amravati

CM Chandrababu: లేబర్‌ అడ్డాలతో ఏపీలో నూతన అధ్యాయం.. కార్మికుల నైపుణ్యాలకు పదును పెట్టేలా స్కిల్ ట్రైనింగ్

Shankar Dukanam — Sun, 24 May 2026 19:26:55 +0530

Andhra Pradesh Latest News | అమరావతి: ఆంధ్రప్రదేశ్‌ రాష్ట్ర నిర్మాణంలో వెన్నెముకలా నిలిచే సంఘటిత, అసంఘటిత రంగాల కార్మికుల సంక్షేమమే ధ్యేయంగా కూటమి ప్రభుత్వం గత రెండేళ్లలో విప్లవాత్మక అడుగులు వేసింది. కుదేలైన నిర్మాణ రంగాన్ని, కార్మిక వ్యవస్థలను ముఖ్యమంత్రి చంద్రబాబు తన దార్శనికతతో పునరుద్ధరించారు. కార్మికులకు నైపుణ్య శిక్షణ (Skill Upgrade) ఇప్పించడంతో పాటు, సమాజంలో వారి గౌరవాన్ని పెంచేలా లేబర్ అడ్డాల నిర్మాణం, వైద్య సంరక్షణ కోసం సరికొత్త ఈఎస్‌ఐ ఆసుపత్రుల ఏర్పాటు వంటి చర్యలతో కూటమి ప్రభుత్వం కార్మికులకు కొండంత అండగా నిలిచింది.

మౌలిక వసతులతో 'లేబర్‌ అడ్డాల' ఏర్పాటు
ఉపాధి కోసం కూడళ్లలో ఎండనక, వాననక నిలబడే దినసరి కూలీల కష్టాలకు పరిష్కారంగా విజయవాడ, విశాఖపట్నం, తిరుపతి, రాజమండ్రి, గుంటూరు, నెల్లూరు వంటి నగరాలతో పాటు ఉమ్మడి జిల్లాల కేంద్రాల్లో ఆధునిక లేబర్ అమెనిటీస్ సెంటర్స్ (లేబర్‌ అడ్డాల) ఏర్పాటుకు శ్రీకారం చుట్టారు. ఈ కేంద్రాల ద్వారా కార్మికులకు స్వచ్ఛమైన తాగునీరు, విశ్రాంతి గదులు, మరుగుదొడ్లతో పాటు ఉద్యోగ సమాచారం, ప్రభుత్వ సంక్షేమ పథకాల వివరాలను అందిస్తున్నారు. పని లేని సమయాల్లో కార్మికులకు అనుభవంతో పాటు టెక్నాలజీని జోడించి నైపుణ్యాభివృద్ధి శిక్షణ ఇచ్చేలా కార్యాచరణ రూపొందించారు.

నిలిచిన సంక్షేమ పథకాలకు పునరుజ్జీవం
రాష్ట్రంలోని 88 లక్షల మంది అసంఘటిత కార్మికులు, అందులోని 18 లక్షల భవన నిర్మాణ కార్మికుల కుటుంబాలకు ధీమా కల్పిస్తూ గతంలో నిలిచిపోయిన పథకాలను ప్రభుత్వం పునరుద్ధరించింది. ప్రస్తుతం కార్మిక కుటుంబాలకు ప్రసూతి సహాయం కింద రూ. 20 వేలు, వివాహ కానుకగా రూ. 40 వేలు, సహజ లేదా ప్రమాదవశాత్తు మరణం సంభవిస్తే రూ. 20 వేల తక్షణ సహాయంతో పాటు అంత్యక్రియల ఖర్చుల నిమిత్తం రూ. 60 వేలు అందిస్తూ ఉచిత వైద్య పరీక్షలు కూడా నిర్వహిస్తున్నారు.

పారిశ్రామిక భద్రతకు పెద్ద పీట
పారదర్శకత, భద్రత సూత్రాలతో ఫ్యాక్టరీల శాఖను బలోపేతం చేసిన ప్రభుత్వం, నిబంధనలు ఉల్లంఘించిన 23 ఫ్యాక్టరీలపై కఠిన చర్యలు తీసుకుంది. కార్మికుల ప్రాణ రక్షణ కోసం సేఫ్టీ అలర్ట్, ఇన్సిడెంట్ అలర్ట్ వంటి కార్యక్రమాలు ప్రారంభించింది. జేఎన్‌టీయూ, ఎస్‌వీయూ వంటి ప్రతిష్టాత్మక యూనివర్శిటీలతో ఒప్పందాలు కుదుర్చుకుని, 360 పరిశ్రమల్లో థర్డ్ పార్టీ సేఫ్టీ ఆడిట్లు, వందలాది మాక్ డ్రిల్స్ నిర్వహించడం ద్వారా పారిశ్రామిక భద్రతలో ఆంధ్రప్రదేశ్ రాష్ట్రం దేశానికే రోల్ మోడల్‌గా నిలిచింది.

Also Read: Amaravati News: అమరావతిలో తొలిదశ భూసేకరణ వేగవంతం.. విడివిడిగా CRDA నోటిఫికేషన్లు - రైతులకు మరో ఛాన్స్ !

ఈఎస్‌ఐ వైద్య సేవల్లో చారిత్రాత్మక మార్పులు
రాష్ట్రంలోని 15 లక్షల మంది ఇన్సూర్డ్ పర్సన్స్ ఆరోగ్య రక్షణే ధ్యేయంగా భీమా వైద్య సేవల శాఖను ప్రభుత్వం ఆధునీకరించింది. అచ్యుతాపురంలో కొత్త ఈఎస్‌ఐ ఆసుపత్రి భవన నిర్మాణానికి శంకుస్థాపన చేయడంతో పాటు తిరుపతి, గుంటూరు, కర్నూలు, శ్రీసిటీ, నెల్లూరు ప్రాంతాలలో ఆసుపత్రుల విస్తరణకు భూములు కేటాయించారు. విశాఖపట్నంలో ESIC మెడికల్ కాలేజీ, అమరావతిలో 500 పడకల సూపర్ స్పెషాలిటీ ఆసుపత్రి ఏర్పాటుకు ప్రతిపాదనలు సిద్ధం చేశారు. My Health, e-Aushadhi వంటి మొబైల్ యాప్‌ల ద్వారా ఔషధాల పంపిణీలో పూర్తి పారదర్శకతను తీసుకువస్తూ కార్మికుల ప్రాణాలకు, ఆరోగ్యానికి ఢోకా లేకుండా కూటమి ప్రభుత్వం రెండేళ్ల పాలనను విజయవంతంగా సాగించింది.

Also Read: Prakash Raj: ప్రొఫెసర్ నాగేశ్వర్‌కు నటుడు ప్రకాష్ రాజ్ మద్దతు.. పవన్ కళ్యాణ్ ఫ్యాన్స్‌పై తీవ్ర విమర్శలు

Balakrishna : టెక్నిక్ పెరిగినా సినిమాలు లేట్... థియేటర్స్‌కు తాళాలు - గాడ్ ఆఫ్ మాసెస్ బాలయ్య రియాక్షన్

Ganesh Guptha — Sun, 24 May 2026 18:26:54 +0530

Balakrishna About Theaters Movie Industry Issue In APFDC Team Oath Event : సినీ ఇండస్ట్రీకి ఓ రాజధానిగా ఏపీ మారుతుందని... 70 శాతం సినిమా కలెక్షన్స్ వచ్చేది ఏపీ నుంచేనని ప్రముఖ నటుడు, హిందూపురం ఎమ్మెల్యే బాలయ్య అన్నారు. ఏపీ ఫిల్మ్ డెవలప్మెంట్ కార్పొరేషన్ ఛైర్మన్, వైస్ ఛైర్మన్, డైరెక్టర్స్ ప్రమాణ స్వీకార కార్యక్రమంలో ఆయన పాల్గొన్నారు. మూవీ ఇండస్ట్రీ, ఎగ్జిబిటర్స్, థియేటర్స్ గురించి ఇంట్రెస్టింగ్ కామెంట్స్ చేశారు.

