Andhra Pradesh Rainfall: ఏపీలో 51 శాతం, కృష్ణా డెల్టాలో 49 శాతం లోటు వర్షపాతం.. రైతులకు ఈఎన్సీ కీలక సూచనలు

Union Cabinet Decisions: రైతులకు కేంద్రం గుడ్‌న్యూస్.. కనీస మద్దతు ధర పెంపు, ఏ పంటకు ఎంత

Shankar Dukanam — Wed, 30 Sep 2026 15:57:45 +0530

Union Cabinet Decisions | న్యూఢిల్లీ: కేంద్ర ప్రభుత్వం రైతులకు శుభవార్త చెప్పింది. కేంద్ర మంత్రివర్గ సమావేశంలో నరేంద్ర మోదీ ప్రభుత్వం పలు కీలక నిర్ణయాలు తీసుకుంది. ఇందులో భాగంగా రబీ పంటలకు సంబంధించి 2027-28 సీజన్‌కు మద్దతు ధరను (MSP) నిర్ణయించింది. గోధుమలు, బార్లీ (జౌ), శనగలు, ఆవాలు, పొద్దుతిరుగుడు (కుసుమ), మసూర్ (కందులు/చిరుధాన్యాల రకం) పంటల కనీస మద్దతు ధరను కేంద్ర ప్రభుత్వం పెంచింది. గోధుమలపై క్వింటాలుకు రూ.25 పెంచారు.

కేంద్ర మంత్రి అశ్విని వైష్ణవ్ మాట్లాడుతూ.. కనీస మద్దతు ధరలో (MSP) అత్యధికంగా కుసుమ పంటకు క్వింటాలుకు ₹675 చొప్పున పెంపుదల చేశారు. ఆ తర్వాత రేప్‌సీడ్, ఆవాలకు క్వింటాలుకు ₹413 చొప్పున పెంచారు. మసూర్ పంటకు క్వింటాలుకు ₹390, బార్లీకి (జౌ) క్వింటాలుకు ₹136, శనగలకు క్వింటాలుకు ₹83, గోధుమలకు క్వింటాలుకు 25 చొప్పున పెంచారు.

నిర్ణయించిన కనీస మద్దతు ధరల (MSP) వివరాలు
గోధుమలు: క్వింటాలుకు ₹2,610
శనగలు: క్వింటాలుకు ₹5,928
బార్లీ (జౌ): క్వింటాలుకు ₹2,286
మసూర్: క్వింటాలుకు ₹7,390
ఆవాలు: క్వింటాలుకు ₹6,613
పొద్దుతిరుగుడు (Safflower) క్వింటాలుకు: ₹7,215

ఢిల్లీ ట్రాఫిక్ నిర్వహణను మెరుగు చేయడం కోసం 'ఇంటెలిజెంట్ ట్రాఫిక్ మేనేజ్‌మెంట్ సిస్టమ్' (ITMS) తీసుకురావాలని కేంద్ర కేబినెట్ నిర్ణయం తీసుకుంది. ప్రస్తుతం 1,529 ట్రాఫిక్ సిగ్నల్స్ స్థిరమైన మ్యాన్యువల్ పద్ధతిలో ఉన్నాయి. అయితే ITMS వచ్చిన తర్వాత ఈ సిగ్నల్స్ ట్రాఫిక్ రద్దీకి తగ్గట్లుగా సిగ్నల్ సమయాన్ని అవే అడ్జస్ట్ చేసుకుంటాయి. దీనిని మూడు విడతలలో (ఫేజ్‌లలో) అమలు చేయనున్నామని తెలిపారు. వేర్వేరు కారిడార్లలో వేర్వేరు సమయాల్లో ఈ పద్ధతిని అమలు చేస్తారు. ఇందుకోసం కేంద్రం 1,790 కోట్ల రూపాయలు ఖర్చు చేయనుందని తెలిపారు. బ్యాటరీ ఎనర్జీ స్టోరేజ్‌తో కలిపి రైన్యూవబుల్ ఎనర్జీ సరఫరా చేయడం కోసం 1.86 లక్షల కోట్ల అంచనాతో కూడిన 'గ్రీన్ ఎనర్జీ కారిడార్ ఫేజ్ III' పథకానికి కూడా మోదీ కేబినెట్ ఆమోదం తెలిపింది.

దేశంలో శాస్త్రీయ పరిశోధనలు, వినూత్న ఆవిష్కరణలు, సాంకేతిక అభివృద్ధి కోసం కేంద్ర ప్రభుత్వం ‘పీఎం ధార’ పథకాన్ని తీసుకొచ్చింది. రూ. 1,86,405 కోట్లను ఈ పథకానికి కేటాయిస్తూ నిర్ణయం తీసుకుంది.

Atchannaidu: జలధార జలహారతితో 79,826 పనులు పూర్తి.. భూగర్భ జలాలు 0.79 మీటర్లు పెరుగుదల: అచ్చెన్నాయుడు

Shankar Dukanam — Fri, 18 Sep 2026 17:46:39 +0530

Andhra Pradesh Top News | అమరావతి: ఎల్‌నినో వల్ల ఎదురయ్యే వర్షాభావ పరిస్థితులను ముందుగానే అంచనా వేసి, రైతులను, పంటలను కాపాడేందుకుఏపీ ప్రభుత్వం సమగ్ర కార్యాచరణ చేపట్టిందని రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు తెలిపారు. ఎల్‌నినోను ఎదుర్కొనేందుకు తాము ముందస్తు చర్యలు చేపడుతుంటే, మాజీ ముఖ్యమంత్రి వైఎస్ జగన్‌మోహన్‌రెడ్డి ప్రజలను తప్పుదోవ పట్టించేలా దుష్ప్రచారం చేస్తున్నారని మండిపడ్డారు. ఏపీ సీెం నారా చంద్రబాబు నాయుడు ఏప్రిల్ 2026లోనే ‘జలధార’ కార్యక్రమంపై సమీక్ష నిర్వహించారని తెలిపారు. క్షేత్రస్థాయి చర్యల ఫలితంగా ఏపీలో భూగర్భ జలాలు 0.79 మీటర్లు పెరిగాయని, ప్రస్తుతం 625 టీఎంసీల భూగర్భ జలాలు అందుబాటులో ఉన్నాయని వెల్లడించారు. ‘జలధార–జలహారతి’ కార్యక్రమం కింద రూ.3,409.35 కోట్ల వ్యయంతో 79,826 పనులను కూటమి ప్రభుత్వం పూర్తి చేసిందన్నారు.

రెండేళ్లు ఖరీఫ్ ప్రీమియం ఎగ్గొట్టిన జగన్ సర్కార్

పంటల బీమా గురించి మాట్లాడే నైతిక అర్హత జగన్‌కు లేదని మంత్రి అచ్చెన్నాయుడు తీవ్రస్థాయిలో ధ్వజమెత్తారు. వైసీపీ ఐదేళ్ల పాలనలో ఖరీఫ్‌లో మూడేళ్లు మాత్రమే ప్రీమియం చెల్లించి రెండేళ్లు వదిలేశారని, రబీకి ఒక్క ఏడాది కూడా ఇన్సూరెన్స్ కట్టలేదని ఎద్దేవా చేశారు. ఆ బకాయిల భారాన్ని ఇప్పుడు కూటమి ప్రభుత్వం చెల్లిస్తూ రైతులకు రక్షణ కల్పిస్తోందన్నారు. దేశంలోనే పంటల బీమా నమోదులో ఆంధ్రప్రదేశ్ అగ్రస్థానంలో నిలిచిందని, బీమా నిధులను ఎస్క్రో ఖాతాలో అందుబాటులో ఉంచడం ద్వారా తొలిసారిగా రూ.16 వేల కోట్ల విలువైన పంటలకు బీమా నమోదు జరిగిందన్నారు.

