amravati

AP Local Elections: ఏపీలో మున్సిపల్, కార్పొరేషన్ ఎన్నికలకు బ్రేక్.. ఎస్ఈసీ సంచలన ప్రకటన.. అభ్యర్థుల తుది జాబితాపై ఉత్కంఠ!

Satyaprasad Bandaru — Thu, 22 Oct 2026 09:32:09 +0530

AP Local Elections: ఏపీలో మున్సిపల్, కార్పొరేషన్ ఎన్నికలకు బ్రేక్ పడింది. పుర, నగర ఎన్నికలను తాత్కాలికంగా నిలిపివేస్తూ రాష్ట్ర ఎన్నికల కమిషన్ (SEC) కీలక ఉత్తర్వులు జారీ చేసింది. సుప్రీంకోర్టు ఆదేశాల మేరకు ఎస్ఈసీ ఈ నిర్ణయం తీసుకుంది. ముందు 19 ప్రభావిత ప్రాంతాల్లో మాత్రమే ఎన్నికల ప్రక్రియను నిలిపివేయాలని ఎన్నికల కమిషన్ భావించినప్పటికీ, ప్రస్తుత పరిస్థితుల దృష్ట్యా 100 స్థానాల్లోనూ తాత్కాలికంగా ఎన్నికలను నిలిపివేసింది. మరోవైపు అభ్యర్థుల తుది జాబితా ప్రకటనపై ఉత్కంఠ కొనసాగుతోంది. ఈనెల 25 వరకు అభ్యర్థుల తుది జాబితా వాయిదా వేయాలా లేదా అనే అంశంపై నిర్ణయాన్ని నేడో, రేపో వెల్లడిస్తామని ఎస్ఈసీ తెలిపింది. జిల్లాల కలెక్టర్లు, ఎస్పీలు నివేదికలు ఆధారంగా ఎన్నికల నిర్వహణపై తుది నిర్ణయాన్ని ప్రకటించనున్నట్లు కమిషన్ పేర్కొంది.

కలెక్టర్లు, ఎస్పీలకు కీలక ఆదేశాలు

రాష్ట్రంలోని 7 జిల్లాల్లో 19 పుర, నగరపాలక సంస్థల్లో మినహా మిగిలిన చోట్ల ఎన్నికల ప్రక్రియ యథావిధిగా కొనసాగుతుందని అంతకుముందు ఎస్‌ఈసీ అనిల్‌చంద్ర పునేఠా తెలిపారు. అయితే తాజాగా 100 స్థానాల్లోనూ ఎన్నికలకు తాత్కాలికంగా నిలిపివేశారు. బుధవారం ఆయన వైఎస్సార్‌ కడప, అన్నమయ్య, తిరుపతి, అనంతపురం, ప్రకాశం, పల్నాడు, మార్కాపురం మినహా మిగిలిన జిల్లాల కలెక్టర్లు, ఎస్పీలతో వీడియో కాన్ఫరెన్స్‌ ద్వారా మాట్లాడారు. మున్సిపల్‌ ఎన్నికల సందర్భంగా జరుగుతున్న ఘటనలు ఎంపీటీసీ, జడ్పీటీసీ నామినేషన్లలో రిపీట్ కాకుండా చూడాలని సూచించారు. నామినేషన్ల సమయంలో అభ్యర్థులకు సెక్యూరిటీ కల్పించాలన్నారు. నామినేషన్ల ప్రక్రియను ప్రశాంతంగా, పారదర్శకంగా నిర్వహించేందుకు పటిష్ఠ చర్యలు చేపట్టాలన్నారు. ఎలాంటి అవాంఛనీయ ఘటనలకు జరగకుండా శాంతియుత వాతావరణంలో ఎన్నికలు నిర్వహించేలా చూడాలని కలెక్టర్లు, ఎస్పీలను ఎస్‌ఈసీ పునేఠా ఆదేశించారు.

సుప్రీంకోర్టు ఆదేశాలతో

సుప్రీంకోర్టు ఆదేశాల మేరకు ఎన్నికల ప్రక్రియను పారదర్శకంగా పూర్తి చేయడమే తమ లక్ష్యమని ఎస్ఈసీ తెలిపింది. జిల్లాల్లో శాంతిభద్రతల పరిస్థితి, ఎన్నికల నిర్వహణకు అనుకూలమైన వాతావరణం ఉందో లేదో తెలుసుకునేందుకు కలెక్టర్లు, ఎస్పీలతో నిరంతరం సమీక్షిస్తున్నట్లు ఎస్ఈసీ తెలిపారు. అభ్యర్థుల జాబితా ప్రకటన నిలిచిపోవడంతో ప్రధాన రాజకీయ పార్టీలు, పోటీ పడుతున్న అభ్యర్థులు ఎన్నికల కమిషన్ నిర్ణయం కోసం వేచి చూస్తున్నారు.

Also Read: సుప్రీం ఆదేశాలతో ఊరట - 19 మున్సిపాలిటీల్లో నామినేషన్ల రగడ.. వైసీపీకి దక్కేనా రక్షణ?

ఏకగ్రీవాలపై సందిగ్ధం

మున్సిపల్, కార్పొరేషన్ ఎన్నికలకు బ్రేక్ పడడంతో అధికార పార్టీ అభ్యర్థుల్లో ఉత్కంఠ మొదలైంది. ఇప్పటికే ఏకగ్రీవాలైన స్థానాల్లో మళ్లీ నామినేషన్లు స్వీకరించే అవకాశం ఉండడంతో.. కొత్త నామినేషన్ల దాఖలు అయ్యే అవకాశం ఉందని విశ్లేషకులు అంటున్నారు. దీంతో ఏకగ్రీవాలు సందిగ్ధంలో పడ్డాయి.

ఎన్‌వోసీ, నో డ్యూస్ సర్టిఫికెట్ అవసరం లేదు

నామినేషన్లు దాఖలు చేసే సమయంలో కేసుల్లేవని పోలీసుల నుంచి ఎన్వోసీ, మున్సిపల్, కార్పొరేషన్ సంస్థలకు బకాయిలు లేనట్లుగా నో డ్యూస్‌ సర్టిఫికెట్‌ సబ్మిట్ చేయాలన్న నిబంధన ఎన్నికల కోడ్‌లో లేదని ఎస్ఈసీ పేర్కొంది. కొందరు రిటర్నింగ్‌ అధికారులు, ఎన్నికల అధికారులు ఎన్వోసీ, నో డ్యూస్‌ సర్టిఫికెట్‌ వెంటనే ఇవ్వాలని ఒత్తిడి చేస్తున్నారని పలు రాజకీయ పార్టీలు ఎన్నికల కమిషన్‌ దృష్టికి తీసుకొచ్చాయి. దీనిపై ఎస్ఈసీ క్లారిటీ ఇచ్చింది. ఎన్వోసీ, నో డ్యూస్ సర్టిఫికెట్ లేకపోయినా నామినేషన్లు స్వీకరించాలని సూచించింది.

