో మెగా పెట్టుబడుల సదస్సులను నిర్వహిస్తుండటం కార్పొరేట్ రంగాన్ని ఆకర్షిస్తోంది. తెలంగాణలోని ఎనుముల రేవంత్ రెడ్డి సర్కార్ హైదరాబాద్‌లోని హైటెక్స్ వేదికగా నవంబర్ 13-14 తేదీల్లో ప్రసిద్ధ భారత్ సమ్మిట్ 2026 ను నిర్వహిస్తుండగా.. అటు ఆంధ్రప్రదేశ్‌లో నారా చంద్రబాబు నాయుడు నేతృత్వంలోని కూటమి ప్రభుత్వం నవంబర్ 12, 13 తేదీల్లో విశాఖపట్నం వేదికగా ప్రతిష్టాత్మక 31వ సీఐఐ భాగస్వామ్య సదస్సు ను ఎంతో వైభవంగా నిపుణులతో నిర్వహిస్తోంది. రెండు సదస్సుల లక్ష్యం ఒక్కటే—అంతర్జాతీయ పారిశ్రామిక దిగ్గజాలను ఆకట్టుకుని వేల కోట్ల రూపాయల పెట్టుబడులను తమ వైపు తిప్పుకోవడమే.

పోలికలు సహజమే!

ఒకే సమయంలో ఇరు రాష్ట్రాల్లో సమ్మిట్‌లు జరగనుండటంతో సహజంగానే మీడియా, కార్పొరేట్ వర్గాల్లో పోలికలు తీవ్రమయ్యాయి. ఆంధ్రప్రదేశ్ నిర్వహించే సీఐఐ భాగస్వామ్య సదస్సుకు కేంద్ర హోంమంత్రి పీయూష్ గోయల్‌తో పాటు ప్రపంచవ్యాప్తంగా ఉన్న అంతర్జాతీయ బహుళజాతి కంపెనీల సీఈఓలు, దౌత్యవేత్తలు హాజరవుతున్నారు. సముద్ర తీర ప్రాంతం, డెస్టనీ సిటీ ఆధారంగా విశాఖను గ్లోబల్ ఇన్వెస్ట్‌మెంట్ హబ్‌గా ప్రతిపాదించి దాదాపు రూ. 11 లక్షల కోట్ల విలువైన అవగాహన ఒప్పందాలు కుదుర్చుకోవడమే లక్ష్యంగా చంద్రబాబు సర్కార్ వ్యూహాలు రచిస్తోంది. మరోవైపు, తెలంగాణ నిర్వహించే భారత్ సమ్మిట్‌లో 70కి పైగా దేశాల నుంచి 1,000 మందికి పైగా ప్రతినిధులు, పారిశ్రామికవేత్తలు, గ్లోబల్ పాలసీ మేకర్స్ పాల్గొంటున్నారు. రేవంత్ రెడ్డి నాయకత్వంలో గ్లోబల్ ఈక్విటీ, సాంకేతికత, ఫ్యూచర్ సిటీ కాన్సెప్ట్‌లతో గ్లోబల్ బ్రాండ్‌లను ఆకర్షించేందుకు పటిష్టమైన చర్యలు తీసుకుంటున్నారు. హైదరాబాద్ ఇప్పటికే పొందిన ఐటీ అండ్ ఫార్మా గ్లోబల్ అడ్వాంటేజ్‌ను మరింత ముందుకు తీసుకెళ్తూ గ్రీన్ ఎనర్జీ, ఏఐ, స్పేస్ టెక్నాలజీ విభాగాలలో వేల కోట్ల పెట్టుబడులను సాధించడమే తెలంగాణ వ్యూహంగా ఉంది.