రాష్ట్రంలో జూన్ నుంచి ఆగస్టు కాలంలో సాధారణ వర్షపాతం 350 మి.మీ. కాగా 170.9 మి.మీ. మాత్రమే నమోదు కావడంతో ఈ ఏడాది 51.2 శాతం వర్షపాత లోటు ఏర్పడిందని తెలిపారు. ఎల్‌నినో ప్రభావాన్ని ఎదుర్కొనేందుకు ఫిబ్రవరి 2026 నుంచే ముందస్తు కార్యాచరణను ప్రారంభించి, శాస్త్రీయ సమాచారం, శాటిలైట్ పర్యవేక్షణ ఆధారంగా పంచసూత్రాలను అమలు చేస్తున్నామని అచ్చెన్నాయుడు తెలిపారు. 8,489 రైతు సేవా కేంద్రాల (RSK) పరిధిలో 1,357 RSKలను హై రిస్క్‌గా, 2,077 RSKలను మోడరేట్ రిస్క్‌గా గుర్తించామని చెప్పారు. వర్షాధార ప్రాంతాల్లో PMDS, సీడ్ పెల్లెటింగ్‌ను ప్రోత్సహిస్తూ 23 లక్షల మంది రైతులు 25 లక్షల ఎకరాల్లో ఈ విధానాలను అనుసరిస్తున్నారని తెలిపారు. నీటి లభ్యతకు అనుగుణంగా వరికి ప్రత్యామ్నాయంగా పప్పుధాన్యాలు, చిరుధాన్యాలను ప్రోత్సహిస్తున్నామని పేర్కొన్నారు.

ఆగస్టు 7, 2026న ప్రారంభించిన ‘రైతన్న మీ కోసం–El Nino Mitigation Plan’ ద్వారా 46.86 లక్షల మంది రైతులకు సంబంధించిన 2.75 కోట్ల కమతాలను పరిశీలిస్తూ ప్రతి కమతానికి ప్రత్యేక సలహాలు అందిస్తున్నామని పేర్కొన్నారు. పంటల బీమా దరఖాస్తులను 2025లో 19.5 లక్షల నుంచి 2026లో 35.15 లక్షలకు పెంచామని, రుణం లేని రైతుల సంఖ్యను 2 లక్షల నుంచి 27.5 లక్షలకు పెంచామని తెలిపారు. అలాగే, నిబంధనలకు అనుగుణంగా యానిమల్ షెల్టర్ల సంఖ్యను గత ఏడాది ఉన్న 15,303 నుంచి ఈ ఏడాది 20,000కు పెంచే లక్ష్యంతో పనిచేస్తున్నామని వివరించారు.

వైసీపీ హయాంలో వ్యవసాయ అభివృద్ధిపై జగన్ కనీసం ఒక్క సమీక్షా నిర్వహించలేదని, కూటమి ప్రభుత్వంలో ముఖ్యమంత్రి చంద్రబాబు అధ్యక్షతన నెలకు రెండుసార్లు వ్యవసాయ రంగాన్ని సమీక్షిస్తున్నామని తెలిపారు. నీటి వనరుల సంరక్షణకు ప్రాధాన్యమిచ్చే చంద్రబాబును ‘వాటర్ మ్యాన్’ అని పిలుస్తారన్నారు. వైసీపీ హయాంలో నిర్లక్ష్యానికి గురైన మైక్రో ఇరిగేషన్ బకాయిలు రూ.1,100 కోట్లను కూటమి ప్రభుత్వం చెల్లిస్తూ డ్రిప్ ఇరిగేషన్‌లో ఏపీని దేశంలోనే అగ్రస్థానంలో నిలిపిందన్నారు. రాయలసీమను ‘రతనాల సీమ’గా మార్చేందుకు కేంద్ర అనుమతులతో రూ.40 వేల కోట్ల ప్రభుత్వ, రూ.60 వేల కోట్ల ప్రైవేట్ పెట్టుబడులతో మొత్తం రూ.1 లక్ష కోట్లతో హార్టికల్చర్ హబ్ ఏర్పాటు చేస్తున్నామని తెలిపారు.

వర్షాభావ పరిస్థితులను తట్టుకునేందుకు మొదటి విడతలో 47,321 క్వింటాళ్ల విత్తనాలు, ఆగస్టు 15 తర్వాత అదనపు అవసరాల కోసం మరో 1.12 లక్షల క్వింటాళ్ల విత్తనాలను సిద్ధం చేశామని మంత్రి అచ్చెన్నాయుడు తెలిపారు. ఆగస్టు 3 నుంచే ‘రైతన్నా మీకోసం’ వారోత్సవాల ద్వారా ప్రత్యామ్నాయ పంటలపై అవగాహన కల్పిస్తున్నాం.. 6.30 లక్షల హెక్టార్లలో PMFBY, RWBCIS కింద బీమా కవరేజీ కల్పించడంతో పాటు వరి బీమా నమోదు గడువును ఆగస్టు 31 వరకు పొడిగించామని పేర్కొన్నారు. రాష్ట్రంలో ప్రస్తుతం 5 నెలలకు సరిపడా పశుగ్రాసం అందుబాటులో ఉందని, కొరత ఉన్న ప్రాంతాలకు తరలించేందుకు స్పష్టమైన ట్రాన్స్‌పోర్ట్ ప్లాన్ సిద్ధం చేశామన్నారు. వైసీపీ పాలనలో తెలంగాణ అక్రమ ప్రాజెక్టులు నిర్మిస్తున్నప్పుడు మౌనంగా ఉన్న జగన్, ఇప్పుడు ప్రభుత్వంపై అసత్యాలు ప్రచారం చేస్తున్నారని, చంద్రబాబు నాయకత్వంలో ప్రతి రైతును, ప్రతి పంటను కాపాడటమే తమ ప్రభుత్వ లక్ష్యమని వ్యవసాయశాఖ మంత్రి స్పష్టం చేశారు.

Most Sugar Produced States: భారత్‌లో అత్యధికంగా చక్కెర ఉత్పత్తి చేసే టాప్ 5 రాష్ట్రాల జాబితా

Shankar Dukanam — Sun, 23 Aug 2026 07:55:15 +0530

Sugar Production: భారత్‌లో పండుగల సీజన్‌కు ముందు చక్కెర ధరల్లో భారీ పెరుగుదల కనిపించింది. గత 1 నెలలో చక్కెర రిటైల్ ధర సుమారు ₹48.18 నుంచి పెరుగుతూ ఏకంగా కేజీ ₹65కు చేరింది. అంటే కిలోకు దాదాపు 17 రూపాయలు పెరిగి సామాన్యులకు షాకిచ్చింది. పెరుగుతున్న ధరల మధ్య దేశంలో చక్కెర ఉత్పత్తిపైనా ఎక్కువ ఫోకస్ చేస్తున్నారు. దేశంలో ఏ రాష్ట్రాలు అత్యధికంగా చక్కెరను ఉత్పత్తి చేస్తాయి వివరాలు ఇక్కడ తెలుసుకుందాం.

భారత్‌లో చక్కెర ఉత్పత్తి

వస్త్ర పరిశ్రమ తర్వాత దేశంలో రెండో అతిపెద్ద వ్యవసాయ ఆధారిత పరిశ్రమ భారత చక్కెర పరిశ్రమ. ఇది లక్షలాది మంది రైతులు, గ్రామీణ కార్మికులకు ఉపాధి కల్పిస్తుంది. మహారాష్ట్ర, ఉత్తరప్రదేశ్ చక్కెర ఉత్పత్తిలో అగ్రస్థానం కోసం పోటీ పడుతుంటాయి. కానీ వాటి వ్యవసాయ పరిస్థితులు, వాతావరణం, చక్కెర మిల్లుల నిర్మాణం భిన్నంగా ఉంటాయి. 2025-26 చక్కెర సీజన్‌కు దేశ మొత్తం చక్కెర ఉత్పత్తి సుమారు 30.6 మిలియన్ మెట్రిక్ టన్నులుగా అంచనా వేస్తున్నారు.