Also Read: రెబల్స్‌పై వేటు తప్పదు.. సీఎం చంద్రబాబు వార్నింగ్.. సుప్రీం ఆదేశాలపై టీడీపీ స్పష్టత

Sharmila: విజయసాయిరెడ్డి ఇంటికి వెళ్లిన వైఎస్ షర్మిల.. కుమార్తె వివాహానికి ఆహ్వానం

Shankar Dukanam — Wed, 21 Oct 2026 17:49:30 +0530

Sharmila Daughter Anjalis Wedding | విజయవాడ: ఏపీ కాంగ్రెస్ చీఫ్ వైఎస్ షర్మిల తన కుమార్తె వివాహ వేడుకకు సంబంధించి ఆహ్వానాలు అందజేస్తున్నారు. ఇదివరకే తెలుగు రాష్ట్రాల్లో పలువురు ప్రముఖులతో పాటు తమిళనాడు సీఎం జోసెఫ్ విజయ్‌ని తన కుమార్తె అంజిలిరెడ్డి వివాహానికి ఆహ్వానించారు. తాజాగా మాజీ ఎంపీ విజయసాయిరెడ్డిని తన కుమార్తె వివాహ వేడుకకు హాజరుకావాలని ఆహ్వానించారు. విజయసాయిరెడ్డి నివాసానికి వెళ్లిన షర్మిలకు ఆయన కుటుంబసభ్యులు ఆత్మీయ స్వాగతం పలికారు. నవంబర్ 25న అంజిలిరెడ్డి, రఘురామ్ రెడ్డిల వివాహానికి హాజరై కొత్త జంటను ఆశీర్వదించాలని కోరారు.

వెడ్డింగ్ కార్డ్ ఇవ్వడానికి షర్మిల వచ్చి తమ కుటుంబాన్ని వివాహ వేడుకకు ఆహ్వానించారని విజయసాయిరెడ్డి తెలిపారు. ఈ మేరకు పలు ఫొటోలు ఎక్స్ ఖాతాలో పోస్ట్ చేశారు. డాక్టర్‌ YSR మనుమరాలు, షర్మిలమ్మ కుమార్తె అంజిలి Wedding Invitation ఇచ్చి కుటుంబ సమేతంగా వచ్చి వధూవరులను ఆశీర్వదించాల్సిందిగా ఆహ్వానించారని పోస్టులో పేర్కొన్నారు.

డాక్టర్‌ వైయస్సార్‌గారి మనుమరాలు, శ్రీమతి షర్మిలమ్మ కుమార్తె అయిన “చిరంజీవి అంజిలి” “Wedding Invitation” ఇచ్చి కుటుంబ సమేతంగా వచ్చి వధూవరులను ఆశీర్వదించాల్సిందిగా శ్రీమతి షర్మిలమ్మ ఈరోజు ఆహ్వానించారు. https://t.co/SD7gKq1Q5L
— Vijayasai Reddy V (@VSReddy_MP) October 21, 2026

అంజిలి రెడ్డి - సోమల రఘురామ్ రెడ్డిల ఎంగేజ్‌మెంట్ సెప్టెంబర్ 24న ఘనంగా నిర్వహించారు. నవంబర్ 25న వివాహం జరిపించాలని రెండు కుటుంబాల పెద్దలు నిశ్చయించారు. అలాగే డిసెంబర్ 5న రిసెప్షన్ నిర్వహించనున్నట్లు ఇదివరకే వెల్లడించారు.

సెప్టెంబర్ 24న గ్రాండ్‌గా ఎంగేజ్‌మెంట్

ఏపీసీసీ అధ్యక్షురాలు వైఎస్ షర్మిల, బ్రదర్ అనిల్ దంపతుల కుమార్తె వైఎస్ అంజిలి రెడ్డి నిశ్చితార్థ వేడుక సెప్టెంబర్ 24న అత్యంత వైభవంగా జరిగింది. ఇరు కుటుంబ సభ్యులు, కొద్దిమంది ముఖ్య ప్రముఖుల సమక్షంలో వైఎస్ అంజిలి రెడ్డి - సోమల రఘురామ్ రెడ్డిల నిశ్చితార్థ కార్యక్రమం ఘనంగా నిర్వహించారు.

ఈ శుభకార్యానికి తెలంగాణ ముఖ్యమంత్రి రేవంత్ రెడ్డి తన సతీమణి గీతతో కలిసి హాజరై కాబోయే వధూవరులను ఆశీర్వదించారు. సీఎం రేవంత్ రెడ్డితో పాటు పలువురు రాష్ట్ర మంత్రులు, విపక్ష నాయకులు ఈ వేడుకకు విచ్చేసి నూతన జంటకు శుభాకాంక్షలు తెలిపారు. నిశ్చితార్థం పూర్తయిన అనంతరం వైఎస్ షర్మిల సోషల్ మీడియాలో కుమార్తెను ఉద్దేశించి ఒక భావోద్వేగమైన సందేశాన్ని పంచుకోగా, ఈ వేడుక వీడియోలు నెట్టింట వైరల్‌గా మారాయి.

AP MPTC ZPTC Elections: పల్నాడు, కడప, అన్నమయ్య జిల్లాల్లో మళ్లీ ఉద్రిక్తత.. పలుచోట్ల టీడీపీ, వైసీపీ రాళ్ల దాడులు

Shankar Dukanam — Wed, 21 Oct 2026 14:22:29 +0530

అమరావతి: ఏపీలో ఎంపీటీసీ, జెడ్పీటీసీ ఎన్నికల నామినేషన్లు ప్రారంభమైన తొలిరోజే పలు జిల్లాల్లో ఉద్రిక్తతలు చోటుచేసుకున్నాయి. పల్నాడు జిల్లాలోని నరసరావుపేట, మాచర్ల, ముప్పాళ్ల ప్రాంతాల్లో ఎంపీటీసీ, జడ్పీటీసీ నామినేషన్ల దాఖలు సందర్భంగా తీవ్ర ఉద్రిక్త పరిస్థితులు నెలకొన్నాయి. అభ్యర్థులు నామినేషన్లు దాఖలు చేయడానికి వెళ్తున్న సమయంలో టీడీపీ, వైసీపీ శ్రేణుల మధ్య తీవ్ర వాగ్వాదం, తోపులాట చోటుచేసుకుంది. ఇరువర్గాలు ఒకరిపైకొకరు పోటీపడి నినాదాలు చేసుకుని, చివరికి దాడులకు దిగడంతో నామినేషన్ కేంద్రాల వద్ద తీవ్ర ఘర్షణ వాతావరణం ఏర్పడింది. సమాచారం అందుకున్న పోలీసులు తక్షణమే రంగంలోకి దిగి, పరిస్థితిని అదుపులోకి తెచ్చేందుకు ఇరువర్గాల నాయకులను, కార్యకర్తలను చెదరగొట్టారు.

పుంగనూరులో వైసీపీ, టీడీపీ వర్గీయుల మధ్య రాళ్ల దాడి

స్థానిక సంస్థల (ఎంపీటీసీ, జడ్పీటీసీ) నామినేషన్ల పర్వం అన్నమయ్య జిల్లాల్లోనూ పలుచోట్ల తీవ్ర ఉద్రిక్తతలకు దారితీసింది. అన్నమయ్య జిల్లా పుంగనూరులోని మున్సిపల్ హైస్కూల్ సమీపంలో వైసీపీ, టీడీపీ వర్గీయుల మధ్య చెలరేగిన వివాదం పరస్పరం రాళ్ల దాడికి దారితీసింది. అప్రమత్తమైన పోలీసులు వెంటనే రంగంలోకి దిగి పరిస్థితిని అదుపులోకి తెచ్చారు.