తెలంగాణకు హైదరాబాద్.. ఏపీకి పోర్టులు

ఈ రెండు సమ్మిట్‌ల పోలికలో మౌలిక సదుపాయాలు, ఎకోసిస్టమ్స్ ప్రధాన వ్యూహాత్మక భిన్నత్వాలుగా నిలుస్తున్నాయి. తెలంగాణ తన ప్రపంచ శ్రేణి హైదరాబాద్ నగర మౌలిక వసతులు, గ్లోబల్ కేపబిలిటీ సెంటర్లు , వేగవంతమైన అనుమతుల వ్యవస్థలను ప్రధాన ఆయుధాలుగా ఉపయోగిస్తుంటే.. ఆంధ్రప్రదేశ్ తన విస్తారమైన సముద్ర తీరం, పోర్టు ఆధారిత రవాణా, గ్రీన్ హైడ్రోజన్, స్పేస్ టెక్నాలజీ హబ్‌లను చూపుతూ మల్టీనేషనల్స్ కంపెనీలకు ఆకర్షణీయమైన ప్రాధాన్యతలను అందిస్తోంది. కార్పొరేట్ సంస్థల కోణంలో చూస్తే, ఈ రేసు ద్వారా రెండు రాష్ట్రాలకు పెట్టుబడులు రావడం దేశానికే ప్రయోజనకరంగా మారుతోంది.

పోటీ వల్ల రెండు రాష్ట్రాలకూ ప్రయోజనమే!

అయితే ఏ రాష్ట్రం ఎంత సులభతర వాణిజ్యం , సింగిల్ విండో విధానం , స్థిరమైన నిధులు అందిస్తుందనే అంశంపైనే ఒప్పందాల కార్యరూపం ఆధారపడి ఉంటుంది. పెట్టుబడుల సమ్మిట్ వేదికపై ఎవరి ఒప్పందాల సంఖ్య ఎంత, ఏ రాష్ట్రం అధిక గ్లోబల్ జెయింట్స్‌ను తమ భూభాగంలోకి ఆహ్వానిస్తుందో రాబోయే రోజుల్లో తేలాల్సి ఉంది. తెలుగు రాష్ట్రాల మధ్య నెలకొన్న ఈ పెట్టుబడుల పోటీ రాజకీయ రంగానికి అతీతంగా అభివృద్ధికి కొత్త గమనకాలాన్ని ఇస్తోంది. విశాఖపట్నం పోర్టు లొకేషన్ బలం కాగా, హైదరాబాద్ ఆవిష్కరణల నెట్‌వర్క్ తెలంగాణకు అడ్వాంటేజ్. నవంబర్ రెండో వారంలో వెలువడే పెట్టుబడుల ఒప్పందాలు రాబోయే రోజుల్లో ఏపీ, తెలంగాణ రాజకీయ శ్రేణుల మైలేజ్‌ను శాసించే ప్రధాన కారకాలుగా నిలవబోతున్నాయని అనుకోవచ్చు.

Vijayasai Reddy Politics:రెండు కుటుంబాల ఆధిపత్యానికి చెక్.. రాజకీయాల్లో మార్పులకు శ్రీకారం చుట్టాం: విజయసాయిరెడ్డి

Shankar Dukanam — Wed, 11 Nov 2026 19:24:31 +0530

Parivartan Rajniti Party | అమరావతి: ఆంధ్రప్రదేశ్ భవిష్యత్తు ఏ ఒక్క నేత చేతుల్లోనో, రెండు కుటుంబాల చేతుల్లోనో బంధీ కాకూడదని నూతన రాజకీయ ప్రయాణానికి శ్రీకారం చుట్టినట్లు మాజీ ఎంపీ విజయసాయిరెడ్డి (V Vijayasai Reddy) తెలిపారు. రాష్ట్రంలో సుదీర్ఘకాలంగా కొనసాగుతున్న కుటుంబ పాలనకు, అహంకారపు నాయకత్వానికి స్వస్తి పలకడమే ఈ పార్టీ ప్రధాన లక్ష్యం అన్నారు. తన రాజకీయ పార్టీ పేరు పరివర్తన రాజనీతి పార్టీ అని విజయవాడ వేదికగా ప్రకటించారు. అనంతరం విజయసాయిరెడ్డి మాట్లాడుతూ.. పదవులు, వారసత్వాలు తాత తండ్రుల నుండి కాకుండా కష్టం, అనుభవం ద్వారా సాధించుకోవచ్చని తన జీవితమే నిరూపించిందన్నారు.

వైసీపీ కోసం ఎంతో చేశా.. చివరికి అవమానాలు మిగిలాయి..