మహారాష్ట్ర

చక్కెర ఉత్పత్తిలో భారత్‌లో ప్రస్తుతం మహారాష్ట్ర అగ్రస్థానంలో ఉంది. ప్రస్తుత సీజన్‌లో రాష్ట్రంలో 200కు పైగా చక్కెర మిల్లులు పనిచేస్తున్నాయి. మహారాష్ట్రకు ఉన్న అతిపెద్ద ప్రయోజనం దాని ఉష్ణమండల, సముద్రతీర వాతావరణం. సరైన ఉష్ణోగ్రత, తేమ ఉంటే చెరకు ఎండిపోకుండా బాగా పెరగడానికి సహాయపడుతుంది. రాష్ట్రంలో శీతాకాలం ప్రభావం తక్కువగా ఉంటుంది. పంటలకు సూర్యకాంతి కూడా బాగా లభిస్తుంది. దీంతో చెరకులో సుక్రోజ్ పరిమాణం పెరగడానికి దోహదం చేస్తుంది. మహారాష్ట్రలో సుమారు 9.92 మిలియన్ మెట్రిక్ టన్నుల ఉత్పత్తి అవుతుంది.

మహారాష్ట్ర సహకార చక్కెర మిల్లు మోడల్ మరో పెద్ద బలం. ఇందులో రైతులు పరిశ్రమ నిర్వహణలో ప్రత్యక్ష పాత్ర పోషిస్తారు. ప్రధాన చక్కెర ఉత్పత్తి కేంద్రాల్లో పుణే, సతారా, అహ్మద్‌నగర్, కొల్హాపూర్, సొలాపూర్ ఉన్నాయి.

ఉత్తరప్రదేశ్

ఉత్తరప్రదేశ్‌ను తరచుగా భారతదేశ చక్కెర గిన్నె (Sugar Bowl of India) అని పిలుస్తారు. ఇక్కడ సుమారు 8.92 మిలియన్ మెట్రిక్ టన్నుల ఉత్పత్తి అవుతుంది. దేశంలో చెరకు సాగు విస్తీర్ణం అత్యధికంగా ఇక్కడే జరుగుతుంది. కొన్ని సీజన్లలో తయారైన చక్కెర ఉత్పత్తిలో మహారాష్ట్ర ముందుంటుంది. కానీ సాగు విస్తీర్ణం పరంగా ఉత్తరప్రదేశ్ దేశంలో అతిపెద్ద చెరకు ఉత్పత్తి రాష్ట్రంగానే నిలుస్తోంది.

రాష్ట్రంలోని సారవంతమైన గంగా-యమునా మైదానాలు చెరకు సాగు కోసం అద్భుతమైన పరిస్థితులను అందిస్తాయి. అయితే ఉత్తరప్రదేశ్ వాతావరణం సబ్-ట్రాపికల్. ఇక్కడ వేసవులు చాలా వేడిగా, శీతాకాలంలో అతి చల్లగా ఉంటుంది. ఈ పరిస్థితులు చెరకు పక్వానికి వచ్చే కాలం, చక్కెర రికవరీ రేటును ప్రభావితం చేసే ఛాన్స్ ఉంది.

మహారాష్ట్రకు భిన్నంగా, అక్కడ ప్రభుత్వ సహకార సంఘాల పాత్ర అధికంగా ఉంటుంది. ఉత్తరప్రదేశ్ చక్కెర పరిశ్రమలో పెద్ద ప్రైవేట్ చక్కెర మిల్లులకు పట్టు ఉంది. ప్రధాన ఉత్పత్తి క్లస్టర్లలో మీరట్, ముజఫర్‌నగర్, బిజ్నోర్, సహారన్‌పూర్, గోరఖ్‌పూర్ ఉన్నాయి.

కర్ణాటక

దేశంలోని ప్రధాన చక్కెర ఉత్పత్తి రాష్ట్రాల్లో కర్ణాటక మూడో స్థానంలో ఉంది. ఇక్కడ సుమారు 4.71 మిలియన్ మెట్రిక్ టన్నుల ఉత్పత్తి చేస్తున్నారు. దేశంలోని అత్యంత ముఖ్యమైన షుగర్ హబ్‌లలో ఒకటి. చెరకు సాగు వివిధ వాతావరణ పరిస్థితులు ఉన్న ప్రాంతాల్లో జరుగుతుంది. ఉత్తర కర్ణాటక, ముఖ్యంగా బెలగావి, బాగల్‌కోట్ వంటి ప్రాంతాల్లో పొరుగున ఉన్న మహారాష్ట్రలాంటి వాతావరణ పరిస్థితులు ఉండటం కలిసొస్తుంది. దక్షిణ ప్రాంతాలకు కావేరీ బేసిన్ నుంచి నీటి లభ్యత ప్రయోజనకరం.

రాష్ట్రంలోని చక్కెర మిల్లులు వేగంగా మోడ్రన్ టెక్నాలజీ స్వీకరించాయి. అనేక మిల్లులు చక్కెర ఉత్పత్తితో పాటు ఇథనాల్ తయారీ, విద్యుత్ ఉత్పత్తి కూడా చేస్తాయి. దీంతో చెరకు నుంచి రైతులకు అదనపు ఆదాయం లభిస్తోంది.

గుజరాత్

దేశంలోని ప్రధాన చక్కెర ఉత్పత్తి రాష్ట్రాల్లో గుజరాత్ నాలుగో స్థానంలో ఉంది. గుజరాత్‌లో సుమారు 1.1 మిలియన్ మెట్రిక్ టన్నుల ఉత్పత్తి జరుగుతుంది. రాష్ట్ర చక్కెర పరిశ్రమ వ్యవసాయంలో వ్యవస్థీకృత పద్ధతులు, సహకార చక్కెర మిల్లుల నెట్‌వర్క్‌కు ప్రసిద్ధి. చెరకు ఉత్పత్తి ప్రధానంగా దక్షిణ గుజరాత్‌లోని మైదాన, తీర ప్రాంతాల్లో చేస్తారు. సహకార సంస్థలు రైతులను చక్కెర మిల్లులతో అనుసంధానించడంలో చెరకు ప్రాసెసింగ్ నిర్వహణలో కీలక పాత్ర పోషిస్తాయి.

తమిళనాడు

చెరుకు ఉత్పత్తిలో తమిళనాడు టాప్-5 రాష్ట్రాల జాబితాలో ఉంది. రాష్ట్రంలో సుమారు 0.9 మిలియన్ మెట్రిక్ టన్నుల ఉత్పత్తి జరుగుతుంది. రాష్ట్రంలోని వేడి వాతావరణం కారణంగా సంవత్సరంలో చాలా కాలం చెరకు సాగు, క్రషింగ్ పనులు కొనసాగుతుంటాయి. అనేక ప్రాంతాల్లో రైతులు సాగునీటిని మెరుగ్గా వినియోగించుకోవడానికి, చెరకు దిగుబడిని పెంచడానికి ఆధునిక పద్ధతులు, డ్రిప్ ఇరిగేషన్‌ను ఉపయోగిస్తున్నారు. ఈ విధానాలు తమిళనాడును దేశంలోని ప్రధాన చక్కెర ఉత్పత్తి రాష్ట్రాల్లో టాప్ 5లో నిలుపుతున్నాయి.

Sugar From 1 Quintal Sugarcanes: ఒక క్వింటా చెరకు నుంచి ఎంత చక్కెర ఉత్పత్తి అవుతుంది? తయారీ ప్రక్రియ ఎలా ఉంటుంది?

Khagesh — Sat, 22 Aug 2026 09:19:23 +0530

Sugar From 1 Quintal Sugarcanes: చెరకు భారత్‌లోని అతిపెద్ద వాణిజ్య పంటలలో ఒకటిగా చెబుతారు. దేశవ్యాప్తంగా చాలా మంది రైతులు దీనిని సాగు చేస్తారు. ఇది పొలాల నుంచి చక్కెర మిల్లులకు చేరిన తర్వాత, చక్కెరగా మారుతుంది. కానీ చెరకు నుంచి చక్కెర తయారు చేయడం గురించి చాలా మందికి సందేహాలు ఉన్నాయి. 1 క్వింటాల్, లేదా 100 కిలోగ్రాముల చెరకు నుంచి ఎంత చక్కెర ఉత్పత్తి అవుతుందో అని మీరు కూడా ఆలోచిస్తున్నారా?