మరోవైపు కడప జిల్లా పరిషత్ కార్యాలయం వద్ద సైతం టీడీపీ, వైసీపీ కార్యకర్తలు పరస్పరం దాడులకు దిగారు. ఈ క్రమంలో గుర్తుతెలియని వ్యక్తులు వారిపై రాళ్లు రువ్వడంతో అక్కడ భయాందోళన వాతావరణం నెలకొంది. పల్నాడు జిల్లా నరసరావుపేట ఆర్డీవో ఆఫీసులోని నామినేషన్ కేంద్రం వద్ద పిడుగురాళ్ల జడ్పీటీసీ వైసీపీ అభ్యర్థి భారతి, ఆమె భర్త లక్ష్మారెడ్డిపై ప్రత్యర్థులు దాడికి పాల్పడ్డారు. గాయాలపాలైన లక్ష్మారెడ్డిని చికిత్స నిమిత్తం ఆస్పత్రికి తరలించారు.

పల్నాడు జిల్లాలో నేతల హౌస్ అరెస్టులు

ఎంపీటీసీ, జడ్పీటీసీ నామినేషన్ల ప్రక్రియ సందర్భంగా పల్నాడు జిల్లాలో ఎలాంటి అవాంఛనీయ ఘటనలు జరగకుండా పోలీసులు ముందస్తు చర్యలు చేపట్టారు. పలువురు కీలక వైసీపీ నేతలను గృహనిర్బంధం చేయడంతో పాటు మరికొందరిని అదుపులోకి తీసుకున్నారు. మాచర్లలో మాజీ ఎమ్మెల్యే పిన్నెల్లి రామకృష్ణారెడ్డిని, పిడుగురాళ్లలో గురజాల మాజీ ఎమ్మెల్యే కాసు మహేశ్‌రెడ్డిని, వినుకొండలో మాజీ ఎమ్మెల్యే బొల్లా బ్రహ్మనాయుడిని బయటకు రాకుండా పోలీసులు వారి నివాసాల్లోనే హౌస్ అరెస్ట్ చేశారు. నరసరావుపేట నియోజకవర్గంలో పల్నాడు జిల్లా రైతు విభాగం అధ్యక్షుడు అన్నెం పున్నారెడ్డి సహా రొంపిచర్ల మండలానికి చెందిన మాజీ సర్పంచ్‌లు, స్థానిక నేతల నివాసాల వద్ద పోలీసు పహారా ఏర్పాటు చేసి, శాంతిభద్రతలను పరిరక్షించేందుకు భద్రతను కట్టుదిట్టం చేశారు.

Also Read: AP Local Body Election: నామినేషన్ దాఖలు పొడిగింపుపై ఏపీ ఎస్ఈసీకి సుప్రీంకోర్టు కీలక ఆదేశాలు

నరసరావుపేటలో వైయస్‌ఆర్‌సీపీ జెడ్పీటీసీ అభ్యర్థిగా నామినేషన్ వేయడానికి వస్తే.. టీడీపీ గూండాలు దాదాపు 10 మంది నా చీర లాగి వివస్త్రను చేయడానికి ప్రయత్నించారని వంగా పద్మావతి ఆరోపించారు. నామినేషన్ పత్రాలతో పాటు హ్యాండ్ బ్యాగ్‌ను కూడా రోడ్డుపైనే చించేశారని ఆవేదన వ్యక్తం చేశారు.

ప్రొద్దుటూరులో ఎమ్మెల్సీ రమేష్ యాదవ్ ని పోలీసులు హౌస్ అరెస్ట్ చేశారు. జెడ్పీటిసి, ఎంపీటీసీ నామినేషన్ వేయకుండా వైసీపీ అభ్యర్థులను అడ్డుకునేందుకు కుట్రలు చేస్తున్నారని ఆరోపించారు. అభ్యర్థులకి మద్దతుగా వెళ్లాలని చూస్తున్న రమేష్ యాదవ్ కి నోటీసులు ఇచ్చి హౌస్ అరెస్ట్ చేశారని పార్టీ నేతలు అంటున్నారు.

AP Local Body Election: నామినేషన్ దాఖలు పొడిగింపుపై ఏపీ ఎస్ఈసీకి సుప్రీంకోర్టు కీలక ఆదేశాలు

Shankar Dukanam — Wed, 21 Oct 2026 12:27:03 +0530

AP Urban Local Bodies Election | న్యూఢిల్లీ: ఆంధ్రప్రదేశ్‌లో మున్సిపల్ ఎన్నికల నామినేషన్ల దాఖలుపై సుప్రీంకోర్టు కీలక తీర్పునిచ్చింది. శాంతిభద్రతల సమస్యల కారణంగా అభ్యర్థులు నామినేషన్లు వేయలేకపోయారని భావించే ప్రాంతాల్లో, నామినేషన్ల గడువును పొడిగించే అంశంపై గురువారంలోగా నిర్ణయం తీసుకోవాలని రాష్ట్ర ఎన్నికల కమిషన్ ను ఆదేశించింది. వైఎస్సార్‌సీపీ (YSRCP) సమర్పించిన వినతులు, వీడియో ఆధారాలను పరిశీలించి నిర్ణయం ప్రకటించాలని స్పష్టం చేసింది. ఈ ఆదేశాలతో ఏపీలో మున్సిపల్ ఎన్నికల వేళ రాజకీయ వేడి మరింత పెరిగింది. నామినేషన్లు దాఖలు చేసేందుకు గడువు ముగిసినా, కొన్ని చోట్ల తమ అభ్యర్థులు నామినేషన్లు వేయకుండా అడ్డుకున్నారని వైసీపీ ఆరోపిస్తోంది. హింస, బెదిరింపుల కారణంగా కొన్నిచోట్ల పోటీకి దూరంగా ఉండాల్సి వచ్చిందంటూ.. గడువు పొడిగించాలని సుప్రీంకోర్టును ఆశ్రయించింది.

అభ్యర్థుల తుది జాబితా 25కి వాయిదా

వైసీపీ దాఖలు చేసిన పిటిషన్‌ను విచారించిన జస్టిస్ జోయ్‌మల్య బాగ్చి, జస్టిస్ వి. మోహనలతో కూడిన ప్రత్యేక ధర్మాసనం ఈ ఆదేశాలు జారీ చేసింది. అక్టోబర్ 21న విడుదల కావాల్సిన అభ్యర్థుల తుది జాబితా ప్రచురణను నిలిపివేసి.. అక్టోబర్ 25వ తేదీ వరకు వాయిదా వేయాలని ఎస్‌ఈసీని కోరింది. ఒకవేళ నామినేషన్ల సమయాన్ని పొడిగించాలని ఎస్‌ఈసీ నిర్ణయిస్తే, ఆ ప్రకటన వెలువడిన సమయం నుండి మరో 48 గంటల పాటు అదనపు గడువు ఇవ్వాలని సుప్రీంకోర్టు స్పష్టం చేసింది. నామినేషన్ కేంద్రాల వద్ద అభ్యర్థులకు తగిన రక్షణ కల్పించాలని, పోలీసు బందోబస్తు పెంచాలని, సీసీటీవీ నిఘా ఏర్పాటు చేయాలని ఏపీ డీజీపీని ధర్మాసనం ఆదేశించింది. నామినేషన్ల గడువు పొడిగింపుపై హైకోర్టు నిరాకరించడంతో వైసీపీ సుప్రీంకోర్టును ఆశ్రయించింది. ఈ వ్యవహారానికి సంబంధించి ఎస్‌ఈసీ, రాష్ట్ర ప్రభుత్వం తగిన నివేదికలు సమర్పించాలని పేర్కొంటూ తదుపరి విచారణను అక్టోబర్ 27కి వాయిదా వేసింది.