‘గతంలో వైఎస్సార్‌సీపీ నిర్మాణంలో ఇటుక ఇటుక పేర్చి కష్టపడిన నాకు చివరకు అవమానమే దక్కింది. నాయకత్వాన్ని గౌరవించడం విధేయత అనిపించుకుంటుంది. కానీ, అది బానిసత్వం కాకూడదు. 2019లో 151 స్థానాలు ఇచ్చిన రాష్ట్ర ప్రజలు, 2024 అసెంబ్లీ వైఎస్సార్‌సీపీని 11 సీట్లకే ఎందుకు పరిమితం చేశారో మాజీ సీఎం వైఎస్ జగన్ ఆత్మపరిశీలన చేసుకోవాలి. ప్రజలు తిరస్కరించింది సంక్షేమాన్ని కాదు, కేవలం నాయకుడి అహంకారాన్ని.. కార్యకర్తలను దూరం చేసుకున్న రాజకీయ సంస్కృతిని’ అన్నారు.

వైసీపీ, టీడీపీ తీరుపై నిలదీత.. రాష్ట్ర అప్పులపై ఆందోళన

మరోవైపు, గత అసెంబ్లీ ఎన్నికలకు ముందు ఇచ్చిన హామీలను చంద్రబాబు నాయుడు ప్రభుత్వం విస్మరించినందుకు ప్రజలు నిలదీస్తున్నారని విజయసాయిరెడ్డి అన్నారు. వారు పోస్టర్లలో చూపించే అభివృద్ధి రియల్ టైంలో కనిపించడం లేదన్నారు. రాష్ట్ర అప్పులు పుష్కర కాలంలో లక్ష కోట్ల నుంచి దాదాపు 10 లక్షల కోట్లకు చేరాయే తప్ప సంపద సృష్టి జరగలేదు అన్నారు. ఉద్యోగాలు లేక యువత, గిట్టుబాటు ధర లేక రైతులు అల్లాడుతున్నారు. రౌడీయిజం, రెడ్ బుక్ రాజ్యాంగం, రాజకీయం పేరిట కక్షసాధింపు చర్యలు చేపడితే టీడీపీ నేతృత్వంలోని కూటమి ప్రభుత్వం పతనం తప్పదన్నారు. తిరుమల లడ్డూ వివాదం వంటి సున్నితమైన అంశాలను రాజకీయం చేస్తూ హిందువుల మనోభావాలతో ఆడుకోవడం అత్యంత శోచనీయం అన్నారు. మన పరివర్తన రాజనీతి పార్టీ (PRP) ఏ ఒక్కరికీ B టీమ్ కాదని, 5 కోట్ల ఆంధ్రుల ఆత్మగౌరవానికి మాత్రమే జవాబుదారీగా నిలుస్తుందన్నారు.

66 శాతం సీట్లు యువతకే..

‘2029 ఎన్నికల్లో రాష్ట్రంలోని అన్ని నియోజకవర్గాల్లో పోటీ చేసి విజయం సాధించడమే మా లక్ష్యం. సామాజిక న్యాయంలో భాగంగా బిసి, ఎస్సి, ఎస్టి, మైనారిటీ వర్గాలకు జెండాలు మోసేందుకే కాకుండా రాష్ట్ర ప్రభుత్వాన్ని నడిపే స్థాయిలో ప్రాతినిధ్యం కల్పిస్తాం. రాబోయే ఎన్నికల్లో 66 శాతం ఎమ్మెల్యే, ఎంపీ టికెట్లను జెన్-జీ (Gen-Z), యువతకే కేటాయిస్తామని మాటిస్తున్నాను. మన పార్టీ మేనిఫెస్టో కేవలం కాగితాలకే పరిమితం కాకుండా, ప్రతి 3 నెలలకోసారి ప్రభుత్వ ఆదాయ వ్యయాలపై శ్వేతపత్రం విడుదల చేసే పారదర్శక పాలన అందిస్తాం. తమిళనాడు తరహాలోనే ఆంధ్రప్రదేశ్‌లో కూడా మూడో ప్రత్యామ్నాయం సాధ్యమని నిరూపిస్తాం. అవినీతి రహిత, ప్రక్షాళన రాజకీయాలకు ఈ వేదిక ద్వారా నాంది పలుకుతున్నామని’ విజయసాయిరెడ్డి తన ప్రసంగంలో స్పష్టం చేశారు.

Pawan Gifted Property To Children: విడాకుల వేళ పవన్ కళ్యాణ్ మాజీ భార్య అన్నా, పిల్లల పేరిట ఆస్తులు చిట్టా వైరల్ !

