గుంటూరు: గత వైసీపీ ప్రభుత్వ హయాంలో జరిగిన అక్రమ మద్యం సరఫరా వ్యవహారానికి సంబంధించిన కేసులో వైఎస్సార్‌సీపీ నేత, మాజీ మంత్రి అంబటి రాంబాబుకు ఎన్‌ఫోర్స్‌మెంట్ డైరెక్టరేట్ నోటీసులు జారీ చేసింది. విచారణకు హాజరుకావాల్సిందిగా ఈ నెల 11వ తేదీన ఈడీ అధికారులు ఆయనకు ఫోన్ ద్వారా సమాచారం అందించారు. ఈ విచారణ నిమిత్తం ఆయన తప్పనిసరిగా ఈడీ కార్యాలయానికి రావాలని అధికారులు స్పష్టం చేశారు.

Continues below advertisement

అయితే, ఈడీ అధికారుల నుంచి తనకు ఇప్పటివరకు ఎలాంటి నోటీసులు గానీ, సమాచారం గానీ అందలేదని మాజీ మంత్రి అంబటి రాంబాబు పేర్కొన్నారు. ఇప్పటికే ఆయనపై పలు కేసులు నమోదైన నేపథ్యంలో ఈ తాజా పరిణామం ప్రాధాన్యత సంతరించుకుంది. అయితే ఏ కేసులో విచారణకు హాజరుకావాలో తనకు చెప్పలేదన్నారు. కాగా, అంబటి రాంబాబుపై రాజకీయ కక్షసాధింపులో భాగంగానే మరో కేసు నమోదు చేసేందుకు కూటమి ప్రభుత్వం ప్రయత్నిస్తోందని వైఎస్సార్‌సీపీ నేతలు ఆరోపిస్తున్నారు.

మాజీ మంత్రి కారుమూరికి ఈ 25 వరకు రిమాండ్ పొడిగింపు

Continues below advertisement

ఏపీ లిక్కర్ రవాణా స్కాం కేసులో మాజీ మంత్రి, వైసీపీ నేత కారుమూరి నాగేశ్వరరావును సిట్ అధికారులు చంచల్‌గూడ జైలు నుంచి విజయవాడ ఏసీబీ కోర్టులో హాజరుపరిచారు. కోర్టు ఆయన రిమాండ్‌ను సెప్టెంబర్ 25 వరకు పొడిగించడం తెలిసిందే. గత వైసీపీ ప్రభుత్వ హయాంలో ఆంధ్రప్రదేశ్ స్టేట్ బెవరేజెస్ కార్పొరేషన్ లిమిటెడ్ (APSBCL) ద్వారా జరిగిన మద్యం రవాణా టెండర్లలో నిబంధనలు ఉల్లంఘించి రాష్ట్ర ప్రభుత్వ ఖజానాకు రూ.195.33 కోట్ల నష్టం చేకూర్చారని ఈడీ పేర్కొంది. కిలోమీటర్‌కు రూ.13 చెల్లించాల్సి ఉండగా, టెండర్ నిబంధనలు మార్చి రూ.35 వరకు చెల్లించినట్లు ఆరోపణలు ఉన్నాయి.

పౌరసరఫరాల శాఖ మంత్రిగా ఉన్న సమయంలో కారుమూరి నాగేశ్వరరావు తన అధికారాన్ని ఉపయోగించి కుమారుడు సునీల్ కుమార్, ఆయన భాగస్వాములకు సబ్‌కాంట్రాక్టులు దక్కేలా చేశారని ఈడీ పేర్కొంది. ఈ వ్యవహారంలో హవాలా ద్వారా కారుమూరికి రూ.15 కోట్లు చేరినట్లు ఆధారాలు సేకరించింది. ఈ కేసులో కారుమూరితో పాటు ఆయన కుమారుడు సునీల్, ఏపీఎస్‌బీసీఎల్ మాజీ ఎండీ వాసుదేవ రెడ్డి, కసిరెడ్డి రాజశేఖర్ రెడ్డిలను ఇప్పటికే అరెస్ట్ చేయగా, కారుమూరి కుటుంబానికి చెందిన రూ.87.7 కోట్ల ఆస్తులను ఈడీ జప్తు చేయడం తెలిసిందే.