స్వేచ్ఛగా, పారదర్శకంగా ఎన్నికలు నిర్వహించడమే ప్రాథమిక రాజ్యాంగ సూత్రమని సుప్రీంకోర్టు ధర్మాసనం వ్యాఖ్యానించింది. ప్రజాస్వామ్యంలో పోటీ చేసే అభ్యర్థులు అడ్డంకులు లేకుండా నామినేషన్లు వేయడం ఎన్నికల ప్రక్రియలో అత్యంత కీలకమని తెలిపింది. సాధారణంగా ఎన్నికల నిర్వహణలో న్యాయస్థానాలు జోక్యం చేసుకోనప్పటికీ, ఒక ప్రధాన ప్రతిపక్ష పార్టీ ఆధారాలతో సహా అభ్యంతరాలు వ్యక్తం చేసినప్పుడు, స్వేచ్ఛా ఎన్నికలకు భంగం కలిగే పరిస్థితులు ఉన్నప్పుడు న్యాయసమీక్ష చేసే అధికారం రాజ్యాంగ వ్యవస్థలకు ఉంటుందని ధర్మాసనం పేర్కొంది. సమర్పించిన ఆధారాలను పరిశీలించిన మీదట వైఎస్సార్‌సీపీ విజ్ఞప్తిలో ప్రాథమికంగా వాస్తవం ఉందని భావిస్తూ ఈ ఉత్తర్వులు జారీ చేసినట్లు తెలిపింది.

నామినేషన్లు వేయకుండా అడ్డుకున్నారని, బలవంతపు ఏకగ్రీవాలు/ ఘర్షణలు జరిగాయని వైఎస్సార్‌సీపీ తమ పిటిషన్‌లో పేర్కొన్న సమస్యాత్మక ప్రాంతాలు:

కనిగిరి
దర్శి
పుంగనూరు
రాయచోటి
రాజంపేట
మైదుకూరు
ఎర్రగుంట్ల
ప్రొద్దుటూరు
పిడుగురాళ్ల
మాచర్ల
గురజాల
దాచేపల్లి
కమలాపురం
చిలకలూరిపేట
సత్తెనపల్లి
వినుకొండ
ఆళ్లగడ్డ
నగరి
తాడిపత్రి
సుప్రీంకోర్టు ఆదేశాల ప్రకారం ఈ 19 మున్సిపాలిటీలకు సంబంధించి నామినేషన్లపై రాష్ట్ర ఎన్నికల సంఘం (SEC) మరోసారి పరిశీలించనుంది.

ఎన్నికల నిర్వహణ అనేది రాష్ట్ర ఎలక్షన్ కమిషన్ SEC పరిధిలోని అంశమని.. ఇందులో కోర్టులు జోక్యం చేసుకోరాదని SEC తరపు న్యాయవాది పరమేశ్వరన్, ప్రభుత్వం తరపు న్యాయవాది ముకుల్ రోహత్గీ వాదనలు వినిపించారు. ప్రతిపక్షానికి ఎన్నికల్లో ఆసక్తి లేదని, తమ సానుకూల మీడియా నేరేటివ్ కోసం ప్రయత్నిస్తున్నారని చెప్పారు. దీనిని ధర్మాసనం ఎన్నటికీ అంగీకరించలేదు. దాదాపు 63శాతం మంది అభ్యర్థులు పిటిషన్ దాఖలు చేశారని.. దీనర్థం అన్ని చోట్ల ఏకగ్రీవాలు కాబోతున్నాయని కోర్టు అభిప్రాయపడింది. హింస జరిగినట్లు, నామినేషన్ పత్రాలు లాక్కెల్లినట్లు వీడియోలు ఉన్నాయని.. ఇవన్నీ YSRCP పిటిషన్‌ను అంగీకరించేందుకు కారణమవుతున్నాయని సుప్రీంకోర్టు తెలిపింది. ఎన్నికల నిర్వహణ SEC పరిధిలోని అంశమైనప్పటికీ... ఎన్నికలు స్వేచ్చగా, పక్షపాతం లేకుండా నిర్వహించడం రాజ్యాంగ ధర్మమని.. ఆ స్ఫూర్తి అమలయ్యేలా చూడటం కోర్టుల కర్తవ్యమని ధర్మాసనం స్పష్టం చేసింది.

ఈ వివాదానికి కారణమేంటి..?

అక్టోబర్ 16 నుంచి 18 వరకు జరిగిన మున్సిపల్, నగర పంచాయతీ ఎన్నికల నామినేషన్ల ప్రక్రియలో.. పుంగనూరు, రాయచోటి సహా పలు ప్రాంతాల్లో హింసాత్మక ఘటనలు చోటుచేసుకున్నాయని వైసీపీ ఆరోపించింది. తమ అభ్యర్థులపై దాడులు చేశారని, నామినేషన్ పత్రాలను లాక్కొని చించేశారని, కొన్ని చోట్ల నామినేషన్ కేంద్రాలకు వెళ్లకుండా అడ్డుకున్నారని ఆ పిటిషన్‌లో పేర్కొంది.

ఈ పరిస్థితుల్లో నామినేషన్ల గడువు పొడిగించడంతో పాటు, అభ్యర్థులకు రక్షణ కల్పించాలని వైసీపీ కోరింది. ప్రభావిత వార్డుల్లో ఏకగ్రీవ ఎన్నికల ప్రకటనలను నిలిపివేయాలని కూడా విజ్ఞప్తి చేసింది. ఈ అంశంపై ఏపీ హైకోర్టును ఆశ్రయించిన వైసీపీకి నిరాశ ఎదురైంది. నామినేషన్ల గడువు ముగిసిన తర్వాత దాన్ని పొడిగించాలని ఆదేశించడం ఎన్నికల ప్రక్రియలో జోక్యం చేసుకోవడమే అవుతుందని అక్టోబర్ 18న ఏపీ హైకోర్ట్ అభిప్రాయపడింది. దీనిపై చివరి అస్త్రంగా YSRCP సుప్రీంకోర్టులో స్పెషల్ లీవ్ పిటిషన్ దాఖలు చేసింది.

Vijayawada Gold Smuggling: విజయవాడలో రూ.5.84 కోట్ల విలువైన బంగారం, విదేశీ కరెన్సీ సీజ్.. బంగ్లాదేశ్ నుంచి హైదరాబాద్‌కు

Shankar Dukanam — Wed, 21 Oct 2026 10:59:45 +0530

విజయవాడ: బంగ్లాదేశ్ నుంచి అక్రమంగా హైదరాబాద్‌కు తరలిస్తున్న బంగారం, కరెన్సీని అధికారులు స్వాధీనం చేసుకున్నారు. విజయవాడలో డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు 3 కేజీలకు పైగా బంగారంతో పాటు విదేశీ కరెన్సీని స్వాధీనం చేసుకున్నారు.