Shankar Dukanam — Wed, 11 Nov 2026 17:30:01 +0530

అమరావతి: ఏపీ డిప్యూటీ సీఎం పవన్ కళ్యాణ్, అన్నా కొణిదెల దంపతులు విడిపోతున్నట్లు ప్రకటించారు. అనంతరం పవన్ నుంచి అన్నా లెజినోవాకు భరణం ఎంత వస్తుందని చర్చ జరుగుతోంది. ఈ క్రమంలో అన్నా లెజినోవాతో పాటు పిల్లలకు పవన్ కళ్యాణ్ ఎంత ఆస్తి ఇచ్చారు? అనే అంశం సోషల్ మీడియాలో హాట్ టాపిక్‌గా మారింది. పవన్ కళ్యాణ్, అన్నా దంపతులు పరస్పర అంగీకారంతో విడిపోవడంతో భరణానికి సంబంధించిన అధికారిక వివరాలు బయటకు రాలేదు. కానీ ఎన్నికల అఫిడవిట్‌లో పవన్ కళ్యాణ్ సమర్పించిన ఆస్తుల వివరాలు ఇప్పుడు వైరల్ అవుతున్నాయి.

2024 ఏపీ అసెంబ్లీ ఎన్నికల్లో పిఠాపురం నుంచి పోటీ చేసిన పవన్ కళ్యాణ్ దాఖలు చేసిన అఫిడవిట్ ప్రకారం.. హైదరాబాద్‌లోని జూబ్లీహిల్స్ రోడ్ నంబర్ 35, షేక్‌పేట్ పరిధిలో ఉన్న స్థిరాస్తిని అన్నా లెజినోవాతో కలిగిన సంతానం అయిన కొణిదెల పోలీనా అంజనీ, కొణిదెల మార్క్ శంకర్‌లకు సమాన వాటాలుగా బదిలీ చేసినట్లు తెలిపారు. ఈ ఆస్తి విలువ అఫిడవిట్‌లో ఒక్కొక్కరికి రూ.11 కోట్లుగా ఇచ్చినట్లు స్పష్టం చేశారు. మరోవైపు, బంజారాహిల్స్‌లోని ఎమ్మెల్యే కాలనీలో 3,336 చదరపు అడుగుల విస్తీర్ణంలో ఉన్న ఫ్లాట్‌ను అన్నా కొణిదెల పేరిట ఉందని తెలిపారు. దీని మార్కెట్ విలువ సుమారు రూ.1.95 కోట్లు అని అఫిడవిట్‌లో పవన్ కళ్యాణ్ వెల్లడించారు.

ఇక బ్యాంకు డిపాజిట్ల విషయానికొస్తే.. అన్నా లెజినోవా పేరిట సుమారు రూ.86 లక్షల డిపాజిట్లు ఉన్నట్లు అఫిడవిట్‌లో ఉంది. పిల్లల పేరిట కూడా లక్షల రూపాయల విలువైన చరాస్తులు ఉన్నట్లు వివరించారు. అయితే ఇవన్నీ ఎన్నికల సమయంలో పవన్ సమర్పించిన అఫిడవిట్‌లోని వివరాలు అని, వాటిని సోషల్ మీడియాలో వైరల్ చేస్తున్నారు. తాజాగా పవన్ కళ్యాణ్ విడాకుల అనంతరం మూడో భార్య అన్నాకు, సంతానం మార్క్ శంకర్, పోలేనా అంజనా పేరిట పేర్కొన్న ఆస్తుల వివరాలు హల్ చల్ చేస్తున్నాయి.

కాగా, పవన్ కళ్యాణ్ మొదటి భార్య నందినికి విడాకుల సమయంలో రూ.5 కోట్లు భరణం ఇచ్చారని ఎప్పటినుంచో ప్రచారంలో ఉంది. నటి రేణూ దేశాయ్ విషయానికి వస్తే కొన్ని ఆస్తులు రిజిస్టర్ చేశారని, ఆమె అంతగా ఆశించలేదని గతంలో వైరల్ అయింది. పిల్లల పోషణ కోసం ఖర్చులు పవన్ భరిస్తున్నారని తెలిసిందే. తాజాగా విడాకులు తీసుకున్న అన్నా లెజినోవాకు దాదాపు 1200 కోట్ల వరకు ప్రాపర్టీ ఇచ్చారని ప్రచారం జరుగుతోంది. దీనిపై ఆ దంపతులు మాత్రం ఎక్కడా స్పందించలేదు కనుక క్లారిటీ రావాల్సి ఉంది.