Pan IIT Summit: విజయవాడలో పాన్ ఐఐటీ సమ్మిట్.. ఆవిష్కరణలను పరిశీలించిన సీఎం చంద్రబాబు.. అమరావతి నుంచి భారత్ మోడల్ చూపిస్తామన్న మంత్రి లోకేశ్

Pan IIT Summit: విజయవాడలో పాన్ ఐఐటీ సమ్మిట్ వైభవంగా ప్రారంభమైంది. ఈ సదస్సులో యువ ఐఐటీయన్లు, స్టార్టప్ సంస్థలు ప్రదర్శించిన ఆవిష్కరణలు సీఎం చంద్రబాబు పరిశీలించారు.

విజయవాడలో పాన్ ఐఐటీ సమ్మిట్.. ఆవిష్కరణలను పరిశీలించిన సీఎం చంద్రబాబు

Source : Twitter

Show Quick Read

Key points generated by AI, verified by newsroom

• విజయవాడలో పాన్ ఐఐటీ సమ్మిట్ ప్రారంభమైంది; సీఎం చంద్రబాబు పాల్గొన్నారు.
• సీఎం డ్రోన్, ఈవీ మార్పిడి సహా పలు ఆవిష్కరణలను సందర్శించారు.
• మంత్రి లోకేశ్: అమరావతి నుంచే భారత్ మోడల్ ఆవిష్కరణ లక్ష్యం.

Pan IIT Summit: విజయవాడలోని డాక్టర్ బి.ఆర్. అంబేడ్కర్ కళావేదికలో ప్రతిష్టాత్మకమైన 'పాన్ ఐఐటీ సమ్మిట్' (Pan IIT Summit) అత్యంత వైభవంగా ప్రారంభమైంది. ఈ సదస్సుకు ముఖ్య అతిథిగా సీఎం చంద్రబాబు, మంత్రి నారా లోకేశ్ హాజరయ్యారు. ఈ వేదికపై యువ ఐఐటీయన్లు, వివిధ స్టార్టప్ సంస్థలు ప్రదర్శించిన నూతన ఆవిష్కరణలు అందరినీ ఆకట్టుకున్నాయి.

స్టాళ్ల సందర్శన.. ప్రత్యేక ఆకర్షణగా ప్రాజెక్టులు

• సమ్మిట్ ప్రాంగణంలో ఏర్పాటు చేసిన వివిధ స్టాళ్లను సీఎం చంద్రబాబు పరిశీలించారు. ఈ సందర్భంగా పలు ఆవిష్కరణలను సీఎం తిలకించి, నిర్వాహకులను వివరాలు అడిగి తెలుసుకున్నారు.
• ఆక్సి ఏరోస్పేస్ డ్రోన్: ఆక్సి ఏరోస్పేస్ సంస్థ రూపొందించిన లేటెస్ట్ డ్రోన్‌ను సీఎం చంద్రబాబు పరిశీలించారు. సంస్థ ప్రతినిధుల కోరిక మేరకు ఆ డ్రోన్‌పై సీఎం స్వయంగా సంతకం చేయడం విశేషం.
• పెట్రోల్ బైక్స్ టూ ఈవీ కన్వర్షన్: పెట్రోలుతో నడిచే టూ-వీలర్లను కేవలం గంటల వ్యవధిలో ఎలక్ట్రిక్ వెహికల్స్‌గా మార్చే సరికొత్త టెక్నాలజీని ప్రదర్శించిన స్టాల్‌ను సీఎం సందర్శించారు. ఈ విధానంపై ఆరా తీసిన ఆయన, ఈ ప్రాజెక్ట్‌ను ప్రత్యేకంగా ఏపీలో ఏర్పాటు చేసేలా చర్యలు తీసుకోవాలని అధికారులను ఆదేశించారు.
• హెల్త్ రిపోర్ట్ యాప్: కేవలం ఫేస్ స్కాన్ చేసిన వెంటనే ప్రాథమిక ఆరోగ్య రిపోర్టును అందించే సరికొత్త యాప్‌ను రూపొందించిన స్టార్టప్ స్టాల్‌ను కూడా సీఎం సందర్శించి, వారి ప్రతిభను ప్రశంసించారు.
• చిన్నారుల ఆవిష్కరణలు: 'స్వర్ణాంధ్ర-10 సూత్రాల' అమలులో టెక్నాలజీని ఏ విధంగా ఉపయోగించవచ్చనే అంశంపై చిన్నారులు తమ ఆలోచనలను సీఎంకు వివరించారు. వారి ప్రతిభను మెచ్చిన చంద్రబాబు చిన్నారులను అభినందించి, వారితో కలిసి ప్రత్యేకంగా గ్రూప్ ఫోటో దిగారు.

ప్రపంచానికి భారత్ మోడల్ చూపిద్దాం- మంత్రి నారా లోకేశ్

ఈ సదస్సులో ఐటీ శాఖ మంత్రి నారా లోకేశ్ మాట్లాడుతూ ప్రపంచానికి భారత్ మోడల్‌ను చూపిస్తామని, ఆ మోడల్ కచ్చితంగా అమరావతి నుంచే వస్తుందని ధీమా వ్యక్తం చేశారు.

"ఏ రంగంలోనైనా ఆంధ్రప్రదేశ్ నంబర్ వన్ స్థానంలో ఉండాలనే లక్ష్యంతో కూటమి ప్రభుత్వం పనిచేస్తోంది. ఇందుకోసం విభాగాల వారీగా 23 క్లస్టర్లను ఏర్పాటు చేసి పెట్టుబడులను ఆకర్షిస్తున్నాం. అభివృద్ధి చెందిన దేశాలుగా అవతరించడానికి అమెరికా, యూరప్‌లకు వందేళ్లు పట్టింది. కానీ, వచ్చే పదేళ్లలో భారత్ కూడా ఆ స్థాయికి చేరుకుంటుంది. ఆ ప్రయాణంలో ఆంధ్రప్రదేశ్ అందరికన్నా ముందుంటుంది. ఈ అభివృద్ధి ప్రయాణంలో 'పాన్ ఐఐటీ' మాకు మార్గదర్శనం చేయాలని కోరుతున్నాను" అని మంత్రి లోకేశ్ పేర్కొన్నారు. ఈ సదస్సు రాష్ట్రంలో టెక్నాలజీ అభివృద్ధికి, పారిశ్రామిక వృద్ధికి ఒక గొప్ప వేదికగా మారుతుందని నిపుణులు అభిప్రాయపడ్డారు. 

మరిన్ని చదవండి

శ్రీసిటీ ప్రమాదంలో కార్మికుల మృతి.. బాధితుల కుటుంబాలకు అండగా ఉంటామన్న సీఎం చంద్రబాబు