బంగ్లాదేశ్ నుంచి అక్రమంగా హైదరాబాద్‌కు తరలిస్తుండగా సమాచారం అందుకున్న అధికారులు ఆకస్మిక తనిఖీలు చేపట్టారు. ఈ క్రమంలో విజయవాడలో ఓ వాహనాన్ని తనిఖీ చేయగా కేజీల కొద్ది బంగారంతో పాటు 60 వేల అమెరికా డాలర్లు, 20 వేల వరకు యూరోల విదేశీ కరెన్సీని అధికారులు గుర్తించారు. స్వాధీనం చేసుకున్న బంగారం, విదేశీ కరెన్సీ మొత్తం విలువ సుమారు రూ. 5.84 కోట్లు ఉంటుందని డీఆర్‌ఐ అధికారులు వెల్లడించారు. ఈ అక్రమ రవాణా వెనుక ఉన్న ముఠా సభ్యులను అదుపులోకి తీసుకుని కేసు నమోదు చేశారు. ఈ ఘటనపై సమగ్ర విచారణ జరుపుతున్నారు.

CM Chandrababu: రప్పా రప్పా అంటూ రౌడీయిజం చేస్తే తాట తీయండి.. ఖాకీ అంటే బాధ్యత, భరోసా: సీఎం చంద్రబాబు

Shankar Dukanam — Wed, 21 Oct 2026 09:15:05 +0530

Andhra Pradesh News Today | అమరావతి: పోలీస్ స్టేషన్‌కు వచ్చే బాధితుల పట్ల మానవత్వంతో వ్యవహరించాలని, నేరస్థులకు భయం, బాధితులకు నమ్మకం కలిగించేలా పోలీసింగ్ ఉండాలని ఏపీ సీఎం చంద్రబాబు సూచించారు. రప్పా రప్పా అంటూ రాజకీయ ముసుగులో నేరాలకు పాల్పడేవారిని, రౌడీలను, సోషల్ మీడియా సైకోలను కఠినంగా శిక్షించాలని పోలీసులను ఆదేశించారు. ఆధునిక సైబర్ నేరాలను అరికట్టేందుకు సీసీ కెమెరాలు, డ్రోన్లు, ఏఐ (AI) సాంకేతికతను ఉపయోగిస్తూ ఏపీ పోలీస్ శాఖ దేశంలోనే నంబర్ వన్‌గా నిలవాలని ఆకాంక్షించారు. మంగళగిరిలో నిర్వహించిన పోలీసు అమరవీరుల సంస్మరణ దినం కార్యక్రమంలో పాల్గొని సీఎం చంద్రబాబు ప్రసంగించారు.

పోలీసు అమరవీరుల సంస్మరణ దినం సందర్భంగా ప్రజారక్షణ కోసం ప్రాణ త్యాగం చేసిన అమరులందరికీ సీఎం చంద్రబాబు సెల్యూట్ చేస్తూ శ్రద్ధాంజలి ఘటించారు. మాతృభూమి రక్షణ, ప్రజల భద్రత కోసం ప్రాణాలర్పించిన వీరులను గౌరవించుకోవాల్సిన బాధ్యత అందరిపై ఉందన్నారు. 1959 అక్టోబర్ 21న లడఖ్‌లో చైనా సైన్యం దాడిని తిప్పికొడుతూ 10 మంది పోలీసులు వీరమరణం పొందారని, అందుకు గుర్తుగానే ప్రతిఏటా ఈ రోజును సంస్మరణ దినంగా జరుపుకుంటున్నామని గుర్తుచేశారు.

పోలీసు అంటే బాధ్యత, భరోసా..

‘ఖాకీ అంటే బాధ్యత - పోలీసు అంటే భరోసా’ అని అభివర్ణించిన సీఎం చంద్బాబు, ఆపదలో ఉన్నవారికి పోలీసులే ధైర్యంమని పేర్కొన్నారు. ఏ ప్రమాదం లేదా నేరం జరిగినా ముందుగా గుర్తుకొచ్చేది పోలీసులేనని, నిరంతరం విధుల్లో ఉంటూ ప్రజల కోసం సేవ చేసే ఏకైక విభాగం పోలీసు శాఖ అని కొనియాడారు. దుర్గగుడి శరన్నవరాత్రులు, విజయవాడ ఉత్సవాల నిర్వహణలోనూ, వీఐపీల భద్రత నుండి సమాజంలో శాంతిభద్రతల పరిరక్షణ వరకు పోలీసులే కీలకమన్నారు. ప్రజల ఇళ్లలో పండుగ వెలుగులు నింపేందుకు పోలీసులు తమ స్వంత పండుగలకు దూరమవుతారని, వారి త్యాగాలను స్మరించుకోవడం కేవలం సానుభూతి కాదని, మన బాధ్యత అని ఉద్ఘాటించారు.

ఏపీ పోలీసులకు దేశంలోనే ప్రత్యేక గుర్తింపు

ఆంధ్రప్రదేశ్ పోలీసులకు దేశంలోనే ప్రత్యేక గుర్తింపు ఉందన్న సీఎం, తీవ్ర నేరాలను ఛేదించడంలో వారికి మంచి ట్రాక్ రికార్డు ఉందన్నారు. గతంలో ఫ్యాక్షనిజాన్ని అణచివేయడంలో, తీవ్రవాదాన్ని ఎదుర్కోవడంలో, మత కలహాలను అరికట్టడంలో అసాధారణమైన ధైర్యాన్ని ప్రదర్శించారని సీఎం చంద్రబాబు గుర్తుచేశారు. శాంతిభద్రతలు, అభివృద్ధి, ఉపాధి, ప్రజల సుఖసంతోషాలు పరస్పరం ముడిపడి ఉన్నాయన్నారు. భద్రతపై నమ్మకం ఉన్న ప్రాంతాలకే పెట్టుబడులు, ఉద్యోగాలు వస్తాయని తెలిపారు. అలజడి, అశాంతి ఉన్న చోటకు పారిశ్రామికవేత్తలు రారని, అందుకే తాను ఎప్పుడు అధికారంలో ఉన్నా శాంతిభద్రతలకే తొలి ప్రాధాన్యత అని స్పష్టం చేశారు. ఇటీవల దేశ రక్షణకు భంగం కలిగించే కుట్రలను ఛేదించి ఏపీ పోలీస్ ప్రతిష్టను పెంచిన కౌంటర్ ఇంటెలిజెన్స్ విభాగాన్ని ఆయన ప్రత్యేకంగా అభినందించారు.

పోలీసు విధుల్లో ధైర్యంతో పాటు మానవత్వం కూడా అంతే ముఖ్యమని సీఎం చంద్రబాబు సూచించారు. భయం, కన్నీళ్లు, సమస్యలతో పోలీస్ స్టేషన్‌కు వచ్చే బాధితులకు తక్షణ స్పందనతో గౌరవం, నమ్మకం అందించాలన్నారు. నేరస్థుడికి ఖాకీని చూస్తే భయం కలగాలని, బాధితుడికి పోలీసులపై నమ్మకం ఏర్పడాలని స్పష్టం చేశారు. మారుతున్న కాలానికి అనుగుణంగా నేరాల పద్ధతి మారినందున దర్యాప్తు విధానంలో కూడా మార్పులు రావాలని పిలుపునిచ్చారు. ఒక ఫోన్ కాల్, లింక్ లేదా మెసేజ్‌తో చదువుకున్న వారు సైతం సైబర్ నేరగాళ్ల బారిన పడి సొమ్ము కోల్పోతున్నారని ఆందోళన వ్యక్తం చేశారు.