'వారిని చూస్తే జాలేస్తుంది'

'షూటింగ్స్ లేక ఎన్నో యూనియన్స్‌కు పనులు లేవు. సినిమా ఎలా ఉండాలో ఆలోచించాల్సింది పోయి... బ్రతికించాల్సిన పరిస్థితి వచ్చింది. టెక్నిక్ లేనప్పుడు మూవీస్ త్వరగా పూర్తయ్యేవి. టెక్నిక్ పెరిగాక మరింత లేట్ అవుతున్నాయి. చాలా మంది ఎగ్జిబిటర్స్‌ను చూస్తే చాలా బాధగా ఉంది.

థియేటర్స్‌కు తాళాలు వేసుకునే పరిస్థితుల్లో ఉన్నారు. జోడెడ్ల ప్రభుత్వం సినీ ఇండస్ట్రీని డెవలప్ చేస్తుంది. తెలంగాణ ప్రభుత్వ సహకారం కోరుతున్నాం. ఏపీలో తెలుగు సినీ ఇండస్ట్రీని కాపాడుకోవాల్సిన బాధ్యత ఉంది.' అని బాలకృష్ణ (Balakrishna) అన్నారు. ప్రస్తుతం ఈ కామెంట్స్ వైరల్ అవుతున్నాయి.

Also Read : ట్రెండింగ్‌లో హల్లల్లల్లో ఐటెం సాంగ్ - ఎనర్జిటిక్ స్టెప్స్ విత్ రొమాంటిక్ టచ్ లిరిక్స్

సరికొత్త అధ్యాయం

ఏపీ చరిత్రలో ఇది సరికొత్త అధ్యాయమని... సీఎం చంద్రబాబు, తమ్ముడు, డిప్యూటీ సీఎం పవన్ కల్యాణ్, నేను, మంత్రి దుర్గేష్ కలిసి FDC ఏర్పాటు చేసినట్లు చెప్పారు బాలయ్య. 'సినీ ఇండస్ట్రీకి ఏపీ రాజధానిగా మారుతుంది. 70 శాతం కలెక్షన్స్ వచ్చేది ఏపీ నుంచే. అఖండ సినిమా కూడా రంపచోడవరంలో చేశాం. నేను చేసినన్ని సినిమాలు ఏపీలో ఎవరూ చేసి ఉండరు.

సినిమా నేపథ్యాలు అన్నీ ఏపీలో అద్భుతమైనవి ఉన్నాయి. షూటింగ్స్ నిరాటంకంగా జరగడానికి అన్నీ పర్మిషన్స్ ఒకే గొడుగు కిందక దొరికేలా సింగిల్ విండోలో రావాలి. అన్నీ అంశాలపై త్వరలోనే ఓ కార్యాచరణ తెలియజేస్తాం.' అని చెప్పారు.

APFDC ఛైర్మన్, డైరెక్టర్స్ ప్రమాణ స్వీకారం

ఏపీ FDC (APFDC) నూతన ఛైర్మన్‌గా ప్రముఖ డిస్ట్రిబ్యూటర్ భరత్ భూషణ్‌ను నియమిస్తూ ఏపీ ప్రభుత్వం శనివారం ఉత్తర్వులు జారీ చేసింది. అలాగే, వైస్ ఛైర్మన్ సహా 20 మంది డైరెక్టర్స్‌ను నియమించింది. వీరంతా సినీ రంగానికి చెందిన వారే కావడం విశేషం. వైస్ ఛైర్మన్‌గా డైరెక్టర్ మెహర్ రమేష్ నియమితులయ్యారు.

ప్రముఖ నటుడు శివాజీ, సుమన్, యాంకర్ ఝాన్సీ, సీనియర్ ప్రొడ్యూసర్ చదలవాడ శ్రీనివాసరావు, కూచిబొట్ల సుబ్రమణ్యం, రైటర్ సాయిమాధవ్ బుర్రా, డైరెక్టర్ సముద్ర, సీనియర్ జర్నలిస్ట్ కె ఉమా మహేశ్వరరావు, సినిమాటోగ్రాఫర్ ఎస్ మీర్ డైరెక్టర్స్‌గా అపాయింట్ అయ్యారు. విజయవాడలోని ఎన్టీఆర్ అడ్మినిస్టేటివ్ బ్లాక్‌లోని FDC ఛైర్మన్‌గా వీరు ప్రమాణ స్వీకారం చేశారు. అటు, తెలంగాణలో FDC ఛైర్మన్‌గా ప్రముఖ నిర్మాత దిల్ రాజు కొనసాగుతున్నారు. ఇంకా డైరెక్టర్స్‌ను నియమించలేదు.

Also Read : జన నాయగన్ రిలీజ్ డేట్ - ఫ్యాన్స్‌కు నోటిఫికేషన్స్... సీఎం బర్త్ డేకు డబుల్ ట్రీట్

Guntur Crime News: పోలీసులు వేధిస్తున్నారని ఆరోపిస్తూ సెల్ఫీ వీడియో తీసి మహిళ ఆత్మహత్య.. గుంటూరులో ఘటన

Shankar Dukanam — Sun, 24 May 2026 15:30:04 +0530

Bapatla Crime News | గుంటూరు: ఓ కేసు విషయమై పోలీసులు స్టేషన్‌కు పిలిపించి వేధిస్తున్నారంటూ ఆరోపిస్తూ ఒక మహిళ సెల్ఫీ వీడియో తీసుకొని ఆత్మహత్యకు పాల్పడిన ఘటన గుంటూరు జిల్లాలో తీవ్ర కలకలం రేపింది. బాధితురాలిని తిరుపతమ్మగా గుర్తించారు. ఆమె తన భర్తతో కలిసి తెనాలి కొత్తపేటలోని ఒక అపార్ట్‌మెంట్‌లో పనిమనిషిగా జీవనం సాగిస్తోంది. అయితే, సదరు అపార్ట్‌మెంట్‌కు చెందిన ఒక మహిళ.. తిరుపతమ్మ తన వద్ద బంగారం అడిగి తీసుకొని తిరిగి ఇవ్వడం లేదంటూ ఇటీవల స్థానిక పోలీసులకు ఫిర్యాదు చేసింది.

ఈ ఫిర్యాదు ఆధారంగా పోలీసులు తిరుపతమ్మను విచారణ నిమిత్తం స్టేషన్‌కు పిలిపించారు. ఈ క్రమంలో, అపార్ట్‌మెంట్‌లోని మహిళ తనపై బంగారం తీసుకున్నట్లు తప్పుడు ఫిర్యాదు చేసిందని, విచారణ పేరుతో స్టేషన్‌లో పోలీసులు తనను తీవ్రంగా వేధిస్తున్నారంటూ తిరుపతమ్మ ఒక సెల్ఫీ వీడియో రికార్డ్ చేసింది. అనంతరం మనస్తాపానికి గురై ఆమె పురుగుల మందు తాగింది. గమనించిన కుటుంబ సభ్యులు ఆమెను వెంటనే చికిత్స నిమిత్తం ఆసుపత్రికి తరలించారు. అక్కడ అత్యవసర విభాగంలో చికిత్స పొందుతూ ఆమె మృతిచెందింది. ఈ ఘటనపై సర్వత్రా ఆగ్రహం వ్యక్తమవుతుండగా, ఉన్నతాధికారులు కేసు నమోదు చేసి దర్యాప్తు చేపట్టారు.

Also Read: Hit And Run In Hyderabad: హైదరాబాద్‌లో ఘోరం.. కారుతో ఢీకొట్టి లాయర్ దారుణ హత్య! అదే కారణమా !

మద్యం మత్తులో పీఎస్ ఆవరణలో గొడవ.. పోలీసులకు గాయాలు
బాపట్ల జిల్లా కొల్లూరు పోలీసు స్టేషన్‌లో మద్యం మత్తులో రెండు వర్గాలు తలపడటంతో స్టేషన్ ఆవరణ రణరంగంగా మారింది. వేమూరు రోడ్డులోని ఓ వైన్ షాప్ ఎదుట నూడిల్స్ వ్యాపారి ఉప్పు జానకీరామ్‌పై, కొండూరు సురేష్ అనే వ్యక్తి మద్యం సీసాతో తలపై కొట్టి దాడి చేశాడు. తీవ్ర గాయాలైన జానకీరామ్ ఫిర్యాదు కోసం కొల్లూరు పోలీసు స్టేషన్‌కు వెళ్లాడు. ఈ విషయం తెలుసుకున్న అతని మేనల్లుడు బాలు ఆవేశంతో సురేష్ నివసించే కాలనీకి వెళ్లి కత్తి చూపించి వార్నింగ్ ఇచ్చాడు.