అయితే దీనికి నిర్దిష్టమైన సంఖ్య ఏదీ లేదు. ఇది చెరకు నాణ్యత, దాని తీపి, దానిని ఎలా ప్రాసెస్ చేస్తారు వంటి అనేక అంశాలపై ఆధారపడి ఉంటుంది. ఈ అంశాలన్నింటి ఆధారంగా తుది ఉత్పత్తి నిర్ణయమవుతుంది. చెరకు నుంచి చక్కెర తయారు చేయడంలో అనేక దశలు ఉంటాయి. 1 క్వింటా చెరకు నుంచి ఎంత చక్కెర ఉత్పత్తి అవుతుంది. దానిని ఎలా ఉత్పత్తి చేస్తారో ఇప్పుడు వివరిద్దాం.

క్వింటా చెరకు నుంచి ఎంత చక్కెర ఉత్పత్తి అవుతుంది?

1 క్వింటాల్ (100 కిలోల) చెరకు నుంచి ఉత్పత్తి అయ్యే చక్కెర పరిమాణం, చెరకు నాణ్యత, మిల్లు రికవరీపై ఆధారపడి ఉంటుంది. సులభంగా చెప్పాలంటే, మిల్లు రికవరీ 10 శాతం ఉంటే, 100 కిలోల చెరకు నుంచి సుమారుగా 10 కిలోల చక్కెర లభిస్తుంది. అదేవిధంగా, 11 శాతం రికవరీతో సుమారుగా 11 కిలోలు, 12 శాతం రికవరీతో సుమారుగా 12 కిలోల చక్కెర లభిస్తుంది. ఇక్కడ రికవరీ అంటే, మిల్లులో వేసిన మొత్తం చెరకు నుంచి ఉత్పత్తి అయిన చక్కెర పరిమాణం.

అన్ని రకాల చెరకు ఒకే పరిమాణంలో చక్కెరను ఉత్పత్తి చేయదు. చెరకులో సుక్రోజ్ శాతం ఎక్కువగా ఉంటే, చక్కెర దిగుబడి మెరుగ్గా ఉంటుంది. చెరకు తాజాదనం కూడా కీలక పాత్ర పోషిస్తుంది. కోత తర్వాత చెరకు మిల్లుకు చేరడానికి ఎక్కువ సమయం పడితే, చక్కెర దిగుబడి ప్రభావితం కావచ్చు. అందుకే, చెరకు నాణ్యతతోపాటు, మిల్లుకు సకాలంలో చేరవేయడం కూడా చాలా కీలకంగా పరిగణిస్తారు.

చెరకు నుంచి చక్కెర తయారు చేయడంలో మొదటి దశ ఏమిటి?

మిల్లులో చెరకును క్రష్ చేయడంతో చక్కెర ఉత్పత్తి ప్రారంభమవుతుంది. మిల్లుకు చేరాక, చెరకును పెద్ద యంత్రాలలో క్రష్ చేసి , దాని రసాన్ని తీస్తారు. ఈ రసంలో నీరు, సుక్రోజ్ ఇతర మూలకాలు ఉంటాయి. దీని తరువాత శుద్ధి ప్రక్రియ జరుగుతుంది, దీని ద్వారా వేస్ట్‌ను, పీచుపదార్థం ఇతర మలినాలను తొలగిస్తారు.

శుద్ధి చేసిన తర్వాత, చెరకు రసాన్ని వేడి చేస్తారు. ఆ తర్వాత ఆవిరిని ఉపయోగించి అందులో ఉంటే నీటి శాతాన్ని తగ్గిస్తారు. క్రమంగా, రసం చిక్కబడి పాకంలా మారుతుంది. ఈ చిక్కటి రసాన్ని తదుపరి ప్రక్రియకు పంపుతారు, అక్కడ చక్కెర స్ఫటికాలు ఏర్పడతాయి. చెరకును క్రష్ చేయడం నుంచి రసాన్ని చిక్కబరచడం వరకు ప్రతి దశ, తుది చక్కెర వెలికితీతలో కీలక పాత్ర పోషిస్తుంది.

చక్కెర స్ఫటికాలు ఎలా తయారు చేస్తారు?

చెరకు రసం తగినంత చిక్కబడిన తర్వాత, దానిని స్ఫటికీకరణ అనే తదుపరి దశకు పంపుతారు. ఇక్కడ, నిర్దిష్ట ఉష్ణోగ్రతలు, కచ్చితమైన పరిస్థితుల్లో చిన్న చక్కెర స్ఫటికాలు ఏర్పడతాయి. ఆ తర్వాత ఈ స్ఫటికాలను మిగిలిన ద్రవం నుంచి వేరు చేస్తారు. ఈ స్ఫటికాలను మరింత శుద్ధి చేసి, మనం ఇళ్లలో ఉపయోగించే రేణువుల చక్కెరగా తయారు చేస్తారు. చెరకులోని చక్కెర అంతా ఉపయోగించే చక్కెరగా మారదు; ఈ ప్రక్రియలో కొంత చక్కెర వివిధ భాగాలలో మిగిలిపోతుంది.

చక్కెర ఉత్పత్తిలో చక్కెరతోపాటు చాలా పదార్థాలు వస్తాయి. చెరకును క్రష్ చేసిన తర్వాత మిగిలిపోయిన పీచును బగాస్ అంటారు. దీనిని మిల్లులో విద్యుత్తును ఆవిరిని ఉత్పత్తి చేయడానికి ఉపయోగిస్తారు. మొలాసిస్ కూడా ఉత్పత్తి అవుతుంది, దీనిని ఇథనాల్ ఉత్పత్తికి ఉపయోగిస్తారు. చక్కెర మిల్లులలో చెరకును శుద్ధి చేసే ప్రక్రియలో ప్రెస్‌మడ్ కూడా ఒక ఉపయోగకరమైన ఉత్పత్తి.

అందువల్ల, ఒక క్వింటా చెరకు కేవలం చక్కెరను మాత్రమే ఉత్పత్తి చేయదు. ఇది అనేక ఇతర ఉపయోగకరమైన ఉత్పత్తులను కూడా ఇస్తుంది. ఉత్పత్తి అయ్యే చక్కెర పరిమాణం చెరకు నాణ్యత, మిల్లులో జరిగే ప్రాసెసింగ్‌పై ఆధారపడి ఉంటుంది. అందువల్ల, ప్రతి 100 కిలోల చెరకు నుంచి ఉత్పత్తి అయ్యే చక్కెర పరిమాణం మారవచ్చు.

AP CM Chandrababu Speech: ఎల్‌నినో ప్రభావంపై సీఎం చంద్రబాబు కీలక వ్యాఖ్యలు.. అక్కడ మాత్రమే వరి వేయాలని రైతులకు సూచనలు

Shankar Dukanam — Mon, 17 Aug 2026 21:20:16 +0530

అమరావతి: ఈ ఏడాది భారత్‌లో పలు రాష్ట్రాల్లో ఎల్ నినో తీవ్ర ప్రభావం చూపుతోంది. ఆగస్టు నెల సగం పూర్తయినా లోటు వర్షపాతం కారణంగా రైతులు చాలా ఇబ్బందులు ఎదుర్కొంటున్నారు. ఈ అంశంపై ఆంధ్రప్రదేశ్ ముఖ్యమంత్రి చంద్రబాబు అసెంబ్లీలో కీలక వ్యాఖ్యలు చేశారు. రాష్ట్రంలో నెలకొన్న వర్షాభావ పరిస్థితులు, ఎల్ నినో తీవ్ర ప్రభావం, నీటి సంక్షోభంపై మాట్లాడుతూ ఈ ఏడాది 35.5 శాతం లోటు వర్షపాతం ఉంటుందని నిపుణులు అంచనా వేశారని రైతులకు కీలక సూచనలు చేశారు. ఎల్ నినో ప్రభావంతో రాష్ట్రంలోనూ తీవ్ర వర్షాభావ పరిస్థితులు ఏర్పడి నీటి లభ్యత తగ్గిపోతుందని ఆవేదన వ్యక్తం చేశారు. లోటు వర్షపాత పరిస్థితుల కారణంగా రైతులు అన్ని ప్రాంతాల్లో వరి వేసి ఇబ్బంది పడొద్దని సూచించారు.