రాజకీయ ముసుగులో నేరాలకు పాల్పడితే సహించేది లేదని, రౌడీల తాట తీయడంతో పాటు సోషల్ మీడియా సైకోలను వదలవద్దన్నారు. నేరాన్ని నివారించడమే అత్యుత్తమ పోలీసింగ్‌కు నిదర్శనమని పేర్కొన్నారు. సీసీ కెమెరాలు, డేటా అనలిటిక్స్, డ్రోన్లు, ఏఐ (AI) వంటి ఆధునిక సాంకేతిక పరిజ్ఞానాన్ని పూర్తిస్థాయిలో వినియోగిస్తూ "టెక్నాలజీలో ఏపీ పోలీస్ నంబర్ వన్" అనే పేరు తీసుకురావాలని సీఎం చంద్రబాబు ఆకాంక్షించారు.

CM Chandrababu: స్థానిక సంస్థల ఎన్నికలు.. ఆ టీడీపీ నేతలపై చర్యలు తప్పవు!: సీఎం చంద్రబాబు వార్నింగ్

Shankar Dukanam — Tue, 20 Oct 2026 17:00:09 +0530

CM Chandrababu | అమరావతి: ఆంధ్రప్రదేశ్‌ స్థానిక సంస్థల ఎన్నికల్లో అఖండ విజయం సాధించాలని అధికార కూటమి పార్టీలు వ్యూహాలు రచిస్తున్నాయి. ఇప్పటికే దాదాపు 12 మున్సిపాలిటీలు, నగర పంచాయతీ చైర్ పర్సన్ పదవుల్లో కూటమి ఏకగ్రీవంగా సొంతం చేసుకుంది. అయితే స్థానిక సంస్థల ఎన్నికల్లో పార్టీ నిర్ణయాన్ని ధిక్కరించి రెబల్స్‌గా బరిలోకి దిగితే కఠిన చర్యలు తప్పవని టీడీపీ అధినేత, ఏపీ సీఎం చంద్రబాబు నాయుడు హెచ్చరించారు. రెబల్స్‌గా నామినేషన్లు వేసిన వారిని వెంటనే నామినేషన్ విత్‌గ్రా చేసుకునేలా చేయాలని, పార్టీ ప్రకటించిన అభ్యర్థుల గెలుపు కోసం ప్రతి ఒక్కరూ కృషి చేయాలని సూచించారు. ఈ మేరకు మంగళవారం పార్టీ నాయకులతో నిర్వహించిన టెలికాన్ఫరెన్స్‌లో చంద్రబాబు స్పష్టం చేశారు.

సమర్థులకే అవకాశమిచ్చాం.. గెలిపించే బాధ్యత మీదే

కూటమి భాగస్వామ్య పక్షాల మధ్య పూర్తి సమన్వయంతోనే అభ్యర్థుల ఎంపిక, ప్రచార కార్యక్రమాలు నిర్వహించాలని టీడీపీ నేతలకు ఆయన దిశానిర్దేశం చేశారు. తాత్కాలిక ప్రయోజనాల కోసం అభ్యర్థులను నిలబెట్టడం సరైన విధానం కాదని, కూటమి ఒప్పందంలో కేటాయించిన స్థానాల్లో సమర్థులుగా భావించి అవకాశం ఇచ్చిన నేతల్ని గెలిపించడమే లక్ష్యంగా పనిచేయాలన్నారు. నేతలు, కార్యకర్తలు ఇంటింటికీ తిరుగుతూ కూటమి ప్రభుత్వం రాష్ట్రంలో అమలు చేస్తున్న అభివృద్ధి, సంక్షేమ పథకాలను, సూపర్ సిక్స్ ప్రయోజనాలను ప్రజలకు వివరించాలని సూచించారు.

సామాజిక న్యాయం పాటించిన కూటమి

గత సార్వత్రిక ఎన్నికల కంటే స్థానిక సంస్థల ఎన్నికల్లో మరింత మెరుగైన ఫలితాలు సాధించాలని చంద్రబాబు పిలుపునిచ్చారు. బీసీ, ఎస్సీ, ఎస్టీ, మైనార్టీ తదితర వర్గాలకు ప్రాధాన్యమిస్తూ 11 కార్పొరేషన్లను 11 వేర్వేరు సామాజికవర్గాలకు కేటాయించి సామాజిక న్యాయం చేశామన్నారు. అన్ని కులాలకు రాజ్యాధికారంలో భాగస్వామ్యం కల్పించడమే తమ ప్రభుత్వ ఉద్దేశమన్నారు.

Also Read: YS Jagan In Pulivendula: ఈ 21నుంచి 3 రోజులు పులివెందులలోనే జగన్.. దగ్గరుండి వైసీపీ నామినేషన్లు పర్యవేక్షణ

సార్వత్రిక ఎన్నికల తరహాలోనే పార్టీ కోసం క్షేత్రస్థాయిలో కష్టపడి పనిచేసిన కార్యకర్తలకు ఈ స్థానిక పోరులో పదవులు దక్కే అవకాశం లభిస్తుందన్నారు. పొత్తులు, రాజకీయ సమీకరణాల కారణాల వల్ల పోటీ చేసే అవకాశం రాని వారికి భవిష్యత్తులో నామినేటెడ్ పదవుల్లో తగిన ప్రాధాన్యం ఇస్తామని చంద్రబాబు వారికి హామీ ఇచ్చారు.

మరోవైపు మంగళగిరిలో పలువురు వైసీపీని వీడి టీడీపీలో చేరారు. వైసీపీ సీనియర్ నేతలు తోలేటి రవీంద్ర, దామర్ల కుబేరస్వామి, దుగ్గిరాల మండల సీనియర్‌ నేత షేక్‌ అబ్దుల్‌ సలామ్‌ తదితరులకు కండువా కప్పి నారా లోకేష్ టీడీపీలోకి ఆహ్వానించారు. దుగ్గిరాలలో త్వరలో రోడ్లు, కమ్యూనిటీ భవనాలు నిర్మించనున్నట్లు తెలిపారు. సమష్టిగా పనిచేసి స్థానిక ఎన్నికల్లో కూటమి విజయం కోసం కృషి చేయాలని నారా లోకేష్ పిలుపునిచ్చారు.

Also Read: Vijayasai Reddy: 11వ నెల 11వ తేదీ 11 గంటల 11 నిమిషాలకు కొత్త పార్టీ ఆవిర్భావం: విజయసాయిరెడ్డి

Vijayasai Reddy: 11వ నెల 11వ తేదీ 11 గంటల 11 నిమిషాలకు కొత్త పార్టీ ఆవిర్భావం: విజయసాయిరెడ్డి

Shankar Dukanam — Tue, 20 Oct 2026 13:29:09 +0530

Andhra Pradesh Politics | విజయవాడ: మాజీ ఎంపీ వి. విజయసాయిరెడ్డి దసరా పండుగ సందర్భంగా తాను స్థాపించబోయే కొత్త రాజకీయ పార్టీకి సంబంధించిన ముహూర్తాన్ని, ఆశయాలను వెల్లడిస్తూ కీలక ప్రకటన చేశారు. ఈ క్రమంలో ఆయన ఆంధ్రప్రదేశ్ ప్రజల ఆకాంక్షలే ఎజెండాగా కొత్త పార్టీ ఆవిర్భవించబోతోందని స్పష్టం చేశారు. రాష్ట్రంలో 2 పార్టీలు, రెండు కుటుంబాల దోపిడీకి ముగింపు పలకడం, కులపిచ్చి, మతపిచ్చి రాజకీయాలను రూపుమాపడమే లక్ష్యంగా ఈ నిర్ణయం తీసుకున్నట్లు విజయసాయిరెడ్డి తెలిపారు. అలాగే రెడ్ బుక్ రాజ్యాంగం, రప్పారప్పా ఫ్యాక్షన్ల నుంచి విముక్తి కల్పించి, కరువు కాటకాలు, కరెంటు కోతలు లేని ఆంధ్రప్రదేశ్‌ను నిర్మిస్తామని దసరా పండుగరోజు మాజీ ఎంపీ ప్రకటించారు.