తనకు కత్తి చూపించి వార్నింగ్ ఇవ్వడంతో తీవ్ర ఆగ్రహానికి లోనైన సురేష్ అర్ధరాత్రి 12 గంటల సమయంలో సుమారు 30 మంది అనుచరులతో కలిసి కొల్లూరు పోలీసు స్టేషన్‌పైకి దాడికి వచ్చాడు. స్టేషన్ లోపలే ఇరువర్గాలు కొట్టుకోవడంతో జానకీరామ్, అతని సోదరి, బావ, మేనల్లుడు బాలు తీవ్రంగా గాయపడ్డారు. ఈ గొడవలో స్టేషన్ ముందు గది రక్తంతో తడిచిపోయింది. పీఎస్ లోపల కుర్చీలు, బల్లలు, కూలర్లను దుండగులు పూర్తిగా ధ్వంసం చేశారు.

Also Read: Murder Mystery: మోడల్ ట్విషా శర్మ మృతి కేసులో భర్త సమర్థ్ సింగ్ అరెస్ట్ - వేధింపుల నుంచి మరణం వరకు అసలేం జరిగింది?

ఈ దాడిని అడ్డుకునేందుకు ప్రయత్నించిన వేమూరు సీఐ వీరాంజనేయులు, ఇద్దరు కానిస్టేబుళ్లు, ఒక హోంగార్డుపై కూడా నిందితులు దాడి చేసి గాయపరిచారు. పీఎస్ బయట ఉన్న వాహనాన్ని తగలబెట్టేందుకు ప్రయత్నిస్తూ, వీడియో తీస్తున్న జర్నలిస్ట్ ఫోన్ లాక్కుని దాడికి యత్నించారు. చివరికి అదనపు బలగాలను రప్పించడంతో గంటన్నర తర్వాత ఎట్టకేలకు పరిస్థితి అదుపులోకి వచ్చింది. క్షతగాత్రులను చికిత్స నిమిత్తం గుంటూరు జీజీహెచ్‌కు తరలించగా, డీఎస్పీ శ్రీనివాసరావు కొల్లూరు పోలీస్ స్టేషన్‌కు చేరుకుని పరిశీలించి బాధ్యులపై కేసులు నమోదు చేస్తామని ప్రకటించారు.

Film Development Corporation : AP FDC ఛైర్మన్‌, డైరెక్టర్స్ నియామకం - సుమన్, శివాజీ, ఝాన్సీలకు ఛాన్స్

Ganesh Guptha — Sun, 24 May 2026 13:49:38 +0530

AP Governments Appoints FDC Directors : సినీ ఇండస్ట్రీకి ఏపీ ప్రభుత్వం గుడ్ న్యూస్ చెప్పింది. అవార్డుల నిర్వహణ, టీవీ నాటక రంగాలకు మరింత ప్రోత్సాహం ఇచ్చే ఫిలిం డెవలప్‌మెంట్ కార్పొరేషన్‌కు కొత్త రూపు తీసుకొచ్చింది. FDC (Film Development Corporation)కు ఛైర్మన్, వైస్ ఛైర్మన్ సహా 20 మంది డైరెక్టర్లను నియమించింది. ప్రముఖ డైరెక్టర్స్, నిర్మాతలు సహా నటులకు ఇందులో అవకాశం కల్పించారు.

ఛైర్మన్‌గా ఫేమస్ డిస్ట్రిబ్యూటర్

ఏపీ FDC ఛైర్మన్‌గా ప్రముఖ డిస్ట్రిబ్యూటర్ భరత్ భూషణ్‌ను ఛైర్మన్‌గా నియమించింది. అలాగే, వైస్ ఛైర్మన్‌గా ప్రముఖ డైరెక్టర్ మెహర్ రమేష్‌ను నియమించారు. అయితే, FDCలో ఆ పదవి లేకపోవడంతో ఆయన కూడా డైరెక్టర్‌గానే కొనసాగనున్నారు. ఇక వీరితో పాటే 20 మంది డైరెక్టర్స్‌ను అపాయింట్ చేస్తూ జీవో జారీ చేసింది. వీరంతా సినిమా రంగంలో వివిధ శాఖలకు చెందినవారే.

గతంలో FDC డైరెక్టర్లుగా 15 నుంచి 20 మందిని నియమించినా... అందులో ఎక్కువ మంది సినీ రంగానికి సంబంధం లేని వాళ్లు ఉండేవాళ్లు. ఆ పద్ధతిని పక్కన పెడుతూ ఈసారి మొత్తం సినీ రంగానికి చెందిన వారినే డైరెక్టర్లుగా నియమించింది ప్రభుత్వం.

#TFJA Heartfelt congratulations to everyone appointed as Chairman, Vice Chairman, and Director of the Andhra Pradesh State Film, Television and Theatre Development Corporation (APSFTVTDC). pic.twitter.com/Ee4sD1tNCT
— Telugu Film Journalists Association (@FilmJournalists) May 24, 2026

FDC డైరెక్టర్స్ వీళ్లే...

ఛైర్మన్ - భరత్ భూషణ్, వైస్ ఛైర్మన్ - డైరెక్టర్ మెహర్ రమేష్

డైరెక్టర్స్ - ప్రముఖ నటులు శివాజీ, సుమన్, ఝాన్సీలకు FDC డైరెక్టర్స్‌లో చోటు దక్కింది. అలాగే, సీనియర్ ప్రొడ్యూసర్ చదలవాడ శ్రీనివాసరావు, కూచిభొట్ల సుబ్రమణ్యం, రచయిత సాయిమాధవ్ బుర్రా, డైరెక్టర్ సముద్ర, సీనియర్ జర్నలిస్ట్ కె.ఉమా మహేశ్వరరావు, సినిమాటోగ్రాఫర్ ఎస్.మీర్ డైరెక్టర్స్‌గా నియమితులయ్యారు.

అలాగే, నాటక రంగానికి చెందిన కందిమళ్ల సాంబశివరావు, ఎగ్జిబిటర్స్ ఎస్.వెంకట కృష్ణారెడ్డి, జి.రాజ్ వెంకటేశ్వర యాదవ్, వైజాగ్ ఫిల్మ్ ఎంప్లాయీస్ ఫెడరేషన్ నేత డి.సత్యనారాయణలను నియమితులయ్యారు. వీరితో పాటే ముగ్గురు ప్రభుత్వ అధికారులు కూడా డైరెక్టర్స్‌గా వ్యవహరిస్తారు.

డైరెక్టర్స్ ప్రమాణం

APFDC చైర్మన్ సహా ఇతర డైరెక్టర్స్ అంతా విజయవాడలోని ఎన్టీఆర్ అడ్మినిస్ట్రేటివ్ బ్లాక్‌లోని FDC కార్యాలయంలో ప్రమాణం స్వీకారం చేశారు. ఆ తర్వాత వీరంతా సీఎం చంద్రబాబును కలిశారు. గాడ్ ఆఫ్ మాసెస్ బాలకృష్ణ, ఏపీ డిప్యూటీ సీఎం, పవర్ స్టార్ పవన్ కల్యాణ్ సూచనలతో FDCని బలోపేతం చేసేందుకు సన్నాహాలు జరుగుతున్నాయి. తెలంగాణలో రేవంత్ రెడ్డి ప్రభుత్వం వచ్చాక గద్దర్ అవార్డ్స్ ఇస్తుండగా... ఏపీలోనూ నంది అవార్డ్స్ ఇవ్వాలనే డిమాండ్ బలంగా వినిపిస్తోంది.