గోదావరి బేసిన్ మినహా ఇతర ప్రాంతాల్లో వరి వద్దు!
గోదావరి నదికి మాత్రమే కొంత వరద నీరు వస్తోందని తెలిపారు. కనుక గోదావరి బేసిన్ మినహా మిగిలిన ఏ ప్రాంతంలోనూ వరి పంటలు వేస్తే, పంటలు ఎండిపోయి రైతులు ఇబ్బందుల్లో పడే ప్రమాదం ఉందని సీఎం చంద్రబాబు హెచ్చరించారు. ఈ విషయాన్ని రైతులు గ్రహించి నీటిని అత్యంత పొదుపుగా వాడుకోవాలని సూచించారు. ఎల్ నినో ప్రభావంతో లోటు వర్షపాతం నమోదవుతుందని రైతులు అర్థం చేసుకుని, ప్రత్యామ్నాయ పంటలు వేసుకోవడం మంచిదన్నారు. మంత్రులు, ఎమ్మెల్యేలు వారి ప్రాంతాల్లో ప్రకృతి సేద్యాన్ని ప్రోత్సహించాలని సూచించారు.

రాష్ట్రంలో తాగునీటి అవసరాలకు మొదటి ప్రాధాన్యత ఇస్తూనే, పరిశ్రమలకు అవసరమైన నీటి సరఫరాపై ప్రత్యేక దృష్టి పెడతామని సీఎం చంద్రబాబు స్పష్టం చేశారు. నిపుణుల అంచనాల ప్రకారం ఈ ఏడాది దాదాపు 35.5 శాతం మేర లోటు వర్షపాతం నమోదు కానుందని తెలిపారు. ఉత్తరాంధ్ర ప్రాజెక్టులతో పాటు పెన్నా బేసిన్ వ్యాప్తంగా పరిస్థితి ఆందోళనకరంగా ఉందని, కొన్ని జిల్లాల్లో లోటు వర్షపాతం 42 శాతానికి చేరిందన్నారు.

నీటి కొరతతో రాష్ట్రాల మధ్య వివాదాలు

నీటి కొరత వల్ల రాష్ట్రాల మధ్య వివాదాలు, విభేదాలు పెరుగుతున్నాయని ఆందోళన వ్యక్తం చేశారు. గత రెండేళ్లుగా ఏపీ ప్రభుత్వం నీటి నిర్వహణపై ప్రత్యేక శ్రద్ధ వహిస్తోందన్నారు. పొరుగు రాష్ట్రాలైన కర్ణాటక, మహారాష్ట్రలలో కూడా వర్షపాతం తగ్గడంతో అక్కడి రిజర్వాయర్లు నిండిన తర్వాతే మన రాష్ట్రానికి నీరు వస్తుందని తెలిపారు. దీనివల్ల కృష్ణా పరివాహక ప్రాంతంలోని శ్రీశైలం, నాగార్జున సాగర్ ప్రాజెక్టులకు నీటి ప్రవాహం భారీగా తగ్గిందని ఆయన వివరించారు. ఉదాహరణకు శ్రీశైలానికి సాధారణంగా రావాల్సిన 753 టీఎంసీల నీటికి గాను ఈ ఏడాది కేవలం 214 టీఎంసీలు మాత్రమే వచ్చాయని తెలిపారు.

జూన్ నుంచి డిసెంబర్ మధ్య సాధారణంగా పడాల్సిన 867 మిల్లీమీటర్ల వర్షపాతానికి బదులుగా కేవలం 557 మి.మీ మాత్రమే నమోదయ్యే అవకాశం ఉందన్నారు. జులై నుంచి నవంబర్ వరకు 20 శాతం నుండి 68 శాతం వరకు లోటు వర్షపాతం ఉంటుందని, డిసెంబర్‌లో మాత్రమే స్వల్పంగా సాధారణ వర్షపాతం ఉండవచ్చని వివరించారు. ఈ ఏడాది అన్ని జిల్లాల్లో సాధారణం కంటే తక్కువ వర్షపాతం నమోదు కానుందని.. కొన్ని జిల్లాల్లో జులైలో 68 శాతం లోటు వర్షపాతం నమోదు కాగా, ఆగస్టులో 35 శాతం, సెప్టెంబర్ నెలలో 35 శాతం, అక్టోబర్‌లో 25 శాతం, నవంబర్‌‌ నెలలో 20 శాతం మేర లోటు వర్షపాతం నమోదు కానుందని అంచనాలు వివరించారు. నీటి కొరత ముప్పు తీవ్రంగా ఉన్నందున ప్రతి ఒక్కరూ అప్రమత్తంగా ఉండాలని సీఎం చంద్రబాబు హెచ్చరించారు.

Crop Insurance Scheme: రూ. 84 చెల్లించి, నిశ్చింతగా ఉండండి.. ఏపీ రైతులకు ప్రభుత్వం కీలక సూచనలు

Shankar Dukanam — Tue, 4 Aug 2026 17:42:11 +0530

Crop Insurance Scheme | అమరావతి: ఈ ఏడాది ఎల్ నినో (El Nino) కారణంగా భారత్‌లో పలు రాష్ట్రాల్లో లోటు వర్షపాతం నమోదవుతుంది. ప్రతికూల వాతావరణ ప్రభావం కారణంగా వర్షాలు సరిగ్గా కురవక వరి పంటకు నష్టం జరిగే ప్రమాదం ఉందని, అందువల్ల వరి సాగు చేసే రైతులు తప్పనిసరిగా పంట బీమా చేయించుకోవాలని ఏపీ ప్రభుత్వం సూచించింది. ఏపీ అసెంబ్లీ స్పీకర్ చింతకాయల అయ్యన్నపాత్రుడు మాట్లాడుతూ.. ప్రతికూల వాతావరణ పరిస్థితుల వల్ల రైతులు ఆర్థికంగా నష్టపోకుండా రక్షణ కల్పించేందుకే ప్రభుత్వం ఈ బీమా సౌకర్యాన్ని అందుబాటులోకి తెచ్చిందన్నారు. కనుక రాష్ట్రంలోని రైతులు ఆగస్టు 15వ తేదీ లోగా ఎకరానికి కేవలం రూ. 84 చెల్లించి తమ వరి పంటను ఇన్సూరెన్స్ పరిధిలోకి తీసుకురావాలని పిలుపునిచ్చారు.

రైతుల వద్ద ఏ డాక్యుమెంట్లు ఉండాలి..

రైతుల సౌలభ్యం కోసం కామన్ సర్వీస్ సెంటర్లు (CSC), ఆధార్ అప్‌డేట్ సెంటర్లతో పాటు సమీపంలోని గ్రామ సచివాలయాల్లోనూ ఇన్సూరెన్స్ చేసుకునే వెసులుబాటు కల్పించినట్లు ఆయన వెల్లడించారు. పంట బీమా నమోదు కోసం రైతులు తమ 1B పత్రం, బ్యాంక్ పాస్ బుక్ మొదటి పేజీ జిరాక్స్, సెల్ఫ్ డిక్లరేషన్ సర్టిఫికెట్, ఆధార్‌తో లింక్ అయిన మొబైల్ నంబర్‌తో (ఓటీపీ కోసం) గ్రామ సచివాలయాలకు గానీ లేదా సీఎస్సీ సెంటర్లకు గానీ వెళ్లాలని ఆయన వివరించారు.

కౌలు రైతులు ఏ డాక్యుమెంట్స్ సమర్పించాలి..