తన నూతన రాజకీయ పార్టీ ఆవిర్భావ కార్యక్రమాన్ని 11వ నెల, 11వ తేదీన, ఉదయం 11 గంటల 11 నిమిషాలకు విజయవాడలోని 'ఎ-కన్వెన్షన్'లో నిర్వహించనున్నట్లు విజయసాయిరెడ్డి వెల్లడించారు. ఆంధ్రప్రదేశ్ రాష్ట్ర శ్రేయస్సును కోరుకునే వారందరూ ఈ నూతన ప్రస్థానానికి మద్దతు పలకాలని ఆయన విజ్ఞప్తి చేశారు.

నూతన పార్టీ ఎజెండాలో భాగంగా ప్రతీ ఎకరానికి 2 పంటలకు నీరు అందించడం, ప్రతీ ఇంటికీ ఉచిత విద్యుత్తు లభించేలా చూడటం, చదువుల భారం తగ్గించి 100 శాతం యువతకు ఉద్యోగ, ఉపాధి అవకాశాలు కల్పించడం ముఖ్యమైన లక్ష్యాలని విజయసాయిరెడ్డి తన పోస్టులో వివరించారు. పేద, మధ్యతరగతి కుటుంబాల ఆదాయాలు పెరిగి ఖర్చులు తగ్గేలా చర్యలు తీసుకుంటామని, గత 80 ఏళ్లుగా నెరవేరని ప్రజల ఆకాంక్షలను నెరవేరుస్తూ కొత్త పార్టీని 'జెన్-జీ (Gen-Z) నాయకుల తయారీ ఫ్యాక్టరీగా' తీర్చిదిద్దుతామని విజయసాయరెడ్డి పేర్కొన్నారు.

ఇటీవల పార్టీ ఏర్పాటు ప్రకటన వాయిదా..

కొన్ని రోజుల కిందట విజయసాయిరెడ్డి పార్టీ ఆవిర్భావం ప్రకటన చేయాల్సి ఉండగా.. అనారోగ్యం కారణంగా వాయిదా వేసుకున్నట్లు ప్రకటించారు. ఆయుర్వేద చికిత్స తీసుకుంటున్నానని, త్వరలోనే పార్టీ ఏర్పాటుపై ప్రకటన చేస్తానన్నారు. అయితే వైసీపీ నుంచి బెదిరింపులకు పాల్పడటంతో ఆయన వెనక్కి తగ్గారని, మరికొన్ని వర్గాల వారు విజయసాయిరెడ్డిని భయపెట్టడంతో మాజీ ఎంపీ వెనక్కి తగ్గారని ప్రచారం జరిగింది. అయితే తాను పార్టీ పెట్టడంలో వెనక్కి తగ్గేదిలేదని, తనను ఎవరూ బెదిరించలేదన్నారు. రాష్ట్ర రాజకీయాల్లో మార్పు కోసం కచ్చితంగా తన పోరాటం కొనసాగుతుందన్నారు.

AP Local Body Elections: పట్టణ స్థానిక పోరులో కూటమి హవా- జగన్, పెద్దిరెడ్డి కంచుకోటల్లో 6 సహా 12 చైర్మన్లు ఏకగ్రీవం!

Shankar Dukanam — Tue, 20 Oct 2026 12:25:47 +0530

అమరావతి: ఆంధ్రప్రదేశ్‌లో జరగనున్న పట్టణ స్థానిక సంస్థల ఎన్నికల్లో పోలింగ్‌కు ముందే అధికార కూటమి పార్టీల హవా కొనసాగుతోంది. వైసీపీ అభ్యర్థులు నామినేషన్లు దాఖలు చేయకపోవడంతో మున్సిపాలిటీలు, నగర పంచాయతీల చైర్మన్లు ఏకగ్రీవాలు అవుతున్నాయి.

ఏపీలో దాదాపు 14 పట్టణ స్థానిక సంస్థల్లో వైసీపీ ఛైర్‌పర్సన్‌ అభ్యర్థులు పోటీలో లేరు. కొన్నిచోట్ల నామినేషన్లు తిరస్కరణకు గురవ్వడం, మరికొన్ని చోట్ల నామినేషన్లే వేయకపోవడంతో ఏకంగా 12 పురపాలక స్థానాల్లో కూటమి (టీడీపీ, జనసేన, బీజేపీ) అభ్యర్థులు మాత్రమే బరిలో ఉన్నారు. దాంతో 12 స్థానాల్లో కూటమి విజయం కన్ఫామ్ అయింది. ఈ 12 స్థానాల్లో మాజీ సీఎం, వైసీపీ అధినేత వైఎస్‌ జగన్‌మోహన్‌రెడ్డి, మాజీ మంత్రి పెద్దిరెడ్డి రామచంద్రారెడ్డిల కంచుకోటలైన నియోజకవర్గాల్లోనే 6 మున్సిపాలిటీలు, నగర పంచాయతీలు ఉన్నాయి.

ప్రస్తుత సమాచారం ప్రకారం ఏకగ్రీవం కానున్న ఛైర్‌పర్సన్‌ స్థానాలు

టీడీపీ: దాచేపల్లి, గురజాల, పిడుగురాళ్ల (పల్నాడు జిల్లా), రాజంపేట, బద్వేలు, కమలాపురం (వైఎస్సార్‌ కడప జిల్లా), రాయచోటి, పుంగనూరు (అన్నమయ్య జిల్లా), నగరి (చిత్తూరు), గుత్తి (అనంతపురం జిల్లా).

జనసేన: దర్శి (ప్రకాశం జిల్లా)

బీజేపీ: ఎర్రగుంట్ల (కడప)

వైఎస్సార్‌ కడప జిల్లాలోని 9 పట్టణ స్థానిక సంస్థల విషయానికి వస్తే.. మైదుకూరులో ఎన్నిక వాయిదా పడింది. కడప కార్పొరేషన్, పులివెందుల, జమ్మలమడుగుల్లో మాత్రమే వైసీపీ అభ్యర్థులు పోటీలో ఉన్నారు. అందులోనూ జమ్మలమడుగులో వైసీపీ ప్రకటించిన ఎమ్మెల్సీ రామసుబ్బారెడ్డి సతీమణి ఇందిర నామినేషన్‌ వేయలేకపోయారు. డమ్మీ అభ్యర్థిగా మాజీ మంత్రి శివారెడ్డి కుమార్తె హైమావతినే పార్టీ తరఫున ఛైర్‌పర్సన్‌గా బరిలో నిలవనున్నారు. రాజంపేట మున్సిపాలిటీలో ఒరిజినల్‌ డాక్యుమెంట్లకు బదులు జిరాక్స్‌ కాపీలు ఇవ్వడం, నో డ్యూ సర్టిఫికెట్లు జతచేయకపోవడంతో వైసీపీ అభ్యర్థుల నామినేషన్లు తిరస్కరణకు గురయ్యాయి. దీంతో అక్కడ టీడీపీ అభ్యర్థి దొంతం గాయత్రి ఏకగ్రీవంగా నెగ్గనున్నారు.