FDC ఛైర్మన్, డైరెక్టర్స్ నియామకంతో ఏపీలో సినీ రంగం బలోపేతం కావడం సహా నంది అవార్డ్స్ పునరుద్ధరణలోనూ ముందడుగు పడే ఛాన్స్ ఉందని సినీ రంగ విశ్లేషకులు భావిస్తున్నారు. అటు, తెలంగాణలో FDC ఛైర్మన్‌గా ప్రముఖ నిర్మాత దిల్ రాజు మాత్రమే కంటిన్యూ అవుతుండగా... డైరెక్టర్లను నియమించలేదు.

Also Read : సేవ్ ది టైగర్స్ సిరీస్ సీజన్ 3 రెడీ - ఈసారి స్పెషల్ సర్ప్రైజ్... స్ట్రీమింగ్ ఎప్పుడంటే?

NOTE : మరిన్ని సినిమా వార్తలు, గాసిప్స్, ఓటీటీ అప్డేట్స్, వెబ్ సిరీస్‌లు, టాలీవుడ్, బాలీవుడ్ హీరోయిన్స్ లేటెస్ట్ సోషల్ మీడియా అప్డేట్స్, టీవీ సీరియల్స్ కోసం ఇక్కడ క్లిక్ చేయండి.

Amaravati News: అమరావతిలో తొలిదశ భూసేకరణ వేగవంతం.. విడివిడిగా CRDA నోటిఫికేషన్లు - రైతులకు మరో ఛాన్స్ !

Shankar Dukanam — Sun, 24 May 2026 10:29:27 +0530

Andhra Pradesh News | అమరావతి: ఆంధ్రప్రదేశ్ రాజధాని అమరావతి నిర్మాణ పనులను వేగవంతం చేసేందుకు ఏపీ సీఆర్‌డీఏ (AP CRDA) కీలక అడుగులు వేస్తోంది. కొన్ని చోట్ల రైతులు భూములు ఇవ్వకపోవడంతో పలు ప్రాజెక్టుల పనులకు ఆటంకాలు ఎదురవుతున్నాయి. దాంతో తొలి విడత భూసమీకరణ (Land Pooling) విధానంలో రాజధాని కోసం భూములు ఇవ్వని రైతుల వద్ద నుంచి, ఇప్పుడు భూసేకరణ (Land Acquisition) చట్టం ద్వారా భూములను సేకరించే ప్రక్రియపై ఫోకస్ చేశారు. అమరావతిని అంతర్జాతీయ స్థాయిలో తీర్చిదిద్దుతామని ఏపీ సీఎం చంద్రబాబు పలుమార్లు స్పష్టం చేశారు.

అయితే రాజధాని అమరావతి మాస్టర్ ప్లాన్ పరిధిలోని 217 చదరపు కిలోమీటర్ల పరిధిలో అక్కడక్కడా కొన్ని భూములు సీఆర్డీఏకు రాకపోవడం వల్ల రహదారుల నిర్మాణం, డ్రైనేజీ, విద్యుత్ వంటి మౌలిక వసతుల ప్రాజెక్టులకు అడ్డంకులుగా మారాయి. రాజధానిలోని 28 గ్రామాల పరిధిలో ఇంకా 2,766 ఎకరాల భూమి కావాల్సి ఉండగా, ప్రాజెక్టుల అవసరాల బట్టి సీఆర్‌డీఏ విడివిడిగా నోటిఫికేషన్లు జారీ చేస్తోంది. 720 ఎకరాలకు సంబంధించి 74 నోటిఫికేషన్లను అధికారులు విడుదల చేశారు.

భూ సమీకరణ ద్వారా సేకరణకు సీఆర్‌డీఏ చర్యలు
సీఆర్‌డీఏ ఒకవైపు భూసేకరణ నోటిఫికేషన్లు ఇస్తున్నప్పటికీ, మరోవైపు రైతులు ఎవరైనా స్వచ్ఛందంగా భూసమీకరణ పద్ధతిలో ముందుకు వస్తే భూములను స్వీకరిస్తామని స్పష్టం చేస్తోంది. అధికారుల ప్రకటనకు సానుకూలంగా స్పందించిన రైతులు ఇటీవల 30 ఎకరాల వరకు ల్యాండ్ పూలింగ్ కింద ప్రభుత్వానికి అప్పగించారు. రాజధాని అమరావతి ప్రాజెక్టు పనులు వేగవంతం చేసేందుకు సీఆర్‌డీఏ అధికారులు భూసేకరణ నోటిఫికేషన్లు ఇచ్చిన గ్రామాల్లో సభలు నిర్వహిస్తూ రైతులకు అవగాహన కల్పిస్తున్నారు. భూసేకరణ ద్వారా వచ్చే నష్టాల కంటే, భూసమీకరణ కింద భూములిస్తే ప్రభుత్వం ఇచ్చే రిటర్నబుల్ ప్లాట్ల వల్ల కలిగే ప్రయోజనాలు ఉంటాయని అర్థమయ్యేలా చెబుతున్నారు.

సీఆర్‌డీఏ భూసేకరణకు నోటిఫికేషన్ ఇచ్చినప్పటికీ, చివరికి అవార్డు జారీ అయ్యే లోపు ఎప్పుడైనా ల్యాండ్ పూలింగ్‌కు మారవచ్చని తెలిపారు. అలా వస్తే రోజుల వ్యవధిలోనే ప్లాట్లు కేటాయించి రిజిస్ట్రేషన్ చేస్తామని రైతులకు భరోసా ఇస్తున్నారు. ప్రస్తుతం పెండింగ్‌లో ఉన్న భూముల్లో అత్యధికంగా ఉండవల్లిలో 741 ఎకరాలు, పెనుమాకలో 378 ఎకరాలు ఉన్నాయి. నిడమర్రులో 432 ఎకరాలు, కురగల్లు, నీరుకొండ, రాయపూడి గ్రామాల్లో 200 ఎకరాలకు పైగా భూములను సేకరించాల్సి ఉందని అధికారులు తెలిపారు.

అమరావతి కోసం సేకరించిన భూమి వివరాలు
రాజధాని అమరావతి బృహత్ ప్రణాళిక విస్తరణ, మౌలిక వసతుల కల్పన కోసం ఇప్పటివరకు సేకరించిన మొత్తం భూమి వివరాలు ఇలా ఉన్నాయి.
భూసమీకరణ (Land Pooling Scheme) ద్వారా సమీకరించిన భూమి: అమరావతి చరిత్రలోనే అత్యంత ప్రతిష్టాత్మకంగా చేపట్టిన భూసమీకరణ విధానం కింద 28 గ్రామాల రైతులు స్వచ్ఛందంగా ముందుకు వచ్చి దాదాపు 33,000 ఎకరాలకు పైగా భూమిని రాష్ట్ర ప్రభుత్వానికి అప్పగించారు. ప్రపంచంలోనే ఇంత భారీ ఎత్తున ల్యాండ్ పూలింగ్ జరగడం ఒక రికార్డుగా నిలిచింది.

భూసేకరణ (Land Acquisition), పెండింగ్ భూములు: మొదటి విడతలో ల్యాండ్ పూలింగ్‌కు ఇవ్వకుండా మిగిలిపోయిన భూమి 2,766 ఎకరాలు కాగా, ప్రస్తుతం సీఆర్‌డీఏ ఈ మిగిలిన భూమిని ప్రాజెక్టుల వారీగా నోటిఫికేషన్లు జారీ చేసి సేకరిస్తోంది. ఇందులో భాగంగా ఇప్పటికే 720 ఎకరాల సేకరణకు నోటిఫికేషన్లు జారీ చేయగా, ఇటీవల 30 ఎకరాలు ల్యాండ్ పూలింగ్ కిందకు వచ్చాయి.

Also Read: Purandeswari Central Cabinet: కేంద్ర కేబినెట్‌లోకి పురందేశ్వరి? మోదీ టీంలో 'చిన్నమ్మ'కు కీలక పదవి ఖరారైందా?

ప్రభుత్వ భూములు: రాజధాని అమరావతి పరిధిలో అడవులు, వాగులు, వివిధ ప్రభుత్వ శాఖలకు చెందిన సుమారు 11,000 ఎకరాల ప్రభుత్వ భూములను సీఆర్‌డీఏ పరిధిలోకి బదిలీ చేశారు.