కౌలు రైతులైతే కౌలు ఒప్పంద పత్రం లేదా గ్రామ సర్పంచ్/ వీఆర్‌వో ధృవీకరణ పత్రాన్ని సమర్పించాల్సి ఉంటుందని అయ్యన్నపాత్రుడు స్పష్టం చేశారు. అలాగే, నాట్లు పూర్తయిన 15 నుండి 30 రోజులలోపు తప్పనిసరిగా 'e-crop'లో తమ వివరాలను నమోదు చేయించుకోవాలన్నారు. అలా నమోదు చేసుకున్న రైతులకు పంట నష్టం వాటిల్లితే ఎకరానికి రూ. 42,400 వరకు బీమా పరిహారం అందుతుందని పేర్కొన్నారు.

Also Read: Amalapuram Latest News: అంబేడ్కర్ కోనసీమ జిల్లాలో రైతులు తిరుగుబాటు- పంట విరామం ప్రకటించిన తాడికోన అన్నదాతలు!

ఈ సందర్భంగా మండల స్థాయి నాయకులు, ప్రజాప్రతినిధులు గ్రామీణ ప్రాంతాల్లోని రైతులకు పంట బీమా (E Crop Insurance)పై పూర్తి అవగాహన కల్పించాలని స్పీకర్ కోరారు. అర్హులైన రైతులందరిచేత ఇన్సూరెన్స్ ప్రీమియం చెల్లించేలా చూసే బాధ్యతను ప్రజాప్రతినిధులు సమర్థవంతంగా చేపట్టాలని సూచించారు. వరి సాగు చేసిన ప్రతీ రైతు ఈ అవకాశాన్ని సద్వినియోగం చేసుకుని, ఆగస్టు 15వ తేదీలోగా ఎకరానికి రూ. 84 చెల్లించి తమ పంటకు ఆర్థిక భద్రత కల్పించుకోవాలని స్పీకర్ అయ్యన్నపాత్రుడు విజ్ఞప్తి చేశారు. ఇతర పంటలు సాగుచేసే రైతులు సైతం ప్రభుత్వ సూచనలు పాటిస్తూ పంటలకు బీమా చేసుకుని నష్టం వాటిల్లిన సమయంలో లబ్ధి పొందాలని సూచించారు.

IMD Weather Update: ఈ రాష్ట్రాలకు వరద ముప్పు- ఐఎమ్‌డి సీరియస్‌ హెచ్చరిక!

Khagesh — Mon, 3 Aug 2026 08:11:39 +0530

IMD Weather Update: దేశంలోని అనేక ప్రాంతాల్లో కురుస్తున్న భారీ వర్షాల కారణంగా వరద ముప్పు ఉందని ఐఎండీ హెచ్చరించింది. ఇప్పటికే అస్సాం , కేరళ, ఛత్తీస్‌గఢ్, గుజరాత్‌లో కురిసిన భారీ వర్షాలు, వరదల కారణంగా అనేక మంది ప్రాణాలు కోల్పోయారు, లోతట్టు ప్రాంతాలు జలమయమయ్యాయి. పెద్ద సంఖ్యలో ప్రజలు నిరాశ్రయులయ్యారు. భారీ వర్షాలు, వరదల కారణంగా అస్సాంలో మృతుల సంఖ్య 82కి పెరగ్గా, కేరళలో ఎనిమిది మరణాలు రికార్డ్ అయ్యాయి.

ఛత్తీస్‌గఢ్‌లో కురిసిన భారీ వర్షాల కారణంగా అబుజ్‌మాడ్ ప్రాంతంలో వరదలు సంభవించాయి. రాష్ట్రంలోని నారాయణ్‌పూర్ జిల్లా అత్యంత తీవ్రంగా ప్రభావితమైంది, అక్కడ 50కి పైగా ఇళ్లు దెబ్బతినగా, ఇద్దరు బాలికలు మరణించారు.

ఛత్తీస్‌గఢ్‌లో పరిస్థితి ఎలా ఉందంటే?

జూలై 28, 29, 30 తేదీల్లో ఆ ప్రాంతంలో సగటు వర్షపాతాన్ని మించి భారీ వర్షాలు కురిశాయని, ఇది క్లౌడ్‌ బరెస్ట్‌లా అనిపించిందని ఛత్తీస్‌గఢ్ మంత్రి కేదార్ కశ్యప్ ఏఎన్ఐ వార్తా సంస్థకు తెలిపారు. అయినప్పటికీ, వరదలు, వర్షాల వల్ల ప్రభావితమైన వారికి సహాయ సామాగ్రి వీలైనంత త్వరగా, సకాలంలో చేరేలా రాష్ట్ర ప్రభుత్వం నిరంతరం కృషి చేస్తోంది.

"రాష్ట్రంలో కురుస్తున్న భారీ వర్షాలు, వరదల కారణంగా పెద్ద సంఖ్యలో ప్రజలు నిరాశ్రయులయ్యారు. స్థానిక మౌలిక సదుపాయాలు దెబ్బతిన్నాయి. ప్రజలకు సహాయక చర్యలు అందించడానికి మా జిల్లా యంత్రాంగం తీవ్రంగా కృషి చేస్తోంది," అని ఆయన అన్నారు.

అస్సాంలో పరిస్థితి ఏంటి ?

ఆగస్టు 1 నాటి అస్సాం రాష్ట్ర విపత్తు నిర్వహణ అథారిటీ (ASDMA) నివేదిక ప్రకారం, రాష్ట్రంలో వరదల కారణంగా మృతుల సంఖ్య 82కి పెరిగింది. శివసాగర్, చరాయిదేవ్‌లలో ఒక్కొక్క మరణం నమోదైంది. ఈ నివేదిక ప్రకారం, అస్సాంలోని ఐదు జిల్లాలైన శివసాగర్, గోలాఘాట్, జోర్హాట్, నాగావ్, చరాయిదేవ్‌లలోని 379 గ్రామాలలో 1,92,000 మందికిపైగా ప్రజలు ప్రత్యక్షంగా ప్రభావితమయ్యారు.

కేరళలోని 209 సహాయక శిబిరాలకు 5,792 మంది తరలింపు

కేరళలో కురుస్తున్న భారీ వర్షాలు, వరదలకు ఎనిమిది మంది మరణించారు. ఎనిమిది మంది గల్లంతయ్యారు. 13 మంది గాయపడ్డారు. ఇరవై ఏడు ఇళ్లు పూర్తిగా ధ్వంసమయ్యాయి. 196 ఇళ్లు పాక్షికంగా దెబ్బతిన్నాయి. రాష్ట్ర ప్రభుత్వం ఏర్పాటు చేసిన 209 సహాయక శిబిరాలకు మొత్తం 5,792 మందిని తరలించారు.

గుజరాత్‌లో వాతావరణ శాఖ రెడ్ అలర్ట్ జారీ

ఆదివారం (ఆగస్టు 2, 2026) గుజరాత్‌లోని రెడ్ అలర్ట్ జారీ చేసింది. ఈ వర్షాలు ఇప్పుడు సౌరాష్ట్ర వైపు మళ్లాయని, దీంతో కొన్ని ప్రాంతాల్లో తీవ్రమైన నీటి ముంపు ప్రమాదం ఉందని అధికారులు తెలిపారు.

గుజరాత్‌తో పాటు, తీరప్రాంత రాష్ట్రమైన ఒడిశా కూడా వరద లాంటి పరిస్థితులను ఎదుర్కొంటోంది. అంతేకాకుండా, పెరుగుతున్న నీటిమట్టాల కారణంగా హిమాచల్ ప్రదేశ్‌కు వాతావరణ శాఖ రెడ్, ఆరెంజ్ అలర్ట్‌లను జారీ చేయగా, అస్సాం, ఉత్తరాఖండ్‌లను హై అలర్ట్‌లో ఉంచారు.

వాతావరణ శాఖ హెచ్చరిక

రాబోయే నాలుగైదు రోజుల్లో ఈశాన్య భారత్‌, మధ్య, తూర్పు హిమాలయ ప్రాంతాల్లో భారీ వర్షాలు కురుస్తాయని, అయితే దక్షిణ భారత్‌లో వర్షపాతం తగ్గే అవకాశం ఉందని వాతావరణ శాఖ తెలిపింది. హిమాచల్‌ప్రదేశ్, జమ్మూకాశ్మీర్, లడఖ్, ఉత్తరాఖండ్‌తో పాటు కేరళ తీర ప్రాంతాలు, కర్ణాటకలో రాబోయే 24 గంటల పాటు భారీ వర్షాలు కురుస్తాయని హెచ్చరిక జారీ చేసింది.