ప్రొద్దుటూరు, బద్వేలు మున్సిపాలిటీల్లోనూ నామినేషన్ల లోపాల వల్ల వైసీపీ అభ్యర్థులు అనర్హులయ్యారు. బద్వేలులో టీడీపీ అభ్యర్థి దివ్యతేజ ఏకగీవ్రం కానున్నారు. ఎర్రగుంట్లలో వైసీపీ పోటీచేయకపోవడం, జనసేన అభ్యర్థి విత్ డ్రా చేసుకోవడంతో బీజేపీ అభ్యర్థి గెలుపు ఖాయమైంది. కమలాపురంలోనూ టీడీపీ అభ్యర్థి మాత్రమే నామినేషన్ వేశారు. వైఎస్ జగన్ సొంత నియోజకవర్గమైన పులివెందులలోని 40 వార్డుల్లో వైసీపీ 15 స్థానాల్లో నామినేషన్లు వేయలేకపోయింది. ఇక అన్నమయ్య జిల్లాలోని రాయచోటి, పుంగనూరులలో వైసీపీ నుంచి నామినేషన్ కూడా పడలేదు.

పల్నాడు జిల్లా గురజాల నియోజకవర్గంలోని 3 స్థానాలనూ కూటమి ఏకగ్రీవంగా కైవసం చేసుకోనుంది. దాచేపల్లిలో డిపాజిట్ రసీదు లేకపోవడం, పిడుగురాళ్లలో నిర్దేశిత టైమ్ మించిపోవడం వల్ల వైసీపీ అభ్యర్థుల నామినేషన్లు తిరస్కరణకు గురయ్యాయి. గురజాలలో వైసీపీ అభ్యర్థులు నామినేషన్ వేయకుండానే వెనుతిరిగారు. అనంతపురం జిల్లా గుత్తి మున్సిపాలిటీలో వైసీపీ అభ్యర్థి నామినేషన్ వేయకపోవడంతో టీడీపీ గెలుపు ఏకగ్రీవమైంది.

ప్రకాశం జిల్లా దర్శి మున్సిపాలిటీలో వైసీపీ పోటీ లేకపోవడంతో జనసేన అభ్యర్థి గెలుపొందనున్నారు. కనిగిరిలో వైసీపీ నామినేషన్ రిజెక్ట్ కావడంతో టీడీపీ, కాంగ్రెస్ ల మధ్య పోటీ మిగిలింది. చిత్తూరు జిల్లా నగరిలోనూ స్వీయ ధ్రువీకరణ లోపాల వల్ల వైసీపీ అభ్యర్థుల నామినేషన్లు చెల్లకుండా పోయాయి. దాంతో టీడీపీ చైర్మన్ అభ్యర్థి ఏకగ్రీవం కానున్నారు. తిరుపతిలో 15 డివిజన్లు, పలమనేరులో 6 వార్డుల్లో వైసీపీ నామినేషన్లు వేయకపోవడంతో పోటీకి దూరమైంది.

Andhra Pradesh Rains: ఏపీకి తుపాను గండం.. మరో మూడు రోజులపాటు భారీ వర్షాలు- 60 కి.మీ వేగంలో ఈదురుగాలులు

Shankar Dukanam — Tue, 20 Oct 2026 10:28:47 +0530

Andhra Pradesh Rains | అమరావతి / విశాఖపట్నం: ఆంధ్రప్రదేశ్‌లో 3 రోజుల పాటు వర్షాలు కురుస్తాయని కోస్తాంధ్ర, యానాంతో పాటు రాయలసీమలోనూ పలు ప్రాంతాల్లో వర్షాలు కురిసే అవకాశం ఉందని భారత వాతావరణ శాఖ వెల్లడించింది. నైరుతి బంగాళాఖాతంలో కొనసాగుతున్న ఉపరితల ఆవర్తనం, ద్రోణి ప్రభావంతో కొన్నిచోట్ల ఉరుములు, మెరుపులతో కూడిన జల్లులు కురుస్తాయని అధికారులు తెలిపారు. ముఖ్యంగా కోస్తాంధ్రలో గంటకు గరిష్ఠంగా 60 కిలోమీటర్ల వేగంతో గాలులు వీచే అవకాశం ఉందన్నారు. ఈ వర్షాల సమయంలో ప్రజలు అప్రమత్తంగా ఉండాలని, రైతులు పంటల విషయంలో తగిన జాగ్రత్తలు తీసుకోవాలని విశాఖ వాతావరణ శాఖ డైరెక్టర్ PLN మూర్తితో ABP దేశంతో మాట్లాడారు.

నైరుతి బంగాళాఖాతంలో ఉత్తర తమిళనాడు తీరానికి సమీపంలో సముద్ర మట్టానికి దాదాపు 5.8 కిలోమీటర్ల ఎత్తు వరకు ఒక ఉపరితల ఆవర్తనం కొనసాగుతోందని వాతావరణ శాఖ తెలిపింది. దీని ప్రభావంతో రాబోయే 3 రోజుల పాటు కోస్తాంధ్రలో అక్కడక్కడా భారీ వర్షాలు కురిసే అవకాశం ఉందని అధికారులు తెలిపారు. అలాగే పలు ప్రాంతాల్లో తేలికపాటి నుండి ఒక మోస్తరు వర్షాలతో పాటు ఉరుములతో కూడిన జల్లులు పడే అవకాశముందని అంచనా వేశారు.

మరోవైపు, వివిధ వాతావరణ పరిస్థితుల కారణంగా ఈ ఆవర్తన ప్రభావం వల్ల ఈ నెల 24, 25 తేదీల్లో అండమాన్ పరిసర ప్రాంతాల్లో ఒక అల్పపీడనం ఏర్పడే సూచనలు కనిపిస్తున్నాయి. ఇది మరింత బలపడి 27వ తేదీ నాటికి వాయుగుండంగా మారి మధ్య బంగాళాఖాతంలోకి ప్రవేశించే అవకాశం ఉందని అంచనా వేశారు. ఆ తర్వాత రెండు రోజుల్లో ఇది తుపానుగా రూపాంతరం చెంది, ఈ నెలాఖరు నాటికి ఉత్తర కోస్తాంధ్ర - దక్షిణ ఒడిశా తీరాల మధ్య ఎక్కడైనా తీరం దాటే అవకాశం ఉందని భావిస్తున్నారు. అయితే ఈ తుపాను తీవ్రతపై త్వరలోనే స్పష్టత వస్తుందని వాతావరణ శాఖ అధికారులు చెబుతున్నారు.

Also Read: AP Local Body Elections: ఒడిశాలో ఏపీ ఎన్నికలా.. ఆంధ్రా గో బ్యాక్ అన్న బీజేపీ ఏం చెస్తుంది? నవీన్ పట్నాయక్ ఆగ్రహం