అమరావతి గ్రీన్ ఫీల్డ్ రాజధాని కోసం ప్రభుత్వం ఇప్పటివరకు సుమారు 44,000 ఎకరాలకు పైగా భూమిని సీఆర్‌డీఏ తన ఆధీనంలోకి తీసుకుంది. మిగిలిన 2,700 పైచిలుకు ఎకరాలను కూడా సేకరిస్తే రాజధాని లోపల రహదారులు, మౌలిక వసతుల గ్రిడ్ పూర్తిస్థాయిలో అనుసంధానం కానుంది. రెండో విడత భూ సమీకరణ కోసం సైతం సీఆర్‌డీఏ ఇదివరకు నోటిఫికేషన్ ఇచ్చింది. త్వరలో ఇందుకు సంబంధించి భూముల సమీకరణ ప్రక్రియ మొదలుకానుంది. ముందుగా తొలి విడత భూములు ఇచ్చిన రైతులకు ప్రయోజనాలు అందించడంపై ప్రభుత్వం ఫోకస్ చేసింది.

Talliki Vandanam Eligibility Status: ప్రతి విద్యార్థికి రూ.15 వేలు.. తల్లికి వందనం స్కీమ్ కు మీరు అర్హులేనా.. ఇలా చెక్ చేసుకోండి

Satyaprasad Bandaru — Sun, 24 May 2026 10:22:22 +0530

Talliki Vandanam Eligibility Status: ఆంధ్రప్రదేశ్ ప్రభుత్వం 1వ తరగతి నుంచి ఇంటర్ వరకు చదువుతున్న విద్యార్థులకు తల్లికి వందనం పథకం అమలు చేస్తుంది. ఈ పథకం ప్రతి ఏటా రూ.15 వేలు నేరుగా ఖాతాల్లో జమ చేస్తున్నారు. వీటిలో రూ.13 వేలు విద్యార్థి తల్లి బ్యాంక్ ఖాతాలో జమ చేస్తారు. మిగిలిన రూ.2 వేలు మాత్రం సూళ్ల నిర్వహణ కోసం వినియోగిస్తారు. 2026-27 విద్యా సంవత్సరం ప్రారంభం జూన్ లో తల్లికి వందనం డబ్బులు లబ్దిదారుల ఖాతాల్లో జమ చేయాలని ప్రభుత్వం నిర్ణయించింది. అయితే తల్లికి వందనం స్కీమ్ కు మీరు అర్హులా, కాదా అనే తెలుసుకోవచ్చు. అదేలానో చూద్దాం.

తల్లికి వందనం పథకం స్టేటస్ తనిఖీ విధానం

2026-27 కొత్త విద్యా సంవత్సరానికి సంబంధించిన “తల్లికి వందనం” పథకం అర్హతను ఆన్‌లైన్‌లో ఈ కింద విధంగా చెక్ చేసుకోవచ్చు.

1. అధికారిక వెబ్‌సైట్ https://bm-sgsw.ap.gov.in/BM/Schemeout లింక్ ను ఓపెన్ చేయండి
2. కుటుంబ పెద్ద లేదా తల్లి ఆధార్ నెంబర్ నమోదు చేయండి
3. స్కీమ్ టైప్ లో “తల్లికి వందనం” సెలెక్ట్ చేయండి
4. సంవత్సరం 2026-27 సెలెక్ట్ చేయండి
5. "Get Details" పై క్లిక్ చేయండి
6. ఆధార్‌కు లింక్ అయిన మొబైల్ నెంబర్‌కు ఓటీపీ వస్తుంది
7. OTP నమోదు చేయండి
8. 'Verify'పై క్లిక్ చేయండి

Also Read: రోజుకు రూపాయితో రూ.6,00,00 బీమా.. ఈ ప్రభుత్వ పథకాల గురించి తెలుసా?

వెరిఫై చేసిన తర్వాత మూడు విభాగాలు కనిపిస్తాయి. అవి

సిటిజన్ డీటైల్స్
ఫ్యామిలీ డీటైల్స్
స్కీమ్ ఎలిజిబిలిటీ కాలిక్యులేటర్

ఎలిజిబిలిటీ కాలిక్యులేటర్ లో వాలిడేషన్ స్టేటస్ 'Satisfied' అని ఉంటే మీరు తల్లికి వందనం పథకానికి అర్హులు అవుతారు. వివరాల్లో తప్పులు ఉంటే వెంటనే సంబంధిత సచివాలయం లేదా పాఠశాలలో సంప్రదించి సరిచేసుకోవాలి.

Also Read: రూ.50 లక్షల లోన్, రూ.17 లక్షల సబ్సిడీ.. PMEGP Scheme అర్హతలు, అప్లై ప్రాసెస్ ఇలా

తల్లికి వందనం అర్హతలు

కుటుంబంలో ఎవరు ఆదాయపు పన్ను చెల్లించి ఉండకూడదు
10 ఎకరాలలోపు డ్రై ల్యాండ్
5 ఎకరాలలోపు వెట్ ల్యాండ్
12 నెలల విద్యుత్ వినియోగం 300 యూనిట్ల లోపు ఉండాలి.
కుటుంబంలో ఫోర్ వీలర్ కలిగి ఉండకూడదు.
పట్టణాల్లో 1000 చదరపు అడుగుల లోపు స్థలం ఉన్నవారు అర్హులు
కుటుంబంలో ఎవరూ ప్రభుత్వ/అవుట్‌సోర్స్/పెన్షన్/కాంట్రాక్ట్ ఉద్యోగిగా ఉండకూడదు.

Also Read: విద్యుత్ బిల్లు ఆదాతో పాటు ఆదాయం.. రూ.78 వేల వరకు సబ్సిడీ.. పీఎం సూర్య ఘర్ స్కీమ్ పూర్తి వివరాలు ఇవే!

బ్యాంక్ అకౌంట్ తో ఆధార్ లింక్

తల్లి వందనం డబ్బులు బ్యాంకులో పడాలంటే ముందుగా బ్యాంక్ అకౌంట్ ఆధార్‌తో అనుసంధానం చేసుకోవాలి. గతేడాది చాలామంది విద్యార్థులు అర్హత ఉండి కూడా తల్లికి వందనం పథకానికి పొందలేకపోయారు. ఈ సమస్యను దృష్టిలో ఉంచుకుని విద్యాశాఖ విద్యార్థుల తల్లులను ఇప్పటికే అలర్ట్ చేసింది. ప్రతి ఒక్కరూ తమ బ్యాంక్ అకౌంట్ ను ఆధార్ అనుసంధానం చేసుకోవాలని సూచించింది.

Prakash Raj: ప్రొఫెసర్ నాగేశ్వర్‌కు నటుడు ప్రకాష్ రాజ్ మద్దతు.. పవన్ కళ్యాణ్ ఫ్యాన్స్‌పై తీవ్ర విమర్శలు

Shankar Dukanam — Sat, 23 May 2026 20:58:51 +0530

Professor Nageshwar | అమరావతి: ప్రముఖ విశ్లేషకులు, ప్రొఫెసర్ నాగేశ్వరరావుపై జరుగుతున్న సోషల్ మీడియా ట్రోలింగ్, కేసులపై నటుడు ప్రకాష్ రాజ్ తీవ్రంగా స్పందించారు. ప్రొఫెసర్ నాగేశ్వర్‌కు తన పూర్తి మద్దతు ప్రకటించారు. ప్రజల పక్షాన నిలుస్తూ ప్రొఫెసర్ నాగేశ్వర్ గత కొన్నేళ్లుగా అధికారంలో ఉన్నవారినైనా, ప్రతిపక్షంలో ఉన్నవారినైనా ప్రశ్నిస్తూనే ఉన్నారని ప్రకాష్ రాజ్ గుర్తుచేశారు. కానీ ఆయన మాట్లాడిన మొత్తం విషయాన్ని పక్కన పెట్టి, కేవలం ఒకే ఒక్క లైన్‌ను పట్టుకుని సోషల్ మీడియాలో ట్రోలింగ్ చేయడం, కేసులతో బెదిరించడం సరైన పద్ధతి కాదని ఆయన హితవు పలికారు. ఏదైనా అంశంపై అభిప్రాయాన్ని చెబితే ట్రోల్ చేయడంతో పాటు కేసులు పెట్టి చట్టప్రకారం చర్యలు తీసుకుంటామని బెదిరించడం, ప్రశ్నించే గొంతుకలను నొక్కేయడమేనని, ఇది ప్రజాస్వామ్యానికే ప్రమాదం అన్నారు.