Andhra Pradesh And Telangana Weather Report: ఆంధ్రప్రదేశ్ తెలంగాణలో తేలికపాటి వర్షాలు- వాతావరణ శాఖ లేటెస్ట్ అప్‌డ్టే ఇదే

Khagesh — Mon, 3 Aug 2026 07:38:51 +0530

Andhra Pradesh And Telangana Weather Report: ఆంధ్రప్రదేశ్, తెలంగాణలో తాజా వెదర్‌ అప్‌డేట్‌పై వాతావరణ శాఖాధికారులు కీలక ప్రకటన విడుదల చేశారు. రెండు రాష్ట్రాల్లో తేలికపాటి వానలే పడతాయని తెలిపారు. అది కూడా కొన్ని జిల్లాల్లోనే వర్షాలు పడతాయని చెబుతున్నారు. తెలంగాణలోని కరీంనగర్‌, సిద్దిపేట ములుగు, భూపాలపల్లి, కొత్తగూడెం, పెద్దపల్లి, కొత్తగూడెం, నాగర్‌కర్నూల్‌, ఖమ్మం, ఆదిలాబాద్, నిజామాబాద్‌, జగిత్యాల, కామారెడ్డి, నిర్మల్‌, మెదక్‌, రంగారెడ్డి, వికారాబాద్‌, మేడ్చల్‌, జిల్లాల్లో తేలికపాటి వర్షాలు కురుస్తాయి. ఆంధ్రప్రదేశ్‌లో మన్యం, అల్లూరి, పోలవరం, విశాఖసహా పలు జిల్లాల్లో చెదురుమదురు వానలే పడతాయని అధికారులు స్పష్టం చేశారు. ఈ జిల్లాల్లో ఎల్లో అలర్ట్ జారీ చేశారు. అయితే వర్షాలు తక్కువే పడుతున్నప్పటికీ కూడా పిడుగులు పడతాయని ప్రజలు అప్రమత్తంగా ఉండాలని అధికారులు సూచించారు. మూడు రోజుల పాటు ఇలాంటి వాతావరణం ఉంటుందని పేర్కొన్నారు.

మరో మూడు రోజులు తేలికపాటి వర్షాలే

ఎల్‌నినో ప్రభావంతో ఈసారి వర్షాభావ పరిస్థితులు ఏర్పడ్డాయి. ఈ సీజన్‌లో భారీ వర్షాలు గత వారంలోనే కురిశాయి. అయినా అవి ఎటూ సరిపోవడం లేదని రైతులు ఆందోళన చెందుతున్నారు. ఇప్పుడు పంటలు వేసుకుంటే మళ్లీ వానలు మొహం చాటేస్తే అవి ఎండిపోతాయని దిగాలు చెందుతున్నారు. అందుకే చాలా ప్రాంతాల్లో ఇంకా పంటలు వేసుకోలేదు. ఇప్పుడు మూడు రోజుల పాటు తేలికపాటి వర్షాలు కురుస్తాయన్న అధికారుల ప్రకటన రైతులకు కాస్త ఊరట కల్పిస్తుంది.

వేసవిని తలిపిస్తున్న వాతావరణం

శనివారం వరకు కొన్ని ప్రాంతాల్లో వానలు పడ్డాయి. అయితే ఆదివారం మరోసారి వేసవిని తలపించేలా ఎండలు దంచికొట్టాయి. ఉక్కపోతతో ప్రజలు ఇబ్బంది పడ్డారు. కొన్ని ప్రాంతాల్లో సాయంత్రానికి భారీ వర్షం కురిసింది. అయితే ఎక్కువ సమయం పడలేదు. ముఖ్యంగా హైదరాబాద్‌ లాంటి ప్రాంతాల్లో కుండపోతగా వాన కురిసింది. ఇది కంటిన్యూ అవుతుందని ఆశించిన ప్రజలకు నిరాశే ఎదురైంది.

శాంతించిన గోదావరి నది

మరోవైపు గత వారంలో కురిసిన వర్షాలతో నదుల్లో పెరిగిన వరద ప్రవాహం ఇప్పుడు కాస్త తగ్గింది. ముఖ్యంగా గోదావరిలో భద్రాచలం వద్ద 15 లక్షల క్యూసెక్కుల వరద ప్రవహించగా ఇప్పుడు అది 9లక్షలకు పడిపోయింది. ముంపు బారిన పడిన లంకలు ఇప్పుడు తేరుకున్నాయి. ఎగువ ప్రాంతాల నుంచి వస్తున్న వరద తగ్గుముఖం పట్టడంతో ఉగ్ర గోదావరి శాంతించింది. దీంతో ప్రమాద హెచ్చరికలను అధికారులు ఉపసంహరించుకున్నారు.

శ్రీశైలం ప్రాజెక్టులోకి వరద నీరు

మరోవైపు కృష్ణానదికి వరద ప్రవాహం పెరుగుతోంది. ఆల్మట్టీ, నారాయణపూర్‌ నుంచి జూరాలలోకి భారీగా వరద నీరు వచ్చి చేరుతోంది. జూరాల వద్ద 27 గేట్లు ఎత్తి నీటిని వదులుతుంటే, ఆల్మట్టి నుంచి 30వేల క్యూసెక్కుల నీటిని కిందికి రిలీజ్ చేస్తున్నారు. నారాయణపూర్‌లో 29 గేట్లు ఎత్తి లక్షకుపైగా క్యూసెక్కులను విడుదల చేస్తున్నారు. ఇలా శ్రీశైలంపై ఉన్న ప్రాజెక్టుల్లో నుంచి నీరు విడుదల అవుతుండటంతో ప్రాజెక్టులోకి భారీగా వరద నీరు వస్తోంది. ఫలితంగా ఈ సీజన్‌లో తొలిసారిగా శ్రీశైలం నిండుతోంది.

Crop Insurance: పంటల బీమాకు మరో 3 రోజులే డెడ్‌లైన్.. ఎల్‌నినో ముప్పు ఉన్నా తక్కువగా రైతుల నమోదు

Shankar Dukanam — Tue, 28 Jul 2026 07:35:03 +0530

అమరావతి: ఆంధ్రప్రదేశ్‌లో ఖరీఫ్ పంటల బీమా నమోదు ప్రక్రియలో జోరు కనిపించడం లేదు. పంటల బీమా నమోదు ముగియడానికి మరో 3 రోజులే గడువు (జులై నెలాఖరు వరకు) ఉన్నప్పటికీ, పలు జిల్లాల్లో పరిస్థితి ఏమాత్రం మారలేదు. రాష్ట్రవ్యాప్తంగా కేవలం 15.25 లక్షల ఎకరాలకు మాత్రమే 2 బీమా పథకాల కింద ప్రీమియం చెల్లించారు. కొన్ని జిల్లాలు, మండలాల్లో పంటల బీమా (Pradhan Mantri Fasal Bima Yojana - PMFBY) నమోదు సున్నా(0)గా ఉందని అధికారులు గుర్తించారు.

రాబోయే రోజుల్లో ఎల్‌నినో ప్రభావంతో తక్కువ వర్షపాతం తద్వరా వ్యవసాయ రంగంపై ప్రతికూల ప్రభావం చూపే అవకాశాలు ఉన్నప్పటికీ, వ్యవసాయ అధికారులు, సిబ్బంది రైతులకు అవగాహన కల్పించడంలో విఫలం అవుతున్నారు. ప్రజాప్రతినిధులు సైతం రైతులకు అంతగా సూచనలు చేయడం లేదని వినిపిస్తోంది. వ్యవసాయ శాఖ ప్రత్యేక శిబిరాలు నిర్వహించి రైతులను ప్రోత్సహిస్తే, వారు పంటల బీమా నమోదు చేసుకుంటారు. తద్వారా కరవు ముప్పు వచ్చినా రైతులకు నష్టపరిహారం లభించి ఆసరాగా నిలుస్తుంది.