రాజకీయ గుండాయిజంపై ప్రకాష్ రాజ్ విమర్శలు
‘మా నాయకుడిని ప్రశ్నిస్తే నాశనం చేస్తాను’ అనడం ప్రజాస్వామ్యం అనిపించుకోదని, ఇది కేవలం రాజకీయ గుండాయిజం అని నటుడు ప్రకాష్ రాజ్ జన సైనికులు, పవన్ ఫ్యాన్స్‌ను విమర్శించారు. ప్రొఫెసర్ నాగేశ్వర్ మాట్లాడిన మాటల్లో ఏదైనా తప్పు ఉందని అనిపిస్తే, దానికి ఆధారాలు అడగాలని లేదా రాజకీయంగా కౌంటర్ ఇవ్వాలని సూచించారు. కానీ వ్యక్తిత్వ హననానికి పాల్పడటం, అవమానించడం కొత్త రాజకీయ సంస్కృతిగా మారుతోందని ఆవేదన వ్యక్తం చేశారు

నిష్పాక్షిక విశ్లేషణలు గుర్తురాలేదా..
గతంలో ప్రొఫెసర్ నాగేశ్వరరావు.. చంద్రబాబు నాయుడు, పవన్ కళ్యాణ్, కెసిఆర్, జగన్ మోహన్ రెడ్డి, రేవంత్ రెడ్డి, బిజెపి వంటి అన్ని రాజకీయ శక్తులను ప్రశ్నించారని, అప్పుడు ఆయన నిజాయితీ ఎవరికీ గుర్తుకు రాలేదా అని ఈ సందర్భంగా ప్రకాష్ రాజ్ ప్రశ్నించారు. ఇప్పుడు కేవలం ఒక మాట నచ్చలేదని ఆయనపై యుద్ధం ప్రకటించడం వారి ద్వంద్వ వైఖరిని సూచిస్తుందని మండిపడ్డారు.

ప్రజాస్వామ్యానికి హెచ్చరిక
ప్రశ్నించే గొంతులను కేసులతో నోరు మూయించాలని చూడటం అత్యంత ప్రమాదకరమని, ఈరోజు నాగేశ్వరరావుకు తలెత్తిన పరిస్థితి రేపు ఇంకెవరికైనా ఎదురుకావచ్చని ఆయన హెచ్చరించారు. ప్రస్తుత రాజకీయ పరిస్థితుల్లో ఏ పార్టీ ఎవరితో పొత్తులో ఉందో అందరికీ తెలుసని, ఇలాంటి అనాగరిక చర్యలను ఆపాలని ప్రకాష్ రాజ్ కోరారు. ప్రొఫెసర్ నాగేశ్వర్‌కు మేము అండగా ఉన్నాం, మీరు మీ పనిని యథాతథంగా కొనసాగించండి అంటూ ప్రకాష్ రాజ్ తన సంఘీభావాన్ని తెలిపారు.

ప్రొఫెసర్ నాగేశ్వర్ వ్యాఖ్యలపై జనసేన ఫైర్..

ప్రొఫెసర్ నాగేశ్వర్ రావు ఏపీ డిప్యూటీ సీఎం పవన్ కళ్యాణ్ రాజకీయ ప్రస్థానంపై చేసిన కొన్ని వ్యాఖ్యలు తీవ్ర వివాదానికి దారితీశాయి. ఒక ఇంటర్వ్యూలో ఆయన మాట్లాడుతూ... గతంలో చిరంజీవి స్థాపించిన ప్రజారాజ్యం పార్టీకి, ప్రస్తుత జనసేన పార్టీకి ఉన్న పోలికలను విశ్లేషించారు. ఈ క్రమంలో పవన్ కళ్యాణ్ వైఖరి, గత ఎన్నికల ఫలితాలు, ప్రస్తుత కూటమి ప్రభుత్వంలో ఆయన పాత్రను ప్రస్తావిస్తూ చేసిన వ్యాఖ్యలు పవన్ కళ్యాణ్ వ్యక్తిత్వాన్ని, ఆయన రాజకీయాలను తక్కువ చేసి చూపేలా ఉన్నాయంటూ జనసేన వర్గాలు తీవ్ర అభ్యంతరం వ్యక్తం చేశాయి. అమిత్ షాను కలిసిన సందర్భంలో, పవన్ కళ్యాణ్, నాదెండ్ల మనోహర్‌లకు క్లాస్ పీకారని.. చంద్రబాబు ఇన్ స్టాంట్ ఫ్రెండ్, జగన్ శాశ్వత మిత్రుడు అని చేసిన వ్యాఖ్యలపై దుమారం చెలరేగింది.

Also Read: SAEL Solar Project AP: జమ్మలమడుగులో రూ.3వేల కోట్లతో SAEL సోలార్ ప్రాజెక్ట్ ప్రారంభం - ఇన్వెస్టర్లకు ఒక్క వాట్సాప్ కాల్ దూరంలోనే.. లోకేష్ కీలక వ్యాఖ్యలు!

ఈ వ్యాఖ్యల పట్ల జనసేన నాయకులు, కార్యకర్తలు, పవన్ కళ్యాణ్ అభిమానులు తీవ్ర ఆగ్రహం వ్యక్తం చేస్తూ ప్రొఫెసర్ నాగేశ్వర్‌ను సామాజిక మాధ్యమాలలో లక్ష్యంగా చేసుకున్నారు . ఆయన విశ్లేషణలు ఒక వర్గానికి కొమ్ముకాసేలా, పక్షపాత ధోరణితో ఉన్నాయని వారు మండిపడుతున్నారు. పవన్ కళ్యాణ్ సాధించిన చారిత్రాత్మక విజయాన్ని, ఆయన త్యాగాలను నాగేశ్వర్ రావు కావాలనే కించపరుస్తున్నారంటూ సోషల్ మీడియా వేదికగా పాత వీడియోలను, ట్రోల్స్‌ను షేర్ చేస్తూ పెద్ద ఎత్తున నిరసన వ్యక్తం చేస్తున్నారు. ఒక నిష్పక్షపాత విశ్లేషకుడిగా కాకుండా, రాజకీయ అజెండాతోనే నాగేశ్వర్ ఇటువంటి వ్యాఖ్యలు చేశారని జనసైనికులు ఆగ్రహం వ్యక్తం చేశారు.

తన వ్యాఖ్యలు ఉపసంహరించుకున్న ప్రొఫెసర్

పవన్ కళ్యాణ్, కేంద్ర హోంమంత్రి అమిత్ షా భేటీకి సంబంధించి తాను చేసిన వ్యాఖ్యలపై రాజకీయ దుమారం రేగడం, జనసేన నుంచి తీవ్ర నిరసనలు వ్యక్తమై కేసులు నమోదు కావడంతో ప్రొఫెసర్ కె. నాగేశ్వర్ రావు వెనక్కి తగ్గారు. వైఎస్ జగన్ అరెస్ట్ అంశంపై అమిత్ షాతో పవన్ కళ్యాణ్ చర్చించారని, ఆ సమయంలో జగన్ తమకు 'లాంగ్ టర్మ్ ఫ్రెండ్' అని అమిత్ షా అన్నారంటూ జనసేన కోర్ కమిటీ సభ్యుడి సమాచారం మేరకు తాను చేసిన వ్యాఖ్యలను ఆయన భేషరతుగా ఉపసంహరించుకున్నారు. ఈ వివాదాన్ని ఇక్కడితో ముగించాలని విజ్ఞప్తి చేశారు. పవన్ కళ్యాణ్ అంటే తనకు చాలా ఇష్టమైన వ్యక్తి అని, తనను ఎంతగానో గౌరవించే వ్యక్తి అని నాగేశ్వర్ అన్నారు.

Breaking News: భారతీయులను చూసి సభ్యత, సంస్కారం నేర్చుకోండి: అమెరికాకు ఇరాన్ కౌంటర్

Khagesh — Sat, 23 May 2026 08:50:13 +0530

Breaking News:భారత్‌లో సామాన్యుడి రవాణా బడ్జెట్‌ మరోసారి తలకిందులైంది గత పది రోజుల్లోనే చమురు సంస్థలు మూడోసారి ధరలను పెంచుతూ నిర్ణయం తీసుకున్నాయి. శనివారం ఉదయం నుంచి అమల్లోకి వచ్చిన ఈ ధరల పెంపుతో పెట్రోల్‌, డీజిల్‌ రేట్లు సరికొత్త గరిష్టాలకు చేరుకున్నాయి.

శనివారం చమురు సంస్థలు విడుదల చేసిన ప్రకటన ప్రకారం పెట్రోల్‌ లీటరుకు 87పైసలు పెరిగింది. డీజిల్‌ లీటరకు 91పైసలుపెరిగింది. సీఎన్జీ ఢిల్లీలో కిలోకు రూపాయి పెరిగింది. ఇప్పుడు అక్కడ కిలో సీఎన్జీ ధర 91.09రూపాయలుగా ఉంది. గడచిన పది రోజులను గమనిస్తే ఇంధన ధరలు మొత్తంగా లీటర్‌కు దాదాపు ఐదు రూపాయలు పెరిగాయి.

ఇంధన ధరల పెరుగుదలకు ప్రధానంగా అంతర్జాతీయ రాజకీయ, భౌగోళిక పరిస్థితులు కారణమవుతున్నాయి. పశ్చిమాశియాలో నెలకొన్న ఉద్రిక్తతలు ప్రపంచ చమురు సరఫరాపై తీవ్ర ప్రభావాన్ని చూపుతున్నాయి. ముఖ్యంగా హార్ముజ్ జలసంధి గుండా చమురు రవాణాకు అంతరాయం కలుగుతుందనే ఆందోళనలు అంతర్జాతీయ మార్కెట్‌లో ముడి చమురు ధరలు పెంచుతున్నాయి.

భారత్ తన ముడి చమురు అవసరాలలో దాదాపు 85శాతం దిగుమతులపైనే ఆధారపడుతోంది. దీని వల్ల అంతర్జాతీయ మార్కెట్‌లలో ధరలు పెరిగినప్పుడల్లా దేశీయంగా రేట్లు పెంచక తప్పడం లేదు. గతంలో క్రూడ్ ఆయిల్ ధరలు పెరిగినప్పుడు ప్రభుత్వం, చమురు సంస్థలు ఆ భారాన్ని ప్రజలపై వేయకుండా తామే భరించాయి. 2021-24 మధ్య కాలంలో చమురు సంస్థలు సుమారు 24, 500 కోట్ల నష్టాన్ని చవిచూశాయి. అలాగనే 2024-25లో ఎల్పీజీ వినియోగదారులకు ఉపశమనం కలిగించేందుకు సుమారు నలభై వేల కోట్ల భారాన్ని భరించాయి. ఈ నష్టాలను భర్తీ చేసుకునే క్రమంలో ఇప్పుడు ధరలను పెంచుతున్నట్టు తెలుస్తోంది.

ఈ వరుస ధరల పెంపు కేవలం వాహనదారులకే పరిమితం కాదు. డీజిల్ ధర పెరగడం వల్ల రవాణా,లాజిస్టిక్ ఖర్చులు పెరుగుతాయి. ఫలితంగా నిత్యావసర వస్తువుల ధరలు, కూరగాయలు, పండ్లు, ఇతర సరకుల రవాణా ఖర్చులు పెరిగి సామాన్యుడిపై భారం పడుతుంది.మల్టిపుల్ సెక్టార్లలో ఉత్పత్తి వ్యయం పెరిగి ద్రవ్యోల్బణానికి దారి తీయవచ్చు.

ప్రస్తుతం ధరలు పెరుగుతున్నప్పటికీ గత నాలుగేళ్లలో భారత్ నాలుగు సార్లు ఇంధన ధరలను తగ్గించిందని ప్రభుత్వ వర్గాలు గుర్తు చేస్తున్నాయి. ఈ ఏడాది మార్చి 27న స్పెషల్ అడిషనల్ ఎక్సైజ్ డ్యూటీని లీటర్‌కు పది రూపాయలు తగ్గించారు. దీని వల్ల డీజిల్‌పై ఎక్సైజ్ సుంకాన్ని దాదాపు సున్నాకి తీసుకొచ్చారు.

అంతర్జాతీయ మార్కెట్‌లో నెలకొన్న అనిశ్చితి తగ్గే వరకు ఇంధన ధరల్లో ఈ హెచ్చుతగ్గులు కొనసాగే అవకాశం ఉందని నిపుణులు భావిస్తున్నారు. ప్రభుత్వం ప్రత్యామ్నాయంగా ఇంధన వనరుల అన్వేషణపై దృష్టి సారించాలని ఇప్పటికే ప్రధాని మోదీ మంత్రులకు దిశానిర్దేశం చేశారు.

Petrol Price Hike May 2026: పది రోజుల్లో మూడోసారి పెరిగిన పెట్రోల్, డీజిల్ ధరలు! మీ ప్రాంతంలో రేట్లు ఎంత?

Khagesh — Sat, 23 May 2026 07:49:10 +0530

Petrol Price Hike May 2026: దేశంలో చమురు ధరల పెంపు కొనసాగుతోంది. మే నెలలో సామాన్యుడిపై మరోసారి భారం పడింది. శనివారం (మే 23, 2026) దేశవ్యాప్తంగా పెట్రోల్, డీజిల్ ధరలను చమురు సంస్థలు పెంచాయి. గత పది రోజుల్లోనే ధరలు పెరగడం ఇది మూడోసారి. అంతర్జాతీయ మార్కెట్‌లో ముడి చమురు ధరలు పెరగడం, పశ్చిమ ఆసియాలో నెలకొన్న ఉద్రిక్తతలకు పుల్‌స్టాప్ పడలేదని ఇలా పెట్రోల్ ధరలు పెంచుతున్నారు.

నేటి తాజా ధరలు ఇవే

దేశ రాజధాని ఢిల్లీలో పెట్రోల్ ధర లీటరుకు 87 పైసలు, డీజిల్ ధర 91 పైసలు పెరిగింది. దీంతో ఢిల్లీలో పెట్రోల్ ధర రూ. 98.64 నుంచి రూ. 99.51కి, డీజిల్ ధర రూ.91.58 నుంచి రూ. 92.49కి చేరింది.

ప్రధాన నగరాల్లో పెట్రోల్, డీజిల్ ధరలు (లీటరుకు):

హైదరాబాద్‌: పెట్రోల్ రూ. 111.88 (+0.87), డీజిల్ రూ. 99.95 (+0.91).

ముంబై: పెట్రోల్ రూ. 108.49 (+0.87), డీజిల్ రూ. 95.02 (+0.91).

కోల్‌కతా: పెట్రోల్ రూ. 110.64 (+0.87), డీజిల్ రూ. 97.02 (+0.91).

చెన్నై: పెట్రోల్ రూ. 105.31 (+0.87), డీజిల్ రూ. 96.98 (+0.91).

గురుగ్రామ్: పెట్రోల్ రూ. 100.38 (+0.87), డీజిల్ రూ. 92.92 (+0.91).

నోయిడా: పెట్రోల్ రూ. 98.78 (+0.87), డీజిల్ రూ. 93.12 (+0.91).

గత 10 రోజుల్లో ఏం జరిగింది?

ఈ నెలలో పెట్రోల్ ధరల బాదుడు మే 16న ప్రారంభమైంది. ఆ రోజు పెట్రోల్, డీజిల్ ధరలు ఏకంగా లీటరుకు రూ. 3 వరకు పెంచారు. ఆ తర్వాత మే 19న మెట్రో నగరాల్లో మరో 90 పైసలు పెరిగాయి. తాజా పెరుగుదలతో కలిపి చూస్తే, గత పది రోజుల్లోనే ఇంధన ధరలు దాదాపు రూ.5 మేర పెరిగాయి. కేవలం పెట్రోల్, డీజిల్ ధరలే కాకుండా ఇటీవలి రోజుల్లో సిఎన్‌జి (CNG), పిఎన్‌జి (PNG) ధరలు కూడా పలు నగరాల్లో పెరిగాయి.