రాయలసీమ ముందంజ.. తీరప్రాంత జిల్లాల్లో అత్యల్పం
రాష్ట్రంలో నమోదైన మొత్తం 15.25 లక్షల ఎకరాల బీమాలో ఒక్క కర్నూలు, అనంతపురం జిల్లాల వాటానే 60% ఉంది. నంద్యాల, శ్రీసత్యసాయి, వైఎస్సార్ కడప జిల్లాల్లో నమోదు కొంతవరకు మెరుగ్గా ఉన్నప్పటికీ, మిగిలిన జిల్లాల్లో పరిస్థితి దారుణంగా ఉంది. ప్రధానమంత్రి ఫసల్ బీమా (PMFBY) కింద 12 జిల్లాల్లో సగటున వెయ్యి ఎకరాలు కూడా పంటల బీమాకు నమోదు చేసుకోలేదు. సవరించిన వాతావరణ ఆధారిత బీమా (WBCIS) కింద 9 జిల్లాల్లో సగటున 500 ఎకరాల్లో కూడా బీమా చేయకపోవడం ఆందోళన పెంచుతోంది.

తక్కువ ప్రీమియం ఉన్నా ఆసక్తి చూపని రైతులు

ఖరీఫ్‌లో వరి, వేరుశనగ, కంది, పత్తి, మిరప, మినుము, మొక్కజొన్న వంటి పంటలు అధికంగా సాగవుతున్నప్పటికీ ప్రీమియం తక్కువగా ఉన్న చోట్ల కూడా రైతులు బీమా చేయడం లేదు. ఉదాహరణకు ఎకరా మిరపకు కేవలం రూ.360, ఓ జిల్లాలో ఎకరా కందికి రూ.36, కోనసీమ జిల్లాలో ఎకరా వరికి రూ.76 మాత్రం ప్రీమియం చెల్లిస్తే సరిపోతుంది. అయినప్పటికీ అవగాహన లేకపోవడంతో రైతులు పంటలకు బీమా చేయించడం లేదు. వరి ఎక్కువగా సాగయ్యే ఉమ్మడి ఉభయ గోదావరి, కృష్ణా జిల్లాల్లో పంట బీమా నమోదు చాలా తక్కువగా నమోదైంది. ఖరీఫ్ సాధారణ పంటలకు జులై నెలాఖరు వరకు, వరి పంటకు ఆగస్టు 15 వరకు గడువు ఉంది. కనుక ఏపీ ప్రభుత్వం, అధికారులు వెంటనే స్పందించి రైతులకు అవగాహనా కల్పించి, పంటల బీమా వైపు ప్రోత్సహించాల్సిన అవసరం ఎంతైనా ఉంది. అసలే ఈ ఏడాది వ్యవసాయరంగంపై ఎల్‌నినో ప్రభావం అధికంగా ఉండనుందని అధికారులు అంచనా వేశారు.

Andhra Pradesh Rainfall: ఏపీలో 51 శాతం, కృష్ణా డెల్టాలో 49 శాతం లోటు వర్షపాతం.. రైతులకు ఈఎన్సీ కీలక సూచనలు

Shankar Dukanam — Fri, 24 Jul 2026 13:13:52 +0530

AP Farmers Alert | విజయవాడ: ఎల్‌నినో ప్రభావంతో ఈ ఏడాది ఆంధ్రప్రదేశ్ సహా భారత్‌లోని పలు రాష్ట్రాల్లో లోటు వర్షపాతం నమోదవుతోంది. ఈ క్రమంలో ఏపీ ప్రభుత్వం నీటి లభ్యతపై ఫోకస్ చేసింది. వర్షాభావం వల్ల కృష్ణా డెల్టాలో సాగునీటి కొరత ఉందని, తాగునీటికే తొలి ప్రాధాన్యత ఇస్తున్నామని ఈఎన్సీ కే. నరసింహమూర్తి తెలిపారు. ఎల్‌నినో ప్రభావం వల్ల కృష్ణా పరివాహక ప్రాంతంలో వర్షపాతం గణనీయంగా తగ్గిందని, రాష్ట్రంలో 51 శాతం, కృష్ణా డెల్టాలో 49 శాతం వర్షపాత లోటు నమోదైందని తెలిపారు. విజయవాడ ఇరిగేషన్ కాంపౌండ్‌లో ఏర్పాటు చేసిన విలేకరుల సమావేశంలో ఇరిగేషన్ ఈఎన్సీ కే. నరసింహమూర్తి రాష్ట్రంలో కృష్ణా డెల్టా పరిధిలోని నీటి లభ్యతపై కీలక విషయాలు వెల్లడించారు.

ఎగువన ఉన్న ప్రాజెక్టులలో డెడ్ స్టోరేజ్ (కుషన్ నీరు) నింపాల్సి రావడం వల్ల శ్రీశైలానికి వచ్చే ఇన్ఫ్లో తగ్గిపోయిందని తెలిపారు. ప్రస్తుతం గోదావరిలో ప్రవాహాలు తగ్గడం వల్ల పట్టిసీమ పంపింగ్‌పై ప్రభావం పడిందని, అన్ని పంపులను ఒకేసారి నడపడం సాధ్యం కావడం లేదని, సీలేరు నీటి లభ్యత కూడా తగ్గిందని ఈఎన్సీ స్పష్టం చేశారు. ఈ అసాధారణ పరిస్థితుల నేపథ్యంలో కూటమి ప్రభుత్వం తాగునీటికే తొలి ప్రాధాన్యత ఇస్తోందని తెలిపారు.

పులిచింతలలో నీటిని స్టోరేజ్ చేశాం..

ఏలూరు, కృష్ణా, ఎన్టీఆర్, గుంటూరు, బాపట్ల జిల్లాలకు చెందిన సుమారు 60 లక్షల మంది ప్రజల తాగునీటి అవసరాల కోసం పులిచింతలలోని నీటిని భద్రపరిచామని, 2027 జూన్ వరకు తాగునీటి ఎద్దడి రాకుండా నీటి నిర్వహణ ప్రణాళికలు రూపొందించామని తెలిపారు. ప్రస్తుత పరిస్థితుల్లో కృష్ణా డెల్టా పరిధిలో సాగునీటికి తగినంత నీటి లభ్యత లేదని, అధికారులు ఎప్పటికప్పుడు పరిస్థితులను సమీక్షిస్తున్నారని ఈఎన్సీ నరసింహమూర్తి పేర్కొన్నారు.

Also Read: YS Jagan Delhi: జగన్ ఢిల్లీ రాజకీయం - మోదీ, అమిత్ షాలతో సమావేశానికి ప్రయత్నం - రాజకీయంగా మేలేనా !?

సాగునీటి కొరత ఉన్నందున ఆర్‌ఎంసీ (RMC) నుంచి అనధికారికంగా నీటిని తోడవద్దని, మోటార్ల వినియోగాన్ని అరికట్టేందుకు చర్యలు తీసుకుంటున్నామని తెలిపారు. నీటి కొరత వల్ల ఆర్‌ఎంసీ పరిధిలో ప్రస్తుతం వరి సాగు చేయవద్దని, పంట మధ్యలో ఎండిపోయి నష్టపోయే ప్రమాదం ఉందని రైతులను హెచ్చరించారు. వరికి బదులుగా తక్కువ నీరు అవసరమయ్యే ఆరుతడి పంటలను సాగు చేయాలని కీలక సూచనలు చేశారు. తాగునీటి అవసరాలు తీరిన తర్వాతే ఆరుతడి పంటలకు ప్రాధాన్యత ఇస్తామని, భవిష్యత్తులో వర్షాలు పడి నీటి లభ్యత పెరిగితే వ్యవసాయ శాఖతో చర్చించి సాగుపై తదుపరి నిర్ణయం తీసుకుంటామని తెలిపారు. తీవ్రమైన వర్షాభావ పరిస్థితులను దృష్టిలో ఉంచుకుని రైతులు విజ్ఞతతో సహకరించాలని విజ్ఞప్తి చేశారు.