ధరలు ఎందుకు పెరుగుతున్నాయి?

అంతర్జాతీయ ముడి చమురు ధరలు పెరగడంతో ఇలా ధరలు పెంచుతున్నారు. ప్రపంచ మార్కెట్‌లో క్రూడ్ ఆయిల్ ధరలు నిలకడగా పెరుగుతున్నాయి. దీంతో ప్రభుత్వ రంగ చమురు సంస్థలు ఈ నిర్ణయం తీసుకున్నాయి. వెస్ట్ ఆసియాలో నెలకొన్న భౌగోళిక రాజకీయ ఉద్రిక్తతలు సరఫరాపై తీవ్ర ప్రభావం చూపుతున్నాయి. భారత్ తన ముడి చమురు అవసరాల కోసం దాదాపు 85 శాతం దిగుమతులపైనే ఆధారపడుతోంది. దీనివల్ల అంతర్జాతీయ మార్కెట్‌లో ఏ చిన్న మార్పు వచ్చినా, అది మన దేశీయ ధరలపై ప్రభావం చూపుతుంది

సామాన్యుడిపై ప్రభావం

వరుసగా పెరుగుతున్న ఇంధన ధరలు అన్ని రంగాలపై ప్రభావం చూపే అవకాశం ఉంది.
రవాణా, లాజిస్టిక్స్ ఖర్చులు పెరుగుతాయి. దీంతో నిత్యావసర వస్తువులు, పండ్లు, కూరగాయల ధరలు పెరిగే ప్రమాదం ఉంది. రవాణా భారం పెరిగితే అది చివరకు సామాన్య వినియోగదారుడిపైనే పడుతుంది, దీనివల్ల ద్రవ్యోల్బణం పెరిగే అవకాశం ఉంది. మే నెలలో మూడోసారి జరిగిన ఈ ధరల పెంపు మధ్యతరగతి జీవి బడ్జెట్‌ను అస్తవ్యస్తం చేస్తోంది.

Heatwave deaths Telangana AP:అగ్ని గుండంలా తెలుగు రాష్ట్రాలు! వడదెబ్బకు పోతున్న ప్రాణాలు! రికార్డులు తిరగరాస్తున్న ఉష్ణోగ్రతలు!

Khagesh — Sat, 23 May 2026 06:19:01 +0530

Heatwave deaths Telangana AP:తెలుగు రాష్ట్రాల్లో సూరీడు ప్రతాపం చూపిస్తున్నాడు. ఆకాశం నుంచి నిప్పుల వర్షం కురుస్తోంది. ఈ దెబ్బకు ప్రజలు విలవిలలాడిపోతున్నారు. గత 24 గంటల్లోనే వడదెబ్బ ప్రభావంతో ఆంధ్రప్రదేశ్ తెలంగాణ రాష్ట్రాల్లో పదుల సంఖ్యలో మరణాలు సంభవించాయి. ఎన్నడూ లేని విధంగా మే నెలలో ఉష్ణోగ్రతలు రికార్డు స్థాయిలో నమోదు అవుతున్నాయి.

ఆంధ్రప్రదేశ్‌లో సూరీ ఊచకోత

ఆంధ్రప్రదేశ్‌లో శుక్రవారం ఒక్క రోజు వడబెద్దకు 21 మంది మరణించారు. ఇందులో అత్యధికంగా విజయవాడలోనే ఉన్నారు. ఇక్కడ పది మంది మరణించారు. మృతుల్లో ఎనిమిది మంది యాచచకులే. రోడ్డు పక్కన, పార్కుల వద్ద అపస్మారక స్థితిలో పడి ఉన్న వీరిని ఆసుపత్రికి తరలించే లోపే ప్రాణాలు కోల్పోయారు. ఇక ఏలూరులో ముగ్గురు, కాకినాడలో ముగ్గురు, పల్నాడులో ఇద్దరు, అనకాపల్లి, పశ్చిమ గోదావరి జిల్లాల్లో ఒక్కొక్కరు చొప్పున మరణించారు.

తెలంగాణ నిప్పుల కొలిమి

తెలంగాణలో ఎండల తీవ్రత మరింత భీకరంగా ఉంది. రాష్ట్రవ్యాప్తంగా వడ దెబ్బతో 34మంది మరణించినట్టు తెలుస్తోంది. దాదాపు ఇరవైకిపైగా జిల్లాల్లో 46 డిగ్రీలపైగా ఉష్ణోగ్రతలు నమోదు అయ్యాయి. కుమురం భీం ఆసీఫాబాద్‌ జిల్లాలోని సిర్పూర్(టి)లో అత్యధికంగా 46.5 డిగ్రీల సెల్సియస్‌ ఉష్ణోగ్రత నమోదు అయ్యింది.

ఎందుకు ఈ పరిస్థితి

ప్రస్తుతం మనం చూస్తున్న ఈ ఎండలు కేవలం వేసవి ప్రభావం మాత్రమే కాదు. హిందూ మహాసముద్రంలో వేడి పెరగడం వల్ల ఏర్పడే ఎల్‌నినో ప్రభావంతో వడగాలుల సంఖ్య, వాటి వ్యవధి పెరుగుతోంది. నగరాల్లో కాంక్రీట్ కట్టడాలు, వాహనాల వినియోగం వల్ల వేడి గాలి బయటకు వెళ్లకుండా అక్కడే నిలిచిపోతోంది. ఫలితంగా నగరాల్లో ఉష్ణోగ్రతలు గ్రామీణ ప్రాంతాల కంటే రెండు నుంచి పది డిగ్రీలు ఎక్కువగా ఉంటున్నాయి.

మీ గుండె భద్రం

రాజస్థాన్, పంజాబ్ ఎడారి ప్రాంతాల నుంచి వీస్తున్న పొడి వేడి గాలుల మధ్య భారతంతోపాటు తెలుగు రాష్ట్రాలపై తీవ్ర ప్రభావం చూపుతున్నాయి. సాధారణంగా రాత్రి పూట చల్లబడాల్సిన వాతావరణం, ప్రస్తుతం 24-30 డిగ్రీల కంటే ఎక్కువగా నమోదు అవుతోంది. ఇది మానవుల గుండపై తీవ్ర ఒత్తిడి పెంచుతుంది.

మరో నాలుగు రోజులు ఇదే తంతు

వాతావరణ శాఖ హెచ్చరికల ప్రకారం రాబోయే నాలుగు రోజులు అత్యంత కీలకం. అందుకే తెలంగాణలోని 18 జిల్లాలు వాతావరణ శాఖ రెడ్ అలర్ట్ జారీ చేసింది. శని, ఆదివారాల్లో కూడా ఉష్ణోగ్రతలు 46 డిగ్రీల వరకు నమోదు అయ్యే ఛాన్స్ ఉంది. మధ్యాహ్నం 11 నుంచి సాయంత్ర నాలుగు గంటల వరకు ప్రజలు బయటకు రావద్దని సూచించారు.

ఎండల వల్ల కేవలం ప్రాణ నష్టమే కాదు ఆస్తి నష్టం కూడా జరుగుతోంది. భద్రాద్రి కొత్తగూడెం జిల్లాలో ఎండ తీవ్రతకు రోడ్డుపై వెళ్తున్న స్కూటీ మంటల్లో చిక్కుకుంది. జనగామా జిల్లాలో ఎండల వల్ల పంట పొలాల్లో మంటలు చెలరేగాయి. ధాన్యం కుప్పలు బూడిద అయ్యాయి. ఎండల వల్ల ఏసీలు, కూలర్ల వాడకం పెరిగింది. ఆంధ్రప్రదేశ్‌లో గ్రిడ్‌ డిమాండ్ రికార్డు స్థాయిలో 15, 016 మెగావాట్లకు చేరింది.

ప్రకృతి వైపరిత్యాలు మన చేతల్లో లేకపోయినా, అప్రమత్తతతో ప్రాణనష్టాన్ని తగ్గించవ చ్చు. ముఖ్యంగా బాలింతలు, గర్భిణులు, వృద్ధులు ఈ ఎండల పట్ల అత్యంత జాగ్రత్తగా ఉండాలి.